Mwiireke Ela Mukuupuwelaka Miyo

“Ahimuxukhuru Muluku, ahikawanya ephau iyo, khuhimya wira: ‘Ela ti erutthu aka, entthuna ovaheriwa nyuwo. Mwireke iya, mukùpuwelaka miyo’”.​—1 AKOR. 11:24.

MWAAROWA WAAKHULA SAI?

Okhala wene, ninthanliwa sai nihiku na Wuupuwelela?

Enithonyerya exeeni ephaau ni eviinyu okathi wa Yoolya ya Ohiyu ya Apwiya?

Xeeni varyaaya vootthuneya ohicompela niira na Wuupuwelela hata nirina yoolipelela ya okhala wiirimu wala valaponi?

1, 2. Woonasa wene etthu xeeni arummwa yuupuwela aya voohimya sa okathi woreerela orowa oYerusalemu?

NIHIKU noohikhala meeku, hiyo nnoowerya woona mweeri woonen’ye niinaano. Nsana maguarda oYerusalemu yaahiweha mweeri wooneyaka vakhaani. Nuumala Sineedrio osuwela, waahilaleiwa opacerya wa mweeri musya Nisani. Awo yaanilaleya ihapari iyo arumeelaka ithoonyeryo sa mooro, wala anamitthaka mpakha arummwa wiiwa. Tthiri, Yesu onniphavela orowa oYerusalemu wira ophiye ohinatthi opacerya Paasikha.

² Woonasa wene eyo ti etthu yuupuwela aya arummwa ale yaari ni Yesu oPereya, (okhopela wa muro Yordani), mmukwaha awe wookiserya worowa oYerusalemu. (Math. 19:1; 20:17, 29; Mar. 10:1, 32, 46) Nuumala olaleiwa nihiku noopacerya na mweeri wa aYuda Nisani, Paasikha aarowa wiiriwa mahiku 13 muhoolo mwaya, nuumala nsuwa okela 14 a Nisani.

3. Xeeni oryaaya woreerela maKristau ophavela osuwela nihiku niiriwa Paasikha?

³ Nihiku na Yoolya ya Ohiyu ya Apwiya, nenlo ninvarihana ni nihiku na Paasikha, ninrowa okhala 14 a Abril 2014 nuumala okela nsuwa. Nlo ninrowa okhala nihiku na vameekha aya wa maKristau eekeekhai ni ale anooniherya ophavela ekeekhai. Mwaha wa xeeni? Mwaha wa ele enisoma ahu va 1 aKorinto 11:23-25: ‘Yesu, ohiy’ule wavarihiwawe, ahikuxa ephau, ahimuxukhuru Muluku, ahikawanya ephau iyo, khuhimya wira: ‘Ela ti erutthu aka, entthuna ovahiwa nyuwo. Mwireke iya, mukùpuwelaka miyo’. Siso-tho, . . . ahikuxa ekálisi’.

4. (a) Makoho xeeni anikhumelela voohimya sa niira na wuupuwelela? (b) Ninthanliwa sai nihiku na wuupuwelela khuta mwaakha? (Nwehe ekaaxa eni: “Niira na Wuupuwelela 2014”)

⁴ Moohaaniherya nyuwo munimoorwa oniirani nenlo Yesu aarumme awe atthareli awe wuupuwelelaka khuta mwaakha. Nihinatthi ophiya nihiku nno mwiikoheke so: ‘ninrowa wiilokiherya sai mwaha wa nihiku nle? Itthu xeeni sa vameekhaaya sinirowa orumeeliwa? Itthu xeeni sinirowa wiiriwa okathi wa niira? Nto itthu sinrowa orumeeliwa vamosa ni sowiiraneya sotheene sirina yootaphulela xeeni wa miyo?

ITHOONYERYO

5. Malokiheryo xeeni Yesu aavenke awe okathi wa Paasikha ookiserya ni arummwa awe?

⁵ Okathi yoole Yesu aalenle awe arummwa awe orowa olokiherya opuro wa yoolya ya Paasikha, owo khaarumme orowa ophavelasa opuro wowaattiheriwa itthu, masi Yesu aaphavela opuro wooreerela, wooratteliwa ni waaphiyerya atthu ale yaalattuliwe. (Mmusome Marko 14:12-16.) Awo yaahaana-tho olokiherya itthu sikina saatthuneya okathi wa yoolya ele, eyo yaahela muhina ephaawu yoohiruruvalihiwa ni eviinyu yooxeerya. Nuumala omwiira Paasikha, Yesu aahitthokiherya saana ele enitaphulela aya ithoonyeryo iyo piili.

