Abril

Arumeyi oororomeleya a Yehova a khalai sahaaphwanya mixankiho yahaalipelela aya. Nrowe niwehe ntakiheryo na Yakobe. Paapa awe aahimuruma orowa omuthanla mwaana mmosa mwaamuthiyana a Labano wiira okhale mwaarawe. Maana yaari amusi ni yaanimukokhorela Yehova. Nave apapawe yaahimuleiherya wiira apaka eyo, Yehova ammureeliha vanceene. (Maph. 28:1-4) Nto Yakobe aahimwiiwelela paapa awe. Okhala wiira aahikhuma oKanaani orowaka owannyawe Labano yoowo aarina anamwane axithiyana anli, Liya ni Rakheli. Yakobe aahisiveliwa vanceene ni mwaana ookiseriwa a Labano, Rakheli. Nto Yakobe aaheemererya onvarela muteko Labano, mwa iyaakha 7 wiira omuthele Rakheli. (Maph. 29:18) Mooriipiha murima, khayiho ti yeeyo yiiraneyale. Maana Labano aahinwoka Yakobe omuthelihaka Liya yoowo aari muulupale awe Rakheli. Labano aahimuleela Yakobe wiira ammuthela Rakheli nuuvira esumana emosa, masi akhala wiira aamunvarela-tho muteko iyaakha 7. (Maph. 29:26, 27) Nave Labano aahooniherya ohixariya okathi amweetta awe nakoso ni Yakobe. Labano aahimuthokorerya Yakobe moohixariya mwa iyaakha 20! — Maph. 31:41, 42. w23.04 15 etti. 5

Okathi muniphavela anyu omaalihiwa ni malakiheryo, ti pani muninvekela anyu? Hiyo ninnisuwela waakhuliwa wa nikoho nno. Nnoowerya omwaattamela Yehova Muluku, nipakaka nivekelo. Nto ti yeeyo Yehova oniphavela awe wiira nipakeke. Ninnisuwela eyo, maana Biibiliya onihimya wiira: “Nvekeleke voohihiyererya”, niire so, ovekela khula okathi. (1aTes. 5:17) Eyo enitaphulela wiira, hiyo pooti olavula ni Yehova khula okathi nimphavela ahu ni onvekela malakiheryo okathi sinnikhumelela aya mixankiho mookumini mwahu. (Mir. 3:5, 6) Tthiri Yehova, Muluku oovaha. Hiyo ninnisuwela eyo maana yena onihimya wiira ninvekeleke ikwaha sootheene nimphavela ahu. Yesu aanisuwela wiira Yehova aanivaha efaita yinceene mavekelo. Maana ohinatthi orwa valaponi, Yesu aahinweha Tiithi awe aakhulaka mavekelo a arumeyi awe oororomeleya. Mwa ntakiheryo, owo aahinweha Yehova aakhulaka mavekelo a Ana, Davidi, Eliya ni arumeyi awe akina. (1Sam. 1:10, 11, 20; 1Mam. 19:4-6; Esal. 32:5) Ti nthowa naya Yesu aawiixuttinhe awe atthareli awe, ovekela moohihiyererya ni okupali wiira Yehova aamwaakhulaka mavekelo aya! — Math. 7:7-11. w23.05 2 itti. 1, 3

Muulupale aanamukuttho Yehoyada, aanimoova vanceene Yehova. Eyo yaahooneya okathi mwaana a Yezabeli, iitthaniwa Ataliya aapacenrye awe olamulela oYuda ohirina ediretu. Nave okathi aari awe pwiyamwene, aahiphavela owiiva axisulu awe wiira ohaakhiwe opwiyamwene! (2Wah. 22:10, 11) Masi musulu awe mmosa, yoowo iitthaniwa Yowasi aahiwerya woopowa maana mwaara awe Yehoyada, Yehoxabathi aahimwiipithiha. Yehoyada vamosa ni mwaarawe yaahimwiipithiha mmiravo ole ni yaahimukhapelela. Mwaha waivaavo, Yehoyada ni Yehoxabathi yaahikhaliherya ni okhapelela nloko na Davidi nenlo naakhuma aya mamwene. Tthiri, Yehoyada aahooniherya ororomeleya wa Yehova ni khoovale opaka etthu yooloka. Ekwaha ekina Yehoyada oonihenrye awe olipa murima wa Yehova, okathi yoole Yowasi aarina awe iyaakha 7. Owo aahimwiiriha Yowasi yoowo aakhuma nloko na Davidi okhala mwene. Vaakhanle wiira Yehoyada khaamukhalinhe mwene, owo aamwiiviwa. Masi okhaliheriwaka ni Yehova itthu sootheene aaphavela awe saahikhumela saana. w23.06 17 itti. 12-13

