Niireke ‘Munnaakuva Wiiwelela’?

1. Xeeni ikwaha sikina nnoona ahu ovila wiiwelela?

NIIREKE ikwaha sikina munnoona ovila wiiwelela? Mwene Davidi oona siiso. Ti maana aya anvekenle awe Muluku ohimyaka so: “Mulipihe murim’aka mukhalihe wowìleva”. (Esal. 51:14) Davidi aanimphenta Yehova. Hata vari siiso, ikwaha sikina vaanimuxankiha wiiwelela. Nave eyo enniiraneya ni hiyo. Mwaha wa xeeni? Yoopacerya, okhala wiira na atthu oottheka nave niyariwe ni yoophavela ya ohiiwelela. Ya nenli, okhala wiira Satana onniimananiha oniiriha omurukunuwela Yehova ntoko yena. (2 aKor. 11:3) Ya neeraru, ninkhala ni atthu arina mweettelo woohiloka wa olumwenku ola, yaawo aneettihiwa ni “muupuwelo wa atthu oohiiwelela”. (aEef. 2:2) Nihaana wiimananiha vanceene wiira nixintte soophavela sa etampi. Nave nihaana wiimananiha wiira nixintte muupuwelo wa ohiiwelela wa olumwenku ola, onikumiheriwa ni Satana. Wiira niwerye, nihaana omwiiwelela Yehova ni ale aavanha awe okhulupale.

2. Ontaphulela exeeni okhala mutthu ‘oowaakhuva wiiwelela’? (Yakobo 3:17)

² Mmusome Yakobo 3:17. Murummwa Yakobo ohimmye wiira mutthu a ankhili “towaakuva wiiwelela”. Masi eyo enitaphulela exeeni? Enitaphulela wiira nihaana owiiwelela ale Yehova aavanha awe okhulupale. Ekeekhai wiira owo khonlipelela wiira niwiiweleleke ale annivekela opaka etthu, ehinivarihana ni malamulo awe. — Mit. 4:18-20.

3. Xeeni Yehova onivaha awe efaita owiiwelela wahu ale arina okhulupale?

³ Veekeekhai, ti vookhweya omwiiwelela Yehova ohiya apinaatamu. Okhala wiira, khula okathi malakiheryo Yehova onivaha awe tooloka. (Esal. 19:8) Masi atthu Yehova aavanha awe okhulupale toottheka, nave khahiyo wiira khula okathi anivaha malakiheryo ooloka. Hata vari siiso, Yehova ohaavaha okhulupale anamuyari, axitokweene a mmulokoni ni atthu akina anivara miteko sa kuvernu. (Mir. 6:20; 1 aTes. 5:12; 1 Ped. 2:13, 14) Okathi nniwiiwelela ahu atthu awo, nimmwiiwelela Yehova. Mwaha ola, ninrowa wiixutta moota nikhanle ahu oowiiwelela apinaatamu avahiwe okhulupale ni Yehova, hata ikwaha sikina vavilaka weemererya ni otthara malakiheryo aya.

NWIIWELELEKE ANAMUYARI

4. Xeeni anamwane anceene ahiniwiiwelela aya anamuyari aya?

⁴ Amiravo akina anikhala eriyari ya axipatthani aya ‘ahiniwiiwelela apapaya ni amamaya’. (2 Tim. 3:1, 2) Xeeni amiravo anceene ahiniiwelela aya? Amiravo akina anuupuwela wiira anamuyari aya anaavekela opaka itthu awo ahinivara aya. Nave akina anuupuwela wiira malakiheryo anivahiwa aya khanivareleya muteko olelo-va aahiiso toovila. Niireke munuupuwela siiso? Atthu anceene vannaaxankiha ovarihela muteko miruku Yehova oruminhe awe olempwa siri aEefeso 6:1, sini: “Nwiiweleleke apapinyu ni amaminyu, moovarihana ni ele Apwiya aniphavela aya, okhala wira eyo ti yooloka vamaithoni va Muluku”. Exeeni enrowa wookhaliheryani okhala oowiiwelela?

