Iyaakha 100 sa Olamulelo wa Omwene Sinoophanyihani Mureerelo Xeeni?

‘Yehova Muluku, òwerya sothene, miteko sanyu ti Sulupale, . . . Mwene a mahiku othene’.​—WIS. 15:3.

MUNNIWERYA WAAKHULA?

Moota xeeni Yehova sakhanle awe Mwene mwaakha wa 1914, ni itthu xeeni sipakiwe valaponi ni Omwene owo?

Yesu onirumeela sai Omwene wa Mesiya wira oreerihele itthu, axuttihe, ni waatthokiha saana arumeyi oororomeleya a Muluku, ari valaponi?

Ninrowa waakhuliwa liini moomalela nivekelo nahu noowi ‘Omwene anyu orwe’, nto eyo enrowa otaphulela exeeni?

1, 2. Omwene wa Muluku onrowa waakhwaniherya exeeni, nto xeeni vanikupaleela ahu wira onimoorwa tthiri?

ORYEENE vamwaako waattamela oKafarnau elimwe ya 31 EC, Yesu Kristu aahiwiixuttiha atthareli awe ovekela so: ‘Omwene anyu orwe’. (Math. 6:10) Olelo-va, atthu anceene annitikhina akhala wira Omwene owo onimoorwa tthiri. Hata vari siiso, hiyo ninnikupaleela wira nivekelo nahu, noowi ‘Omwene wa Muluku orwe’, nnimwaakhuliwa tthiri.

² Yehova onrowa orumeela Omwene wira uuraanihe emusi awe wiirimu ni valaponi. Yoolakela eyo ya Muluku ehaana wiiraneya. (Yes. 55:10, 11) Maana sowiiraneya sa iyaakha 100 sivinre, sinooniherya wira tthiri Yehova onnilamulela ntoko Mwene mahiku ahu ala! Muluku onnipaka itthu suulupale ni sootikiniha mmureerelo wa atthu imilyau sinceene animwiiwelela. (Zak. 14:9; Wis. 15:3) Masi Yehova okhala wawe Mwene, khonilikana ni orwa wa Omwene weiwo Yesu oniixuttinhe awe wira nilompeke. Nto itthu iyo piili sinivirikana sai, ni mureerelo xeeni onrowa aya wookumiheryani?

OLE YEHOVA ONVANHE AWE EMWENE ONNIVARA MUTEKO AWE

3. (a) Yesu aavahiwe liini Emwene, ni aavahiwe woowi? (b) Munrowa otthokiherya sai wira Omwene waatikitheriwe 1914? (Nwehe enoota.)

³ Vahalaka vakhaani ophiya iyaakha sa 1900, muthuko waahimwaleela, eprofesiya yaahimmwale iyaakha 2.500 ottuli, elempwale ni Daniyeli, eni: ‘Mahiku a omwene owo, Muluku a wirimu onokumiherya omwene ohinrowa omala nnákhala oweriwa ni omwene mukina’. (Dan. 2:44) Alipa Oomusoma Biibiliya yaahiviriha iyaakha sinceene ahimyaka wira mwaakha wa 1914 waarowa okhala a vameekhaaya. Atthu anceene okathi ole, yaakupali wira waakelela mahiku, itthu saarowa okhala sooreera, ntoko sahimyale awe mulipa oolepa oriki: “Olumwenku ohinatthi ophiya mwaakha wa 1914, atthu yaanilipelela itthu sooreera sinceene”. Masi muhoolo mwaya mwaakha yoole, yaahiiraneya eprofesiya ya Biibiliya, okathi waakhumelenle aya Ekhotto Yoopacerya ya Olumwenku. Itthu ntoko etala, itetere, iretta ni wiiraneya wa iprofesia sinceene sa Biibiliya, saahooniherya moomalela wira Yesu Kristu, aahipacerya olamulela ntoko Mwene a Omwene wa Muluku, mwaakha wa 1914.a Mwaha wonvaha emwene Mwanawe, ntoko Mwene a Mesiya, Yehova aahikhala tthiri Mwene mwa enamuna esya!

