Ichashe

Daro gubaaꞌiyan wudiyaa maaddana mala yelaga ishatakka gastta ishatakka kaseegaappe aaruwan loohissana koshshiyoogaa kumettaa saꞌan deꞌiya woradaa xomoosiyaageeti akeekidosona. Hegaadan oottiyoogee wayssiyaaba. SHin aybissi? Neeni gubaaꞌe cima gidikko, loohissiyoogee keehippe koshshiyoogaa akeekiyoogee qoncce. Gubaaꞌeti ayyaanaaban mino gididi deꞌanawunne ooratta gubaaꞌeta essanawu hara ishati koshshiyoogaa eraasa. (Isi. 60:22) Xoossaa Qaalay ‘harata tamaarissanaadan’ nena zoriyoogaakka eraasa. Gidikkokka, hegaadan oottanawu neeni waayettana danddayaasa. So asawu koshshiyaabaa kunttiyoogee, oosoy, gubaaꞌiyan deꞌiya aawatettaynne hara keehi koshshiyaabay ne wodiyaa wurssiyo gishshawu, gubaaꞌiyan deꞌiya harata loohissanawu wodee baynnaba malatana danddayees. SHin, xammaqettida attumaageeti ubbay hashetidi oottanawu loohana koshshiyoogaa akeekanaadan he qofay minttettees. Hegaadan oottiyo wode, ubba asay goꞌettana. w15 4/15 1:2, 3

Issi ishay gubaaꞌiyan awu aawatettay imettosaara issi issibaa kaseegaappe mule dummatiya ogiyan oottana koshshees giidi qoppana bessenna. Laammanawu kuuyiyoy issi uri koyiyoogaadaana gidennan, gubaaꞌiyawu koshshiyaagaadaananne Yihoowa dirijjitee immiyo kaaletuwaadaana. Neeyyo aawatettay imettikko ayyaanaaban kaymida cimati Geeshsha Maxaafay yootiyoogaadan oottiyoobaa kaalliyoogan eta bonchaasa; qassi ne mala Kiristtaaneta minttettaasa. SHin, neeni oosuwan loohiyo wode, sinttawu biya Yihoowa dirijjitiyaara gubaaꞌee issippe baanaadan maaddanawu laamettiyaabaa oosuwan peeshshanaagee qoncce. Ammanettida tamaariyawu, Yihooway guyyeppe ne asttamaariyaagaappe aaddhiyaabaa oottanaadan nena denttettana danddayees.—Yoh. 14:12. w15 4/15 2:17

Wolqqaama metoy gakkiyo wode, neessi PHawuloosaagaadan ‘gaammuwaa doonan’ woy a doonaa matan deꞌiyaabadan siyettana danddayees. (2 Xim. 4:17) Hegaa mala wodiyan Yihoowan ammanettiyoogee metiyaaba gidikkokka, hegee keehi koshshiyaaba. Leemisuwawu, neeni keehi siiqiyo so asappe issuwaa yeddenna harggee oyqqin maaddaasa giidi qoppoos. Neeni minnanawunne eraa demmanawu woossennan aggakka. Hegaa xeelliyaagan neeyyo danddayettida ubbabaa oottada, Yihooway nena ubbatoo xeelliyoogaanne ammanettada genccanawu koshshiyaabaa immanaagaa eriyo gishshawu woppu giikkii? Yihooway nena maaddennaba neessi milatana danddayees. Dottoreti neeyyo issoy issuwaagaa phalqqiyaabaa yootana danddayoosona. Woykko neeni nena minttettana gaada qoppido dabboti hanotay neeyyo yaa iitanaadan oottana danddayoosona. Yihooway nena minttettanaagaa ubba wode ammanetta. Ubbatoo akko shiiqa. (1 Sam. 30:3, 6) Maaduwaa demmiyo wode, aara dabbotaa minttaasa. w15 4/15 4:10, 11