Nabukodonosori anwerya wuupuwela wiira Daniyeli aari nwanani awe ni anwerya orumiha wiira iiviwe. Masi Daniyeli aahooniherya olipa murima ni aahihimya etthu yaataphulela aya yooloha ele. Woonasa wene exeeni yaamukhalihenrye Daniyeli okhala oolipa murima okumi awe wootheene? Moohaanyiherya okathi aari awe mwaana, amamawe ni apapawe yaahinvaha ntakiheryo nooloka. (Otum. 6:6-9) Daniyeli khahiyo paahi aasuwela itthu vakhaani sa nlamulo, ntoko malamulo 10, masi aanisuwela-tho itthu aisarayeli yeemereriwa aya olya ni yaaheemereriwa aya. (Onam. 11:4-8; Dan. 1:8, 11-13) Nave Daniyeli aahiixutta yoowiiraneya ya arumeyi a Yehova ni aanisuwela etthu yiiraneya vakhala wiira khiyaatthara malamulo awe. (Dan. 9:10, 11) Daniyeli saahimukhumelela itthu sinceene. Itthu iyo saahimwiixuttiha wiira moohicikha etthu enikhumelela, Yehova ni malaikha awe oowerya anoomukhaliherya. — Dan. 2:19-24; 10:12, 18, 19. w23.08 3 itti. 5-6

Rebeka aari muthiyana ankhili ni oolipa murima, nave aanisuwela okathi ni moota woopaka itthu. (Maph. 24:58; 27:5-17) Hata vari siiso, khula okathi aari oottittimiheya ni oowiiwelela. (Maph. 24:17, 18, 65) Vakhala wiira munoomutakihaka Rebeka okhala oowiiyeviha, nwiiwelelaka ale Yehova aavanhe awe okhulupale, munimwaahakalaliha amusi anyu vamosa ni muloko. Wiisuumaaliha, mukhalelo makristau anireerela aya okhalana. Esteeri ari muthiyana ni murumeyi oororomeleya a Yehova. Mwaha woowiisuumaaliha, eyo yaahimukhaliherya ohikhala oowiixinnuwiha okathi aakhalihiwe awe pwiyamwene. Owo aahiiwelela malakiheryo aavahiwe awe ni maanu awe, Mardokeyo, ni aahivarihela muteko. (Est. 2:10, 20, 22) Nave nyuwo munoowerya otakiha wiisuumaaliha wa Esteeri, mwaakohaka atthu akina miruku ni weettela. (Tito 2:3-5) Esteeri, aahooniherya wiisuumaaliha mwa enamuna ekina. Owo aari “òrerexa, vokuxa mirima s’atthu othene yamona”, hata vari siiso, owo khaittottopa. — Est. 2:7, 15. w23.12 19-20 itti. 6-8

Wiivahaka nthowa muritti ninreerela ahu orula. Nave ninrowa osuwela sai akhala wiira ninniivaha nthowa? Akhala wiira nnoohimya soottheka sahu, wiittaruxa ni wiimananiha opaka ele ninwerya ahu wiira nihitthikele, nave nikupali wiira Yehova oonilevelela. (Mit. 3:19) Yehova oniphavela wiira nihitthikele wiivaha nthowa akhala wiira nnoopaka itthu iya sootheene. Owo onnisuwela wiira wiivaha nthowa moota owo pooti oniriipihaka murima. (Esal. 31:10) Akhala wiira nnootepaka oriipiwa murima, eyo pooti oniiriha ohiya otthimaka. (2aKor. 2:7) Akhala wiira nlelo munnitepa wiivaha nthowa, muupuweleleke ‘olevelela’ weekeekhai wa Yehova. (Esal. 130:4) Yehova onnaaleiherya ale aniittharuxa moomalela ohimyaka so: “Nkinrowa-tho wupuwela itampi saya”. (Yer. 31:34) Eyo entaphulela wiira Yehova khonrowa woophukelani mwaha wa soottheka sanyu sa khalai. Nto muhiivaheke nthowa akhala wiira soottheka sanyu sa khalai soowiirihani oyeleela iparakha sanyu mmulokoni. Yehova khonuupuwelela soottheka sanyu sa khalai, nave nyuwo khivanireerela wuupuwelelaka. w23.08 30-31 itti. 14-15

Okathi wa Koronaviiru, Anamoona a Yehova yaanitthara malakiheryo yaavahiwa ni mutthenkeso ahu, nave yaanaakhaliherya ale yiiwa itthu iyo soowoothiwa. (Math. 24:45) Nihaana othanlelaka “itthu sootepa oreerela”. (aFil. 1:9, 10) Ikwaha sikina itthu sooxeleliha pooti oniiyeryaka ikuru sahu ni okathi naakhanle ahu oorumeelaka wiira nivare itthu sootepa oreerela. Itthu iyo sinihela muhina eyoolya, yoowurya, matthekulelo ni muteko, vakhala wiira nnoovaha efaita yinceene mookumini mwahu. (Luka 21:34, 35) Ohiya-vo, khula nihiku ninniiwa aahiiso ninniweha ikereve ni itthu soohiloka sinilaleiwa ni ahooleli a ipoliitika. Nto nihaana ovahaka ephoole yinceene wiira itthu iyo sihinixelelihe. Naahiire siiso, hiyo pooti opaceryaka waakhaliherya atthu akina, masi nnaanyokha akina. Satana onnirumeela itthu soovirikana wiira onihiihe omuroromela Yehova. w23.07 16-17 itti. 12-13

