MARQQOOSI XAAFIDOOGAA
1 Xoossaa Naꞌaa, Yesuus Kiristtoosabaa qonccissiya mishiraachchoy hagaadan doommees: 2 Xoossay erissidobaa yootiya Isiyasi abaa hagaadan giidi xaafiis: “(Beꞌa! Ne sinttan ogiya giigissiya, tawu kiitettiya ura taani neeppe sinttawu* kiittays.) 3 Issi uri bazzuwan ba qaalaa xoqqu oottidi, ‘Yihoowa* ogiya giigissitenne sittayite’ yaagees.” 4 Asaa haattan muukkiya Yohaannisi bazzuwa biidi asaayyo hagaadan giis: “Intte zilꞌꞌettidi laamettidoogaa bessanawunne Xoossay intte nagaraa atto gaana mala, haattan muukettite.” 5 Yihudaa biitta ubbaappe yiidanne Yerusalaamen deꞌiya ubba asay akko bin, I eta Yorddaanoosa Shaafan muukkees, qassi eti bantta nagaraa asaa sinttan paaxoosona. 6 Yohaannisi gaameelaa ikisiyappe dadettida maayuwa maayeesinne ba xeessan dafuwa gixxees, qassi booliyanne woraa eessaa mees. 7 I hagaadan giidi mishiraachchuwa yootiis: “Taappe minniyagee taappe simmin yaana; taani hokkada A caammaa birshshanawukka bessikke. 8 Taani inttena haattan muukkays, shin I inttena geeshsha ayyaanan hegaadan oottana.”*
9 He wode Yesuusi Galiilan deꞌiya Naazireeteppe yin, Yohaannisi A Yorddaanoosa Shaafan haattan muukkiis. 10 I haattaappe kiyosaara saloy dooyettin, ayyaanay haraphphe milatidi A bolli wodhdhiyogaa beꞌiis. 11 Qassi Xoossay saluwappe, “Neeni taani siiqiyo ta Naꞌaa; taani nenan ufayttays” yaagiis.
12 Qassi sohuwara I bazzuwa baanaadan ayyaanay denttettiis. 13 Hegaa gishshawu, Yesuusi Seexaanay A paaccishin 40 gallassaa bazzuwan takkiis. I doꞌatuura deꞌiis, shin kiitanchchati ayyo haggaazidosona.
14 Yohaannisi qashetti simmin, Yesuusi Xoossaa mishiraachchuwa yootiiddi Galiilaa biidi, 15 hagaadan giis: “Kasetidi odettida wodee hagaa; qassi Xoossaa Kawotettay matattiis. Intte nagaran zilꞌꞌettidi laamettitenne mishiraachchuwa ammanite.”
16 I Galiila Abbaa mataara biiddi, Simooninne A ishay Inddiraasi moliya oyqqiyageeta gidiyo gishshawu, gitiya abban yeggishin beꞌiis. 17 Yesuusi eta beꞌidi, “Tana kaallite; intte moliya koyiyogaadan asaa waati koyanaakko taani inttena bessana” yaagiis. 18 Eti sohuwara bantta gitiya yeggi bayidi A kaallidosona. 19 I hegaappe guuttaa sinttawu biidi, Zabddiyosa naꞌay Yaaqoobinne A ishay Yohaannisi wolwoluwa* giddon bantta gitiya giigissishin beꞌidi, 20 eta sohuwara xeegiis. Yaatin, eti bantta aawaanne A oosanchchata wolwoluwa giddon aggi bayidi A kaallidosona. 21 Qassi eti Qifirinaahooma biidosona.
I Sambbatay doommosaara shiiqo keettaa gelidi tamaarissiyogaa doommiis. 22 Qassi eti I waati tamaarissiyakko beꞌidi malaalettidosona; ayssi giikko, I xaafetudan gidennan, Xoossay maataa immido uradan eta tamaarissiis. 23 He wode, tuna ayyaanay oyqqido issi bitanee eta shiiqo keettan deꞌees; I ba qaalaa xoqqu oottidi hagaadan giis: 24 “Naazireete Yesuusaa, neeni nuuppe koyiyobay aybee? Neeni nuna xayssanawu yaadii? Neeni Xoossay kiittido Geeshshaa gidiyogaa taani loyttada erays!” 25 Shin Yesuusi A, “Coꞌꞌu ga; appe kiya!” yaagidi seeriis. 26 He tuna ayyaanay bitaniya keehi kokkorssi simmidi, waasuwa xulluusiiddi appe kiyiis. 27 Asay ubbay keehi malaalettidi issoy issuwara hegaa haasayidosona; hagaadan giidosona: “Hagee aybee? I tamaarissiyo ogee haratuugaappe dummatees! Haray atto iita ayyaanaakka kessiyo wolqqay ayyo deꞌees; etikka ayyo azazettoosona.” 28 Hegaa gishshawu, kumetta Galiilan ubbasan abay eesuwan odettiis.
29 Eti shiiqo keettaappe kiyidi, Simooninne Inddiraasi deꞌiyo keettaa biidosona; Yaaqoobinne Yohaannisikka etaara biidosona. 30 He wode, Simoona bollotiya mishoy oyqqin sahettada zinꞌꞌaasu; yaatin I sahuwabaa eti ayyo sohuwara yootidosona. 31 I ikko biidi I kushiya oyqqidi, O denttiis. Mishoy aggin, A denddada etayyo qumaa kattiyogaa doommaasu.
32 Omarssi away wulli simmin, asay harggidanne daydanttay oyqqido ubbaa akko ehiyogaa doommiis; 33 qassi kataman deꞌiya asay ubbay he penggen shiiqiis. 34 Yaatin I dumma dumma harggee oyqqido darota pattiis, qassi daro daydanttata kessiis, shin I daydanttati haasayennaadan diggiis; ayssi giikko, I Kiristtoosa gidiyogaa eti eroosona.*
35 I wonttimaattan saꞌay xumi uttidaashin denddidi, kare kiyidi asi baynnasaa biis; yaatidi yan woossiyogaa doommiis. 36 Shin Simooninne aara deꞌiyageeti Yesuusa mintti koyidi 37 demmidosona; yaatidi A, “Asay ubbay nena koyees” yaagidosona. 38 Shin I etayyo hagaadan giis: “Taani yankka mishiraachchuwa yootana mala, harasaa boos; ane matan deꞌiya katamata boos; ayssi giikko, taani yiidoy hegaassa.” 39 Qassi I eta shiiqo keettatun mishiraachchuwa yootiiddinne daydanattata kessiiddi Galiilan ubbasaa biis.
40 Inchchirichchay oyqqido issi bitaneekka yan akko yiidi gulbbatidi, “Neeni koyikko, tana pattana* danddayaasa” yaagiis. 41 Yaagin, I ayyo qarettidi, ba kushiya yeddidi A bochchiis; yaatidi, “Ee, taani koyays! Neeni paxana”* yaagiis. 42 Sohuwara inchchirichchay A bollaappe xayin, I paxiis.* 43 Hegaappe simmin, Yesuusi A mintti azazidi sohuwara yeddiis; 44 I ayyo hagaadan giis: “Ooyyonne odoppa, shin baada kahiniyawu nena bessa; yaatada etayyo naqaasha gidana mala, neeni geeyido gishshawu, Muusee yootido imotaa imma.” 45 Shin bitanee biidi, hoshkkayidi hegaa ubbasaa gattiis; hegaa gishshawu, Yesuusi asi erennan katamaa gelana danddayibeenna; shin katamaappe gaxan asi baynnasan takkiis. Gidikkokka, eti ubbasaappe akko yoosona.
2 Shin amarida gallassappe guyyiyan, I haranttuwakka Qifirinaahooma biis; yaatin, I soo yiidoogee ubbasan odettiis. 2 Qassi, haray atto penggiya heerankka sohoy xayana gakkanaashin daro asay shiiqiis; yaatin, I etayyo mishiraachchuwa yootiyogaa doommiis. 3 Eti bollay qaaxxenna, oyddu asati tookkido bitaniya he wode akko ehiidosona. 4 Shin asay keehi cora gidiyo gishshawu, eti A Yesuusakko efaana danddayibookkona; hegaa gishshawu, eti Yesuusappe bollaara deꞌiya kaaraa lukkidi, qaaxxana danddayenna bitanee zinꞌꞌido halaa duge wottidosona. 5 Yesuusi eta ammanuwa beꞌidi, he bitaniyayyo, “Ta naꞌawu, ne nagaray atto geetettiis” yaagiis. 6 He wode, xaafetuppe amaridaageeti yan uttidi, bantta wozanan hagaadan giidi qoppidosona: 7 “Ha bitanee hagaadan ayssi haasayii? I Xoossaa toochchees. Issi Xoossaappe attin, hari ooni nagaraa atto gaana danddayii?” 8 Shin eti bantta giddon hegaadan haasayiyogaa Yesuusi ba wozanan sohuwara eriis; hegaa gishshawu, I etayyo hagaadan giis: “Intte intte wozanan hegaadan ayssi qoppeetii? 9 Bollay qaaxxenna bitaniya, ‘Ne nagaray atto geetettiis’ giyogee metiiyye woy, ‘Dendda eqqada ne halaa tookkada ba’ giyogee metii? 10 Shin asa Naꞌawu saꞌan nagaraa atto giyo maatay deꞌiyogaa taani inttena bessana.” Yaagi simmidi bitaniya, 11 “Taani nena, dendda eqqada, ne halaa tookkada ne soo ba gays” yaagiis. 12 Yaagin, I denddi eqqidi sohuwara ba halaa tookkidi, eta ubbaa sinttaara biis. Hegaa gishshawu, eti ubbay malaalettidi, “Nuuni hagaa malabaa mule beꞌi erokko” yaagidi Xoossaa bonchchidosona.
13 Yesuusi haranttuwakka abbaa dooni bin, asay ubbay akko zuliis; yaatin, I eta tamaarissiyogaa doommiis. 14 Qassi I hegaara aadhdhiiddi, asay qaraxaa qanxxiyo keettan uttida, Ilppiyosa naꞌaa Leewa beꞌidi A, “Tana kaalla” yaagiis. Yaagin, I denddidi A kaalliis. 15 Guyyeppe, Yesuusi Leewa son qumaa maanawu uttido wode, qaraxaa shiishshiyanne nagaraa oottiya daro asati Yesuusaaranne A kaalliyageetuura issippe moosona; ayssi giikko, hegeetuppe daroti Yesuusa kaalliyageeta gididosona. 16 Shin xaafe Parisaaweti I nagaraa oottiyageetuuranne qaraxaa shiishshiyageetuura qumaa miyogaa beꞌido wode, Yesuusa kaalliyageetuyyo, “I qaraxaa shiishshiyageetuuranne nagaraa oottiyageetuura miyoy aybissee?” yaagidosona. 17 Yesuusi hegaa siyidi etayyo, “Harggiya asatussappe attin, mino asatussi aakime koshshenna. Taani nagaraa oottiya asata xeesanawu yaasippe attin, xillo asata xeesanawu yabeykke” yaagiis.
18 Yohaannisa kaalliyageetussinne Parisaawetussi xoomiyogee meeze. Hegaa gishshawu, eti akko yiidi A, “Xoomiyogee Yohaannisa kaalliyageetuyyonne Parisaawetuyyo meeze, shin nena kaalliyageeti xoomennay aybissee?” yaagidosona. 19 Yesuusi etayyo hagaadan giis: “Mishiray etaara deꞌishin, mishiraa laggeti xoomanaadan oottiyabi baawa. Mishiray etaara deꞌiyo wode, eti xoomokkona. 20 Shin mishiray etappe shaahettiyo* wodee yaana; he wode eti xoomana. 21 Ooninne galꞌꞌa maayuwa bolli oorattaa wotti sikkenna. I yaatikko, he wotoy gunddidi maayuwa daakkana; yaatin, daassay yaa aakkana. 22 Qassi ooninne ooratti agido woyne eessaa galꞌꞌa ogoruwan tigenna. I yaatikko, woynee ogoruwa xuussana, qassi woyne eessaynne ogoroy goꞌꞌennaba gidana. Shin asay ooratti agido woyne eessaa ooratta ogoruwan tigees.”
23 He wode, I Sambbata gallassi gisttiya giddoora kanttishin, A kaalliyageeti aara biiddi tiya gisttiya duuttidosona. 24 Hegaa gishshawu, Parisaaweti ayyo, “Nena kaalliyageeti Sambbatan woga gidennabaa ayssi oottiyonaa?” yaagidosona. 25 Shin I etayyo yaagiis: “Daawiti miyobay wurin inne A asati namisettido wode waatidaakko mule nabbabibeekketii? 26 Waanna kahiniya Abiyataarabay xaafettidosan qonccidaagaadan, Daawiti Xoossaa keettaa gelin, Muuse higgiyan kahinetu xalaalappe attin hara ooninne miyogee woga gidenna, geeshsha oyttay* ayyo imettin miis; yaatidi banaara deꞌiyageetuyyokka amaridaagaa immiis.” 27 Hegaappe simmin, I etayyo hagaadan giis: “Xoossay Sambbataa asawu giigissiisippe attin, asaa Sambbatawu medhdhibeenna. 28 Hegaa gishshawu, asa Naꞌay sambbatawukka Goda.”
3 I asay shiiqiyo keettaa haranttuwakka geliyo wode, kushee silido* issi bitanee yan deꞌees. 2 Parisaaweti Yesuusi he bitaniya Sambbatan pattiyakkonne beꞌanawu loytti xeelloosona. Ayssi giikko, eti A mootanawu koyidosona. 3 I kushee silido* bitaniya, “Dendda eqqada giddo shiiqa” yaagiis. 4 Yaagi simmidi I etayyo hagaadan giis: “Sambbatan waatiyogee wogee? Loꞌꞌobaa oottiyogeeyye, qohiyabaa oottiyogee? Shemppo ashshiyogeeyye, woriyogee?” Shin eti coꞌꞌu giidosona. 5 I yiillotidi eta xeelli simmidi, eta wozanay dammido gishshawu keehi azzanidi bitaniya, “Ne kushiya piddi ootta” yaagiis. Yaagin bitanee piddi oottiis, qassi A kushee paxiis. 6 Yaanin Parisaaweti kare kiyidi, A woranawu Heeroodisa yamiya asatuura sohuwara maqettidosona.
7 Shin Yesuusi bana kaalliyageetuura abbaakko biis; yaatin, Galiilaappenne Yihudaappe yiida keehi cora asay A geeduwa biis. 8 Yesuusi oottido darobaa siyidi, haray atto Yerusalaameppe, Eedomiyasappe, Yorddaanoosappe hefintta baggappenne Xiiroosanne Sidoona heerappe keehi cora asay akko yiis. 9 Qassi Yesuusi asay bana yaara haara sugenna mala, guutta wolwoluwa baayyo giigissi wottanaadan bana kaalliyageetussi yootiis. 10 I darota pattido gishshawu, keehi harggiya ubbay A bochchanawu yaara haara A sugiis. 11 Tuna ayyaanati oyqqidoogeetikka A beꞌiyo wode, A sinttan kunddidi bantta qaalaa xoqqu oottidi, “Neeni Xoossaa Naꞌaa” yaagoosona. 12 Shin eti abaa hara asawu odenna mala, I darotoo minttidi azaziis.