Nuuni Yihoowa ashkkarata gidiyo gishshawu, Seexaanay deꞌiyaaba gidenna gidi qoppiyaagetudan balokko. Seexaanaa Dabloosi deꞌiyaaba gidiyoogaa eroos; ayssi giikko, Hewaano shooshshan zemppidi haasayissiday a. (Doo. 3:1-5) Seexaanay Iyyoobaara gayttidaagan Yihoowa cayiis. (Iyy. 1:9-12) Seexaanay Yesuusa paaccanawu maliis. (Maa. 4:1-10) Qassi Xoossaa Kawotettay 1914n eqqi simmin, tiyettidaageetuppe attidaageetuura ‘olettiyoogaa’ doommiday Seexaanaa. (Ajj. 12:17) Seexaanay 144,000tuppe attidaageetu ammanuwaanne hara dorssatu ammanuwaa bashshanawu koyiyo gishshawu he olaa haꞌꞌikka olettees. Nuuni he olan xoonanawu Seexaanaa eqettananne ammanuwan minnidi deꞌana bessees. Seexaanay keehi otorettees. Ha iita kiitanchay Xoossay haariyo maataa eqettiis; qassi hara meretati Yihoowayyo goynniyoogaa aggidi baassi goynnanaadan oottanawu maliis. Yaatiyo gishshawu, otorancha gidiyoogan a mali baawa. Hegaa gishshawu, nuuni Seexaanaa eqettana danddayiyo issi ogee otorettennan aggidi nu huuphiyaa kawushshiyoogaa.—1 PHe. 5:5. w15 5/15 2:3, 4

Kiristtaane gidiyoogaadan, nu hidootay saluwan deꞌiyoogaa gidin saꞌan deꞌiyoogaa gidin, he hidootaa qoppiyoogee nuna minttettees. Xoossay qaalaa gelidobay polettishin beꞌiyaabadan qoppana danddayay? Xoossay qaalaa gelidobaa poliyo wode neeni oottana danddayiyoobaa qoppiyoogan ufayttiyoogee erettidaba. Neeni saꞌan merinawu deꞌana wodiyaabaa qoppana danddayaasa. Biittaa gannate oottanawu haratuura hashetiyoogaa qoppa. Neegaadan, ne shoorotikka Yihoowa siiqoosona. Neeni he wode payyanne kumetta wolqqaara deꞌaasa; qassi nena hirggissiyaabi baawa. Gannatiyaa giigissiyo oosuwaa kaalliyaageeti neessi wozanappe qoppiyo gishshawu, ne deꞌuwan ufayttaasa. Neeni oottiyo ubbabay harata goꞌꞌiyo gishshawunne Xoossaa bonchissiyo gishshawu, ne eran ufayttada oottaasa. Leemisuwawu, mati hayquwaappe denddidaageeti Yihoowa eranaadan maaddaasa. (Yoh. 17:3; Oos. 24:15) Hegee aymo gidenna. He ufayssiyaabaa qoppiyoogee Geeshsha Maxaafay sinttanaabaa yootiyoobaara gayttidaba.—Isi. 11:9; 33:24; 35:5-7; 65:22. w15 5/15 3:15

Yesuusi daro asawu gidiya ayfe woyne eessaa maalaalissiya hanotan giigissiis. (Yoh. 2:6-11) Yesuusi shuchaa oytta kessanaadan Dabloosi a paaccido wode, Kiristtoosi maalaalissiyaabaa oottiyo wolqqaa baassi koshshiyaabawu goꞌettibeenna. (Maa. 4:2-4) SHin i ba wolqqaa harata maaddanawu goꞌettiis. Nuuni yaaretennan Yesuusaagaadan haratussi waati qoppana danddayiyoo? I Xoossaa ashkkarati haratussi ‘immanaadan’ zoriis. (Luq. 6:38) Harata nu son qumaanne ayyaanaabaa shoobbiyoogan hegaadan oottana danddayoos. Issi ishay ba haasayaa meezetishin siyiyoogaa malabankka shiiquwaappe simmin issi ura maaddana danddayoos. Woy qassi haggaazuwan harata maaddananne loohissana danddayoos. Nuuyyo danddayettida ubban harata wozanappe maaddiyo wode, Yesuusaagaadan keha gidoos. w15 6/15 1:3, 4, 6

Nuuni ubbatoo ammanettidi deꞌikko, maalaalissiya ubbabaappe aadhiyaageetuppe issuwaa, hegeekka iita waayiyaappe attiyoogaa beꞌana danddayoos. Armmageedoona olaappe simmin takkennan, asa ubbay payyatettaa demmanaadan maalaalissiya darobay hanana. (Isi. 35:5, 6; Ajj. 21:4) Asay manaaxxiriyaa, guufiyaa, kiranchiyaa, gaariyaa, siyanawu maaddiyaabaanne hegaa malabaa olishin beꞌiyoogaa qoppa. Armmageedoona olaappe attiyaageeti darobaa oottana. Eti Xoossaa imota gidida kumetta saꞌaa gannate oottana. (Maz. 115:16) Yesuusi beni sahettidaageeta pattidoogee, ha wodiyan deꞌiya ‘zaway baynna daro asay’ hargge ubbaappe paxiyo ufayssiya hidootaa loytti ammanaadan oottidi, eta minttettiis. (Ajj. 7:9) He maalaalissiyaabay Xoossawu bayra Naꞌay asawu qoppiyoogaanne i eta ay keena siiqiyaakko bessees. (Yoh. 10:11; 15:12, 13) Yesuusi asawu qarettidoogee Yihooway ba ashkkaratu ubbaassi qoppiyoogaa qonccissees.​—Yoh. 5:19. w15 6/15 2:16, 17