Arumeyi a Yehova, annoona nihiku na Wuupuwelela okhwa wa Kristu, okhala na faita yuulupale vamwaakhani. Okhala wiira niira nimosa, Yesu aarumme awe awiixutti awe wiira yaahaana wuupuwelelaka khula mwaakha. (Luka 22:19, 20) Nave onninuupuxerya moota nikhanle ahu owooniherya oxukhurela wahu mukuttho wa Yesu. (2aKor. 5:14, 15) Ohiya-vo, muthukumano wa Wuupuwelela onninivaha eparakha ya ‘olipihana’ mukina ni mukhwaawe. (aRom. 1:12) Mwaha wa niphento anooniheriwa aya okathi wa wuupuwelela, akina annithanla otthikela omurumeela Yehova. Nave atthu akina annithanla omusoma Biibiliya mwaha wa itthu yiiwale aya ni yoonale aya okathi wa muthukumano owo. Nihiku na Wuupuwelela, ninnaakhaliherya anna ni arokora a olumwenku wootheene, okhala oowiiraana. Moohaanyiherya, nihiku nno nookhalana efaita yuulupale wa hiyo! w24.01 8 itti. 1-3

Wiira niiwexexe moota animphenta aya khula mmosa a hiyo, nihaana wuupuwelela eperesu Yehova ni Yesu alinve aya wiira noopoliwe. (aKal. 2:20) Yehova khovanhe yoowoopola mwaha wookhala naxariya paahi. Owo ohooniherya oniphenta wawe onivahaka etthu ya faita wa yena, Yesu. Yehova oheemererya wiira mwanawe ohaawe ni iiviwe mwaha wa mureerelo ahu. Yehova onninooniherya oniphenta wawe. (Yer. 31:3) Yehova oonithanla okhala wiira onniniphenta. (Munwehe-tho Otumererya 7:7, 8.) Khiivo etthu nnakhala mutthu onrowa onivalaanya ni ophenta iwo. (aRom. 8:38, 39) Nyuwo munoonela sai ophenta wa Yehova? w24.01 28 itti. 10-11

Makristau ootheene oothanliwa annihakalala ni nlipelelo na orowa okhalaka wiirimu. Mmosa wa anna awo oothanliwa, Frederick Franz. Olavulaka sa moonelo awe, ohimmye so: “Nlipelelo nahu ti neekeekhai ni nnimwiiraneya, nto ootheene ahu 144.000 nnimwaakhela yooleiherya ela ya Muluku”. Mwaakha wa 1991 munna Franz aahimmye so: “Ninnivaha efaita yinceene nlipelelo nahu. . . . Ninnixukhurela vanceene nlipelelaka wiiraneya yooleiherya eyo. Etthu ya faita olipelela. . . . Miyo kinnihakalala vanceene ni nlipelelo nno”. Moohicikha akhala wiira nrina nlipelelo na waakhela okumi woohimala valaponi aahiiso wiirimu, ootheene ahu nookhalana mathowa ooloka anniiriha ohakalala. Nave nnoowerya olipiha nlipelelo nahu nno. w23.12 9 etti. 6; 10 etti. 8

Ohoolo wa etabernaakulu, yaahikhala altaari a ekoopiri memmo Yehova aavahiwa awe mikuttho ni inama. (Okhu. 27:1, 2; 40:29) Masi mikuttho iyo, khisaawerya ottipiha moomalela itampi sa atthu. (aHep. 10:1-3) Khula okathi saanivahiwa mikuttho iyo ni inama mutabernaakulu sitaphulelaka wiira muhoolo aamukhala namukuttho mmosa aarowa wiiriha oleveleliwa itampi sootheene sa apinaatamu. Yesu aanisuwela wiira aarummwe ni Yehova orwa valaponi, wiira ovahe okumi awe ntoko mukuttho woowoopola wa itampi sa apinaatamu ootheene. (Math. 20:28) Okathi aapatisiwa awe, Yesu aahiivahererya opaka ele Yehova aaphavela awe. (Yoh. 6:38; aKal. 1:4) Yesu aahivaha okumi awe “ekwaha emosa paahi” wiira ootheene ale animwaamini eleveleliwe itampi saya. — aHep. 10:5-7, 10. w23.10 26-27 itti. 10-11