13 I deriya kiyidi bana kaalliyageetuppe amaridaageeta xeegin, eti akko biidosona. 14 Qassi I 12 attuma asata dooridi, eta kiitettidaageeta giis; ha 12ti ubbasaa aara issippe biidosona; qassi mishiraachchuwa yootanaadan I eta kiittiis. 15 Daydanttata kessanaadankka I etawu maataa immiis.
16 Qassi I sunttido 12ti hageeta: I Pheexiroosakka giidi xeegiyo Simoona, 17 Zabddiyosa naꞌaa Yaaqoobanne Yaaqooba ishaa Yohaannisa (I eta Boꞌanergges giidikka xeegees; hegee “Dadaa Naata” giyogaa), 18 Inddiraasa, Piliphphoosa, Barttalamoosa, Maatiyosa, Toomaasa, Ilppiyosa naꞌaa Yaaqooba, Taaddiyosa, yeemottiya* Simoona, 19 qassi guyyeppe Yesuusa A morkketuyyo aatti immida Asqqorootu Yihudaa.
Hegaappe simmin I issi keettaa geliis; 20 yankka asay shiiqido gishshawu, eti qumaa maanawukka danddayibookkona. 21 Shin A dabboti hegaa siyidi, “I wozanaa boshettees” giidi, A oyqqanawu biidosona. 22 Qassi Yerusalaameppe yiida xaafeti, “Ha bitaniya Biꞌeelizeebuli* oyqqiis; I daydanttata kessiyoy daydanttata haariyagaa wolqqaana” yaagoosona. 23 Hegaa gishshawu, I eta baakko xeesi simmidi, etayyo hagaadan giidi leemisuwa yootiis: “Seexaanay waanidi Seexaanaa kessii? 24 Issi kawotettaa asay shaahettidi issoy issuwa bolli denddikko, he kawotettay laalettana; 25 qassi issi keettaa asay shaahettidi issoy issuwa bolli denddikko, he keettaa asay laalettana. 26 Hegaadankka, Seexaanay ba bolli denddin A kawotettay* shaahettikko, I laalettananne xayana. 27 Issi wolqqaama bitaniya keettaa geliya ooninne koyro A qachchennan A aquwa wuuqqana danddayenna. I he bitaniya son deꞌiyabaa ubbaa bonqqana danddayiyoy yaatiyogaa xalaalaana. 28 Taani intteyyo tumaa odays, asaa naati ay nagara oottikkokka, qassi toochchidi ay haasayikkokka, ubbabay etawu atto geetettana. 29 Gidoppe attin, geeshsha ayyaanaa toochchiya ooyyonne A nagaray merinawu atto geetettenna; shin I merinaa nagaraa tookkana.” 30 Eti, “A bolli tuna ayyaanay deꞌees” giyo gishshawu, I hegaadan giis.
31 Qassi A aayyiyanne A ishati yiidi karen eqqidi, A xeegana mala issi asa kiittidosona. 32 He wode cora asay A matan uttiis; eti ayyo, “Ne aayyiyanne ne ishati nena koyiiddi yiidi karen deꞌoosona” yaagidosona. 33 Shin I etayyo, “Ta aayyiya oonee, qassi ta ishati oonee?” yaagiis. 34 He wode, I ba mati shiiqi uttidaageeta xeelliiddi hagaadan giis: “Ta aayyiyanne ta ishati hageeta! 35 Xoossay koyiyobaa oottiya ooninne ta isha, ta michcho, qassi ta aayo.”
4 I haranttuwakka abbaa lanqqen tamaarissiyogaa doommiis; yaatin keehi cora asay A matan shiiqiis. Hegaa gishshawu, I wolwoluwan kiyidi abbaa gaxaappe guuttaa haakkidi uttiis, shin asay ubbay abbaa gaxan, haattaa lanqqen deꞌees. 2 Qassi I leemisuwan eta darobaa tamaarissiyogaa doommidi, tamaarissiiddi etayyo hagaadan giis: 3 “Siyite. Zerettaa zeriyagee zeranawu kiyiis. 4 I zerishin issi issi zerettati ogiya doonan wodhdhidosona; yaatin, kafoti yiidi maxi bayidosona. 5 Hara zerettati qassi daro biittay baynna zaallaa bolli wodhdhido gishshawu, sohuwara mokkidosona. 6 Shin away kiyidi xuuggin, hegeeti xaphoy baynna gishshawu shullidosona. 7 Hara zerettati qassi agunttaa giddon wodhdhidosona; yaatin, agunttay diccidi eta cuullin aynne ayfibookkona. 8 Shin harati aradda biittan wodhdhidosona; yaatidi, dicci gitatidi ayfiyogaa doommidosona; eti 30 kushe, 60 kushenne 100 kushe darissidi ayfidosona.” 9 Yaatidi I, “Siyanawu hayttay deꞌiyo uri loytti siyo” yaagiis.
10 Asay bi simmin, I kiittido tammanne naaꞌꞌatinne A kaalliya harati he leemisuwabaa A oychchidosona. 11 I etayyo hagaadan giis: “Xoossay ba Kawotettaabaa genttido yohuwa intte akeekanaadan oottiis; shin taani karen deꞌiyageetuyyo ubbabaakka leemisuwan yootays; 12 hegee eti beꞌana, shin beꞌibeennabadan hananaadaana; eti siyana, shin akeekibeennabadan hananaadaana; qassi Xoossay eta nagaraa atto gaana mala eti akko simmennaadaana.” 13 Qassi I etayyo hagaadan giis: “Intte ha leemisuwa erekketa; yaatin, hara leemisota ubbaa waati akeekuuteetii?
14 “Zeriyagee qaalaa zerees. 15 Qaalay zerettido oge doonay eti siyosaara Seexaanay yiidi eta wozanan zerettida qaalaa wotti ekkiyogeeta. 16 Hegaadankka, zaallaa bolli deꞌiya biittan zerettidaagee qaalaa siyosaara ufayssan ammaniya asata. 17 Shin etayyo xaphoy baynna gishshawu, guutta wodiyawu ammanoosona; qassi qaalaa gaasuwan waayettiyo wode woy asi naaqqiyo wode, sohuwara xubettoosona. 18 Agunttaa giddon zerettidaageetikka deꞌoosona. Hageeti qaalaa siyiyageeta. 19 Shin ha wodiya* deꞌuwa hirggay, duretettaa cimoynne hara ubbabaa amottiyogee qohidi qaalaa cuullin, ayfennan attees. 20 Wurssettan, aradda biittan zerettidaageeti qaalaa siyidi ufayttidi ekkiyageeta, qassi 30 kushe, 60 kushenne 100 kushe darissidi ayfiyageeta.”
21 I etayyo hagaadankka giis: “Ooninne xomppe keeshen qumꞌꞌenna, woykko arssaappe garssaara wottenna. Intte xomppiya xoqqasan wottiyogee qoncce. 22 Ayssi giikko, qosin qonccennan attiyabi baawa, qassi genttin qoncciya kiyennan attiyabi baawa. 23 Siyanawu hayttay deꞌiyo ooninne loytti siyo.”
24 Qassikka, I etayyo hagaadan giis: “Intte siyiyobaa loytti ezggite. Intte makkiyogaa keenay intteyyo makettidi imettana; ee, intteyyo gujettana. 25 Ayssi giikko, issibi deꞌiyo ooyyonne gujettana, shin issibi baynna ooppenne awu deꞌiya guuttabaykka ekettana.”
26 I asaayyo hagaadan giis: “Xoossaa Kawotettay zerettaa zeriya bitaniya mala. 27 He zerettay caaridi dicciyo wode, I ubba galla qammi xiskkees, qassi maallado denddees; shin zerettay waani dicciyakko erenna. 28 Zerettay biittaappe loddan loddan bawu diccidi ayfees; koyro caarees, guyyeppe kukkumees, qassi wurssettan bootees. 29 Shin cakkiyo wodee gakkido gishshawu, kattay gakkosaara zeridaagee baacan cakkees.”
30 I qassikka hagaadan giis: “Xoossaa Kawotettaa aybiira geeddarissana danddayiyo, woy A ayba leemisuwan qonccissana danddayiyo? 31 I keehi guutta ayfe* mala; he ayfee gaden zerettiyo wode, saꞌan deꞌiya mitta ayfe ubbaappe keehi guutta. 32 Shin diccidi, gaden mokkiya hara ubbaappe gitatidi wogga daashshay deꞌiyogaa gidees; yaanin saluwa kafoti A kuwan deꞌoosona.”
33 I eti akeekana danddayiyobaa qoppidi, hegaa mala daro leemisotun Xoossaa Qaalaa eta tamaarissiis. 34 I leemisoy baynnan etawu yootenna; shin hara asay baynna wode, bana kaalliyageetuyyo ubbabaa qonccissees.
35 Qassi he gallassi saꞌay omariyo wode I etayyo, “Ane abbaappe hefintti pinnoos” yaagiis. 36 Hegaa gishshawu, eti asaa moyssi simmidi, wolwoluwan A ekki biidosona; hara wolwolotikka he wolwoluwara biidosona. 37 Guyyeppe, wolqqaama carkkoy denddin, beetay wolwoluwa shociis; yaatin, wolwoluwan haattay kumana haniis. 38 Shin I wolwoluwayyo guyye baggaara borkkotaa borkkotidi xiskkiis. Hegaa gishshawu, eti A xiskkuwappe denttidi, “Asttamaariyawu, nuuni hayqqana haniyogaa beꞌikkii?” yaagidosona. 39 Yaagin, I denddidi carkkuwa seeriis; qassi abbaa, “Coꞌꞌu ga! Woppu ga!” yaagiis. Yaatin carkkoykka abbaykka sohuwara woppu giidosona. 40 Yaanin I eta, “Ayssi yayyeetii? Xoossay maaddanaagaa ammanekketii?” yaagiis. 41 Shin eti keehi yayyidi issoy issuwawu, “Haray atto carkkoynne abbaykka awu azazettiyogee hagee tumu oonee?” yaagidosona.
5 Hegaappe guyyiyan, eti abbaappe hefinttan deꞌiya Gerggesetu biitti gakkidosona. 2 Yesuusi wolwoluwappe wodhdhosaara, tuna ayyaanay oyqqido issi bitanee makkaanaappe kiyidi aara gayttiis. 3 I makkaanan deꞌees; he wode gakkanaashin, haray atto sanssalatankka gidin, A ooninne qachchana danddayibeenna. 4 Asay A kushiyanne tohuwa darotoo sanssalatan qachchikkonne, I he sanssalataa duuteretti olees; qassi A teqqanawu ooyyonne wolqqi baawa. 5 Qassi I ubbatoo qamminne gallassi makkaanaaninne deriya bolli waasseesinne shuchchan ba bollaa qanxxerettees. 6 Shin I Yesuusa haahuwan beꞌidi, woxxi biidi ayyo ziggiis. 7 He wode I ba qaalaa xoqqu oottidi, “Ubbaappe Xoqqa Xoossaa Naꞌawu Yesuusaa, neeni taappe koyiyobay aybee? Neeni tana xayssennaagawu Xoossaa sunttan caaqqa” yaagiis. 8 Ayssi giikko, Yesuusi A, “Ha tuna ayyaanawu, bitaniyappe kiya” yaagiis. 9 Shin Yesuusi A, “Ne sunttay oonee?” yaagiis. Yaagin I, “Nuuni cora gidiyo gishshawu ta sunttay Leegiyona” yaagiis. 10 Qassi he ayyaanata he biittaappe yedettenna mala, I Yesuusa mintti woossiis.
11 He wode asay daro gudunttaa wudiya deriya bolli heemmees. 12 Hegaa gishshawu, he ayyaanati A, “He gudunttatun gelanaadan nuna yedda” yaagidi woossidosona. 13 Yaatin, I etawu eeno giis. Qassi he iita ayyaanati kiyidi gudunttatun gelidosona; yaatin, 2,000 gidiya he gudunttaa wudee jaammiiddi kakaa bollaara abban gelidi muuketti bayiis. 14 Shin henttanchchati biidi, katamaaninne katamaa heeran deꞌiya asawu hegaa yootin, asay hanidabaa beꞌanawu yiis. 15 Hegaa gishshawu, eti Yesuusakko yiidi, kase daro shaꞌu* daydanttati oyqqido bitanee haꞌꞌi gooshshaappe paxidi, maayuwa maayidi uttidaagaa beꞌidi keehi yayyidosona. 16 Qassi daydanttay oyqqido bitaniyawunne gudunttatu bolli hanida ubbabaa beꞌida asati etayyo hegaa yootidosona. 17 Hegaa gishshawu, Yesuusi bantta biittaappe baanaadan eti A woossidosona.
18 Yesuusi wolwoluwan geliyo wode, kase daydanttay oyqqido bitanee Yesuusaara baanawu woossiis. 19 Gidikkonne, I ayyo eeno gibeenna; shin A, “Ne dabbotukko soo baada, Yihoowi* neeyyo qarettidi* oottido ubbabaa etayyo yoota” yaagiis. 20 Ha bitanee biidi, Yesuusi ayyo oottido ubbabaa Dikapoolisan* yootiis; yaatin asay ubbay malaalettiis.
21 Yesuusi haranttuwakka wolwoluwan abbaa pinni simmin, cora asay akko shiiqiis; qassi I abbaa lanqqen deꞌees. 22 Shiiqo keettan kaalettiyageetuppe issoy, Yaaꞌiroosa giyogee yiidi, Yesuusa beꞌidi A tohuwan wulliis. 23 I zaari zaaridi hagaadan giidi A woossiis: “Ta guutta naꞌiya keehippe sahettawusu;* iyyo kehin A paxa deꞌana mala, hayyanaa baada ne kushiya I bolli wottarkkii.” 24 Yaatin, Yesuusi aara biis; qassi cora asay Yesuusa yaara haara sugiiddi aara biis.
25 Qassi 12 layttawu suuttay goggi wayssido issi maccaasiya he asaa giddon deꞌawusu. 26 Daro aakimeti I waayiya darissidosona,* qassi A bawu deꞌiya aquwa ubbaa wurssaasu; shin iyyo sahoy yaa goobiisippe attin kehibeenna. 27 A Yesuusabaa siyada, asaa giddoora guyyeera akko shiiqada, A maayuwa macaraa bochchaasu. 28 A ubbatoo, “Taani A maayuwa macaraa bochchiyakkonne paxana” yaagawusu. 29 Sohuwara, suuttay I bollaappe goggiyogaa aggi bayiis; qassi A bana wayssida harggiyappe paxidoogaa akeekaasu.
30 Yesuusi baappe wolqqay kiyidoogaa sohuwara ba wozanan akeekidi, asaakko simmidi, “Ta maayuwa bochchiday oonee?” giidi oychchiis. 31 Shin A kaalliyageeti A hagaadan giidosona: “Asay neekko shiiqanawu issoy issuwa sugiyogaa beꞌaydda, ‘Tana bochchiday oonee?’ yaagay?” 32 Shin I hegaa oottida ura eranawu yaa haa xeelliis. 33 Maccaasiya paxidoogaa erada yayyayddanne kokkoraydda baada A sinttan gulbbatada, ubbabaa ayyo yootaasu. 34 Yesuusi O, “Ta naꞌee, ne ammanoy nena pattiis. Hirggoppa, ba,* qassi nena wayssida harggiyappe paxa” yaagiis.
