MURUU WA NAMULOKO NEETHANU NENLI

Mmwiiweleleke Muluku Vatthokoni Vanyu

1. Ovarihela muteko malakiheryo a Nuulumo na Muluku waakhalihenrye sai anamathelana?

YEHOVA Tokumihenrye othelana, tivonto Nuulumo nawe nookhalana malakiheryo oolokexa wa itthoko. Ntoko yookhumelela ya ovarihela muteko malakiheryo awo, atthu anceene ahiiriha othelana waya okhumela saana. Moottottopeleya, akina yaakhala hoothe ahilepinhe othelana waya aakuxeya murima mpakha olepiha. Akina aahiya oraruwa. Alopwana oowali yaawo yaahaaxa axaaraya ni anaaya ahiixutta wooniherya oreera murima ni ophenta.

2. Exeeni eniheliwa muhina mu okumi wa etthoko ya eKristau?

² Okumi wa etthoko ya eKristau onnihela muhina itthu sinceene, ntoko moota onoonela ahu mwaha wa othelana moohilipelela omwalana, ele enipaka ahu wira naakhwaniherye miritti sahu vatthokoni, ni moota sinaathokorerya ahu atthu a vatthokoni vahu. (aÉfeso 5:33–6:4) Osuwela paahi ele Biibiliya enihimya awe sa okumi wa vatthokoni, ti woovirikana saana ni osuwela ovarihela muteko miruku iyo sa Biibiliya. Khuuvo mmosaa a hiyo oniphavela okhala ntoko ale Yesu aapwapwenle awe mwaha wa ohithokorerya sooruma sa Muluku. Moohikhalela, awo yuupuwela wira etthu yootthuneya yaari okhalana muupuwelo wa omukokhorela Muluku paahi. (Matheyo 15:4-9) Nihikhalane mooneelo oowi ninnimuttittimiha Muluku paahi, masi khihiyamwiiwelela vatthokoni vahu. Moovirikana ni vo, hiyo nimphavela wooniherya omwiiwelela Muluku mwekeekhai, etthu yeeyo ‘eniphwanyiha muhakhu mulupale’.​—1 Timótheyo 5:4; 6:6; 2 Timótheyo 3:5.

Othelana Olokeleke Mpakha Silini?

3. (a) Exeeni eniiraneya ni anamathelana anceene, masi tiivi yaatthuneya okhala yoolakela ahu? (b) Mmurumeelaka Biibiliya anyu, mwaakhule makoho ari vathii va ettima ela.

³ Ohilipa wa itthoko onnincerereya. Atthu akina yaawo avirinhe iyaakha sinceene athelanne ene, annilakela omwalana wira athelane ni mutthu mukina. Nave-tho khahiyo vooxankiha wiiwa wira anamathelana yaawo ari amiravo aavalaana vahivinre okathi munceene nuumala othelana. Moohicala ele atthu akina enipaka aya, hiyo nohaana ophavela omusiveliha Yehova. Siiso nrowe nthokorerye makoho awo ni soolepa sinttharelana wira noone ele Nuulumo na Muluku nnihimya aya sa ipiseryo sa othelana.

Vaavo mulopwana ni muthiyana vanithelan’aya, yaatthuneya okhalaka vamosaa mpakha silini? (Marko 10:6-9; aRoma 7:2, 3)

Mathipelo xeeni a omwalana aneemererya Muluku, yaawo aneemererya othelana-tho ni mukina? (Matheyo 5:31, 32; 19:3-9)

Yehova onoonela sai omwalana weiwo ohineemereriwa ni Nuulumo nawe? (Malakhiya 2:13-16)

Niireke wira Biibiliya onneemererya ovalaana ntoko moota woomaliha mixankiho sa vatthokoni? (1 aKorinto 7:10-13)

Itthu xeeni siniweemererya ovalaana ale athelanne? (Esalimo 11:5; Luka 4:8; 1 Timótheyo 5:8)