Khiivo etthu naakhanle ahu oopaka, yaarowa onoopola etampi ni okhwa. (Esal. 49:7, 8) Yehova oopaka mareheryo omweemereryaka Yesu ovaha okumi awe wiira onoopole. Yehova ni Yesu ahiimananiha vanceene wiira avahe mukuttho owo. Vaavo nnuupuwelela ahu etthu Yehova ni Yesu anipakenle aya, oxukhuru wahu onrowa otepaka wuncerereya. Nuumala Adamu omutthekela Muluku, yena ni osuulu awe, yaahipweteiwa eparakha yaarina aya ya okhala mahiku ootheene. Wiira oliverye etthu Adamu yaapweteiwale aya, Yesu aahivaha okumi awe woohittheka ntoko mukuttho woowoopola. Okathi wa muteko awe woolaleerya valaponi, Yesu “khonapake etampi, nave khonaphwanyaniwe wootha mwaano mwawe”. (1Ped. 2:22) Yesu okhwiiye ohirina etampi ntoko Adamu yaari aya ahinatthi ottheka. Orumeelaka okumi awe ntoko mukuttho woowoopola, Yesu ooliverya okumi Adamu apweteiwale aya. — 1aKor. 15:45; 1Tim. 2:6. w24.01 10 itti. 5-6

Nuumala Yesu ohihimuxiwa, owo ookela opuro woowaaryexa wa etemplo ya wiirimu. Okokhorela weekeekhai, onivarihana ni mukuttho woowoopola wa Yesu ovahiwe ni Yehova ni muritti orina awe ntoko namukuttho muulupale. Moota makristau anikokhorela aya olelo-va, ti woolokexa ovikana moota aisarayeli yaakokhorela aya khalai. Namukuttho muulupale a wIsarayeli, aanikela mutabernaakulu yaatekiwe ni apinaatamu wiira avahe mukuttho okunxe ene ephome ya axinama. Masi Yesu, “ookela wiirimu” opuro yoowo wootepa waaryexa ohoolo wa Yehova. Nuumala ovaha okumi awe woohittheka wa mureerelo ahu, Yesu aahikhalana ehakhi ya ‘omaliha etampi orumeelaka mukuttho awe’. (aHep. 9:24-26) Ntoko ninrowa ahu oweha, hata nrina ene nlipelelo na orowa wiirimu aahiiso okhala valaponi, ootheene ahu nihaana omukokhorela Yehova mutemplo mwawe ya omunepani. w23.10 28 itti. 13-14

Nkuupuwelani etthu Yesu onipaka awe ori ene wiirimu, ntoko mwene ahu ni Namukuttho Muulupale onisuwela khula etthu ennixankiha. Mwaha wa Muluku onireerela murima vaalupale “nnoowerya omwaattamela nihoovaka etthu” ni onvekela wiira onilevelela itampi sahu ni ‘onikhaliherya okathi wooreerela’. (aHep. 4:14, 15) Muhihiye niviraka nihiku ntero muhisomme ni wuupuwelela ele Yesu opanke awe ni onipaka awe. Tthiri ophenta wa Kristu tonnitumererya, nave ohaana oniiriha oluttuweliwa ovara miteko sa Muluku. (2aKor. 5:14, 15) Enamuna emosa nikhanle ahu oowooniherya oxukhurela wahu, ori waakhaliherya atthu akina wiira akhale Anamoona a Yehova ni okhala awiixutti a Yesu. (Math. 28:19, 20) Ti yeeyo aapanka awe murummwa Paulo ooniheryaka omphenta wawe Yehova ni Yesu. Owo aanisuwela wiira Yehova oniphavela wiira “atthu a makhalelo otheene yoopowe, ni akhalane osuwela weekeekhai”. — 1Tim. 2:3, 4. w23.10 22-23 itti. 13-14

Anamunceene a hiyo, ninnirumeela yoolepa ela ya mbiibiliyani, wiira naamaalihe atthu akina ni owooniherya moota elapo enrowa aya okhala eparayiisu muhoolo. Ninrowa waakhaliherya sai atthu akina okupali wiira sooleiherya siri Wiisuupulula 21:3, 4 sinimwiiraneya? Nave hiyo ninrowa olipiha sai omuroromela wahu Yehova ni sooleiherya sawe? Ohiya paahi yooleiherya ela, Yehova oonivaha itthu sinceene sinnikupaliha wiira onoomaliha sooleiherya sawe. Wiisuupulula 21:5, 6, ninniphwanya itthu sinnikupaliha wiira Yehova onoomaleliha sooleiherya sawe voohimya sa eparayiisu. Ninsoma so: “Ole aakilanthi veehiceni aahihimya wira: ‘Moone! Miyo kinnipaka itthu sotheene isya’. Aahihimya-tho wira: ‘Mulepe, okhala wira moolumo ala toororomeleya ni teekeekhai’. . . . ‘Ala ahiiraneya! Miyo ka Oopacerya ni Ookiserya’”. w23.11 3 itti. 3-5

