Tani Ori Mikhayeli?

Waakhuliwa wa mBiibiliyani

Itiini sikina, sinnimuhimya Mikhayeli okhala “Mikhayeli Oowaarwa”. Vanooneya wiira Mikhayeli naari nsina aitthaneliwa awe Yesu ohinatthi orwa valaponi ni nuumala otthikela wiirimu. a Mikhayeli aahiwana ni Satana nuumala Moise okhwa, nave aahikhaliherya nlaikha nimosa omuleela profeta Daniyeli ihapari sa Muluku. (Daniyeli 10:13, 21; Yuda 9) Mikhayeli aahipaka itthu sintoko ninthoonyerya aya nsina nawe: “Tani Onilikana ni Muluku?”, aakiheryaka olamulelo wa Muluku ni owanaka ni awanani a Muluku.— Daniyeli 12:1; Wiisuupulula 12:7.

Nrowe niwehe nthowa naya Yesu onihimmwa awe okhala nlaikha Mikhayeli.

• Mikhayeli, “nlaikha”. (Yuda 9) Nuulumo noowi “Mikhayeli” nintaphulela “nlaikha nuulupale”. MBiibiliyani nimphwanyaneya ikwaha piili paahi, ni onihimmwa mutthu mmosa. Ninhimmwa nlaikha nimosa nniihaneliwa nsina nla. Yoolepa emosa-emosa enihimya wiira, nuumala ohihimuxiwa, Pwiya Yesu “onookhuruwa wiirimu. Owo onookhuwela ni nsu noorunya na nlaikha nuulupale”. (1 aTesaloonika 4:16) Yesu ookhalana “nsu noorunya” okhala wiira owo nlaikha nuulupale, Mikhayeli.

• Mikhayeli, muhooleli a anakhotto a wiirimu. Biibiliya onihimya wiira “Mikhayeli vamosa ni malaikha awe, yaahiwana ni enowa yuulupale”, Satana. (Wiisuupulula 12:7) Mikhayeli ookhalana owerya wiirimu, mwaha woowi onnihimmwa okhala “nimosa na malaikha malupale”, ni “mulupale a malaikha”. (Daniyeli 10:13, 21; 12:1) Maihaneliwo ala, anooniherya wiira Mikhayeli “tonihoolela malaikha a wiirimu”, sintoko onihimya awe musomi a Wataana wa Niinaano oniitthaniwa David Aune.

  Biibiliya onromola nsina nimosa na mutthu mukina orina owerya wookhala mukhulupale a malaikha. Onnimuhimya Yesu ori ene ‘wiirimu ni malaikha awe oowerya ni malumi a mooro, owunlelaka ikuhu awanani a Muluku’. (2 aTesaloonika 1:7, 8; Matheyo 16:27) Nuumala-vo Yesu “oowela wiirimu, weiwo malaikha, makhulupale ni owerya wotheene animwiiwelela aya”. (1 Pedru 3:21, 22) Vaakhanle wiira Yesu ni Mikhayeli atthu oovirikana khivaarowa oreerela Muluku waahela opuro omosaru wala waavaha okhulupale omosaru ntoko makumandanti a malaikha oororomeleya, aniwana ni Malaikha ootakhala. Ohiya opaka eyo, onnooniherya saana wiira Yesu ni Mikhayeli mutthu mmosaru.

• Mikhayeli “onokhumelela” yaphiya “mahiku a ovelavela wulupale’’. (Daniyeli 12:1) Muliivuruni ya Daniyeli, nuulumo noowi “onokhumelela” ikwaha sinceene ninrumeeliwa ophavelaka ohimmwa mwene ‘onvenya’ wiira opake etthu ehimmakela wiiraneya. (Daniyeli 11:2-4, 21) Nave Yesu Kristu, yoowo-tho onihimmwa okhala “Nuulumo na Muluku”, onoopaka etthu yuulupale okhala wiira oothanliwa wiira okhale “Mwene a mamwene”, onimwaapwetexa awanani ootheene a Muluku ni onimwaakhapelela atthu a Muluku. (Wiisuupulula 19:11-16) Onrowa opaka eyo okathi wa “maxakha maalupale, ahinakhumelele okhuma woopaceryani wa olumwenku mpakha vano”. — Matheyo 24:21, 42.