5. Moovarihana ni Luka 2:46-52, xeeni Yesu ori awe ntakiheryo nooloka na mwaana oniwiiwelela anamuyari awe?

⁵ Nyuwo pooti wiixutta okhala oowiiwelela, muttharaka ntakiheryo nooloka na Yesu. (1 Ped. 2:21-24) Owo aari oohittheka, masi anamuyari awe yaari atthu oottheka. Hata vari siiso, Yesu aanaattittimiha anamuyari awe hata okathi yaafalyari aya wala yahaamwiiwexexa aya. (Okhum. 20:12) Nwehe etthu yiiraneyale okathi Yesu aarina awe iyaakha 12. (Mmusome Luka 2:46-52.) Yesu aari ni anamuyari awe oYerusalemu, masi okathi yaatthikela aya owaani, awo khiyaasuwenle wiira Yesu oohala. Yosefe ni Maria yaahimuhaavya yena, nto okathi yamphwannye aya Maria aahinvaha nthowa Yesu mwaha woowi khaahimmye etthu. Woonasa wene, Yesu anwerya wuupuwela wiira aathokoreriwe moohixariya. Okhala wiira ole waari muritti wa anamuyari, waaweha-weha anamwane ootheene ahinatthi okhuma, akhala wiira yaari vamosa arowaka owaani. Ohiya-vo, Yesu aahiwaakhula mwa enamuna yooloka ni mwa nttittimiho. Masi Yosefe ni Maria “khiyaasuwenle oratteene etthu aahimmye awe”. Hata vari siiso, Yesu khaahiyale ‘owiiwelela’ anamuyari awe.

6-7. Exeeni enrowa waakhaliherya amiravo owiiwelela anamuyari aya?

⁶ Ankhi nyuwo, niireke vannoovilani owiiwelela anamuyari anyu okathi anifalyari aya aahiiso ahiniiwexexa aya etthu munihimya anyu? Exeeni enrowa wookhaliheryani owiiwelela? Yoopacerya, muupuweleke moota Yehova onoonela awe. Biibiliya onihimya wiira mwaawiiwelelaka anamuyari anyu, “eyo ennaasivela Apwiya”. (aKol. 3:20) Yehova onnisuwela wiira ikwaha sikina, anamuyari anyu pooti ohiiwexexaka saana etthu munihimya anyu, aahiiso awo pooti okumiheryaka malamulo anikhala ntoko khanivareleya muteko. Hata vari siiso, okathi muniwiiwelela anyu, munnimuhakalaliha Yehova.

⁷ Ya nenli, muupuweleke moota anamuyari anyu anoonela aya. Okathi muniwiiwelela anyu, awo annitteeliwa murima nave annoororomelani. (Mir. 23:22-25) Ohiya-vo, nyuwo munookhala mpatthani aya. Mmiravo mmosa a oBélgica oniitthaniwa Alexandre, onihimya so: “Okathi kaapacenryeka ovarihela muteko ele anamuyari aka yaakivekela aya, ompatthani ahu waari wooloka nave naanihakalala”.b Ya neeraru, muupuweleke moota okhala oowiiwelela nenna-va onrowa aya wookhaliheryani muhoolo. Paulo, onikhala oBrasil, onihimya so: “Owiiwelela anamuyari aka wookikhaliherya omwiiwelela Yehova ni atthu akina arina okhulupale”. Ntoko Biibiliya onihimya awe, nookhalana mathowa ooloka a owiiwelela anamuyari. Owo onihimya so: “Wira itthu siweettelekeni saana, ni mukhale mahiku manceene vathi-va”. — aEef. 6:2, 3.

8. Exeeni ewiirinhe amiravo anceene othanla owiiwelela anamuyari aya?

⁸ Amiravo anceene ahoona wiira etthu yooloka, owiiwelela anamuyari aya. Luiza, onikhala oBrasil, wanipacerya khaiwexexa etthu yaawiiriha anamuyari awe ohimuthumela telefoni. Aanaaleela anamuyari awe wiira atthu anceene aarina awe iyaakha simosa-ru, yaahikhalana telefoni. Masi muhoolo mwaya, aahoona wiira anamuyari awe, yaaphavela omukhapelela. Owo onihimya so: “Okathi kiniwiiwelelaka anamuyari aka nkinoona okhala etthu yooxankiha, maana malakiheryo aya ti etthu kiniphavelaka okathi wooreerela”. Elizabeth, onikhala wEstados Unidos, ikwaha sikina onnoona oxankiha owiiwelela anamuyari awe. Owo onitthokiherya so: “Okathi kihiniiwexexaka nthowa naya anamuyari aka akumihenrye aya malamulo, kinniimananiha wuupuwelela moota malakiheryo aya yaakikhapelenle aya”. Mônica, onikhala wArmênia, ohoona wiira itthu saanimweettela saana okathi aawiiwelela awe anamuyari awe.

