Nihimyeke ni Nroromelo Wira Yehova Tonnikhaliherya!

‘Nihimyeke ni nroromelo wira Yehova t’onnikhaliherya’.​—AHÉB. 13:6.

NYUWO MUNOONELA SAI?

Exeeni anamuyari akhanle aya oopaka wira alipihe emusi aya momunepani?

Moota xeeni ahooleli a etthoko anirowa aya okhapelela emusi aya akhalaka hoothe?

Moota xeeni maKristau akhanle aya ookhootta yookhanyererya ya othaamela elapo ekina wira yaphwanye musurukhu munceene?

1, 2. Mixankiho xeeni aniphwanya aya atthu ale anithaamela elapo ekina okathi anitthikela aya owaani? (Nwehe elatarato yoopacerya.)

EDUARDO onihimya so: “ovara muteko elapo yookhopela waahikiphwanyiha muteko wooloka ni musurukhu munceene.a Masi noopacerya omusoma Biibiliya ni Anamoona a Yehova khaahoona wira kaahikhalana miritti sikina sootthuneya, eyo piiyo, okhapelela emusi aka weerutthuni ni omunepani. Nto kaahitthikela owaani orowa okhala vamosa ni emusi aka”.​—aÉf. 6:4.

² Eduardo aahiixutta wira orowa okhalaka ni emusi awe yaari etthu yaamusivela Yehova. Masi moolikana ni Mariliya, yoole oromoliwe muru ovinre, Eduardo ahaana opacerya muteko woovila wa olokiherya makhalelo a emusi awe. Nave owo aahikumanana muxankiho wa waakhapelela amwaarawe ni anaawe okathi woothowa musurukhu. Nto owo aavara exeeni wira ophwanye yoolya? Nikhaliheryo xeeni naakhanle awe oovahiwa ni anna akina mmulokoni?

OLOKIHERYA ITTHU SAAHONONEN’YE OMUNEPANI NI VATTHOKONI

3. Muxankiho xeeni onaaphwanya anamwane anihiiwa ni anamuyari aya?

³ Eduardo onneemererya wira “kaaholowela waakhapelela anaaka, waavaha miruku okathi waatthuneya aya hata waaphenta. Miyo nkaakhanle vakhiviru wira kaasomele myaha sa mBiibiliyani, ovekela naawo, waakhupaarela hata othweelana”. (Otum. 6:7) Mwanawe mwaamuthiyana muulupale Anna onihimya so: “Miyo kaakhala ooxankiheya mwaha wa apaapa ohikhala nihiyo. Okathi otthinke aya, hiyo naasuwela mwaha wa waaweha owiitho ni wiiwa nsu naya. Okathi yaakikhupaarela aya apaapa, miyo khivaakisivela”.

4. Moota xeeni tiithi ohinikhala ni anaawe oniyeleela awe owerya wawe wa ohoolela emusi?

⁴ Tiithi aahikhale vatthokoni vawe onniyeleela owerya wawe ohoolela emusi ntoko muru wa etthoko. Rubi, amwaarawe Eduardo annitthokiherya so: “Kahaana ovara miteko sa atthu anli sa Maama ni sa Paapa, ni kaahaana opaka soothanla sinceene sa emusi ele. Vaavo Eduardo arwiiye awe kaahaana wiixutta omuttittimiha ni omwiiwelela. Mpakha olelo-va kihaana wiixupuxeryaka mmansaka wira vano aiyaka ahoorwa”. (aÉf. 5:22, 23) Eduardo onihimya so: “Anaaka yaahilimalela waavekela amamaya khula etthu. Miyo ni mwaaraka nahaana wiiraana okathi wowaalakiherya aniihu, ni kaahaana wiixutta moota etthoko ya eKristau sineettihiwa aya”.

5. Moota xeeni tiithi mmosa aapacenrye awe olokiherya itthu saahononenye okathi ahaakhanle awe, nto yaakhumelenle exeeni?

