Maio

Makristau a okathi wa arummwa khiyaatempe oxanka okathi yaakhumelenle aya etala yuulupale “elapo yootheene”. Tthiri ahooleli a itthoko yaanixanka vanceene sa moota woophwanya eyoolya wiira alyiheke emusi aya. Nave niireke munniwerya wuupuwelela moota yaaxankale aya amiravo ale yaaphavela wuncererya muteko aya woolaleerya? Woonasa wene, awo yaahuupuwela olipelela omala etala ele. Nnaamwi makhalelo yaari oovirikana wa khula mmosa, makristau ale yaahiilimaleliha makhalelo ale masya. Awo khiyaahiyale olaleerya ni yaanihakalala okawana itthu yaarina aya ni anna a oyudeya. (Mit. 11:29, 30) Ale yaakhaliheriwe evahiwaka itthu saathowa, yaahoona moota Yehova aakhaliherya awe. (Math. 6:31-33) Eyo yaahiwiiriha olipiha waataana waya ni anna ni arokora yaakhalihenrye. Nto anna ale yaakhalihenrye yaavahaka itthu saathowa, yaahihakalala mwaha wookhala atthu oovaha. — Mit. 20:35. w23.04 16 itti. 12-13

Ikwaha sikina, Yehova onnaakhula mavekelo ahu aarumaka atthu ahinimurumeela wiira anikhaliherye. Mwa ntakiheryo, Yehova aahimuruma mwene Artaserse omweemererya Nehemiya otthikela oYerusalemu wiira akhaliherye otekiwa ixiri sa epooma ele. (Neh. 2:3-6) Moolikanasa, olelo-va Yehova pooti waaruma atthu yaale ahinimurumeela wiira anikhaliherye. Ikwaha sikina Yehova khonaakhula mavekelo ahu moowakuveya. Masi Yehova onaakhula mavekelo ahu mwa enamuna ninreerela ahu wiira nihihiye oororomeleya wa yena. Nto khula okathi, nvaheke ephoole wiira moone moota Yehova onaakhula awe mavekelo anyu. Okathi mukina nihaana ovarerya moota Yehova onaakhula awe mavekelo ahu. (Esal. 66:19, 20) Nnimooniherya waamini wahu ohiya paahi ninvekelaka Yehova, masi-tho neemereryaka enamuna onaakhula awe mavekelo ahu. — aHep. 11:6. w23.05 11 etti. 13; 12 itti. 15-16

Okathi naivaherenrye ahu wa Yehova, naahileiherya wiira naarowa omurumeelaka yena ni opaka yootthuna awe mahiku ootheene. Nihaana omaleliha yooleiherya ahu. Etthu nimuleihenrye ahu Yehova ti ya faita yuulupale. Masi khahiyo muritti woolemela. Yehova onipattunxe wiira nipakeke ele oniphavela awe. (Wis. 4:11) Owo onipattunxe ailikanyihaka yena ni oniphavela wiira nimusuwele ni nimurumeeleke. Ti nthowa naya ninwerya ahu omwaattamela yena nave opaka ele oniphavela awe etthu yootepa ohakalaliha. Ohiya-vo, okathi nimpaka ahu ele Muluku oniphavela awe ni omwiiwelela mwanawe, eyo ‘enninlipiha’. (Math. 11:28-30) Muhihiye olipiha omphenta wanyu Yehova. Muupuwelelake itthu sootheene Yehova oopakenle aweni ni mareeliho onrowa awe woovahani muhoolo. Okathi omphenta wanyu Muluku onincerereya aya, vanimookhweelakani omwiiwelela. (1Yoh. 5:3) Yesu aniwerya opaka etthu Muluku aaphavela awe, maana aaninvekela Yehova wiira omukhaliherye ni aniwehexexa mareeliho aakhela awe. (aHep. 5:7; 12:2) Ntoko Yesu, munvekeleke Yehova ikuru ni muhiliyaleke nlipelelo na okumi woohimala. w23.08 27-28 itti. 4-5

Ti voohakalaliha okhala ni atthu anooniherya opixa murima. Nave hiyo ninnisiveliwa ni atthu anwerya olipelela etthu moohinyoonyiheya. Nave ti vooloka okathi mutthu onnipixerya awe murima hata nimutthekenle ene. Ninnimuxukhurela mutthu onisominhe Biibiliya mwaha woonipixerya murima okathi naimananiha ahu wiixutta, weemererya ele niixutta ahu, aahiiso ovarihela muteko ele Biibiliya onihimya awe. Nave ninnitepa omuxukhurela Yehova mwaha woonipixeryaka murima! Ekeekhai wiira ootheene ahu vanninsivela okathi atthu annipixerya aya murima, masi ikwaha sikina pooti onivilaka wooniherya mukhalelo owo. Mwa ntakiheryo, pooti onivilaka wooniherya opixa murima vakhala wiira niri mbiixani ni nnimwaakuveyasa. Nave ikwaha sikina pooti onivilaka olipelela elapo esya Yehova oleihenrye awe. Mwa inamuna iyo sootheene, nihaana opixa murima vanceene. w23.08 20 itti. 1-2

