Yehova Tonnimaaliha

1. Makhalelo a ayuda yaari sai oBabiloonia?

NKUUPUWELANI moota ayuda yaari ipottha oBabiloonia yaaxankale aya. Awo yaahiweha elapo aya epwetexiwaka. Mwa iyaakha sinceene, ayuda ale khiyaamwiiwelenle Yehova. Mwaha waivaavo, Yehova aaheemererya wiira yakhalihiwe ipottha oBabiloonia. Makhalelo yaari sai oBabiloonia? (2 Wah. 36:​15, 16, 20, 21) Ekeekhai wiira oBabiloonia, ayuda yaaniwerya ovara miteko saya khula nihiku. (Yer. 29:​4-7) Masi okhala oBabiloonia khahiyo yaari etthu yookhweya, maana makhalelo yaari ooxankiha. Awo yoonela sai okhala oBabiloonia? Mmosa a yaawo onihimya so: “Naanikilaathi mukerekhere mwa miro sa oBabiloonia, naaninla khula okathi nuupuwela ahu oSiyoni”. (Esal. 137:1) Tthiri ayuda ale khiyaareere oriipiwa murima vanceene, nave yaanipirisari omaalihiwa. Masi ti pani aarowa waalipiha?

2-3. a) Etthu xeeni Yehova aaleihenrye awe ayuda yaari oBabiloonia? b) Mwaha ola ninrowa othokorerya exeeni?

² Yehova, “Muluku onnimaaliha mwa mikhalelo sootheene”. (2 aKor. 1:3) Owo onnaaphenta vanceene arumeyi awe, tivonto oniphavela awe waamaaliha. Yehova aanisuwela wiira ayuda akina yaaniphavela ottharuwa ni opaka itthu sooloka. (Yes. 59:20) Ti nthowa naya, sihalaka iyaakha 100 wiira ayuda arowaniwe oBabiloonia, Yehova aamulenle awe profeta Yesaya olepa muhupi wa nimaaliho. Muhupi xeeni owo? Muhupi owo waakhuma eliivuru ya Yesaya yeeyo profeta owo aalempe awe so: “Mwaakurunuxe murima, mwaakurunuxe murima atthu aka, Muluku anyu tonihimya”. (Yes. 40:​1, Piipiliya Emakhuwa) Yehova, aahirumeela iprofesia Yesaya aalempe awe wiira aamaalihe ayuda ale.

³ Sintoko ayuda ale, hiyo nave ikwaha sikina ninnipirisari omaalihiwa. Mwaha ola, nnoothokorerya inamuna tthaaru Yehova aamaalinhe awe ayuda: 1) Owo aahileiherya wiira amwaalevelela ale yaarowa ottharuwa ni murima aya wootheene, 2) owo aahaavaha nlipelelo atthu awe ni 3) owo aamwaakhaliherya wiira ahixankeke. Okathi ninrowa ahu othokorerya aka iponto iya tthaaru, nwehe moota hiyo olelo-va nikhanle ahu oottottela mureerelo moolumo a Yesaya.

YEHOVA TOOMORIWA IKHARARI NI TOOLEVELELA

4. Yehova oonihenrye sai wiira Muluku oowoona othunku? (Yesaya 55:7)

⁴ Yehova, “Tiithi oomoriwa ikharari vanceene”. (2 aKor. 1:3) Yehova aahooniherya mukhalelo ola, vaavo aaleihenrye awe wiira amwaalevelela ayuda yaarowa ottharuwa. (Mmusome Yesaya 55:7.) Owo aahimmye so: “Kinrowa wothonyeryani othunku aka, mana kinophentani vanjeene vohimala-tho”. (Yes. 54:8) Masi Yehova oonihenrye sai wiira aniwoonela othunku? Nnaamwi ayuda ale yaahaawa vanceene oBabiloonia mwaha wa soothanla saya, Yehova aahaaleiherya wiira khiyaarowa okhala oBabiloonia mahiku ootheene. Nuuvira okathi, awo yaamutthikela elapo aya. (Yes. 40:2) Tthiri moolumo ala a Yesaya yaahaalipiha vanceene ayuda yaattharunwe!