6. (a) Nuumala Paasikha exeeni Yesu aahimmye awe moovarihana ni ephaau? (b) Ephaau xeeni enirumeeliwa okathi wa niira na wuupuwelela?

⁶ Murummwa Matheyo aari vaavo, nto muhoolo mwaya khulepa ariki: “Yesu ahikuxa ephau, ahimuxukhuru Muluku, ahikawanya ephau iyo, khwavaha awixutti awe, ìraka: Kuxakani, mukhureke, ela erutthu aka”. (Math. 26:26) “Ephau” ele, yoohiruruvalihiwa, yaari emosaru yaarumeeliwa oPaasikhani. (Okhum. 12:8; Otum. 16:3) Ephaawu ele yaapakiwe ni otthu wa etrigu ni maasi, khiyatakaaheriwe miropo wala itthu ntoko maakha. Mwaha woohiheliwa miropo ephawu eyo khiyaaruruvanle. Eyo yaari yoophapateya, yoowuuma, enipasuwa ni yookhweya wunnakasa. Mahiku ala nihinatthi ophiya nihiku na Wuupuwelela, axitokweene a mmulokoni anninvekela mutthu wira opake ephaau, orumeelaka otthu wa etrigu ni maasi, khiyooxa mpanelani ettikittheliwe makhura vakhaani. (Mapuro ahikhanle aya otthu wa etrigu pooti orumeeliwa otthu wa musoro, meele, nakhuwo wala ephyo ekina enireerela.) Aahiiso, mukatthe wa aYuda oniitthaniwa matzot, ohiniheliwa miropo, mooce wala esebola onnireerela orumeela.

7. Muthinto xeeni wa eviinyu Yesu aarumenle awe, nto muthinto xeeni wa eviinyu okhanle oorumeeliwaka okathi wa niira na Wuupuwelela?

⁷ Matheyo onnivikaniha ohimya ariki: ‘[Yesu] ahikuxa ekálisi y’evinyu, ahimuxukhuru Muluku, khwavaha awixutti awe ìraka: ‘Nwuryeke othene anyu’’. (Math. 26:27, 28) Etthu yaakunxe awe Yesu mukaalisini yaari eviinyu yoxeerya. (Eyo khahiyo yaari esuumu ya uva, okhala wira uva iira amala-manle ene khalai) Ekeekhai wira eviinyu khiyaakhanle okathi wa yoolya ya Paasikha yaalyiwe wEjiitu, hata vari siiso Yesu aaheemererya orumeela eviinyu okathi wa Paasikha. Tthiri okathi wa Yoolya ya Ohiyu ya Apwiya Yesu aahirumeela eviinyu ele. Tivonto olelo-va maKristau anikhalana aya eviinyu okathi wa niira na Wuupuwelela. Okhala wira ephome ya Yesu khiyaatthuneya wuncereriwa wala olipihiwa efaita aya, tivonto eviinyu enirumeeliwa ehikhaleke yootakaheriwa itthu sikina ntoko aalikole ni itthu sikina soowunkheliha. Ehaana orumeeliwa eviinyu yoohitakaheriwa etthu, eviinyu eniphwanyaneya mulooxa ntoko Beaujolais, Burgundy wala Chianti.

YOOTAPHULELA YA ITHOONYERYO

8. Xeeni maKristau animananiha aya ophavela osuwela yootaphulela ya ephaawu ni eviinyu?

⁸ Murummwa Paulo aahihimya oratteene wira maKristau makina ohiya arummwa paahi, yaahaana ovikaniha opaka Yoolya ya Ohiyu ya Apwiya. Aalepelaka maKristau akhwa awe oKorinto aahimmye so: ‘Miyo kakhenle w’Apwiya etthu ela yolènlyakani [wira] Pwiya Yesu . . . ahimuxukhuru Muluku, ahikawanya ephau iyo, khuhimya wira: ‘Ela ti erutthu aka, entthuna ovaheriwa nyuwo. Mwireke iya, mukùpuwelaka miyo’’. (1 aKor. 11:23, 24) Moovarihana ni eyo, okhuma khalai mpakha olelo-va, maKristau annivikaniha opaka niira nna khula mwaakha ni anniphavela osuwela ele enitaphulela aya ephaawu ni eviinyu.