⁵ Eduardo ahilakela opaka sotheene wira olokiherye emusi awe ni olipiha omunepani. Owo onihimya so: “Yoolakela aka waari waaxuttiha ekeekhai anaaka kirumeelaka masu ni kaavahaka ntakiheryo, ohiya paahi waaleela wira miyo kinnimphenta Yehova masi kaaphavela owooniherya moota waamphenta aka”. (1 Yoh. 3:18) Niireke Yehova aahimureeliha Eduardo mwaha woopaka itthu mwa nroromelo? Anna onaakhula so: “Oweha moota aimananiha awe okhala tiithi ooloka ni ophavela wawe omwaattamela Yehova waahikumiherya mireerelo sinceene. Okathi waamoona ahu aakhulelaka miritti mmulokoni eyo yaaniniiriha ohakalala. Elapo yaaphavela onihapuxa wira nimuhiye Yehova. Waaweha anamuyari ahu akhalelaka nthiti ekeekhai waahiniiriha hiyo nave ophavela wira siiso. Paapa aahiniroromeliha wira khaarowa onihiya-tho ni khaanihinye. Vaakhanle wira aahinihiya khurowa, kinoona wira olelo nkaarowa okhala Namoona a Yehova”.

WEEMERERYA MURITTI

6. Etthu xeeni anamuyari anceene yiixuntte aya okathi wa ekhotto?

⁶ Okathi yoole muttetthe wa oBálcãs waawaniwa aya ekhotto, anamwane a Anamoona a Yehova yaawo yaakhala weiwe yaari oohakalala nnaamwi yaakhala muttetthe wa ekhotto. Mwaha wa xeeni? Okhala wira anamuyari aya khiyaarowa omutekoni, yaakhala owaani nto yanwerya owiixuttiha, othweelana ni ovaanela ni anamwane awo. Eyo enniixuttiha exeeni? Anamwane annisiveliwa okhala hoothe ni anamuyari aya ovikana ovahiwa musurukhu ni itthu soothweeliha sinceene. Mwekeekhai, ntoko Nuulumo na Muluku sinihimya aya, anamwane anoophwanya mureerelo akhala wira anookhapeleliwa ni wiixuttihiwa ni anamuyari aya.​—Mir. 22:6.

7, 8. (a) Etthu xeeni yoovonyeya anipaka aya anamuyari anitthikela vatthokoni vaya? (b) Exeeni anipaka aya anamuyari anceene wira axintte makhalelo oohiloka a anaaya?

⁷ Mooriipiha murima aakhala anamuyari aniira yatthikela owaani anaaphwanya anaaya yaavirikanenle. Awo ikwaha sinceene anihimya so: “Xeeni nyuwo ohooniheryaka oxukhuru wiimananiha wotheene kipanke aka wira munnuwe?”. Masi, ohiiwananeya wa anamwane awo ikwaha sinceene onikhumelela mwaha wa ohikhapeleliwa oratteene ni anamuyari aya. Nto exeeni anamuyari akhanle aya oopaka wira meelo ahiikhupanyerye siiso?

⁸ Munvekele Yehova wira wookhaliheryeni osuwela moonelo wa atthu a vatthokoni vanyu. Nto okathi onilavula anyu ni emusi anyu, mwaakhulele wira ni nyuwo moovonya. Ovekela oleveleliwa mookhalela pooti okhaliherya. Vaavo ole othelanne anyu ni aniinyu aniwoonaayani mwiimananihaka opaka itthu sooloka, awo anoosuwela wira nyuwo munihimya ekeekhai. Okhalana yoolakela ni opixa murima, onimookhaliheryani wuuraaniha emusi anyu.

‘MWAATHOKORERYE AMUSI ANYU’

9. Moota xeeni ‘waakhapelela amusi ahu’ ohinitaphulela aya omakelaka ophavela mihakhu?

⁹ Murummwa Paulo aahihimya wira vaavo maKristau oowuuluvala vahiniwerya aya wiikhapelela, anaaya ni axisulu aya ahaana “wakhapelela” amusi aya oowuuluvala. Masi Paulo ahaatumererya maKristau otheene wira atteeliweke murima ni itthu sirinaaya ntoko yoolya, soowara ni yoowiikhuneela. Hiyo nihiphaveleke okathi wotheene okhalana makhelelo aanamusurukhu hata othukumanya musurukhu wira nalyeeke muhoolo. (Mmusome 1 Timótheyo 5:4, 8; 6:6-10.) Moophavela waakhapelela atthu a vatthokoni vawe, muKristau khonitthuneya ophavelasa okhalana mihakhu sa olumwenku ola seiyo moohipisa sinirowa omala-malihiwa. (1 Yoh. 2:15-17) Hiyo niheemererye “wototha wa mihakhu” ni soovelaveliha sa ekumi sinooceelihaka “ophwanya ekumi yohimala” elapo esya ya Muluku!​—Mar. 4:19; Luka 21:34-36; 1 Tim. 6:19.

