Mmutthapele Kristu, Mwene Ovuwihiwe!

‘Ikuru sanyu sinimwawerya n’uvuwa awanan’inyu’.​—ESAL. 45:5.

IPONTO SUULUPALE SOREERELA WUUPUWELA

Moota xeeni Yehova omukhalinha awe Yesu oovuwa waavikana akhwa awe?

Kristu onihela liini ekatana muyuununi, nto okathi xeeni opacenrye awe orumeela ekatana eyo, ni onrowa otthikela orumeela-tho silini?

Ekeekhai xeeni yuulupalexa yeeyo Yesu Kristu, Mwene oniwaniha ekhotto enrowa awe waakiherya?

1, 2. Xeeni ekapiitulo 45 ya Esalimo erya aya yootthuneya wa hiyo?

MWENE oovuwihiwa onneettiha ekhavalo orowaka owanela ekeekhai ni exariya, ni onniituperya wira aawerye awanani awe. Nuumala waawerya khuluwi awanani awe, owo onnimuthela noiva oreera. Nto onnuupuweleliwa ni otthapeliwa mahiku otheene ni atthu a nloko ti nloko. Masu amanle ahu ohimya tari muru muulupale wa Esalimo 45.

² Masi eliivuru ya Esalimo 45, khahiyo ntoko ethale wala ehantisi enimala mwa enamuna yoohakalaliha. Itthu sinihimmwa ni ekapiitulu ela ti sootthuneya wa hiyo. Sinnivareleya muteko wa hiyo olelo-va ni muhoolo. Vano nrowe nivahe ephoole wira nithokorerye saana masu a esaalimo ela.

‘MURIMA AKA WOSAREYA MOLUMO ÒTTHAPELA’

3, 4. (a) Exeeni ekhanle ‘etthu yooreera’ enivaha ahu efaita, nto eyo enivara sai murima ahu? (b) ‘Nimmwiipela sai mwene’ nave nlumi nahu ninlikana sai ni enamuna yoolepa ya mulepi ooratta?

³ Musome Esalimo 45:2. Moolumo oopacerya a yoolepa ela, Biibiliya mukina onitaphulela so: ‘Murima aka onnitthimaka mwaha woowiiwa etthu yooreera’. Nto ‘etthu yooreera’ yaavanre murima wa nasalimo ni wiiriha ‘otthimaka’, enimuhela mpuwa mwene. Nuulumo na eHeeberi nitaphuleliwe ‘murima aka onnitthimaka’ ninhimya ‘etthu enikaphula’. Etthu eyo yooreera yaahiiriha murima wa nasalimo otthimaka mwaha woohakalala nto khwiiriha nlumi nawe olikanaka ni enamuna yoolepa ya ‘mulepi òratta’.

⁴ Sai voohimya sa hiyo? Ihapari sooreera sa Omwene wa Mesiya sinnivara murima ahu mwaha wootepa oreera. Ihapari sa Omwene saahikhala ‘sooreera’ mwa vameekhaaya mwaakha wa 1914. Okhuma vaavale, ihapari sooreera khahiyo-tho sa Omwene wa muhoolo, masi ti sa Omwene okhanle vano, onilamulela wiirimu. Tthiri eyo teri ‘ihapari sooreera sa Omwene’ sinilaleya ahu ‘mulaponi mothene, wira atthu othene esuwele’. (Math. 24:14) Nto niireke murima ahu ‘onnittimaka’ mwaha wa ihapari sa Omwene? Niireke ninnikhalela nthiti olaleerya ihapari sooreera sa Omwene? Nimutakihaka nasalimo, ‘ninnimwiipela mwene nsipo’, eyo piiyo, Mwene ahu Yesu Kristu. Ninnimulaleya wira oovahiwa emwene wiirimu ntoko Mwene a Omwene wa Mesiya. Ohiya-vo, ninnaalattula anamalamulela otheene ni ale anilamuleliwa, wira yiiweleleke emwene awe. (Esal. 2:1, 2, 4-12) Tivonto, mwaha woorumeela saana Moolumo oolempwa okathi onilaleerya ahu, nlumi nahu ninlikana ni enamuna yoolepa ya ‘mulepi òratta’.

