Yehova Oonikhaliherya ‘Wunnuwa Opuro Naaliwe Ahu’

Munna ni murokora Kassholms, yaahirowela Eskola ya oXileyaadi mwaakha wa 1979. Mwa iyaakha sinceene, awo “ahaaliwa”, aahiiso aavahiwa soothanleliwa soovirikana wiira yarumeele wIrão, oMaurícias, oMianmar, oTanzânia ni oZaire. Yaari eskola yeele ya oXileyaadi, munna Jack Redford aavahale awe miruku seiyo saakhalihenrye okathi munceene “yaaliwa aya”, “yaapheliwa aya” ni “yaaphatteiwa aya”. Mats ni Ann-Catrin annitthokiherya.

Munna Mats, mookhala oonileela moota mwiixuntte anyu ekeekhai?

Mats: Okathi wa Ekhotto ya Nenli ya Olumwenku Wootheene, paapa aka aakhala oPolónia. Owo aahiweha itthu soohiloka saapakiwa ni atthu a Ekerexa Katoolika. Hata vari siiso, ikwaha sinceene owo aanihimya wiira: “Kinoona wiira yookhala etiini yeekeekhai!” Muhoolo mwaya, kaahoona wiira aahimya ekeekhai. Kaahithuma iliivuru ni ibroxuura sinceene soorumeeliwa wiira kisomeke. Eliivuru emosa kaathumme aka, yaarina muru oni: Conhecimento Que Conduz à Vida Eterna. Muru wa eliivuru ele waahikivara murima. Kaahisoma eliivuru yootheene ohiyu omosa paahi. Nuumaliha osoma eliivuru ele, kaahoona wiira koophwanya etiini yeekeekhai!

Okhuma mweeri wa Abril a 1972, koosoma iliivuru sinceene sa Anamoona a Yehova ni koophwanya waakhuliwa wa makoho aka mbiibiliyani. Moonelo aka waalikana ni mulipa a nakoso oniromoliwa nlikanyiho na Yesu, yoowo nuumala ophwanya epeerola emosa yaarina efaita yuulupale, aatumihale itthu sootheene aarina awe wiira othume. Kaahihiya yoophavela aka ya orowa osoma wuniwersitaati wiira kikhale totoro. Kaahiira siiso, wiira kithume “epeerola” ya ekeekhai, yeeyo kaaphwanyale aka. (Math. 13:​45, 46) Kipatisiwe 10 a Dezembro a 1972.

Ohinatthi omala mwaakha, anamuyari aka ni muhima aka, yaaheemererya ekeekhai ni yaahipatisiwa. Julho a 1973, kaahipacerya orumeela ntoko pioneero rekular. Aahikhala murokora ookisivela, aihaniwa Ann-Catrin, yoowo aarumeela ntoko pioneera rekular muloko ahu ni amphenta vanceene Yehova. Naahipacerya onamorari ni naahithelana mwaakha wa 1975. Iyaakha 4 saattharelana, naahirowa orumeela esitati ya Strömsund, mapuro ooreera a oSuécia, weiwo atthu anceene yaasiveliwa aya ekeekhai ya mbiibiliyani.

Ann-Catrin: Paapa aka, aahiixutta ekeekhai nlelo osomaka wuniversitaati, esitati ya wEstocolmo. Kiira kirina ene miyeeri miraru nuumala oyariwa, masi owo aanikikuxa orowaka mithukumano ni olaleerya. Maama aka, khivaamusivela ni aaheererya wooniherya wiira Anamoona khiyaixuttiha ekeekhai. Masi amaama khiyaawenrye. Tivonto, nuuvira okathi awo yaahipatisiwa. Okathi kaarina aka iyaakha 13, kaahipatisiwa. Nave okathi kaarina aka iyaakha 16, kaahipacerya orumeela ntoko pioneera rekular. Nuumala orumeela muttetthe wa Umeå, weiwo yahaareere othowa anamalaleerya a Omwene, kaahipacerya orumeela ntoko pioneera espesiyaale.

Nuumala otheliwa ni Mats, hiyo naahikhalana eparakha ya waakhaliherya atthu anceene wiixutta ekeekhai. Mmosa a atthu awo, aari Maivor, mwali yoowo aahiyale oweetta axooku wiira omurumeeleke vanceene Yehova. Owo aarumeela ntoko pioneera rekular vamosa ni muhima aka. Awo yaahirowa eskola ya oXileyaadi mwaakha wa 1984. Vano anirumeela ntoko mamisionaaria elapo ya wEcuador.