NIWIIWELELEKE “MAKHULUPALE A MULAPONI”

9. Atthu akina anoonela sai wiiwelela malamulo a Kuvernu?

⁹ Atthu anceene ahoona wiira annireerela okhaliheriwa ni kuvernu. Nave aasuwela wiira ti vooreera wiiwelela malamulo makina anikumiheriwa ni “makhulupale a mulaponi”. (aRom. 13:1) Masi atthu akina annikhootta wiiwelela malamulo awo yaahaasivele aahiiso yoona wiira toohixariya. Mwa ntakiheryo, oliva mpoosito. Elapo ya wEuropa, atthu anceene anoona wiira “ti voohixariya oliva itaaxa sootheene anivekeliwa aya”. Mwaha waivaavo, atthu akina anikhala elapo eyo, khanimuliva kuvernu itaaxa sootheene onivekela awe.

10. Xeeni nniiwelela ahu hata malamulo ale ahinnisivela?

¹⁰ Biibiliya onihimya wiira Satana onnirumeela ikuvernu sa apinaatamu wiira okumiherye mixankiho. Masi moohipisa sinrowa opwetexiwa. (Esal. 110:5, 6; Mus. 8:9; Luka 4:5, 6) Nave-tho onihimya wiira “ole onaavirikanya makhulupale, onnivirikanya mukhalelo okumiheriwe ni Muluku”. Yehova onniweemererya anamalamulela a kuvernu wiira apakeke itthu mootthokiheya ni omphavela wiira niwiiweleleke. Nto nihaana ‘waavaha khula etthu aniphwanela aya, ohela muhina mpoosito, nttittimiho ni owiiwelela’. (aRom. 13:1-7) Ikwaha sikina hiyo pooti woonaka wiira malamulo makina tooxankiha, toohixariya ni toovila wiiwelela. Nihaana owiiwelela makhulupale a mulaponi maana Yehova onnivekela wiira niwiiweleleke, masi akhala wiira malamulo aya annivarihana ni malakiheryo a Yehova. — Mit. 5:29.

11-12. Moovarihana ni Luka 2:1-6, Yosefe ni Maria yaapanke exeeni wiira yiiwelele nlamulo, ni mareeliho xeeni yaakhumelenle? (Nwehe ifootu.)

¹¹ Nnimwiixutta etthu ni ntakiheryo na Yosefe ni Maria, yaawo yaawiiwelela makhulupale a mulaponi, hata ikwaha sikina vaaxankiha opaka eyo. Nwehe etthu yeeherenrye wiiwelela waya okathi Maria aarupanle awe. (Mmusome Luka 2:1-6.) Okathi ole, Seesari Augusto aahikumiherya nlamulo naahimya wiira atthu ootheene yaahaana otthikela elapo aya wiira yarepeliwe. Maria ni Yosefe yaahaana weetta mukwaha wa ikiloomo 150 erowaka oBethelehemu, nave yaavira ephiro yoowaatta isupita ni mikhuruwelo. Mukwaha ole, waari wooxankiha, otepexa wene Maria iira ohalaka vakhaani oyara. Nkuupuwelani vakhanle wiira erukulu yampacerya onwereya eettaka mukwaha ole! Woonasa wene, awo yaahixanka vanceene ni okumi wa Maria ni mwaana aarupaliwe, yoowo muhoolo mwaya aarowa okhala Mesiya. Tthiri Yosefe ni Maria yaaphavenle yaamurumeela mathowa ale wiira ahimwiiwelele kuvernu.

¹² Yosefe ni Maria khiyeemerenrye wiira mixankiho iye siwiirihe ohimwiiwelela kuvernu. Okhala wiira yaahiiwelela, Yehova aahaareeliha. Maria aahiphiya moovareleleya oBethelehemu, aahimuyara mwaana mukumi ni aahikhaliherya wiiraneya eprofesia ya mbiibiliyani! — Mik. 5:2.