Yehova aahimuruma Gideyoni waaleele anakhotto awe anceene wiira atthikeleke owaani. Woonasa wene Gideyoni aaniikoha so: ‘Kiireke kihaana waavukula? Niireke nnoowerya waaxintta awanani ahu?’ Hata aaikoha siiso, Gideyoni aahiiwelela yooruma ele. Olelo-va, axitokweene annimutakiha Gideyoni vaavo anivarihela muteko marukunuxo anikumiheriwa ni mutthenkeso wa Yehova. (aHep. 13:17) Gideyoni aahimwiiwelela Yehova nnaamwi oova aahiiso aareerela oleva okumi awe. (Aph. 9:17) Nto nuumala Yehova omulipiha Gideyoni, owo aanikupali ni murima awe wootheene wiira anwerya waakhaliherya ni waakhapelela arumeyi a Muluku. Axitokweene anikhala ilapo seiye muteko ahu onikhoottihiwa aya, annitthara ntakiheryo na Gideyoni. Awo annooniherya okhala oolipa-murima maana khanihiya ohoolela muloko atthokihaka mithukumano ni muteko woolaleerya. Nto awo khanihiya ovara miteko iyo hata yoopopihiwaka otthukweliwa, ekohakohiwaka, woomoliwa muteko aahiiso ohaaxiwa. Nave okathi wa maxakha maalupale axitokweene anooreerelaka okhala oolipa-murima wiira yiiweleleke malakiheryo anrowa aya ovahiwaka hata varowaka oxankiha. w23.06 5-6 itti. 12-13

Yehova aahiruma olempwa yoowiiraneya ya Muulupale a Anamukuttho Yehoyada mbiibiliyani wiira niweryeke wiixutta etthu ni ntakiheryo nawe. (aRom. 15:4) Nave okathi Yehoyada aakhwiiya awe owo aahivithiwa “epooma ya Davidi vamosa ni mamwene, okhala wiira aahipaka itthu sooreera wIsarayeli omuttittimihaka Muluku eekeekhai ni empa ya Muluku”. (2Wah. 24:15, 16) Yoowiiraneya ya Yehoyada pooti onikhaliherya wuncererya omuttittimiha wahu Yehova. Nave axitokweene anoowerya omutakiha Yehoyada aphavelasaka inamuna sa moota wookhapelela muloko. (Mit. 20:28) Anna oowuuluvala anoowerya omutakiha Yehoyada, vakhala wiira anoomuttittimihaka Yehova ni ahihiyaka okhala ororomeleya wa yena. Nave Yehova pooti waarumeela wiira omalelihe itthu siniphavela awe. Nave amiravo anoowerya omutakiha Yehova yaattittimihaka anna oowuuluvala, ntoko Yehova aamuttittiminhe awe Yehoyada. Otepexa wene anna oowuuluvala apacenrye omurumeela Yehova okhuma khalai. (Mir. 16:31) Nihaana waakhaliherya moororomeleya ‘ale annihoolela’ niwiiwelelaka. — aHep. 13:17. w23.06 17 itti. 14-15

Okathi wa mithukumano muupuweleke saana okathi munithanla anyu ikwaha kavi muniphavela anyu okomentari. Akhala wiira munoovenxaka ntata ikwaha sinceene, eyo enoomwiiriha muhooleli omakelaka woothanlani nnaamwi anna akina ahikomentari. Tthiri opaka eyo enoowiiriha atthu akina ohivenxa ntata wiira akomentari. (Mus. 3:7) Akhala wiira atthu anceene annivenxa ntata wiira akomentari, woonasa wene hiyo pooti ohiwerya okomentari ntoko naaphavela ahu. Nave ikwaha sikina, munna onihoolela pooti ohiwerya onithanla nnakhala ekwaha emosa. Nto eyo pooti onikhulumula, masi nihaakuveke onyoonyiheya mwaha woohithanliwa. (Mus. 7:9) Akhala wiira khanwenrye okomentari ikwaha sinceene ntoko mwaaphavela anyu, munoonela sai owiriyana ikomentaario sa atthu akina, nuumala muthukumano munaattottopela? Woonasa wene, anna ni arokora anoolipihiwa vanceene ni moolumo anyu, ntoko ikomentaario mwaarowa anyu ovaha. w23.04 23-24 itti. 14-16

Mmusomeke Biibiliya ni muupuweleleke ele munisoma anyu. Akhala wiira mwiri onnikhalana mitathari soowiixerya, mwiri owo onikhala woolipa. Mwa enamuna emosa-ru, vakhala wiira nnoosoma Nuulumo na Muluku ni wuupuwelela, waamini wahu onrowa okhala woolipa ni khaninrowa ohiya omurumeela Yehova. Tthiri, ninnikupali wiira itthu Yehova onnivekela awe opaka, ti sooloka. (aKol. 2:6, 7) Muupuweleleke moota malakiheryo a Yehova ni malamulo awe yaakhalihenrye aya arumeyi awe a khalai. Mwa ntakiheryo, okathi aaloha awe, Ezekiyeli aahivaha ephoole vaavo nlaikha na Yehova naaphima aya etemplo. Etthu ele yaahimulipiha Ezekiyeli, nave enninuupuxerya wiira nihaana wiiwelela ni waakiherya okokhorela wa ekeekhai. (Ezek. 40:1-4; 43:10-12) Ninnittottela mureerelo, vaavo ninsoma ahu ni wuupuwelela ikeekhai soovila wiiwexexa sa mbiibiliyani. Ootheene ahu nihaana ohittikinyeya ni omuroromela Yehova ni murima wootheene. — Esal. 112:7. w23.07 18 itti. 15-16