9. Yookupali xeeni yoohiloka arinaaya atthu akina voohimya sa ephaau yeele Yesu aarumenle awe?

⁹ Atthu akina yaale aneetta oKerexa anihimya wira Yesu aahimya erutthu awe tthiri vaavo aalavunle awe so: ‘ela erutthu aka’, awo anaamini wira mwa mwiirira ephaau ele yaahithatuwa tthiri khukhala erutthu ya Yesu. Masi eyo khahiyo ekeekhai.a Erutthu ya Yesu yaari nteronene ohoolo wa arummwa awe ale oororomeleya, ni yaahikhala-tho ephaau yoohiruruvalihiwa yeeyo yaarowa aya okhuuraka. Tivonto vannooneya tthiri wira Yesu aalavula mwa nthoonyeryo, ntoko siiraawe ikwaha sinceene.​—Yoh. 2:19-21; 4:13, 14; 10:7; 15:1.

10. Ephaawu enirumeeliwa okathi wa Yoolya Yoohiyu ya Apwiya enitaphulela exeeni?

¹⁰ Ephaau yeeyo arummwa yaawerya aya oweha ni yaarowa aya okhuura ti yaataphulela erutthu ya Yesu. Erutthu xeeni enihimmwa-va? Khalai, arummwa a Muluku yaatthokiherya so: okhala wira Yesu aahinnanya ephaau, masi makhuva awe khiyaanyanyiwe, nto ephaau ele yaataphulela ‘erutthu ya Kristu’, eyo piiyo, muloko wa maKristau oowoottihiwa. (aÉf. 4:12; aRom. 12:4, 5; 1 aKor. 10:16, 17; 12:27) Masi muhoolo mwaya vaahooneya wira Soolempwa sinooniherya wira ephaau enithoonyerya erutthu yaavahiwe Yesu ntoko pinaatamu. “Kristu ahihawa mwerutthuni mwawe”, mpakha okhomeliwa. Tivonto, okathi wa Yoolya Yoohiyu ya Apwiya, ephaau enitaphulela erutthu ya Yesu, yeele etexanne awe “itampi sahu”.​—1 Ped. 2:21-24; 4:1; Yoh. 19:33-36; aHéb. 10:5-7.

11, 12. (a) Yesu aapanke exeeni voohimya sa eviinyu? (b) Eviinyu yaarumeeliwe okathi wa Yoolya ya Ohiyu ya Apwiya yaataphulela exeeni?

¹¹ Eyo enninikhaliherya wiiwexexa saana ele Yesu yaahimmya awe sa eviinyu. Hiyo nnisoma so: “Vamanlyaya olya, ahikuxa ekálisi, ahimyaka wira: ‘Ekális’ila ti watàna wa nanano, olipihiwe n’iphome aka”. (1 aKor. 11:25) ABiibiliya anceene ilepeliwo saya anoolikana ni ole otaphuleliwe ni Robert Young yoowo oni: “Ela ti ekaalisi ya watana wa nanano mwa ephome aka” (Itaaliku ola tawihu.) Niireke ekaalisi yeele Yesu aakunxe awe ti yaataphulela wataana wa nanaano? Nnari. Nuulumo noowi ekaalisi naahimya etthu yaari memmo, niire so, eviinyu. Nto Yesu aahimmye wira eviinyu ele yaataphulela exeeni? Yaataphulela ephome awe eyeehiwe.

¹² Evangelyo ya Marku yookhalana masu a Yesu yaawo ani: “Ela t’iphome aka, ephome yo watàna wa nanano, yela enoyeheriwa atthu othene”. (Mar. 14:24) Aayo ephome ya Yesu yaarowa ‘omwarexeliwa atthu othene, wira eleveleliwe itampi saya’. (Math. 26:28) Tivonto eviinyu yooxerya, mookhalela enitaphulela aya ephome ya Yesu. Orweela mwa ephome ela nnoowerya ‘oleveleliwa sottheka sahu’.​—Mmusome aÉfeso 1:7.

WUUPUWELELA OKHWA WA YESU

13. Mutthokiherye moota sinipakiwa aya niira na khula mwaakha na Wuupuwelela okhwa wa Yesu.

¹³ Etthu xeeni enrowa anyu woona akhala wira munoopacerya orowa niira na Wuupuwelela okhwa wa Yesu ni Anamoona a Yehova? Muthukumano owo onrowa wiiriwa nipuro nooratteliwa, ninrowa owiiriha atthu otheene osiveliwa niira nlo. Woonasa wene opuro owo onooheliwa ifiloori vakhaani, masi khonirowa osariwa itthu sinrowa wiiriha okathi owo okhalaka ntoko ti wa efesta. Mutokweene mmosa oophwanelela onrowa othokorerya mwa enamuna yowiiwanyeya ni yoottittimiheya ele Biibiliya enihimya awe sa niira nlo. Onrowa waakhaliherya atthu otheene oxukhurela ele Kristu opanke awe wa hiyo. Owo aahikhwa ntoko yowoopola wira niphwanye okumi. (Mmusome aRoma 5:8-10.) Mulipa oolavula mwaha onrowa otthokiherya soolipelela piili silaiheriwe aya maKristau mBiibiliyani.