4. Etthu xeeni yaapanke awe Yesu avahiwakaru emwene, nto nuumala-vo aapanke-tho exeeni?

⁴ Etthu yoopacerya Mwene ole aapanke awe, waari owana ni Satana, nwanani muulupale a Tiithi awe. Yesu ni malaikha awe, yaahimoomola wiirimu Satana ni minepa sawe sootakhala. Eyo yaahikumiherya ohakalala wuulupale wiirimu, masi mwa okathi vakhaani, otakhaliwa wuulupale valaponi. (Mmusome Wisupulula 12:7-9, 12.) Nuumala-vo, Mwene aahivaha ephoole wa arumeyi awe valaponi, wira aareerihele, owiixuttihe ni waatthokiha saana wira apake otthuna wa Muluku. Nrowe noone moota wiiwelela waya olamulelo wa Omwene mwa inamuna iyo thaaru, owiirinha aya ovaha ntakiheryo nooloka.

OMWENE WA OMESIYA ONNAAREERIHELA ATTHU AWE OOROROMELEYA

5. Oreerihiwa xeeni wiiranen’ye eriyari ya 1914 ni wanipacerya wa 1919?

⁵ Nuumala Yesu omoomola Satana ni minepa sawe sootakhala wiirimu, Yehova aahimuruma Yesu orowa otokosa ni oreerihela mukhalelo womunepani wa atthareli awe valaponi. Eprofesiya ya Mikeya ennihimya yowiiraneya eyo okhala oreeriheliwa womunepani. (Mal. 3:1-3) Sowiiraneya sinooniherya wira eyo yiiranen’ye eriyari ya 1914, ni epantte yoopacerya ya 1919.b Wira niirele mpantta emusi yowiiraana ya Muluku, nihaana okhala ooreerihiwa wala ootteelihiwa. (1 Ped. 1:15, 16) Nihaana okhootta oravihiwa sowiixuttiha seethiru sa etiini ni ipoliitika sa elapo ela.

6. Eyoolya ya omunepani enikumiheriwa sai, nave xeeni eryaaya yootepexa otthuneya?

⁶ Nuumala-vo Yesu aahirumeela ekhulupale awe ya Omwene, wira omuthanle ‘murumeyi oororomeleya ni ankhili’. Murumeyi ola aarowa ovahaka eyoolya yomunepani moohihiyererya, wa otheene yaale yaarowa wiirelaka mpantta nikoto nimosa ninthokoreriwa ni Yesu. (Math. 24:45-47; Yoh. 10:16) Nto okhuma 1919, ekrupu yaamukhaani ya anna oowoottihiwa, moororomeleya ennivara muteko aya muulupale wa waalyiha atthu a vatthokoni. Yoolya yinceene yomunepani enikumiheriwa ni murumeyi owo, enninivaha ikuru wira ninnuweke moowaaminini. Eyo ennilipiha yoolakela ahu, ya ovikaniha okhala ooratteleya omunepani, mweettelo, muupuwelelo ni werutthuni. Yoolya ela yoomunepani enniniixuttiha-tho vamosa ni oniiriha okhala oophwanelela, ovara muteko wootepexa otthuneya, yoowo olelo-va onivariwa valaponi. Niireke nyuwo munnittottela muraarelo itthu iyo sotheene?

MWENE ONIWIIXUTTIHA ATTHU AWE OLALEERYA ILAPO SOTHEENE

7. Muteko xeeni wootepa otthuneya Yesu aavanre awe oryeene valaponi, ni waarowa ovikaniha mpakha silini?

⁷ Okathi Yesu aapacenrye awe olaleerya valaponi, owo aahimmye so: ‘Kihana olaleya ehapari yorera y’Omwene wa Muluku mittetthe sikina-tho, p’itthu kirwenlyaka’. (Luka 4:43) Iyaakha tthaaru nnimeya oryeene valaponi, muteko awe muulupale, waari olaleerya. Owo aaharuma awiixutti awe oriki: ‘Virani mwettaka, mulaleyaka wira: ‘Omwene wa wirimu ori vakhiviru!’’ (Math. 10:7) Nuumala ohihimuxiwa, Yesu aahihimya vahinatthi wira atthareli awe yaarowa omwara-mwarya ihapari sooreera ‘mpakha omalenle elapo’. (Mit. 1:8) Owo aahaaleiherya wira mwaneene aarowa okhaliherya muteko owo wootepexa otthuneya mpakha okathi ahu ola.​—Math. 28:19, 20.