5. Moovirikana ni ayuda, mathowa xeeni anniiriha omuxukhurela Yehova mwaha wa onoonela othunku?

⁵ Etthu xeeni nniixutta ahu? Yehova ori oolikana ene wiira aalevelele moomalela arumeyi awe. Olelo-va, nookhalana mathowa manceene anniiriha omuxukhurela Yehova mwaha woonilevelela soottheka sahu. Mwaha wa xeeni? Mwaha woowi, noosuwela etthu Yehova opanke awe wiira nleveleliwe soottheka sahu. Nuuvira iyaakha sinceene nuumala Yesaya olepa eprofesia awe, Yehova aahimuruma Mwanawe orwa valaponi wiira ovahe ekumi awe para owoopola ale anooniherya ottharuwa soottheka saya. Mwaha wa mukuttho Yesu ovahale awe, Yehova “oonilevelela” itampi sahu moomalela. (Mit. 3:19; Yes. 1:18; aEef. 1:7) Tthiri Yehova, Muluku oomoriwa ikharari!

6. Ninrowa ottottela sai mureerelo omoriwa ikharari wa Yehova? (Nwehe efootu.)

⁶ Vakhala wiira munniivaha nthowa mwaha wa itthu soohiloka mwaapanke anyu, moolumo ari Yesaya 55:7 animoolipihani. Anamunceene a hiyo, ninniivaha nthowa mwaha wa itthu sinceene naapanke ahu khalai hata nittharunwe ene. Otepexa wene, akhala wiira ninnikhalana mixankiho mwaha wa soovonya naapanke ahu. Vakhala wiira moottharuwa opaka itthu soohiloka, mukupaliki wiira Yehova ohoolevelelani. Nto vaavo Yehova onimulevelela awe mutthu, owo khonuupuwelela-tho etampi eyo. (Mulikanyihe ni Yeremiya 31:34.) Nto vakhala wiira Yehova onniliyala itampi sahu, hiyo khaninreerela wuupuwelela-tho. Yehova oniweha paahi itthu sooloka nimpaka ahu vano, ohiya soottheka sahu sa khalai. (Ezek. 33:​14-16) Moohipisa, Tiithi ahu oomoriwa ikharari onoomaliha ohaawa wootheene onikumiheriwa ni etampi.

7. Etthu xeeni enniiriha waaleela axitokweene akhala wiira noopaka etampi?

⁷ Etthu xeeni ekhanle ahu oopaka akhala wiira ninniriipiwa murima aahiiso ninniivaha nthowa mwaha wa itampi nipanke ahu? Biibiliya onihimya wiira nihaana waaleela axitokweene wiira anikhaliherye. (Yak. 5:​14, 15) Ekeekhai wiira khivanrowa okweya waaleela etthu yoohiloka nipanke ahu. Etthu ekhanle oonikhaliherya, ori wuupuwela wiira Yehova onnaarumeela axitokweene awo wiira anikhaliherye. Nave awo anoonikhaliherya mwa enamuna yoophenta ni mooreera murima sintoko Yehova oniira awe. Vakhala wiira nnimuupuwela eyo ni nnimooniherya ottharuwa, vanoonikweela waaleela axitokweene etthu yoohiloka nipanke ahu. Mwa ntakiheryo munna oniitthaniwa Artur,a aaniivaha nthowa mwaha wa itthu soohiloka aapanke awe. Munna Artur ooweha moota omoreliwa awe ikharari ni Yehova. Owo onihimya so: “Kaahiviriha eyaakha emosa kiwehaka epornokrafia. Masi nuumala owiriyana mwaha waalavula voohimya sa murima, kaahaaleela amwaaraka ni axitokweene. Mwaha wa opaka eyo, kaahikhalana muupuwelo wooloka. Masi ikwaha sikina kaanixanka. Axitokweene yaahikuupuxerya wiira Yehova khaakinyanyanle, owo aahikittaruxa mwaha wa okiphenta wawe. Moolumo a axitokweene yaahikikhaliherya oweha wiira Yehova aahikilevelela moomalela”. Olelo-va, Artur onirumeela ntoko pioneero ookilaatheya ni murumeyi ookhaliherya. Ti voohakalaliha oweha wiira Yehova ori oolikana ene wiira onilevelele!

