Makoho Anikohiwa Ni Ale Anisoma Irevista Sahu

Niireke moonelo wa Davidi ori Esalimo 37:25 ni masu a Yesu ari va Matheyo 6:33 anitaphulela wira Yehova khonirowa weemererya wira Kristau emuthoweke yoolya?

▪ Davidi aalempe wira “nkinamone naxariya onyanyaliwe ni Muluku, nkinawone amusi awe elolaka yolya”. Owo aalavunle masu ale moovarihana ni ele yaamukhumelenle mweekumini mwawe. Owo aanisuwela oratteene inamuna Muluku sihinihiya awe waakhapelela atthu awe. (Esal. 37:25) Masu ala a Davidi, khanitaphulela wira khuuvo murumeyi a Yehova onihaawa mwaha wa etala wala onrowa othoiwa yoolya.

Waahikhala okathi Davidi aryaawe ooxankiheya vanceene. Okathi mmosa tiyoole owo aamutthyawa awe Sawuli. Yoolya ya Davidi yaahimala, onarowa oveka-veka yoolya wira alye owo ni atthu ale yaarina awe. (1 Sam. 21:1-6) Tthiri okathi ole, Davidi ‘alola yolya’. Masi owo aanisuwela wira hata aahaawa, khaanyanyaliwe ni Yehova. Etthu enisuwela ahu tiila, khanivo nipuro ninsoma ahu wira Davidi aahaana oveka-veka yoolya khula nihiku wira okhale mukumi.

Va Matheyo 6:33, hiyo ninniphwanya masu a Yesu, yaawo anittittimiherya wira Muluku onrowa waaphwanyiha arumeyi awe oororomeleya khula etthu enaathowa vakhala wira annipacerya ophavelasa Omwene. Yesu aahimmye so: “Mpajeryeke ophavela omwene wa Muluku ni wiwelela otthuna wawe. Vano sikina sothene, [ohela muhina yoolya, maasi ni soowara] Muluku onimophwanyihani ni wunjererya”. Hata vari siiso, Yesu aahihimya-tho wira mwaha wa olupatthiwa, “annawe” yaarowa ovoliwa etala. (Math. 25:35, 37, 40) Nto eyo yaahimukhumelela murummwa Paulo. Owo, okathi mukina aanivoliwa etala ni ntthona.​—2 aKor. 11:27.

Yehova onninihimeerya wira hiyo ninrowa olupatthiwa mwa inamuna sinceene. Owo pooti weemereryaka wira hiyo enithowe yoolya okathi onirowa ahu owananaka mixankiho sinikumiheriwa ni Diabo. (Yobi 2:3-5) Mwa ntakiheryo maKristau akhwiihu, ntoko ale yaathukumanyiwe ni maNazista mapuro ale yaakhanyereriwa aya ovara miteko, yaahithoiwa yoolya mwaha wa olupatthiwa iwe. Ohivahiwa waya yoolya yoophiyerya Anamoona ale, yaari enamuna Diabo aarumeela awe wira opwetexe nroromelo naya. Ale yaari oororomeleya yaahivikaniha omwiiwelela Yehova, yaaminiki wira owo khiwaanyanyanle. Owo temerenrye wira saakhumelele mixankiho iye, ntoko sineemererya awe wira maKristau otheene saaphwanyeke mixankiho sa khula enamuna. Masi, khivanivaanyihaniwa wira Yehova onnaakhaliherya ale anihaaxiwa mwaha wa nsina nawe. (1 aKor. 10:13) Hiyo nihaana wuupuwelaka khula okathi masu ari va aFilipi 1:29, yaawo ani: “Tthiri Muluku ohovahani oreriwa w’omurumela Kristu, khahiyó mmwaminiki pahi, masi-tho mmuhawelaka yowo”.

Yehova onnileiherya wira onrowa okhalaka ni arumeyi awe. Mwa ntakiheryo, eliivuru ya Yesaya 54:17, enihimya so: “Iyuma sothene sipakeliwe wolupatthani khasinvara-tho muteko”. Yooleiherya ele ni iye sikina siri mBiibiliyani, yoolipiherya yoowi Muluku onnaakhaliherya atthu awe otheene ntoko nikhuuru. Masi khula muKristau pooti ophwanya weehereriwa mpakha okhwa.