10. Voohimya sa okopha musurukhu, moota xeeni ninrowa ahu wooniherya okhalana osuwela wa Muluku?

¹⁰ Yehova onnisuwela wira hiyo ninniphavela musurukhu. Masi musurukhu khoniwerya onikhapelela sintoko saarowa aya onikhapelela osuwela wa Muluku. (Mus. 7:12; Luka 12:15) Ikwaha sinceene, atthu annipeepheiha woopiha waya orowa waavya muteko elapo ekina yoonaka wira anirowa ophwanya musurukhu munceene. Masi sookhala itthu sinceene soowoopiha sikhanle owaakhumelelaka. Atthu anceene anirowa ilapo sookhopela waavya muteko okathi mukina anitthika akompheene musurukhu munceene. Ohiya okhala ootaphuwa wira amurumeele Yehova awo anikhala ipottha sa atthu awo yaakophenle aya musurukhu. (Mmusome Miruku 22:7.) Osyaka okopha musurukhu wa atthu akina tekhanle ephiro yookhweya.

11. Moota xeeni omulepa palano a itthu yaarowa aya othuma waakhalihenrye aya etthoko ya Eduardo ovikana muxankiho wa othoiwa musurukhu?

¹¹ Eduardo ahoona wira ahaana osuwela ovarihela muteko musurukhu awe wira epalano awe ya otthikela owaani ekhumele saana. Owo ni amwaarawe yaahilepa itthu saatthuneya tthiri othummwa. Eliista ele yaarina itthu vakhaani ovikana itthu saawerya aya othuma khalai. Masi atthu otheene a vatthokoni vawe yaahiiwanana ohihonona musurukhu athumaka itthu sihilempwale.b Eduardo onihimya so: “kahaakumiha anaaka exikola yaasoma aya yaaliviwa musurukhu munceene, khaarowana exikola ya guvernu”. Owo vamosa ni emusi awe yaahipaka mavekelo wira owo ophwanye muteko wahaarowa ohonona eprograma aya yomunepani. Nto Yehova aakhunle sai mavekelo aya?

12, 13. Mavalo xeeni tiithi mmosa otthanre awe wira olokiherye emusi awe, ni moota xeeni Yehova oreelinhe awe wiimananiha wawe ohiixaattiherya itthu mweekumini?

¹² Eduardo onihimya so: “Iyaakha piili soopacerya saari sooxankiha vanceene. Musurukhu ahu waari vakhaani, khaaphiyerya olyiha emusi aka, ni miyo kaari ookhulumuwa. Masi naaniwerya orowa mithukumano sotheene ni muteko woolaleerya”. Eduardo ahaana ohela mmuupuweleloni mwawe wira khaarowa waakhulela muteko aarowa omwiiriha ohiya etthoko awe okathi munceene. Owo onihimya so “ohiya ororomelaka muteko mmosa paahi, kaahiixutta miteko soovirikana, nto kaahiphwanye mmosa kamphwanya mukina”.

¹³ Okhala wira Eduardo ahaana oliva musurukhu aakomphe awe vakhani-vakhani, nto owo aahaana oliva ixuuru sinceene ovikana musurukhu aakhomphe awe. Masi owo ahoona musurukhu owo okhala vakhaani, ovikana okhala vamosa ni etthoko awe ni waahuwa anaawe ntoko Yehova siniphavela awe. Owo onihimya so: “Olelo-va kiniphwanya musurukhu ohiniphiya 10 porcento ya ole waaphwanya aka kivaraka muteko elapo ya okhopela, masi khannivoliwa etala”. Tthiri ‘mono wa Yehova khunkhuveya’. Nto nookela muteko wa epioneero. Voohakalaliha-vo, nuumala okela muteko wa opioneero osikhini woonivukuwa, okhala wira nno onrweela vanninikhweela ophwaya itthu sinnithowa.​—Yes. 59:1.