14. Okathi onrowa awe olavuliwaka mwaha wa Wuupuwelela okhwa wa Yesu, soolipelela xeeni piili sinrowa otthokiheriwa?

¹⁴ Nlipelelo nimosa ti nle na olamulela wiirimu ni Yesu, nto nummuru naamukhaani paahi na maKristau oororomeleya, ntoko ale yaari arummwa a Yesu, tarina yoolipelela ela. (Luka 12:32; 22:19, 20; Wis. 14:1) Yoolipelela ekina tiile arina arumeyi anceene oororomeleya mahiku ahu ala. Awo annilipelela okhala mahiku otheene eparayiisu esya valaponi. Nto okathi owo otthuna wa Muluku onimwiireyaka valaponi, ni wiirimu etthu yeeyo Yesu aavekenle awe khalai wira yiireye. (Math. 6:10) Soolempwa sinnooniherya itthu soohakalaliha sinrowa owiiraneela mahiku otheene.​—Yes. 11:6-9; 35:5, 6; 65:21-23.

15, 16. Ephaawu eniirihiwa exeeni okathi wa Yoolya Yohiyu ya Apwiya?

¹⁵ Mwaha owo aattamelaka wuumalani, mulipa oolavula mwaha onrowa ohimya wira woophiya okathi woopaka ele Yesu yaapanke awe ni arummwa awe. Ntoko sihimmwale aya vasulu-vo sinrowa orumeeliwa ithoonyeryo piili ephaau yoohiruruvala ni eviinyu yooxeerya. Ithonyeryo iyo, wonasa wene sinrowa opwehiwa ohoolo omwaattamela ole onilavula mwaha. Owo onrowa wooniherya ele elempwale mBiibiliyani voohimya sa ele Yesu yaapanke awe ni yaalavunle awe okathi aapacerinhe awe niira nla. Mwa ntakiheryo, eliivuru ya Matheyo enihimya so: ‘Yesu ahikuxa ephau, ahimuxukhuru Muluku ahikawanya ephau iyo, khwavaha awixutti awe ìraka: ‘Kuxakani, mukhureke, ela erutthu aka’’. (Math. 26:26) Yesu aahikawanya ephaau yoohiruruvala wira owerye waavahererya awiixutti awe yaamurukurenrye. Nyuwo munrowa woona wira okathi wa muthukumano nihiku na 14 a Abril ephaau yoohiruruvalihiwa, enrowa okawanyiwa khuheliwa mparathoni enilyelyiwa.

¹⁶ Woonasa wene sinoorumeeliwa iparatho sowaatta wira moohipisa iphaau iyo sivirihiwe wa atthu otheene. Ela enrowa opakiwa voohaattiheriwa itthu. Wanipacerya nimpakiwa nivekelo noohipisa, nuumala vo, sivirihiweke iparatho mwa enamuna yootthokiheya, moovarihana ni ele enikhalela opuro owo. Atthu vakhaani paahi tanikhuura ephaau (wala khuuvo onikhuura), ntoko siirenye aya ni miloko sinceene okathi waavirihiwa aya ephaau mwaisana 2013.

17. Okathi wa Wuupuwelela okhwa wa Yesu, anrowa otthareliwa sai malakiheryo a Yesu voohimya sa eviinyu?

¹⁷ Nuumala-vo enrowa ottittimiheriwa ele Matheyo yaavikaninhe awe ohimya oriki: ‘ahikuxa ekálisi y’evinyu, ahimuxukhuru Muluku, khwavaha awixutti awe ìraka: ‘Nwuryeke othene anyu. Ela ephome aka, ephome yo watàna emwarexeliwe atthu othene, wira sottheka sileveleliwe’. (Math. 26:27, 28) Etthariwaka ele Yesu aapanke awe, nnoopakiwa-tho nivekelo nikina, nto enoovirihiwa ekaalisi ya eviinyu yooxeerya wa atthu otheene.

