Owiitho wa Yesu Waari Sai?
Moota Biibiliya onaakhula awe
Khanninsuwela saana maana Biibiliya khonihimya moota waari aya owiitho wa Yesu. Eyo enooniherya wiira osuwela moota yaari aya erutthu awe khahiyo etthu yootepa otthuneya. Hata vari siiso, Biibiliya onoonikhaliherya osuwela vakhaani moota yaari aya erutthu awe.
Mikhalelo sa erutthu awe: Yesu aari muYuda moohaanyiherya aayariwe olantte ene mikhalelo sa atthu a nloko na amamawe. (aHeeberi 7:14) Vannooneya wiira, Yesu khaavirikanne ni atthu akina. Ennikupaliha eyo, mwaha woowi okathi omosa, aahikhuma oGalileya orowaka oYerusalemu ni khaavo aamusuwenle. (Yohani 7:10, 11) Hata okathi aakhala awe ni awiixutti awe, erutthu awe khahiyo yaakhala yootepexa oreera waavikana atthu akina. Ennikupaliha eyo okhala wiira ohiyu Yuda Isikaryoti aarowa awe onvariha, okhala wiira opuro ole yaahikhala atthu akina, Yuda aahaana waathoonyerya anakhotto wiira Yesu tuula, ela enooniherya wiira aamulikana ni atthu akina.— Matheyo 26:47-49.
Ikharari wala maihi awe: Vanikhala wiira ikharari sa Yesu khahiyo saari soorakama, maana Biibiliya onihimya wiira “mulopwana khonittittimiheya akhalana ikharari soorakama”.—1 aKorinto 11:14.
Ereru: Yesu aahikhalana ereru. Yena aatthara nlamulo na ayuda naakhottiherya atthu aalupale ‘omettha ereru’ yotheene. (Onamukuttho 19:27; aGalasia 4:4) Nave, Biibiliya onniromola ereru ya Yesu, okathi onlavula awe eprofesiya enihimya moota Yesu aarowa awe ohaawa.— Yesaya 50:6.
Erutthu awe: Yesu aahikhalana erutthu yoolipa okhala wiira okathi aalaleerya awe aaheetta ikiloomo sinceene mwentto. (Matheyo 9: 35) Ikwaha piili Yesu aahikela mutemplo, onawoomola atthu yaatumiha ni aahipittula meesa aya. Ekwaha emosa, aahipaka murepettho wa mukhoi, ni aahoomola ipwittipwitthi ni inyompe saatumihiwa. (Luka 19:45, 46; Yohani 2: 14, 15) Enciclopedia ya McClintock ni Strong yaatthokihenrye so: “Ivangelyo sootheene sinooniherya wiira Yesu aari muttthu ookhoomala aarina erutthu yoolipa ni ekumi yooloka”. — eVolume 4, epaaxina 884.
Owiitho wawe: Yesu aari oophenta ni aanaathokorerya saana atthu, moohaanyiherya eyo yaanooneya ni moota waakhala aya owiitho wawe. (Matheyo 11:28, 29) Atthu ootheene yaanimurweela wiira aakhaliherye. (Luka 5:12, 13; 7:37, 38) Nave hata anamwane vaanaasivela omwaattamela. — Matheyo 19:13-15; Marko 9:35-37.
Itthu soowoothiwa voohimya sa owiitho wa Yesu
Itthu soowoothiwa: Atthu akina anikupali wiira erutthu ya Yesu yaamulikana ni moota anikhala aya atthu a wÁfrica okhala wiira eliivuru ya Wiisuupulula ennilikanyiha ikharari sawe ni mapururu a epwittipwitthi, nave inawu sawe enlikanyiha ni “ekoopiri enitotoxiwa”.— Wiisuupulula 1:14, 15, Biblya Exirima.
Ekeekhai: Eliivuru ya Wiisuupulula ennirumeela moolumo a “nthonyeryo”. (Wiisuupulula 1:1) Okathi entthokiherya aya maihi ni metto sa Yesu, khahiyo enilavula moota yaari aya erutthu awe okathi aari awe elapo ya vathi. Masi enihimya mikhalelo sikina aarowa awe okhalana nuumala ohihimuxiwa. Wiisuupulula 1:14 onihimya wiira “ikharari sa mmuruni mwawe, saari sootteela vanceene, ni otteela waya waari ntoko eneevi”. Vanooneya wiira ekoore ya ikharari sawe tenlikanyihiwa ohiya moota saari aya wala etiipu aya. (Wiisuupulula 3:14) Eveersu ela enttittimiherya wiira Yesu aari mutthu aankhili wala oosuwela itthu sinceene sintoko mutthu orina ipwi.
Inawu sa Yesu sinlikana ni “ekoopiri enitotoxiwa vaikho”. (Wiisuupulula 1:15) Nave owiitho wawe onnilavuliwa waaryaka ntoko ‘nsuwa nnaarya vanceene’. (Wiisuupulula 1:16) Olelo-va moolumwenkuni khanikhanle nloko wala nihimo na atthu arina erutthu siisa. Ela enooniherya wiira otthokiheriwa nno paahi ti wa nthoonyeryo. Nuumala Yesu ohihimuxiwa aahirowa okhalaka “mapuro oovuwa atthu ahiniwerya aya waattamela”, ela enooniherya wiira, apinaatamu khanwerya onweha.— 1 Timootheyo 6:16.
Itthu soowoothiwa: Yesu aari mutthu oolosowa.
Ekeekhai: Moovirikana ni moonelo ola, Yesu aari mutthu ookhomaala ni oolipa murima. Mwa ntakiheryo, okathi anakhotto yaaronwe aya onvara, aahimmye so: Mutthu munimphavela anyu “ti yoomi”. (Yohani 18:4-8) Nave Yesu aahaana okhala mutthu oowiilipiha okhala wiira aari kalapinteero.—Marko 6:3.
Nto xeeni Yesu aatthuneya awe okhaliheriwa oteexa mwiri wa nihaaxeryo? Nave xeeni aapacenrye awe okhwa ehinatthi okhwa alopwana akina aakhomelaniwe awe? (Luka 23:26; Yohani 19:31-33) Ohalaka vakhaani wiiviwa, Yesu aahikhulumuwa vanceene. Mwaha wa itthu saarowa omukhumelela, aahiviriha ohiyu wootheene ohirumpe. (Luka 22:42-44) Ohiyu wootheene aahihaaxiwa, ni ayuda, nave mmeeloni mwaya voosiisu aahihaaxiwa ni aroma. (Matheyo 26:67, 68; Yohani 19:1-3) Itthu iye sootheene saahiiriha wiira Yesu okhwe moowaakuveya.
Itthu soowoothiwa: Yesu aari Mutthu ahaatheya ni ooriipiwa murima.
Ekeekhai: Yesu aanooniherya moomalela mikhalelo sa Tiithi awe, Yehova yoowo Biibiliya ommuhimya awe okhala “Muluku oohakalala”. (1 Timootheyo 1:11; Yohani 14:9) Veekeekhai Yesu aahiwiixuttiha atthu moota woophwanya ohakalala. (Matheyo 5:3-9; Luka 11:28) Itthu iya sinooniherya wiira Yesu aari mutthu oohakalala, eyo yaanooneya ni owiitho wawe.