YEHOVA ONNINIVAHA NLIPELELO

8. a) Nlipelelo xeeni Yehova aavanhe awe ayuda yaari oBabiloonia? b) Moovarihana ni Yesaya 40:​29-31, nlipelelo naakhalihenrye sai ayuda ale?

⁸ Mwa moonelo wa apinaatamu, vaakhala wiira ayuda yaakhalihiwe ipottha oBabiloonia khiyaarowa otthikela elapo aya. Maana oBabiloonia, yaanisuweliwa okhala elapo yahaataphula ipottha saya. (Yes. 14:17) Masi Yehova aahaavaha nlipelelo arumeyi awe. Owo aahaaleiherya wiira aamwaakhaliherya otaphuliwa ni khiivo etthu yaarowa omukhoottiherya opaka eyo. (Yes. 44:26; 55:12) Mwa moonelo wa Yehova, Babiloonia aari ntoko ntthupi. (Yes. 40:15) Nuumala woopa epheyo vakhaani paahi, ntthupi nlo nanvavihiwa nroihiwaka ottaiwene. Nlipelelo nlo naalipihale sai ayuda ale yaari oBabiloonia? Awo yaahilipa vanceene. Ohiya-vo, nlipelelo nlo nahaalipiha mwa enamuna ekina. Yesaya aahimmye so: “Ale anlipa ni Apwiya ikuru saya sinninjerereya”. (Mmusome Yesaya 40:​29-31.) Awo yaarowa olikanaka ni murumaasi onivava wiirimu, maana nlipelelo naya naamwaavahaka ikuru.

9. Itthu xeeni saakupaliha ayuda ale yaari oBabiloonia wiira sooleiherya sa Yehova saamwiiraneya?

⁹ Yehova aahirumeela inamuna sikina wiira owooniherye aisarayeli, wiira yaahaana okupali itthu aaleihenrye awe wiira saamwiiraneya. Moota xeeni? Nkuupuwelani iprofesia ayuda yaawenhe aya siiraneyaka. Mwa ntakiheryo, awo yaahaaweha Asiiria apwetexaka omwene wa onorti wa wIsarayeli ni yaaroihaka atthu weepotthani. (Yes. 8:4) Nave awo yaahaaweha atthu a oBabiloonia apwetexaka oYerusalemu ni waakuxa atthu wiira yaakhalihe ipottha. (Yes. 39:​5-7) Awo yaahinweha mwene Zedekiya osyooliwaka maitho ni oroihiwaka oBabiloonia. (Yer. 39:7; Ezek. 12:​12, 13) Itthu sootheene sahiiraneya ntoko Yehova aaleihenrye awe. (Yes. 42:9; 46:10) Wuupuwela eyo, yahaalipiha ayuda ale yaari oBabiloonia wiira Yehova ammaliherya itthu sootheene aleihenrye awe!

10. Exeeni enrowa onikhaliherya olipiha nlipelelo nahu mahiku ala ookiserya?

¹⁰ Etthu xeeni nniixutta ahu? Okathi ninkhulumuwa ahu, wuupuwelela nlipelelo nahu nnoonivaha ikuru. Hiyo ninkhala okathi wooxankiha nave awanani ahu toowerya vanceene. Masi nihikhulumuwe. Yehova onninivaha nlipelelo noohakalaliha na okumi woohimala, murettele ni ovareleleya. Nto nihaana olipiha nlipelelo nahu nlo ni murima ni muupuwelo ahu wootheene. Naahipake eyo, nlipelelo nahu ninrowa olikanaka ni exardim yooreera ninweha ahu niri ene vaxanelani, masi iviituru saya soosareya ntthupi. Ninrowa oreeriha sai “iviituru sa ixanela iyo”, wiira nlipelelo nahu nikhale nooloka? Nnoowerya vakhala wiira nnimuupuwelelaka khula okathi moota okumi ahu onrowa aya okhala wooloka elapo esya. Hiyo pooti osoma iliivuru, oweha iviidiyu, ni owiriyana masipo anilavula voohimya sa nlipelelo nahu. Nave hiyo pooti onvekela Yehova nimuleelaka voohimya sa sooleiherya ninlipelela ahu wiiraneya.