Mbiibiliyani aakhala matakiheryo ooloka munna ori mmiravo onireerela awe otthara. Matakiheryo awo a mbiibiliyani, ta alopwana yamphenta Muluku ni yiimananiha okhapelela saana miritti saya ni atthu a Yehova. Nave-tho munoophwanya matakiheryo ooloka a amusi anyu ari Anamoona a Yehova ni anna a mmulokoni. (aHep. 13:7) Nave mookhalana ntakiheryo noolokexa na Yesu Kristu. (1Ped. 2:21) Okathi munsoma anyu matakiheryo awo ni ephoole, mmananiheke wuupuwelela mikhalelo sooloka arina aya. (aHep. 12:1, 2) Nuumala-vo, nweheke moota mukhanle anyu oowaatakiha alopwana awo owaamini. Mulopwana orina ankhili, onnuupuwela oratteene ni onnivaha ephoole ohinatthi opaka etthu. Tivonto, mwiimananiheke wiira mukhalane mukhalelo owo. Mpaceryeke nenna-va osoma aahiiso wiixutta malakiheryo a mbiibiliyani ni oweha efaita arina aya mookumi mwanyu. Murumeeleke malakiheryo awo okathi munrowa anyu opakaka soothanla sinrowa omuhakalaliha Yehova. (Esal. 119:9) Eyo enimookhaliheryani okhala mukristau orina waamini woolipa. — Mir. 2:11, 12; aHep. 5:14. w23.12 24-25 itti. 4-5

Anamuyari pooti waakhaliherya anaaya osuwela moota woowaakhula moomaaleleya, okathi anikohiwa aya sa ele anikupali aya. (Yak. 3:13) Anamuyari akina anniwiixuttiha anaaya okathi woomulompa Muluku vatthokoni. Awo annisoma myaha sikhanle ookhumelela oskola ni annipaka sowooniherya sa moota woowaakhula. Nave anniwiixuttiha anaaya moota woolavula mooreera murima ni waavara murima atthu akina. Owiixuttiha vahinatthi pooti waakhaliherya amiravo waatthokiherya saana atthu akina ele anikupali aya. Nave eyo enoowiiriha okupali wiira ele aniixutta aya mbiibiliyani ekeekhai. Myaha siri mpantta oni: “Amiravo Annikoha” musaitini jw.org, sookhalana itabela sikhanle oowaakhaliherya amiravo. Myaha iyo sipakeliwe wiira saakhaliheryeke amiravo olipiha ele anikupali aya ni owerya waakhula arumeelaka moolumo aya. Okathi emusi eniixutta aya hoothe myaha iyo, eyo enimwaakhaliherya atthu ootheene waakiherya waamini waya moomaaleleya ni mwa enamuna enaavara murima atthu akina. w23.09 17 etti. 10; 18 itti. 15-16

Niireke mootoko ophavela opaka etthu masi vanoovila-ni omaliherya? Akhala wiira eyo yootoko owiiraneelani, khamukhanle mekhinyu. Mwa ntakiheryo, Filipe aahikhalana yoolukama ya ovekelaka ikwaha sinceene ni olokiherya enamuna aavekela awe. Masi waaninvila okhalana okathi wiira ovekele. Nave Erika aahikhalana yoolukama ya ohaatarasariki muthukumano wa muteko woolaleerya. Masi hata aarina yoolukama ele, khula okathi owo aanaatarasari. Akhala wiira yookhala etthu mwaaphavela anyu omaleliha masi muhinawerya, xontte muhikhulumuwe. Maana wiira mutthu omaliherye opaka etthu hata ekhalaka yaamukhaani onipirisari okathi ni ikuru. Nto muhiliyale wiira wiimananiha wanyu omaleliha itthu muniphavela anyu onnooniherya wiira munnivaha efaita ompatthani anyu ni Yehova ni muniphavela omuhakalaliha. Nave muhiliyale wiira Yehova onnivaha efaita wiimananiha wanyu. Ekeekhai wiira Yehova khonnivekela opaka etthu nihinwerya ahu. (Esal. 103:14; Mik. 6:8) Akhala wiira muniphavela omaleliha etthu, mukhalaneke ephoole wiira muhithanle etthu muhiniwerya anyu opaka. w23.05 26 itti. 1-2

Atthu oolipa murima annoova, masi khaneemererya wiira woova iwo waahiihe opaka itthu sooloka. Daniyeli aari mmiravo oolipa murima. Owo aanisoma iprofesia, ohela muhina iprofesia sa Yeremiya. Mwaha woosoma, muhoolo mwaya Daniyeli aahisuwela wiira okathi ayuda yaarowa aya okhalihiwa ipottha oBabilonia, waahanle omala. (Dan. 9:2) Oweha iprofesia sa mbiibiliyani siiraneyaka, waahilipiha omwaamini wawe Yehova ni okupali wiira ootheene ale animuroromela Muluku anookhala oolipa murima. (Mulikanyihe ni aRoma 8:32, 37-39.) Etthu yuulupale okhala wiira khula okathi Daniyeli aaninvekela Tiithi awe a wiirimu, Yehova. (Dan. 6:10) Owo aaninvekela Yehova wiira oleveleliwe itampi sawe ni animuleela moonelo awe. Nave Daniyeli aanivekela okhaliheriwa. (Dan. 9:4, 5, 19) Daniyeli aari mutthu ntoko hiyo, khaayariwe ori ene oolipa murima. Owo aahiwerya okhalana mukhalelo owo okhala wiira aanisoma, aanivekela ni aanimuroromela Yehova. w23.08 3 etti. 4; 4 etti. 7