MOOLUMO OOREERA ANIKHUMA VAYANONI VA MWENE

5. (a) Enamuna xeeni Yesu aarya awe ooreera? (b) Moolumo ooreerela murima anikhuma sai vayanoni va Mwene, nto ninrowa omutakiha sai?

⁵ Musome Esalimo 45:3. Soolempwa khasinihimya itthu sinceene sa moota sarya aya erutthu ya Yesu. Ntoko mutthu oomalela, owo tthiri aari ooreera. Masi oreera wawe wuulupale waari mwaha wa ororomeleya wawe wa Yehova ni ohiphavela wawe omutthekela. Wuncererya-vo, Yesu aanilaleya ihapari sa Omwene orumeelaka moolumo ooreerela murima. (Luka 4:22; Yoh. 7:46) Niireke hiyo ninnimananiha otthara ntakiheryo nawe okathi onilaleerya ahu ni omananiha orumeela moolumo anivara murima?​—aKol. 4:6.

6. Muluku omurelinhe sai Yesu wa mahiku otheene?

⁶ Mwaha wa Yesu onvarela wawe muteko Muluku ni murima wotheene, Yehova aahimureeliha okathi aalaleya awe valaponi, ni aahimutthuvela nuumala ovahererya erutthu awe ntoko mukuttho. Murummwa Paulo aalempe so: ‘Yesu ahìyeviha, aikhalihaka òwìwelela mpakha okhwa, okhwa wene va mwirini wa nihaaxeryo. Tivó, Muluku ònvuwiha vanjene, khunvaha nsina novikana masina othene, wira sothene sikokhorele nsina nawe, iye siri wirimu n’iyo siri mulaponi n’iyo siri mowixani, ni wira atthu othene elaleye wira: Yesu Kristu ti Pwiya, ni siso envuwihe Muluku Tithi’. (aFil. 2:8-11) Nto Yehova omureeliha Yesu wa mahiku otheene, mwaha woomuhihimuxa ni onvaha ekumi ehinikhwa-tho.​—aRom. 6:9.

MWENE ONNIKHALIHIWA MUULUPALE WAAVIKANA AKHWA AWE

7. Muluku omuthanla wawe Yesu ntoko mwene ovirikanne sai ni mamwene makina?

⁷ Musome Esalimo 45:7, 8. Okhala wira Yesu onniphenta vaalupale exariya ni onninyokha khuta etthu enimuramusa Tiithi awe, Yehova oomuthanla okhala Mwene a Omwene wa Mesiya. Yesu ‘ahittikittheliwa makura òwarya’, vowaavikana mamwene makina, eyo piiyo, mamwene oYuda emusi ya Davidi. Mwaha wa xeeni? Mwaha wa etthu emosa, Yesu aathanliwe ni mwaneene Yehova. Ohiya-vo, Yehova aahimoottiha makhura Yesu wira okhale Mwene ni Muulupale Aanamukuttho. (Esal. 2:2; aHéb. 5:5, 6) Wuncererya eyo, othanliwa wa Yesu ntoko mwene khiwaarumeeliwe makhura, masi munepa wootteela, tivonto omwene awe khahiyo wa valaponi masi ti wa wiirimu.

8. Xeeni ohimmwaka wira Muluku tokhanle ehice ya Yesu, nto exeeni ennikupaliha wira emwene awe ti yaxariya?

⁸ Mwaakha wa 1914 Yehova aahinvaha Mwanawe emwene ntoko Mwene Mesiya. Ekopo ya omwene awe eri ekopo ya exariya, ela enitaphulela wira momweneni mwawe, exariya ni ohipuheryana enrowa otepa waatta. Vannihimmwa wira Muluku tokhanle ehice awe, okhala wira okhulupale awe onivahiwa ni Muluku. Nihimye so, Yehova tori mathipelo a omwene awe. Tivonto, ehice ya Yesu enikhala mahiku otheene. Niireke munnoona oreera waya omurumeela Yehova, neettihiwaka ni Mwene oowerya othanliwe ni Muluku?