Mmiravo onnooniherya wiira onnuupuwela vookhalela okathi onipaka awe soothanla sa moota woowara ni wiitthokiha. Okhala wene, atthu yaale ahinittittimiha malamulo a Yehova aniwara attharaka ikuwo siri namoota. Muupuwelo woohiloka wa atthu awo, onniwiiriha ophavela owara ikuwo sootita ni sihinaasuwanyeiha akhala wiira alopwana aahiiso athiyana. Munna ori mmiravo oniphavela olipiha waamini wawe, ohaana otthara malakiheryo a mbiibiliyani okathi onithanla awe ikuwo soowara ni ovaha ntakiheryo nooloka mmulokoni. Owo pooti wiikoha so: ‘Kiireke soothanla saka kinnooniherya wiira kookhalana moonelo wooloka ni kinnaathokorerya atthu akina? Kiireke moota kiniwaraka ni wiitthokiha, enniwiiriha atthu akina wuupuwela wiira ka namoona a Yehova?’. (1aKor. 10:31-33) Munna ori mmiravo onuupuwela saana myaha iya, onimooniherya nttittimiho ohiya paahi ni anna ni arokora a mmulokoni, masi-tho ni Tiithi awe a wiirimu, Yehova. w23.12 26 etti. 7

Khalai, mwene a osuuli aanaalupattha arumeyi a Yehova. (Dan. 11:40) Mwa ntakiheryo, okhuma mwaakha 1900 mpakha mwaakha wa 1950, anna anceene yaahitthukweliwa mwaha woohiirela mpantta itthu sa mulaponi, nave anaaya yaahoomoliwa oskola mwaha wa etthu emosa-ru. Masi mahiku ala, waamini wa arumeyi a Yehova yaawo anilamuleliwa ni mwene a osuuli onneehereriwa mwa enamuna ekina. Mwa ntakiheryo, okathi wa mwaathanle mukristau pooti weehereriwa okhaliherya epartiitu emosa aahiiso muhooleli a epartiitu. Owo khahiyo onrowa ovotari, masi vamurimani vawe pooti wuupuwelaka wiira fataari epartiitu ekina ovikana ekina. Naaphavelaka ohiirela mpantta moomalela itthu sa olumwenku, nihaana okhalana ephoole ni itthu nnuupuwela ahu! — Yoh. 15:18, 19. w23.08 12 etti. 17

Okhala wiira munootthimaka, muhaana opaka eyo “wira nwerye waakhela etthuvo”. (1aKor. 9:24) Yesu aahimmye wiira naamuxankaka ni “olya vanceene ni owurya vanceene ni oxankela itthu siniphavela ahu”. (Luka 21:34) Yoolepa ela ni sikina, sinimookhaliheryani oweha marukunuxo munireerela anyu opaka wiira muhihiye otthimaka ni mwaakhele okumi woohimala. Nikupaliki wiira nnoowerya otthimaka mpakha oxintta, okhala wiira Yehova onoonivaha ikuru nimpirisari ahu. (Yes. 40:29-31) Nto muhikhulumuwe! Mmutakiheke murummwa Paulo, yoowo aapanke sootheene aawerya awe wiira aakhele etthuvo. (aFil. 3:13, 14) Musuweleke wiira khuuvo onrowa otthimaka ekontha anyu, masi mukhaliheriwaka ni Yehova munoowerya. Yehova onimookhaliheryani oteexa miritti munireerela anyu okuxa ni ohiya iye sikhanle oowookumiheryani mixankiho. Tthiri, mukhaliheriwaka ni Yehova munoowerya otthimaka mpakha wanikisa ni waakhela etthuvo! w23.08 31 itti. 16-17

Okathi Yesu aarina awe iyaakha 12, aari ni anamuyari awe oYerusalemu, masi okathi yaatthikela aya owaani, awo khiyaasuwenle wiira Yesu oohala. (Luka 2:46-52) Yosefe ni Maria yaahimuhaavya yena, nto okathi yamphwannye aya Maria aahinvaha nthowa Yesu mwaha woowi khaahimmye etthu. Woonasa wene, Yesu anwerya wuupuwela wiira aathokoreriwe moohixariya. Okhala wiira ole waari muritti wa anamuyari, waaweha-weha anamwane ootheene ahinatthi okhuma, akhala wiira yaari vamosa arowaka owaani. Ohiya-vo, Yesu aahiwaakhula mwa enamuna yooloka ni mwa nttittimiho. Masi Yosefe ni Maria “khiyaasuwenle oratteene etthu aahimmye awe”. Hata vari siiso, Yesu khaahiyale ‘owiiwelela’ anamuyari awe. Ankhi nyuwo, niireke vannoovilani owiiwelela anamuyari anyu okathi anifalyari aya aahiiso ahiniiwexexa aya etthu munihimya anyu? Exeeni enrowa wookhaliheryani owiiwelela? Muupuweleke moota Yehova onoonela awe. Biibiliya onihimya wiira mwaawiiwelelaka anamuyari anyu, “eyo ennaasivela Apwiya”. (aKol. 3:20) Yehova onnisuwela wiira ikwaha sikina, anamuyari anyu pooti ohiiwexexaka saana etthu munihimya anyu, aahiiso awo pooti okumiheryaka malamulo anikhala ntoko khanivareleya muteko. Hata vari siiso, okathi muniwiiwelela anyu, munnimuhakalaliha Yehova. w23.10 7 itti. 5-6

