WAAKHULIWA WA MAKOHO A MBIIBILIYANI

Niireke Biibiliya Nuulumo na Muluku?

Khiivo eliivuru enilikana ni Biibiliya, tivonto owo Nuulumo na Muluku. ABiibiliya ibilyau sene ahimpirimiriwa mmattaava imiya sinceene. Biibiliya ookhalana owerya wa orukunuxa mirima sa atthu.​—Mmusome 1 aTesalonika 2:13; 2 Timótheyo 3:16.

Ninnikupali wira Biibiliya Nuulumo na Muluku mwaha woowi owo onnihimya itthu sinrowa wiireya muhoolo. Khuuvo mutthu oniwerya opaka eyo. Mwa ntakiheryo, moone eliivuru ya Yesaya. Ekoopiya emosa ya eliivuru eyo, yaapakiwe eseekulu emosa Yesu ohinatthi oyariwa yaahiphwanyiwa munikhukuni waattamela Ephareya Yookhwa. Eyo yaahihimya wira epooma ya oBabilonia khiyaarowa-tho okhaliwaka. Mpantta woopacerya wa eprofesia eyo yiiraneyale iyaakha sinci nuumala Yesu ovara muteko woolaleerya valaponi.​—Mmusome Yesaya 13:19, 20; 2 Pedru 1:20, 21.

Biibiliya olempwale sai?

Biibiliya olempwale mwa okathi wowiiraka 1.600 iyaakha sene. Atthu 40 amulempe Biibiliya, yaatthara mwaha mmosaru moohivaanyihana. Vaaweryaneyale sai? Muluku taakhalihenrye atthu awo.​—Mmusome 2 Samuweli 23:2.

Ikwaha sikina, Muluku aanilavula ni atthu awo orumeelaka malaikha, sowoonihiwa, aahiiso, oloha. Nto Muluku aaniiriha muupuwelo wa alipa yaamulepa Biibiliya othanla moolumo ooreerela wira alepe ihapari Sawe.​—Mmusome Wisupulula 1:1; 21:3-5.

Wira musuwele soohimmwa sikina, moone muru 2 wa eliivuru ela, yoolaleiwa ni Anamoona a Yehova.

Mubaxari va  http://www.jw.org/vmw