MWAHA WOOPACERYA | IHAPARI XEENI BIIBILIYA SIRINA AWE?
Ihapari Sooreera wa Atthu Otheene
Ohihimuwa wa Yesu waahiwiiriha awiixutti awe olaleerya moolipiherya ni mooluttuweliwa. Murummwa Paulo aaheetta orowaka wAsia Menore ni oMediteraaneo, olokiheryaka miloko ni waalipiha maKristau wira akhale oowiilipiha okathi yaakhanyereriwa aya opaka itthu soohiloka ni olupatthiwa wootakhala. Nnaamwi yaakumana mixankiho ntoko iyo, eKristau yaahivikaniha omwara-mwareleya mittetthe sinci.
Muhoolo mwaya, Paulo aahitthukweliwa. Hata vari siiso, owo aahilepa iwarakha wira olipihe ni ovahe miruku miloko sa eKristau. Nave-tho owo aahilopola voohimya sa okhumelela wuulupale wa anammwareya. Ohooleliwaka ni munepa wootteela wa Muluku, Paulo aahihimya wira saamukhumelela “miji sowopiha” seiyo saarowa “olavula [itthu] sovirikana”. Miici iyo wala anammwareya, yaamukela eriyari ya maKristau a ekeekhai ‘yahapuxaka alipa-òwamini wira yatthareke’.—Miteko 20:29, 30.
Wanikisa wa eseekulu yoopacerya, omwareya iwo waahipacerya. Mwa okathi owo, Yesu yoole aahihimuxiwe aahinvaha murummwa Yohani Wisupulula, yowooniherya ya nthoonyeryo sa itthu sa muhoolo. Ntoko murummwa Yohani aalempe awe, hata anamalupattha wala awiixuttihi owootha khiyaarowa omukhoottiherya Muluku omaleliha yoolakela awe yoopacerya wa apinaatamu ni elapo ya vathi. “Atthu a maloko othene ni a mahimo othene ni a malavulelo othene” yaarowa owiriyana ihapari sooreera voohimya sa Omwene. (Wisupulula 14:6) Nto, eparayiisu enirowa ottikiheriwa vathi-va, ni khuta mutthu oniphavela opaka yootthuna ya Muluku onoowerya okhala mparayiisu!
Niireke iyo khahiyo ‘ihapari sorera’? Akhala wira ti siiso, mwiixutte sikina voohimya sa ihapari sa Muluku wa apinaatamu moovarihana ni Biibiliya, ni moota sikhanle aya owookhaliheryani olelo ni muhoolo.
Nyuwo munoowerya omusoma Biibiliya online va www.jw.org. Mwa epaaxina eyo ya Internet, nyuwo munoowerya-tho otokosa ibroxura iya: A Bíblia—Qual É a sua Mensagem?, Ihapari Sooreera Sinikhuma wa Muluku!, eliivuru Biibiliya Oniixuttiha Exeeni Tthiri?, ni iliivuru sikina sinithokorerya nthowa naya vanitthuneya ahu omuroromelaka Biibiliya ni moota xeeni hiyo nikhanle ahu oovarihela muteko miruku saya vatthokoni ni okumi ahu. Wala pooti onvekela Namoona a Yehova wira musuwele soohimmwa sikina.
—Mwaha ola onikhuma eliivuru ya aÉfeso, aFilipi, aKolosi, Filémoni, 1 Yohani, ni Wisupulula.
[Elatarato epaaxina 7]
[Elatarato epaaxina 7]