Mpatthani ahu oskola pooti ohimyaka wiira Anamoona a Yehova, aahaana olokiherya moota anuupuwela aya voohimya sa orupihana alopwana-ru aahiiso athiyana-ru. Woonasa wene vanooloka omutthokiherya wiira hiyo ninnisuwela wiira khula mutthu ookhalana etireitu yoopaka soothanla. (1Ped. 2:17) Omuleela mutthu owo ele Biibiliya enihimya awe ni moota woweettela, enoonikhaliherya okhalana okumi woohakalaliha. Okathi ninvaanela ahu ni mutthu onilavula moonelo awe moolipiherya, nihuupuweleke wiira ninnisuwela etthu enimwiiriha mutthu owo olavula siiso. Mwa ntakiheryo, mwaarowa opaka exeeni akhala wiira mpatthani anyu a oskola onihimya wiira khonikupali akhala wiira Muluku ookhala? Niireke moowakuveya mwaarowa wuupuwela wiira owo onikupali wiira itthu siroothatuwa ni onnisuwela saana itthu sootheene sa mwaha owo? Woonasa wene, owo pooti olavulaka etthu aatonko awe wiiwa ni ohitonko awe wuupuwela saana sa mwaha owo. Woonasa wene nyuwo pooti omooniherya myaha sinlavula sa soopattuxiwa siri esaite ahu jw.org. Nto nihiku nikina nyuwo pooti ovaanela voohimya sa mwaha aahiiso eviidiyu ophwannya awe. Okathi nnaattittimiha ahu atthu mwa enamuna ela, vanimwaakhweela awo ophavelasa wiixutta ele Biibiliya onihimya awe. w23.09 17 itti. 12-13

Nikupaliki wiira Yehova pooti onirumeela ni onitthuvela hata nitthekaka, vakhala wiira khula okathi nnimwiimananiha olokiherya soottheka sahu ni ohihiya omuroromela yena. (Mir. 28:13) Sansoni aari mutthu aayariwe orina ene etampi, hata vari siiso khaahiyale wiimananiha omurumeela Yehova, hata nuumala oopaka etthu yoohiloka ni Dalila. Nave Yehova khaamunyanyanle. Yehova aahitthikela omurumeela Sansoni mwa enamuna yootikiniha. Nlelo Yehova onnimoona Sansoni ntoko mulopwana orina waamini wuulupale. Nsina na Sansoni niri elista ya atthu yoonihenrye waamini aari aHeeperi ekapiitulu 11. Ti voohakalaliha osuwela wiira nimmurumeela Tiithi oophenta oniphavela onilipiha, vanceenexa okathi ninkhulumuwa ahu! Tivonto, ntoko Sansoni, nrowe nimuxonttele Yehova niiraka so: “Xontte, Apwiya Muluku! Mukùpuwele: mukitthikiherye nlelo ikuru saka”. — Aph. 16:28. w23.09 7 itti. 18-19

Hiyo noosuwela wiira nihiku na Yehova niri vakhiviru. Nihaana wiimananiha opaka ele eniwerya ahu, wiira naalaleerye ihapari sooreera atthu akina. Masi ikwaha sikina, hiyo pooti ohiweryaka wooniherya olipa murima. Mwaha wa xeeni? Mwaha woowi hiyo pooti owoovaka atthu ntoko Pedru. Ohiyu Yesu aaphukeliwe awe, Pedru aahikhootta waakhulela wiira ari mutthareli a Yesu. Nave ikwaha sinceene aahihimya wiira khaamusuwela! (Math. 26:69-75) Nuuvira okathi, Pedru aahixintta woova wawe. Owo aahimmye so: “Muhooveke etthu anoova aya, nnakhala oxanka”. (1Ped. 3:14) Moolumo a Pedru anninikupaliha wiira nnoowerya oxintta owoova atthu. Exeeni enrowa onikhaliherya oxintta owoova atthu? Pedru onihimya so: “Vamurimani vanyu, mmuttittimiheke Kristu, ntoko Pwiya anyu”. (1Ped. 3:15) Eyo enihela muhina wuupuwelela okhulupale ni owerya orina awe Pwiya ahu mwene, Yesu Kristu. w23.09 27-28 itti. 6-8

Wiira nihihiye okhala ntoko muthuko, nihaana ‘ohiya ovara miteko sa epiphi, seiyo sihinikumiherya etthu’. (aEef. 5:11) Vannikhweya mutthu opaka etampi, akhala wiira onnithipelela oweha, owiriyana aahiiso olavula itthu soohiloka. (Maph. 3:6; Yak. 1:14, 15) Olumwenku ola wa Satana, onninoototha onikupalihaka wiira ele Yehova onoona awe okhala yoohiloka khahiyo ti yootthekeya. (2Ped. 2:19) Muraakho mmosa Diabo onirumeela awe okhuma khalai, ori waakanyerya muupuwelo wa atthu, wiira ahiweryeke osuwela etthu yooloka ni yoohiloka. (Yes. 5:20; 2 aKor. 4:4) Vannooneya wiira iviidiyu sinceene, iprokrama sa TV, ni isaite sikina, sinnikumiherya itthu sinnivirikanya malakiheryo axariya a Yehova! Satana onniimananiha oniiriha wuupuwelaka wiira itthu soohiloka ni soohiirya sinipakiwa, ohiya paahi okhala sooheemerereya masi sinninikhaliherya okhala oohakalala ni okhala moovareleleya. — aEef. 5:6. w24.03 22 itti. 8-10

