MURUU WA NAMILOKO MIILI NI MMOSA
Yootthuna ya Yehova Enniphwanya Ovuwa Wuulupale
1, 2. (a) Tiivi ekhanle yootthuna ya Yehova voohimya sa soopattuxiwa sawe sirina ankhili? (b) Tanii yiirela mpantta wa emusi yowiiraana ya anamakokhorela a Muluku?
YOOTTHUNA ya Yehova yeeyo enooniherya ophenta ti yoowi soopattuxiwa sotheene sirina ankhili sikhalee sowiiraana mu omukokhorela Muluku mmosaa paahi eekeekhai ni sikhalane otaphuwa wuulupale ntoko anamwane a Muluku. Nave-tho ela ti etthu eniphavela aya ale tthiri aniphenta exariya.
2 Yehova aahipacerya waakhwaniherya yootthuna awe ela yuulupale okathi vaapacenrye awe opattuxa itthu. Ampacenrye awe ompattuxa aari Mwanawe, yoowo okhuma okathi wa ohihimuwa wawe ‘okhanle warya w’ovuwa wa Muluku n’iruku ya makhalelo awe’. (aHéberi 1:1-3) Mwaana ola aari a vameekh’awe, mwaha woowi Muluku ampanke mekhawe paahi. Moottharelana, itthu sikina sotheene saarowa opattuxiwa orweela mwa Mwaana ola: wanipacerya malaikha a wirimu, moottharelana apinaatamu valaponi. (Yobi 38:7; Luka 3:38) Itthu iya sotheene siniirela mpantta emusi emosaa ya olumwenku wotheene. Otheene aya, Yehova taari Muluku aya, Mwene aya a Olumwenku Wotheene, ni Tiithi aya oophenta.
3. (a) Exeeni otheene ahu eranve ahu wa axitiithi ihu oopacerya? (b) Marehereryo xeeni anooniherya ophenta yaawo Yehova aapakenle awe anamwane a Adamu?
3 Vaavo axitiithi ihu oopacerya yaalamuliwa aya okhwa mwaha woottheka moolakelela, awo yaahoomoliwa wEedeni, ni Muluku aahaakhootta. Nto, awo khiyiirela-tho mpantta wa emusi awe ya olumwenku wotheene. (Maphattuwelo 3:22-24; Otumererya 32:4, 5) Otheene ahu nrii anamwane a Adamu, tivonto niyariwe ahu oottheka. Masi Yehova aahisuwela wira anamwane akina a Adamu ni Eva yaarowa ophentaka exariya. Siiso, moophenta Yehova aahipaka marehereryo wira anamwane a Adamu ni Eva, aphwanye “otaphuwa n’uvuwa w’àna a Muluku”.—aRoma 8:20, 21.
AnaIsarayeli Anniyeleela Oreeriwa Waya
4. Eparakha xeeni Yehova aavanha awe anaIsarayeli a khalai?
4 Iyaakha 2.500 nuumala opattuxiwa Adamu, Yehova aahaavaha apinaatamu akina eparakha ya okhalana wataana wa vameekh’aya n’Uwo. Yehova aahithanla nloko na khalai na anaIsarayeli wira akhalee atthu awe ni aahaavaha Nlamulo nawe. (Maphattuwelo 12:1, 2) Owo aahaapaka okhala nloko ni aahaavarihela muteko moovarihana ni yootthuna awe. (Otumererya 14:1, 2; Yesaya 43:1) Masi, awo nlelo yaari epottha ya yoottheka ni okhwa, tivonto khiyaarina otaphuwa wuulupale ntoko Adamu ni Eva saarina aya ahinatthi ottheka.
