UBBABAY TAALLETTIYOGAA WAATI GENCCANEE?

Deꞌiyaban Ufaytta

Banttawu deꞌiyaban ufayttiyageeti woppu giidi deꞌoosona. Qassi eti bantta hanotay laamettiyo wode, banttawu deꞌiya miishshaadan bantta deꞌuwa giigissoosona.

YAATIYOGEE KEEHI KOSHSHIYOY AYBISSEE?

Jesika Koler giyo saykoloojiya eranchchiya, banttawu deꞌiyaban ufayttiyageeti issibaa loꞌꞌo ogiyan qoppiyogaa yootaasu. A eti harata darin qanaatennaagaakka akeekaasu. Yaatiyo gishshawu, deꞌiyaban ufayttiyageeti darotoo woppu giidi deꞌiyogeenne darin hirggennaagee aynne malaalissenna. Keehippe ufayttiya issoti issoti daro miishshi baynnaageeta. So asaaranne laggetuura wodiya aattiyogan demmiyo ufayssaa mala, miishshan shammana danddayennabata xoqqu oottidi xeelliyageetu hanotay hegaa bessees.

“Nuuni miyobaaninne maayiyoban ufayttidi deꞌana.”—1 Ximootiyosa 6:8.

WAATANA DANDDAYAY?

Geeddarissoppa. Ne deꞌiyo sima deꞌuwa ishalo milatiya haratuugaara geeddarissikko, neeyyo deꞌiyaban ufayttennan aggana, ubba eta qanaatana danddayaasa. Hegaa bollikka, hegaadan geeddarissiyogee tumu hanotaa qonccissennan aggana danddayees. Aquwaban darobay deꞌiyo amaridaageeti keehi daro acuwan gelidaageeta gidana danddayoosona. Senegaalen deꞌiya Niikoola hagaadan gaasu: “Ufayttanawu taayyo darobay koshshenna. Taani deꞌiyaban ufayttiya asa gidikko, tawu deꞌiyabay haratuugaappe guutta gidikkokka woppu gaada deꞌana danddayays.”

Hagaa mala: Haratu duretettaa woy etawu deꞌiya alꞌꞌobaa bessiya erissota woy sooshal miidiya beꞌoppa.

“Issi asassi darobay deꞌikkonne, A aqoy ayyo deꞌo demissenna.”—Luqaasa 12:15.

Galatiyagaa gida. Galatiya asati darotoo banttawu deꞌiyaban ufayttoosona, qassi banttawu darobay koshshiyabadan woy bessiyabadan qoppokkona. Heyti biittan deꞌiya Roberttoni hagaadan giis: “Harati taayyonne ta so asawu kehidi oottidobaa darotoo qoppays. Yaatada, he asati oottidobaa taani keehi nashshiyogaa etawu yootays. Qassi, hosppun laytta gidido ta naꞌay asi awu immiyo ubbabawu galatanaadan tamaarissays.”

Hagaa mala: “Galatiyobata” xaafiyogaa meeze ootta. Ubba galla, neeni galatanaadan oottidabata xaafa. Hegee payyatettaa, siiqiya so asaa, tumu laggeta, woy ubba, away wulliyo wode beettiya loꞌꞌiya hanotaa gidana danddayees.

“Ufaittiya asati ubbatonkka bantta de7uwaa aloosona.”—Leemiso 15:15.

Issi issitoo nuuni ubbay deꞌiyaban ufayttanawu metootoos. Shin yaatanawu baaxetiyogee goꞌꞌiyaba! Nuuni deꞌiyaban ufayttikko woppu giidi deꞌoos, qassi hegee miishshan shammana danddayennaba.