Nvaheke Efaita Ororomeleya ni Olevelela wa Yehova

‘[Yehova], nyuwo mòrera murima ni òlevelela, òsareya othunku wale othene anovekelani’.​—ESAL. 86:5.

MUNNIWERYA OTTHOKIHERYA?

Inamuna xeeni ninrowa ahu otakiha ororomeleya wa Yehova?

Ninrowa otakiha sai olevelela wa Yehova?

Xeeni nyuwo muniphavela anyu ovikaniha wunnuuherya oovaha efaita mikhalelo soreera sa Yehova?

1, 2. (a) Xeeni vannisivela aya okhalana apatthani oororomeleya ni oolevelela? (b) Makoho xeeni ninrowa ahu othokorerya?

MWAAROWA otthokiherya sai nuulumo noowi mpatthani ekeekhai? Murokora muKristau oniihaniwa Ashiley onihimya so: “Mpatthani ekeekhai, ti yoole onookhaliherya okathi wotheene, ni onoolevelela wamutthekela”. Otheene ahu ninnaavaha efaita, apatthani oororomeleya ni oolevelela. Okhala wira apatthani awo anniniphenta ni onikhapelela.​—Mir. 17:17.

² Nto Yehova tori Mpatthani muulupalexa oororomeleya ni oolevelela. Ti maana aya nasalimo iipale awe ariki: ‘[Yehova], nyuwo mòrera murima ni òlevelela, òsareya othunku wale othene anovekelani’. (Esal. 86:5) Ontaphulelani okhala oororomeleya ni oolevelela? Yehova onooniherya sai mikhalelo iyo sooreera? Nto ninrowa omutakiha sai? Waakhuliwa waya onrowa wunnuuherya omphenta wahu Mpatthani oolokexa Yehova. Onrowa-tho olipiha wataana wahu ni atthu akina.​—1 Yoh. 4:7, 8.

YEHOVA TOOROROMELEYA

3. Ontaphulelani okhala oororomeleya?

³ Ororomeleya, ti mukhalelo wooloka onihela muhina muupuwelo wa wiivahererya, ookupaleeleya wala ohitthikela ottuli. Mutthu oororomeleya khantthikela ottuli. Moovirikana ni vo, owo moororomeleya onninvarexexa mutthu owo, (wala etthu eyo), moohihiyererya hata sikhumelelaka mikhalelo sooxankiha. Tthiri Yehova, tori ‘Òroromeleyexa’.​—Wis. 16:5.

4, 5. (a) Moota xeeni Yehova onooniherya awe ororomeleya? (b) Ninlipiheya sai natthokelela miteko sa ororomeleya wa Muluku?

⁴ Nto Yehova onooniherya sai ororomeleya? Owo khanaanyanyala arumeyi awe oororomeleya. Mmosa mwa anamakokhorela yaale yoonale ororomeleya wa Yehova aari Mwene Davidi. (Mmusome 2 Samuweli 22:26.) Okathi wa mixankiho, Yehova aanimweettiha, omukhapelela ni omoopola Davidi. (2 Sam. 22:1) Davidi aanisuwela wira ororomeleya wa Yehova khahiyo waari wa moolumo paahi. Xeeni Yehova aaryaawe oororomeleya ni Davidi? Mwaha woowi Davidi nave aari ‘òroromeleya’. Yehova onnivaha efaita ororomeleya wa anamakokhorela awe, nto owo onnaatthuvela mwaha wa ororomeleya waya.​—Mir. 2:6-8.

⁵ Nnowerya okhala oolipiheya vaavo vanuupuwelela ahu miteko soororomeleya sa Yehova. Munna mmosa oniihaniwa Reed, oolavula ariki: “Osoma moota Yehova aamukhapelenle awe Davidi okathi wa mixankiho ti etthu enitepa okikhaliherya venceene. Maana hata okathi Davidi aatthyawa awe khukhala mmakhukuni, okathi wotheene Yehova aanikhala ni Davidi. Tthiri masu ala annitepa okilipiha. Eyo ennikuupuxerya wira hata sikhumelelaka mixankiho, pooti siryeene suulupale, Yehova onrowa okikhaliherya kavikaniharu okhala oororomeleya”. Moohaaniherya nyuwo munnuupuwela siiso.​—aRom. 8:38, 39.