35 I haasayishin, Yaaꞌiroosa sooppe kiittin yiida amarida asati, “Ne naꞌiya hayqqaasu! Asttamaariya metiyogee ay maaddii?” yaagidosona. 36 Shin Yesuusi eti haasayiyobaa siyidi, Yaaꞌiroosa, “Ammanappe attin, yayyoppa” yaagiis. 37 I Pheexiroosappe, Yaaqoobappenne Yaaqooba ishaa Yohaannisappe hara oonanne banaara efaanawu koyibeenna.
38 Yaatin eti Yaaꞌiroosa soo gakkiyo wode, asay wocamees, yeekkeesinne zilaalees. 39 I soo gelidi eta, “Intte yeekkiyoynne hagaadan wocamiyoy aybissee? Naꞌiya xiskkaasuppe attin, hayqqabeykku” yaagiis. 40 Yaagin, eti A qilliiccidi miicciyogaa doommidosona. Shin I eta ubbaa kare kessi simmidi, naꞌee aawaanne aayyiyo, qassi banaara deꞌiyageeta ekkidi, naꞌiyo wottido sohuwa biis. 41 Yaatidi, I naꞌee kushiya oyqqidi O, “Xaalitaa, qumi” yaagiis; hegee, “Guutta naꞌee, taani nena, ‘Dendda!’ gays” yaagiyogaa. 42 Sohuwara naꞌiya denddada hemettiyogaa doommaasu. (Iyyo layttay 12.) Qassi eti hegaa beꞌosaara keehi ufayttidi poocammidosona. 43 Shin I eti hegaa ooyyonne yootenna mala zaari zaaridi azaziis;* qassi iyyo miyobaa immana koshshiyogaa yootiis.
6 I hegaappe aggidi, ba diccido heeraa biis; qassi A kaalliyageetikka aara issippe biidosona. 2 I asay shiiqiyo keettan Sambbata gallassi tamaarissiyogaa doommiis; qassi hegaa siyida daroti malaalettidi hagaadan giidosona: “Ha bitanee waanidi ha ubbabaa eriya asa gidana danddayidee? Ha hayyoynne malaaliyabata oottiyo eray awu imettanawu I oonee? 3 Hagee Mayraami naꞌaa, qassi Yaaqooba, Yooseefa, Yihudaanne Simoona ishaa anaaxiya gidennee? Qassi A michchoti nunaara deꞌokkonaa?” Hegaa gishshawu, eti A gaasuwan xubettidosona. 4 Shin Yesuusi etayyo, “Xoossay erissidobaa yootiyagee ba diccido heeraana, ba dabbotu giddoonanne ba soonappe attin, hara ubbasan bonchchettees” yaagiis. 5 Hegaa gishshawu, I harggida amarida asatu bolli ba kushiya wottidi pattidoogaappe attin, hara malaaliyabaa aybanne yan oottana danddayibeenna. 6 Etawu ammanoy baynna gishshawu, I malaalettiis. Qassi hegaa heeran deꞌiya guutta katamatu ubban yuuyidi tamaarissiis.
7 I kiittido tammanne naaꞌꞌata xeesidi, eta naaꞌꞌaa naaꞌꞌaa oottidi kiittiis; qassi tuna ayyaanata azazana mala, etassi wolqqaa immiis. 8 Qassi eti oytta gidin, qumaa yeggiyoba gidin, bantta danccuwan miishsha gidin, ogiyawu xamꞌꞌappe attin, hara aybanne oyqqennaadan I azaziis. 9 Shin eti wottido caammanne maayido maayo xalaalaara baanaadan I yootiis. 10 Qassi I etayyo hagaadan giis: “Awaaninne intte issi keettaa gelikko, he katamaappe kiyana gakkanaashin yan takkite. 11 Qassi inttena mokkennasan woy intte yootiyobaa siyennasan awaaninne, intte he sohuwappe biyo wode, etayyo markka gidana mala, intte tohuwan deꞌiya buhiya shocite.”* 12 Hegaappe simmin, eti yaappe kiyidosona; yaatidi asay zilꞌꞌettidi laamettana koshshiyogaa etayyo yootidosona. 13 Qassi eti daro daydanttata kessidosonanne harggida daro asata zaytiya tiyidi pattidosona.
14 He wode Kawoy Heeroodisi hegaa siyiis; ayssi giikko, Yesuusa sunttay keehi erettiis; qassi asay hagaadan gees: “Asaa haattan muukkiya Yohaannisi hayquwappe denddiis; malaaliyabata I oottana danddayidoy hegaassa.” 15 Shin harati, “I Eelaasa” goosona. Qassi harati, “Beni wode Xoossay erissidobaa yootidaageetudan, ikka Xoossay erissidobaa yootiyagaa” yaagoosona. 16 Shin Heeroodisi hegaa siyido wode, “Taani A siifissido Yohaannisi hayquwappe denddiis” yaagiis. 17 Ayssi giikko, Heeroodisi ba ishaa Piliphphoosa machchiyo Heeroodiyado ufayssanawu Yohaannisa oyqqidi qashissiis. I Heeroodiyado machchiis, 18 qassi Yohaannisi Heeroodisa, “Neeni ne ishaa machchiyo ekkidoogee woga gidenna” yaagiis. 19 Hegaa gishshawu, Heeroodiyada ayyo ba uluwan lanccada A woranawu koyikkonne danddayabeykku. 20 Ayssi giikko, Yohaannisi Xoossawu yayyiya xillo asa gidiyogaa Heeroodisi eriyo gishshawu, ayyo yayyiis; qassi I qohettennaadan naagiis. Yohaannisi yootiyobaa siyiyogee A keehi ufayssiyo gishshawu, I yootiyobaa siyiyo wode, A oottanabay awu erettennan ixxiis.
21 Shin Heeroodisi ba yeleta gallassi ba haaruwan deꞌiya sunttata, wotaaddaratu halaqata, qassi Galiilan keehi erettida gita asata kahuwa shoobbido wode, Heeroodiyadissi injjetiya gallassay gakkiis. 22 He wode Heeroodiyadi naꞌiya yaada, Heeroodisa sinttaaninne aara issippe miyageetu sinttan durada eta ufayssaasu. Yaatin kawoy naꞌiyo, “Neeni koyiyobaa aybanne tana oychcha, qassi ta neeyyo hegaa immana” yaagiis. 23 I ubba iyyo, “Neeni tana oychchiyobaa aybanne, haray atto ta kawotettawu baggaa gidikkokka, taani neeyyo immana” yaagidi caaqqiis. 24 Hegaa gishshawu, A baada ba aayyiyo, “Taani ay oychchoo?” yaagaasu. Yaagin I aayyiya, “Asaa haattan muukkiya Yohaannisa huuphiya oychcha” yaagaasu. 25 Sohuwara naꞌiya kawuwakko eesuwan baada, “Neeni asaa haattan muukkiya Yohaannisa huuphiya sayniyan haꞌꞌi tawu immanaadan koyays” yaagada oychchaasu. 26 Kawoy hegan keehi azzanikkonne, ba caaquwa gishshawunne ba imattatussi* giidi, A oychchidobaa eeno giis. 27 Hegaa gishshawu, kawoy naagiyagaa sohuwara azazidi, Yohaannisa huuphiya ehaanaadan kiittiis. Yaatin I biidi, qasho keettan A siifidi, 28 A huuphiya sayniyan ehiis. Yaatidi, hegaa naꞌeeyyo immin, naꞌiya ba aayeeyyo immaasu. 29 Yohaannisa kaalliyageeti hegaa siyidi yiidosona; yaatidi A anhaa efiidi moogidosona.
30 Yesuusi kiittidoogeeti A matan shiiqidi eti oottidonne tamaarissido ubbabaa ayyo yootidosona. 31 Yiyanne biya asay daro gidiyo gishshawu, eti qumaakka maanawu wode demmibookkona. Hegaa gishshawu, I eta, “Guuttaa shemppanawu asi baynnasaa hinddite” yaagiis. 32 Hegaa gishshawu, eti banttarkka wolwoluwan asi baynnasaa biidosona. 33 Shin asay eti biyogaa beꞌiis, qassi daroti hegaa eridosona; yaatidi eti katamatu ubbaappe issippe woxxi biidi, etappe kasetidi yaa gakkidosona. 34 I wolwoluwappe wodhdhiyo wode cora asaa beꞌidi, eti heemmiya asi baynna dorssaa mala gidiyo gishshawu, etawu qarettiis. Yaatidi eta darobaa tamaarissiyogaa doommiis.
35 He wode away wullanawu matiis; yaatin Yesuusa kaalliyageeti akko yiidi hagaadan giidosona: “Ha sohoy buta, qassi saꞌay yuuyiichchiis. 36 Asay matan deꞌiya katamatanne eta yuushuwan deꞌiya heeraa biidi bawu qumaa shammanaadan eta moyssa.” 37 I eta, “Intte etawu miyobaa immite” yaagiis. Yaagin, eti A, “Nuuni biidi 200 dinaariyan* daabbuwa shammidi asay maana mala immanaadan koyay?” yaagidosona. 38 I eta, “Intteyyo aappun daabboy deꞌii? Ane biidi beꞌite!” yaagiis. Eti beꞌi simmidi, “Ichchashu daabbotinne naaꞌꞌu moleti deꞌoosona” yaagidosona. 39 Qassi I asay ubbay citan citan maatan uttanaadan yootiis. 40 Hegaa gishshawu, eti citan citan 100, qassi 50 gididi uttidosona. 41 I ichchashu daabbotanne naaꞌꞌu moleta oyqqidi saluwa xeelliiddi woossiis.* Yaatidi, daabbota menttidi, bana kaalliyageeti asaa sintti aattanaadan etassi immiis; qassi naaꞌꞌu moleta ubbawu shaakkiis. 42 Yaatin, asay ubbay miidi kalliis; 43 qassi eti shiishshido meꞌerettidi attida daabboy moliya gujjennan 12 daachcho kumetta. 44 Daabbuwa miida attuma asati 5,000.
45 Hegaappe simmin, I asaa moyssidi yeddanaashin, A kaalliyageeti wolwoluwan gelidi appe sinttatidi Beetasayda baggi hefintti pinnanaadan sohuwara yootiis. 46 Shin I asaa moyssi simmidi, woossanawu deriya kiyiis. 47 Saꞌay omariyo wode, wolwoloy abbawu gidduwan deꞌees; shin I he wodekka kase sohuwan deꞌees. 48 Eti carkkoy sugishin laagganawu metootiyogaa I beꞌido wode, qammaappe oyddantto shaaho heeran,* abbaa bollaara hemettiiddi etakko biis; shin eta sinttaara kanttidi biyaba milatiis. 49 Eti I abbaa bolli hemettishin beꞌidi, “Laa hagee ajjuuteeyye!” giidi qoppidosona. Qassi waassidosona. 50 Ayssi giikko, eti ubbay A beꞌidi dagammidosona. Shin I sohuwara eta, “Tanattennee! yayyoppite” yaagiis. 51 He wode I etakko wolwoluwa giddo geliis; qassi carkkoy woppu giis. Yaanin eti keehi malaalettidosona; 52 ayssi giikko, eti Yesuusi daabbuwan oottidobay keehi koshshiyaba gidiyogaa eribookkona; eti he wodekka ubbabaa akeekanawu metootoosona.
53 Eti abbaa pinnidi Genssereexa gakkidi, wolwoluwa matasan essidosona. 54 Shin eti wolwoluwappe wodhdhosaara, asay A shaakki eriis. 55 Asay hegaa heeran ubbasaa woxxi biidi, harggidaageeta I yan deꞌees gin siyidosaa halan ehiyogaa doommiis. 56 Qassi awaaninne, I qeeri katamata woy gita katamata woy gaxariya biyo wode, harggida asata giyaa ehin, A maayuwa macaraa bochchanawu woossoosona; qassi hegaa bochchida ubbay paxiis.
7 Parisaawetinne xaafetuppe issoti issoti Yerusalaameppe yiidi A matan shiiqidosona. 2 Qassi eti Yesuusa kaalliyageetuppe issoti issoti bantta kushiya geeshshennan, hegeekka, meecettennan* qumaa miyogaa beꞌidosona. 3 (Ayssi giikko, Parisaawetinne Ayhudati ubbay mayzzaa wogaa baqqi oyqqidi, qesiya gakkanawu bantta kushiya meecettennan qumaa mookkona; 4 qassi eti giyaappe yiyo wode, banttana geeshshennan qumaa mookkona. Eti laattidonne mintti kaalliyo hara daro wogay deꞌees; leemisuwawu, wanccata, xaarotanne nahaase miishshata haattan muukkoosona.) 5 Hegaa gishshawu, he Parisaawetinne xaafeti A hagaadan giidi oychchidosona: “Nena kaalliyageeti mayzzaa wogaa kaallennan aggidi, kushiya meecettennan qumaa miyoy aybissee?” 6 I etayyo hagaadan giis: “Ha shollooretoo, Isiyasi inttebaa yootidobay bessiyaba; I hagaadan giidi xaafiis: ‘Ha asay tana ba doonan bonchchees, shin eta wozanay taappe haakkidi deꞌees. 7 Eti asa azazuwa Xoossaagaa milatissidi tamaarissiyo gishshawu, tawu mela goynnoosona.’ 8 Intte Xoossaa azazuwa kaalliyogaa aggidi, asaa wogaa baqqi oyqqidi kaalleeta.”
9 Qassikka I etayyo hagaadan giis: “Intte intte wogaa kaallanawu, cincceettees giidi Xoossaa azazuwa aggiigeeta. 10 Leemisuwawu, Muusee, ‘Ne aawaanne ne aayyiyo bonchcha,’ qassi, ‘Ba aawaa woy ba aayyiyo qanggiya* ura worite’ yaagiis. 11 Shin intte hagaadan geeta: ‘Issi uri ba aawaa woy ba aayyiyo, “Taani nena maaddana danddayiyobay qurbbaana (hegeekka, Xoossawu immanawu qaalaa gelidoba)” yaagikko,’ 12 ba aawaayyo woy ba aayeeyyo issibanne oottennaadan diggeeta. 13 Yaatiyogan, intte harata laatissiyo intte wogaassi giidi Xoossaa qaalaa goꞌꞌi baynnaba ootteeta. Qassi hegaa mala darobaa ootteeta.” 14 Hegaa gishshawu, I asaa haranttuwakka baakko xeegidi etayyo hagaadan giis: “Intte ubbay taani yootiyobaa siyitenne hegee woygiyogaakko akeekite. 15 Asa giddo geliyabay aybinne A tunissana danddayenna; shin appe kiyiyabay A tunissees.” 16* ——
17 He wode, Yesuusi asaa aggidi haakki biidi issi keettaa geliis; yaatin, A kaalliyageeti he leemisuwabaa A oychchidosona. 18 Hegaa gishshawu, I etayyo hagaadan giis: “Inttekka etadan akeekekketii? Asa giddo geliyabi aybinne A tunissana danddayennaagaa erekketii? 19 Ayssi giikko, hegee A uluwara kanttidi gaxi kiyidi ollan geleesippe attin, A wozanan gelenna.” Yesuusi hegaadan giyogan qumi ubbi geeshsha gidiyogaa yootiis. 20 Qassi I hagaadan giis: “Issi asa tunissiyabay appe kiyiyabaa. 21 Ayssi giikko, asa giddoppe, A wozanaappe kiyiyabay iita qofaa, pokkiya tuna nagaraa,* wuussaa, asa woriyogaa, 22 wodiraa laammiyogaa, yaariya, iita oosuwa, cimuwa, yeellaa xayiyogaa,* qanaatiya, tooshiya, otoruwanne eeyyatettaa. 23 Ha iitabati ubbati issi asappe kiyoosonanne A tunissoosona.”
