Mukhalane Ephoole ni Soophavela sa Murima

Biibiliya onihimya wira ‘khivo etthu yotakhala envikana murima wowotha’. (Yer. 17:9) Okathi murima ahu oniphavela aya etthu, niireke ninnaavya enamuna ya ovenxa-vo soophavela iyo?

Soolempwa sinninlopola wira: ‘Mmurimani mwa mutthu sinnikhuma sowupuwela sonanara, wiva, oraruwa, enamuttompe, wíya, owotherya atthu n’uwapa’. (Math. 15:19) Murima ahu pooti onivariha, ni oniiriha ophavelaka waakiherya sowiira sahu sihinivarihana ni yootthuna ya Muluku. Hiyo pooti ohisuwela etthu enuupuwela murima ahu mpakha nuumala opaka itthu soohiloka. Exeeni enrowa onikhaliherya osuwela soophavela sa murima ahu nihinatthi opaka etthu yoohiloka?

MUSUWELE SOOPHAVELA SA MURIMA ANYU​—MOOTA XEENI?

Mmusomeke Biibiliya khula nihiku ni wuupuwelela enihimya awe. Murumwa Paulo onihimya so: ‘Masu a Muluku ti makumi: awo t’òwithexa onvikana xowa onitha ninno-ninno. Awo annikela mpakha nipuro ninkumanelaya murima n’iroho’. Masu a Muluku ari mBiibiliyani, ‘annitokosa sowupuwela ni sotthuna sa mmurimani mwa mutthu’. (aHéb. 4:12) Ovarerya mukhalelo ahu nirumeelaka ele Soolempwa sinihimya aya, pooti onikhaliherya osuwela soophavela sa murima ahu. Ti va efaita osoma Nuulumo na Muluku khula nihiku, wuupuwelela enihimya aya, wira nikhalaneke miyuupuwelo ni miyoonelo sa Yehova!

Weemererya miruku sa mBiibiliyani ni weettela, sinookhaliheryaka muupuwelo ahu; eyo piiyo, ankhili a mmurimani mwahu anivaha onamoona ‘wekekhai’. (aRom. 9:1) Yowuupuxerya ya murima ahu, enooniiriha osyaka ohicalela soovonya sahu. Nave-tho, Biibiliya ookhalana matakiheryo anrowa ‘onilopola hiyo’. (1 aKor. 10:11) Wiixutta matakiheryo awo, anooniiriha osyaka itthu soohiloka. Khula mmosa a hiyo iireke exeeni?

Munvekeleke Muluku wira ookhaliheryeni osuwela soophavela sa murima anyu. Yehova ‘tonitokosa mirima’. (1 Wah. 29:17) Muluku khaniwokeya. Vakhala wira nnimooniherya muupuwelo ahu, miyoonelo, ni soophavela sahu ninvekelaka Yehova, owo onoonikhaliherya otokosa soophavela sa murima ahu. Hiyo pooti onvekela Muluku ‘murima woloka’. (Esal. 51:12) Okathi onitokosa ahu soophavela sa murima ahu nihaana othokorerya efaita erina aya mavekelo.

Nwiriyaneke saana okathi wa mithukumano sa eKristau. Owiriyana oratteene ele enlavuliwa mmuthukumanoni weekristau, onoonikhaliherya otokosa mikhalelo sa murima ahu. Nnaamwi nihiwehereryaka waakhela ihapari isya khula muthukumano,masi mwaha wa orowa opuro owo onniniiriha osuwela saana malakiheryo a mBiibiliyani ni soolopola sa efaita sinnikhaliherya otokosa soophavela sa murima ahu. Nave, ikomentaario sa anna ni arokora, sookhalana efaita ya olokiherya miyuupuwelelo sa murima ahu. (Mir. 27:17) Ohirowela mithukumano wala ohaataana ni maKristau makhwiihu pooti onihonona. Eyo pooti oniiriha ‘wisupuwelelaka’ mekhihu paahi. (Mir. 18:1) Nto ti vooloka wiikoha so: ‘Kiireke vannikisivela orowa omuthukumanoni wira kittottele mureerelo?’​—aHéb. 10:24, 25.

