Eprofesia Yakobe Aalavunle Awe Ohalaka Okhwa — Mpantta 1

1-2. Etthu xeeni Yakobe aapanke awe ohalaka okhwa, ni mwaha wa xeeni? (Nwehe eteseenyu ya vakaapani.)

SAAHIVIRA iyaakha 17 okhuma okathi murumeyi a Yehova aitthaniwa Yakobe, aakhumme awe oKanaani orowaka wExiitu ni emusi awe. (Maph. 47:28) Yakobe aahihakalala onweha mwanawe Yosefe, maana uupuwela wiira aahikhwa. Nto vano Yakobe ni anaawe ootheene yaahitthikela-tho okhala hoothe. Masi Yakobe aanisuwela wiira aahala vakhaani okhwa. Tivonto, owo aahaathukumanya anaawe ootheene wiira aavahe malakiheryo. — Maph. 49:28.

² Okathi ole, yaari yoolema axipaapa waathukumanya amusi aya ootheene, wiira yaavahe malakiheryo ahinatthi okhwa. (Yes. 38:1) Okathi wa muthukumano, owo aanimuthanla mutthu aarowa okhala xeefi wiira aahooleleke atthu a emusi awe, nuumala yena okhwa.

3. Moolumo a Yakobe ari Maphattuwelo 49:​1, 2, anniixuttiha exeeni?

³ Musome Maphattuwelo 49:​1, 2. Masi muthukumano owo, waahivirikana ni mithukumano sikina. Maana Yakobe aari profeta ni okhaliheriwaka ni Yehova, Yakobe aahaaleela anaawe itthu sirina efaita yuulupale saarowa owiiraneela awo ni imusi saya. Tivonto, moolumo a Yakobe annisuweliwa okhala eprofesia aalavunle awe ohalaka okhwa.

4. Eprofesia xeeni Yakobe aahimmye awe ni exeeni nniixutta ni moolumo awo? (Nwehe ekaaxa eni: “Emusi ya Yakobe”.)

⁴ Mwaha ola, nnoothokorerya etthu Yakobe aaleelale awe anaawe 4, eyo piiyo, Rubeni, Simeyoni, Levi ni Yuda. Vano mwaha onittharelana, nnooweha moolumo Yakobe aaleelale awe anaawe akina 8. Ntoko ninrowa ahu oweha, Yakobe aahihimya itthu saarowa owiiraneela anaawe ni imusi saya. Nuuvira okathi, imusi iyo saarowa okhala nloko na aisarayeli. Okathi ninsoma ahu soowiiraneya sa aisarayeli, ninnoona wiira eprofesia ya Yakobe yaahiiraneya. Vaavo nintokosa ahu moolumo awo a Yakobe, ninniixutta itthu sirina efaita, sinrowa onikhaliherya omuhakalaliha Tiithi ahu a wiirimu, Yehova.

RUBENI

5. Eparakha xeeni Rubeni aalipelela awe ovahiwa ni paapa awe?

⁵ Wanipacerya, Yakobe aalavunle ni Rubeni. Owo aahimmye so: “Nyuwo mwà mwan’aka òmwixutta”. (Maph. 49:3) Rubeni aalipelela wiira aamwaakhela itthu sinceene sa paapa awe, okhala wiira aari mwaana oopaceriwa oyariwa. Nave owo uupuwela wiira aarowa okhala xeefi a nloko nne nuumala okhwa paapa awe. Nto muhoolo mwaya, aarowa omuhiyerya okhulupale awe, mwanawe.

6. Etthu xeeni yaamwiirinhe Rubeni operteri etireitu ya okhala mwaana oopacerya oyariwa? (Maphattuwelo 49:​3, 4)

⁶ Rubeni aahiperteri etireitu yookhala mwaana oopacerya oyariwa. (1Wah. 5:1) Mwaha wa xeeni? Mwaha woowi, iyaakha saavinre aahirupa ni muthiyana mukina a Yakobe, yoowo aihaniwa Biliha. Nto Biliha, aari epottha ya muthiyana Yakobe amphentexa awe, aihaniwa Rakeli masi vano Rakeli aahikhwa. (Maph. 35:​19, 22) Rubeni aari mwaana a Yakobe a muthiyana mukina aitthaniwa Liya. Exeeni yaamwiirinhe Rubeni orupa ni Biliha? Muhiliyale wiira Rubeni aari mwaana a muulupale awe Rakeli, aitthaniwa Liya. Pooti wiira Rubeni aahirupa ni Biliha, ophavelaka wiira Yakobe omunyokheke Biliha ni omphenteke vanceene Liya, yoowo aari maama awe Rubeni. Aahiiso pooti wiira Rubeni aarootepexa osiveliwa ni Biliha ohinawerya onvilela. Moohicikha etthu yaamwiirinhe, ele aapanke awe yaahimunanara vanceene Yehova ni paapa awe. — Musome Maphattuwelo 49:​3, 4.