24 I yaappe denddidi, Xiiroosanne Sidoona biittaa biis. Qassi I yaa biidoogaa ooninne eranaadan koyibeenna gishshawu issi keettaa geliis, shin asay eriis. 25 I yaa gakkosaara, issi maccaasiya abaa siyada, yaada A tohuwan kunddaasu; I guutta naꞌiyo tuna ayyaanay oyqqiis. 26 He maccaasiya Sooriyan deꞌiya Pinqqen yelettida Giriike asa; qassi A ba naꞌeeppe daydanttaa kessanaadan Yesuusa mintta woossaasu. 27 Shin I iyyo, “Koyro naati kallona; ayssi giikko, naatu qumaa ekkidi kana maratussi oliyogee likke gidenna” yaagiis. 28 Shin maccaasiya ayyo, “Ee, godawu, shin haray atto masoofiya lanqqiyan deꞌiya kana maratikka guutta naatuppe wodhdhiya suuppa qumaa moosona” yaagaasu. 29 Yaagin Yesuusi O, “Neeni hagaa giido gishshawu ba; daydanttay ne naꞌeeppe kiyiis” yaagiis. 30 Hegaa gishshawu, A ba soo baada, naꞌiya arssan zinꞌꞌidoogaa beꞌaasu, qassi daydanttay ippe kiyidoogaa eraasu.
31 Yesuusi Xiiroosappe simmiyo wode Sidoonaara kanttiis; qassi Dikapoolisaara* kanttidi Galiila Abbaakko biis. 32 Haasayanawu metootiya tulle bitaniya yan asay akko ehiidi, I he bitaniya pattana* mala woossiis. 33 Qassi I he bitaniya asaappe shaakkidi haahosaa efiis. Yaatidi, ba biradhdhiya bitaniya hayttan naaqqiis, qassi cuchchi simmidi A inxxarssaa bochchiis. 34 I yaatidi, saluwa xeellidi tookki shemppidi A, “Efetta” yaagiis; hegee, “Dooyetta” giyogaa. 35 Yaagin A hayttay dooyettiis, qassi haasayanawu metootiya bitanee paxidi, suure haasayiyogaa doommiis. 36 Yaanin, Yesuusi eti ooyyonne yootenna mala azaziis; shin I zaari zaari azaziyo wode, eti oduwa ubba yaa gujjidosona. 37 Eti keehi malaalettidi, “I oottido ubbabay loꞌꞌo. I haray atto tulletikka siyanaadaaninne duudetikka haasayanaadan oottees” yaagidosona.
8 He wodekka cora asay Yesuusakko shiiqiis; qassi etayyo miyobi baawa. Hegaa gishshawu, Yesuusi bana kaalliyageeta xeegidi, etayyo hagaadan giis: 2 “Taani ha asaayyo qarettays; ayssi giikko, eti tanaara heezzu gallassaa takkidosona, qassi etawu miyobi baawa. 3 Taani eti namisettishin* soo yeddikko, eti labbanidi ogiyan kunddana, qassi issoti issoti keehi haahosaappe yiidosona.” 4 Shin Yesuusa kaalliyageeti A, “Issi uri ha asaa kalissiya daabbuwa ha buta sohuwan awuppe demmanee?” yaagidosona. 5 Yaagin Yesuusi eta, “Intteyyo aappun daabboy deꞌii?” yaagiis. Eti, “Laappun daabboti deꞌoosona” yaagidosona. 6 I asay saꞌan uttanaadan yootiis. Yaatidi I laappun daabbota oyqqidi galatiis, yaatidi mentterettidi, bana kaalliyageeti asaayyo gishana mala etawu immiis; eti qassi hegeeta asaayyo gishidosona. 7 Etawu amarida qeeri moletikka deꞌoosona; I Xoossaa galatidi, hegeetakka asaayyo gishana mala etayyo yootiis. 8 Hegaa gishshawu, eti miidi kallidosona; qassi Yesuusa kaalliyageeti meꞌerettidi attida daabbuwa laappun gita daachcho kumettaa shiishshidosona. 9 Hegaa miida attuma asati 4,000 gidana. I hegaappe guyyiyan asaa moyssiis.
10 Sohuwara, I bana kaalliyageetuura wolwoluwan gelidi Dalmmanuta heeraa biis. 11 Parisaaweti akko yiidi, A paaccanawu, I saluwappe malaataa bessanaadan oychchiyogan aara palamettiyogaa doommidosona. 12 Hegaa gishshawu, Yesuusi keehippe azzanidi hagaadan giis: “Ha wodiya asay malaata beꞌanawu koyiyoy aybissee? Taani tumaa yootays, ha wodiya asay ay malaatanne beꞌenna.” 13 Yaagidi I eta aggi biidi, haranttuwa wolwoluwan gelidi abbaappe hefintti pinniis.
14 Shin eti dogidi daabbuwa oyqqennan biidosona; hegaa gishshawu, wolwoluwa giddon etawu issi daabboppe hari baawa. 15 Qassi I hagaadan giidi etawu mintti yootiis: “Parisaawetu irshshuwappenne Heeroodisa irshshuwappe naagettite.” 16 Yaagin eti daabbuwa oyqqibeennaagaa issoy issuwara haasayiyogaa doommidosona. 17 I hegaa eridi eta hagaadan giis: “Intte daabbuwa oyqqibeennaagaa ayssi haasayeetii? Intte hanno gakkanawukka erekketiinne akeekekketii? Haꞌꞌikka intte ubbabaa akeekanawu metooteetii? 18 ‘Intteyyo ayfee deꞌees, shin beꞌekketii? Qassi intteyyo hayttay deꞌees, shin siyekketii?’ Intte hassayekketii? 19 Taani 5,000 attuma asawu ichchashu daabbota menttada immido wode, meꞌerettidi attida daabbuwa aappun daachcho kumettaa shiishshidetii?” Yaagin eti ayyo, “Tammanne naaꞌꞌa” yaagidosona. 20 “Taani 4,000 attuma asawu laappun daabbota menttada immido wode, meꞌrettidi attida daabbuwa aappun gita daachcho kumettaa shiishshidetii?” Yaagin eti ayyo, “Laappuna” yaagidosona. 21 Yaagin I eta, “Haꞌꞌikka akeekekketii?” yaagiis.
22 Hegaappe guyyiyan, eti Beetesayda biidosona. Asay akko issi qooqe bitaniya ehiidi, he bitaniya pattana mala A woossiis. 23 Yaatin, I qooqe bitaniya kushiya oyqqidi, A katamaappe gaxi kessiis. I bitaniya ayfiyan cuchchi simmidi, ba kushiya A bolli wottidi, “Neeyyo beettiyabi deꞌii?” yaagidi oychchiis. 24 Bitanee xoqqu gi xeellidi, “Taani asay hemettiyagaa beꞌays; shin eti mittaa milatoosona” yaagiis. 25 Yaanin, Yesuusi bitaniya ayfiya zaarettidi bochchin, bitanee paxidi ubbabaa geeshshidi xeelliis. 26 Hegaa gishshawu, Yesuusi, “Katamaa geloppa” yaagidi, bitaniya A soo yeddiis.
27 Yesuusinne A kaalliyageeti Piliphphoosa Qiisaariya katamata baanawu denddidosona; yaa biiddi I bana kaalliyageeta, “Tana asay oona gii?” giidi oychchiis. 28 Eti ayyo hagaadan giidosona: “Asaa haattan muukkiya Yohaannisa goosona, shin harati Eelaasa goosona, qassi harati Xoossay erissidobaa yootiyageetuppe issuwa goosona.” 29 I eta, “Intte shin, tana oona geetii?” yaagidi oychchiis. Yaagin Pheexiroosi, “Neeni Kiristtoosa” yaagidi zaariis. 30 Yaagin, I oonakko eti ooyyonne yootenna mala minttidi azaziis. 31 Qassi I asa Naꞌay daro waayettiyogee, cimati, waanna kahinetinne xaafeti A bohiyogeenne woriyogee, qassi heezzantto gallassi Xoossay A hayquwappe denttiyogee attennaagaa eta tamaarissiyogaa doommiis. 32 I etayyo hegaa geeshshidi yootiis. Shin Pheexiroosi A baakko zaaridi, hegaadan haasayido gishshawu A calliis. 33 Yaatin, I guyye simmidi bana kaalliyageeta xeelliis; qassi Pheexiroosa, “Seexaanay, taappe guyye aadhdha! ayssi giikko, neeni asa qofappe attin, Xoossaagaa qoppakka” yaagidi seeriis.
34 I asaanne bana kaalliyageeta baakko xeegidi eta hagaadan giis: “Ooninne tana kaallana koyikko, bana yeggi bayo; yaatidi, ba mittaa* tookkidi aggennan tana kaallo. 35 Ayssi giikko, ba shemppuwa* ashshanawu koyiya asi hayqqana, shin tana kaalliyo gishshawunne mishiraachchuwa gaasuwan hayqqiya asi* zaarettidi deꞌana. 36 Woni issi uri ha saꞌan deꞌiya ubbabaa demmidi, ba shemppuwa* xayssikko, hegee A ay maaddanee? 37 Woni issi uri ba shemppuwa* ashshanawu ay immana danddayii? 38 Ayssi giikko, ammanettennanne* nagaraa oottiya ha wodiya asaa sinttan ooninne tanaaninne ta qaalan yeellatikko, asa Naꞌaykka ba Aawaa bonchchuwan geeshsha kiitanchchatuura yiyo wode an yeellatana.”
9 Qassikka, I etayyo hagaadan giis: “Taani intteyyo tumaa odays, hagan eqqidaageetuppe amaridaageeti Xoossaa Kawotettay ba wolqqan yiidoogaa beꞌennan mule hayqqokkona.” 2 Usuppun gallassappe guyyiyan, Yesuusi Pheexiroosa, Yaaqoobanne Yohaannisa xalaalaa kaalettidi issi gita deriya kessiis. Qassi eta sinttan A meray laamettiis; 3 A maayoy ooninne meeccidi booxissana danddayiyogaappe keehi aaruwan booxxidi phooliis. 4 Qassi Eelaasinne Muusee Yesuusaara haasayishin eti beꞌidosona. 5 He wode Pheexiroosi Yesuusa hagaadan giis: “Rebbi, nuuni hagawu yiido gishshawu keehi ufayttida. Hegaa gishshawu, ane nuuni heezzu daaseta, issuwa neeyyo, issuwa Muuseyyo, qassi issuwa Eelaasayyo daasoos.” 6 Pheexiroosi ay gaanaakko eribeenna; ayssi giikko, eti keehi yayyidosona. 7 He wode shaaray yiidi eta kammiis; qassi shaaraa giddoppe, “Hagee ta Naꞌaa, taani siiqiyogaa. I yootiyobaa siyite” yaagiya qaalay siyettiis. 8 Hegaappe guyyiyan, eti yuushshi aatti xeellidi, Yesuusappe hara asi banttanaara baynnaagaa beꞌidosona.
9 Eti deriyappe wodhdhishin, asa Naꞌay hayquwappe denddana gakkanaashin eti beꞌidobaa ooyyonne yootenna mala, I minttidi azaziis. 10 Eti I yootidobaa bantta wozanan wottidosona;* shin I hayquwappe denddiyogee woygiyogaakko bantta giddon haasayidosona. 11 Qassi eti A, “Xaafeti Eelaasi koyro yaana bessiyogaa yootiyoy aybissee?” yaagidi oychchidosona. 12 I etayyo hagaadan giis: “Eelaasi koyro yiidi ubbabaa giigissana bessees; shin asa Naꞌay daro waayettananne asay A karana bessees geetettidi xaafettidoy aybissee? 13 Gidoppe attin, Eelaasi yiidoogaa taani intteyyo odays; qassi abay xaafettidoogaadan, eti A bolli oottana koyiyobaa oottidosona.”
14 Eti Yesuusa kaalliya haratukko yiidi, eta yuushuwan daro asaa beꞌidosona; qassi xaafeti etaara palamettoosona. 15 Shin he asay ubbay A beꞌosaara, eti qoppennan I yiido gishshawu malaalettidosona; yaatidi A sarotanawu woxxi yiidosona. 16 Hegaa gishshawu, I eta, “Intte etaara palamettiyobay aybee?” yaagidi oychchiis. 17 Qassi asaa giddoppe issoy Yesuusa hagaadan giis: “Asttamaariyawu, asa duudissiya ayyaanay ta naꞌaa oyqqido gishshawu A neekko ehaas. 18 I naꞌaa oyqqiyo wode ubban saꞌan olees; yaatin naꞌaa doonaara hoommoy goppattees, qassi I achchaa garcceesinne wolqqaa xayees. Taani nena kaalliyageeti he tuna ayyaanaa kessanaadan eta oychchaas, shin eti kessana danddayibookkona.” 19 I eta hagaadan giis: “Ammanenna ha wodiya asawu, taani inttenaara awude gakkanaashin deꞌanee? Taani inttena awude gakkanaashin danddayanee? A taakko ehiite.” 20 Yaagin eti naꞌaa akko ehiidosona; shin he iita ayyaanay Yesuusa beꞌosaara, naꞌaa keehi kokkorssiis. Naꞌay saꞌan kunddidi doonaara hoommoy goppattishin gonddorettiis. 21 Yaatin Yesuusi naꞌaa aawaa, “I awudeppe doommidi hagaadan hanii?” yaagidi oychchiis. I hagaadan giis: “Naatettaappe doommidi, 22 he ayyaanay A woranawu darotoo, issitoo taman issitoo haattan olees. Shin neeni A pattana danddayikko, nuuyyo qarettada nuna maadda.” 23 Yesuusi ayyo hagaadan giis: “Ayssi, ‘Neeni danddayikko’ yaagay? Ayssi giikko, ammaniya urawu ubbabay danddayettees.” 24 Sohuwara naꞌaa aaway ba qaalaa xoqqu oottidi, “Taani ammanays! Shin ta ammanoy minnanaadan maadda!” yaagiis.
25 Yesuusi banttakko asay eesotiiddi yiyogaa beꞌidi, tuna ayyaanaa hagaadan giidi seeriis: “Naꞌaa duudenne tulle oottida ayyaanawu, taani ne appe kiyanaadan azazays, qassi zaarettada an geloppa!” 26 He iita ayyaanay waassi simmidi, naꞌaa keehi kokkorssidi kiyiis; qassi naꞌay hayqqidaba milatiis; yaanin daro asay, “I hayqqiis!” yaagiis. 27 Shin Yesuusi naꞌaa kushiya oyqqidi denttin, naꞌay denddi eqqiis. 28 Hegaa gishshawu, I soo geli simmin, A kaalliyageeti hara asi siyennan, “Nuuni he ayyaanaa kessana danddayibeennay aybissee?” yaagidi A oychchidosona. 29 I etayyo, “Hagaa malay kiyana danddayiyoy woosa xalaalaana” yaagiis.