5. AnaIsarayeli yaayelenle sai wataana wa vameekh’aya waarina aya ni Muluku?
5 Nto, anaIsarayeli yaari atthu ooweemereriwa ohoolo wa Muluku. Nave-tho, awo yaahikhalana muritti wa omuttittimiha Yehova ntoko Tiithi aya ni opaka itthu moovarihana ni yootthuna awe. Ti maana aya, Yesu aattittimihenrye awe otthuneya waya waakhwaniherya yoovekela eyo. (Matheyo 5:43-48) Hataa vaari siiso, nloko na anaIsarayeli nahooceela opaka ela. Nnaamwi aYuda ale yaahimya wira “hiyo nrina tith’ihu mmosá pahi: Muluku!”, Yesu aahaaleela wira soovara saya ni munepa wooniherya aya saanivaanyiha moolumo aya. (Yohani 8:41, 44, 47) Mwaakha wa 33 E.C., Muluku aahimaliha Nlamulo, nto wataana wa vameekh’aya wa anaIsarayeli ni Muluku waahimala. Masi niireke wi ela yaataphulela wira apinaatamu khiyaawerya-tho okhalana wataana wooloka ni Muluku?
Othukumanyiwa wa “Itthu Sothene Siri Wirimu”
6. ‘Othukumanyiwa’ Paulo onihimya awe ori mu aÉfeso 1:9, 10, orina yoophavela xeeni?
6 Murummwa Paulo aahooniherya wira atthu akina eriyari ya apinaatamu yaarowa okhalana wataana wa vameekh’aya ni Muluku. Mwa ntakiheryo, voohimya sa murehereryo wa Yehova orweela mwa yoowo ale anaamini oniwerya aya okhala atthu a vatthokoni va Yehova, Paulo aalempe so: “[Muluku] ònsuweliha mirirya s’otthuna wawe, ntoko khalai supuwenlyawe opaka mwa Kristu, n’urera wawe murima. Mirirya sene t’iya: wamalelá okathi othanliwe, Muluku onothukumanya momweneni omosaru mwa Kristu itthu sothene siri wirimu n’iye siri vathí-va”. (aÉfeso 1:9, 10) ‘Othukumanyiwa’ nno onlipa mwa Yesu Kristu. Orweela mwa Yesu, apinaatamu annikhalana mukhalelo woweemereriwa ohoolo wa Muluku. Atthu ookontareya aakhalana yoolipelela ya orowa wirimu. Nummuru nuulupale na atthu oohikontareya anrowa okhalaka valaponi mahiku otheene.
7. Tanii aniirela mpantta wa “itthu sothene siri wirimu”?
7 Okhuma Pentekoositi 33 E.C., saahipacerya othukumanyiwa “itthu sothene siri wirimu”, eyo piiyo, ale yaarowa olamulela ni Kristu Momweneni wa wirimu. Orweela mwa waamini waya esisapo ya mukuttho wa Yesu, awo yaahihimmwa okhala axariya ohoolo wa Muluku. (aRoma 5:1, 2) Mu okathi aya, aYuda ni Amalapo yaahiheliwa muhina, ni “itthu sothene siri wirimu” saarowa okhala 144.000 nummuru naya. (aGalasia 3:26-29; Wisupulula 14:1) Paahi oohalela a atthu awo nlelo ari valaponi.
Othukumanyiwa wa Itthu “Siri Vathí-va”
8. Tanii ari itthu “siri vathí-va”, ni wataana xeeni orina aya ni Yehova?
8 Moolikanasa onnipakiwa-tho othukumanyiwa wa itthu “siri vathí-va”. Imilyau sinceene sa atthu sinnithukumanyiwa vano wira sikhalane yoolipelela ya okhala moohimala valaponi. Mowiiraana ni ale oohalela anrowa olamulelaka mu Omwene owo, awo annivuwiha nsina na Yehova ni wunnuwiha okokhorela wawe. (Yesaya 2:2, 3; Sofoniya 3:9) Nave-tho, awo annimwiihana Yehova okhala “Tithi” mwaha woowi annisuwelexa wira owo ti maphattuwelo a okumi. Atthu awo aakhalana weemereriwa ohoolo wa Muluku orweela mwa waamini waya ephomee eyiihiwe ya Yesu. (Wisupulula 7:9, 14) Masi okhala wira nlelo arii atthu oottheka, paahi muhoolo tanrowa aya ohimmwa okhala tthiri anamwane a Muluku.
