MUTAKIHEKE WAAMINI WAYA | YOSEFE

“Miyo Nkihiyó Muluku”

MAKAARIPI, Yosefe aaheemela ojardim wa enupa awe. Waaniheryasa, aahirukureriwa ni miri sa korooro ni miri sikina saima mihokorokho, ni matthiya yaarina miri sa mmuro. Ottuli wa enupa awe, yaahikhala epalaasio ya Farawo. Owannyawe Yosefe waaniiweya nsu na Manasé vaavo aamutheya awe muhima awe, Efrayimi, vaavo yaathweelasa aya. Yosefe aaniwuupuwelela amwaarawe atheyaka ni anamwane awo anli. Owo aahihakalala maana aanisuwela wira aanireelihiwa ni Muluku.

Yosefe aahinvaha mwanawe oopacerya nsina na Manasé, nenlo nintaphulela oliyaliwa. (Maphattuwelo 41:51) Moota Muluku aamureelinhe awe Yosefe, waahimukhaliherya oliyala maxakha yaamukhumelenle vamosa ni mixankiho saakhumelenle vatthokoni va anamuyari awe. Onyokhiwa ni axuulupale awe waahirukunuxa okumi awe. Awo yaahimutuphela, yaaniphavela omwiiva, ni yahaatumiherya anamarotta ntoko epottha. Okhuma okathi yoole aatumihiwe awe, okumi awe waanikhala wooxankiheya. Mwa iyaakha soowiiraka 12, aahivilela opakiwa epottha vamosa ni otthukiwa ni eyuuma. Masi vano, owo aari namalamulela a nenli oowerya wEjiitu!a

Mwa iyaakha sinci, Yosefe aahoona wiiraneya wa itthu seiye Yehova aaleihenrye awe. Iyaakha 7 sa yoolya yinci wEjiitu saahivira, nave Yosefe aanaaweherya alumasiya yaarina yoolya. Owo aahimuthela muthiyana Asenathi, ni aahaayara anamwane anli axilopwana. Masi nlelo, aanuupuwela emusi awe yaari ottaiwene, vanceenexa muhima awe, ni paapa awe. Waaniheryasa, Yosefe aaniikoha akhala wira awosa yaari akumi, ni akhala wira axuulupale awe yaahirukunuxa mweettelo aya wootakhala; wala akhala wira anwerya opaka etthu yaarowa wiiriha emusi yotheene okhala yowuuraana.

Niireke emusi anyu yootoko okumana muxankiho wa ohiiwanana, nrima, wala onyokhana? Akhala wira ti siiso, mukhalelo anyu onlikana ni wa Yosefe. Nto nniixutta exeeni sa waamini wa Yosefe vaavo aakhapelela awe emusi awe?

“MUROWEKE WA YOSEFE”

Yosefe ahaatteliwa muteko, nto iyaakha iye 7 saavinre mowaakuveya. Ntoko Yehova saahimyale awe mwa oloha wa Farawo, nuuvira iyaakha 7 sa yoolya yinceene, yaahikhumela etala. Voohipisa, etala yaahivola ilapo sotheene. Masi, “mulaponi mothene mwa wEjitu yahikhala yolya”. (Maphattuwelo 41:54) Moohaaniherya, otaphulela wekeekhai wa Yosefe ni ntakiheryo nawe na otthokiha saana itthu, wahaakhaliherya atthu a wEjiitu.

Tthiri atthu a wEjiitu yaanoona wira Yosefe aari mutthu ootthuneya, ni yaaninvuwiha mwaha wa osuwela otthokiha itthu. Masi, Yosefe aaphavela wira ovuwa wotheene ovahiweke Muluku awe, Yehova. Akhala wira nnoorumeela owerya orina ahu wira nimurumeele Muluku mowiiyeviha, owo pooti orumeela owerya iwo wira opake itthu nahuupuwela ahu.