Iyaakha murumeelale anyu ntoko mamisionaario, mutthanre sai miruku soowi ‘munnuweke opuro mwaaliwe anyu’?

Mats: Ikwaha sinceene, hiyo naanivahiwa yoothanleliwa esya. Masi etthu emosa yaanikhalihenrye olimalela makhalelo masya, waari wiimananiha opaka naawerya ahu nimutakihaka Yesu, vanceenexa nitakihaka mukhalelo awe wa wiiyeviha. (aKol. 2:​6, 7) Mwa ntakiheryo, ohiya waawehererya anna ni arokora wiira apakeke itthu ntoko naalimalenle ahu, hiyo naaneererya osuwela etthu yaawiiriha opaka itthu mwa enamuna ekina. Naaneererya osuwela moota yuupuwela aya ni ekultuura aya. Okathi naamutakiha ahu Yesu, vaanikhweya olimalela makhalelo masya ni naanihakalala ni khula yoothanleliwa naavahiwa ahu. — Esal. 1:​2, 3.

Ann-Catrin: Wiira mwiri ophatteiwale wunnuwe, onnipirisari oviha wa nsuwa. Okathi wootheene, Yehova aahooniherya okhala “nsuwa” para hiyo. (Esal. 84:11) Yehova aahinireeliha onivahaka anna ni arokora oophenta. Mwa ntakiheryo, oTeerã, wIrão, anna ni arokora yaahinaakhela saana ni yaari oovaha. Eyo yaaninuupuxerya waakheliwa saana wiiraneyale khalai, ntoko ninsoma ahu mbiibiliyani. Hiyo vaaninsivela okhala elapo ele ya wIrão, masi Julho a 1980, Anamoona a Yehova yaahikhoottiheriwa muteko aya woolaleerya elapo ele. Nave hiyo naavahiwe mahiku manli wiira nikhume elapo ele. Nto naahithanleliwa orowa orumeela oZaire (vano onisuweliwa okhala oCongo), wÁfrica.

Okathi kaasuwenle aka wiira nithanleliwe orowa wÁfrica, miyo kaahinla. Miyo kaahixanka nuumala wiiwa silavuliwaka inowa ni iretta wÁfrica. Masi apatthani ahu anli, yaawo yaatonko orumeela wÁfrica, yaahinileela wiira: “Muhoove. Nyuwo khamutonko okhala wÁfrica, masi musuwele wiira vanimoosivelani okhala”. Awo yaahimya ekeekhai! Tthiri anna ni arokora toophenta ni tooreera murima. Mweekeekhai, nuumala orumeela iyaakha 6 wÁfrica, naahaana okhuma mwaha woowi muteko ahu waahikhoottihiwa ni kuvernu. Miyo kaahitheya okhala wiira, vano muupuwelo aka waahiturukeya ni kaahinvekela Yehova wiira: “Khoo Yehova, nihiyeeni nlelo nikhale wÁfrica”.

Mareeliho xeeni mphwannye anyu iyaakha iya sivinre mmurumeelaka Yehova?

Mats: Soothanleliwa nivahiwa ahu, soonikhaliherya waapaka apatthani mamisionaario yaakhuma ilapo soovirikana. Nave-tho, soothanleliwa sikina saahinivaha eparakha yoowiiriha soosoma sa Biibiliya, etthu yoowiiraka 20 khula mutthu! Nave nkiniliyala ophenta ni oreera murima wa anna ni arokora a wÁfrica. Okathi naaxukurya ahu miloko sa oZaire, hiyo naarupa mukaaroni mwahu. Masi anna ni arokora yaaniphavela osuwela vakhala wiira naahikhalana itthu sootheene naapirisari ahu, hata awo yaari oohaawa. (2aKor. 8:3) Etthu ekina yootepa oreera, waari okathi naakontari ahu itthu saaniiranenle. Eyo yiiraneya wuumalani wa khula nihiku. Okathi owo, miyo ni Ann-Catrin naanikilaathi nnalavula itthu siiraneyale nihiku nle, nave naanimuxukhuru Yehova mwaha woonikhaliherya.

Ann-Catrin: Para miyo koohakalala waasuwela anna ni arokora olumwenku wootheene. Hiyo nihiixutta mattaava manceene, ntoko eFarsi, eFrancês, eLuganda ni eSuaíli. Nave noosuwela ikultuura soovirikana. Nookhaliherya waaterenari anna ni arokora a niinaano, nihaapaka apatthani ni ninnihakalala omurumeela Yehova hoothe. — Sof. 3:9.