Owiiwelela makhulupale a mulaponi, onniniphwanyiha mureerelo hiyo ni atthu akina. Moota xeeni? Yoopacerya, hiyo khaninhaaxiwa ntoko anihaaxiwa aya atthu akina ahiniiwelela malamulo. (aRom. 13:1, 4) Vaavo nniwiiwelela ahu makhulupale a mulaponi, awo annaaweha Anamoona a Yehova okhala atthu oowiiwelela. Mwa ntakiheryo, iyaakha vakhaani sivinre, oNigéria atoropa yaahivolowa Empa ya Omwene okathi wa mithukumano, yaaphavelasaka atthu yaahimya wiira khahiyo ti vooloka oliva mpoosito. Masi muhooleli aya, aahaavekela wiira yaahaana okhuma Empa ya Omwene. Owo aahimmye so: “Anamoona a Yehova anniliva mpoosito”. Khula okathi muniiwelela anyu malamulo, munnikhaliherya wiira arumeyi a Yehova athokoreriweke okhala atthu arina mikhalelo sooloka. Woonasa wene, mwaha woosuweliwa okhala atthu a mikhalelo iyo, eyo pooti owiiriha anna ni arokora okhapeleliwa muhoolo. w23.10 9 etti. 13

Okhuma khalai, arumeyi anceene a Yehova annilipelela woona wanikisa wa elapo ela yoohiloka. Moonelo wa apinaatamu, vankhala ntoko wiira Muluku onnitepa opisa omaliherya sooleiherya sawe. Masi Yehova onnisuwela itthu sinaaxankiha arumeyi awe. Owo aahimuhimeerya profeta Habakuki wiira: “Mutthak’ola khunakuva okhumelela: okathi aya nlelo khuphiye, masi onimwiraneya tthiri. Wapisá ohikhumelenle, mulipeleleke, okhala wira onokhumelela tthiri, khivaninteya”. (Hab. 2:3) Niireke Yehova aalavunle masu awo ophavelaka ommaaliha Habakuki paahi? Aahiiso, masu awo anninimaaliha olelo-va? Uupuxeriwaka ni Muluku, murummwa Paulo aahaahimeerya-tho masu awo makristau anlipelela elapo esya. (aHep. 10:37) Nto, hata noonaka wiira iprofesia iyo sinnitepa opisa, mutthaka owo “onokhumelela tthiri, khivaninteya”. w23.04 30 etti. 16

Aisarayeli khiyaakupali enamuna ela Yehova aalavula awe naawo omurumaka Moise. (Mmr. 14:10, 11) Ikwaha sinceene, awo yaanikhootta weemya wiira Yehova aaniweettiha omurumaka Moise. Mwaha waivaavo, Yehova kheemerenrye wiira atthu ale oohiiwelela akele Elapo Yooleiheriwa. (Mmr. 14:30) Hata vari siiso, aisarayeli akina yaanitthara malakiheryo a Yehova. Mwa ntakiheryo, Yehova aahimmye so: “Kalebi . . . ahitthara mwettelo worera, khukìwelela ahanyiheryaka etthu”. (Mmr. 14:24) Muluku aahimutthuvela Kalebi ni aahimweemererya othanla opuro aaphavela awe okhala, elapo ele yooleiheriwa. (Yox. 14:12-14) Nloko naattharelana na aisarayeli naahooniherya ntakiheryo nooloka na otthara malakiheryo a Yehova. Masi nuumala Moise okhwa ni orantteliwa ni Yoxuwa, aisarayeli “yahipajerya omuttittimiha” ntoko saamuttittimiha aya Moise mahiku ootheene a okumi awe vathi-va. (Yox. 4:14) Mwaha woopaka eyo, Yehova aahaatthuvela aisarayeli aakhaliheryaka mpakha ophiya elapo yooleiheriwa. — Yox. 21:43, 44. w24.02 21 itti. 6-7

Ntoko siisaale meediku oniwerya awe osuwela moota murima wa mutthu onitthimaka aya orumeelaka moono awe, nave hiyo nnoowerya osuwela akhala wiira omphenta wahu Muluku ti woolipa, niwehaka moota nnaaphenta ahu anna ni arokora. Nasuwela wiira waaphenta wahu woopacerya ovukuwa, eyo enooniherya wiira omphenta wahu Yehova onnivukuwa. Masi vakhala wiira ninnaaphenta anna ni arokora khula okathi, eyo enooniherya wiira omphenta wahu Yehova ti woolipa. Vakhala wiira waaphenta wahu anna ni arokora onnivukuwa, owo muxankiho muulupale. Mwaha wa xeeni? Mwaha woowi eyo enooniherya wiira waataana wahu ni Yehova onnivukuwa. Murummwa Yohani aahiiwanyeiha eyo okathi aahimmye awe so: “Ole ohinimphenta munnawe, onimoona awe, khoniwerya omphenta Muluku, ohinimoona awe”. (1Yoh. 4:20) Exeeni nniixutta ahu? Nniixutta wiira nnoowerya omuhakalaliha Yehova ‘naaphentanaka mukina ni mukhwaawe’. — 1Yoh. 4:7-9, 11. w23.11 8 etti. 3; 9 itti. 5-6