Nuuvira okathi, atthu a wEjiitu nave yaahaaphwanya etala. Nto vaavo yanvekela aya yoolya Farawo, owo aaleela so: “Muroweke wa Yosefe, mmwìweleleke sothene sinrowawe wohimeryani”. Vano, Yosefe aahitthukula ipa saasukiwa soolya, nto atthu yaanithuma ele yaathowa.​—Maphattuwelo 41:55, 56.

Masi, ilapo sowaattamela atthu yaanivoliwa etala vanci, ntoko oKanani, weiwo yaakhala aya amusi a Yosefe. Yakobe aahiiwa wira wEjiitu yaahikhala yoolya, nto aahaahimeerya anaawe wira akhuruwele wEjiitu yathume yoolya eyo.​—Maphattuwelo 42:1, 2.

Yakobe aahaaruma anaawe 10, masi khumuhiya Beniyamini. Nlelo Yakobe aanuupuwela okathi yoole aamurumme awe Yosefe waaxukurya axuulupale awe, masi kuhitthika-tho. Axuulupale awe Yosefe yaahimuruuhela tiithi aya nlaya na Yosefe noosareya ephome. (Nlaya nno nooniherya wira Yakobe aanimphenta vanceene Yosefe). Awo yaaphavela omwiiriha tiithi aya okupali wira Yosefe aahikhuuriwa ni enama yowoopiha.​—Maphattuwelo 37:31-35.

YOSEFE “AHUPUWELA OLOHA WARINAWE”

Nuumala weetta vanceene, anaawe Yakobe yaahiphiya wEjiitu. Okathi yaakonhe aya opuro woothuma yoolya, yaahileeliwa wira yaahaana olavula ni mukhulupale aitthaniwa Safenathi-Paneyahi. (Maphattuwelo 41:45) Masi awo khiyaasuwela wira mukhulupale owo aari Yosefe! Awo yaamoona paahi mukhulupale oowerya a wEjiitu yoowo aakhaliherya. Aphavelaka wooniherya nttittimiho, yaahipaka ele yaari yoolimaleleya: “Yahùramasa oholo wawe mpakha vathí”.​—Maphattuwelo 42:5, 6.

Masi Yosefe aahaasuwela axuulupale awe okathi ene yoowo! Nto okathi yuuramme aya ohoolo wawe, owo aahuupuwela ele yaalonhe awe ori ene mmiravo. Biibiliya onihimya wira Yosefe “ahupuwela oloha warinawe”. Oloha iwo wooniherya wira wamphiya okathi axuulupale awe yaarowa aya wuurama ohoolo wawe. Vano ti yeeyo yiiraneya! (Maphattuwelo 37:2, 5-9; 42:7, 9) Nto Yosefe aarowa opakani? Niireke aamwaakupaarela wala owunlela ikuhu?

Yosefe aanisuwela wira aahaana osyaka opaka ele murima awe yaaphavela aya. Yehova aaneettiherya myaha iyo, maana saanihela muhina yoolakela Awe. Owo aahimulaiherya Yakobe wira nloko nawe naamukhala nloko nuulupale. (Maphattuwelo 35:11, 12) Akhala wira axuulupale awe nlelo yaari atthu ootakhala, ni a nrima, nto yaarowa wiiraneya sai yoolakela ya Muluku? Ohiya-vo, akhala wira Yosefe aamunla ikuhu, aamwaakumiherya maxakha atithi awe vamosa ni Beniyamini, yaawo yaahanle owaani evoliwaka etala. Niireke awo nlelo yaari akumi? Yosefe aahithanla ohiisuwanyeiha wa axuulupale awe, wira owehe akhala wira nlelo yaari ootakhala. Nuumala-vo, aamusuwela ele Yehova aaphavela awe.

Waaniheryasa, nyuwo khamunrowa okumana ni muxankiho ntoko owo. Masi, olelo, imusi sinceene sinninyakulihana wala ovalaana. Okathi owo, hiyo pooti okuxeya ni murima ahu nto khiyapaka itthu nittharaka ohimalela wahu. Nto ti va miruku omutakiha Yosefe ni omananiha wiiwexexa ele Muluku oniphavela awe wira nipake. (Miruku 14:12) Ekeekhai wira wataana ni amusi etthu yootthuneya; masi wataana ni Yehova vamosa ni Mwanawe tekhanle etthu yootepa otthuneya.​—Mattheyo 10:37.