Nave-tho, nooweha itthu sinceene ni sooreera Yehova opattunxe awe. Khula okathi neemererya ahu yoothanleliwa esya muteko wa Yehova, naakhala ntoko wiira neetta mukwaha ni Yehova wiira onilakiheryeke. Yehova ooniixuttiha itthu sinceene, nahaarowa ahu wiixutta mekhihu.

Mixankiho xeeni mwaarina anyu ni etthu xeeni yookhalihenryeni ovilela?

Mats: Ikwaha sinceene hiyo naaniwereiwa. Mwa ntakiheryo, naahiphwanya malaaria. Nave, Ann-Catrin aahaana woopereriwa mootutuxerya. Nave-tho, naanixanka mwaha wa anamuyari ahu yuuluvala. Tivonto, ninnaaxukhurela vanceene axihima ahu ni axirokorihu, yaawo yaanikhaliherya waakhapelela. Awo yaanaakhapelela anamuyari ahu, yooniheryaka opixa murima, ohakalala ni ophenta. (1Tim. 5:4) Masi ikwaha sikina, naanixanka mwaha wa muupuwelelo woohiloka, noonaka wiira naahaana opaka itthu sikina wiira naakhaliherye anamuyari ahu, hata naakhala ottaiwene.

Ann-Catrin: Mwaakha wa 1983, okathi naarumeela ahu oZaire, naahiwereiwa vanceene mwaha koolera. Meetiku aahimuleela Mats wiira: “Mwaakumihe olelo-va amwaarinyu elapo ela!” Nihiku naattharelana, naahiwela eviyau yaakuxa miritti, nnarowa oSuécia.

Mats: Nuupuwela wiira muteko ahu wa omisionaario waahimala. Tivonto, naahinla vanceene. Nnaamwi meetiku aalavunle wiira Ann-Catrin khaarowa ovona, Ann-Catrin aahivona. Nuumala mwaakha mmosa, naahitthikela oZaire. Okathi owo, naarumeela muloko mwaamukhaani wa oLubumbash, weiwo anna yaalavula aya eSuaíli.

Ann-Catrin: Okathi naari ahu oLubumbash, miyo kaahirupala, masi erukulu yaahiyiiheya. Nnaamwi naahaarina palano a omuyara mwaana, naahiriipiwa murima vanceene nuumala erukulu ele oyiiheya. Okathi owo wa mixankiho, Yehova aahinivaha etthu nahaalipelela ahu. Soosoma sahu sa Biibiliya saahincerereya ovikana khalai. Ohinatthi omala mwaakha mmosa, anamalaleerya yaahincerereya okhuma 35 aphiya 70. Nave atthu yaarweela mithukumano yaahincerereya okhuma 40 aphiya 220. Hiyo naanikhalela nthiti muteko woolaleerya, nave Yehova aanireeliha wiimananiha wahu. Nto eyo yaaniniiriha okhala saana. Hata vari siiso, nlelo hiyo ninnuupuwela erukulu ele eyiiheyale. Nave ninnilipelela oweha moota Yehova onrowa awe omaliha owereya wootheene mparayiisu.

Mats: Muhoolo mwaya, Ann-Catrin aahikhulumuwa vanceene. Okathi omosa-ru, kaahiphwanyaniwa kanser aafetanri marupo, nto kaanipirisari wooperariwa. Masi olelo-va, miyo kaakumi nave Ann-Catrin onnipaka eniwerya awe wiira omurumeele Yehova.

Hiyo naahoona wiira mixankiho khasinniphwanya mekhihu. Nuumala wiivanana wiiraneyale oRuanda mwaakha wa 1994, naahaaxukurya apatthani anceene yaari ekampu ya marefuxiyaatu. Oweha waamini waya, ovilela ni owaakhela waya aletto okathi wa mixankiho, woonikhaliherya woona wiira Yehova ookhalana owerya wiira aakhapelela atthu awe aniphwanyiwa mixankiho. — Esal. 55:22.

Ann-Catrin: Muxankiho mukina waaniphwannye, okathi naarowale ahu oweha ovahereriwa wa efiliyaali ya wUganda, mwaakha wa 2007. Nuumala eprokrama, naaheetta nirowaka oNairobi, oQuénia, niri ene ni mamisionaario ni mabeteliita 25. Nihinatthi ophiya efronteera ya oQuénia, yaahirwa ekamiyau emosa emana ekaaro naari ahu. Motorista ni apatthani ahu 5, yaahikhwa okathi ene yoole. Nave murokora mmosa aakhwiiye ospitaali. Ninnilipelela waaweha-tho apatthani ahu ale! — Yoobi 14:​13-15.