WATAANA NI EMUSI OKATHI WA MIXANKIHO

14, 15. Moota xeeni imusi sinirowa aya okhootta okhanyereriwa ni amusi aya wira akhaleleke nthiti mihakhu, nto exeeni enikhumelela mutthu athanla itthu somunepani?

¹⁴ Mapuro manceene a mulaponi, atthu annikhanyereriwa waavaha musurukhu ni itthu sikina amusi ni apatthani. Eduardo onihimya so “Eyo yoolema ya elapo aka ni miyo ennikisivela”. Owo onincererya so: “Masi eyo yookhalana mukano aya. Miyo kahaaleela amusi aka wira kaamwaavahaka khula etthu yaaweryaaka, masi nkaarowa opaka etthu yaarowa waahasula atthu a emusi aka mwa werutthuni wala omunepani”.

¹⁵ Atthu yaale anithaamela ilapo sikina aniira nootthikela elapo aya anavenya-tho atthikelaka okhopela okhala wene eniwiiriha esara, othanyiwa ni ovololiheya mwaha woowi amusi aya anoona wira aanoopweteiwa musurukhu. Akina anniwoona awo okhala atthu oohiphenta. (Mir. 19:6, 7) Mwanawe Eduardo mwaamuthiyana, Anna onihimya so: “Vaavale mutthu onikhootta awe ohela mihakhu nipuro noopacerya, nto amusi awe anoowerya woona efaita ya itthu somunepani. Masi awo anirowa wiixutta sai eyo akhala wira hiyo ninnaakhulela okhanyererya waya?”​—Mulikanyihe ni 1 Pedru 3:1, 2.

MOONIHERYE OMWAAMINI MULUKU

16. (a) Moota xeeni mutthu okhanle awe ‘owisototha’ ni muupuwelelo woohiloka? (Yak. 1:22) (b) Soothanla sa moota xeeni seiyo Yehova onireeliha awe?

¹⁶ Nuumala othaamela elapo yoothaaciri, ni waahiya anaawe ni aiyawe, murokora mmosa aahimeeryale so axitokweene: “hiyo nahaana oleva itthu sinceene wira miyo kiwerye orwa elapo ela. Aiyaka yahaana ohiya okhala mutokweene. Nto kinnaamini wira Yehova onooreeliha othaama waka nno”. Okhala wene Yehova onnireeliha soothanla sinivarihana ni yootthuna awe, masi aarowa oreeliha sai yoothanla enivonyola malamulo awe, vanceenexa yeele enihela muhina mutthu ohiya ovara miteko sa mmulokoni vahimulattu?​—Mmusome aHéberi 11:6; 1 Yohani 5:13-15.

17. Xeeni vanitthuneya ahu ovekelaka miruku sa Yehova nihinatthi opaka yoothanla, nto ninrowa opaka sai eyo?

¹⁷ Mphaveleke miruku sa Yehova muhinatthi opaka yoothanla anyu, ohiya opaceryaka opaka yoothanla nto khiyamukoha Yehova yoowiira. Munvekele wira oovaheni munepa wootteela, osuwela ni malakiheryo. (2 Tim. 1:7) Mwiikoheke mmensinyu: ‘Kinirowa omwiiwelela Yehova mpakha vaavi? Niireke kinoowerya omwiiwelela kaalupatthiwaka?’ Nto niireke nyuwo munoowerya omwiiwelela Yehova hata murowaka okhalana musurukhu vakhaani ovikana khalai? (Luka 14:33) Mwaavekele axitokweene miruku sa mBiibiliyani, mooniherye nroromelo wa Yehova ni anatiri awe wira munrowa oreelihiwa mwamwiiwelela. Ekeekhai wira axitokweene khanirowa woopakelani yoothanla, masi awo anoowerya wookhaliheryani opaka yoothanla enirowa woophwanyihani ohakalala okathi onivira anyu ephiro ya ekumi.​—2 aKor. 1:24.