4. Nthowa xeeni anamathelana akina anikhumela aya saana mu okathi munceene?

⁴ Anamathelana akina annikhumela saana mu okathi munceene. Nthowa xeeni? Olipelela mpakha wunnuwa etthu yootthuneya wa mulopwana ni muthiyana. Masi omphwanya oothelana orina yoophavela emosaru ni oniwerya olavula miyaha mootaphuwa ti vootthuneyexa-tho. Nto, yootepexa otthuneya ori omphwanya oothelana onimphenta Yehova ni onttittimiha Nuulumo nawe ntoko mathipelo a omaliha mixankiho. (Esalimo 119:97, 104; 2 Timótheyo 3:16, 17) Mutthu a mukhalelo owo khonrowa wuupuwelaka wira itthu saahimweetteleke saana, owo pooti ovalaana aahiiso omwalana. Owo khonrowa orumeela soovonya sa ole othelanne awe wira ophwanye ephiro ya ohaakhwaniherya miritti sawe. Masi, owo onrowa othokorerya mwaha owo ni ophavela omala-maliha mookhalela.

5. (a) Okhala oororomeleya wa Yehova onihapuwela sai mmarehereryo a othelana? (b) Nnaamwi okhumelelaka ovaanyihiwa, mireerelo xeeni sinikhumelela mwaha wa ovarexexa malamulo a Yehova?

⁵ Satana onihimya wira vaavo vanihaawa ahu, hiyo ninrowa ohiya otthara iphiro sa Yehova. (Yobi 2:4, 5; Miruku 27:11) Masi Anamoona a Yehova anceene yaawo ahaawale mwaha wa ovaanyihiwa ni ole othelanne aya khahiiye omwaakhwaniherya natiri a othelana waya. Awo annivikaniha okhala oororomeleya wa Yehova ni wa sooruma sawe. (Matheyo 5:37) Akina yaavilenle yaahiphwanya ohakalala mwaha woowi oothelana aya aahipacerya omurumeela Yehova vamosaa n’awo, nnaamwi saavinre iyaakha sinceene sa ovaanyihiwa! (1 Pedru 3:1, 2) Wa maKristau yaawo ole othelanne aya ohinooniherya ethoonyeryo ya orukunuxa murima aahiiso yaawo oothelana aya aahin’ye mwaha wa omurumeela waya Yehova, nave-tho awo annisuwela wira anrowa oreelihiwa mwaha wa wooniherya waya omwiiwelela Muluku vatthokoni.​—Esalimo 55:23; 145:16.

Khula Mutthu Aakhwaniheryeke Muritti Awe

6. Wira othelana okhumeleke saana, marehereryo xeeni anitthuneya ottittimihiwa?

⁶ Tthiri, okhumela saana moothelani onnivekela itthu sikina ohiya okhalaka vamosaa paahi. Yoovekela yootthuneya wa khuta mmosaa wa ale athelanne orii ottittimiha marehereryo a Yehova voohimya sa ohoolela vatthokoni. Ela ennikumiherya wiiwanana ni ovareleleya vatthokoni. Mu 1 aKorinto 11:3, ninsoma so: “Kristu ti murú w’atthu othene, mulopwana ti murú wa mwar’awe, vano Muluku ti murú wa Kristu”.

7. Mulopwana ohooleleke sai etthoko awe?

⁷ Muhoona ele wanipacerya enihimya aya eversiikulu ele? Aayo, khuta mulopwana ookhalana Muruu, okhanle Kristu, yoowo onitthuneya awe omwiiwelelaka. Ela entaphulela wira mulopwana oothela ohaana ohoolelaka mu enamuna enooniherya mikhalelo sa Yesu. Kristu onnimwiiwelela Yehova, onniphenta muloko vanceene, ni onnithokorerya. (1 Timótheyo 3:15) Owo ‘oleva ekumi awe mwaha w’Ekerej’eyo [muloko]’. Yesu khahiyo oowiixinnuuha aahiiso ohimmuthokorerya mutthu, masi owo “mutthu òmàla ni òwiyeviha”. Otheene yaale onaahoolela awe ‘anniphwanya murettele murohoni mwaya’. Vaavo mulopwana oothela vanihoolela awe etthoko awe moota ola, owo onooniherya wira onnimwiiwelela Kristu. Nto, muthiyana ootheliwa yoowo ori muKristau ohaana woona okhala voottotteleya mureerelo ni woohakalaliha murima omukhaliherya iyawe ni wiiwelela ohoolela wawe.​—aÉfeso 5:25-33; Matheyo 11:28, 29; Miruku 31:10, 28.