OPURO XEENI MURIMA AHU ONNIROIHA AYA?

Murima ahu woololo, pooti onihapuxa mwa inamuna sinceene sa mookumini. Nrowe nthokorerye inamuna iya xexe: Mihakhu sa werutthuni, moota onirumeela ahu soowurya soohapala, moota wowaathanla apatthani ni ele enipaka ahu okathi wa otthekula.

Mihakhu sa werutthuni. Khahiyo vootthekeya ohakalaliha soophavela sooloka sa erutthu ahu. Masi Yesu oonilopola voohimya sa ophavelexa mihakhu. Aahilavula ntakiheryo nimosa onnilattula awe wira nithokorerye voohimya sa mulopwana mmosa aari thaaciri aarina arumasiya awe yaasaren’ye soolya. Nto owo khaarina-tho opuro woohela soohepha sawe sikina sooloka. Mulopwana ole aahuupuwela waapwexakasa arumasiya awe wira aateke aalupale. Owo uupuwenle so: “Kisuke memmo solya saka ni muhakhu aka. Numala kinohimerya murim’aka wira: Murim’aka we, wokhalana muhakhu munjene osukiwe, oniphiyerya iyakha sinjene. Vano omumuleke, olyeke, opuheke”. Nto mulopwana ola thaaciri aahiliyala wuupuwelela etthu ehintthyaweya: wira owo pooti okhwa ohiyu yoole.​—Luka 12:16-20.

Vaavo vaninnuwa ahu pooti opaceryaka wuupuwela othukumanya mihakhu wira sinikhapelele nuuluvalaka, nto khupaceryaka ovaraka muteko oniviriha okathi munceene nihinawerya orowela mithukumano wala ohiluttuweliwa ni miteko sa eKristau. Nto khahiyo vooloka osyaka muupuwelo owo? Ikwaha sikina hiyo pooti oweha omiravo ahu, nto khiyuupuwela wira khiivo yooloka ovikana onvarela muteko Muluku okathi wotheene. Masi hiyo pooti wiikoha so: niireke ninneehereriwa ni ohiya opioneero wira nithukumanye musurukhu? Nto khahiyo vooloka vano othukumanyerya muhakhu ahu ohoolo wa Muluku? Tani onsuwela akhala wira meelo nnookhalana okumi?

Moota woorumeela soowurya soohapala. Miruku 23:20 onihimya so: ‘Muhitthuké muloko n’anamuhapaliwa’. Mutthu oosiveliwa owurya soohapala, owo onihimya wira khaniwerya okhala ahiwuryaka. Owo pooti ohimyaka wira oniwurya wira akhaleke saana ohiya ophavela ohapaliwa. Akhala wira hiyo ninwurya eviinyu wala khula yoowurya enihapala niphavelaka oliyala mixankiho sahu, nto nihaana otokosa murima ahu.

Waathanla wahu apatthani. Khivaniweryaneya osyaka olavula ni atthu ahikhanle maKristau akwiihu ntoko: oxikola, omutekoni, wala okathi woolaleerya. Eyo ennivirikana ni otepa olimalelana ni atthu awo hata opatthana aahiiso wataana naawo. Niireke ninnilavula wira hiyo ninnipatthana naawo mwaha woowi awo aakhalana mikhalelo sooloka? Biibiliya onnilopola ariki: ‘Muhihiyé motothiwaka: Wetta n’alavilavi, opwetexa makhalelo òrera’. (1 aKor. 15:33) Sintoko eveneno vakhaani enihonona aya maasi ooloka, opatthana ni atthu ahinimuttittimiha Muluku, pooti ohonona omunepani wahu, ni oniiriha weetta ntoko atthu a mulaponi, ntoko mawarelo, ilavulelo, ni mweettelo.

