1925​​—⁠Soovira Iyaakha 100

ATTHU A MULUKU YAAHAANA OHIHIYA OLIPELELA

Anamasoma a Biibiliya anceene, yuupuwela wiira elapo yaamutthikela okhala eparayiisu, mwaakha wa 1925. Mwaha wa xeeni? Munna Albert Schroeder, yoowo muhoolo mwaya aari a Nikhuuru Noolamulela, aatthokihenrye so: “Hiyo naakupali wiira mwaakha wa 1925 anna oothanliwa yaamurowa wiirimu. Nave, ale oororomeleya, eyo piiyo, Abrahamu ni Davidi, yaamuhihimuxiwa wiira yaahooleleke atthu valaponi”. Tivonto, okathi eyo yahiiraneyale aya, anna ni arokora akina yaahikhulumuwa. — Mir. 13:12.

Nnaamwi awo yaakhulumunwe, Anamasoma a Biibiliya anceene khiyaahiyale olaleerya. Awo yaahisuwela wiira olaleya muhupi wa Yehova, ti yaari etthu ya efaita yinceene yaareerela aya opaka. Nrowe niwehe moota yaamurumenle aya raatiyu wiira yaalaleerye atthu anceene.

SAAHINCERERIWA IMISOORA SA ARAATIYU

Mwaakha wa 1924, atthu anceene yaaninwiriyana raatiyu WBBR. Vano mwaakha wa 1925, Anamasoma a Biibiliya yaahipaka imisoora sikina sa raatiyu waattamela oChicago, Illinois. Emisoora ele yaahilempwa moolumo ani: WORD, yaawo yaamusuwanyeiha raatiyu ole. Ralph Leffler, yoowo aakhalihenrye otekiwa emisoora ele ya raatiyu, aahimmye wiira: “Eyiita, vaavo vaniriirya aya vanceene, atthu a mapuro oorakamela yaaniwiriyana emisoora ya raatiyu WORD”. Mwa ntakiheryo, emusi emosa, yeeyo yaarakamenle ikiloomo sinivikana 5.000 ni oPilot Station, wAlasca, yaahiwiriyana eporokaraama ya raatiyu ole ekwaha yoopacerya. Nuumala owiriyana, emusi emosa yaahilepa ekarta yaaxukhurelaka anna yaakhalihenrye okumiheriwa raatiyu ole, yoowo aalavula moolumo oolipiha yaakhaliherya omusuwela Muluku ni Biibiliya.

Erevista Owehaweha ya 1 a Dezembro ya 1925, ennitthokiherya moota atthu anceene yaawerya aya owiriyana eporokaraama ele, eyo enihimya so: “Emisoora ela ya raatiyu WORD, tenitepa owiriyaniwa wEstados Unidos. Atthu anceene anniwiriyana, okhale mpantta onikhuma nsuwa ni onikela nsuwa wa wEstados Unidos, oCuba ni mpantta wa onorti wa Alasca. Atthu anceene yahaatonko wiiwa ekeekhai, yaahipacerya ophavela omusoma Biibiliya okathi yaawiriyana aya emisoora ele”.

Okathi omosa-ru, Anamasoma a Biibiliya yiira yiimananihaka omurumeela vanceene raatiyu, wiira yalaleyeke ihapari sooreera oCanadá. Nto mwaakha wa 1924, yaahipaka estasau ya raatiyu yiihaniwa CHUC, oSaskatoon, oSaskatchewan. Ela yaari emisoora yoopacerya, yaalavula myaha sa etiini oCanadá. Nto mwaakha wa 1925, emisoora ele, yaahaana othaamiheriwa opuro mukina muulupale. Tivonto, Sociedade Torre de Vigia, yoowo aari mwaneene emisoora ele, aahithuma ni olokiherya empa yuulupale yeeyo khalai yaapakiwa iteyaaturu, oSaskatoon, wiira orumeeleke.

Mwaha wa emisoora ela, atthu anceene yaakhala ipooma saamukhaani ni mapuro oorakamela ositati a oSaskatchewan, yaahiwiriyana ihapari sooreera ekwaha yoopacerya. Mwa ntakiheryo, epooma emosa yoorakamela, muthiyana aihaniwa Graham nuumala onwiriyana raatiyu ole, aahilepa ekarta ovekelaka iliivuru saamutthokiherya Biibiliya. Munna George Naish, aahimmye wiira muthiyana ole aahivekela wiira ohipiseriwe okhaliheriwa. Nto eyo ti etthu yaaniirihale moowaakuveya onvaha ivolume sootheene sa Estudos das Escrituras. Moohipisa, Graham aahaalaleerya atthu anceene muhupi wa Omwene, yaawo yaakhala mapuro oorakamela.

