Makoho anikohiwa ni ale anisoma irevista sahu
Muupuwelo xeeni, moohipisa Yehova onrowa ohela vamurimani wa anamalamulela?
Olavulaka sa moota anrowa aya opacerya maxakha maalupale, Wiisuupulula 17:16, 17, ohimmye so: “Manyaka 10 ni enama yoowali moonale anyu, sinrowa omunyokha muthiyana namararuwa. Iyo sinoomwaakha itthu sawe sootheene ni sinrowa omuhiya ohiwanre etthu. Nave, sinookhuura erutthu awe ni sinrowa ompaha voomalela ni mooro. Tthiri, Muluku oohela vamurimani vaya ophavela opaka etthu onuupuwela awe, eyo piiyo, opaka etthu emosa-ru ootheene aya anuupuwela aya, owiirihaka ovaha enama yoowali omwene aya”. Khalai, iliivuru sahu saahimya wiira muupuwelo Yehova onrowa awe ohela vamurimani va anamalamulela, ori opwetexa itiini soowootha.
Masi, vannireerela opaka marukunuxo a moota nniiwexexa ahu. Muupuwelo Yehova onrowa awe ohela vamurimani va anamalamulela, ori owiiriha “ovaha enama yoowali omwene aya”. Nrowe niwehe waakhuliwa wa makoho vakhaani, wiira niiwexexe moota eprofesia ela enrowa aya wiiraneya.
Anithoonyerya exeeni atthu anilavuliwa eprofesia ela? “Muthiyana namararuwa” oniihaniwa okhala “Babiloonia Muulupale”, onithoonyerya mutthenkeso wootheene wa itiini soowootha. Nave, “enama yoowali yooxeerya” enithoonyerya Nações Unidas. Mutthenkeso owo waapakiwe mwaakha 1919, yoolakela aya yaari oruuha murettele olumwenku wootheene. Nto, khalai waasuweliwa okhala Liga das Nações. (Wis. 17:3-5) Vano “manyaka 10” anithoonyerya ikuvernu sinikhaliherya enama yoowali.
Waataana xeeni orina awe muthiyana namararuwa ni enama yoowali yooxeerya? Muthiyana namararuwa “okilanthi” vasulu va enama yoowali. Eyo enitaphulela wiira muthiyana namararuwa, onnikhaliherya ni onniimananiha weettiha enama yoowali.
Etthu xeeni enrowa omwiiraneela muthiyana namararuwa? Enama yoowali ni manyaka 10, yaawo animukhaliherya, “sinrowa omunyokha muthiyana namararuwa.” Sinoorowa okuxa mireerelo sawe ni sinimooniherya wiira muthiyana namararuwa tootakhala vanceene. Nave, sinrowa omaleliha ophukela wa Yehova simpwetexaka ni mooro. (Wis. 17:1; 18:8) Eyo, enrowa okhala opwetexiwa voomalela wa itiini soowootha. Masi eyo ehinatthi wiiraneya, Yehova onrowa owiiriha anamalamulela opaka etthu ehitonko opakiwa okhuma vaavale apattuxiwa aya apinaatamu.
Yehova onrowa owiiriha opaka exeeni anamalamulela? Yehova onrowa ohela vamurimani va anamalamulela aahiiso manyaka 10, ophavela opaka etthu onuupuwela awe, eyo piiyo, anamalamulela anrowa ovaha “enama yoowali [yooxeerya] owerya waya”, niire so, Nações Unidas. (Wis. 17:13) Eyo enitaphulela exeeni? Niireke enitaphulela wiira anamalamulela a apinaatamu anrowa othanla vootthuna waya, ovaha okhulupale ni owerya waya enama yoowali? Nnaari! Eprofesia ela, enihimya wiira Muluku tonrowa owiiriha opaka eyo. (Mir. 21:1; mulikanyihe ni Yesaya 44:28.) Niireke marukunuxo awo anrowa wiiraneyaka vakhaani-vakhaani? Nnaari! Anrowa wiiraneya vootutuxerya. Enama yoowali, enrowa oruumela owerya enrowa aya ovahiwa ni Yehova wiira ephukele itiini soowootha, niire so, opwetexa ni omala-maliha.
Nuumala-vo, etthu xeeni enrowa wiiraneya? Khaninrowa wiiwa-tho ihapari sinihimya wiira anamalamulela annimukhaliherya vakhaani-vakhaani Nações Unidas. Etthu nikhanle ahu oolipelela tiila: Mootikiniha ni mootutuxerya, Yehova onrowa wiiriha ikuvernu sa apinaatamu ovaha enama yoowali okhulupale ni owerya orina aya. Nto eyo yiiraneya, nnoosuwela wiira maxakha maalupale ahanle opacerya. Nilipelelaka ophiya okathi owo, “niwehaweheke ni nuupuweleke saana”, okhala wiira moohipisa animwiiraneya marukunuxo awo mootutuxerya! — 1 Ates. 5:6