Ele enipaka ahu okathi wa otthekula. Olelo-va, etekonologia ennipaka itthu siniruuha khula enamuna ya itthu sa otthekulano; sinceene sihinloka wa maKristau. Paulo olempe so: ‘itthu sa oseje ni sonanara sikina nnákhala sihiromoliweke eriyari anyu’. (aÉf. 5:3) Ankhi akhala wira nookuxeya murima mwaha wa oweha wala owiriyana etthu yoohiloka? Akina pooti wuupuwela wira khula mutthu tonithanla enamuna ya otthekula wira othweeleke. Masi, nihaana wiiwelela miruku sa Paulo olavunle wira nihilavuleke wala oweha aahiiso owiriyana itthu soohiloka.

VANNIWERYANEYA OPAKA MARUKUNUXO

Akhala wira ninnimora mwaha wa ohiya murima ahu ohapuwaka nto nihinakupali wira ninnivonya, masi vanniweryaneya opaka mirukunuxo. (aÉf. 4:22-24) Moone matakiheryo manli a vano.

Miguela aahaana orukunuxa moonelo aarina awe ni mihakhu. Onihimya so: “Amwaraka, mwanaka, ni miyo, ninkhuma elapo yeeyo enitepa aya ovahiwa efaita vanceene itthu sinikhumelela isya sa etekonologia ni mihakhu. Miyo kahiivahererya ophavela mihakhu elapo enivaha aya, kuupuwelaka wira kinoowerya okhalana sotheene masi moohiphenta muhakhu. Nto kaahiweha wira ophavela mihakhu, eri ntoko ephiro ehinikota. Kahinvekela Yehova wira akikhaliherye voohimya sa moonelo aka ni soophavela sa murima aka. Kaahimuleela wira miyo ni emusi aka naaphavela omurumeela oratteene. Naahiwerya opaka yoothanla wira nikhweeherye okumi ahu ni othaamela opuro woothowa anamalaleerya. Niwerya okhala mapioneero. Nto nooweha wira khivanitthuneya okhalana mihakhu sinceene wira nihakalaleke”.

Yowiiraneya ya Lee, ennooniherya wira otokosa enamuna ya opaka wawe opatthani waahimukhaliherya. Lee onihimya so: “Mwaha wa muteko aka, khula okathi kaakhala ni apatthani a oomutekoni. Kaanisuwela wira orowa mmafestani mme pooti wiiraneya itthu ntoko owurya mohiiphima; masi vaanikisivela orowa mapuro awo. Ikwaha sinceene keetta ni anamuhapaliwa, masi nuumala vo kaahiikhupanyiha. Kahaana otokosa oratteene soophavela sa murima aka. Miruku sa Nuulumo na Muluku ni malakiheryo a axitokweene yaahikikhaliherya osuwela wira apatthani yaarina aka yaari atthu ahinimphenta Yehova. Mahiku ala kinivara ni telefoni, nto eyo ennikikhaliherya ohitepa opatthana ni atthu”.

Nihaana okhala atthu ekeekhai, ni osuwela saana soophavela sa murima ahu. Niira siiso, niphaveleke nikhaliheryo wa Yehova ninvekelaka, nisuwelaka wira owo ‘onnisuwela mirima sa atthu’. (Esal. 44:22) Muluku oonivaha Nuulumo nawe ninlikana ni eloola. (Yak. 1:22-25) Sookhala-tho miruku sa efaita nimphwanya ahu muliivuruni mwahu sa eKristau ni mithukumano sahu! Nto makhaliheryo awo, anookhapelela murima ahu wira neetteke ephiro ya exariya.

[Enoota]

[Elatarato epaaxina 22]

[Elatarato epaaxina 23]

Omusoma Biibiliya khula nihiku onikhaliherya sai murima ahu wa nthoonyeryo?

[Elatarato epaaxina 23]

Mavekelo ahu anninikhaliherya osuwela soophavela sahu sekeekhai

[Elatarato epaaxina 23]

Mithukumano seKristau sinninikhaliherya otokosa soophavela sa murima ahu