Etabernaakulu yaari ntoko etenta nave aisarayeli yaaniwerya othaamiha okathi yaakhuma aya ethaamelaka mapuro makina. Etabernaakulu woonasa wene yaahirumeeliwa iyaakha 500, mpakha okathi yaatekiwe aya etemplo, oYerusalemu. (Okhu. 25:8, 9; Mmr. 9:22) Etabernaakulu yaari opuro aisarayeli yaavaha aya mikuttho. (Okhu. 29:43-46) Nave, yaataphulela etthu ya faita Yehova arowa awe waavaha muhoolo. Nave ‘yooniherya itthu sa wiirimu paahi’ nave yaataphulela etemplo yuulupale ya Yehova ya omunepani. Murummwa Paulo aahimmye wiira “eheema ela, [aakiiso etabernaakulu] nlikanyiho na itthu siniiraneya okathi ola”. (aHep. 9:9) Okathi Paulo aalepenle awe makristau a aheeberi, etemplo ya omunepani yaari etthu yeekeekhai wa makristau ale. Ele yaapacenrye okhala mwaakha wa 29 Nuumala Kristu Orwa. Mwaakha yoole, Yesu opatisiwa awe, aahipacerya omurumeela Yehova ntoko “namukuttho muulupale” a etemplo ya omunepani. — aHep. 4:14; Mit. 10:37, 38. w23.10 25-26 itti. 6-7

Wiira nimurumeele Yehova moohakalala nihaana waakuvaka ovenya okathi sinniphwanya aya mixankiho. Exeeni enrowa onikhaliherya opaka eyo? Nihaana ovilelaka okathi sinniphwanya aya mixankiho ni ottittimihaka miyoonelo sa atthu akina. Okhala wiira na arumeyi a Yehova, nihaana ohithipelelaka moonelo ahu. Nave nihaana okhala oowiiyeviha ni ooreera murima. Yehova onniitthaniwa okhala “Mwala” okhala wiira toolipa ni khonittikinyeya. (Otum. 32:4 NWT.) Masi hata vari siiso, owo khonithipelela moonelo awe. Makhalelo a mulaponi anniturukeya moowakuveya, masi eyo khenimuxankiha Yehova, okhala wiira onoopaka itthu sootheene oleihenrye awe. Yehova ohaapattuxa apinaatamu iilikanyihaka mmansawe, nto ti nthowa naya awo anwerya aya otakiha mikhalelo sawe ntoko waakuva wiilimaleliha makhalelo masya. Mbiibiliyani ninniphwanya malakiheryo yaawo annikhaliherya opaka soothanla sooloka hata siniphwanyaka mixankiho. Tthiri malakiheryo ootheene ari mbiibiliyani, anninikhaliherya woona wiira nnaamwi Yehova ori ene “Mwala”, owo khahiyo mutthu oothipelela. w23.07 20 itti. 1-3

Mbiibiliyani, Yehova onnilikanyihiwa ni maama onimmaaliha mwanawe. (Yes. 66:12, 13) Mwa ntakiheryo, nkamuupuweleni maama onimukhapelela saana mwanawe, owo onniimananiha vanceene wiira omukhapelele. Nto okathi sinniphwanya aya mixankiho, nihaana ororomela ophenta wa Yehova. Hata nivonyaka, yena khonrowa oninyanyala. (Esal. 103:8) Aisarayeli yaanimutthekela Yehova ikwaha sinceene, hata vari siiso, mwaha wa niphento nawe nuulupale owo aanaalevelela. Owo aahimmye so: “Nyuwo ti moophaveleyaxa ohoolo waka, miyo kinnottittimihani ni kinnoophentani vanci-ene”. (Yes. 43:4, 5, Piipiliya Emakhuwa.) Yehova khoturukeyale. Hata nipanke ene itampi suulupale, okathi ninttharuwa ahu ni nnatthikela waataana ni yena, nnimoonaka wiira onniniphenta. Owo onnileiherya wiira, ‘ononlevelela’. (Yes. 55:7) Biibiliya onihimya wiira Yehova ‘onimoolevelelani itampi sanyu ni onimooruuhelani mahiku a murettele’. — Mit. 3:19. w24.01 27 itti. 4-5