Nuuvira okathi, makhwatta aka yaahivola. Masi miyo ni Mats ni atthu akina vakhaani, yaanixanka mwaha wa asitenti ole. Ikwaha sinceene, oxanka iwo waanikiiriha ovinya ohiyu ni murima waanikiwereya. Nto eyo, yaanikiiriha woova vanceene. Onvekela Yehova ni osoma ni wuupuwelela soolepa sinnisivela saahiniiriha okhala oomaaleleya. Nave-tho, naahirowa okumana ni mameetiku wiira anikhaliherye moota woovukula oxanka wahu, nto eyo yaahinikhaliherya vanceene. Vano khanintepa oxanka. Nave ninninvekela Yehova wiira aakhaliherye atthu akina aniwanana muxankiho mmosa-ru.

Okathi mwaalavula anyu moota Yehova ookhalihenryaaweni ovilela mixankiho, mwaahihimya wiira owo aahookhapelelani “ntoko maace oohaapeiwa”. Munna, mwaaphavela ohimya exeeni?

Mats: Moolumo ala anilavuliwa ni nttaava na eSuaíli, ani: “Tumebebwa kama mayai mabichi” aahiiso “hiyo naahikhapeleliwa ntoko maace oohaapeiwa”. Ntoko siisaale mutthu onikuxa awe saana maace oohaapeiwa wiira ahiphweeye, moophenta Yehova aahinikhaliherya ni khula yoothanleliwa naavahiwa ahu. Okathi wootheene, naanikhalana itthu naapirisari ahu, ovikana iye naaphavela ahu. Enamuna emosa noonale ahu wiira Yehova onniniphenta ni onikhaliherya, moota anna a Nikhuuru Noolamulela, yaanireerenle aya murima.

Ann-Catrin: Kiniphavela olavula ntakiheryo nimosa nnooniherya moota Yehova aanikhalihenrye awe. Nihiku nimosa, kaahilikareliwa, kileeliwaka wiira apaapa, yaawo yaakhala oSuécia, khiyaareere owereiwa. Mats iira omalaka-ru woona saana mwaha wa malaaria, nave khaawerya oliva epilyeti ya eviyau wiira nrowe owaani. Naahuupuwela otumiha ekaaro ahu. Nuumala-vo, naahaakhela ixamaata piili. Examaata emosa, yaari anamathelana yaiwale muxankiho ahu ni yaaphavela omuliverya epilyeti mutthu mmosa. Examaata ekina, yaari ya murokora oowuuluvala, yoowo aasunke musurukhu awe mukaaxani wiira “okhaliheriwe mutthu aarowa opirisari”. Minuutu vakhaani paahi, Yehova aahinikhaliherya othuma ipilyeti naapirisari ahu! — aHep. 13:6.

Exeeni mwiixuntte anyu, muupuwelaka iyaakha iya 50 sivinre nvaraka muteko wa Muluku wa okathi wootheene?

Ann-Catrin: Kihiixutta wiira ikuru sahu sinlipa ni ‘omuroromela [Yehova] ni murima’. Okathi nimmuroromela ahu Yehova, ninnoona wiira owo toniwana nipuro nahu. (Yes. 30:15; 2Wah. 20:​15, 17) Mwaha woomurumeela Yehova nipakaka sootheene siniwerya ahu khula yoothanleliwa, nihaakhela mareeliho manceene, ovikana naarowa ahu waakhela naavara miteko sikina.

Mats: Etthu yuulupale kiixuntte aka, ori omuroromela Yehova wa khula muxankiho ni oweha moota owo onikikhaliherya awe. (Esal. 37:5) Okathi wootheene, Yehova onnikikhaliherya ntoko oleihenrye awe. Nave ninnoona wiira Yehova onninikhaliherya ni yoothanleliwa esya, eBeteli ya oMianmar.

Ninnikupali wiira amiravo anceene aniphavela wuncererya muteko aya woolaleerya, animoona ophenta woororomeleya wa Yehova ntoko onoonihenrye awe. Ninnikupali ni murima ahu wootheene wiira, akhala wiira amiravo anrowa omweemererya Yehova waakhaliherya, awo animunnuwa khula opuro anrowa aya waaliwa.