MWENE ONNIHELA EKATANA AWE MUYUUNUNI

9, 10. (a) Okathi xeeni Yesu onihela awe ekatana muyuununi mwawe, nto nuumala owara aarumeelale sai? (b) Kristu onrowa-tho orumeela sai ekatana awe?

⁹ Musome Esalimo 45:4. Yehova onnimuleela Mwene wira oware ekatana muyuununi mwawe, eyo enitaphulela wira Yehova onnimuruma Yesu owaniha ekhotto ni waaphukela mwa xariya otheene yaale anivaanyiha olamulelo wa Muluku. (Esal. 110:2) Okhala wira Kristu ti nakhotto ohinxinttiwa, owo onihimmwa okhala mwene ‘akuru’. Mwaakha wa 1914, taapacenrye awe ohela ekatana muyuununi mwawe, ni aahimuxintta Satana ni malaikha awe, khuwoomola wiirimu nto khumorela waattamela valaponi.​—Wis. 12:7-9.

¹⁰ Owo waari okathi woopacerya paahi wa Mwene oneettiha ekhavalo orowaka oxintta. Maana nlelo ohaana omaleliha oxintta wawe. (Wis. 6:2) Yehova ohaana waaphukela awanani awe otheene ari valaponi aneettihiwa ni Satana, ohiya-vo, Satana ni malaikha awe ahaana otthukweliwa. Etthu enrowa opacerya opwetexiwa onrowa okhala Babilonia Muulupale, olamulelo wa mulaponi wa itiini soowoka. Yehova oolakela wira anapoliitika anilamulela ampwetexe ‘muthiyana namararuwa’ ola ootakhalexa. (Wis. 17:16, 17) Nuumala-vo Mwene oniwaniha ekhotto onrowa omala-maliha ohikhale-tho olamulelo wa Satana wa ipoliitika sa mulaponi. Nto Kristu yoowo oniitthaniwa-tho nlaikha na nlitti ‘nowixa’, onrowa omaleliha oxintta wawe, omurihelaka mulittini mowiixa-mo Satana ni malaikha awe. (Wis. 9:1, 11; 20:1-3) Nrowe niwehe moota soowiireya iyo sookuxa murima saahimmwale aya vahinatthi ni Esalimo 45.

MWENE ONNEETTIHA EKHAVALO OROWAKA OWANELA EKEEKHAI

11. Kristu ‘oniwanela sai ekeekhai’?

¹¹ Musome Esalimo 45:5. Mwene ola oniwaniha ekhotto, khoniwana mwaha woophavela okuxa ilapo ni waalamulela atthu awo anaawerya awe. Owo onniwana ekhotto ya xariya orineene yoolakela yuulupale. Aayo, oniwanela ‘ekeekhai’, wiiyeviha ni ‘exariya’. Ekeekhai yuulupale enivekela waakiheriwa ti olamulelo wa Yehova wa olumwenku wotheene. Okathi Satana ammwarenle awe Yehova, aahivaanyiha ophwanelela wawe okhala namalamulela. Okhuma okathi yoole, onnoonaneya ovaanyiha wa malaikha ootakhala, vamosa ni apinaatamu. Vano woophiya okathi wa Mwene oothanliwa ni Yehova wira owele ekhavalo nto ekwaha emosa paahi ni voohitthikela-tho ooniherye ekeekhai yoowi Yehova onniphwanela tthiri olamulela.

12. Mwene oniwanela sai wiiyeviha?

¹² Mwene onniwela-tho ekhavalo wira awanele ‘wiiyeviha’. Ntoko Mwaana mmoseene a Muluku, owo oovaha ntakiheryo na wiiyeviha wuulupale ni wiiwelela wawe olamulelo wa Tiithi awe. (Yes. 50:4, 5; Yoh. 5:19) Ntoko atthu oororomeleya anilamuleliwa ni Mwene, nihaana otthara ntakiheryo nawe na wiiyeviha niiwelelaka mwa itthu sotheene olamulelo wa Yehova. Ale aniiwelela paahi, tanrowa weemereriwa okhala elapo esya enilaiheriwa ni Muluku.​—Zak. 14:16, 17.