Yehova pooti onikhaliherya okathi sinniphwanya aya mixankiho. Mwa ntakiheryo, okathi nninvekela ahu ifeeriya patarau ahu, wiira nanwehe konkresu aahiiso nninvekela ahu wiira oturuke iwoora ninvara ahu muteko, wiira niweryeke orowela mithukumano. Okathi owo, ninniweha moota Yehova onnikhaliherya awe, aakhulaka mavekelo ahu ntoko naaphavela ahu. Nto omuroromela wahu Yehova onnitepa olipa. Eezira aari oowiiyeviha ni aaninvekela Yehova wiira omukhaliherye. Khula okathi aaxanka awe mwaha wa muteko anvarela awe Yehova, moowiiyeviha aanivekela okhaliheriwa ni yena. (Eezi. 8:21-23; 9:3-5) Aisarayeli akina, nuumala woona moota Eezira aamuroromela awe Yehova, yaahipacerya omukhaliherya ni otakiha waamini wawe. (Eezi. 10:1-4) Okathi ninxanka ahu mwaha wa itthu sinnithowa aahiiso moota wookhapelela emusi ahu, nihaana onvekela Yehova wiira onikhaliherye. w23.11 18 itti. 15-17

Yehova khoniphavela ohimya wiira nihaana opaka itthu siisaale aapaka awe Abrahamu wiira nithokoreriwe okhala anaxariya. Ohimya ekeekhai, sookhala inamuna soovirikana nikhanle ahu oowooniherya waamini ni miteko sahu. Mwa ntakiheryo, nihaana owaakhela oratteene ale anampacerya orweela mithukumano, waakhaliherya anna ni arokora sinaaphwanya mixankiho ni waapakela itthu sooloka amusi ahu. Tthiri, iya siri miteko Yehova oneemererya awe ni onireeliha awe. (aRom. 15:7; 1Tim. 5:4, 8; 1Yoh. 3:18) Nave enamuna ekina nikhanle ahu oowooniherya waamini, ori olaleya ihapari sooreera mooluttuweliwa. (1Tim. 4:16) Ootheene ahu, nnoowerya wooniherya waamini ni miteko sahu, wiira sooleiherya sa Yehova ti sa ekeekhai ni itthu sootheene onipaka awe ti sooloka. Napaka itthu iya sootheene, nikupaliki wiira Muluku onoonithokorerya okhala anaxariya ni nnookhala apatthani awe. w23.12 2 etti. 3; 6 etti. 15

Ohalaka okhwa mwene Davidi aahinvaha miruku mwanawe, Salomoni, miruku sa yoolepa ya olelo. (1Mam. 2:1, 3) Miruku iyo, sinnivareleya muteko wa anna ootheene ari amiravo, aniphavela olipiha waamini waya. Wiira vaweryaneye, khula etthu anipaka aya, awo aahaana wiiwelela malamulo a Muluku ni weettela malakiheryo a mbiibiliyani. (Luka 2:52) Xeeni vari aya va faita anna ari amiravo okhalana waamini woolipa? Mmiravo mukristau, ookhalana miritti sinceene mweemusini hata mmulokoni. Vakhala wiira mwa mmiravo, pooti wiira munnuupuwelela miritti munrowa anyu okhalana muhoolo. Nave woonasa wene, mookhalana yoolukama ya ovara muteko wa Muluku wa okathi wootheene, orumeela ntoko murumeyi ookhaliherya ni muhoolo mwaya, okhala mutokweene a mmulokoni. Nave waanyiheryasa munniphavela othela ni waayara anamwane. (aEef. 6:4; 1Tim. 3:1) Wiira mmalelihe soolukama iyo, muhaana okhala mukristau orina waamini woolipa. w23.12 24 itti. 1-2

Yehova ohaathanla axitokweene wiira akhapeleleke ipwittipwitthi sawe, seiyo sirina efaita vanceene. Alopwana awo oowiivahererya, annivaha efaita yinceene muteko owo avahiwa aya. Ti maana aya awo aniimananiha aya “olyihaka” ipwittipwitthi sa Muluku. (Yer. 23:4; 1Ped. 5:2) Nto hiyo ninnihakalala vanceene mwaha wookhalana axitokweene awo annihoolela mmulokoni! Mukhulupale Gideyoni oovaha ntakiheryo nooloka axitokweene anireerela aya otthara. (aHep. 6:12) Gideyoni aanaakhaliherya ni waakhapelela arumeyi a Muluku. (Aph. 2:16; 1Wah. 17:6) Ntoko siisaale Gideyoni, axitokweene olelo-va, aathanliwa ni Yehova wiira yaakhapeleleke arumeyi awe okathi wa mixankiho. (Mit. 20:28; 2Tim. 3:1) Gideyoni oovaha ntakiheryo nooloka na okhala mutthu oowiiyeviha ni oowiiwelela. Nave owo aahivilela mixankiho okathi aari awe mukhulupale. Ootheene ahu nihaana ovaha efaita miteko axitokweene anivara aya, hata niri ene axitokweene aahiiso nnaari. Nave nihaana waakhaliherya anna awo anivara muteko munceene wiira akhapelele muloko. — aHep. 13:17. w23.06 2 etti. 1; 3 etti. 3