SHaahuwaa 13

Loꞌꞌo Kawotanne Iita Kawota

Israaꞌeele kawotettay naaꞌꞌau shaahettiis. Daro wodiyau, daro kawoti Israaꞌeeleta haaridosona; etappe daroti ammanettennaageeta. Baabilooneti Yerusalaame katamaa xayssidosona

SOLOMONI tumu goynuwaa aggi simmin, Yihooway yootidoogaadan Israaꞌeele kawotettay naaꞌꞌau shaahettiis. A sohuwaa laattida a naꞌaa Robiꞌaami meqetti baynna asa. Hegaappe denddidaagan, Israaꞌeela yaratuppe tammati a bolli makkalidi, huuphessa bagga Israaꞌeele kawotettaa essidosona. Naaꞌꞌu yarati, Daawita zerettay Yerusalaamen haariyo kawotettau ammanettidaageeta gididi, tohossa bagga kawotettaa, Yihudaa kawotettaa essidosona.

Naaꞌꞌu kawotettatikka woppi baynnaageetanne metoy kumidoogeeta; hegau daro bagga gaasoy kawoti ammanoy baynnaageetanne azazettennaageeta gidiyoogaa. Huuphessa bagga Israaꞌeele kawoti koyruwaappe doommidi worddo goynuwaa aassido gishshau, eta metoy Yihudaagaappekka daro. Hayqqidaageeta denttida Eelaasanne Elssaꞌa mala hananabaa yootiyaageeti oottiyo maalaalissiyaabay deꞌishinkka, Israaꞌeeleti iitabaa oottiyoogaa aggibookkona. Wurssettan, Xoossay huuphessa bagga kawotettaa Asooreti xayssanaadan paqqadiis.

Hegaappe simmin, Yihuday xeetaappe guuttaa dariya layttaa takkiis; gidikkokka akka Xoossay qaxxayiis. Xoossay kiittin hananabaa yootiyaageetu seeraa siyidanne bantta deree Yihoowakko simmanaadan kaalettida Yihudaa kawoti amaridaageetu xalla. Leemisuwau, Kawuwaa Yoosiyaasi Yihudaappe worddo goynuwaa xayssiyoogaa doommiis; qassi Yihoowa beeta maqidasiyaa bottokoniis. Xoossay Muuse baggaara immido, koyro xaafettida Higgiyaa maxaafay beettido wode, hegee a wozanappe denttettin Yoosiyaasi worddo goynuwaa xayssiyo oosuwaa yaa gujjiis.

Gidikkokka, Yoosiyaasappe simmin kawotida kawoti a loꞌꞌo leemisuwaa kaallibeennaagee azzanttiyaaba. Yaatiyo gishshau, Baabilooneti Yihudaa xoonidi, Yerusalaamenne beeta maqidasiyaa xayssanaadan Yihooway paqqadiis. Attidaageeta omooddidi Baabiloone efiidosona. Eti omoodettidi biidosan 70u layttaa takkanaagaa Xoossay kasetidi yootiis. Xoossay qaalaa gelidoogaadan Israaꞌeelati bantta biittaa simmana gakkanaashin, Yihuday he ubba wodiyaa baysa gidiis.

Gidikkokka, he wodeppe doommidi qaalaa gelido Ashshiyaagee, Masee haarana gakkanaashin Daawita zerettay kawo gididi haarenna. Yerusalaamen kawotida kawotuppe daroti oottido iita oosoy, polo gidenna asaa naati haaranau giday baynnaageeta gidiyoogaa qonccissiis. Tumuppe giday deꞌiyoy Masiyaa xalla. Yaatiyo gishshau, Daawita zerettan wurssetta kawuwau Yihooway: “Ne huuphiyaappe kallachchaa dentta; . . . pirddiyo maatai de7iyoogee yaana gakkanaashin [“hegee oossinne imettenna,” NW]. I yiyo wode taani ayyo aattada immana” yaagiis.—Hizqqeela 21:26, 27.

—Koyro Kawotun; 2 Kawotun; 2 Hanidabaa Odiya shemppo 10ppe 36 gakkanaashin; Ermmaasa 25:8-11n baasettidaagaa.

◼ Israaꞌeele kawotettay naaꞌꞌau shaahettidoy aybissee? Naaꞌꞌu kawotettati waanidonaa?

◼ Daawita zerettan kawotiyaageetu haaroy waanidee? Aybissi?

◼ Yoonaasa taarikee Yihoowabaa nuna ay tamaarissii? (Saaxiniyaa xeella.)

[Sinttaa 16n deꞌiya saaxiniyaa]

Yoonaasa

Israaꞌeela kawotettay shaahetti deꞌishin, haaho biittan deꞌiya, makkalancha katamaa Nanawe biidi, seeraa yootanaadan Xoossay Yoonaasa kiittiis. Yoonaasi Nanawe biyoogaappe, harasaa biya markkabiyan geliis. Hegee issi maalaaliyaaba kaalettiis; Xoossay issi wogga molee Yoonaasa mittanaadan oottiis. Yoonaasi moliyaa uluwan deꞌiiddi Yihoowakko woossiis; yaatin Yihooway molee a mela biittan cooyanaadan oottiis. Hegaappe simmin, Yoonaasi sabbakanau Nanawe biis.

Azazettiyoogaa xeelliyaagan Yihooway Yoonaasa hegaadan tamaarissi simmin, hara metoy merettiis: Yoonaasi Nanawe asaassi sabbakiis; shin eti bantta nagaraappe simmido gishshau Xoossay qarettidi eta qaxxayennan aggin, Yoonaasi keehippe lancciis. Yoonaasi keehippe qarettiyaagaa gidanaadan tamaarissanau Xoossay waatidi hara maalaaliyaaba goꞌettidaakko eranau, ha ufayssiya maxaafaa nabbaba.

[Sinttaa 16n deꞌiya misiliyaa]

Doomettaabaa

Kessaabaa

Wogaabaa

Qoodaabaa

Zaarettido Wogaa

Yaasa

Daannatu

Uruto

1 Sameela

2 Sameela

● 1 Kawotu

● 2 Kawotu

1 Hanidabaa Odiya

● 2 Hanidabaa Odiya

Izira

Nahimiyaa

Asttiro

Iyyooba

Mazamure

Leemiso

Eranchchaa

Siiquwaa Sabaa

Isiyaasa

Ermmaasa

Ermmaasa Zilaassaa

Hizqqeela

Daaneela

Hoose7a

Yuu7eela

Amoxa

Abddiyyu

● Yoonaasa

Mikiyaasa

Naahooma

Imbbaaqooma

Sofonaasa

Hagga

Zakkaariyaasa

Milkkiyaasa