18. Okhala wira atthu vakhaani paahi tanikhuura wala khuuvo onikhura, xeeni varyaaya votthuneya orowa muthukumano owo?

¹⁸ Anamunceene anrowa okhala opuro ole khanrowa okhuura ithoonyeryo iyo, okathi onrowa aya ovirihiwaka; mwaha woowi Yesu aahimmye wira paahi yaale anrowa olamulelaka wiirimu momweneni tanikhuura. (Mmusome Luka 22:28-30; 2 Tim. 4:18) Atthu anceene anrowa okhala alipa ooweha paahi. Hata vari siiso, okhala opuro ole wa Yoolya ya Ohiyu ya Apwiya ti vootthuneya, okhala wira onnooniherya moota sinivaha ahu efaita mukuttho wa Yesu. Okathi wa niira nlo, awo anrowa wuupuxeriwa mareeliho aniwerya aya okhalana mwaha wa mukuttho onoopola wa Yesu. Awo aakhalana yoolipelela ya wiirela mpantta ‘muttitthi mulupalexa’ yoowo onrowa woopowa okathi wa ‘maxakha malupale’. Awo anrowa okhala anamakokhorela “akantthe malaya aya khutteliha mphomeni mwa mwapwittipwitthi”.​—Wis. 7:9, 14-17.

19. Etthu xeeni enitthuneleya anyu opaka wira mwiilokiherye ni ottottela mureerelo Yoolya ya Ohiyu ya Apwiya?

¹⁹ Anamoona a Yehova ilapo sotheene, anniilokiherya mwaha wa muthukumano ola wa vameekha awe. Isumana sinceene ohinatthi wiiraneya, ninrowa okawaka ipaphelo sa nlattulo wira atthu anceene arwe. Ohiya-vo yaattamelaka mahiku a niira nlo, anamunceene a hiyo anrowa osomaka itthu sihimmwale mBiibiliyani sa ele Yesu yaapakale awe ni siiranen’ye mmahiku anilikanela mwaakha wa 33 EC. Nto nihaana olokiherya miteko sahu wira nihiku nla nihicompe. Ti vooreera ophiya nsipo ni nivekelo noopacerya nihinatthi, wira niwaakheleke ale annixukurya, ni ottottela muraarelo eprograma yotheene. Otheene sahu anna a mmulokoni ni ale anrowa onixukuryaka anoophwanya mireerelo sinceene akhala wira anoottharaka mBiibiliyani soolepa sinihimmwa. Etthu yootepa otthuneya, orowa wahu oniirani na Wuupuwelela okhwa wa Yesu, onrowa wooniherya oxukhurela wahu wuulupale mukuttho wa Yesu okathi omosaru nnimooniherya wiiwelela yooruma awe ela: ‘Mwireke ela mukùpuwelaka miyo’.​—1 aKor. 11:24.

[Enoota]

[Elatarato epaaxina 22]

[Ekaaxa epaaxina 23]

NIIRA NA WUUPUWELELA 2014

Mweeri wa musulu onnirukurerya elapo yotheene khula mweeri. Khuta ekwaha mweeri onirukurerya awe elapo, wookhala okathi mweeri owo oneereryana awe onakhala eriyari ya elapo ni nsuwa. Okathi oniiraneya aya eyo tonihimmwa okhala “mweeri musya”. Okathi owo, khivaniweryaneya woona mweeri, mweeri onnipacerya wooneya nuumala ovira iwoora 18 wala 30.

Mwaakha wa 2014, mweeri musya wootepexa waattamela okathi nihiku nnikhalana aya iwoora 12 othana ni iwoora 12 ohiyu, onirowa wooneya nihiku na 30 a Março ewoora ya 20:45, oYerusalemu. Nto okela wa nsuwa woopaceya nuumala wooneya mweeri oYerusalemu (31 a Março ) onirowa wiiraneya sivinrene iwoora 21. Vannivila okupali wira mweeri musya onirowa wooneya tthiri nihiku na 31 a Março. Waaniheryasa, okela wa nsuwa woopacerya vaavo vaniweryaneya aya woona mweeri musya oYerusalemu, onrowa wiiraneya nihiku na 1 a Abril. Moovarihana ni okontari mahiku wa aYuda a khalai, okela wa nsuwa wa nihiku nlo, onrowa okhala nihiku noopacerya na mweeri woopacerya (1 a Nisani).

Tivonto miloko sa Anamoona a Yehova, elapo yotheene aaleeliwa wira 14 a Nisani onirowa opacerya ni okela wa nsuwa wa segunda feira 14 a Abril, 2014. Eyo enirowa wiiraneya okathi yoole mweeri oniira awe oryeene woosarya.—soohimwa sikina sa moota woosuwela saana nihiku nlo munwehe A Sentinela 1 de Outubro 1977, ipaaxina 607.

[Ekaaxa epaaxina 24]

Atthareli a Yesu yaahiwurya eviinyu yaathoonyerya ephome ya Yesu ya wataana wa niinano (Nwehe ittima 11, 12)