Mphavelaseke Epooma Enrowa Anyu Okhalaka Mahiku Ootheene

1. Etthu xeeni Yesu aahimmye awe yaarowa wiiraneya oYerusalemu?

AHALAKA mahiku vakhaani wiira iiviwe, Yesu Kristu aahilavula eprofesia emosa yoowiiwanyeya, yeeyo yaarowa wiiraneya mahiku ookiserya a makhalelo a ayuda. Owo aahaalopola wiira nihiku nimosa, yanweha epooma ya oYerusalemu ‘erukureriwe ene ni anakhotto’. (Luka 21:20) Yesu aahaaleela atthareli awe wiira yaawehaka-ru anakhotto a oRoma, yaahaana otthyawa muttetthe ole moowaakuweya. Ele Yesu aahimmye awe, yaahiiraneya okathi anakhotto a aRoma yaarukurenrye aya oYerusalemu. — Luka 21:​21, 22.

2. Murummwa Paulo aaleelale exeeni makristau yaakhala oYerusalemu ni oYudeya?

² Sihalaka iyaakha vakhaani wiira anakhotto arukurerye oYerusalemu, murummwa Paulo aahilepa ekarta yoolipiha yeeyo olelo-va enisuweliwa okhala eliivuru ya aHeeberi. Mukartani-mmo, owo aahaavaha miruku makristau yaakhala oYerusalemu ni oYudeya, seiyo saarowa waakhaliherya wiilokiherya mwaha wa itthu saarowa okhumelela moohipisa. Masi etthu xeeni yaarowa okhumelela? Olavulaka voohimya sa epooma ya oYerusalemu, murummwa Paulo aahimmye so: “Khanrina epooma enikhala mahiku otheene, masi ninniphavela ni murima wotheene epooma enrowa otekiwa muhoolo”. (aHeeb. 13:14) Yerusalemu aarowa opwetexiwa. Wiira makristau ale yoopowe, yaahaana wiilokiherya wiira ahiye ipa saya ni anakoso aya.

3. Exeeni ekhanle ‘epooma erina alisenso eekeekhai’, ni exeeni enniiriha olipelelaka epooma eyo?

³ Makristau yaalakenle okhuma oYerusalemu ni oYudeya, woonasa wene, yaanilavuliwa moohiloka ni oveehiwa. Masi yoothanla ele yaahoopola ikumi saya. Nave olelo-va, ninnilavuliwa moohiloka ni oveehiwa mwaha woowi khannaaroromela apinaatamu ni khannoona wiira okhalana musurukhu aahiiso othaaciri, toniphwanyiha ovareleleya. Hiyo ninlipelela ‘epooma erina alisenso eekeekhai’, eyo piiyo, Omwene wa Muluku, yoowo onirwa.a (aHeeb. 11:10; Math. 6:33) Exeeni enniiriha opaka eyo? Maana noosuwela wiira makhalelo a olumwenku ola arina mahiku vakhaani. Mwaha ola, nnoothokorerya mikhalelo Paulo aatumerenrye awe makristau okhalana, wiira ahihiye ohela nipuro noopacerya Omwene wa Muluku, ni wiilokiherya mwaha wa itthu saarowa okhumelela muhoolo. Nave-tho, nnimwiixutta moota mikhalelo iyo sinrowa aya onikhaliherya olelo-va.

MMUROROMELEKE YEHOVA MAANA OWO KHONIKHALA-KHALA OONYANYALAKANI

4. Xeeni oYerusalemu waari aya opuro wa faita para makristau?

⁴ Makristau yaanivaha efaita yinceene epooma ele ya oYerusalemu. Muloko woopacerya wa ekristau, waapakiwe oYerusalemu mwaakha wa 33 Nuumala Kristu Orwa. Nave anna a Nikhuuru Noolamulela yaakhala weiwo. Nave-tho makristau yaahikhalana ipa ni mireerelo sinceene oYerusalemu. Masi hata vari siiso, Yesu aahaalopola atthareli awe wiira yaahaana okhuma oYerusalemu ni mittetthe sootheene sa oYudeya. — Math. 24:16.

5. Paulo aakhalihenrye sai makristau wiilokiherya mwaha wa itthu saarowa okhumelela oYerusalemu?

⁵ Paulo aaphavela wiira makristau a oYerusalemu, yiilokiherye mwaha wa itthu saarowa okhumelela muhoolo. Tivonto, owo aahaakhaliherya okhalana moonelo mmosa-ru wa Yehova voohimya sa epooma ele. Paulo aahiwuupuxerya makristau yaakhala epooma ele wiira Yehova khaathokorerya-tho okhala soowaarya itthu iya: etemplo ni mikuttho saapahiwa ni anamukuttho. (aHeeb. 8:13) Atthu anceene yaakhala oYerusalemu, yaahimukhootta Mesiya nave etemplo khiyaarina-tho efaita wiira okokhoreliweke Yehova. Tivonto, epooma ele ni etemplo, yaarowa opwetexiwa. — Luka 13:​34, 35.

