5-11 YA AGOSTO

MIHAKHU SINIKHUMA MBIIBILIYANI

1. Mwaaleele Owerya wa Muluku “Othene Ale Anrwa Oholo”

(10 min.)

Davidi aaniweha wiira aanikhapeleliwa ni Yehova okathi wa omiravo awe. (Esa 71:5; Sentinela 99 1/9 epaax. 18 etti. 17)

Hata okathi uuluvanle awe, Davidi aanisuwela wiira anikhaliheriwa ni Yehova. (Esa 71:9; Despertai! 04 8/10 epaax. 23 etti. 3)

Vaavo Davidi aaleela awe amiravo akina soowiiraneya sawe, owo aanaalipiha. (Esa 71:17, 18; Owehaweha 14 15/1 epaax. 23 itti. 4-5)

Emusi emosa ninweha ahu esumana evinre mpantta oni: “Malakiheryo a Moota Woomulompa Muluku Vatthokoni”. Awo anniwaakhela anamathelana akina vatthokoni vaya wiira amulompe Muluku hoothe nave annihakalala vaavo anooniheriwa aya ifootu sa soowiiraneya sa anamathelana ale yaalattunle aya.

MWIIKOHEKE SO: ‘Munna xeeni aahiiso murokora opacenrye khalai omurumeela Yehova, kiniphavela aka omukoha soowiiraneya sawe okathi Woomulompa Muluku Vatthokoni?’

2. Itthu sa Efaita sa Mbiibiliyani

(10 min.)

Esa 72:8 — Yiiraneyale sai etthu Yehova aamuleihenrye awe Abrahamu eri Maphattuwelo 15:18, okathi wa olamulelo wa Mwene Salomoni? (Perspicaz vol. 1 epaax. 892 etti. 2)

Mwaakhule va
Itthu xeeni sa efaita siphwannye anyu okathi mwaamusoma anyu Biibiliya esumana ela?

Mwaakhule va

3. Omuleeri Biibiliya

(4 min.) Esa 71:1-24. (Wiixuttiha yoosoma 5)

MUKHALELEKE NTHITI MUTEKO WOOLALEERYA

4. Ovaanela Woopacerya

(3 min.) OLALEERYA EMPA NI EMPA. Akhala wiira mwaneene etthoko onnipacerya olavula itthu sinceene, mmaliheke ovaanela iwo mwa enamuna yooloka. (Waaphenta Atthu yoosoma 4 eponto 5)

5. Ohihiya Waakhaliherya

(4 min.) OLALEERYA MOOHIILOKIHERYA. Nvaanele ni mmusi mwaatonko anyu olavulana yoowo ohiniphavela yoosoma ya Biibiliya. (Waaphenta Atthu yoosoma 8 eponto 4)

6. Otthokiherya Sookupali Sanyu

(5 min.) Mwaha. Makoho Animakela Okohiwa 35 — Muru: Niireke Anamoona a Yehova Ampanke Biibiliya Aya Wira Ovarihaneke ni Itthu Anikupali Aya? (Wiixuttiha yoosoma 17)

MAKHALELO A MAKRISTAU

7. Malakiheryo a Moota Woomulompa Muluku Vatthokoni

(15 min.) Mwaha ni makoho vakhaani.

Emusi yooniheriwe wanipacerya, vano yeemenle yinsayariki isipo sa Omwene.

Emusi emosa awehaka eprokrama ya JW Broadcasting.

Mwaana mmosa mwaamuthiyana omwaakhula amaama awe okhathi wa yooniherya vaavo animulompa aya Muluku vatthokoni vaya.

Okathi wa Omulompa Muluku Vatthokoni, ti wooreerela wiira anamwane yiixutte “malakiheryo a Yehova”. (aEef 6:4) Wiira mutthu iixutte, onipirisari wiimananiha. Masi ti voohakalaliha otepexa wene anamwane maana okathi yoowo anincererya aya osuwela waya ikeekhai sa mbiibiliyani. (Yoh 6:27; 1 Pe 2:2) Nwehe ekaaxa eni: “Malakiheryo a Moota Woomulompa Muluku Vatthokoni” yeeyo enrowa waakhaliherya anamuyari wiiriha Omulompa waya Muluku okhala woovara murima ni woohakalaliha. Nuumala-vo, muthokorerye ni alipa-oowiriyana makoho anittharelana:

Eponto xeeni eniphwanyaneya ekaaxa ela mwaaphavela anyu ovarihela muteko?

Mwaakhule va
Niireke moophwanya etthu ekina yoosivenleni ni enrowa wookhaliheryani?