13. Wiiwelela wahu onaakhaliherya sai anna?

¹³ Owiiwelela makhulupale a mulaponi, onniniphwanyiha mureerelo hiyo ni atthu akina. Moota xeeni? Yoopacerya, hiyo khaninhaaxiwa ntoko anihaaxiwa aya atthu akina ahiniiwelela malamulo. (aRom. 13:4) Vaavo nniwiiwelela ahu makhulupale a mulaponi, awo annaaweha Anamoona a Yehova okhala atthu oowiiwelela. Mwa ntakiheryo, iyaakha vakhaani sivinre, oNigéria atoropa yaahivolowa Empa ya Omwene okathi wa mithukumano, yaaphavelasaka atthu yaahimya wiira khahiyo ti vooloka oliva mpoosito. Masi muhooleli aya, aahaavekela wiira yaahaana okhuma Empa ya Omwene. Owo aahimmye so: “Anamoona a Yehova anniliva mpoosito”. Khula okathi muniiwelela anyu malamulo, munnikhaliherya wiira arumeyi a Yehova athokoreriweke okhala atthu arina mikhalelo sooloka. Woonasa wene, mwaha woosuweliwa okhala atthu a mikhalelo iyo, eyo pooti owiiriha anna ni arokora okhapeleliwa muhoolo. — Math. 5:16.

14. Exeeni yaamukhalihenrye murokora Joana owiiwelela makhulupale a mulaponi?

¹⁴ Hata vari siiso, ikwaha sikina hiyo pooti onixankihaka owiiwelela makhulupale a mulaponi. Murokora oniitthaniwa Joana a wEstados Unidos, onihimya so: “Ikwaha sikina vaanikivila owiiwelela, okhala wiira amusi aka akina yaahitoko othokoreriwa voohixariya ni makhulupale”. Nto Joana aahoona wiira anireerela oturuka moota uupuwela awe. Etthu yoopacerya yaamukhalihenrye tiila: Owo aahihiya osoma myaha saaheliwa muredes sociais saalavula moohiloka makhulupale. (Mir. 20:3) Ya nenli, owo aahinvekela Yehova wiira omukhaliherye waaroromelaka ohiya olipelela wiira yaaturukiwe. (Esal. 9:9, 10) Ni ya neeraru, owo aanisoma myaha saalavula sa ohiirela mpantta olumwenku orumeelaka iliivuru sahu. (Yoh. 17:16) Olelo-va, Joana onihimya wiira waattittimiha ni owiiwelela makhulupale onnimwiiriha okhalana “murettele ni omaaleleya”.

MWIIWELELEKE MALAKIHERYO A MUTTHENKESO WA YEHOVA

15. Xeeni ikwaha sikina vannivila aya wiiwelela malakiheryo a mutthenkeso wa Yehova?

¹⁵ Yehova onnivekela wiira ‘niwiiweleleke ale annihoolela’ mmulokoni. (aHeeb. 13:17) Nnaamwi muhooleli ahu Yesu ari ene oohittheka, masi ale onaarumeela awe wiira yaahooleleke arumeyi awe valaponi-va, atthu oottheka. Ti nthowa naya, ikwaha sikina nnoona ahu ovila owiiwelela, otepexa wene, okathi annivekela aya opaka etthu nihimphavela ahu. Ekwaha emosa, Pedru vaahimuxankiha okhala oowiiwelela. Okathi nlaikha naamulenle aya wiira aahaana okhuura inama sa mwiikho moovarihana ni nlamulo na Moise, owo aahikhootta wiiwelela, ohiya paahi ekwaha emosa masi ikwaha tthaaru! (Mit. 10:9-16) Masi exeeni yaamwiirinhe Pedru okhootta? Okhala wiira owo khaakupali nlamulo nne, maana naari noovirikana ni moota aalimalenle awe opaka itthu. Akhala wiira Pedru aahoona ovila wiiwelela malakiheryo aavahiwe awe ni nlaikha noohittheka, nkuupuwelani moota vari aya voovila wiiwelela malakiheryo ninvahiwa ahu ni atthu oottheka!