6. Xeeni makristau yaapirisari aya miruku sa Paulo siri aHeeberi 13:​5, 6?

⁶ Okathi murummwa Paulo aalepenle awe ekarta aheeberi, atthu anceene, waanaasivela okhala ni oxukurya oYerusalemu. Mulipa-oolepa a oRoma aakhala okathi ole, aahihimya wiira oYerusamelu, “yaari epooma yoovuwa ni yootepa osuwelaxiwa okathi ole”. Ayuda yaakhala mittetthe soovirikana, yaanirowa khula eyaakha oYerusalemu wiira yiirele mpantta ifesta saapakiwa, seiyo siiriha epooma ele okhala yootepa otthaaciri. Mwaha waivaavo, makristau makina yaaniphwanya musurukhu. Woonasa wene, ti etthu yaamwiirinhe Paulo ohimya so: “Muhiphenteke musurukhu, masi muhakalaleke ni itthu murina anyu”. Nave owo, aahiiwuupuxerya makristau ale ovaha efaita yoolaiherya Yehova aapanke awe ohimyaka so: “Miyo nkinikhala-khala koohiyakani, nave nkinikhala-khala koonyanyalakani”. (Mmusome aHeeberi 13:​5, 6; Otum. 31:6; Esal. 118:6) Makristau yaakhala oYerusalemu ni oYudeya, yaanipirisari ororomela yoolaiherya eyo. Mwaha wa xeeni? Mwaha woowi, nuumala waakhela ekarta ele, awo yaahaana ohiya ipa saya, anakoso aya ni mireerelo saya sootheene. Nave-tho awo yaarowa opaceriha makhalelo masya a okumi opuro yahaasuwela aya, nto opaka eyo, khahiyo yaari etthu yookhweya.

7. Xeeni olelo-va ninreerela ahu wiixutta omuroromela Yehova moomalela?

⁷ Ele nniixutta ahu: Moohipisa, nnooweha apwetexiwaka makhalelo ootakhala, okathi wa “maxakha maalupale”. (Math. 24:21) Sintoko makristau a oYerusalemu, ninnipirisari okhala oowehaweha ni oowiilokiherya. (Luka 21:​34-36) Okathi wa maxakha maalupale, woonasa wene, vanrowa opirisariki ohiya mireerelo sikina aahiiso sootheene, nimuroromelaka moomalela Yehova wiira khonikhala-khala oninyanyalaka. Okhuma nenna-va, nookhalana eparakha ya wooniherya ti pani nimmuroromela ahu. Mwiikoheke so: ‘Kiireke soothanla saka ni apalano aka a muhoolo, annooniherya wiira nkiniroromela musurukhu, masi kinimuroromela Muluku yoowo onileiherya okikhapelela?’ (1 Tim. 6:17) Ntakiheryo na makristau a khalai pooti onikhaliherya ohihiya ororomeleya. Masi itthu saawiiranenle makristau ale a khalai, khasinlikana nnakhala vakhaani ni itthu sinrowa okhumelela okathi wa maxakha maalupale. Nto ninrowa osuwela sai etthu yoopaka okathi anrowa aya opacerya maxakha maalupale?

NWIIWELELEKE ALE ANOOHOOLELANI

8. Etthu xeeni Yesu aaleelale awe awiixutti awe yaareerela aya opaka?

⁸ Nuuvira iyaakha vakhaani nuumala waakhela ekarta yaalepeliwa aya aheeberi, makristau ale yaahaaweha anakhotto a oRoma arukurenrye ene oYerusalemu. Eyo yaari esinaale para makristau ale wiira atthyawe, okhala wiira epooma ele yaarowa opwetexiwa. (Math. 24:3; Luka 21:​20, 24) Masi yaarowa otthyawela woowi? Yesu aahimmye wiira: “Ale anikhala oYudeya, apaceryeke otthyawela omiyaakoni”. (Luka 21:21) Muttetthe ole, saahikhala miyaako sinceene. Nto miyaako xeeni yaarowa aya otthyawela?

