Nuulumo na Muluku ti Noottotteleya Mureerelo Wira Niixuttihe
1. Asembeleya a esirkwitu a mwaakha wa muteko a 2014, orina muru xeeni, nto nikoho xeeni ninrowa waakhuliwa okathi wa eprograma?
1 ‘Mwixuttihi’ ahu Muulupalexa, Yehova, ti mulipa ootepexa osuwela wiixuttiha molumwenkuni. (Yes. 30:20, 21) Nto, Yehova onniixuttiha sai? Owo oonivaha eliivuru enivikana iliivuru sotheene, eyo piiyo, Nuulumo nawe, Biibiliya. Moota xeeni sowiixuttiha sa Muluku sinnikhaliherya aya mmukhalelo wa werutthuni, mmuupuweloni, ni omunepani? Nikoho nlo nnimwaakhuliwa okathi wa asembeleya a esirkwitu a mwaakha wa muteko a 2014. Muru aya oni: “Nuulumo na Muluku ti Noottotteleya Mureerelo Wira Niixuttihe”; onikhuma yoolepa ya 2 Timótheyo 3:16.
2. Makoho xeeni anrowa waakhuliwa okathi wa eprograma ya asembeleya?
2 Mwaavye Osuwela Iponto iya Suulupale: Iponto suulupale sa eprograma sinrowa waakhula makoho ala anittharelana:
• Sowiixuttiha sa Muluku sinnikhaliherya sai mookumini mwahu? (Yes. 48:17, 18)
• Akhala wira nnoopaka marukunuxo mookumini mwahu, wira nimurumeele Yehova mmuteko wa okathi wotheene, exeeni ekhanle ahu oororomela? (Mal. 3:10)
• Nipakeke exeeni vaavo ninkumana ahu ni “sowixuttiha sikina sovirikana”? (aHéb. 13:9)
• Ninrowa otakiha sai enamuna ya ‘wixuttiha’ wa Yesu? (Math. 7:28, 29)
• Xeeni ale aniixuttiha mmulokoni anitthuneya aya wixiixuttiha mmensaya? (aRom. 2:21)
• Nuulumo na Muluku ti noottotteleya mureerelo wa etthu xeeni? (2 Tim. 3:16)
• Moota xeeni ‘othukumelihiwa’ wa maloko a atthu onaakhaliherya aya atthu anceene? (Hag. 2:6, 7)
• Nroromelo xeeni Yehova orina awe wa hiyo? (aÉf. 5:1)
• Xeeni nintthuneya ahu wiimananihaka wira nivikanihe weettela sowiixuttiha sa Yehova? (Luka 13:24)
3. Xeeni vari aya vootthuneya ohicompela ni owiriyana saana eprograma ya asembeleya?
3 Ahinatthi olempwa masu a eveersu a muru wa asembeleya ola, iversiikulu vakhaani siri ottuli wa 2 Timótheyo ekapiitulu 3, Paulo aahiromola sa okathi wooxankiha waarowa okhumelela mahiku ookiserya. Owo aalempe so: “Atthu òtakhala murima ni òwòtha anovira etepaka: awo anowototha akhw’aya, nto awo axinene animotothiwa”. (2 Tim. 3:13) Tivonto, wira nihootothiwe, ti vootthuneya owiriyana ni weettela sowiixuttiha sa Muluku. Nto, nrowe nilakele ohicompela ni owiriyana saana eprograma ela elokiheriwe mwa okathi aya.