8. Moota xeeni Mwene aatumerenrye awe arumeyi awe valaponi ovara muteko?

⁸ Mwaakha wa 1919, ‘ihapari sorera sa Omwene’ saahela muhina etthu ekina ya niinano. (Math. 24:14) Mwene aanilamulela wiirimu, ni aahithukumanya valaponi ekrupu emosa yaamukhaani, yeeyo yaari yooratteleya omunepani. Mowaakuveya ekrupu ele yaahiiwelela yootumererya ya Yesu ya alaleerya ilapo sotheene ihapari sooreera sa Omwene wa Muluku! (Mit. 10:42) Mwa ntakiheryo, anamalaleya oowiiraka 20.000 yaahirwa va muthukumano wa ilapo sinceene, oCedar Point, Ohio EUA, mweeri wa Setembro 1922. Nkahaya muupuwele moota anna yaaryaaya oohakalala vaavo Munna Rutherford, aalavunle awe mwaha oni: “Omwene”, nto khulaleya oriki: “Nkawehani, Mwene onnilamulela! Nyuwo alipa-animulaleya. Tivonto, mulaleye, mulaleye, mmulaleye Mwene ni Omwene awe”. Atthu owiiraka ikonto piili yaaronwe muthukumano ole, yaahooniherya weemya waya yootumererya ele, vaavo yaapakiwa aya marehereryo oorowa olaleya “Nihiku na vameekhaaya”, woorowa oxukuryaka itthoko, nto aneetta mukwaha woorowa waalaleerya atthu yaakhala mittetthe soorakamela etthu yowiiraka ikiloometru 72, akhumaka opuro wiiriwa kongresu. Oluttuweliwe ene, mutthu mmosa aari vakongresuni aahimmye so: “Nkinkhala-khala kiliyalaka moota kongresu ola onitumerenrye awe okhalela nthiti olaleya Omwene!” Khiyaareere atthu akina yaarina muupuwelo mmosaru owo.

9, 10. (a) Ixikola xeeni sipakiwe wira siwiixuttiheke anamalaleya a Omwene? (b) Moota xeeni nyuwo muttottenle anyu mureerelo ixikola iyo?

⁹ Eyaakha ya 1922, anamalaleya a Omwene yaavikana 17.000, yaanilaleerya ilapo sowiiraka 58. Masi atthu awo yaahaana olelihiwa moota woolaleerya. Eseekulu yoopacerya, ole ori Mwene-Oothanliwa, aahaavaha awiixutti awe, malakiheryo oowiiweya saana, niire so: masu ene, opuro ene, ni moota woolaleerya. (Math. 10:5-7; Luka 9:1-6; 10:1-11) Ottharihelaka ele yaapanke awe nihiku nle, Yesu onnivikaniha waleeliha atthareli awe anivara muteko woolaleya Omwene, ni waavaha itthu sinaakhaliherya ovara muteko saana. (2 Tim. 3:17) Yesu onnirumeela muloko wira aavaheke malakiheryo arumeyi awe sa moota wolaleerya. Enamuna emosa enirumeela awe eri Exikola ya Orummwa wa Muluku, yeeyo eniiriwa mwa miloko sinivikana 111.000 ilapo sotheene. Mwaha woottottela mureerelo malakiheryo awo, anamalaleerya anivikana imilyau 7, vano ari oolikane ene olaleerya ni wiixuttiha mwa enamuna enaakhaliherya ‘atthu othene, ni mwa sothene’.​—Mmusome 1 aKorinto 9:20-23.

¹⁰ Wuncererya Exikola ya Orummwa wa Muluku, sookumiheriwa Ixikola sikina sa Biibiliya siniwiixuttiha axitokweene, mapioneero, anna oohithela, maKristau oothelana, anna a Ekomisau ya Efiliyali vamosa ni axaaraya, axitokweene anixukurya miloko vamosa ni axaaraya, ni mamisionaario.c Anna akina yaamwinre kursu a Exikola ya maKristau Oothelana, yahooniherya ohakalala waya ahimyaka so: “Nikuruta na vameekhaaya niirihiwa ahu, nihaceererya omphenta wahu Yehova, ni wuncererya osuwela wahu moota wowaakhaliherya saana akina”.