30 Eti hegaappe denddidi Galiilaa biidosona, shin I ooninne hegaa eranaadan koyibeenna. 31 Ayssi giikko, I bana kaalliyageeta tamaarissana koyiis, qassi I etayyo hagaadan giis: “Asay asa Naꞌaa A morkketuyyo aattidi immana, qassi eti A worana, shin eti A worikkonne, heezzantto gallassi Xoossay A hayquwappe denttana.” 32 Gidoppe attin, I yootidobaa eti akeekibookkona, qassi A oychchanawukka yayyidosona.
33 Qassi eti Qifirinaahooma gakkidosona. Eti son deꞌishin, I eta, “Intte ogiyan palamettidobay aybee?” yaagidi oychchiis. 34 Eti ogiyan bantta giddon gitatiyagee oonakko issoy issuwara palamettido gishshawu, coꞌꞌu giidosona. 35 Hegaa gishshawu, I uttidi kiitettida tammanne naaꞌꞌata xeegidi etayyo, “Gitatana koyiya ooninne ubbaappe guutta gidananne ubbaassi haggaazana bessees” yaagiis. 36 Yaagidi I issi guutta naꞌaa ehiidi eta giddon essiis, qassi naꞌaa hashiyan ba kushiya wottidi etayyo hagaadan giis: 37 “Hagaa mala guutta naatuppe issuwa ta sunttan mokkiya ooninne tanakka mokkees; qassi tana mokkiya ooninne tana mokkiyogaa xalaala gidennan, tana Kiittidaagaakka mokkees.”
38 Yohaannisi A, “Asttamaariyawu, issi asi ne sunttan daydanttata kessishin beꞌidi, I nena kaallenna gishshawu digganawu malida” yaagiis. 39 Shin Yesuusi hagaadan giis: “Ta sunttan malaaliyabaa oottananne hegaappe simmin sohuwara tabaa iitabaa haasayana danddayiya uri baynna gishshawu, A digganawu maloppite. 40 Ayssi giikko, nuna eqettenna uri ooninne nu bagga. 41 Qassi taani intteyyo tumaa odays, intte Kiristtoosa kaalliyageeta gidiyo gishshawu intteyyo issi burccukko haattaa uyanawu immiya ooninne ba anjjuwa demmennan mule attenna. 42 Shin ammaniya ha guuttatuppe issuwa ammanuwa xubbiya ooninne, A qooriyan wogga woxaa* qachchin abban olettiyakko ayyo keha.
43 “Ne kushee neeyyo xube gidikko, qanxxada ola baya. Naaꞌꞌu kushee deꞌishin Gaannabiyan,* toꞌana danddayenna taman olettiyogaappe issi kushee baynnan deꞌuwa demmiyogee neeyyo loꞌꞌo. 44* —— 45 Qassi ne tohoy neeyyo xube gidikko, qanxxada ola baya. Naaꞌꞌu tohoy deꞌishin Gaannabiyan* olettiyogaappe issi tohoy baynnan deꞌuwa demmiyogee neeyyo loꞌꞌo. 46* —— 47 Ne ayfee neeyyo xube gidikko, kessada ola baya. Naaꞌꞌu ayfee deꞌishin Gaannabiyan* olettanaappe issi ayfiyara Xoossaa Kawotettaa geliyogee neeyyo loꞌꞌo. 48 Gaannabiyan guxunee hayqqenna, qassi tamaykka toꞌenna.
49 “Issi asi maxiniya qoliyogaadan, hegaa mala asatu bolli tamay qolettana bessees. 50 Maxinee loꞌꞌo, shin maxinee malꞌꞌuwa aggikko, intte A aybin malꞌꞌettuuteetii? Intte maxine mala gidite, qassi issoy issuwara saruwan deꞌite.”
10 I hegaappe denddidi, Yorddaanoosa shaafaappe hefintti Yihudaa biittaa gaxaa biis, qassi asay he wodekka akko shiiqiis; I ubbatoo oottiyogaadan, eta tamaarissiyogaa doommiis. 2 Qassi Parisaaweti akko shiiqidi, A paaccanawu qoppidi, issi uri machcho yeddiyogee wogakkonne oychchidosona. 3 I eta, “Muusee inttena azazidobay aybee?” yaagiis. 4 Eti, “Machchiyo tumuppe yeddidoogaa bessiya woraqataa immidi O yeddiyogaa Muusee diggibeenna” yaagidosona. 5 Shin Yesuusi etayyo hagaadan giis: “Intte wozanaa muume gidiyo gishshawu I intteyyo he azazuwa xaafiis. 6 Shin doomettan, ‘I eta attumanne macca oottidi medhdhiis. 7 Hegaa gishshawu, issi asi ba aawaanne ba aayyiyo aggi bayin, 8 eti naaꞌꞌay issi asho gidana’; yaaniyo gishshawu, eti issi ashoppe attin, naaꞌꞌa gidokkona. 9 Hegaa gishshawu, Xoossay issippe gattidoogaa ay asinne shaakkoppo.” 10 Eti he wodekka issi keettan deꞌishin, A kaalliyageeti hegaa xeelliyagan A oychchidosona. 11 I etayyo hagaadan giis: “Ba machchiyo yeddidi haranno ekkiya ooninne wodiraa laammees; hegan O qohees, 12 qassi issi maccaasiya ba azinaappe kiyada haraa gelikko, wodiraa laammawusu.”
13 Hegaappe simmin, I guutta naata anjjanaadan* asay akko ehiyogaa doommiis, shin A kaalliyageeti asaa hanqqettidosona. 14 Yesuusi hegaa beꞌidi ufayttibeenna gishshawu, eta hagaadan giis: “Naati taakko yona; eta diggoppite, ayssi giikko, Xoossaa Kawotettay eta mala asaassa. 15 Taani intteyyo tumaa odays, guutta naꞌi issibaa ekkiyogaadan Xoossaa Kawotettaa ekkenna ooninne mule yaa gelenna.” 16 Qassi I naata qoommidi, eta huuphiyan ba kushiya wottidi eta anjjiis.
17 I hegaappe kiyidi biishin issi bitanee woxxi yiidi A sinttan gulbbatidi, “Loꞌꞌo Asttamaariyawu, taani merinaa deꞌuwa demmanawu ay oottana bessii?” yaagidi A oychchiis. 18 Yesuusi ayyo hagaadan giis: “Tana ayssi loꞌꞌuwawu gay? Issi Xoossaappe hari loꞌꞌoy ooninne baawa. 19 Ha azazota eraasa: ‘Asa woroppa, wodiraa laammoppa, wuuqqoppa, wordduwan markkattoppa, balibakkada nebaa gidennabaa ekkoppa, ne aawaanne ne aayyiyo bonchcha.’ ” 20 Bitanee ayyo, “Asttamaariyawu, taani ha azazota ubbaa naatettaappe doommada naagays” yaagiis. 21 Yesuusi A xeelliis; qassi A siiqido gishshawu hagaadan giis: “Neeyyo issibay paccees: Baada, neeyyo deꞌiyabaa bayzzada miishshaa hiyyeesatuyyo imma; yaatikko, neeyyo saluwan alꞌꞌo miishshay deꞌana; yaatada, yaada tana kaalliyagaa gida.” 22 Shin hegee A ufayssibeenna gishshawu, bitanee azzaniiddi biis; ayssi giikko, ayyo daro aqoy deꞌees.
23 Yesuusi yuushshi aatti xeellidi, bana kaalliyageetuyyo hagaadan giis: “Xoossaa Kawotettaa geliyogee daro miishshay deꞌiyogeetuyyo ay keena metiyabee!” 24 Shin Yesuusa kaalliyageeti hegan malaalettidosona. He wode Yesuusi hagaadan giis: “Naatoo, Xoossaa Kawotettaa geliyogee ay keena metiyabee! 25 Dure asi saluwa Kawotettaa geliyogee gaameelay marppiya xooꞌiyara kanttiyogaappe aaruwan metiyaba.” 26 Eti kaseegaappe aaruwan malaalettidi ayyo,* “Ooni attana danddayii?” yaagidosona. 27 Yesuusi eta tishshi ootti xeellidi, “Hagee asassi danddayettenna, shin Xoossaassi hegaadaana gidenna; ayssi giikko, Xoossaassi ubbabay danddayettees” yaagiis. 28 Pheexiroosi ayyo, “Nuuni ubbabaa aggi bayidi nena kaallida” yaagiis. 29 Yesuusi hagaadan giis: “Taani intteyyo tumaa odays, tana kaalliyo gishshawunne mishiraachchuwa gishshawu keettaa woy ishata woy michchota woy aayyiyo woy aawaa woy naata woy gadiya aggida ooninne, 30 asay naaqqishinkka, ha wodiyan* keettata, ishata, michchota, aayota, naatanne gadiya 100 kushe dariyagaa demmana, qassi sinttappe yaana wodiyan merinaa deꞌuwa demmana. 31 Shin sinttatida daroti wurssetta gidana, qassi wurssettati sinttatana.”
32 He wode eti Yerusalaame kiyoosona, qassi Yesuusi etappe sinttatidi hemettees; yaatin eti malaalettidosona, shin eta geeduwan deꞌiya harati yayyidosona. He wodekka I kiitettida tammanne naaꞌꞌata haratuppe shaakkidi, bana gakkana haniyabaa etayyo hagaadan giidi yootiis: 33 “Siyite! Nuuni Yerusalaame biiddi deꞌoos; qassi asay asa Naꞌaa oyqqidi waanna kahinetuyyonne xaafetuyyo immana. Eti I hayqqana bessees giidi pirddidi, hara biittaa asawu A aatti immana, 34 yaatin, eti A borana, A bolli cuchchana, A shocananne worana, shin heezzantto gallassi Xoossay A hayquwappe denttana.”
35 Zabddiyosa naati Yaaqoobinne Yohaannisi akko shiiqidi A, “Asttamaariyawu, nuuni nena oychchiyo aybakka neeni nuuyyo oottanaadan koyoos” yaagidosona. 36 I eta, “Taani intteyyo ay oottanaadan koyeetii?” yaagiis. 37 Eti, “Neeni ne Kawotettan haariyo wode, nuuppe issoy neeppe ushachcha baggaara issoy qassi neeppe haddirssa baggaara uttanaadan eeno ga” yaagidosona. 38 Shin Yesuusi eta hagaadan giis: “Intte ay oychchiyakko erekketa. Taani uyaydda deꞌiyobaa uyana danddayeetii, woykko taani muukettaydda deꞌiyogaa malaa muukettana danddayeetii?” 39 Eti ayyo, “Ee danddayoos” yaagidosona. Yaagin, Yesuusi etayyo hagaadan giis: “Taani uyaydda deꞌiyobaa intte uyana, qassi taani muukettaydda deꞌiyogaa malaa intte muukettana. 40 Gidoppe attin, taappe ushachcha baggaaranne haddirssa baggaara uttiyo sohuwa immiyay tana gidikke, shin he sohoy Xoossay hegaa giigissido asatussa.”
41 Hankko tammati hegaa siyidi, Yaaqoobanne Yohaannisa hanqqettidosona. 42 Shin Yesuusi eta baakko xeegidi hagaadan giis: “Hara biittaa asaa haariyageeti* bantta sheniyadan asaa haariyogaa, qassi sunttati banttawu deꞌiya maatan asaa huqqunniyogaa ereeta. 43 Intte giddon hegaadan hanana bessenna; shin intte giddon gitatana koyiya ooninne inttessi haggaaziyagaa gidana bessees; 44 qassi intte giddon sintta xeera gidana koyiya ooninne ubbaayyo aylle gidana bessees. 45 Ayssi giikko, haray atto asa Naꞌaykka asawu haggaazanawunne darota wozanawu qanxxiyoba oottidi ba shemppuwa* immanawu yiisippe attin, asay awu haggaazana mala yibeenna.”
46 Hegaappe guyyiyan, eti Yarkko biidosona. Shin Yesuusi, A kaalliyageetinne cora asay Yarkkoppe kiyidi biyo wode qooqe woosanchchay Barxximoosi (Ximoosa naꞌay) ogiya doonan uttiis. 47 I Naazireete Yesuusi ogiyara aadhdhiyogaa siyidi, ba qaalaa xoqqu oottidi, “Daawita naꞌawu, Yesuusaa, taayyo qaretta!”* yaagiis. 48 Yaagin I coꞌꞌu gaanaadan daroti A hanqqettidosona, shin I ba qaalaa yaa xoqqissidi zaari zaaridi, “Daawita naꞌawu, taayyo qaretta!”* yaagiis. 49 Yaatin Yesuusi eqqi ekkidi, “A haa xeegite” yaagiis. Hegaa gishshawu, eti qooqe bitaniya, “Yayyoppa! Dendda eqqa; I nena xeessiiddi deꞌees” yaagidi xeegidosona. 50 I bollaara maayidobaa qaari olidi, shuttu giidi Yesuusakko biis. 51 Yaatin Yesuusi A, “Taani neeyyo ay oottanaadan koyay?” yaagiis. Qooqe bitanee A, “Rabbooni* taani zaaretta xeellanaadan ootta” yaagiis. 52 Yaagin Yesuusi A, “Ba. Ne ammanoy nena pattiis” yaagiis. Qassi sohuwara A ayfee xeelliis; yaatin, I Yesuusa kaalliyogaa doommiis.
11 Eti Yerusalaame matidi, Beetefaagenne Biitaaniya katamati deꞌiyo Dabira Zayte Deriya gakkidosona; he wode Yesuusi bana kaalliyageetuppe naaꞌꞌata kiittidi, 2 eta hagaadan giis: “He beettiya katamaa biite; intte yaa gakkosaara, qashettida hare maraa beꞌana; hanno gakkanawu asi A toggi erenna. A birshshidi taakko ehiite. 3 Ooninne inttena, ‘Waateetii?’ giikko, ‘Hare maraa Goday koyees, qassi I sohuwara A haa zaarana’ giite.” 4 Hegaa gishshawu, eti biidi ogiya doonan deꞌiya issi keettaa penggiya sinttan hare maray qashettidaagaa beꞌidosona; yaatidi, A birshshidosona. 5 Shin yan eqqida asatuppe amaridaageeti eta, “Intte hare maraa birshshiyoy aybissee?” yaagidosona. 6 Eti Yesuusi giidoogaadan he asatuyyo yootidosona; yaatin, eti efeennaadan diggibookkona.
7 Eti hare maraa Yesuusawu ehiidi bantta maayuwa A bolli wottin, I A toggiis. 8 Qassi daroti bantta maayuwa ogiyan hiixxidosona, shin harati ogiya doonappe mittaa tashiya karidosona. 9 Qassi Yesuusappe sinttaara biya asaynne A geeduwa kaalliya asay ba qaalaa xoqqu oottidi hagaadan giis: “Xoossawu nuuni nena woossoos! A ashsha, Yihoowa* sunttan yiyagee anjjettidaagaa! 10 Nu aawaa Daawita naꞌay, haaranawu yiyagee anjjettidaagaa! Saluwan deꞌiyagoo, nuuni nena woossoos, A ashsha!” 11 Qassi I Yerusalaame gelidi, Xoossaa garuwa biidi yan deꞌiya ubbabaa beꞌiis, shin saꞌay omarido gishshawu, I Tammanne Naaꞌꞌatuura Biitaaniya biis.
