Moota Wookhalana Etthoko Yoohakalala—Mpantta 2

Anamwane yoovaha ya Yehova. Nave oniphavela wira anamuyari yaakhapeleleke oratteene anaaya. Yehova onnaavaha anamuyari malakiheryo ooloka anaakhaliherya waakhapelela ni waalakiherya anaaya. Nave malakiheryo a Muluku annaakhaliherya anamwane wuncererya ohakalala wa etthoko ya anamuyari aya.

1. Malakiheryo xeeni Yehova onaavaha awe anamuyari?

Yehova oniphavela wira anamuyari yaaphenteke anaaya ni aviriheke okathi munceene ari ene naawo. Nave oniphavela wira anamuyari yaakhapeleleke anaaya ni awiixuttiheke arumeelaka malakiheryo ari mBiibiliyani. (Miruku 1:8) Tivonto Yehova onaaleela awe anamuyari wira: “Mwaahuweke [aniinyu] ni owiixuttiha muttharaka malakiheryo a Yehova”. (Mmusome aEefeso 6:4) Yehova onnihakalala vanceene okathi anamuyari aniiwelela aya malakiheryo ala aavanhe awe. Nave onnihakalala okathi anamuyari anaahuwa aya anaaya, maana Yehova khoniphavela wira anaaya ahuuweke ni atthu akina.

2. Malakiheryo xeeni Yehova onaavaha awe anamwane?

Yehova onnaaleela anamwane wira: “Nwiiweleleke apapinyu ni amaminyu mwa sotheene”. (Mmusome aKolosi 3:20.) Okathi anamwane aniwiiwelela aya ni waattittimiha anamuyari aya, awo annimuhakalaliha vanceene Yehova ni anamuyari aya. (Miruku 23:22-25) Yesu oovaha ntakiheryo nooloka okathi aari awe mwaana. Owo khaarina etampi, masi hata vaari siiso, aaniwiiwelela ni waattittimiha anamuyari awe nnaamwi yaari atthu oottheka.—Luka 2:51, 52.

3. Imusi sinrowa olipiha sai ompatthani aya ni Muluku?

Akhala wira mwa paapa wala maama, moohaanyiherya muniphavela wira aniinyu amphenteke Yehova ntoko nyuwo munimphenta anyu. Munrowa owerya sai waakhaliherya aniinyu opaka eyo? Muhaana opaka ele Biibiliya onihimya awe oriki: “Mwalakiheryeke [nuulumo na Yehova] an’inyu. Nwixuttihe mukilathiki owannyu walá mwettaka mukwaha”. (Otumererya 6:7) Nuulumo noowi “mwaalakiheryeke” nintaphulela owiixuttiha ikwaha sinceene. Woonasa wene, nyuwo munnisuwela wira para aniinyu ohela mmuru etthu wala otekorari, muhaana owiixuttiha ikwaha sinceene. Nto, yoolepa ela eniphavela ohimya wira muhaana ophavela okathi wira nwiixuttihe aniinyu omusuwela oratteene Yehova. Etthu enrowa wookhaliheryani, ophavela okathi khula esumana wira mmulompeke Yehova vatthokoni vanyu. Akhala wira khamurina anamwane, muhaana ophavela okathi khula esumana wira mmusomeke Biibiliya.

MWIIXUTTE ITTHU SIKINA

4. Nwiixuttiheke aniinyu moophenta

Vannixankiha vanceene owiixuttiha anamwane. Biibiliya onrowa wookhaliheryani sai owiixuttiha aniinyu? Mmusome Yakobo 1:19, 20, nuumala-vo mwaakhule makoho anittharelana:

• Anamuyari anrowa wooniherya sai wira annaaphenta anaaya okathi anilavulana aya?

• Xeeni vahinreerela aya paapa aahiiso maama waattaruxa anaawe onanariwe ene?a

5. Mwaakhapeleleke aniinyu

Wira mwaakhapelele aniinyu, ti vooloka ovaanela ni aniinyu myaha sa orupihana hata vahoosivelakani olavula myaha ntoko iyo. Nwehe EVIIDIYU, nuumala-vo mwaakhule makoho.

EVIIDIYU: Nwaakiherye Aniinyu Itthu Sootakhala (2:58)

• Xeeni anamuyari onaaxankiha aya olavula ni anaaya myaha sa orupihana?

• Anamuyari akina yaawenrye sai olavula ni anaaya myaha sa orupihana?

Ntoko Biibiliya aahimmye awe, olumwenku ola wa Satana onootepa otakhala. Mmusome 2 Timootheyo 3:1, 13, nuumala-vo mwaakhule nikoho:

• Eversiikulu 13 ennaahimya atthu akina ootakhala. Nave ninnisuwela wira atthu akina annaarupiha anamwane. Okhala wira eyo enniiraneya, xeeni vari aya vooloka anamuyari ovaanela ni anaaya myaha sa orupihana ni owiixuttiha moota wookhootta akhala wira ookhala oniphavela waarupiha?