16. Exeeni Paulo aapanke awe hata malakiheryo aakhenle awe ahiiwexexa saana? (Miteko 21:23, 24, 26)

¹⁶ Murummwa Paulo aari ‘oowaakuva wiiwelela’ hata okathi yoole aakhela awe malakiheryo ahiiwexexa awe saana. Makristau a oYuda yaahiiwa soohimmwa saahimya wiira Paulo aalaleya itthu ‘saavirikanya nlamulo na Moise’. (Mit. 21:21) Nto makristau yaahoolela oYerusalemu, yaahinvekela Paulo wiira orowe vamosa ni alopwana axexe otemplo wiira aireerihe. Opaka eyo, aamooniherya wiira aanittittimiha Nlamulo. Masi aanisuwela wiira khaapanke etthu yoohiloka nave makristau khiyaareerela otthara Nlamulo nne. Hata vari siiso, Paulo aahiiwelela moohinlaseya. Owo “aahaakuxa alopwana awo, nto mmeeloni mwaya, aahipacerya wiireeriha vamosa naawo”. (Musome Miteko 21:23, 24, 26.) Wiiwelela wa Paulo, waahaakhaliherya anna ale okhala oowiiraana. — aRom. 14:19, 21.

17. Ntakiheryo na Stephanie niwiixuttinheni exeeni?

¹⁷ Murokora oniitthaniwa Stephanie, aahoona ovila weemererya yoothanla ya anna a ofiliyaali ya elapo awe. Owo ni iyawe yaanihakalala vanceene okathi yaarumeela aya ekhurupu yaalavula nttaava na elapo ekina. Masi nuumala-vo, efiliyaali yaahivekela wiira ekhurupu ele yaahaana ohiiwa, nto anamathelana ale yaahivekeliwa otthikela muloko wa nttaava naya. Stephanie onihimya so: “Kaahiriipiwa murima vanceene, nave koona wiira khiyaapirisari-tho anamalaleerya a nttaava naka, maana khiyaareere”. Masi hata vari siiso, aahilakela wiiwelela. Owo onincererya oriki: “Muhoolo mwaya kaahoona etthu yaawiirinhe anna opaka yoothanla ele. Nave naahikhalana eparakha ya waakhapelela anamwane yahaarina amusi mmulokoni. Miyo kinnimusomiha Biibiliya murokora mmosa aahiyale orowela mithukumano. Nave nenna-va, kookhalana okathi munceene wiira kipake yoosoma aka ya omwaneene. Vano kookhalana muupuwelo wooloka maana koosuwela wiira kihiimananiha wiira kiiwelele”.

18. Xeeni vari aya vooloka wiiwelela?

¹⁸ Hiyo pooti wiixutta okhala atthu oowiiwelela. Yesu “aahiixutta wiiwelela” ohiya paahi okathi woohakalaliha masi “mwaha wa itthu aahaawale awe”. (aHeeb. 5:8) Ntoko Yesu, okhala wene hiyo ninniixutta okhala oowiiwelela okathi wooxankiha. Mwa ntakiheryo, wanipacerya wa oretta wa koronaviiru, naahivekeliwa ohiya othukumana Empa ya Omwene ni olaleerya empa ni empa. Niireke vaahooxankihani wiiwelela malakiheryo awo? Masi wiiwelela wanyu ohookhapelelani, wookhaliherya muloko ohihiya okhala wowiiraana ni moomuhakalaliha Yehova. Nenna-va, ootheene ahu nihiilokiherya wiira niiwelele khula malakiheryo woonasa wene, ninrowa ahu ovahiwaka okathi wa maxakha maalupale. Nto wiiwelela malakiheryo awo, tanrowa woopola ikumi sahu! — Yob. 36:11.

19. Xeeni muniphavela anyu okhala oowiiwelela?

¹⁹ Mpakha-va, nihoona wiira wiiwelela onniphwanyiha mareeliho manceene. Masi nthowa nuulupale ninniiriha wiiwelela, okhala wiira ninnimphenta Yehova nave nimphavela omuhakalaliha. (1 Yoh. 5:3) Khaninkhala-khala niweryaka omuliva Yehova itthu sootheene sooloka onnipakela awe. (Esal. 116:12) Masi nnoowerya omwiiwelela ni owiiwelela ale arina okhulupale. Napaka eyo, nnimooniherya wiira na atthu a ankhili. Mutthu a ankhili onnimuhakalaliha Yehova. — Mir. 27:11.