Mukhapelele Muupuwelo Anyu
1. Muthukumano wa esirkwitu wa 2013 orina muru xeeni, ni tiivi eri yoolakela awe?
1 Yesu ahaatumererya awiixutti awe omphenta Yehova ni murima aya, okumi aya ni muupuwelelo aya wotheene. (Math. 22:37, 38) Kongresu ni mithukumano sa esirkwitu sa mwaakha ola, soolokiheriwa wira sinikhaliherye olipiha murima ni muupuwelo ahu. Munuupuwela wira, muru a kongresu ahu a eDistritu waahimya wira “Mukhapelele Mukhalelo wa Murima Anyu!” Eprokrama ya nihiku na asembeleya a vamekha awe mwaakha wa muteko 2013 muru aya oni: “Mukhapelele Yowuupuxerya Anyu ya Murima”. Mithukumano sa asembeleya a esirkwitu sinipacerya mweeri owo onirwa, muru aya oni: “Mukhapelele Muupuwelo Anyu”, onikhuma mwa yoolepa ya Matheyo 22:37. Eprokrama ela etthokihiwe wira enikhaliherye woona moota muupuwelo ahu okhanle aya oowerya omuhakalaliha Yehova.
2. Makoho xeeni anrowa ahu ophavelaka waakhuliwa waya okathi wa eprograma eyo?
2 Exeeni Enrowa Othokoreriwa: Okathi woowiriyana eprograma eyo, nihaana ophavela waakhula makoho ala anittharelana a iponto suulupale:
• Ninrowa osyaka sai okhalana ‘muupuwelo woohiloka wa atthu’?
• Ninrowa otthukula sai maitho wala muupuwelo wa atthu ahinaamini?
• Muupuwelo xeeni onitthuneya ahu okhalana?
• Onikumiherya mireerelo xeeni mutthu wuupuwelela saana ele enisoma awe?
• Ninrowa omweemya sai Yehova wira olokiherye muupuwelo ahu?
• Anamathelana, amusi, ni anamwane, epakeke exeeni wira emusi ekhaleke yoohakalala?
• Nipake exeeni wira niilokiherye mwaha wa nihiku na Yehova?
• Onitaphulela exeeni olipiha muupuwelo ahu wira nivare muteko?
• Mureerelo xeeni oniphwanya aya ale anivarela muteko ele eniixutta aya?
3. Xeeni oryaaya vootthuneya orowa mahiku oomanli, owiriyana saana, ni ovarihela muteko ele eniixutta ahu?
3 Satana onnintteha-tteha ophavelaka opahula miyupuwelelo sahu. (2 aKor. 11:3) Tivonto nihaana okhapelela murima ahu ni muupuwelo ahu. Nihaana ovikaniha omutakiha Kristu, ni okhoottela mweettelo woohiloka wa elapo ela. (1 aKor. 2:16) Tivonto mpake marehereryo wira murowe mahiku oomanli a muthukumano wa esirkwitu. Mwawiriyaneke saana. Nto ovarela muteko malakiheryo awo ootthuneya onooniiriha olipiha muupuwelo ahu wira nikhalele nthiti olaleya Omwene.—1 Ped. 1:13.