MWAHA WA VAKAAPANI | MULUKU ONOONELA SAI IKHOTTO?

Muluku Onoonela Sai Ikhotto Mahiku Ala?

Olelo-va atthu annihaaxiwa. Anamunceene animakela onvekela Muluku wira aakhaliherye, ni anniikoha akhala wira owo onimwaakhaliherya tthiri. Niireke Muluku onnaawiriyana atthu awo? Ankhi ale anirumeela ekhotto wira yiisaakihe? Niireke Muluku onnikhaliherya wiimananiha waya, ni onnoona ekhotto okhala etthu yookhalela?

Wanipacerya, ti voohakalaliha osuwela wira Muluku onniweha ohaawa molumwenkuni, ni onnileiherya omaliha. (Esalimo 72:13, 14) Muluku ooleiherya waavaha murettele ale anihaawa. Eyo enrowa wiireya liini? “Nihiku Pwiya Yesu onrowawe okhumelela wirimu vamosá ni malaikh’awe òwerya . . . wira àhukhumu ale ahinimusuwela [Muluku] yawo akhontte wiwelela ehapari yorera ya Pwiy’ahu Yesu”. (2 aTesalonika 1:7, 8) Okhumelela nno wa Yesu onrowa wiireya muhoolo okathi yoole Biibiliya oniitthana awe okhala “ekhotto ya nihiku nulupale na Muluku òwerya sothene”, aahiiso, Harmagedoni.​—Wisupulula 16:14, 16.

Ekhotto eyo ya muhoolo, Muluku khonrowa waavarihela muteko apinaatamu, masi onrowa omuruma Mwanawe, Yesu Kristu, ni malaikha Awe wira yaapwetexe atakhali. Anakhotto awo anoomaliha ohaaxana wotheene.​—Yesaya 11:4; Wisupulula 19:11-16.

Voohimya sa nihiku nlo, moonelo wa Muluku nlelo mmosaru. Owo onnoona ekhotto ntoko enamuna yookhalela wira omalihe ohaaxana ni otakhala. Okhuma khalai, Muluku paahi torina ehakhi yoohimya okathi enrowa aya okhumelela ekhotto ni ale anirowa owana. Ntoko niwenhe ahu, Muluku ooleiherya wira muhoolo onookumiherya ekhotto enrowa omaliha otakhala wotheene. Nto Mwanawe, Yesu Kristu, tonrowa owana ekhotto eyo. Nto eyo enooniherya wira Muluku khonisiveliwa ni ikhotto sa olelo-va, hata sikhalaka ntoko ti sa xariya.

Nilikanyihe wira anamwane anli anoowana, masi paapa aya ookhuma. Nto nuuvira okathi vakhaani annihiyana enamuligarela paapa aya. Mmosa onnihimya wira mukhwaawe topacenrye, masi mukina onnihimya wira ommana mukhwaawe mwaha woowi aaronveeha. Khula mmosa onlipelela wira onookhaliheriwa ni paapa ole. Masi paapa onnaawiriyana oowanli ni onnaaleela wira ehiyane ni emulipelele. Moohipisa anamwane ale annitthikela owana. Okathi paapa aya ontthika awe, onninyoonyiwa ni anamwane ale ni onnaahukhumu maana khamwiiwelenle.

Olelo-va, maloko aniwana animakela onvekela Muluku wira aakhaliherye. Masi owo khonikhaliherya ikhotto iyo. Biibiliya onihimya so: “Muhilivé yotakhala enìreliwanyu ni yotakhala ekina” ni “muhiwunlelé ikuhu akhw’inyu”. (aRoma 12:17, 19) Muluku onnaaleela apinaatamu wira ahaana omulipelelaka wira ophuke muxankiho owo orweela wa ekhotto ya Harmagedoni. (Esalimo 37:7) Vaavo maloko awo aniwana aya ekhotto ohiya omulipelela Muluku, eyo enninveeha yena ni onnoona wira maloko awo towiixinnuuha ni tootakhala. Nto, okathi wa Harmagedoni, Muluku onimooniherya onanariwa wawe, ni onoomaliha ohiiwanana wa maloko otheene ni “ekhotto mulaponi mothene”. (Esalimo 46:10; Yesaya 34:2) Moohaaniherya, ekhotto ya Harmagedoni enoomaliha ikhotto sotheene sa apinaatamu.

Tthiri Omwene wa Muluku onooruuha mareeliho manceene, ni omaliha ikhotto. Yesu aahilavula sa Omwene owo orweela wa nivekelo nawe noosuweliwa, oriki: ‘Omwene anyu orwe. Otthuna wanyu wireye ntoko wirimu siso vathí-va’. (Matheyo 6:10) Omwene wa Muluku onoomaliha ikhotto sotheene ni itthu siniiriha okhumelela ikhotto iyo ni otakhala.a (Esalimo 37:9, 10, 14, 15) Tthiri, atthareli a Yesu annilipelela moohakalala mareeliho a Omwene wa Muluku.​—2 Pedru 3:13.

Nto silini Omwene wa Muluku onrowa aya omaliha ohaawa, opuheryana ni otakhala? Wiiraneya wa iprofesia sinceene sa Biibiliya, onooniherya wira ninkhala “okathi wokiserya” wa olumwenku ola. (2 Timótheyo 3:1-5)b Moohipisa, mahiku ala ookiserya anoomala vaavo Omwene wa Muluku onirowa aya oruuha ekhotto ya Harmagedoni.

Ntoko soonale ahu, okathi wa ekhotto eyo, ale “akhontte wiwelela ehapari yorera ya Pwiy’ahu Yesu”, animookhwa. (2 aTesalonika 1:8) Masi, muhiliyale wira Muluku khonisiveliwa waaweha atthu akhwaaka, ohela muhina atakhali. (Ezekiyeli 33:11) Okhala wira okathi wa ekhotto eyo Muluku “khantthuna wira mutthu apweteye, nnákhala mmosá”, onnirumiha olaleiwa ihapari sooreera sa Pwiya Yesu “mulaponi mothene, wira maloko othene esuwele yamini” nuumala ophiyeke wanikisa. (2 Pedru 3:8, 9; Matheyo 24:14; 1 Timótheyo 2:3, 4) Tthiri, muteko woolaleerya olumwenku wotheene wa Anamoona a Yehova, onnaakhaliherya atthu omusuwela Muluku, ni weettela ihapari sooreera sa Yesu, wira yakhale akumi vaavo ikhotto sihinrowa aya okhala-tho.

[Inoota]