Okathi aari awe mmiravo, mwene Yowasi aahipaka yoothanla yooloka. Paapa awe aahikhwa, nto aahitthara miruku sooloka sa Yehoyada Mukhulupale Anamukuttho. Yehoyada aahimuhuwa Yowasi ntoko mwanawe. Ottharaka ntakiheryo nooloka na Yehoyada, Yowasi aahithanla omurumeela Yehova ni waakhaliherya atthu awo opaka etthu emosa-ru. Yowasi aahipacerya olokiherya etemplo ya Yehova. (2Wah. 24:1, 2, 4, 13, 14) Vakhala wiira anamuyari anyu aahiiso mutthu mukina onniwiixuttihani voohimya sa Yehova ni malamulo awe, mukupaliki wiira eyo yoovaha yuulupale. (Mir. 2:1, 10-12) Anamuyari anyu pooti owiixuttihani mwa inamuna soovirikana. Anamuyari anyu anoohakalala, vakhala wiira munootthara malakiheryo a mbiibiliyani anoovahayani. Masi etthu yuulupale okhala wiira Yehova onoohakalala nave ompatthani anyu ni yena onrowa otepaka olipa (Mir. 22:6; 23:15, 24) Awo mathowa ooloka anrowa owiirihani otthara ntakiheryo na Yowasi okathi aari awe mmiravo. w23.09 8-9 itti. 3-5

Yehova onnileiherya wiira onoowiriyanaka mavekelo ahu. Muluku ahu onnaaphenta arumeyi awe oororomeleya, nto owo onimwaakhula mavekelo aya. (Esal. 10:17; 37:28) Masi eyo khentaphulela wiira Yehova onoonivaha khula etthu nninvekela ahu. Woonasa wene itthu sikina nninvekela ahu, onrowa onivaha elapo esya. Yehova onnuupuwela moota mavekelo ahu anivarihana aya ni ele oniphavela awe. (Yes. 55:8, 9) Itthu oniphavela awe sinihela muhina, elapo ela osareya atthu oowiiraana, oohakalala ni anilamuleliwa ni yena. Masi Satana aahootha ohimyaka wiira apinaatamu enaamuhakalala akhala wiira animwiilamulelaka. (Maph. 3:1-5) Ophavelaka wooniherya wiira etthu aahimmye awe Diabo khahiyo ekeekhai, Yehova ooweemererya apinaatamu wiira elamuleleke. Masi mixankiho sinceene sinikhumelela olelo-va, sinikumiheriwa ni ikuvernu sa apinaatamu. (Mus. 8:9) Hiyo noosuwela wiira Yehova khonrowa omaliha mixankiho sootheene, nenna-va. Okhala wiira opaka eyo, atthu akina yaarowa wuupuwelaka wiira ikuvernu sa apinaatamu ti sooloka, ni soowerya omaliha mixankiho. w23.11 21 itti. 4-5

Yehova aahileiherya wiira orweela wa Abrahamu, “maloko manceene” yaamureelihiwa. Masi okathi waanivira, Abrahamu aarina iyaakha 100 Sara aarina 90, awosa nlelo yiira ahinatthi omuyara mwaana. Moonelo wa apinaatamu, vaakhala wiira khivaarowa oweryaneya Abrahamu ni Sara okhalana mwaana. Nave eyo yaaheehererya waamini wa Abrahamu. “Masi mwaha wa nlipelelo aarina awe, owo aanaamini wira aamukhala tiithi a maloko manceene”. (aRom. 4:18, 19) Wookiseryani waya, ntoko Yehova aaleihenrye awe, awo yaahimuyara mwaana. Vano Abrahamu aari tiithi a Isakhi. (aRom. 4:20-22) Ntoko niwenhe ahu, vanooweryaneya Yehova oneemererya ni onithokorerya okhala anaxariya ntoko Abrahamu. Tthiri murummwa Paulo aahitthokiherya eyo okathi aalavunle awe so: “Masi, moolumo oowi ‘aahithokoreriwa okhala’, khiyaalepeliwe Abrahamu paahi. Moolumo awo, noolepeliwa-tho hiyo, okhala wira nnoothokoreriwa okhala anaxariya mwaha wa omwaamini Muluku, yoowo omuhihimunxe Yesu”. (aRom. 4:23, 24) Ntoko Abrahamu, nihaana okhalana waamini onivarihana ni miteko ni nlipelelo. w23.12 7 itti. 16-17

Okathi sinoophwanyayani mixankiho siniwiirihani woova, muupuweleleke wiira Yehova onnisuwela oratteene etthu enooxankihani ni moota munoonela anyu. Mwa ntakiheryo, Yehova ohiya paahi woona mixankiho saaphwanya aisarayeli wExiitu, owo aahihimya wiira “kosuwela tthiri ohawa waya”. (Okhu. 3:7) Niireke ikwaha sikina munniikoha akhala wiira Yehova onnookhaliheryani ovilela mixankiho sanyu? Munoonela sai onvekela Yehova wiira ookhaliheryeni osuwela moota onipaka awe eyo? (2Mam. 6:15-17) Nkuupuwelani ela: Niireke wookhala mwaha aahiiso ekomentaario yaavahiwe mmulokoni yaatonko woolipihani? Niireke yookhala erevista, eviidiyu aahiiso nsipo naatonko woovarani murima? Niireke ookhala mutthu aatonko owooniheryani yoolepa ya mbiibiliyani yoolipinheni? Ikwaha sikina, hiyo pooti oliyala moota ophenta wa anna ni arokora ni moolumo oolipiha nimphwanya ahu mbiibiliyani, annikhaliherya aya. Masi nisuweleke wiira iyo soovaha sinikhuma wa Yehova. (Yes. 65:13; Mar. 10:29, 30) Nave sinooniherya wiira Yehova onninthokorerya vanceene. (Yes. 49:14-16) Nave-tho sinninikupaliha wiira nihaana omuroromelaka Yehova. w24.01 4-5 itti. 9-10

