MWAHA WA VAKAAPANI | MULUKU ONOONELA SAI IKHOTTO?

Muluku Oonela Sai Ikhotto SAAWANIWA KHALAI?

Khalai, naahikhala nloko naahaaxiwa. Nloko nlo naaninvekela Muluku, masi atthu awo khiyaakhaliheriwe okathi ene yoowo. Awo yaari aIsarayeli, atthu a Muluku a okathi wa khalai. Yaahaaxiwa ni nloko noowerya na wEjiitu. (Okhuma 1:13, 14) Mwa iyaakha sinceene, aIsarayeli yaanilipelela wira Muluku aarowa omaliha ohaaxiwa iwo. Vano waahiphiya okathi wira Muluku opake etthu. (Okhuma 3:7-10) Biibiliya onihimya wira Muluku aahiwana ni atthu a wEjiitu. Aahaaruuhela ihukhumu 10, ni aahimwiiva mwene aya ni anakhotto awe Ephareya Yooxeerya. (Esalimo 136:15) Yehova Muluku aahooniherya okhala ‘nakhotto owerya’, awoopolaka atthu awe.​—Okhuma 15:3, 4.

Mwaha wa Muluku owana ekhotto ni atthu a wEjiitu, eyo enooniherya wira khoninyokha ikhotto sotheene. Okathi mukina, Muluku aanaaruma aIsarayeli owana ekhotto. Mwa ntakiheryo, aahaaruma owana ni aKaanani ootakhala. (Otumererya 9:5; 20:17, 18) Nave, aahimuruma Davidi, Mwene a wIsarayeli, owana ni aFilisti yaawo yaahaaxa. Muluku aahimuleela Davidi enamuna yoowana wira aaxintte aFilisti.​—2 Samuweli 5:17-25.

Sowiiraneya iyo sa mBiibiliyani sinnooniherya wira okathi aIsarayeli yaahaaxiwa aya, Muluku aanaaruma owana ekhotto wira aakhapelele arumeyi awe ni waakiherya okokhorela wekeekhai. Masi, moone itthu 3 suulupale voohimya sa ikhotto sa Muluku:

1. MULUKU TAAMUTHANLA OLE AAROWA OWANA EKHOTTO. Okathi omosa, Muluku aahaaleela aIsarayeli wira: “Nyuwo khamunrowa owanano”. Mwaha aya? Muluku taarowa owana wira owoopole. (2 Wahala 20:17; 32:7, 8) Owo aanipaka eyo ikwaha sinceene ntoko niwenhe ahu mwaha yoola. Okathi mukina Muluku aanaaruma atthu awe wIsarayeli wa khalai owana ikhotto, ophavelaka waakhapelela ni waakiherya Elapo aya Yooleiheriwa.​—Otumererya 7:1, 2; Yoxuwa 10:40.

2. MULUKU TAATHANLA OKATHI WAAROWA AYA OWANIWA EKHOTTO EYO. Arumeyi a Muluku yaahaana olipelela moopixa murima okathi owo aathanlale awe wira awane ni atthu yaahaaxa. Nto awo yahaana osyaka orowa okhottoni ahirummwale. Okathi yaikuxererya aya, Muluku aanihiya waakhaliherya. Tthiri, Biibiliya onnooniherya wira okathi aIsarayeli yaawana aya ekhotto ahirummwale ni Muluku yaanixinttiwa.a

3. MULUKU KHONISIVELIWA NI OKHWA WA ATTHU, HATA ALE OOTAKHALA. Yehova Muluku ti Maphattuwelo a okumi ni Mpattuxa a apinaatamu. (Esalimo 36:10) Owo khoniphavela owoona atthu ekhwaaka. Mooriipiha murima, aakhala atthu anaahaaxa ni owiiva akhwaaya. (Esalimo 37:12, 14) Wira Muluku okhoottiherye eyo, ikwaha sikina aanaaruma atthu awe owana ni atakhali awo. Nnaamwi saavinre iyaakha sinceene aIsarayeli ewanaka ikhotto iyo, Muluku aanaamorela ikharari ni ‘opisa waviruwela’ ale yaahaaxa aIsarayeli. (Esalimo 86:15) Mwa ntakiheryo, owo aahaaruma aIsarayeli wira: “Muhinatthi otuphela [muttetthe owo], mwalattule atthu a mmuttettheni mme wira yovareni metto”. (Otumererya 20:10-13) Eyo yaanaavaha eparakha atthu awo oturuka mukhalelo aya ni osyaka ekhotto. Nto, Muluku aahooniherya wira khonsiveliwa “n’ukhwa w’alipa-òttheka”. Masi oniphavelexa “wira anatampi erukunuxe mukhalelo aya, ekhalane ekumi”.​—Ezekiyeli 33:11, 14-16.b

Nto nooweha wira okathi wa khalai, Muluku aaniweemererya arumeyi awe owana ekhotto ophavelaka owaakiherya vaavo yaahaaxiwa aya. Masi Muluku, ohiya apinaatamu, taathanla okathi ene waawaniwa aya ekhotto eyo, vamosa ni ale yiirela mpantta. Niireke Muluku aanisiveliwa owana ikhotto iyo? Nnaari. Owo onninyokha otakhala. (Esalimo 11:5) Niireke Moonelo wa Muluku voohimya sa ikhotto wooturukeya nuumala Mwanawe, Yesu Kristu, opacerya muteko awe valaponi eseekulu yoopacerya?

[Inoota]