Koyro Heezzu Boshata

Gibxxeti Israaꞌeelata aylle oottidi deexo oosuwaa wolqqan ootissidosona. Yihoowi, ‘Bazzuwan taayyo goynnana mala, ta asaa yedda’ yaagidi Paaroonawu yootanaadan, Muusanne Aaroona kiittiis. Paarooni otorettidi, ‘Yihoowi yootiyoobay tana qofissenna; taani Israaꞌeela yeddikke’ yaagiis. Yaagidi, Paarooni wolqqan eta kaseegaappe deexxiya oosuwaa ootissiis. Yihoowi Paaroona issibaa tamaarissana. Waati tamaarissanaakko neeni eray? I Gibxxen Tammu Boshaa yeddiis. Yihoowi Muuseyyo hagaadan giis: ‘Paarooni taani odiyoobaa siyennan ixxiis. Guuran, i Nayle SHaafaa baana. Akko baada, i ta asaa yeddibeenna gishshawu, Nayle haattay suuttawu laamettanaagaa ayyo yoota.’ Muusee azazettidi Paaroonakko biis. Aarooni Nayle SHaafaa ba gatiman shociyo wode Paarooni xeellees; qassi shaafay suuttawu laamettiis. SHaafay xinqqiyoogaa doommiis, molee hayqqiis, Nayle SHaafaa haattay ushshenna. Paarooni haꞌꞌikka Israaꞌeelata yeddennan ixxiis.

Laappun gallassappe guyyiyan Yihoowi, ‘Neeni ta asaa yeddennan ixxikko, Gibxxe biittan shodhee kumana’ yaagidi, Muusa Paaroonakko kiittiis. Aarooni ba gatimaa denttin shodheti biittan kumidosona. SHodheti asaa soo, eta arssaa giddonne eta munaqa keretun gelidosona. SHodhee ubbasan deꞌees! Yihoowi shodhiyaa boshaa diggana mala Paarooni Muusa woossiis. Paarooni Israaꞌeelata yeddanawu qaalaa geliis. Hegaa gishshawu, Yihoowi boshaa xayssiis; qassi Gibxxeti hayqqida shodheta shiishshi shiishshidi dooridosona. Biittay xinqqiyoogaa doommiis. SHin, haꞌꞌikka Paarooni Israaꞌeelata yeddibeenna.

Hegaappe simmin Yihoowi Muusessi, ‘Aarooni ba gatiman biittaa shocin, biittaa buhee biinne kiyana’ yaagiis. Sohuwaara biinnee ubbasan kumiis. Paaroona asatuppe amaridaageeti ayyo, ‘Ha boshay Xoossaappe yiis’ yaagidosona. SHin, haꞌꞌikka Paarooni Israaꞌeelata yeddibeenna.