Yesu ohinatthi otthikela wiirimu, aahiwuupuxerya atthareli awe wiira yaahaana olaleya “oYerusalemu, oYudeya ni oSamariya wootheene, ni elapo yootheene ya vathi”. (Mit. 1:8; Luka 24:46-48) Nuuvira okathi vakhaani, ahooleli a etiini ya eYuda, yaahimutthukwela mukhatteya Pedru ni Yohani ni khumuroiha osineedrio. Ahooleli a itiini awo, yaahaakhottiherya arummwa otthikela olaleerya ni yaahiwoopopiha. (Mit. 4:18, 21) Pedru ni Yohani, yaahimmye so: “Mutthokelele oratteene mmansinyu, yaari etthu ya xariya vamaithoni va Muluku, owiiwelelani nyuwo, ohiya omwiiwelela Muluku. Masi hiyo, khaninwerya ohiya olavula itthu noonale ahu ni niiwale ahu”. (Mit. 4:19, 20) Nuumala Pedru ni Yohani otaphuliwa mukhatteya, awiixutti yaahinvekela Yehova wiira aakhaliherye ohihiya opaka itthu sinimusivela. Tthiri Yehova aahaakhula nivekelo nle. — Mit. 4:31. w23.05 5 itti. 11-12

Okhuma khalai, Yehova ni Yesu anikhala vamosa. Ohinatthi orwa valaponi, Yesu ni Yehova yaakhala vamosa wiirimu mwa iyaakha sinceene. Nto awo yaalipiha ophentana waya mukina ni mukhwaawe. Ntoko enooniherya aya yoolepa ya olelo, Yehova aahooniherya wiira aanimphenta vanceene Yesu. Yehova anwerya ohimya paahi wiira ‘ola ti yoowo kimuthanlale aka’. Masi ophavelaka onisuweliha moota onimphenta awe Yesu, owo aahimmye wiira “ola Mwanaka, kinimphentexa aka”. Yehova aanittottopela mukhalelo wa Yesu ni itthu aarowa awe opaka muhoolo. (aEef. 1:7) Yesu khaahoverya moota Tiithi awe aamoonela awe. Ophenta wa Yehova waari wa ekeekhai ni waanimwiiriha Yesu okupali. Nto okupali iwo, waanimwiiriha ohimya ikwaha sinceene wiira Tiithi onnikiphenta. — Yoh. 3:35; 10:17; 17:24. w24.01 28 etti. 8

Nkuupuwelani ela: Mutthu munimphenta anyu vanceene olavunle ene itthu sihireere woowereyani. Masi munnisuwela wiira itthu iyo ti soowoothiwa. Hata vari siiso atthu akina annikupali. Etthu yootepa oxankiha okhala wiira, atthu awo annilaleya itthu iyo soowoothiwa ni anniwiiriha atthu anceene okupali. Mwaarowa woonela sai? Nyuwo mwaamuriipiwa murima vanceene mwaha wa itthu iyo. Nave khamumphavela wiira mweettelo wooloka aahiiso nsina nanyu nihononiwe. Yoowiiraneya ela enninikhaliherya wiiwexexa moota Yehova oonenle awe, nuumala oveehiwa nsina nawe. Nlaikha nimosa, naahilavula itthu soowootha nimuhimeeryaka muthiyana oopacerya, Eva. Owo aahikupali itthu iyo soowoothiwa. Mwaha wa wootha wa nlaikha nno, anamuyari ahu oopacerya yaahimutthekela Yehova, nto eyo ehiiriha apinaatamu ootheene okhalana yoottheka ni okhwaaka. (Maph. 3:1-6; aRom. 5:12) Olelo-va sinnikhumelela mixankiho olumwenku wootheene, ntoko okhwa, ikhotto ni ohaawa, mwaha wa wootha wa Satana. Yehova onoonela sai vaavo vaniweha awe mixankiho sootheene, sinikhumelela mwaha wa wootha iwo? Ohimya ekeekhai Yehova khoreere oriipiwa murima. Hata vari siiso, owo khahiyo Muluku ootakhala aahiiso ohinaathokorerya apinaatamu. Tthiri owo khonihiya okhala “Muluku oohakalala”. — 1Tim. 1:11. w24.02 8 itti. 1-2