12 Wonttetta gallassi eti Biitaaniyappe kiyidi biyo wode, I namisettiis. 13 I balase mittaa haahuwan beꞌidi ayfe demmanaakkonne giidi yaa biis. Shin I yaa biidi an bonccoppe attin, ayba ayfenne demmibeenna; ayssi giikko, he wodee balasee ayfiyo wode gidenna. 14 Hegaa gishshawu I, “Hagaappe guyyiyan ooninne neeppe ayfe demmoppo” yaagiis. Qassi A kaalliyageeti hegaa siyidosona.
15 Hegaappe guyyiyan, eti Yerusalaame biidosona. I Xoossaa garuwa gelidi yan bayzziyanne shammiya asata ubbaa yedettiyogaa doommiis; qassi miishshaa laammiyageetu xaraphpheezatanne haraphpheta bayzziyageetu oydeta aatti yeggiis. 16 I ay asinne issibaa tookkidi Xoossaa garuwara kanttidi beennaadan diggiis. 17 I asaa tamaarissiiddi hagaadan giis: “Geeshsha Maxaafay, ‘Ta keettay asa ubbawu woosa keetta geetettana’ yaagennee? Shin intte A bonqqiyageetu gonggolo oottideta.” 18 Yaagin, waanna kahinetinne xaafeti hegaa siyidi A waati woranaakko qoppiyogaa doommidosona; ayssi giikko, asay ubbay I waati tamaarissiyakko beꞌidi malaalettiyo gishshawu awu yayyidosona.
19 Saꞌay omariyo wode, eti katamaappe kiyidi biidosona. 20 Shin wonttetta gallassi maallado eti ogiyara aadhdhiiddi, balasiya mittay xaphuwa gakkanaashin melidoogaa beꞌidosona. 21 Pheexiroosi he mittaabaa hassayidi A, “Rebbi, beꞌa! Neeni qanggido balasiya mittay meliis” yaagiis. 22 Yaagin, Yesuusi etayyo hagaadan giis: “Xoossaa ammanite. 23 Taani intteyyo tumaa odays, ooninne ha deriya, ‘Toohettada abban oletta’ giikko, qassi I giidobay hananaagaa ammanidi ba wozanan sirana xayikko, I giidoogaadan hanana. 24 Taani intteyyo hagaadan giyoy hegaassa: Intte Xoossaa woossiyonne oychchiyo ubbabaa demmidabadan ammanite, qassi intte demmana. 25 Qassi intte woossiyo wode, saluwan deꞌiya intte Aaway intte nagaraa atto gaanaadan inttekka inttena naaqqida ooyyonne atto giite.” 26* ——
27 Eti haranttuwakka Yerusalaame yiidosona. Qassi I Xoossaa garuwan hemettishin waanna kahineti, xaafetinne cimati yiidi, 28 A, “Neeni hageeta ayba maatan oottay? Woy neeni hageeta oottanaadan ha maataa neeyyo oonee immiday?” yaagidosona. 29 Yesuusi etayyo hagaadan giis: “Taanikka inttena issibaa oychchays. Tawu intte zaarikko, taanikka ayba maatan hageeta oottiyakko intteyyo yootana. 30 Yohaannisi asaa haattan muukkanaadan saluwan deꞌiya Xoossay kiittideeyye asi kiittidee? Ane tawu zaarite.” 31 Hegaa gishshawu, eti hagaadan giidi issoy issuwara haasayidosona: “Nuuni, ‘Xoossay kiittiis’ giikko, I, ‘Yaatin I yootiyobaa ayssi ammanibeekketii?’ yaagana. 32 Shin nuuni, ‘Asi kiittiis’ gaanee?” Asay ubbay Yohaannisa Xoossay erissidobaa yootiya asa oottidi xeelliyo gishshawu etawu yayyidosona. 33 Hegaa gishshawu, eti Yesuusayyo, “Nuuni erokko” yaagidi zaaridosona. Yaatin, Yesuusi etayyo, “Taanikka hageeta ayba maatan oottiyakko intteyyo yootikke” yaagiis.
12 Hegaappe simmin, Yesuusi etayyo leemisuwa yootiyogaa doommiis; I hagaadan giis: “Issi bitanee woyniya tokkidi hegaa yuushshi aatti diridi, qassi woyniya yedhdhiyosaa bookkidi, woyniya naaganawu adussa gimbbiya gimbbiis; yaatidi, he gadiya kottaa oottiyageetussi immidi hara biitti biis. 2 Woyniya cakkiyo wode, I bana gakkiyagaa ehaana mala issi aylliya oosanchchatukko kiittiis. 3 Shin eti A oyqqidi shocidosonanne mela kushe yeddidosona. 4 I haranttuwakka issi aylliya etakko kiittin, eti A huuphiya shocidosonanne A kawushshidosona. 5 Qassi I haraakka kiittin, eti A woridosona; qassi hara darota kiittin, etappe amaridaageeta shocidosona, qassi amaridaageeta woridosona. 6 Hegaappe guyyiyan, woyniya gadiya goday wurssettan, ‘Eti ta naꞌaa bonchchana’ yaagidi, ba siiqiyo naꞌaa oosanchchatukko kiittiis. 7 Shin he oosanchchati issoy issuwawu, ‘Gadiya laattiyagee hagaa. Haa yiite, A woroos; yaatikko, laatay nubaa gidana’ yaagidosona. 8 Yaatidi, eti A oyqqidi woridi woyniya gadeppe kessidi olidosona. 9 Yaatin woyniya gadiya goday waatanee? I yiidi, he oosanchchata woridi, woyniya gadiya haratuyyo immana. 10 Geeshsha Maxaafay hagaadan giyogaa mule nabbabibeekketii?: ‘Gimbbiyageeti karidi aggido shuchchay zooziyawu liiphe shuchcha* gidiis. 11 Hagee Yihoowi* oottidoba, qassi nuna malaaliyaba.’”
12 He wode, eti I banttana qoppidi he leemisuwa yootidoogaa eridi, A oyqqanawu koyidosona; shin asawu yayyidosona. Hegaa gishshawu, A aggi bayidi biidosona.
13 Hegaappe simmin, eti A haasayan balaa demmidi A mootanawu Parisaawetuppenne Heeroodisa yamiyappe amarida asata akko kiittidosona. 14 He asati yiidi, A hagaadan giidosona: “Asttamaariyawu, neeni asa asappe shaakkenna gishshawunne Xoossaa ogiyabaa tumaa tamaarissiyo gishshawu, neeni tumaa yootiyogaanne asan nashettanawu koyennaagaa nuuni eroos. Qeesaarayyo qaraxaa* qanxxiyogee likkee?* 15 Nuuni qaraxaa qanxxana koshshiiyye koshshennee?” I eta iita qofaa eridi, eta hagaadan giis: “Intte tana ayssi paacceetii? Taani beꞌana mala issi dinaariya* hammite.” 16 Eti ayyo issuwa immin, I eta, “Ha misileenne sunttay oogee?” yaagiis. Yaagin eti, “Qeesaaraagaa” yaagidosona. 17 Yaagin Yesuusi, “Qeesaarabaa Qeesaarawu immite, shin Xoossaabaa Xoossawu immite” yaagiis. Yaagin, eti hegan malaalettidosona.
18 He wode, hayqqida asay denddenna giya Saaduqaaweti yiidi hagaadan giidi A oychchidosona: 19 “Asttamaariyawu, Muusee issi asi naꞌa yelennan hayqqikko, A ishay A machchiyo ayssana koshshiyogaanne yelettiya naati hayqqida bitaniya naata geetettana koshshiyogaa nuuyyo yootiis. 20 Laappun ishantti deꞌoosona. Bayray issi maccaasiyo ekkidi naꞌa yelennan hayqqiis. 21 Qassi naaꞌꞌanttoy O ayssikkokka, naꞌa yelennan hayqqiis; qassi heezzanttoykka hegaadan haniis. 22 Laappunatikka maccaaseeppe naꞌa yelibookkona. Ubbaappe wurssettan maccaasiya hayqqaasu. 23 Hayqqidaageeti denddiyo wode, A ooyyo machcho gidanee? Ayssi giikko, laappunatikka O machchidosona.” 24 Yesuusi etayyo hagaadan giis: “Intte Geeshsha Maxaafaakka Xoossaa wolqqay ay keena gitakkokka erekketa; intte baliyoy hegaassa. 25 Ayssi giikko, hayqqida asay denddiyo wode, attuma asay machchenna, qassi macca asay azinaa gelenna, shin eti saluwan deꞌiya kiitanchchatu mala gidana. 26 Muusee daran hanidabaa xaafidobaa nabbabibeekketii? Xoossay Muuseyyo, ‘Taani Abrahaama Xoossaa, Yisaaqa Xoossaa, qassi Yaaqooba Xoossaa’ giido wode hayqqidaageeta denttanaagaa yootiis. 27 I paxa deꞌiyageetu Xoossappe attin, hayqqidaageetu Xoossa gidenna. Intte keehi bala qofaa qoppeeta.”
28 Eta giddon deꞌiya, xaafetuppe issoy eti haasayiyobaa siyiis. Hegaa gishshawu, Yesuusi etayyo loytti zaaridoogaa eridi, “Azazo ubbaappe aadhdhiyagee awugee?” yaagidi A oychchiis. 29 Yesuusi hagaadan giidi zaariis: “Ubbaappe aadhdhiyagee hagaa: ‘Israaꞌeelaa, siya; Yihoowi* nu Xoossay issi Yihoowa;* 30 qassi neeni ne Xoossaa Yihoowa* ne kumetta wozanaaninne ne kumetta shemppuwan,* qassi ne kumetta qofaaninne ne kumetta wolqqan siiqana bessees.’ 31 Naaꞌꞌanttoogee hagaa: ‘Neeni ne shooruwa nena siiqiyogaadan siiqana bessees.’ Ha azazotuppe aadhdhiya hara azazoy baawa.” 32 Xaafee ayyo hagaadan giis: “Asttamaariyawu, likke; neeni yootidobay tuma, ‘A xalaalay Xoossa, appe hara Xoossi baawa’; 33 qassi issi asi ba kumetta wozanan, ba kumetta qofaaninne ba kumetta wolqqan A siiqiyogeenne bana siiqiyogaadan ba shooruwa siiqiyogee xuuggiyo yarshshotuppenne hara yarshshotu ubbaappe aadhdhees.” 34 I loytti zaaridoogaa Yesuusi akeekidi A, “Neeni Xoossaa Kawotettaa gelanawu matadasa” yaagiis. Shin hegaappe simmin Yesuusa oychchanawu xalida asi baawa.
35 Shin Yesuusi Xoossaa garuwan tamaarissiiddi hagaadan giis: “Xaafeti Kiristtoosi Daawita naꞌaa giyoy aybissee? 36 Daawiti geeshsha ayyaanay kaalettin hagaadan giis: ‘Yihoowi* ta Godaa, “Taani ne morkketa neeni yedhdhanaadan oottana* gakkanaashin, taappe ushachcha baggaara utta” yaagiis.’ 37 Daawiti A Godaa yaagiis; yaatin I waanidi ayyo naꞌa gidana danddayii?”
Qassi daro asay I yootiyobaa ufayssan siyees. 38 Qassi Yesuusi tamaarissiiddi hagaadan giis: “Xaafetuppe naagettite; eti adussa maayuwa maayidi yuuyiyogaa dosoosona, qassi giyan asay eta bonchchidi sarotanaadan koyoosona; 39 qassi shiiqo keettatun sintta* oydiyan uttiyogaanne gibraa miyo sohuwan bonchcho imattati uttiyosaa dosoosona. 40 Eti amꞌꞌetu aquwa* ekkirggoosona; qassi asan nashettanawu adussa woosaa woossoosona. Ha asati haratuugaappe aaruwan qaxxayettana.”
41 Qassi I asay miishshaa yeggiyo saaxiniya baazzan uttidi, asay hegan miishshaa waatidi yeggiyakko beꞌees; qassi dure asati daroti daro miishshaa yeggoosona. 42 He wode issi amꞌꞌe maccaasiya yaada, keehi guutta naaꞌꞌu santtimeta* yeggaasu. 43 Hegaa gishshawu, I bana kaalliyageeta baakko xeegidi etayyo hagaadan giis: “Taani intteyyo tumaa odays, miishshaa yeggiyo saaxiniyan ha hiyyeesa amꞌꞌiya yeggidobay harati ubbay yeggidoogaappe aadhdhees. 44 Ayssi giikko, eti ubbay bantta duretettaappe yeggidosona; shin A keehi hiyyeesa gidikkonne, ba deꞌuwawu aybanne ashshennan bawu deꞌiya ubbabaa yeggaasu.”
13 Yesuusi Xoossaa garuwappe kiyidi biishin, A kaalliyageetuppe issoy A, “Asttamaariyawu, beꞌa! ha shuchchatinne keettati ayba loꞌꞌiyonaa?” yaagiis. 2 Shin Yesuusi ayyo hagaadan giis: “Ha gita keettata beꞌay? Ha shuchchati laalettennan issoy issuwa bolli uttidi mule deꞌokkona.”
3 I Dabira Zayte Deriyan Xoossaa garuwakko simmidi uttidaashin, Pheexiroosi, Yaaqoobi, Yohaannisinne Inddiraasi banttarkka A hagaadan giidi oychchidosona: 4 “Ane nuuyyo yoota; hagee awude hananee, qassi ha ubbabaa wurssettay matidoogawu malaatay ayba gidanee?” 5 Hegaa gishshawu, Yesuusi etayyo hagaadan giis: “Inttena ooninne balettenna mala naagettite. 6 Daroti, ‘Taani A’ yaagiiddi ta sunttan yaana; yiidi darota balettana. 7 Qassi intte matasankka haahosankka denddiya olaabaa siyiyo wode yayyoppite; hageeti haniyogee attennaba, shin wurssettay biroona.
8 “Ayssi giikko, deree deriya bolli, qassi kawotettay kawotettaa bolli denddana; dumma dumma heeran biittay qaaxxana, koshaykka denddana. Hageeti leessuwa doometta.
9 “Intte naagettite. Asay inttena oyqqidi daannatuyyo aatti immana; yaatin, eti bantta shiiqo keettan inttena shocana, qassi intte tana kaalliyo gishshawu asay inttena deriya haariyageetu sinttaaninne kawotu sinttan essin, intte etayyo tabaa yootana. 10 Qassi koyro, dere ubban mishiraachchoy odettana bessees. 11 Qassi eti inttena aattidi immanawu pirdda keetti efiyo wode, intte ay haasayanaakko kasetidi hirggoppite; shin haasayanawu intteyyo he saatiyan imettiyabaa haasayite; ayssi giikko, haasayiyay geeshsha ayyaanaappe attin, inttena gidekketa. 12 Hegaa bollikka, ishay ba ishaa, aaway ba naꞌaa woriya asawu aattidi immana, qassi naati banttana yelidaageetu bolli denddidi, woriyageetuyyo eta aattidi immana. 13 Qassi intte tana kaalliyageeta gidiyo gishshawu, asay ubbay inttena ixxana. Shin wurssettay gakkanaashin genccida* uray attana.