9. Natiri xeeni onileiheriwa apinaatamu ori mu aRoma 8:21?
9 Atthu ala arina yoolipelela ya okhala valaponi, vano anniwehererya vanceene okathi yoowo apinaatamu otheene vanrowa aya “wòpoliwa mwakhalihiwaya ipottha”. (aRoma 8:21) Otaphuliwa iwo onrowa opacerya nuumala Kristu ni anakhotto awe a wirimu omaliha maxakha maalupale orweela mwa Harmagedoni. Ela enrowa otaphulela opwetexiwa wa itthu sotheene sootakhala sa mukhalelo ola wa Satana, seiyo sinrowa otthareliwa ni mareeliho a Omwene wa Kristu mu Olamulelo awe wa Iyaakha Ekonto Emosaa.—Wisupulula 19:17-21; 20:6.
10. Nsipo xeeni na ovuwiha ninrowa aya wiipa arumeyi a Yehova?
10 Ohakalala xeeni onrowa okhala vaavo arumeyi a Yehova ari valaponi mowiiraana vanrowa aya ohimya masuu yaawo alavuliwe moohakalala ni arumeyi ari wirimu wira: “Apwiya, Muluku òwerya sothene, miteko sanyu ti sulupale ni sotikiniha! Nyuwo mwené àtthu othene, iphiro sanyu ti sa xariya ni s’ekekhai. T’ani ohinrowa owovani, Apwiya? T’ani ohinrowa olaleya wunnuwa wanyu? Tthiri nyuwo pahi muri òrera murima. Atthu a maloko othene animorwa wokokhorelani, okhala wira miteko sanyu sa xariya sosuwelihiwa”. (Wisupulula 15:3, 4) Aayo, arumeyi otheene a Yehova anrowa wiiraana mu omukokhorela Muluku mmosaa paahi eekeekhai. Hataa alipa-ookhwa anrowa ohihimuxiwa wira akhalane eparakha ya onvuwiha Yehova.—Miteko s’Arummwa 24:15.
Otaphuwa Woohakalaliha Muhoolo
11. Otaphuwa xeeni woohakalaliha onrowa okhalana ale anrowa woopowa mmaxakha maalupale?
11 Nuumala maxakha maalupale anrowa omala mu Harmagedoni omala-maliha otakhala valaponi, Satana Diabo khonrowa-tho okhala “muluku a vathí-va”. Anamakokhorela a Yehova khanrowa-tho owanana ni soohapuwela sootakhala sa Satana. (2 aKorinto 4:4; Wisupulula 20:1, 2) Itiini soowoka khasinrowa-tho omunyoholiha Yehova nnakhala waavalaanya apinaatamu. Arumeyi a Muluku eekeekhai khanrowa-tho weettihiwaka moohixariya ni ohasuliwa ni makhulupale oopinaatamu. Tthiri atthu awo anrowa okhalana otaphuwa woohakalaliha!
12. Moota xeeni atthu otheene sinrowa aya otaphuliwa mu yoottheka ni sookumiherya saya?
12 Ntoko “Mwapwittipwitthi a Muluku, onttipiha yottheka y’elapo”, Yesu onrowa ovarihela muteko esisapo ya mukuttho awe wira ottipihe soottheka sa apinaatamu. (Yohani 1:29) Okathi Yesu vaary’awe valaponi ni onalevelela soottheka sa atthu, owo aahooniherya olevelela iwo aavonihaka iretta saya. (Matheyo 9:1-7; 15:30, 31) Moolikanasa, Kristu Yesu, Mwene a Omwene wa wirimu wa Muluku, onrowa waavoniha mootikiniha ale ahinoona, ahinlavula, ahiniiwa, oorakala, ooxankiheya muupuwelo, ni ale aniwereiwa iretta sikina. (Wisupulula 21:3, 4) Oowiiwelela otheene anrowa otaphuliwa mu “ikano s’etampi”, nto sowuupuwela saya ni sowiira saya sinrowa okhala soohakalaliha wa awo aneene ni wa Muluku. (aRoma 7:21-23) Wanikisa wa Iyaakha Ekonto Emosaa, atthu awo anrowa okhalihiwa oomalela, ni anrowa okhalana ‘omutthu onlattana’ ni Muluku mmosaa paahi eekeekhai.—Maphattuwelo 1:26.