7. Etthu xeeni yaamwiiranenle Rubeni ni osuulu awe? (Nwehe ekaaxa eni: “Eprofesia Yakobe Aalavunle Awe Ohalaka Okhwa”.)

⁷ Yakobe aahimuleela Rubeni wiira: “Mohonona ottittimihiwa wanyu”. Molumo ala, yaahiiraneya, maana khiivo etthu enooniherya wiira aahikhala mutthu a osuulu wa Rubeni aari mwene, namukuttho aahiiso profeta. Masi Yakobe khaamunyanyanle mwanawe, nto nihimo na Rubeni naahikhala nuulupale eriyari ya aisarayeli. (Yoox. 12:6) Muhoolo mwaya, Rubeni aahooniherya mikhalelo sooloka ni khiivo etthu enooniherya wiira aahitthikela oraruwa. — Maph. 37:​20-22; 42:37.

8. Yoowiiraneya ya Rubeni, enniixuttiha exeeni?

⁸ Etthu xeeni nniixutta ahu? Nihaana wiimananiha owanana soophavela sahu soohiloka ni okhootta orupihana woohiloka. Okathi nneehereriwa ahu opaka etampi, nihaana wuupuwela moota etthu eyo enrowa aya omunanara Yehova, waakumiherya mixankiho amusi ahu ni atthu akina. Nave nihaana wuupuwela wiira “ele mutthu enaala awe, ti yeeyo onrowa awe ohepha”. (aKal. 6:7) Nave-tho, etthu yaamwiiranenle Rubeni enniniixuttiha wiira Yehova, toomoriwa ikharari. Nnaamwi Yehova ohinikhoottiheryaka onikhumelela mixankiho mwaha wa soovonya sahu, owo onooreeliha wiimananiha wahu opaka itthu sooloka.

SIMEYONI NI LEVI

9. Xeeni Yakobe aahaasiveliwe awe ni Simeyoni ni Levi? (Maphattuwelo 49:​5-7)

⁹ Musome Maphattuwelo 49:​5-7. Moottharela, Yakobe aahilavula ni Simeyoni ni Levi. Etthu Yakobe aalavunle awe ennooniherya wiira khaasiveliwe ni itthu yaapanke aya. Iyaakha saavinre, mwaana mwaamuthiyana a Yakobe aitthaniwa Dina, aahirupihiwa ni mulopwana mmosa a oKanaani aitthaniwa Sikhemi. Etthu ele yaamwiiranenle Dina, yaahaariipiha murima anamwane ootheene a Yakobe, masi Simeyoni ni Levi yaahipaka etthu yootakhala. Awo yaahaawoka alopwana ale omuhela muhina Sikhemi ahimyaka wiira vakhala wiira yaamunnuwihiwa, yaamwaataana naawo. Nto awo yaaheemererya. Nlelo yoonaka owereya vanceene mwaha wa winnuwihiwa iwe, Simeyoni ni Levi “yahikuxa ikatana saya, yahikela mmuttettheni vohanyiheriwa etthu, khuwivakasa alopwana othene”. — Maph. 34:​25-29.

10. Eprofesia ya Yakobe yaamuhimya Simeyoni ni Levi, yiiraneyale sai? (Nwehe ekaaxa eni: “Eprofesia Yakobe Aalavunle Awe Ohalaka Okhwa”.)

¹⁰ Yakobe aahinanariwa vanceene mwaha wa anaawe ale anli, owiiva atthu anceene. Owo aahaaleela wiira yaarowa omwara-mwareya mittetthe soovirikana sa wIsarayeli. Moolumo ala yaahiiraneya nuumala ovira iyaakha 200, okathi aisarayeli yaakenle aya Elapo Yooleiheriwa. Nihimo na Simeyoni, naahivahiwa mittetthe soovirikana eriyari ya muttetthe wa oYuda. (Yox. 19:1) Levi, aahivahiwa isitati 48, seiyo saari mittetthe soovirikana sa wIsarayeli. — Yox. 21:41.

