Yoosoma 3

Ti Vootthuneya Wiixutta Sikina Sa Muluku

Wi mukhale mpatthani a Muluku, nyuwo muhaana wiixutta sa owo. Nireke wira apatthani anyu aasuwela nsina nanyu ni anniromola? Aayo. Muluku omphavela wira musuwele ni muromoleke nsina nawe. Nsina na Muluku ti Yehova. (Esalimo 83:18, Tradução do Novo Mundo, NM; Matheyo 6:9) Nyuwo muhaana osuwela enimusivela owo ni ehinimusivela. Muhaana wasuwela apatthani awe ni anyokhani awe. Onnivira okathi munceene wira mmusuwele mutthu. Biibiliya onihimya wira ti vamiruku wiihiyerya okathi wi mwiixutte sa Yehova.—aÉfeso 5:15, 16.

Apatthani a Muluku aniira yeele enimusivela. Nwuupuwelele apatthananyuxa. Mwahaathokoreryeke ni mwiiraka itthu sinnyokh’aya, ompatthani onoorowa vahoolo? Nnaari! Siso-tho, mwaphavela wira Muluku okhale mpatthani anyu, mwiireke enimusivela.—Yohani 4:24.

Kahiyano wira itiini sotheene sin’hula ephiro eniphwanyiha ompatthani ni Muluku. Yesu, ori mpatthanixa a Muluku, aalavunle sa iphiro piili. Emosa wa seiyo ti yulupale ni ti yosareya atthu. Ela eniroiha worimeelani. Ephiro ekina ti yoophunyeya ni anivira arii vakhaani. Ephiro ela eniroiha w’okumini yoohimala. Ela entaphulela wira, naphavela okhalana opatthani wa Muluku, nihaana wiixutta moota wooloka w’omukokhorela owo.—Matheyo 7:13, 14.