NAAHIIXUTTA ETTHU YUULUPALE

Erevista Owehaweha 1 a Março ya 1925, yaahikhalana mwaha woovara murima waahimya wiira: “Okhumelela wa Nloko”. Xeeni mwaha ola waarina aya efaita yuulupale? Anamasoma a Biibiliya yaanisuwela wiira Satana tonilamulela malaikha ootakhala ni toneettiha itiini soowootha. Nave Satana toniweettiha anamalamulela ni alipa a nakoso a olumwenku ola. Mwaha wa erevista ele, waahaakhaliherya anna ni arokora wiiwexexa wiira arumeyi a Yehova ari wiirimu ni ari valaponi, toowiiraana. Awo anivara hoothe ni aavalaana ni olumwenku wa Satana, maana anikhaliherya Omwene wa Yehova ni onvaanyiha Satana ni ale animukhaliherya. (Math. 24:45) Nave, murumeyi oororomeleya aahitthokiherya wiira mwaakha wa 1914, Omwene wa Muluku waahipacerya olamulela, nto mwaha wa ‘ekhotto yaakhumelenle wiirimu’ mwaakha ole, Satana ni malaikha awe ootakhala yaahoomoliwa wiirimu ariheliwa valaponi. — Wis. 12:​7-9.

Anamasoma akina waahaavila weemererya otthokiheriwa nno wa niinaano. Mwaha waivaavo, mwaha ole waahihimya wiira: “Hiyo ninnaatumeererya ale anisoma erevista Owehaweha ahineemererya otthokiheriwa nno wa niinaano, wiira aahaana opixa murima, omukupali Yehova ni ohihiya omurumeela moororomeleya”.

Tom Eyre, kolportoore (vano onisuweliwa okhala pioneero) yoowo aakhala oGrã-Bretanha, aahihimya moota Anamasoma a Biibiliya yoonela aya mwaha ole, oriki: “Anna yaahihakalala vanceene moota aatthokiheriwa awe Wiisuupulula ekapiitulu 12. Okathi naasuwenle ahu wiira Omwene wa Muluku waahipacerya olamulela wiirimu, hiyo naahihakalala vanceene waaleela ihapari iya isya atthu akina. Mweekeekhai, eyo yaahiniiriha ophavela wuncererya muteko ahu woolaleerya ni yaahinikhaliherya oweha wiira Yehova onrowa opaka itthu sooreera muhoolo”.

OLALEYA VOOHIMYA SA YEHOVA

Olelo-va, Anamoona a Yehova annilavula ikwaha sinceene moolumo ari Yesaya 43:​10, yaawo ani: “Anamon’aka ti nyuwo: anihimya t’Apwiya. Miyo kihothanlani nyuwo arumeyi aka”. Masi ohinatthi mwaakha wa 1925, iliivuru sahu khisaalavula vanceene yoolepa ela. Nuumala-vo itthu saahiturukeya. Mwaakha wa 1925, saahikumiheriwa irevista Owehaweha 11, seiyo saatthokiherya oratteene yoolepa ela ya Yesaya 43:​10, 11 ni 12!

Wanikisa wa mweeri wa Agosto, mwaakha wa 1925, Anamasoma a Biibiliya yaahithukumana wiira ampake Konkereesu wIndianapolis, Indiana. Orumeelaka moolumo yaari vaporokaraamani, munna Joseph Franklin Rutherford, aahiwaakhela ale yaamurwenle konkereesu owo, oriki: “Hiyo noomurweela konkereesu ola . . . wiira niphwanye ikuru sinikhuma wa Apwiya, wiira naatthikelaka owaani nitepeke ophavela olaleerya ntoko Anamoona awe”. Mahiku ale 8, ootheene ale yaamurowenle konkereesu ole, yaahilipa wiira alaleye voohimya sa Yehova khula okathi vaaweryaneya aya.