11. Itthu xeeni sooreera nihimo na Simeyoni ni Levi naapanke aya?

¹¹ Osuulu wa Simeyoni ni Levi, khiwaatthikenle opaka itthu soohiloka yaapanke aya amuhavinre aya. Alevi anceene yaanimukokhorela Yehova moororomeleya. Okathi Moise aakhenle awe Nlamulo na Yehova omwaako Sinayi, aisarayeli anceene yaahimukokhorela mwaanyompe. Masi alevi yaahikhootta omukokhorela muluku a ethiru. Nave ohoolo waya, yaahimukhaliherya Moise waapwetexa ale yaamukokhorenle mwaanyompe owo. (Okhu. 32:​26-29) Yehova aahivalaanya nihimo na Levi, aavahaka eparakha yookhala anamukuttho. (Okhu. 40:​12-15; Mmr. 3:​11, 12) Muhoolo mwaya, nihimo na Simeyoni naahikhaliherya nihimo na Yuda owana ni akanaani wiira akuxe muttetthe aya, Elapo Yooleiheriwa. — Aph. 1:​3, 17.

12. Ntakiheryo na Simeyoni ni Levi, ninniixuttiha exeeni?

¹² Etthu xeeni nniixutta ahu? Muheemererye onanariwa weettihaka miteko ni soothanla sanyu. Ekeekhai wiira pooti onyoonyiheyaka, vakhala wiira nyuwo aahiiso mmusi anyu onnithokoreriwa moohixariya. (Esal. 4:4) Nihiliyale wiira Yehova khoneemererya moolumo ni miteko sinooniherya oviruwa. (Yak. 1:20) Okathi ninnyoonyihiwa ahu ni atthu animurumeela aahiiso ahinimurumeela Yehova, ninniimananiha opaka etthu enimusivela Yehova. Vaavo nimpaka ahu eyo, ninnisyaka waakumiherya mixankiho atthu akina. (aRom. 12:​17, 19; 1Ped. 3:9) Okathi anamuyari anyu anipaka aya itthu soohiloka, muhiliyale wiira khamunkhanyereriwa otthara ntakiheryo naya. Muhuupuweleke wiira khivaniweryaneya omusiveliha Yehova ni khonrowa wooreelihani. Yehova onimookhaliheryani opaka itthu sooloka ni onimootthuvelani.

YUDA

13. Xeeni Yuda aapacenrye awe oxanka vaavo waaphiyale aya okathi wiira paapa awe olavule ni yena?

¹³ Moottharelana, Yakobe aahipacerya olavula ni Yuda. Nuumala wiiwa moolumo a Yakobe aaleela awe axuulupale awe, Yuda aahipacerya oxanka. Maana owo nave aahipaka itampi suulupale. Nuumala Simeyoni ni Levi owiiwa alopwana a oSikhemi, Yuda aahaatthara axuulupale awe wiira yakuxe mireerelo sa atthu ale. (Maph. 34:27) Nave owo ni axuulupale awe, yaahimutumiha Yosefe ntoko epottha ni yaahinwoka paapa aya. (Maph. 37:​31-33) Muhoolo mwaya, aahirupa ni Tamari mwaara a mwanawe, uupuwelaka wiira aari muthiyana namararuwa. — Maph. 38:​15-18.

14. Itthu xeeni sooloka Yuda aapanke awe? (Maphattuwelo 49:​8, 9)

¹⁴ Okhaliheriwaka ni Yehova, Yakobe aahimuttottopela Yuda ni aahimureeliha. (Musome Maphattuwelo 49:​8, 9.) Yuda aanithokorerya vanceene moonelo wa paapa awe uuluvanle. Nave owo aahimoonela othunku muhima awe ookiserya oyariwa, yoowo aihaniwa Beniyamini. — Maph. 44:​18, 30-34.