Mwaakhule va

MALAKIHERYO A MOOTA WOOMULOMPA MULUKU VATTHOKONI

BIIBILIYA:

Munwiriyaneke audiyu a mbiibiliyani ookaravariwa a eprokrama ya esumana eyo aahiiso mmusomeke voowiiwanyeya. Khula mutthu a vatthokoni pooti osoma moolumo a atthu oovirikana aniromoliwa mbiibiliyani.
Mulokiheryeke makoho moovarihana ni eprokrama ya yoosoma ya Biibiliya a esumana eyo. Emusi eyo pooti ovarihana nikoho nimosa vano khula mutthu otokoseke. Nuumala otokosa, awo pooti othukumana wiira ahimye itthu yiixuntta aya.
Mpakeke nikoho aahiiso muhimyeke yoowiiraneya, moottharelana, mutokoseke malakiheryo anrowa wookhaliheryani murumeelaka eliivuru eni: Iversiikulu Sinaakhaliherya Makristau
Muthanleke yoowiiraneya ya mbiibiliyani ni mutakiheke itthu sootheene sinihela muhina
Mulokiheryeke ekartau anyu ya memooriya aahiiso efeleexi muhelaka audiyu a iversiikulu sa mbiibiliyani soovirikana khula esumana ntoko siri apendise A, a ebroxuura eni: Waaphenta Atthu — Onimookhaliheryani Waapaka Awiixutti. Nuumala-vo, mmananiheke wuupuwelela. Nyuwo pooti otthikela owiriyana ekartau erina audiyu a iversiikulu sa isumana sivinre
Musomeke mpantta mmosa wa eliivuru Okumi Woohimala!
Mwaavekeleke atthu a vatthokoni, wiira ahimye itthu yiixuntte aya ni myaha siri mpantta oni: Séries “Perguntas Bíblicas Respondidas” aahiiso “Textos Bíblicos Explicados” siniphwanyaneya mpantta oni: ENSINOS BÍBLICOS va jw.org

MITHUKUMANO:

Mulokiheryeke mithukumano sa mmulokoni
Mwinsayariki ikomentaario sanyu. Mwiivaheke okathi
Mulokiheryeke isipo sa Omwene
Muthokoreryeke ni nvariheleke muteko etthu mukhanle anyu oohimya enrowa omulipiha mutthu mukina sihinatthi ni nuumala mithukumano sinittharelana
Mulokiheryeke ni mwinsayariki mpantta ovahiwa awe mutthu mmosa a vatthokoni vanyu wa mithukumano sa eriyari ya esumana

MUTEKO WOOLALEERYA:

Mwiilokiheryeke moota woolaleerya empa ni empa
Mwiilokiheryeke moota wootthikela waaxukurya ale mwaalalenrye anyu
Nwuupuweleke atthu a muttetthe anyu nuumala-vo, munsayariki moota woopaceriha ovaanela
Nvaaneleke moota woowuncerereya muteko anyu woolaleerya okathi wa Wuupuwelela Okhwa wa Yesu aahiiso okathi wa ifeeriya sa omutekoni wala oskola

MIXANKIHO SIKHANLE OOKHUMELELA NI EMUSI:

Muthokoreryeke vamosa moota wooxintta mixankiho sikhumelenle wala sikhanle ookhumelela, sinihela muhina ohiirela mpantta myaha sa mulaponi, ohasuliwa, onamorari aahiiso ifesta sa wuumalani wa mwaakha
Mpakeke yoowooniherya, anamuyari ni anamwane aturukanne ene ipaphelo sirina makoho oovirikana. Nuumala-vo, mwaahiyeke anamwane wiira atokose ni athokoreryeke ni anamuyari aya

ITTHU SIKINA:

Nweheke eprokrama ya JW Broadcasting^® nuumala-vo, musuwelihaneke itthu khula mutthu iixuntte awe
Musomeke myaha aahiiso nweheke eviidiyu eri va jw.org nuumala muthokoreryeke hoothe itthu mwiixuntte anyu
Pooti othokorerya mwaha mukina onivarihana ni “Amiravo” aahiiso “Anamwane” ori mpantta oni: SOOWIIXUTIHA SA BIIBILIYA va jw.org
Pooti otthikela omuuluula konkresu aahiiso asembeleya
Nweheke aahiiso otokosa voohimya sa soopattuxiwa, nuumala-vo, nvaaneleke itthu mwiixuntte anyu voohimya sa Yehova
Okathi owo mmulattuleke mutthu mukina wiira iirele mpantta omulompa wanyu Muluku nuumala-vo, pooti omukoha soowiiraneya sawe
Mukhalaneke soolakela ni nvaaneleke moota mukhanle anyu oomaleliha wala oophwanya
Mumpakeke palano hoothe, ntoko opaka maapha anooniherya moota munrowa anyu ovara itthu

Nwehe EVIIDIYU Muhihiye Olipiha Omulompa Wanyu Muluku Vatthokoni. Nuumala-vo, mwaakohe alipa-oowiriyana nikoho ninttharelana:

Mulopwana onrowa wiiriha sai omulompa wawe Muluku vatthokoni, okhala woolipiha hoothe ni amwaarawe hata ahikhanle anamwane?

Mwaakhule va

8. Yoosoma ya Biibiliya ya Muloko

(30 min.) Mwiixutte Myaha sa Biibiliya yoosoma 42