13. Kristu oniwanela sai ‘exariya’?

¹³ Nave-tho Kristu onniwela ekhavalo wira owanele ‘exariya’. Exariya Mwene eniwanela awe ti ‘exariya ya Muluku’, eyo piiyo, malamulo a Yehova voohimya sa ele eri yooloka ni yoohiloka. (aRom. 3:21; Otum. 32:4) Voohimya sa Mwene Yesu Kristu, eprofesia ya Yesaya enihimya so: “Anophiya mahiku onìrawe mwene awettiheryeke atthu awe ni exariya”. (Yes. 32:1) Olamulelo wa Yesu onrowa okumiherya ‘erimu esyá’ ni ‘elapo esyá’ elaiheriwe enrowa ‘okhala-mo exariya’. (2 Ped. 3:13) Mwa elapo eyo esya, khula mutthu onrowa ovekeliwaka weettela sooruma sa Yehova.​—Yes. 11:1-5.

MWENE ONNIPAKA ITTHU ‘SINITHAMALEYA’

14. Moota xeeni ntata noolopwana na Kristu ninrowa aya opaka itthu ‘sinithamaleya’? (Nwehe elatarato yoopacerya.)

¹⁴ Okathi oneettiha awe ekhavalo, Mwene onnihela ekatana muyuununi mwawe. (Esal. 45:5) Vano, onniphiya akathi wira Mwene okuxe ekatana awe ni ovarele muteko, orumeelaka moono woolopwana. Eprofesia ya Esalimo enihimya so: “Ntata nanyu [noolopwana] nnopaka sothamaleya”. (Esal. 45:4) Okathi Yesu Kristu oneettiha awe ekhavalo wira aaphukele atthu va Harmagedoni, owo onrowa opaka itthu ‘sothamaleya’ aapwetexaka awanani awe. Hiyo kannisuwela ekaruma ene enrowa awe orumeela wira opwetexe olamulelo wa Satana. Masi owana wawe onimwiirima woova mirima sa atthu a avalaponi yaale ahiniiwa yoolopola yoowi amwiiweleleke Mweene onilamulela. (Musome Esalimo 2:11, 12.) Mwa eprofesia awe ya mahiku ookiserya, Yesu aahimyale wira “atthu anrowa okhala owova, elipelelaka sotakhala, sinrowa okhumelela mulaponi mothene; mana ikuru sa wirimu sinottikinyeya”. Owo ahincererya oriki: “Vano-nto atthu anrowa omona Mwana a Mutthu, arwaka mmekuni n’uwerya wulupale n’uvuwa”.​—Luka 21:26, 27.

15, 16. Ti pani anrowa wiirela mpantta wa ‘anakhotto’ animutthara Kristu okhottoni?

¹⁵ Olaleyaka sa orwa wa Mwene ni ‘owerya wulupale ni ovuwa’ wira opake maphukelo, eliivuru ya Wisupulula enihimya so: ‘Numalá, kahona erimu ehuleiyene, khukhumelela ekhavalo yottela. Nakhavalo ene onìhaniwa Òroromeleya ni Mulipaekekhai, owo onnilamula, onniwana ekhotto ni exariya. Mittitthi s’anakhotto a wirimu sanimutthara yowo, settihaka ikhavalo sottela, siwanrene ikuwo sottela, sottèttheya ni sorera. Mwano mwawe onikhuma mwalo wowitha, ni mwalo owo, onrowa wavulaliha amalapo; onrowa owettiha atthu ni ekopo ya eyuma. Onrowa owama evinyu mwehimeni y’onanariwa wa Muluku òwerya sothene’.​—Wis. 19:11, 14, 15.

