Mwaha 21
Yosefe Onninyokhiwa Ni Annawe
NKANWEHEENI moota oriipinwa awe murima ni ovololiheya mmiravo owo. Ola ti Yosefe. Annawe amutuminhe niinano wa alopwana ala yaawo anrowa wEjiitu. Iwee Yosefe onrowa opakiwa okhala epottha. Nthowa xeeni annawe apanka aya etthu ela yootakhala? Nthowa noowi awo animukhalela nrima Yosefe.
Yakobe tiithi ayasa aanimphenta vanceenexa Yosefe. Owo aahimooniherya ophenta orumihaka opakiwa nlaya noorakama nooreera. Vaavo axuulupalya awe 10 yoonalya aya moota Yakobe amphenta awe Yosefe, awo yaahipacerya omukhalela nrima ni omunyokha Yosefe. Masi naahikhala-tho nthowa nikina niirinhe wira amunyokheke.
Yosefe aahiloha ikwaha piili. Ikwaha soopiili iyo Yosefe oniloha annawe amuuramelaka vathii. Vaavo Yosefe aaleelalya awe annawe oloha nno, omunyokha waya waahincerereya vanceenexa.
Vano nihiku nimosaa vaavo axuulupalya awe Yosefe yaakhapelela aya ipwittipwitthi sa atithi aya, Yakobe aahimuruma Yosefe orowa ni owoona moota saarya aya annawe. Vaavo annawe Yosefe vanimoona aya orwaaka, akina a yaawo anihimya wira: ‘Nrowee nimwiive!’ Masi Rubeni, muulupalyayasa, onihimya wira: ‘Nnaari, muhiire siiso!’ Mmapuroni mwaya annivara Yosefe ni annimurihela mweehimeni moohikhala maasi. Nuumala vo awo annikilaathi anuupuwelasa yoomwiiriha.
Mwa okathi ene yoola annoorwa alopwana akina aIximayeli. Yuda onaahimeerya annawe wira: ‘Nrowee naatumiherye aIximayeli.’ Nto ela ti etthu eniiraya. Awo annimutumiha Yosefe ni musurukhu a eparatha 20. Otakhala ni ohimoriwa ikharari wowiira sai waarina aya!
Exeeni annawe enrowa aya omuhimeerya tiithi aya? Awo yaahiiva epuri ni khusamiha imaara sinceene mphomeni mwa puri nlaya nooreera na Yosefe. Nuumala vo awo annikuxa nlaya arowanaka owaani wa Yakobe tiithi aya ni khuhimya wira: ‘Noophwanya nna. Nkawehani, ni moone akhala wira khahiyo nlaya na Yosefe.’
Yakobe onnoona wi ti nenno. ‘Enamaa yootakhala ya mutakhwani khino temwiivale Yosefe,’ owo onninla. Nto ela etthu tthiri yaaphavela aya annawe Yosefe wira tiithi ayasa uupuweleke. Yakobe ooriipiwa murima vanceenexa. Owo onninla mahiku manceene. Masi Yosefe kokhwiiye. Nrowee noone yeele enimwiiraneela weiwo oniroohiwa awe.