MWAHA WA VAKAAPANI

Muluku Onoonela Sai Ikhotto?

Mwaarowa waakhula sai nikoho nlo? Anamunceene anuupuwela wira Muluku sinnimusivela ikhotto, maana Biibiliya onnihimya wira khalai Muluku aahaaruma arumeyi awe owana ekhotto. Masi, akina annisuwela wira Yesu, Mwaana a Muluku, aahiwiixuttiha atthareli awe wira yaaphenteke awanani aya. (Matheyo 5:43, 44) Mwaha wa yeeyo, awo anuupuwela wira moonelo wa Muluku wooturukeya nto olelo-va khonisiveliwa ni ikhotto.

Ankhi nyuwo munoonela sai? Niireke Muluku onnisiveliwa ikhotto wala nnaari? Akhala wira onnisiveliwa, onaakhaliherya atthu xeeni? Ophwanya waakhuliwa wa makoho ala onimookhaliheryani otokosa moonelo anyu voohimya sa ikhotto. Mwa ntakiheryo, vaakhanle wira moosuwela wira Muluku onikhaliherya egrupu ya anakhotto yeeyo nyuwo muri anyu, mwaarowa woonela sai? Woonasa wene mwaamuhakalala muroromelaka wira egrupu anyu enooxintta. Masi, mwaarowa woonela sai vaakhanle wira moosuwela-tho wira Muluku onaakhaliherya awanani anyu? Waaniheryasa, mwaamurowa egrupu yeeyo.

Yookhala-tho etthu ekina yootepa otthuneya. Osuwela moonelo wa Muluku pooti orukunuxa muupuwelo anyu voohimya sa Muluku. Akhala wira yootoko woophwanyani ekhotto, tthiri munniphavela osuwela nikoho nni: Niireke Muluku onnisiveliwa omwarexa ephome, ntoko atthu akina sinuupuwela aya? Aahiiso khoniwoonela othunku ale anihaaxiwa ni ikhotto?

Waakhula wa Biibiliya onnivirikana ni miyuupuwelo iyo. Tthiri, okhuma khalai mpakha olelo-va, moonelo wa Muluku mmosaru. Nrowe niwehe ele Biibiliya onihimya awe sa moota Muluku oonela awe ikhotto khalai, ni eseekulu yoopacerya, okathi Yesu ari awe valaponi. Eyo enoonikhaliherya osuwela moota onoonela awe ikhotto olelo-va. Nave-tho nnoosuwela akhala wira ikhotto sinrowa ovikanihaka okhumela muhoolo.