“KINROWA WOTTEHATTEHANI”

Yosefe aahattehatteha axinnawe mwa inamuna soovirikana wira awehe murima aya. Wanipacerya aahiwootherya okhala anamahottela, nave omurumeelaka namataphulela aahaalavuliha moowali. Aphavelaka wiisaakiha, axinnawe yaahilavula sa emusi aya ni yaahihimya wira yaahimuhiya owaani munnaya mwaamukhaani. Yosefe khoonihenrye ohakalala wawe mwaha woosuwela wira munnawe mwaamukhaani nlelo aari mukumi. Vano Yosefe aahisuwela etthu yoopaka. Owo aahimmye so: “Kinrowa wottehattehani”. Nto aahaahimeerya wira aaphavela onweha munnaya owo. Nuumala-vo, aahiweemererya otthikela owannyeya wira yamuruuhe; masi aahaana ohala mutthu mmosa ntoko namutthukiwa.​—Maphattuwelo 42:9-20.

Ahisuwelaka wira Yosefe aaniiwa ele yaahimya aya, axuulupale awe yaahipacerya wiikhupanyerya mwaha wa ele yaamwiirinhe aya Yosefe iyaakha 20 ottuli, ariki: “Vekekhai nitthukeliwé mwaha wa muhim’ahu. Hiyo nahona oxanka wawe okathi wanivarelawe metto, nto hiyo khuhitthuna. Tivó niphwannyahu otakhaliwa nno”. Yosefe aaniiwa ele yaahimya aya, nto khukhuma ohoolo waya wira ahimoone wira aamunla. (Maphattuwelo 42:21-24) Masi owo aanisuwela wira ottharuwa wekeekhai onihela muhina etthu ekina ohiya paahi wiikhupanyerya mwaha wa sookhumela sa mweettelo wootakhala. Nto Yosefe aahivikaniha waattehatteha.

Nto aahimutthukwela Simeyoni, masi khwaaleela akina wira aroweke. Nave, aahivitha musurukhu mmurupani mwaahenle aya yoolya. Axuulupale awe yaahitthikela owaani ni yaahimuleela Yakobe itthu sotheene. Muhoolo mwaya, yaahimuthipelela tiithi aya wira amuhiye Beniyamini orowa wEjiitu. Okathi yaaphiyale aya, yaahimuleela murumeyi a Yosefe wira yaahiphwanya musurukhu mmurupani mwaya, ni yaahimuleela wira yaaphavela ottikiha. Yoovaha eyo yaari etthu yuulupale, masi Yosefe aaphavela osuwela murima aya. Ohakalalaka mwaha wa onweha Beniyamini, Yosefe aahipaka efesta khulya hoothe ni axinnawe. Moottharelana, aahaaruma orowa owaani, aahaavaha yoolya, masi ekwaha ela aahivitha ekoopho awe ya eparatha mmurupani mwa Beniyamini.​—Maphattuwelo 42:26–44:2.

Voohipisa, Yosefe aahiruma otthimakeliwa axinnawe. Okathi yaaphwanyiwe aya ekoopho awe mmurupani mwa Beniyamini, aahiwootherya wira yaahiiya ekoopho eyo, nto otheene aya yaahitthikela wa Yosefe. Vano Yosefe anwerya osuwela murima wa axinnawe. Yuda aanilavula mwa nsina na axinnawe, aahivekela omoreliwa ikharari, ni aahiivahererya hoothe ni axinnawe ale 11 okhala epottha. Masi Yosefe aahimyale wira Beniyamini paahi taarowa ohala wEjiitu ntoko epottha, masi akina yaahaana ohokolowela owaani.​—Maphattuwelo 44:2-17.