¹⁶ Ti pani anrowa omutthara Kristu okhottoni ntoko ‘anakhotto’ a wiirimu wira yamukhaliherye owana? Okathi aapacenrye awe ohela ekatana muyuununi wira amoomole wiirimu Satana ni minepa sawe, Yesu aari ni ‘malaikha’ awe. (Wis. 12:7-9) Tivonto vanireerela aya ohimya wira okathi wa ekhotto ya Harmagedoni, anakhotto a Kristu anrowa okhala malaikha oowaarya. Niireke aakhala malaikha makina anrowa oheliwa mpuwa? Yesu aahaalaiherya annaawe oothanliwa oriki: ‘Ale anrowa oxintta n’uthipelela wettela miteko saka mpakha womalelani, kinimwavaha owerya weiwo kivahiwaka n’Atithi, eyo piyo, waruma atthu othene, wira ewettiheke nikopo ya yuma, yapwexakase ntoko miyapu s’oloko’. (Wis. 2:26, 27) Aayo, anakhotto a wiirimu a Kristu, anrowa okhala-tho alipa-owoottihiwa annawe Kristu, yaale yaakhenle yootthuvela aya ya wiirimu. MaKristau owoottihiwa yaale anrowa olamulela ni Kristu, anrowa okhala ni Yesu wira apake itthu ‘sinithamaleya’, okathi wowalamulela atthu ni ekopo ya yuma.

MWENE ONNIMALELIHA OXINTTA WAWE

17. (a) Enithoonyerya exeeni ekhavalo yootteela Yesu ewenle awe? (b) Ekatana ni muura wa mattheere sinithoonyerya exeeni?

¹⁷ Musome Esalimo 45:6. Mwene owenle ekhavalo yootteela, eyo enithoonyerya ekhotto yoohinanara ni ya exariya mmoonelo wa Yehova. (Wis.6:2; 19:11) Wuncererya ekatana awe Yesu ookuxa-tho mura wa nttheere. Ninsoma so: ‘Kahona ekhavalo yottela. Mulipa-òwettiha ekhavalo eyo ahikhalana mura, khuvahiwa ekhara y’ovuwa, mana ari mulipa-òxintta. Owo ahivenya wira axintteke nlelo’. Itthu iyo piili; ekatana ni muura sinithoonyerya enamuna Yesu enrowa awe orumeela wira aaphukele awanani awe.

18. Enamuna xeeni mattheere a Kristu anrowa aya okhala oothokowa?

¹⁸ Olavulaka mwa nthoonyeryo, nasalimo aahihimya vahinatthi wira ‘mathere othokolowa a Mwene’, annilukama mirima s’awanani awe’ nto ‘maloko manjene anomurumela’. Atthu anrowa okhwa ekhotto eyo, anrowa okhala anceenexa. Maana eprofesia ya Yeremiya enihimya so: “Mahiku awo, mapuro othene a mulaponi mothene, atthu anrowa wivakasiwa [ni Yehova]”. (Yer. 25:33) Eprofesia ekina enilikana ni ela enihimya so: ‘Kahona nlaikha nemenlene va nsuwani. Nlo nahakhuwelela axipalame othene yavava osulu ottaiwene, nìraka: Murwase, muthukumanele nìra nulupale na Muluku! Murwase, mukhure enama ya mamwene ni ya makhulupale ni y’anakhotto ni ya ikhavalo ni y’anakhavalo; mukhureke enama y’atthu othene, ipottha n’alipa òthapuwa, alupale n’akhani’.​—Wis. 19:17, 18.

19. Kristu onrowa ovikaniha sai omaleliha oxintta wawe?

¹⁹ Nuumala opwetexiwa olamulelo woohiloka wa Satana ori valaponi, Kristu ni waarya wawe onrowa ovikaniha oxintta. (Esal. 45:5) Onrowa omaleliha oxintta wawe okathi woomuhela Satana ni minepa sawe onlittini wowiixa-mo, okathi woorakama wa Iyaakha Ekonto Emosa sa Olamulelo Awe. (Wis. 20:2, 3) Nuumala Diabo ni minepa sawe oriheliwa olittini voohiwerya ovara etthu, atthu a valaponi anrowa otaphuwa wa miteko sa Satana wira emwiiweleleke saana Mwene aya oxinttale moovuwa. Ahinatthi woona elapo epakeyaka eparayiisu, awo anookhalana nthowa nikina noohakalala ni Mwene vamosa ni apatthani awe a wiirimu. Mwaha owo onrowa othokoreriwa ni muru onittharelana.

[Eponto yuulupale epaaxina 4]

Ninnilaleya moohakalala ihapari sooreera voohimya sa Mwene, Yesu Kristu