18. Ti pani orina muritti wa ohoolela etthoko, masi makhalelo xeeni aniwiiriha atthu akina okhaliherya?

¹⁸ Yehova onvaha mulopwana “muritti” wa okhapelela emusi nihiku ti nihiku. Hiyo nihaana waattottopela ni waavekelela ale aniwerya waakhwaniherya muritti aya ahithaamenle elapo ekina ni waahiya ale athelanne aya wala anaaya, hata akhanyereriwaka wira siiso. Sookhumelela sootutuxerya ntoko ehasara ya ephattu wala oretta, onninivaha okathi wa wooniherya ophenta wahu wa eKristau mukina ni mukhwaawe. (aGal. 6:2, 5; 1 Ped. 3:8) Niireke munniwerya ovaha musurukhu yakhumelela ehasara wala omukhaliherya munna ophwanya muteko mapuro yaawo anikhala anyu? Neera siiso, nnimwaavukula othunku anna akina wira ahithoiwe vanceene mpakha woona oreerela othaamela mapuro makina orowa waavya muteko.​—Mir. 3:27, 28; 1 Yoh. 3:17.

MUUPUWELEKE WIRA YEHOVA TI NAMAKHALIHERYA ANYU!

19, 20. Xeeni maKristau anitthuneya aya otteeliwa murima mwaha woosuwela wira Yehova onirowa waakhaliherya?

¹⁹ Biibiliya onnilopola so: “Murim’anyu ohettihiweké ni milili, muhakalaleke n’itthu sirinanyu, okhala wira Muluku mwanene òhimya wira: ‘Miyo nkinonyanyalani-tho: kinimojalani mahiku othene’. Tivó, nihimyeke ni nroromelo wira: ‘Apwiya [Yehova] t’anikikhaliherya, tivó vahinòvaka etthu. Atthu anwerya okìriha exeni?’” (aHéb. 13:5, 6) Miruku iya sinivareleya sai muteko?

²⁰ Mutokweene mmosa owunnuwela onikhala elapo yoohawiwa onihimya so: “Atthu anihimya wira Anamoona a Yehova toohakalala. Awo annihimya-tho wira Anamoona okhala wene toophwaneliwa hata ale oothoiwa anikhala oowiirattela waavikana anammawaani akina”. Eyo ennivarihana ni ele Yesu aaleihenrye awe ale yaarowa ohela Omwene nipuro noopacerya. (Math. 6:28-30, 33) Aayo, Tiithi anyu a wiirimu Yehova, onnoophentani nyuwo ni aniinyu oophavelelakani itthu sooloka paahi. Tthiri “Apwiya [Yehova] anniweha ilapo sothene wira yakhaliherye ale anaroromela ni murim’aya wothene”. (2 Wah. 16:9) Owo oonivaha malamulo awe yaawo anihela muhina makhalelo a vatthokoni ni ohiphavela mihakhu wira nittotteleke mureerelo. Vaavo vaniiwelela ahu malakiheryo awo ninnooniherya wira ninnimphenta ni omuroromela yoowo. Tivo vanihimmwa aya so: “Vano, nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”.​—1 Yoh. 5:3

21, 22. Xeeni nyuwo mulakenle anyu wooniherya omuroromela wanyu Yehova?

²¹ Eduardo onimaliha oriki so: “Koosuwela wira okathi ovirinhe aka kiri ottaiwene ni amwaaraka ni anaaka khonittikihereya ottuli, wookipweteya. Masi nkiniikhupanyiha mwaha wa eyo. Okhala wira atthu yaavarana aka muteko olelo-va aathaciri masi khaniteeliwa murima. Imusi saya soosareya mixankiho. Masi emusi aka ti yoohakalala tthiri. Ni vannikisivela waaweha anna anceene hata ari oothoiwa, masi anivikaniha ohela Omwene nipuro noopacerya. Hiyo otheene ninnoona wiiraneya wa yoolaiherya ya Yesu”.​—Mmusome Matheyo 6:33.

²² Nikhalane nroromelo nooloka! Muthanle omwiiwelela Yehova ni omuroromela yoowo. Mweemererye wira omphenta wanyu Yehova, ole othelanne anyu ni aniinyu wookhaliheryeni waakhwaniherya muritti anyu wookhapelela emusi anyu werutthuni ni omunepani. Eyo enoowiirihani woona wira tthiri ‘Yehova tokhanle namakhaliherya anyu’.

[Inoota]