Munrowa omutakiha sai Yosefe okathi muneehereriwa anyu? Nyuwo muhaana osuwela etthu yoopaka, nenna-va muhinatthi weehereriwa. Okhuma nenna-va, mwiixutteke okhootta moowaakuveya itthu Yehova oninyokha awe ni mukhaleke ottaiwene ni itthu iyo. (Esal. 97:10; 119:165) Eyo enamuna yookhweya ya osyaka itthu soohiloka, akhala wiira munimweehereriwa.Masi hata musuwelaka wiira moophwanya ekeekhai ni munnimurumeela Yehova ni murima anyu wootheene, pooti okhala etthu enrowa wookhoottiheryakani wiivahererya wa yena ni opatisiwa. Akhala wiira eyo enoowiiraneelani mutthareke ntakiheryo na Mwene Davidi. Owo aahinvekela Yehova ohimyaka so: “Muluku, mutokose murima aka, musuwele, mukeehererye, musuwele sinuupuwelaka. Mukiwehe: karowa ephiro yootakhala, mukittikiherye ephiro ya okumi woohimala”. (Esal. 139:23, 24, Piipiliya Emakhuwa.) Yehova onnaatthuvela ale “animwaavya ni murima aya wootheene”. Wiimananiha opaka itthu moovarihana ni yoolakela anyu ya wiivahererya wa yena ni opatisiwa, ennooniherya wiira munnipaka itthu sooloka. — aHep. 11:6. w24.03 6 itti. 13-15

Namukuttho, aanaakhaliherya atthu omukokhorela Muluku. Namukuttho oopacerya a aisarayeli, aari Aroni, owo aathanliwe ni Yehova okathi yiinakurariwa aya etabernaakulu. Ntoko murummwa Paulo aatthokihenrya awe, ‘anamukuttho anceene yaahihiya ovara muteko aya, tivo atthu akina yaanaaranttela’. (aHep. 7:23-26) Okhala wiira yaari atthu oottheka, anamukuttho yaanireerela ovaha mukuttho mwaha wa itampi saya. Tthiri, ninniweha ovirikana okhanle eriyari ya anamukuttho aisarayeli ni namukuttho muulupale, Yesu Kristu. Namukuttho ahu Muulupale, Yesu Kristu “Owo murumeyi a . . . eheema yeekeekhai, yeeyo yeemexiwe ni Yehova, ohiya ni mutthu”. (aHep. 8:1, 2) Paulo ootthokiherya wiira “Yesu onnikhala mukumi mahiku ootheene, khuuvo onimuranttela”. Olavulaka voohimya sa Yesu, Paulo aahincererya ohimyaka wiira ‘khorina etthu yoonanara, oovalaanyiwa ni anatampi’. Nave moovirikana ni anamukuttho a aisarayeli, Yesu “khonvekeliwa ovaha mikuttho khula nihiku” mwaha wa itampi sawe. w23.10 26 itti. 8-9

“Erimu ya khalai” sinihimmwa ikuvernu sa apinaatamu sinilamuleliwa ni Satana vamosa ni malaikha ootakhala. (Math. 4:8, 9; 1Yoh. 5:19) Nuulumo noowi “elapo” Biibiliya onnirumeela ophavelaka waahimya apinaatamu anikhala valaponi. (Maph. 11:1; Esal. 96:1) Vano “elapo ya khalai” anihimmwa atthu ootakhala murima. Ohiya paahi olokiherya “erimu” ikhanle ikuvernu sa apinaatamu ni “elapo”, eyo piiyo, atthu ootakhala nnaaweha ahu olelo-va, Yehova onrowa waapwetexa moomalela. Nuumala-vo, onooruuha erimu esya ni elapo esya, eyo piiyo, ekuvernu enrowa waalamulelaka apinaatamu ootheene a xariya. Yehova onimwiiriha elapo okhala yooloka siisale ejardim ya wEedeni. Nave nnookhalihiwa atthu asya niire so, atthu ahirina etampi. Yehova onnileiherya wiira alipa oorakala, ale ahinoona ni ahiniiwa anoopenuxiwa, nave ale akhwiiye anootthikela okhala akumi. — Yes. 25:8; 35:1-7. w23.11 4 itti. 9-10

Moohipisa, anoopacerya “maxakha maalupale”. (Math. 24:21) Masi moovirikana ni ihasara sikina nihinlipelela ahu, hiyo ninnilipelela maxakha maalupale. Iyaakha 2.000 sivinre, Yesu aahaatumerya awiixutti awe wiira yaahana wiilokiherya nihinatthi ophiya nihiku nno. Nto akhala wiira nnimwiilokiherya vahinatthi, vanoorowa onikhweela ovilela okathi owo ni waakhaliherya atthu akina. (Luka 21:36) Ninrowa opirisariki ovilela wiira nimwiiwelele Yehova, nroromelaka wiira onoonikhapelela. Exeeni ninrowa ahu opaka akhala wiira annihu anoopweteiwa mireerelo saya? (Hab. 3:17, 18) Ninrowa opirisariki wooniherya othunku, wiira naakhaliherye anna awo. Nto ninrowa opaka exeeni akhala wiira ninrowa okhalaka opuro mwaamukhaani vamosa ni anna ni arokora anceene, okathi maloko anrowa aya waataana? (Ezek. 38:10-12) Ninrowa opirisariki okhalana niphento, wiira niwerye ovilela okathi owo wooxankiha. w23.07 2 itti. 2-3