9. Xeeni vaari aya vooxankiha para makristau ale osuwela opuro wootthyawela? (Nwehe maapha.)

⁹ Nrowe niwehe miyaako makristau awo yaarowa aya otthyawela, miyaako sene tiiya: miyaako sa oSamariya, sa oGalileya, mwaako Hermoni, miyaako sa oLiibano ni miyaako saakhala okhopela wa muro Yordani. (Nwehe maapha.) Mittetthe sikina sa miyaako iyo, woonasa wene, saakhala ntoko wiira ti soovareleleya. Mwa ntakiheryo, muttetthe wa oGamla, waaphwanyaneya vasulu va mwaako wootepa orakama, nave vaari vootepa oxankiha ophiya mapuro ale! Ayuda akina yaanoona muttetthe owo okhala opuro wooreerela otthyawela. Masi oGamla, yaahikhala mapuro ayuda yaawana aya ikhotto ni aRoma, nave atthu anceene yaakhala muttetthe ole yaahiiviwa.b

10-11. a) Yehova aaweettinhe sai makristau? (aHeeberi 13:​7, 17) b) Xeeni vaari aya vooloka makristau ale owiiwelela ale yaahoolela? (Nwehe eteseenyu.)

¹⁰ Vanikhala ntoko wiira Yehova aaniweettiha makristau ale aarumeelaka axitokweene yaahoolela muloko. Muhoolo mwaya, mulipa-oolepa soowiiraneya sa mulaponi oniihaniwa Eusebius, aahimmye so: “Akhaliheriwaka ni Muluku, anna ni arokora a oYerusalemu yaahaakhela malakiheryo ni alopwana yeemereriwe; awo yaahivekeliwa . . . okhuma epooma ele ehinatthi opacerya ekhotto ni orowa ophavelasa okhala muttetthe wa oPereya, oniihaniwa oPela”. Muttetthe ole, waari opuro wookhalela makristau ale yaareerela aya otthyawela. Vaari vookhweya ophiya muttetthe wa oPela okhala wiira waahikhuveela oYerusalemu. Ohiya-vo, atthu anceene yaakhala muttetthe ole yaari anamurya. Nave atthu anceene yaakhala muttetthe ole wa oPela, khahiyo yaari ayuda yaawo yaawana-wana ni anakhotto a oRoma. — Nwehe maapha.

11 Makristau yaatthyawenle omiyaakoni, yaahiitthara miruku sa Paulo sa ‘owiiwelela ale yaahoolela’ mmulokoni. (Mmusome aHeeberi 13:​7, 17.) Wiiwelela waahoopola ikumi saya! Soohiimwa, sinnooniherya wiira Muluku khaanyanyanle atthu yaale ‘yaalipelela epooma yaarina alisenso eekeekhai’, eyo piiyo, Omwene wa Muluku. — aHeeb. 11:10.

12-13. Yehova oniweettiha sai arumeyi awe okathi wooxankiha?

¹² Ele nniixutta ahu: Yehova onnaaruma ale annihoolela, wiira yaavaheke atthu awe malakiheryo ookhalela. Mbiibiliyani aakhala matakiheryo manceene anooniherya wiira Yehova aahaaruma alopwana oororomeleya, wiira aweettiheke atthu awe okathi wooxankiha. (Otum. 31:23; Esal. 77:20) Nave olelo-va, nookhalana itthu sinceene sinooniherya moota Yehova onaakhaliherya awe atthu awe aarumeelaka ale annihoolela.

¹³ Mwa ntakiheryo, okathi eretta ya Koronaviiru yaapacenrye aya, ale ‘annihoolela’ yaahinivaha malakiheryo ookhalela. Axitokweene, yaahaakhela malakiheryo, yaawo yaarowa waakhaliherya anna ni arokora olipiha waamini waya. Ohalaka okathi vakhaani wiira epacerye eretta ya Koronaviiru, naahikhalana konkresu oovara murima, yoowo nanwehale ahu nirumeelaka interneeti, aTV ni araadiyu mattaava anivikana 500. Nave naanikhalana eyoolya enilipiha waataana wahu ni Yehova. Yookhumelela aya, hiyo khinaahiyale okhala oowiiraana. Ninnikupali wiira moohicikha mixankiho sinrowa oniphwanya muhoolo, Yehova onimwaakhaliherya anna annihoolela wiira anivaheke malakiheryo nikhanle ahu ootthara. Masi ohiya paahi omuroromela Yehova ni wiiwelela malamulo awe, mikhalelo xeeni sikina sinrowa onikhaliherya ovilela okathi wa maxakha maalupale ni opaka itthu mwa miruku okathi owo?

MPHENTANEKE NTOKO AXINNA NI NWAAKHELEKE ALETTO

14. Moovarihana ni aHeeberi 13:​1-3, mikhalelo xeeni makristau ale yaapirisari aya wooniherya vaavo waattamela aya wanikisa wa makhalelo a ayuda?