6. Inamuna xeeni sikina Yehova onooniherya awe ororomeleya, nto mareeliho xeeni arumeyi awe aniphwanya aya?

⁶ Inamuna xeeni sikina Yehova onooniherya awe ororomeleya? Yehova onninlipiha ariki: ‘Kinimokhapelelani-tho mpakha vanùluvalanyu’. (Yes. 46:4) Owo okathi wotheene onipaka soothanla moovarihana ni malamulo awe ahinturukeya voohimya sa yooloka ni yoohiloka. (Mal. 3:6) Nave-tho, Yehova ohooniherya ororomeleya mwaha wa okhala oororomeleya ni masu a anatiri awe. (Yes. 55:11) Ororomeleya wa Yehova onnittotteliwa mureerelo ni arumeyi awe otheene oowaamini. Moota xeeni? Okathi oniimananiha ahu otthara malakiheryo a Yehova, hiyo pooti ororomeleka wira owo onrowa onaakhwaniherya anatiri awe.​—Yes. 48:17, 18.

MUTAKIHEKE OROROMELEYA WA YEHOVA

7. Enamuna xeeni enrowa ahu otakiha ororomeleya wa Muluku?

⁷ Ninrowa otakiha sai ororomeleya wa Yehova? Enamuna emosa ori waakhaliheryaka yaale sinaaphwanya mixankiho. (Mir. 3:27) Mwa ntakiheryo, niireke moomusuwela muKristau mukhwiinyu oxankihen’ye, mwaha wa okumi awe, emusi awe, wala etthu yoohiloka epanke awe? Xeeni muhinlavula anyu ‘molumo òrera’ ni oolipiha wa atthu awo? (Zak. 1:13)a Opaka eyo, ethoonyeryo yoowi nyuwo mwa mpatthani oororomeleya, ‘onìvahererya’ onvikana munnawe.​—Mir. 18:24.

8. Ninrowa otakiha sai ororomeleya wa Yehova mukasamentoni mwahu?

⁸ Hiyo pooti otakiha ororomeleya wa Yehova vaavo vanooniherya ahu okhala eekeekhai wa ale anaaphenta ahu. Mwa ntakiheryo, akhala wira hiyo atthu oothelana, nihaana ovikaniha ororomeleya ni ole othelanne ahu. (Mir. 5:15-18) Nto hiyo ninnisyaka opaceriha etthu yaarowa oniiriha oraruwa. (Math. 5:28) Nave, ninnooniherya ororomeleya ni axinnihu, vaavo ninkhootta ahu ohankawaani, owoottherya akina ni okhootta owiriyana ovaanela woohiloka.​—Mir. 12:18.

9, 10. (a) Vanceenexa ti pani oniphavela ahu omooniherya ororomeleya wahu? (b) Xeeni wiiwelela malamulo a Yehova vahinikhweya aya khula okathi?

⁹ Mwa itthu sotheene, hiyo nimphavela okhala oororomeleya wa Yehova. Ninrowa opaka sai eyo? Orweela mwa okhalana moonelo wa Yehova, ophentaka ele eniphenta awe, onyokha ele eninyokha awe, ni okhalana mweettelo wooloka. (Musome Esalimo 97:10.) Akhala wira ninrowa wuupuwelaka moovarihana ni miyuupuwelo ni miyoonelo sa Yehova, ninrowa woona okhweya wiiwelela malamulo awe.​—Esal. 119:104.

¹⁰ Ekeekhai wira khivanrowa onikhweela wiiwelela malamulo a Yehova. Vanitthuneya wiilipiha okhala oororomeleya. Mwa ntakiheryo, maKristau nlelo ahithenle wala otheliwa masi aniphavela, awo ahaana omwaavya mutthu oothelanano oophwanelela eriyari ya arumeyi a Yehova. (1 aKor. 7:39) Murokora ohitheliwe pooti woonaka wira atthu oohaamini onivarana awe muteko, annimwaavyerya mulopwana wira amuthele. Nto okathi owo murokora pooti oxankiheyaka tthiri mwaha wa okhala ahitheliwe. Masi hata vari siiso, owo onnimananiha ovikaniha okhala oororomeleya wa Yehova. Niireke hiyo khaninvaha efaita ororomeleya wa anna mmoota owo? Tthiri, Yehova onrowa waareeliha otheene yaale anivikaniha okhala oororomeleya nnaamwi saaphwanyaka mixankiho.​—aHéb. 11:6.

YEHOVA TOOLEVELELA

11. Olevelela ontaphulelani?

¹¹ Wa mikhalelo soolokexa sa Yehova, ori ophavela wawe olevelela. Olevelela ontaphulelani? Ontaphulela ohimwiiriha etthu yoohiloka ole onitthekenle nnaamwi owo aaphwanela omuhukhumu. Olevelela iwo khonitaphulela wira mutthu olevelenle ohinoona onanara waya yoottheka ele. Masi, owo onithanla ohuupuwela ottikiherya yoohiloka, wala omunyemela namattheka owo. Soolempwa sinihimya wira Yehova toolikaneene ‘wàlevelela’ yaale aniittaruxa mwekeekhai.​—Esal. 86:5.