14 “Shin bashshiya tunabay eqqana bessennasan eqqidaagaa intte beꞌiyo wode (nabbabiya uray geetettidabaa akeeko), Yihudan deꞌiyageeti deretiyasaa baqatona. 15 Keettaa huuphiyan deꞌiya asi ba sooppe aybanne ekkanawu wodhdhoppo woy ba soo geloppo; 16 qassi gaden deꞌiya asi aggidi biido maayuwanne hegaa malabaa ekkanawu guyye simmoppo. 17 He gallassatun shahaara macca asatuyyonne xanttiyageetuyyo aayyeero! 18 Hegee balgguwan hanenna mala woossite;* 19 He gallassati waaye wode gidana. Xoossay saꞌan asaa medhdhoosappe he wode gakkanawu hegaa mala waayee deꞌi erenna, qassi hegaappe simminkka deꞌenna. 20 Yihoowi* he wodiya qanttennaakko ay asinne attenna; shin I ba doorido asatu gishshawu he wodiya qanttiis.
21 “He wode ooninne intteyyo, ‘Beꞌite! Kiristtoosi hageeho’ woy ‘Beꞌite! I hegeeho’ giikko, ammanoppite. 22 Ayssi giikko, banttana Kiristtoosa giya worddanchchatinne Xoossay erissidobaa yootoos giya worddanchchati denddidi, banttawu danddayettikko doorettidaageeta wora zaaranawu malaatata bessananne malaaliyabata oottana. 23 Hegaa gishshawu, naagettite. Taani intteyyo ubbabaa kasetada yootaas.
24 “Shin he gallassatun, he waayiyappe simmin, away xumana, aginay pooꞌenna, 25 xoolintteti saluwappe kunddana, qassi saluwan deꞌiya wolqqaamabati qaaxxana. 26 Hegaappe simmin, eti asa Naꞌay gita wolqqaaninne bonchchuwan shaaraa giddoora yiishin beꞌana. 27 Qassi hegaappe simmin, I kiitanchchata kiittin, eti saꞌaa gaxaappe saluwa gaxaa gakkanaashin, saꞌaa oyddu ginaappe awu doorettidaageeta shiishshana.
28 “Balasiya mittaa leemisuwappe hegaa akeekite: Balasiya mittay aacidi hayttaa kessosaara bonee matattidoogaa ereeta. 29 Hegaadankka, intte hageeti haniyogaa beꞌiyo wode, I pengge gakkidoogaa erite. 30 Taani intteyyo tumaa odays, ha wodiya asay hayqqanaappe kase ha ubbabay hanana. 31 Saloynne saꞌay xayana, shin taani yootidobay merinawu deꞌana.
32 “Gidoppe attin, he gallassaa woy he saatiya Aawaappe attin, saluwan deꞌiya kiitanchchata gidin, Naꞌaa gidin, hara ooninne erenna. 33 Xoossay keerido wodiya intte erenna gishshawu naagi uttite, qassi beegotti uttite. 34 Hegee ba keettaa aggidi hara biitti biida bitaniyagaa mala; I ba aylletuyyo aawatettaa immiis, etawu eta oosuwa oosuwakka immiis, qassi kariya naagiyagee mintti naaganaadan azaziis. 35 Hegaa gishshawu, keettaa goday omarssi yaanaakko, bilahe yaanaakko, wonttimaatti* yaanaakko woy guuran yaanaakko, awude yaanaakko intte erenna gishshawu, naagi uttite. 36 Hankkoode, intte xiskkidaashin, intte akeekennan I yaana. 37 Shin taani intteyyo yootiyobaa ubbawu yootays: Naagi uttite.”
14 Naaꞌꞌu gallassappe guyyiyan Paasikaynne Oyttaa Baalay bonchchettees. Qassi waanna kahinetinne xaafeti qaxabaa* maqettidi, A oyqqiyonne woriyo ogiya koyidosona. 2 Ayssi giikko eti, “Asay wocamana danddayiyo gishshawu nuuni A baalaa wode oyqqana bessenna” yaagidosona.
3 Qassi Yesuusi Biitaaniyan, inchchirichchay kase oyqqido Simoona son qumaa miishin, issi maccaasiya albbasxxiroosa bilqqaadiyan deꞌiya, walahi baynna keehi alꞌꞌo narddoose shittuwa ekkada yaasu; yaatada, albbasxxiroosa bilqqaadiya mentta pogada A huuphiyan tigaasu. 4 Amaridaageeti hegan yiillotidi issoy issuwawu hagaadan giidosona: “Ha shittoy coo mela ayssi gukkii? 5 Ayssi giikko, ha shittoy 300 dinaareppe* aaruwan bayzettana danddayees; yaatin he miishshay hiyyeesatuyyo imettana danddayees!” Qassi eti he maccaasee hanotan keehi yiillotidosona.* 6 Shin Yesuusi hagaadan giis: “O wayssoppite. O ayssi meteetii? A taassi loꞌꞌobaa oottaasu. 7 Ayssi giikko, hiyyeesati inttenaara ubbatoo deꞌoosona, qassi intte koyiyo wode awudekka eta maaddana danddayeeta; shin taani hagan inttenaara ubbatoo deꞌikke. 8 A oottana danddayiyobaa oottaasu; mooguwa qoppada, A kasetada ta bollan shittuwa tigaasu. 9 Taani intteyyo tumaa odays, mishiraachchoy kumetta saꞌan odettiyosan awaaninne ha maccaasiya hassayettana mala, A oottidobaykka odettana.”
10 Qassi kiitettida tammanne naaꞌꞌatuppe issoy, Asqqorootu Yihuday A etayyo aattidi immanawu waanna kahinetukko biis. 11 Eti hegaa siyidi ufayttidosona, qassi ayyo miishshaa* immanawu qaalaa gelidosona. Yaatiyo gishshawu, I Yesuusa aattidi immanawu injjetiya wodiya koyiyogaa doommiis.
12 Oyttaa baalaa bonchchiyo koyro gallassi, Paasikaa dorssay shuhettiyo wode, Yesuusa kaalliyageeti A, “Neeni Paasikaa maana mala, nuuni awa biidi giigissanaadan koyay?” yaagidosona. 13 Hegaa gishshawu, I bana kaalliyageetuppe naaꞌꞌata hagaadan giidi kiittiis: “Katamaa biite; biidi haattaa otuwa tookkida issi bitaniyara intte gayttana. He bitaniya kaallite; 14 qassi I awanne gelikko, he keettaa godaayyo, ‘Asttamaaree, “Taani tana kaalliyageetuura Paasikaa qumaa maana imatta kifilee awugee?” yaagees’ giite. 15 Yaagin, I pooqiyan giigissi wottido aaho kifiliya inttena bessana. Yan nuuyyo giigissite.” 16 Hegaa gishshawu, Yesuusa kaalliyageeti katamaa bin ubbabay I giidoogaadan haniis; yaatin eti Paasikawu koshshiyabaa giigissidosona.
17 Saꞌay omarin, I kiitettida tammanne naaꞌꞌatuura yaa biis. 18 Qassi eti miyo wode, Yesuusi etayyo hagaadan giis: “Taani intteyyo tumaa odays, intteppe issoy, tanaara miyagee tana ta morkketuyyo aattidi immana.” 19 Eti hegan azzanidi ubbaykka, “Tanee?” yaagidosona. 20 I etayyo hagaadan giis: “I ba kushiya tanaara issippe shaatiyan yeddiya, kiitettida tammanne naaꞌꞌatuppe issuwa. 21 Ayssi giikko, Geeshsha Maxaafan abay xaafettidoogaadan, asa Naꞌay hayqqana, shin asa Naꞌaa A morkketuyyo aattidi immiya bitaniyawu aayeero! He bitanee yelettennaakko ayyo loꞌꞌo.”
22 Qassi eti miishin, I oyttaa ekkidi woossiis; yaatidi menttidi etawu immiiddi, “Heyte; hagee ta bollaa gishshaassa” yaagiis. 23 Qassi issi wancca woyniya ekkidi, woossidi etayyo immiis; immin eti ubbay hegaappe uyidosona. 24 Qassi I etayyo hagaadan giis: “Hagee ‘maachchaara gayttida ta suuttaa’ gishshaassa; ta suuttay darotu gishshaa gukkana. 25 Taani intteyyo tumaa odays, taani Xoossaa Kawotettan ooratta woyniya uyana gallassay gakkanaashin hagaappe simmin woyne mule uyikke.” 26 Wurssettan, eti Xoossaa sabbanawu yexxi simmidi, Dabira Zayte Deriya biidosona.
27 Qassi Yesuusi etayyo hagaadan giis: “Geeshsha Maxaafay, ‘Taani hentanchchaa shocana, yaatin dorssay laalettana’ yaagiyo gishshawu, intte ubbay xubettana. 28 Shin tana Xoossay hayquwappe dentti simmin, taani intteppe kasetada Galiilaa baana.” 29 Shin Pheexiroosi ayyo, “Harati ubbay xubettiyakkokka, taani xubettikke” yaagiis. 30 Yaagin, Yesuusi ayyo, “Taani neeyyo tumaa odays, hachchi, ee hachchi qammi, kuttoy naaꞌꞌutoo waassanaappe kase neeni tana heezzutoo erikke gaana” yaagiis. 31 Shin I zaari zaaridi, “Taani nenaara hayqqana koshshikkokka nena mule erikke giikke” yaagiis. Qassi hara ubbatikka hegaadan giidosona.
32 Yaatin, eti Geetesemaane giyosaa biidosona; qassi I bana kaalliyageeta, “Taani woossiyo wode hagan uttishshite” yaagiis. 33 Yaagidi, I Pheexiroosa, Yaaqoobanne Yohaannisa banaara ekkidi biis; qassi I keehi kayyottiis. 34 I eta, “Tana* kayyoy worana hanees; hagan takkishshite, yaatidi naagi uttite” yaagiis. 35 Qassi guuttaa sinttawu shiiqidi gulbbatidi, danddayettikko he hanotay bana gakkennaadan woossiyogaa doommiis. 36 Qassi I, “Abbaa, ta Aawawu, ubbabay neeyyo danddayettees; ha wanccaa* taappe digga. Shin neeni koyiyogaadan hanoppe attin, taani koyiyogaadan hanoppo” yaagiis. 37 I simmidi yiyo wode, eti xiskkidaageeta beꞌiis; yaatidi Pheexiroosayyo hagaadan giis: “Simoonaa, xiskkay? Intte issi saatekkonne naagi uttana danddayibeekketii? 38 Intte paaciyan gelenna mala naagi uttite, qassi mintti woossite. Ayyaanay keehi koyiyogee tuma, shin ashoy shugo.” 39 Qassi I haranttuwakka biidi, kaseegaadankka giidi woossiis. 40 I zaarettidikka yiyo wode xiskkidaageeta beꞌiis; ayssi giikko, eti beegotti takkana danddayibookkona. Hegaa gishshawu, eti ayyo woygi zaaranaakko eribookkona. 41 I heezzanttuwa yiidi eta hagaadan giis: “Intte hagaa mala wodiyan xiskkiyoynne shemppiyoy aybissee? Xiskkoy gidana! Asa Naꞌaa nagaranchchatuyyo aattidi immiyo saatee gakkiis! 42 Denddite, boos. Tana aattidi immiyagee gakkiis.”
43 I haasayishin sohuwara, kiitettida tammanne naaꞌꞌatuppe issoy, Yihuday yiis; qassi waanna kahineti, xaafetinne cimati kiittido, bisuwanne bikilaa oyqqida asaykka aara yiis. 44 A aattidi immiyagee, “Taani yeriyogee A; A oyqqidi naagiiddi efiite” yaagidi etayyo malaataa yooti wottiis. 45 Qassi I Yesuusakko biidi, akko shiiqidi, “Rebbi!” yaagidi A yeriis. 46 Hegaa gishshawu, eti A oyqqidi haratuppe shaakkidosona. 47 Shin yan eqqidaageetuppe issoy ba bisuwa shoddidi, gita kahiniya aylliya hayttaa qanxxi oliis. 48 Shin Yesuusi etayyo hagaadan giis: “Panggaa oyqqiyogaadan bisuwanne bikilaa ekkidi tana oyqqanawu yiidetii? 49 Taani Xoossaa garuwan ubba gallassi tamaarissaydda inttenaara takkaas; shin tana he wode oyqqibeekketa. Gidoppe attin, Geeshsha Maxaafay yootiyobay polettana mala hagee haniis.”
50 Qassi Yesuusa kaalliyageeti ubbay A aggi bayidi baqatidosona. 51 Shin garssa maayuwa bolli* muruta liinuwa naxalaa maayida issi yelagay matasan A kaalliyogaa doommiis; yaatin, eti A oyqqanawu malidosona. 52 Shin I ba liinuwa naxalaa aggi bayidi kallo* baqatiis.
53 He wode eti Yesuusa gita kahiniyakko efiidosona; qassi waanna kahineti, cimatinne xaafeti ubbay shiiqi uttidosona. 54 Shin Pheexiroosi gita kahiniya soo gakkanaashin haahuwan A kaalliis; yaatidi, he son oottiya asatuura uttidi tamaa hoꞌꞌees. 55 Waanna kahinetinne kumetta Sanhedirinee* Yesuusa woranawu A bolli markkattiya asaa koyidosona, shin eti aybanne demmibookkona. 56 Daroti A bolli wordduwa markkattikkonne, eti issoy issuwappe dummatiyabaa yootidosona. 57 Qassi issoti issoti denddi eqqidi, A bolli hagaadan giidi wordduwa markkattidosona: 58 “I, ‘Taani kushiyan keexettida ha Xoossaa garuwa laalada, kushiyan keexettibeenna haraa heezzu gallassan keexxana’ yaagishin nuuni siyida.” 59 Shin hegankka, eti issoy issuwappe dummatiyabaa yootidosona.
60 He wode, gita kahinee eta giddon eqqidi, “Neeni aybakka zaarikkii? Ha asati ne bolli markkattiyobay aybee?” yaagidi A oychchiis. 61 Shin Yesuusi aybanne zaaribeenna, coꞌꞌu giis. Gita kahinee, “Neeni Geeshsha Xoossaa Naꞌaa Kiristtoosee?” yaagidi, A haranttuwakka oychchiis. 62 Yaagin Yesuusi, “Ee, taani A; intte asa Naꞌaa wolqqaama Xoossaappe ushachcha baggaara uttidaagaanne saluwa shaaraa giddoora yiyagaa beꞌana” yaagiis. 63 He wode gita kahinee ba maayuwa daakkidi hagaadan giis: “Nuuni hara markkaa koyiyoy aybissee? 64 I toochchiyogaa intte siyideta. Intte qofay aybee?”* Eti ubbay I hayqqana bessiyogaa yootidosona. 65 Qassi issoti issoti A bolli cuchchidi, A somꞌꞌuwa kammidi A yimppiiddi, “Nena shociday oonakko yoota!” yaagidosona. Qassi naagiyageeti A qinxxalliya baqqi simmidi efiidoosona.