¹⁴ Moohipisa, ninrowa opirisariki ophentana mukina ni mukhwa awe ovikana khalai. Etthu enrowa onikhaliherya, ori otthara ntakiheryo na makristau a oYerusalemu ni a oYudeya. Awo yaaniphentana mukina ni mukhwaawe. (aHeeb. 10:​32-34) Okathi waattamela aya wanikisa wa makhalelo a ayuda, awo yaanipirisari otepa wooniheryana ‘ophenta ntoko axinna’ ni “owaakhela aletto”.c (Mmusome aHeeberi 13:​1-3.) Nave ninrowa opirisariki ophentana mukina ni mukhwaawe okathi wa maxakha maalupale.

15. Xeeni makristau yaareerela aya wooniheryana ophentana ntoko axinna ni owaakhela aletto nuumala otthyawa?

¹⁵ Okathi anakhotto a oRoma yaarukurenrye aya oYerusalemu masi moohipisa atthika, makristau yaahitthyawa masi ahikunxe mireerelo sinceene. (Math. 24:​17, 18) Okathi yaatthyawenle aya omiyaakoni ni opaceriha makhalelo masya, awo yaanipirisari okhaliheryana mukina ni mukhwaawe. Moohaaniherya, anna yaanireerela okhaliheriwa avahiwaka yoolya, ikuwo ni opuro wookhala. Nto eyo yaari eparakha yoowooniheryana ophenta weekeekhai ntoko axinna, owaakhela aletto ni waakhaliherya akina yaavahaka itthu saathowa. — Tito 3:14.

16. Ninrowa owooniherya sai niphento anna ni arokora anipirisari okhaliheriwa? (Nwehe efootu.)

¹⁶ Ele nniixutta ahu: Ophenta onniniiriha waakhaliherya anna ni arokora okathi anipirisari aya. Mwa ntakiheryo, mwa okathi vakhaani ovinre, anna ni arokora aatthyawa ilapo saya mwaha wa ikhotto ni ihasara sa ephattu. Masi anna ni arokora akina a olummwenku wootheene, yaahaakhaliherya yaavahaka itthu sinaathowa ni yaakhaliheryaka olipiha waataana waya ni Yehova. Murokora mmosa a wUcrânia otthyanwe elapo awe mwaha wa ekhotto, ohimmye so: “Yehova onnineettiha ni onikhaliherya aarumeelaka anna ni arokora. Awo yaahinaakhela saana ni khiyaareere onikhaliherya okathi naari ahu wUcrânia, oHungria ni mpakha-va niri ahu wAlemanha. Hiyo ninnivara ni Yehova okathi ninwaakhela ahu anna ni arokora owannyihu, ni waakhaliherya naavahaka itthu anipirisari aya. — Mir. 19:17; 2 aKor. 1:​3, 4.

17. Xeeni vari aya vooloka nenna-va wiixutta ophentana ntoko axinna ni owaakhela aletto?

¹⁷ Moohaaniherya, okathi wa maxakha maalupale nnoorowa opirisariki waakhaliherya vanceene anna ni arokora ovikana olelo-va. (Hab. 3:​16-18) Olelo-va, Yehova onniniixuttiha moota nikhanle ahu oowooniherya ophentana wahu ntoko axinna ni owaakhela aletto. Tthiri mikhalelo iya, nnoorowa opirisariki wooniherya okathi owo wa mixankiho.

ETTHU XEENI NINLIPELELA AHU MUHOOLO?

18. Ninrowa otthara sai ntakiheryo na makristau yaatthyanwe oYerusalemu?

¹⁸ Soowiiraneya sa mulaponi, sinnooniherya wiira makristau ale yaatthyawenle omiyaakoni yaahoopowa nuumala Yerusamelu opwetexiwa. Nnaamwi okathi yaatthyawa aya yaahiyale mireerelo saya sikina, Yehova khaanyanyanle ni aahaakhapelela. Ninrowa otthara sai ntakiheryo naya? Hiyo khaninsuwela itetaalye sootheene sa itthu sinrowa wiiraneya muhoolo. Masi Yesu aahinitumererya wiira nihaana okhala atthu oowaakuva wiiwelela. (Luka 12:40) Nave nihaana wuupuwelela ele Paulo aalepenle awe makristau aheeberi. Miruku sawe, sookhalana efaita yinceene olelo-va, ntoko saarina aya efaita okathi ole. Ohiya-vo, nihaana ororomela yooleiherya ya Yehova yoowi owo khonikhala-khala oninyanyalaka. (aHeeb. 13:​5, 6) Nuupuwelaka eyo, nimphavela ohihiya ophavelasa epooma yeeyo enrowa okhalaka mahiku ootheene, eyo piiyo, Omwene wa Muluku. Niira siiso nnoophwanya mareeliho manceene. — Math. 25:34.