Yuda aakhunle so: ‘Ohanle yowo paahi: amam’awe kharina-tho mukina’. Vano atithi annimphenta vanjene’. Waakhula wa Yuda waahivara murima wa Yosefe. Beniyamini aari mwaana muulupale yoowo aayariwe ni Rakheli, muthiyana oophentexiwa ni Yakobe. Rakheli aahikhwa okathi aamuyara awe Beniyamini. Ntoko tiithi awe, Yosefe aanimuupuwelela Rakheli vanci. Waaniheryasa, ti yeeyo yaamwiiriha Yosefe omphentexa Beniyamini.​—Maphattuwelo 35:18-20; 44:20.

Yuda aahimuxonttela Yosefe wira ohimpake epottha Beniyamini. Nto aahivahererya okhala yena mmapuroni mwawe. Wanikisa waya, aahimuxonttela oriki: “Kinwerya sai ohokolowela oholo w’atithi, kihimukunxe mwan’ay’ola? Kihòne ohawa onarwela atithi aka”. (Maphattuwelo 44:18-34) Tthiri Yuda aahirukunuxa murima awe. Owo khahiyo oonihenrye ottharuwa paahi, masi-tho aahooniherya othunku, wiileva ni omoriwa ikharari.

Yosefe khaawerya-tho wiilipiha. Nto aahaavekela arumeyi awe otheene wira akhume. Nuumala-vo, aahinla moorunya, nto wunla iwo waaniweya mpakha mpaani mwa Farawo. Wanikisa waya, aahiisuwanyeiha oriki: “Miyo ki Yosefe!” Nto aahaakupaarela axuulupale awe yaawo yaari oowoova ene ni khwaalevelela sotheene saamwiirinhe aya. (Maphattuwelo 45:1-15) Owo aahimutakiha Yehova yoowo onilevelela moomalela. (Esalimo 86:5) Niireke hiyo ninnimutakiha Yosefe?

“NLELO MWÀ MUKUMI!”

Okathi Farawo aiwale awe ehaali ele, aahimuleela Yosefe wira owiitthane atithi awe oowuuluvala orwa wEjiitu hoothe ni emusi aya yotheene. Voohipisa, Yosefe aahikumana ni tiithi awe! Nto Yakobe aahinla ni khuhimya so: “Vano kolikanela okhwa, mana kihòna ekhove anyu ni nlelo mwà mukumi!”​—Maphattuwelo 45:16-28; 46:29, 30.

Yakobe aahikhala-tho iyaakha 17 wEjiitu. Ohinatthi okhwa, aahaareeliha anaawe 12 ni ohimya ele yaarowa waakhumelela. Yosefe, yoowo aari mwaana a namuloko ni mmosa, aahimureeliha ikwaha piili; masi khalai mwaana oopaceriwa taareelihiwa mwa enamuna eyo. Nto mahimo manli a Isarayeli yaarowa okhuma mwa etthoko ya Yosefe. Ankhi Yuda, mwaana a neexexe, yoowo aavikanne axuulupale awe voohimya sa wooniherya ottharuwa? Owo aahaakhela mareeliho maalupale: Mesiya aarowa okhumela mwa emusi awe!​—Maphattuwelo 48, 49.

Okathi Yakobe aakhwiiye awe orina ene iyaakha 147, axuulupale awe Yosefe yaanoova wira owo aarowa waattikiherya yoonanara. Masi Yosefe aahaalipiherya niphento nawe. Aahoona moota Yehova aakhalihenrye awe emusi awe voohimya sa othaamela wEjiitu. Tivonto axuulupale awe khiyaatthuneya woova. Yosefe aalavunle so: “Miyo nkihiyó Muluku”. (Maphattuwelo 15:13; 45:7, 8; 50:15-21) Yosefe aanikupali wira Yehova taari namaphuka a xariya. Niireke aahaana waahukhumu yaale Yehova aalevelenle awe?​—aHeberi 10:30.

Niireke vannooxankihani waalevelela akina? Pooti okhala voovila akhala wira mutthu owo oroonitthekela moolakela. Masi akhala wira nnimwaalevelela ale attharunwe mwekeekhai, nnoovoliha makhwatta manceene ohela muhina awihu. Niira siiso, nnootakiha waamini wa Yosefe ni omoriwa ikharari wa Tiithi ahu, Yehova.

[Enoota]