11. Exeeni eniwiiriha anamalaleya a Omwene ovikanihaka olaleerya hata avaanyihiwaka?

¹¹ Wiimananiha nno wuulupale wa olaleerya ni wiixuttiha Omwene, khonimusivela munyokhani ahu Satana. Owo onnirumeela inamuna sowooneya ni soohooneya wira owane ni mitthaka sa Omwene vamosa ni ale anilaleya mitthaka iyo, ophavelaka owiiriha ohiya muteko aya. Masi wiimananiha wa munyokhani owo khonikhumela saana. Maana Yehova oomukhaliha Mwanawe ‘mukhulupale ovikana sooruma sotheene ni owerya wotheene ni ikuru sotheene’. (aÉf. 1:20-22) Ntoko Mwene, Yesu onnirumeela owerya orina awe, wira owaakiherye ni oweettiha awiixutti awe, wira otthuna wa Tiithi awe wiireye.d Tivonto ihapari sooreera sinnilaleeriwa, nto imilyau sinceene sa atthu a murima saana anniixuttihiwa iphiro sooreera sa Yehova. Tthiri ela eparakha yuulupale wa hiyo wiirela mpantta muteko ola muulupale!

MWENE ONNATTHOKIHA ATTHU AWE WIRA AVARE MITEKO SUULUPALE

12. Muhimye inamuna sikina sa oreeriheliwa wa nikhuuru nootthokiheya, opakiwe okhuma okathi yoole okhalihiwa awe Omwene.

¹² Okhuma vaavale okhalihiwa awe Omwene 1914, Mwene onnireerihela inamuna sa otthokiheya waya arumeyi a Muluku wira apakeke otthuna wa Muluku. (Mmusome Yesaya 60:17.) Nto okhuma 1919, khula muloko aahithanliwa namahoolela mmosa, iitthaniwa namahoolela a muloko, wira ohooleleke muteko woolaleerya. Mwaakha wa 1927, waahipacerihiwa muteko wootthokiheya wa olaleerya khuta enupa. Mwaakha wa 1931, arumeyi a Yehova yaahipacerya orumeela nsina na mBiibiliyani noowi, Anamoona a Yehova. (Yes. 43:10-12) Okhuma mwaakha wa 1938, khisaarumeeliwa-tho ivootu wira athanliwe amahoolela a Muloko; masi yaathanliwa sitthariheliwaka sooruma sa Biibiliya. Mwaakha wa 1972, muloko waahooleliwa ni nikhuuru na axitokweene ohiya ohooleliwaka ni mutthu mmosa paahi. Alopwana otheene yaarina soophwanelela, yaahitumereriwa ophavelaka miritti sa ‘okukhula nikoto na Muluku’ nivahiwa aya. (1 Ped. 5:2) Mwaakha wa 1976, Nikhuuru Noolamulela naahitthokihiwa-tho, khukhala ikomisau thanu namosa, wira seettiheke muteko woolaleerya, olumwenku wotheene. Tthiri, Mwene othanliwe ni Yehova, onnivikaniha waatthokiha saana arumeyi a Omwene wira apakeke itthu attharihelaka enamuna ya olamulela wa Muluku.

13. Mureerelo xeeni oniphwanya ahu mwa itthu siiranen’ye iyaakha 100 sa olamulelo wa Omwene?

¹³ Vano nkahaya muupuwele ele Omwene wa Mesiya epanke awe mwa iyaakha 100 sa olamulelo awe. Yesu ohaareeriha atthu arina nsina na Yehova. Onneettiherya olaleeriwa wa ihapari sooreera sa Omwene, muteko onivariwa ilapo 239 ni onniwiixuttiha iphiro sa Yehova atthu imilyau sinceene. Yesu oowiiraaniha atthu anivikana imilyau 7, ari arumeyi awe oororomeleya, nto khuta mmosa onniivahererya opaka otthuna wa Tiithi ahu. (Esal. 110:3) Aayo, miteko sa Yehova siniireya orweela mwa Omwene wa Mesiya ti suulupale, ni sootikiniha. Masi sihaavo itthu sikina soohakalaliha, sinrowa wiiraneya muhoolo!

MAREELIHO A MUHOOLO A OMWENE WA MESIYA

14. (a) Okathi onilompa ahu wira ‘Omwene anyu orwe’ ninvekani? (b) Tiivi eri yoolepa ya mwaakha wa 2014, nto xeeni eryaaya yoophwanelela?

