Yohaannisi Xaafido Koyroogaa
4 Taani siiqiyogeetoo, ayyaanay denttettin yootiyoba* ubbaa ammanoppite, shin Xoossay erissidobaa yootays giya daro worddanchchati saꞌan darido gishshawu, ayyaanay denttettin yootiyobati* Xoossaappe pulttidabakkonne eranawu paaccite.
2 Ayyaanay denttettin yootiyobay Xoossaappe pulttidoogaa intte hagaadan ereeta: Yesuus Kiristtoosi ashuwan yiidoogaa ekkin, ayyaanay denttettin yootiyobay ubbay Xoossaappe pulttees. 3 Shin Yesuusa ekkenna, ayyaanay denttettin yootiyobay ubbay Xoossaappe pulttenna. Hegaa bollikka, I yaanaagaa intte siyido, Kiristtoosaara gaaddettiyagee ayyaanay denttettin yootiyobay hegaa, qassi hegee haꞌꞌi saꞌan odettiis.
4 Naatoo, intte Xoossaageeta, qassi intte baggan deꞌiyagee saꞌaa asaa baggan deꞌiyagaappe aadhdhiyo gishshawu, intte eta xoonideta. 5 Eti saꞌaa asaa bagga; eti saꞌaa asadan haasayiyoynne saꞌaa asay hegaa siyiyoy hegaassa. 6 Nuuni Xoossaageeta. Xoossaa eriya ooninne nuuni yootiyobaa siyees; Xoossaagaa gidenna ooninne nuuni yootiyobaa siyenna. Ayyaanay denttettin yootiyo tumaa ayyaanay denttettin yootiyo wordduwappe nuuni hegan shaakki eroos.
7 Taani siiqiyogeetoo, siiqoy Xoossaappe pulttiyo gishshawu, simi nuuni issoy issuwa ubbatoo siiqoos, qassi siiqiya ubbay Xoossaa naꞌa, qassi I Xoossaa erees. 8 Xoossay siiqo gidiyo gishshawu, siiqenna ooninne Xoossaa eribeenna. 9 Xoossaa siiqoy nuban hagaadan qoncciis: nuuni Naꞌaa baggaara merinaa deꞌuwa laattana mala, Xoossay ba dumma Naꞌaa saꞌaa kiittiis. 10 He siiqoy Xoossay nuna siiqidi ba Naꞌay nuna aara sigettana* mala nu nagaraassi yarshshettanaadan kiittidoogaappe attin, nuuni A siiqidoogaa gidenna.
11 Taani siiqiyogeetoo, Xoossay nuna hegaadan siiqidaba gidikko, nuunikka issoy issuwa siiqana bessees. 12 Ooninne Xoossaa awudekka beꞌibeenna. Nuuni ubbatoo issoy issuwa siiqikko, Xoossay nunan deꞌees, qassi A siiqoy nu wozanan polettana. 13 Nuuni aara issippetettan deꞌiyogaanne I ba ayyaanaa nuuyyo immido gishshawu nunaara issippetettan deꞌiyogaa hegan eroos. 14 Hegaa bollikka, Aaway ba Naꞌaa saꞌaa asaa ashshiyagaa oottidi kiittidoogaa nuuni nu huuphen beꞌida, qassi hegaa markkattoos. 15 Yesuusi Xoossaa Naꞌaa gidiyogaa ekkiya oonaaninne Xoossay deꞌees, qassi I Xoossaara issuwa gididi deꞌees. 16 Hegaa bollikka, Xoossay nuna siiqiyo siiquwa eridanne ammanida.
Xoossay siiqo, qassi siiquwan deꞌiya asi Xoossaara issuwa gididi deꞌeesinne Xoossaykka an deꞌees. 17 Siiqoy nu wozanan hegaadan polettiis; hegaappe denddidaagan, nuuni pirddaa gallassi yayyennan haasayana* danddayoos; ayssi giikko, I deꞌiyogaadan, nuunikka ha saꞌan hegaadan deꞌoos. 18 Siiquwan yashshi baawa, shin yashshay nuna xubbiyo gishshawu, wottiyobi baynna siiqoy yashshaa kessi olees.* Yayyiya asassi wottiyobi baynna siiqoy baawa. 19 I nuna koyro siiqido gishshawu, nuuni siiqoos.
20 Ooninne “Xoossaa siiqays” giiddi, ba ishaa ixxikko, I worddanchcha. Ayssi giikko, beꞌiyo ba ishaa siiqenna asi beꞌibeenna Xoossaa siiqana danddayenna. 21 Qassi I nuna azazidobay hagaa: Xoossaa siiqiya ooninne ba ishaakka siiqana bessees.