11. Exeeni enimukhaliherya murokora yoowo sinimphwanya mixankiho sinceene sa mookumini?

¹¹ Nrowe nithokorerye moota nlipelelo nimmulipiha aya ni ommaaliha murokora oniitthaniwa Joy, orina mixankiho sinceene sa mookumini. Owo onihimya so: “Okathi mixankiho sinikitepela aya, kinnimuleela Yehova itthu sootheene sinikixankiha kikupaliki wiira onnikiwiriyana. Nto Yehova onnaakhula mavekelo aka okivahaka ‘owerya onivikana wa mutthu’”. (2 aKor. 4:7) Joy, onnuupuwela moota okumi awe onrowa aya okhala elapo esya maana “khavo-tho onkela ohimya wiira: ‘Miyo ki muretta’”. (Yes. 33:24) Hiyo nave nnoophwanya ikuru vakhala wiira nnoomutthukulela Yehova murima ahu wiira nlipihe nlipelelo nahu.

12. Itthu xeeni sinnikupaliha wiira sooleiherya sa Yehova sinimwiiraneya? (Nwehe efootu.)

¹² Ntoko ayuda, olelo-va nookhalana mathowa anniiriha okupali wiira sooleiherya sa Yehova sinimwiiraneya. Muupuweleke iprofesia ninweha ahu siiraneyaka olelo-va. Mwa ntakiheryo, ninniwerya oweha olamulelo wa olumwenku wootheene yoowo ori “wokina wa eyuma [ni] wokina w’oloko”. (Dan. 2:​42, 43) Nave ninniiwa aahiiso ninniweha sikhumelelaka “itetere mapuro oovirikana”, nave ninnaalaleerya ihapari sooreera “atthu ootheene”. (Math. 24:​7, 14) Vaavo ninweha ahu iprofesia iyo siiraneyaka, ninnikupali wiira iprofesia sikina Yehova oleihenrye awe sinimwiiraneya.

YEHOVA ONNINIMAALIHA OKATHI NNOOVA AHU

13. a) Mixankiho xeeni saarowa waaphwanya ayuda ale okathi yaarowa aya okhuma oBabiloonia? b) Moovarihana ni Yesaya 41:​10-13, Yehova aalipihale sai ayuda ale?

¹³ Nnaamwi Yehova aamaalihale ayuda ale ni nlipelelo noohakalaliha, owo aanisuwela wiira yaamukhalana mixankiho okathi yaarowa aya okhuma oBabiloonia. Yehova aahisuwela wiira ahalaka mahiku vakhaani wiira ayuda ekhume oBabiloonia, aamukhumelela mwene mukina oowerya aarowa opwetexa maloko yaattamenle oBabiloonia. (Yes. 41:​2-5) Niireke ayuda yaanipirisari woova? Mwa iyaakha sinceene, Yehova aahaalipiha arumeyi awe ohimyaka so: “Muhové! Miyo kiri ni nyuwo. Muhivelavelé! Miyo ki Muluku anyu”. (Mmusome Yesaya 41:​10-13.) Exeeni Yehova aaphavela awe ohimya ni moolumo oowi: “Miyo ki Muluku anyu?” Owo khahiyo aaphavela owuupuxerya wiira ayuda ale yaahaana omukokhorelaka, maana yaanisuwela eyo. Masi Yehova aaphavela owuupuxerya wiira yena aamwaakhaliherya. — Esal. 118:6.

