Qoronttoosa Asaassi Xaafettida Koyroogaa

13 Taani asaagaanne kiitanchchatu doonatakka haasayiyakkonne, siiqennaba gidikko, qoxxin giiriya birata mala gidaas. 2 Qassi Xoossay erissidobaa yootiyo imotay taayyo deꞌiyakkokka, taani Xoossay genttido yohota ubbaanne era ubbaa akeekiyakkokka, dereta qaattana* danddayiyo keehi mino ammanoy taayyo deꞌiyakkokka, siiqennaba gidikko, aynne maaddikke. 3 Qassi hiyyeesata mizanawu taayyo deꞌiya ubbabaa bayzziyakkokka, ceeqettana mala ta bollaa yarshshiyakkokka, taani siiqennaba gidikko, hegee tana aynne maaddenna.

4 Siiqoy danddayanchchanne keha. Siiqoy qanaatenna. Siiqoy ceeqettenna, otorettenna, 5 bessennabaa hanenna,* bawu goꞌettanawu koyenna, yiillotenna. Siiqoy lanccenna.* 6 Siiqoy xillotetta gidennaban ufayttenna, shin tuman ufayttees. 7 Siiqoy ubbabaa danddayees, ubbabaa ammanees, ubbaban hidootaa wottees, ubbaban genccees.

8 Siiqoy mule tasenna.* Shin Xoossay erissidobaa yootiyo, woy dumma dumma doonata haasayiyo,* woy malaaliya eraa eriyo imotati attana.* 9 Ayssi giikko, nuuni wurssi erokko, qassi Xoossay erissiyobaa wurssi yootokko, 10 shin nuuni wurssi eriyo wodenne Xoossay erissidobaa wurssi yootiyo wode, wurssi erennaaninne Xoossay erissidobaa wurssi yootennan aggiyogee attana.* 11 Taani naatettan naꞌadan haasayays, naꞌadan qoppays, naꞌadan yigga xeellays; shin taani haꞌꞌi gastta gidiyo gishshawu, naatettan oottiyobati attidosona.* 12 Birata heregan beꞌiyogaadan, nuuni haꞌꞌi geeshshi beꞌokko, shin issi uraara baazzan gayttiyogaadan, guyyeppe geeshshi beꞌana. Haꞌꞌi taani wurssa erikke, shin Xoossay tana wurssi eriyogaadan, taanikka he wode wurssa* erana. 13 Gidoppe attin, ammanoy, hidootay, siiqoy, ha heezzati deꞌana; shin ha heezzatuppe aadhdhiyagee siiquwa.