¹⁴ Nnaamwi 1914 Yehova omukhalinhe Yesu Kristu, Mwene a Mesiya, eyo khenaakhula moomalela nivekelo nahu noowi ‘Omwene anyu orwe’. (Math. 6:10) Biibiliya aahihimya vahinatthi wira Yesu aarowa ‘olamulelaka eriyari ya awanani awe’. (Esal. 110:2) Maguvernu aapinaatamu aneettihiwa ni Satana nlelo annivaanyiha Omwene. Vaavo vanivekela ahu wira Omwene wa Muluku orwe, ninveka wira Omwene wa Mesiya ni anamalamulela akhwaawe arwe amala-malihe olamulelo wa apinaatamu ni waamaliha otheene yaale aniwana ni Omwene owo. Eyo enrowa waakhwaniherya eprofesiya ya Daniyeli 2:44 yoowi, Omwene wa Muluku ‘onohonona n’upwetexa omwene wothene wa mulaponi’. Aayo, eyo enrowa wamala-maliha anapoliitika otheene aninyokha Omwene awe. (Wis. 6:1, 2; 13:1-18; 19:11-21) Vano, onnaattamela okathi onrowa aya wiiraneya eyo. Okhala wira 2014, ti mwaakha onimalela aya iyaakha 100, nuumala okhalihiwa Omwene wa Muluku wiirimu, nto ti vookhalela yoolepa ya mwaakha wa 2014, okhala Matheyo 6:10, yeeyo eni: ‘Omwene anyu orwe’!

15, 16. (a) Itthu xeeni soohakalaliha sinrowa wiiraneya okathi wa olamulelo iyaakha ekonto emosa? (b) Etthu xeeni yookiserya Yesu enrowa awe opaka ntoko Mwene wa oMesiya, nto eyo enrowa otaphulela exeeni wa yoolakela ya Yehova wa soopattuxiwa sotheene?

¹⁵ Nuumala Omwene wa Mesiya waapwetexe awanani a Muluku, Yesu onrowa onvonyerya Satana ni minepa sawe sootakhala weepiphini mpakha iyaakha ekonto emosa. (Wis. 20:1-3) Nto nuumala otthukiwa Satana, Omwene onrowa ovikaniha waakhaliherya atthu, wira attottele mureerelo mukuttho wa Yesu, nto eyo enrowa omala-maliha khuluwi sotheene sinikhumelela mwaha wa yoottheka ya Adamu. Mwene onrowa wahihimuxa atthu imilyau sinceene ni onrowa ompaka programa oowiixuttiha atthu, olumwenku wotheene voohimya sa Yehova. (Wis. 20:12, 13) Elapo yotheene enrowa okhala eparayiisu ntoko saarya aya wEdeni, nto apinaatamu otheene oororomeleya, anrowa okhala oomalela.

¹⁶ Wuumalani wa iyaakha ekonto emosa sa olamulela wa Kristu, Omwene wa Mesiya, onrowa wiiraka omalelinhe ene yoolakela awe. Nuumala-vo, Yesu onrowa omuttikiherya Omwene, Tiithi awe. (Mmusome 1 aKorinto 15:24-28.) Okathi owo, khivanrowa otthuneyaka okhala mutthu onikhaliherya wira Yehova aataane ni anaawe valaponi. Aana otheene a Muluku wiirimu ni valaponi anrowa wuuraana ni Tiithi aya a wiirimu ntoko emusi emosa.

17. Voohimya sa Omwene, etthu xeeni enireerela ahu olakela opaka vano?

¹⁷ Mwa sowiiraneya sinceene sikhumelenle iyaakha 100 sa Omwene, vannooneya wira Yehova onnikhapelela ni wira yoolakela awe ya muhoolo enoorowa wiiraneya valaponi. Moohaaniherya nnoovikaniha wiiwelela ni olaleya Omwene, ni Mwene Yesu. Nivikaniheke omuroromela Yehova wira onrowa waakhula nivekelo nahu noowi: ‘Omwene anyu orwe’!

[Inoota]

[Eponto yuulupale epaaxina 12]

Yoolepa ahu ya mwaakha wa 2014 ‘Omwene anyu orwe’​—Matheyo 6:10