Niireke mwaanisuwela?

Anamoona a Yehova aapaka iliivuru ni iviidiyu sinceene sinaakhaliherya anamuyari ovaanela ni anaaya myaha sa orupihana ni owiixuttiha moota wookhootta akhala wira ookhala mutthu oniphavela waarupiha. Nwehe matakiheryo vakhaani:

• Mwaakhapeleleke Aniinyu (eviidiyu)

• Mwiixuttihi Muulupale, muru 10 ni 32

• “Moota Woovaanela ni Aniinyu Voohimya sa Orupihana” (Nvenye!, N.^o 5 2016)

6. Mwaattittimiheke apapinyu ni amaminyu

EVIIDIYU: Kinrowa Owerya Sai Ovaanela ni Anamuyari Aka? (2:19)

• Xeeni amiravo anireerela aya wiimananiha ovaanela ni anamuyari aya?

• Amiravo anrowa owerya sai ovaanela ni anamuyari aya mwa nttittimiho?

Musome Miruku 1:8, nuumala-vo mwaakhule nikoho ninttharelana:

• Amiravo yooneleke sai okathi anamuyari aya anaaleela aya etthu yoopaka?

7. Mmulompeke Muluku vatthokoni vanyu

Itthoko sa Anamoona a Yehova sinniphavela okathi khula esumana wira amusome Biibiliya, eyo eniihaniwa omulompa Muluku vatthokoni. Nto omulompa Muluku vatthokoni onipakiwa sai? Nwehe EVIIDIYU, nuumala-vo mwaakhule makoho.

EVIIDIYU: Omulompa Muluku Vatthokoni—Mixankiho ni Mareeliho (8:04)

• Munrowa opaka sai eprokrama ya omulompa Muluku vatthokoni?

• Anamuyari anrowa omulompa sai Muluku vatthokoni mwa enamuna yoohakalaliha ni enaakhaliherya anaaya?—Nwehe efootu eri wanipacerya wa yoosoma ela.

• Etthu xeeni yaarowa wooxankihani omulompa Muluku vatthokoni vanyu?

Yehova aahaaruma aisarayeli ovaanela vatthokoni vaya voohimya sa Soolempwa. Mmusome Otumererya 6:6, 7, nuumala-vo mwaakhule nikoho ninttharelana:

• Munrowa weettela sai malakiheryo ala?

Malakiheryo a omulompa Muluku vatthokoni:

• Olokiherya mithukumano sa mmulokoni.

• Osoma ni othokorerya sowiiraneya sa mBiibiliyani.

• Mwaarina ene anamwane, mbaxari ni mwimpirimiri isersisio sa anamwane sa mBiibiliyani siri esaiti jw.org.

• Mwaarina ene amiravo, nvaaneleke myaha sa amiravo siri esaiti jw.org.

• Mpakeke idrama sa mBiibiliyani ni aniinyu.

• Nweheke ni othokorerya iviidiyu siri esaiti jw.org.

IPONTO SUULUPALE

Yehova oniphavela wira anamuyari yaaphenteke, awiixuttiheke ni yaakhapeleleke anaaya. Anamwane ahaana waattittimiha ni owiiwelela anamuyari aya. Atthu otheene vatthokoni ahaana omulompa Muluku vatthokoni.

Wuuluula

• Anamuyari anrowa owiixuttiha ni waakhapelela sai anaaya?

• Anamwane anrowa wooniherya sai wira annaattittimiha anamuyari aya?

• Xeeni vari aya vooloka omulompa Muluku vatthokoni khula esumana?

NWEHE ITTHU SIKINA

Itthu xeeni munireerela anyu owiixuttiha aniinyu sinrowa waakhaliherya yannuwa vale?

“Itthu 6 Munireerela Anyu Owiixuttiha Aniinyu” (Nvenye! N^o. 2 2019)

Nwehe malakiheryo a mBiibiliyani anrowa wookhaliheryani waakhapelela anamuyari oowuuluvala.

“Biibiliya Onihimya Exeeni sa Waakhapelela Anamuyari Oowuuluvala?” (Mwaha ori va jw.org)

Nwehe etthu yaamukhalihenrye paapa mmosa waahuwa anaawe, nnaamwi wanipacerya ahaasuwela waahuwa anamwane.

Yehova Ooniixuttiha Waahuwa Aniihu (5:58)

Nwehe etthu enrowa omukhaliherya paapa okhala mpatthani a anaawe.

“Paapa Onrowa Owerya Sai Okhala Mpatthani a Anaawe?” (Owehaweha, 1 a Novembro, 2011)