Yoosoma 2

Muluku Mpatthani Ooloka Aareerela Okhalana

Okhala mpatthani a Muluku etthu yooloka yaakela owiiraneelani. Muluku onowixuttihani okhala oohakalala ni oovareleleya, ootaphulakani mwa sookupali sinceene soovonyeya ni soowiira sinikela woohooxani. Owo onowiriyana mavekelo anyu ni onimookhaliheryani ophwanya murettele ni ororomela wa murima anyu. (Esalimo 71:5; 73:28) Muluku onimookhaliheryani okathi wa mixankiho. (Esalimo 18:18) N’uwo onimovahani yamahala ya okumi woohimala.—aRoma 6:23.

Mwamwaattamela Muluku, nyuwo munoowaattamela apatthani a Muluku. Ala anokhala-tho apatthani anyu. Mwekeekhai, anokhala ntoko axinninyu ni axirokorinyu. Anotteeliwa murima owixuttihani sikina sa Muluku, ni awo animookhaliheryani ni wohakalalihani.

Hiyo khininlikana ni Muluku. Vaavo vamphavelanyu opatthana ni Muluku, vantthuneya osuwelexa ekeekhai emosa yulupale: ompatthani ni Muluku kahiyo ompatthani wa atthu oolikanasa. Owo takhalai ni musuweli ni oowerexa onivikana hiyo. Owo orii Namalamulel’ahu eephattu. Vanonto, naaphavelaka okhala apatthani awe, nihaana onwiriyana ni wiira yeeyo owo onnirum’awe. Eyo enokhala yooloka wa hiyo.—Yesaya 48:18.