15. Yuda aareelihiwe mwa enamuna xeeni?

¹⁵ Yakobe aahimuleela Yuda wiira taarowa waahoolelaka axinnawe. Masi eprofesia ela yaahipisa wiiraneya. Ekwaha yoopacerya Yuda onilavuliwa awe aahoolelaka axinnawe, siira sivinre ene iyaakha 200, okathi yaari aya moothakoni. Maana nihimo na Yuda naahaahoolela aisarayeli mpakha okela Elapo Yooleiheriwa. (Mmr. 10:14) Iyaakha saattharelana, Yehova aahimuthanla Yuda wiira opacerye toko owana ni akanaani wiira okuxe mittetthe sikina sa Elapo Yooleiheriwa. (Aph. 1:​1, 2) Davidi, yoowo aari osuulu wa Yuda, taapacenrye okhala mwene a mamwene yaawo yaakhuma nihimo nle na Yuda. Masi saahikhala inamuna sikina moota eprofesia yaamuhimya Yuda yaarowa aya wiiraneya.

16. Eprofesia eri Maphattuwelo 49:​10, yiiraneyale sai? (Nwehe ekaaxa eni: “Eprofesia Yakobe Aalavunle Awe Ohalaka Okhwa”.)

¹⁶ Yakobe aahooniherya wiira Mwene a mahiku ootheene aapinaatamu, aarowa okhumelela nihimo na Yuda. (Musome Maphattuwelo 49:10.) Mwene owo ti Yesu Kristu, yoowo Yakobe aamwiihanne awe okhala Silo. Nimuhimyaka Yesu, nlaikha nimosa naahimmye so: “Yehova Muluku, ononvaha ehice ya Davidi, tiithi awe”. (Luka 1:​32, 33) Nave Yesu onnihimmwa okhala “kharamu a nihimo na Yuda”. — Wis. 5:5.

17. Ninrowa omutakiha sai Yehova mwa enamuna nnaathokorerya ahu atthu akina?

¹⁷ Etthu xeeni nniixutta ahu? Yehova aahimureeliha Yuda nnaamwi aapanke itampi suulupale. Masi niireke axuulupale awe Yuda, yaaniikoha etthu Yehova anwehanne awe? Moohicikha etthu ene, Yehova aahiweha itthu sooloka Yuda aapanke awe ni aahimureeliha. Ninrowa otthara sai ntakiheryo na Yehova? Okathi munna aahiiso murokora onivahiwa awe iparakha suulupale, hiyo pooti opaceryaka oweha ifaalya sawe. Masi nnimwiira saana, wuupuwelela wiira Yehova onnisiveliwa ni mikhalelo sooloka sa munna aahiiso sa murokora owo. Yehova oniweha itthu sooloka arumeyi awe anipaka aya. Nave nihaana wiimananiha omutakiha Yehova.

18. Xeeni nimpirisari ahu okhala atthu oopixa murima?

¹⁸ Yoowiiraneya ya Yuda enniniixuttiha etthu ekina. Etthu ene, tiila: Nihaana opixa murima. Khula okathi Yehova onnimaleliha itthu onileiherya awe. Masi khahiyo wiira okathi wootheene onipaka okathi ni enamuna nimphavela ahu. Osuulu wa Yuda, khiwaapacenrye niinaano-ru waahoolela atthu a Muluku. Masi awo yaanaakhaliherya moororomeleya ale Yehova aathanlale awe wiira yaahooleleke ntoko Moise, yoowo aari mulevi, Yoxuwa, yoowo aari a nihimo na Efrayimi ni mwene Sawuli, yoowo aari a nihimo na Beniyamini. Hiyo nave nihaana waakhaliherya ale Yehova aathanlale awe wiira anihooleleke olelo-va. — aHep. 6:12.

19. Eprofesia Yakobe aalavunle awe ohalaka okhwa, enniixuttiha exeeni voohimya sa Yehova?

¹⁹ Mpakha-va, etthu xeeni niixuntte ahu ni eprofesia Yakobe aalavunle awe ohalaka okhwa? Vannooneya wiira “ele mutthu oniweha awe, khahiyo yeeyo” Muluku oniweha awe. (1Sam. 16:7) Yehova toopixa murima ni toolevelela. Nnaamwi Yehova ohisiveliwaka ni itthu sootakhala sinipakiwa, owo khonilipelela wiira okathi wootheene arumeyi awe anrowa opakaka itthu sooloka. Yehova pooti waareeliha atthu yaale khalai yaapanke itampi suulupale attharuwa ni murima aya wootheene ni anapaka itthu sooloka. Mwaha onittharelana, nnoothokorerya itthu Yakobe aaleelale awe anaawe akina 8.