13. Wanikisa wa Olamulelo wa Iyaakha Ekonto Emosaa, etthu xeeni Kristu onrowa awe opaka, ni yookhumelela xeeni?
13 Nuumala Kristu owiiriha apinaatamu okhala oomalela, owo onrowa omuttikiherya Tiithi awe owerya waavahiwe awe mmuteko ola. “Kristu onimwapwetexa makhulupale othene n’ikuru sothene n’uwerya wothene; numalá, ononvahererya Muluku Tithi omwene awe. Vekekhai Kristu ohana okhala mwené, mpakha Muluku wapweha awanani othene vathí va inawu sawe”. (1 aKorinto 15:24, 25) Olamulelo wa Omwene wa Iyaakha Ekonto Emosaa onrowa nto waakhwaniherya oratteene yootthuna awe; siiso khivanrowa-tho otthuneya eguvernu ekina wira yaakhaliheryeke atthu okhalana wataana ni Yehova. Nto okhala wira yoottheka ni okhwa sinrowa omala-malihiwa ni apinaatamu anrowa woopoliwa, khivanrowa otthuneya Yesu okhala Moopoli. Biibiliya onilakiherya wira: “Vano Kristu yowo, Mwana a Muluku, onomurumela Tithi awe, onvaherenrye sothene. Siso Muluku onomaliherya oruma sothene”.—1 aKorinto 15:28.
14. Exeeni enrowa owiiraneela apinaatamu oomalela, ni nthowa xeeni?
14 Nuumala vo, apinaatamu oomalela anrowa ovahiwa eparakha wira yooniherye olakela waya omurumeela Muluku mmosaa paahi eekeekhai mahiku otheene. Vanonto, ohinatthi waakhaliha ntoko anaawe, Yehova onrowa owiiriha apinaatamu otheene oomalela ovira va yoweeha yookiserya. Satana ni axetwani awe anrowa okumihiwa munlittini nowiixa. Nto khivanrowa weemereriwa wira aahaaxe mu okathi munceene ale animphenta tthiri Yehova. Masi otheene yaale moolakelela anrowa weemererya ohapuxiwa wira ahimwiiwelele Yehova, anrowa opwetexiwa, vamosaa ni namavirikanya oopacerya ori Satana ni axetwani awe.—Wisupulula 20:7-10.
15. Mukhalelo xeeni onrowa-tho okhala eriyari ya soopattuxiwa sotheene sa Yehova sirina ankhili?
15 Nto Yehova onrowa owiiriha okhala anaawe apinaatamu otheene oomalela yaawo akhalihenrye olamulelo wa Muluku okathi wa yoweeha yookiserya. Okhuma okathi owo orowa ohoolo, awo anrowa okhalana otaphuwa woohakalaliha wa anamwane a Muluku ntoko mpantta wa emusi ya olumwenku wotheene ya Muluku. Soopattuxiwa sotheene sirina ankhili sa wirimu ni sa valaponi sinrowa-tho okhala sowiiraana mu omukokhorela Yehova ntoko Muluku mmosaa paahi eekeekhai. Nto yootthuna ya Yehova enrowa ophwanya ovuwa wuulupale! Niireke wira nyuwo munniphavela wiirela mpantta wa emusi yoohakalala ya elapo yotheene, yeeyo enrowa okhala moohimala? Akhala wira ti siiso, ninnootumereryani wira mwiiwelele ele enihimya Biibiliya mu 1 Yohani 2:17 wira: “Makhalelo ala anomala vamosá n’itthu simphavelexaya: nto ole onettela otthuna wa Muluku onokhala mahiku othene”.
Makoho Oowuuluula
• Ahinatthi omurukunuwela Muluku wEedeni, wataana xeeni waarina aya anamakokhorela otheene a Yehova n’uwo?
• Muritti xeeni orina aya ale animurumeela Muluku?
• Tanii nlelo anrowa okhala anamwane a Muluku, ni moota xeeni ela enivarihana aya ni yootthuna ya Yehova voohimya sa okokhorela wowiiraana?
[Elatarato eri epaaxina 190]
Apinaatamu oowiiwelela anrowa okhalana okumi mparayiisu valaponi