14. Enamuna xeeni-tho ekina Yehova aamaalihale awe ayuda?

¹⁴ Yehova aahaamaaliha ayuda ale yaaxankale, owuupuxeryaka owerya ni osuwela wawe ohirina mukano. Yehova aahaavekela ayuda ale wiira aweheke itheneeri wiirimu. Nave owo aahaaleela wiira topattunxe itheneeri, nave onnisuwela nsina na khula etheneeri. (Yes. 40:​25-28) Vakhala wiira Yehova onnisuwela nsina na khula etheneeri, moohaaniherya owo onnisuwela nsina na khula murumeyi awe onimurumeela! Nave vakhala wiira owo aahikhalana owerya wa opattuxa itheneeri, owo ookhalana owerya wa waakhaliherya arumeyi awe. Moohaanyiherya ayuda ale khiyaarina mathowa yaakhanle oowiiriha woova aahiiso oxanka.

15. Moota xeeni Yehova aalokihenrye awe arumeyi awe mwaha wa itthu saarowa okhumelela muhoolo?

¹⁵ Yehova aahaaleela arumeyi awe wiira yiilokiherye mwaha wa itthu saarowa wiiraneya muhoolo. Omurumeelaka profeta Yesaya, Yehova aahimmye so: “Mutthikele owannyu: mwiwaleleke mpa mwinyu, mulipihe masele. Mwipitheke okathi vakhani, mpakha ovira oviruwa w’Apwiya”. (Yes. 26:20) Woonasa wene, moolumo ala yaahiiraneya okathi yoole mwene Kiro aatuphenle awe oBabiloonia. Mulipa-oolepa a khalai, onihimya wiira okathi Kiro aatuphenle awe muttetthe wa oBabiloonia, owo “ahaaruma [anakhotto awe] omwiiva khula mutthu yaamphwanya aya vate”. Nkahaya muupuwele moota atthu akina yaakhala oBabiloonia yaaxankale aya! Masi ayuda ale yaahiwerya woopowa okhala wiira yaahiiwelela malakiheryo a Yehova.

16. Xeeni nihinreerela ahu oxanka mwaha wa itthu sinrowa wiiraneya moohipisa? (Nwehe efootu.)

¹⁶ Etthu xeeni nniixutta ahu? Moohipisa anookhumelela maxakha maalupale ahitonko okhumelela. Okathi anrowa aya opacerya maxakha awo, anamunceene anoorowa oxanka ni woova. Masi arumeyi a Yehova khanirowa woova. Hiyo ninnisuwela wiira Yehova Muluku ahu. Ninniroromela wiira ‘woopoliwa [wahu] ori vakhiviru’. (Luka 21:28) Hata okathi maloko oowiiraana anrowa aya onituphela, hiyo khaninrowa ohiya omuroromela Yehova. Nto Yehova onoorumeela malaikha wiira anikhapelele ni onoonivaha malakiheryo, yaawo anrowa woopola ikumi sahu. Ninrowa ovahiwa sai malakiheryo awo? Nihaana olipelela. Woonasa wene, malakiheryo awo ninrowa ovahiwaka mmulokoni. Nto miloko sinrowa okhalaka ntoko ikwaartu memmo ninrowa ahu okhala oovareleleya. Ninrowa wiilokiherya sai mwaha wa itthu sinrowa wiiraneya moohipisa? Nihaana okhala oowiiraana ni anna ni arokora, wiiwelela malakiheryo a Yehova ni okupali wiira toneettiha mutthenkeso awe. — aHeeb. 10:​24, 25; 13:17.

17. Etthu xeeni mukhanle anyu oopaka wiira Yehova oolipiheni?

¹⁷ Nnaamwi makhalelo a ayuda ale yaari ooxankiha oBabiloonia, Yehova aanaalipiha mwa inamuna soovirikana. Nave yena onoopaka etthu emosa-ru para hiyo. Moohicikha itthu sinrowa wiiraneya muhoolo, muhihiye omuroromela Yehova wiira oolipiheni. Mukupaliki wiira Yehova, ti Muluku oothunku. Muhihiye olipiha nlipelelo nanyu, nave hiyo khanimpirisari woova etthu okhala wiira Yehova, Muluku ahu.