8. (a) Nthowa xeeni vanooneya aya ntoko wira mweettelo wa eKristau khonikumiherya mireerelo soophaveleya mu itthoko sikina? (b) Nintthuneya opaka exeeni akhala wira eyo eniiraneya vatthokoni vahu?

⁸ Masi hataa vari siiso, mixankiho sinoowerya okhumelela. Pooti wira mmosaa a vatthokoni-vo ohinatthi opacerya wiixutta ovarihela muteko miruku sa Biibiliya, vaanimunyoonya otthara miruku sa mutthu mukina. Aahiiso, pooti wira oveka etthu mwa nttittimiho ni wooniherya ophenta moophwanelela khonikumiherya etthu yooloka vatthokoni-vo. Hiyo ninnisuwela ele Biibiliya enihimya awe wira murihele ottaiwene makhalelo otheene “òwawa, ònanariwa, òwali, òviruwa ni òruwana”. (aÉfeso 4:31) Masi akhala wira atthu akina a vatthokoni-vo khantthuna owiriyana etthu, exeeni enitthuneya opakiwa? Aayo, Yesu khaatakinhe ale yamoopopiha ni omuruwana, masi owo aamulipana Tiithi awe. (1 Pedru 2:22, 23) Tivonto, vaavo mixankiho vanikhumelela aya vatthokoni, mooniherye wira munnimwiiwelela Muluku munvekelaka Yehova wira ookhaliheryeni mmapuro mwa otthara mweettelo wa elapo.​—Miruku 3:5-7.

9. Mmapuro mwa woonaka sootteettheya-ru paahi, etthu xeeni maKristau manceene oothela yiixuntte aya opaka?

⁹ Khahiyo wira ikwaha sotheene mirukunuxo sinrwa mowaakuveya, tthiri vaavo vanirumeeliwa aya miruku sa Biibiliya moopixa murima ni mwa miruku, iyo sinnivareleya muteko. Alopwana anceene oothela ahoona wira othela waya waahipacerya okhumela saana okathi yoowo yaiwexenxe aya moota Kristu onithokorerya awe muloko. Masi ale aniirela mpantta muloko owo atthu oottheka. Hataa vari siiso, Yesu onniphenta muloko owo, onnivaha ntakiheryo nooloka, ni onnirumeela Soolepa wira olokiherye. Owo oovaha okumi awe mwaha wa muloko. (1 Pedru 2:21) Ntakiheryo nawe ninnaalipiha maKristau manceene oothela wira ahooleleke saana ni olokiherya itthoko saya moophenta. Ti vooloka opaka eyo mmapuro mwa ohilavulana aahiiso woonaka sootteettheya-ru paahi.

10. (a) Mmikhalelo xeeni mulopwana oothela ni muthiyana ootheliwa, hataa ole onihimya okhala muKristau, oniiriha awe itthu okhala soorika wa atthu akina a vatthokoni? (b) Exeeni eniwerya opakiwa wira olokiheriwe mwaha owo?

¹⁰ Masi sai akhala wira mulopwana owo othenle khoncalela soophavela sa etthoko aahiiso khonihoolela mmiyaha sa Biibiliya ni soovara sikina? Aahiiso sai akhala wira muthiyana ootheliwa khonikhaliherya ni khonooniherya wiiwelela woomuluku? Anamathelana akina annikhumela saana vaavo vanivaanel’aya miyaha iyo sa vatthokoni mwa nttittimiho. (Maphattuwelo 21:10-12; Miruku 15:22) Masi hataa sookhumelela saya sihikhanle iye saalipeleliwa, khuta mmosaa a hiyo onoowerya okhaliherya wira vatthokoni vakhalee murettele, nikhalanaka sowiima sa munepa wa Muluku mookumini mwahu, ni niwooniheryaka othokorerya woophenta atthu a vatthokoni. (aGalasia 5:22, 23) Etthu enrowa okhaliherya wira itthu seetteke saana, khahiyo onwehererya namathelana ahu wira opake etthu, masi hiyo ti nintthuneya opaka ele eniwerya ahu, wira nooniherye omwiiwelela wahu Muluku.​—aKolosi 3:18-21.