12. (a) Yehova onooniherya sai olevelela? (b) Onitaphulelani mutthu ‘ottipihiwa’ itampi sawe?

¹² Yehova onooniherya sai olevelela? Okathi Yehova onilevelela awe, owo ‘onilevelela’ moomalela, tthiri olevelela wawe ti woomalela okathi wotheene. (Yes. 55:7) Ninsuwela sai wira Yehova onilevelela moomalela? Moone yoottittimiherya eri mMiteko 3:19. (Musome.) Murummwa Pedru ahaatumererya ale yanwiriyana wira ‘erukunuxe mirima . . . ni ohokolowa’. Okathi namattheka onittharuwa awe, owo onnihiya itampi sawe ni wiikhupanyerya. Nto onniilipiha wira ahitthikele itampi sawe. (2 aKor. 7:10, 11) Ohiya-vo, namattheka oittarunxe, onniimananiha ‘ohokolowa’ ahiyaka mweettelo awe woohiloka wira amuhakalaliheke Muluku. Akhala wira ale yanwiriyana Pedru yaaniphavela wooniherya ottharuwa wekeekhai, nto exeeni yaarowa okhumelela? Pedru aahilavula wira soottheka saya saarowa ‘ottipihiwa’. Nuulumo nlo ninkhuma mwa nttaava na Egrego nintaphulela ‘oveliwa wa etthu, ottiipihiwa’. Nto, okathi Yehova onilevelela awe, owo onnittipiha ni orapiha etampi eyo. Owo onilevelela moomalela.​—aHéb. 10:22; 1 Yoh. 1:7.

13. Exeeni ennilipiherya aya masu oowi: ‘nkinrowa-tho wupuwela itampi saya’?

¹³ Ninsuwela sai wira olevelela wa Yehova ti woomalela? Muthokorerye eprofesia ya Yeremiya voohimya sa nivarihano nsya, naapakeliwe aya maKristau oowoottihiwa, nenlo nniiriha oweryaneya oleveleliwa soottheka ale anaamini mukuttho onoopola. (Mmusome Yeremiya 31:34.) Yehova aalavunle so: ‘Miyo kinimwalevelela sottheka saya, nkinrowa-tho wupuwela itampi saya’. Nto Yehova onninttittimiherya wira amulevelela mutthu, owo khanimphukela-tho mutthu owo mwaha wa etampi yeele. Owo khonnuupuxerya soottheka sahu khuta okathi wira onivahe mulattu wala onihukhumu. Moovirikanai ni eyo, Yehova onnilevelela moomalela itampi sa atthu.​—aRom. 4:7, 8.

14. Ninrowa olipa sai vaavo vanuupuwelela ahu moota Yehova sinilevelela awe? Nvahe ntakiheryo.

¹⁴ Hiyo ninnilipa vaavo vanuupuwelela ahu moota Yehova sinilevelela awe. Muthokorerye ntakiheryo nla. Iyaakha sivinre khalai, murokora onkela ahu onvaha nsina na Ilan, ootoko okumihiwa mmulokoni. Nuuvira iyaakha, nto owo aahittikiheriwa. Ilan onihimya so: “Nnaamwi kaaleeliwa, nave-tho miyo kaalavula wira Yehova ookilevelela, khula okathi, kuupuwela wira atthu akina tarina wataana wooloka ni Yehova okivikana miyo”. Hata vari siiso, Ilan aahilipiheya mwaha wootokosa masu a mBiibiliyani anilavula sa olevelela wa Yehova. Ilan onihimya so: “Kooweha wira Yehova onnikiphenta ni okimorela ikharari, tthiri khalai nkaasuwela”. Murokora ola aavariwe murima ni masu ala: “Okathi Yehova onilevelela awe itampi sahu, nihuupuweleke wira itampi iyo siri ni hiyo mookumini mwahu mootheene”.b Ilan onihimya so: “Miyo kuupuwela wira Yehova khaarowa okilevelela, koona wira itampi iyo kinrowa okhalanaka okathi wotheene. Koosuwela wira ohaana ovira okathi kihiliyanle yoottheka ele, masi vano koopacerya woonaka wira kinoowerya tthiri wataana ni Yehova, ni kinoona wira muritti waarina aka woovukuwa”. Tthiri, Muluku onimurumeela ahu toolevelela!​—Esal. 103:9.

