Makhalelo a Eliivuru Okumi Woohimala!

Niireke onnoosivelani orumeela iviidiyu ni makoho animwiiriha mutthu ohimya moonelo awe a eliivuru Okumi Woohimala!? Ankhi mipantta sini: “Atthu Akina Anihimya Wira”, “Yoolakela aka” ni “Nwehe itthu sikina”? Itthu xeeni sikina sa eliivuru ela sinookhaliheryani vanceene okathi muniiriha anyu yoosoma ya Biibiliya? — Mat 28:19, 20.

Iviidiyu ni Myaha Sikina: Akhala wira muniiriha yoosoma ya Biibiliya murumeelaka eliivuru yoowimpirimiriwa, etthu xeeni enrowa wookhaliheryani ophwanya moowaakuveya iviidiyu ni myaha sikina opuro omosa? Eliivuru eletroniku, nyuwo pooti othanla epantta emosa ya ipantta xexe. Mpantta wookiserya wa elista ya myaha, nyuwo pooti othanla iviidiyu ni myaha sikina sa yoosoma aahiiso mpantta muniphavela anyu. (Nwehe efootu 1.)

Makhalelo a “Eliivuru Yoowimpirimiriwa”: Akhala wira munimusomiha mutthu murumeelaka eliivuru eletroniku, “Eliivuru Yoowimpirimiriwa” pooti wookhaliheryani khula okathi muniphavela anyu. Nlelo muri ene yoosoma eyo, mukilikari aahiiso muttapunye iponto tthaaru siri osulu moono woolopwana ni muthanle mpantta oni: “Edição Impressa”. Eyo enimookhaliheryani wuupuwela moota mpantta munisoma anyu onivarihana aya ni mwaya wootheene munisoma anyu. Wira mutthikele eformatu eletroniku, mutthikele okilikari aahiiso ottapunya iponto iye tthaaru ni muthanle mpantta oni: “Edição Digital”.

“Kiireke Kihiilokiherya?”: Ikaaxa iyo siri wanikisa wa eliivuru sinnooniherya itthu naxikola onireerela awe opaka wira okhale namalaleerya oohipatisiwa ni itthu onireerela awe opaka wira opatisiwe. (Nwehe efootu 2.)

Inoota: Inoota sinnitthokiherya myaha sikina sa efaita yinceene. Eliivuru eletroniku, sookhala ilinkhi wanikisa wa khula enoota sinrowa wooroihani mpantta mweemenle anyu yoosoma eyo. (Nwehe efootu 2.)