Opuro Oniphwanyaneya Waakhuliwa wa Makoho

11, 12. Etthu xeeni Yehova evanha awe wira onikhaliherye okhumela saana vatthokoni vahu?

¹¹ Aakhala mapuro manceene yaawo atthu aniphavela aya miruku sa moota woweettiha itthoko saya. Masi hiyo noosuwela wira Nuulumo na Muluku nookhalana miruku sootepa otthuneya, nto hiyo ninnixukhuru mwaha woowi orweela mwa mulokiheryo awe wowooneya, Muluku onninikhaliherya ovarihela muteko miruku iyo. Niireke wira nyuwo munnittottela mureerelo oratteene yookhaliherya eyo?​—Esalimo 119:129, 130; Mikeya 4:2.

¹² Ohiya orowa mmithukumanoni sa muloko paahi, niireke wira mookhalana okathi oniira anyu yoosoma ya Biibiliya ya vatthokoni moohihiyererya? Itthoko sinipaka eyo sinoowerya okhala sowiiraana mu okokhorela waya. Okumi wa itthoko saya onnireelihiwa vaavo vanivarihela aya muteko Nuulumo na Muluku, moovarihana ni mikhalelo saya.​—Otumererya 11:18-21.

13. (a) Akhala wira nookhalana makoho mmiyaha sa vatthokoni, ikwaha sinceene ninrowa ophwanya woowi yookhaliherya enitthuneya? (b) Etthu xeeni enitthuneya woonihereyaka mu soothanla sotheene sinipaka ahu?

¹³ Nyuwo pooti wira mookhalana makoho mmiyaha sa vatthokoni. Mwa ntakiheryo, sai voohimya sa othanla oyara aahiiso ohiyara? Niireke wira wookhala okathi oyiihasa erukulu oneemereriwa aya? Akhala wira mwanamwane khonisiveliwa vanceene ni miyaha sa omunepani, mpakha vaavi vanitthuneya awe okhanyereriwa wira okhale vamosaa ni etthoko mu okokhorela? Iliivuru sinipakiwa ni Anamoona a Yehova sinnithokorerya makoho manceene ntoko awo. Mwiixutte moota woovarihela muteko sookhaliherya sa omutokosa Biibiliya, ohela muhina índices wira mphwanye waakhula. Akhala wira khamurina iliivuru sihimmwale mu índice, muhaayase opuro onisukiwa iliivuru sa muloko oSalau ya Omwene. Aahiiso nyuwo pooti ophwanya iliivuru iya mu computadoreni mwanyu. Nave-tho, nyuwo pooti olavula miyaha sanyu iyo ni maKristau oolipa momunepani alopwana ni athiyana. Masi muhiwehereryeke wira okathi wotheene munrowa ophwanya waakhuliwa wooluluwanya wa nikoho nanyu. Ikwaha sinceene nyuwo muhaana opaka soothanla ekhinyu aahiiso ni ole othelanne anyu. Nto mpakee soothanla seiyo sinooniherya omwiiwelela wanyu Muluku ohiya paahi ohoolo wa atthu akina masi-tho vatthokoni vanyu.​—aRoma 14:19; aÉfeso 5:10.

Makoho Oowuuluula

• Okhala oororomeleya wa Yehova onihapuwela sai mmarehereryo a othelana?

• Vaavo vanixankiheya ahu nthowa na miyaha sa vatthokoni, exeeni enrowa onikhaliherya opaka ele enimuhakalaliha Muluku?

• Nnaamwi atthu akina vatthokoni-vo ahipakaka saana itthu sikina, nipakeke exeeni wira nlokiherye mwaha owo?

[Elatarato eri epaaxina 155]

Ohoolela wa mulopwana oothela wohaana wooniherya mikhalelo sa Yesu

[Elatarato eri epaaxina 157]

Okhalana yoosoma ya Biibiliya ya vatthokoni yoohihiyererya onnikhaliherya okhala oowiiraana