Saabadu, 29 a Agosto, munna Rutherford aahilavula mwaha waarina muru oni: “Mukhaleleke Nthiti Ovara Muteko”. Mwaha ole, owo aahittittimiherya efaita orina aya muteko woolaleerya, oriki: “Yehova onnaaleela atthu awe wiira . . . ‘Nyuwo mwa’ànamon’aka: vano miyo ki Muluku’. Nuumala-vo, owo aahaatumererya oriki: ‘Nwemexerye nthonyeryo atthu othene’. Khekhanle ekurupu ekina valaponi ekhanle ooweemexerya nthoonyeryo atthu, muhikhanle nyuwo muneettihiwa ni ikuru soowaarya sa Apwiya, ni muri anamoona awe”. — Yes. 43:12; 62:10.

Nuumala-vo, munna Rutherford aahisoma etukumento eni: “Muhupi Onaavaha Atthu Nlipelelo”. Atthu ootheene yaaheemererya muhupi ole waahimya wiira Omwene wa Muluku paahi tonrowa oruuha mareeliho ntoko: “Murettele, opuha, ekumi, okumi, otaphuwa ni ohakalala ohinimala”. Muhoolo mwaya, etukumento ele yaahitaphuleliwa ni yaahimpirimiriwa wiira erumeeliweke okathi woolaleerya. Vano saahikaiwa ikoopiya imilyau 40.

Saahivira iyaakha sinceene, Anamasoma a Biibiliya ahinatthi opacerya wiihaneliwa nsina noowi: “Anamoona a Yehova”. Hata vari siiso, awo yaahipacerya osuwela efaita erina aya olaleerya voohimya sa Yehova.

OTTHIKELA WAAXUKURYA ALE YAASIVELIWA IHAPARI SA OMWENE

Vaavo nummuru na anaskola a Biibiliya nancerereya aya olumwenku wootheene, anna yaahitumereriwa ohiya paahi orowa okawa iliivuru, masi-tho otthikela waaxukurya ale yaasiveliwa ihapari sooreera. Nuumala ekampaanya yookawa efolyeeto eni: Muhupi Onaavaha Atthu Nlipelelo, eBoletima yaahihimya wiira: “Mutthikele oxukurya itthoko seiye sihiiwale efolyeeto eni: Muhupi Onaavaha Atthu Nlipelelo”.

EBoletim ya Janeiro ya 1925, yaahikhalana erelatoorio ya naskola mmosa a Biibiliya a oPlano, oTexas, yoowo aalempe so: “Etthu yooreera oweha wiira okathi nintthikela ahu mapuro yaale naalalenrye ahu, atthu anneemererya muhupi ovikana mapuro yaale nnampacerya ahu olaleerya. Mwa iyaakha 10, epooma ahu yaamukhaani yoolaleeriwa ikwaha 5. . . . Mahiku vakhaani avinre, murokora Hendrix ni maama aka aatthikela olaleerya ni aakawa iliivuru sinceene ovikana khalai”.

Elapo ya oPanama, korportoore mmosa aalempe so: “Atthu anceene yaawo yaakhoottale okiwiriyana ekwaha yoopacerya, yaahituruka muupuwelo aya okathi kaatthikenle aka ekwaha ya nenli aahiiso ya neeraru. Mwaakha ovinre, kooviriha okathi munceene kaaxukuryaka atthu yaale kaalalenrye aka, ni koophwanya soowiiraneya sinceene sooreera”.

NUUPUWELAKA MUHOOLO

Wanikisa wa mwaakha wa 1925, munna Rutherford aahaalepela ekarta makolportoore, otthokiheryaka muteko woolaleerya waavariwe mwaakha ole ni ele yaarowa aya opaka mwaakha waattharelana. Owo aahimmye wiira: “Mwaakha ovinre, nyuwo mwaahikhalana eparakha ya waalipiha atthu anceene yaariipiwe murima. Muteko ola, woohakalaliha murima anyu . . . mwaakha wa 1926, munookhalana eparakha ya waakhaliherya atthu omusuwela Muluku ni Omwene awe ni owooniherya atthu animurumeela mweekeekhai. . . . Tivonto, ootheene ahu nrowe nimuttottopele Muluku ahu ni Mwene ahu”.

Okathi waattamela aya omala mwaakha wa 1925, anna yaahimpaka palano a wuncererya ipa sa oBeteli, oBrooklyn. Mwaakha wa 1926, mutthenkeso ahu waarowa opacerya eproxeetu yuulupale ya oteka yahaatonko wiiraneya.