MUTAKIHE OLEVELELA WA YEHOVA

15. Ninrowa otakiha sai olevelela wa Yehova?

¹⁵ Hiyo pooti otakiha olevelela wa Yehova naalevelelaka akhwiihu okathi onireerela aya. (Mmusome Luka 17:3, 4.) Muupuweleke wira okathi Yehova onilevelela awe, owo onniliyala itampi iyo nto owo khonnupuxerya-tho. Okathi nnaalevelela ahu akina nihaana oliyalaka mwaha owo, ni ohilavula-tho mwaha owo.

16. (a) Niireke okhala oolevelela ontaphulela ohoona owereya oveehiwa, wala oweemya akina wira enipuherye? Mutthokiherye. (b) Wira nileveleliwe ni Muluku nihaana opaka exeeni?

¹⁶ Okhala oolevelela khontaphulela osiveliwa oveehiwa, wala waahiya akina enipuheryaka. Nnaari. Masi eyo entaphulela omananiha ohicalela ele yiireliwa ahu. Vanceenexa, wira nileveleliwe ni Muluku, nihaana otakihaka olevelela wa Yehova mmoota onaakhapelela ahu akina. (Math. 6:14, 15) Nto, othunku Yehova orina awe onnimwiiriha ohiliyala wira hiyo na ‘ntthupi pahi’. (Esal. 103:14) Tthiri, okhalana othunku, onooniiriha olevelela soottheka sa atthu akina, naalevelelaka moomalela!​—aÉf. 4:32; aKol. 3:13.

17. Nipakeke exeeni akhala wira muKristau mukhwiihu ooniveeha?

¹⁷ Ekeekhai wira khivanikhweya olevelela. Hata maKristau oowoottihiwa wala oothanliwa a eseekulu yoopacerya, yanoona ovila olokiherya ohiiwanana waya. (aFil. 4:2) Akhala wira muKristau mukhwiihu ooniveeha, exeeni enrowa onikhaliherya? Moone ntakiheryo na Yobi. Owo aahinyoonyihiwa vanceene ni ‘apatthani’ awe, Elifazi, Bildadi, ni Sofari mwaha womootherya Yobi. (Yobi 10:1; 19:2) Muhoolo mwaya, Yehova aahaapwapwela ale yaamootherya Yobi. Muluku aahimuleela Yobi wira ahaana waapaherya mukuttho anamattheka ale. (Yobi 42:7-9) Masi Yehova aahinvekela Yobi opaka etthu. Exeeni aavekeliwa awe? Yehova aahimulakiherya wira Yobi aavekelele ale yaanveeha ni omootherya. Yobi aahipaka ele Yehova anvekenle awe, nto Yehova aahimureeliha mwaha wa olevelela wawe. (Mmusome Yobi 42:10, 12, 16, 17.) Ela enniixuttiha exeeni? Akhala wira nnimwaavekelela ale aniveehale, eyo enoonikhaliherya ohitthikiherya yoonanara.

NVIKANIHEKE OVAHA EFAITA MIKHALELO SOOLOKA SA YEHOVA

18, 19. Ninrowa ovikaniha sai wunnuuherya ovaha efaita mikhalelo sooreera sa Yehova?

¹⁸ Tthiri nihoona oreera othokorerya mikhalelo sinceene sa Yehova sinooniherya ophenta wawe. Nooweha wira owo, toopatthaneya, khanaathanla atthu, toovaha, tooreera murima, toororomeleya ni toolevelela. Masi, othokorerya wahu nirolawiha paahi. Nto vanrowa oreera othokorerya mikhalelo sa Yehova nikhalaka ni okumi woohimala. (Mus. 3:11) Ninneemererya masu a Paulo, aalempe awe ariki: ‘Vekekhai, othajiri wa Muluku n’ankhili awe n’usuwela wawe ti wulupale. Hiyo khaniwerya otaphulela mupuwelo awe, nnákhala osuwela iphiro sawe’.​—aRom. 11:33.

¹⁹ Nto otheene ahu, nivikaniheke wunnuuherya ovaha efaita mikhalelo sooreera sa Yehova. Nnoowerya opaka eyo, orweela mwa wiixutta mikhalelo iyo, wuupuwelela, ni otakihaka mookumini mwahu. Akhala wira nnoopaka eyo, moohaaniherya ninrowa olikanaka ni nasalimo ipale ariki: ‘oreriwa waka owattamelani’ nyuwo Yehova.​—Esal. 73:28.

[Inoota]

[Elatarato epaaxina 17]

[Elatarato epaaxina 19]

‘Ohavo mpatthani a ekekhai onivahererya’ onvikana munna ooyaraniwa.​—Mir. 18:24 (Moone ettima 7)

‘Mulevelelaneke’ moomalela.​—aÉf. 4:32 (Moone ettima 16)

[Elatarato epaaxina 21]

Mavekelo ahu a olevelela, ekhaleke a murima wotheene (Moone ettima 17)