Anamathelana anniixutta etthu ni ntakiheryo na Akila ni Prisila. Anamathelana awo yaaniphentiwa vanceene ni makristau oopacerya. (aRom. 16:3, 4) Biibiliya onnooniherya wiira yaanivarasa muteko, yaanilaleerya ni yaanaakhaliherya atthu akina. Nto yaanipaka itthu iwo sootheene ari ene hoothe. (Mit. 18:2, 3, 24-26) Anamathelana anrowa waatakiha sai? Woonasa wene nyuwosa munnivarasa miteko sinceene. Munoonela sai ovara miteko sikina nuule muthelanne anyu? Munoonela sai okhumaka hoothe ikwaha sikina muteko woolaleerya nuule muthelanne anyu? Eyo ti etthu Akila ni Prisila yaapaka aya. Woonasa wene, nyuwo khamunvara muteko mmosaru nuule muthelanne anyu. Masi munoonela sai ovara miteko sikina nuule muthelanne anyu ntoko orattela empa? (Mus. 4:9) Vaavo anamathelana anivara aya miteko sa vate hoothe, eyo ennaakhaliherya ovara ntoko ekiipa ni annikhalana okathi munceene wiira avaanele. w23.05 22-23 itti. 10-12

Okathi mukina, ootheene ahu ninnoova. Mwa ntakiheryo okathi Mwene Sawuli aaphavela awe omwiiva, Davidi aahithanla otthyawela epooma ya aFilisti, oGathi. Mwene oGathi, Akixi, aahuupuwela wiira Davidi nakhotto yoole ootupa ni oolipa murima atthu yaamwiipela aya ariki: “Owiivale ikonto muloko” sa afilisti. Nuumala Davidi osuwela etthu mwene uupuwela awe, “aahipacerya omoova vanceene”. (1Sam. 21:10-12) Owo aahixanka vanceene uupuwelaka etthu mwene Akixi aakela awe omwiiriha. Exeeni Davidi aapanke awe wiira oxintte woova? Moolumo ari Esalimo 56, Davidi onnitthokiherya moota oonela awe okathi aari awe epooma ya oGathi. Esalimo ela, Davidi oohimya etthu yaamwiiriha woova ni etthu yaamukhalihenrye oxintta woova. Okathi oova awe, Davidi aanimuroromela Yehova. (Esal. 56:1-3, 11) Davidi khaakhulumunwe. Okhaliheriwaka ni Yehova, aahiwerya opaka etthu yaamwiirinhe woopowa mwa enamuna ahaalipelela awe. Owo aahiikhaliha ntoko namukhwanepa! Nto Akixi ohiya ophavela omwiiva Davidi, owo aahirumiha okumihiwa namukhwanepa ole ohoolo wawe. Nuumala-vo, Davidi aahiwerya woopowa. — 1Sam. 21:13–22:1. w24.01 2 itti. 1-3

Tani anihimmwa yoolepa ya olelo? Anihimmwa makristau oothanliwa akhwiiye ni ahihimuxiwe! Akhala wiira ole ookiserya wa ale oothanliwa onoorowa wiirimu, waattamela wanikisa wa maxakha maalupale, muteko woopacerya anrowa aya waakhela, ori omukhaliherya Yesu owana ekhotto wiira aaxintte awanani awe. Nuumala orowa wiirimu, awo anrowa okhala vamosa ni Yesu ni malaikha, awanaka ekhotto yookiserya wiira yaaxintte awanani a Muluku. Nkuupuwelani ela! Olelo-va makristau oothanliwa ari valaponi, toowuuluvala ni kharina ikuru sinceene. Masi okathi anrowa aya ohihimuxiwa wiira yakhaleke wiirimu, awo anrowa okhala soopattuxiwa sa omunepani, sihinikhwa ni sirina owerya. Nave awo anrowa owana Ekhotto amukhaliheryaka Mwene Muulupale, Yesu Kristu. Nuumala ekhotto ya Armagedoni, awo anrowa ovaraka hoothe ni Yesu yaakhaliheryaka apinaatamu ootheene okhala oohittheka. Moohaanyiherya, okathi anrowa aya okhalaka wiirimu, anoowerya waapakela itthu sinceene anna ni arokora seiyo yahaawerya aya opaka ari ene valaponi ntoko atthu oottheka! w24.02 6-7 itti. 15-16

Atthu akina anniilokiherya masi anoova wiivahererye wa Yehova ni opatisiwa. Awo pooti wuupuwelaka so: ‘Akhala wiira kinoopaka etampi yuulupale nuumala wiivahererya wa Yehova ni opatisiwa, kinookumihiwa mmulokoni’. Akhala wiira munnoova, mukupaliki wiira Yehova onimoovahani khula etthu muniprisari anyu, wiira “nweryeke weetta ntoko simphwanela aya atthu a Yehova”. (aKol. 1:10) Nave onimoovahani ikuru wiira mpakeke itthu sooloka. Atthu anceene anniwerya opaka itthu sooloka akhaliheriwaka ni Yehova. (1aKor. 10:13) Okhala wiira atthu awo anikhaliheriwa ni Yehova, ti maana aya ahinaatta aya atthu anikumihiwa mmulokoni wa ekristau. Maana Yehova onnaalokiherya arumeyi awe, wiira akhalaneke waamini woolipa okathi wootheene. Khula mutthu onneehereriwa opaka itthu soohiloka mwa inamuna soovirikana. (Yak. 1:14) Nto nyuwo, mukhanle oothanla etthu yoopaka akhala wiira munimweehereriwa. Ekeekhai ti yoowi, nyuwo muhaana wiixutta wiikhapelela. Atthu akina anikupali wiira vannivila osuwela etthu yoopaka okathi owo. Masi eyo khahiyo ekeekhai. Nyuwo pooti osuwela moota woosyaka opaka itampi suulupale. w24.03 5 itti. 11-12