66 He wode, Pheexiroosi karen deꞌishin, gita kahiniya ashkkaratuppe issinniya yaasu. 67 A Pheexiroosi tamaa hoꞌꞌiyagaa beꞌada, A tishshi ootta xeellada, “Neenikka Yesuusa giyo Naazireete bitaniyara deꞌaasa” yaagaasu. 68 Shin I, “Taani A erikke, neeni yootiyobaakka erikke” giidi worddotiis; yaatidi dirssaa penggiyakko biis. 69 He ashkkariya A beꞌada, hegan eqqida asaayyo haranttuwakka, “Ha bitanee etappe issuwa” yaagaasu. 70 I haranttuwakka kashi giis. Qassi guuttaa takkidi, hegan eqqida asay Pheexiroosayyo haranttuwakka, “Neenikka tumu etappe issuwa; ayssi giikko, neeni Galiilaa asa gidiyogee erettees” yaagidosona. 71 Shin I, “Intte giyo he bitanee oonakko taani erikke!” yaagidi caaqqiisinne bana qanggiis. 72 Sohuwara kuttoy naaꞌꞌanttuwa waassiis; he wode Pheexiroosi bana Yesuusi, “Kuttoy naaꞌꞌutoo waassanaappe kase neeni tana heezzutoo erikke gaana” giidoogaa hassayiis. Qassi I keehippe mishettidi yeekkiyogaa doommiis.
15 Saꞌay wonttin sohuwara, waanna kahineti, cimatinne xaafeti, hegeetikka, kumetta Sanhediriniya* asay zorettidosona; yaatidi, Yesuusa kushiya qachchidi, A efiidi, Yihudaa haariya Philaaxoosayyo aattidi immidosona. 2 Yaatin, Philaaxoosi A, “Neeni Ayhudatu Kawoo?” yaagidi oychchiis. Yesuusi, “Neeni giidoogaadaana” yaagidi zaariis. 3 Shin waanna kahineti A daroban mootidosona. 4 He wode Philaaxoosi hagaadan giidi A haranttuwakka oychchiis: “Neeni aybakka zaarikkii? Ha asati nena aappunban mootiyakko siyikkii?” 5 Shin hegaappe simmin Yesuusi aybanne zaaribeenna; yaatin, Philaaxoosi malaalettiis.
6 Paasikaa bonchchiyo wode, Philaaxoosi bana asay oychchiyo ura qashuwappe birshshiyogee ayyo meeze. 7 He wode, kawotettaa bolli makkalidi shemppo worida hara asatuura Barbbaana giyo bitaniya qachchi wottidosona. 8 Yaatin, asay Philaaxoosakko yiidi, I etawu kaseegaadankka oottanaadan A oychchidosona. 9 I eta, “Taani intteyyo Ayhudatu Kawuwa birshshanaadan koyeetii?” yaagiis. 10 Ayssi giikko, waanna kahineti Yesuusa qanaatidi aattidi immidoogaa Philaaxoosi erees. 11 Shin Yesuusa birshshanaappe Barbbaana birshshana mala asay A oychchanaadan waanna kahineti eta denttettidosona. 12 Philaaxoosi haranttuwa etayyo, “Yaatin intte Ayhudatu Kawuwa giyogaa waatoo?” yaagiis. 13 Eti haranttuwakka bantta qaalaa xoqqu oottidi, “A mittan kaqqa!” yaagidosona. 14 Shin Philaaxoosi etayyo, “Aybissi? I ay iitabaa oottidee?” yaagiis. Shin eti kaseegaappekka bantta qaalaa xoqqu oottidi, “A mittan kaqqa!” yaagidosona. 15 Yaatin, Philaaxoosi asaa ufayssanawu koyidi, Barbbaana etawu birshshiis; qassi Yesuusa lissuwan shocissidi, mittan kaqettana mala aattidi immiis.
16 He wode wotaaddarati A kawo garuwa,* hegeekka, Philaaxoosa soo efiidi, wotaaddarati ubbay shiiqanaadan oottidosona. 17 Qassi eti A zoꞌo afalaa mayzzidosonanne agunttaa xaaxidi A huuphiyan wottidosona; 18 yaatidi eti A, “Ayhudatu Kawuwawu, saro!” yaagiyogaa doommidosona. 19 Qassi eti maqan A huuphiya shocidosona, A bolli cuchchidosonanne A sinttan gulbbatidi ayyo ziggidosona. 20 Wurssettan, eti A bolli qilliicci simmidi, zoꞌo afalaa A bollappe qaaridi, A maayuwa mayzzidosona. Yaatidi, A mittaa bolli baxxannanawu efiidosona. 21 Qassi eti Iskkinddiranne Rufoosa aaway, Simoona giyo Qareena asi gaxariyappe yiiddi he ogiyara kanttiyagaa, Yesuusi kaqettana mittaa* wolqqan toossidosona.
22 Yaatidi eti A Golggottaa giyosaa efiidosona; hegee, “Guuggiya Sohuwa” yaagiyogaa. 23 Eti karbbee walahettido woyniya* yan ayyo immanawu malidosona; shin I ekkennan ixxiis. 24 Eti A mittaa bolli baxxanni simmidi, ooni ay ekkanaakko kuuyanawu bollaara I maayido maayuwan saamaa yeggidi shaakki ekkidosona. 25 Eti heezzu saate heeran, A mittaa bolli baxxannidi kaqqidosona. 26 Qassi I qaxxayettido gaasuwa, “Ayhudatu Kawuwa” yaagidi xaafidosona. 27 Qassi naaꞌꞌu panggata, issuwa appe ushachcha baggaara, hankkuwa qassi appe haddirssa baggaara A miyyiyan mittan kaqqidosona. 28* —— 29 Qassi ogiyara aadhdhiyageeti bantta huuphiya qaattiiddi A cayidosona; eti hagaadan giidosona: “Xoossaa garuwa laalada heezzu gallassan keexxana giyagoo, 30 ane mittaappe* wodhdhada nena ashsha.” 31 Hegaadankka, waanna kahinetinne xaafeti hagaadan giidi A bolli qilliiccidosona: “I harata ashshiis; bana ashshanawu danddayenna! 32 Nuuni beꞌidi ammanana mala, Israaꞌeela Kawoy Kiristtoosi ane haꞌꞌi mittaappe* wodhdho.” Haray atto, A miyyiyan kaqettidaageetikka hegaadan giidi A cayidosona.
33 Usuppun saate heerappe doommidi uddufun saate heera gakkanaashin, he biittan ubbasan saꞌay xumiis. 34 Qassi uddufun saate heeran, Yesuusi ba qaalaa xoqqu oottidi, “Eeli, Eeli, lama sabaqitaanii?” yaagiis. Hegee, “Ta Xoossawu, ta Xoossawu, tana ayssi aggadii?” yaagiyogaa. 35 Qassi matan eqqida asatuppe issoti issoti hegaa siyidi, “Siyite! I Eelaasa xeegees” yaagidosona. 36 He wode issi bitanee woxxi biidi, ispponjjiya caala woyne eessan yeggidi, hegaa I uyana mala maqan wottidi ayyo immiiddi, “Aggi bayite! Ane Eelaasi A ashshanawu yaanaakkkonne beꞌana” yaagiis. 37 Shin Yesuusi ba qaalaa xoqqu ootti waassidi hayqqiis.* 38 Qassi geeshsha sohuwa magalashoy huuphessaappe tohossaa gakkanawu shaahettidi naaꞌꞌu kiyiis. 39 He wode Yesuusakko simmidi eqqida, wotaaddaratu halaqay he ubbabaanne I hayqqiyogaa beꞌidi, “Hagee tumukka Xoossaa Naꞌaa” yaagiis.
40 Qassi macca asati haniyabaa haahuwan beꞌoosona; hegeetuppe amaridaageeti Magddala Mayraamo, qeeri Yaaqoobanne Yoosa aayyiyo Mayraamonne Saloomo. 41 Eti Galiilan Yesuusa kaallidaageetanne awu haggaazidaageeta; qassi aara Yerusalaame yiida hara daro macca asatikka deꞌoosona.
42 Away wullana haniyo gishshawunne Sambbatawu koshshiyabaa giigissiyo gallassa gidiyo gishshawu, 43 Yooseefa giyo Armmaatiyasa katamaa asi xalidi Philaaxoosakko biidi, Yesuusa anhaa bawu immanaadan oychchiis. Ikka Xoossaa Kawotettaa naagiya, Ayhudatu Xoqqa Pirdda Keettan bonchchettida asa. 44 Shin Philaaxoosi Yesuusi hayqqidoogaa siyidi malaalettiis; qassi wotaaddaratu halaqaa xeegidi Yesuusi hayqqidaakkonne A oychchiis. 45 Yaatidi, I hayqqidoogaa wotaaddaratu halaqaappe siyidi, Yooseefi anhaa ekkanaadan eeno giis. 46 Yooseefi muruta liinuwa shammi simmidi, A mittaappe wottidi he muruta liinuwan xaaxidi, zaallaappe woocidi giigissido duufuwan wottiis; yaatidi, shuchchaa gonddorssidi duufuwa penggiya gorddiis. 47 Shin Magddala Mayraamanne Yoosa aayyiya Mayraama Yesuusa duufuwa xeelliiddi takkidosona.
16 Sambbatay aadhdhin, Magddala Mayraama, Yaaqooba aayyiya Mayraamanne Salooma biidi, A anhaa bolli tiganawu sawiyabata shammidosona. 2 Qassi saaminttawu koyro gallassi maallado away kiyi simmin, eti duufoy deꞌiyosaa biidosona. 3 Eti issoy issuwawu, “Nuuyyo duufuwa penggiyappe shuchchaa gonddorssanay oonee?” yaagidosona. 4 Shin eti duufuwakko xeelliyo wode, shuchchay keehi gita gidikkonne, sohuwappe oonakko gonddorssidi diggidoogaa beꞌidosona. 5 Eti duufuwa giddo geliyo wode, ushachcha baggaara bootta maayuwa maayidi uttida yelagaa beꞌidi malaalettidosona. 6 I etayyo hagaadan giis: “Malaalettoppite. Asay mittan kaqqidi worido Naazireete Yesuusa intte koyiyogaa taani erays. Xoossay A hayquwappe denttiis. I hagan deꞌenna. A wottido sohuwa hagaa beꞌite. 7 Shin biidi, A kaalliyageetuyyonne Pheexiroosayyo, ‘I intteppe kasetidi Galiilaa bees. I intteyyo yootidoogaadan, intte A yan beꞌana’ yaagite.” 8 Hegaa gishshawu, eti duufuwappe kiyidi, yayyiiddinne malaalettiiddi eesotidi biidosona. Qassi eti yayyido gishshawu, ooyyonne qaala qaattibookkona.*
Mise, “ne somꞌꞌuwa sinttan.”
Guj. A5 xeella.
Mt 3:11 tohossa qofaa xeella.
Mt 4:21 tohossa qofaa xeella.
Woykko geella, “I oonakko eti eroosona.”
Woykko “geeshshana.”
Woykko “geeyana.”
Woykko “geeyiis.”
Mise, “ekettiyo.”
Woykko “Xoossaa sintti aattido oyttay.”
Woykko “gundda.”
Woykko “gundda.”
Issi issi birshshettati Qaana biittaa asa goosona, shin birshshettay yeemottiyagaa gidiyogee erettidaagaa.
Dabloosayyo hara suntta.
Woykko “I.”
Woykko “ubbabaa maaraa.” Qonccissuwa xeella.
Mt 13:31 tohossa qofaa xeella.
Mt 26:53 tohossa qofaa xeella.
Guj. A5 xeella.
Woykko “nena maaridi.”
Woykko “Tammu Katamatu Heeran.”
Woykko “hayqqana hanawusu.”
Woykko “daro sahettanaadan oottidosona.”
Mise, “Saruwan ba.”
Woykko “mintti azaziis.”
Tohuwappe buhiya shociyogee bessiyabaa oottidoogaa qonccissiyaba.
Woykko “aara maaddan uttidaageetussi.”
Guj. B14 xeella.
Woykko “anjjiis.”
Hegeekka, qammi 9 saate heeraappe biidi 12 saate heeran away kiyana gakkanaashiina.
Hegeekka, Ayhudatu meeziyadan meecettiyogaa.
Woykko “toochchiya.”
Guj. A3 xeella.
Giriikettuwan, porniya. Qonccissuwa xeella.
Giriikettuwan, aselgiya. Qonccissuwa xeella.
Woykko “Tammu Katamatu Heeraara.”
Woykko “A bolli ba kushiya wottana.”
Woykko “xoomishin.”
Mt 10:38 tohossa qofaa xeella. Qonccissuwa xeella.
Woykko “deꞌuwa.”
Woykko “shemppoy.”
Woykko “deꞌuwa.”
Woykko “deꞌuwa.”
Mise, “shunchchiya.”
Woykko geella, “eti hegaa ooyyonne yootibookkona.”
Woykko “haree yuushshiyo woxaa.”
Qonccissuwa xeella.
Guj. A3 xeella.
Qonccissuwa xeella.
Guj. A3 xeella.
Qonccissuwa xeella.
Mise, “eta bolli kushiya wottanaadan.”
Woykko geella, “issoy issuwawu.”
Woykko “ubbabaa maaran.” Qonccissuwa xeella.
Woykko “haariya asadan xeelliyogeeti.”
Woykko “deꞌuwa.”
Woykko “tana maara.”
Woykko “tana maara.”
“Asttamaariya” giyogaa.
Guj. A5 xeella.
Guj. A3 xeella.
Mise, “zooziya huuphiya.”
Guj. A5 xeella.
Woykko “asaa huuphiyan huuphiyan qanxxissiyo qaraxaa.”
Woykko “wogee.”
Guj. B14 xeella.
Guj. A5 xeella.
Guj. A5 xeella.
Guj. A5 xeella.
Qonccissuwa xeella.
Guj. A5 xeella.
Mise, “ne morkketa ne tohuwappe garssaara wottana.”
Woykko “injjetiya.”
Mise, “keettaa.”
Mise, “naaꞌꞌu leptta,” 10 daqiiqa gidiyagaa oottida oosanchchawu qanxxiyo miishsha. Guj. B14 xeella.
Woykko “gencciya.”
Mise, “aggennan woossite.”
Guj. A5 xeella.
Mise, “kuttoy waassiyo wode.”
Woykko “cimo hiillaa.”
Guj. B14 xeella.
Woykko “hanqquwan haasayidosona.”
Mise, “Biraa,” hegeekka biraappe oosettidaagaa.
Woykko “ta shemppuwa.”
Wanccay Xoossaa toochchiis giidi, wordduwan mootidi Yesuusa woranaadan Xoossay koyidoogaa bessiyaba.
Woykko “ba kalluwa kammanawu.”
Woykko “garssa maayo xalaalaara.”
Mt 26:59 tohossa qofaa xeella.
Woykko “Intte ay kuuyeetii?”
Mt 26:59 tohossa qofaa xeella.
Woykko “A dirssa giddo.”
Qonccissuwa xeella.
Woykko “mattoyiya ushshaa.”
Guj. A3 xeella.
Qonccissuwa xeella.
Qonccissuwa xeella.
Woykko “wurssetta shemppuwa shemppiis.”
Beni kushiyan xaafettida ammanettiya xuufeti bessiyogaadan, paydo 8n deꞌiya qofay Marqqoosa Wonggeliyawu wurssetta. Guj. A3 xeella.