Yoosoma 1

Moota Munrow’anyu Osuwela Ele Muluku Emphavel’awe

Itthu xeeni sootthuneya siri mBiibiliyani? (1)

Ti pani okhanle mwaneene Biibiliya? (2)

Nthowa xeeni vanitthuney’anyu omusomaka Biibiliya? (3)

1. Biibiliya ori yoovaha yootepa otthuneya enikhuma wa Muluku. Ori ntoko ewarakha yeeyo tiithi oophenta aalepenle awe anaawe. Biibiliya onninleela ekeekhai voohimya sa Muluku, eyo piiyo, makhalelo awe ni ele eniphavela awe. Onnitthokiherya moota woweettiherya mixankiho ni moota woophwanya ohakalala wekeekhai. Biibiliya paahi tonihimya ele enitthuneya ahu opaka wira nimusivelihe Muluku.​—Esalimo 1:1-3; Yesaya 48:17, 18.

2. Biibiliya olempwale ni alopwana oophiyeryaka 40, iyaakha sowiiraka 1.600, okhuma eyaakha ya 1513 Ahinatthi Kristu Orwa. Orina Iliivuru saamukhaani 66. Ale amulempe Biibiliya yuupuxeriwe ni Muluku. Awo alempe muupuwelelo wa Muluku, ohiya muupuwelelo aya. Tivonto, Muluku a wiirimu tokhanle Mwaneene Biibiliya, ohiya pinaatamu.​—2 Timótheyo 3:16, 17; 2 Pedru 1:20, 21.

3. Muluku aahivaha ephoole yuulupale wira Biibiliya olempwe ni okhapeleliwe saana. Aalempwa aBiibiliya anceene ovikana eliivuru ekina. Khahiyo wira atthu otheene anrowa osiveliwa woowehani mmusomaka Biibiliya, masi eyo ehookhottiheryeni omusoma Biibiliya. Okumi anyu woohimala wa muhoolo onlipa ni omusuwela wanyu Muluku ni opaka ele enivekel’awe, hata vakhalaka ovaanyihiwa wa khula muthinto.​—Matheyo 5:10-12; Yohani 17:3.