Alamiyan ubbasaa gakkida olay Awurooppaa biittatun 1914n denddiis. He olay 1918n wurido wode, wolqqaama koshaynne olan hayqqidaagaappe dariya asaa worida infiluwenzzaa giyo harggee denddiis. Yesuusi saꞌaa ooratta Kawo gididi beettenna hanotan qonccana wodiyaabaa yootido “malaatai” hegaadan polettiyoogaa doommiis. (Maa. 24:3-8; Luq. 21:10, 11) Godaa Yesuus Kiristtoosawu 1914n ‘akiliilee imettidoogaa’ daro naqaashay bessees. “I xooniiddinne qassikka xoonanau kiyiis.” (Ajj. 6:2) I Seexaanaaranne daydanttatuura olettidi eta saꞌaa duge oliyoogan saluwaa geeshshiis. Geeshsha ayyaanaa kaaletuwan xaafettida hachi gallassa xiqisee tuma gidiyoogaa asay he wodeppe doommidi beꞌiis. w15 6/15 4:13

Kiristtaane gubaaꞌee eqqoosappe xeetu laytta kumennan, kaseti odettidaagaadan kaddiyaageeti denddidosona. (Oos. 20:28-30; 2 Tas. 2:3, 4) Xoossaa ayyaana beeta maqidasiyan ayyo tumuppe haggaaziyaageeti oonakko shaakki eranawu hegaappe simmin keehi metiyaaba gidiis. Daro wodiyaappe guyyiyan, Yihooway baayyo ayyaana beeta maqidasiyan tumuppe haggaaziyaageeti oonakko Yesuusa baggaara qonccissiis. Yihooway dooridoogeetinne a ayyaana beeta maqidasiyan ayyo haggaaziyaageeti oonakko 1919n keehi qoncciis. Eti kaseegaappe aaruwan Xoossay koyiyo ogiyan ayyo haggaazanawu ayyaanaaban geeyidosona. (Isi. 4:2, 3; Mil. 3:1-4) Kiitettida PHawuloosi daro layttappe kase ajjuutan beꞌidobay he wode amarida ogiyan polettiyoogaa doommiis. PHawuloosi ajjuutan beꞌidobay 2 Qoronttoosa 12:2-4n odettiis. PHawuloosi ajjuutan beꞌidobay qonccidaba geetettiis. Hegee a wode deꞌiyaabaara gidennan, sinttappe haniyaabaara gayttidaba. w15 7/15 1:6-8

Hegaa giyoogee tiyettidaageeti asatettaa bollaara saluwaa baana giyoogee? Banttana Kiristtaane giya daroti asatettaa bollaara saluwaa baana giidi ammanoosona. Eti asay beꞌishin Yesuusi saꞌaa haaranawu yaana giidikka ammanoosona. SHin, “asa Na7aa malaatai” saluwan beettanaagaanne Yesuusi “saluwaa shaara giddoora” yaanaagaa Geeshsha Maxaafay geeshshidi yootees. (Maa. 24:30) Ha naaꞌꞌu qofaykka beettennaagaa qonccissees. Qassi “ashoinne suutti Xoossaa kawotettaa laattana danddayenna.” Hegaa gishshawu, saluwaa biyaageeti yaa baanaappe kase, “wurssetta malkkatai punettiyo wode, liphida aifee xeellanaassi hassayennan laamettana” koshshees. (1 Qor. 15:50-53) Hegaa gishshawu, tiyettidaageetuppe attida ammanettidaageeti worddo haymaanootee tamaarissiyoogaadan asatettaa bollaara saluwaa baana giidi qoppokko; shin eti sohuwaara saluwaa baana. w15 7/15 2:14, 15

Kawotettaa Addaraashay geeshsha goynuwawu goꞌettiyo waanna soho. SHiiqoti Xoossay immido imota; eti nuuni aara dabbotaa minttanaadan maaddoosona. A dirijjitee nuussi koshshiyaagaadan shiiquwan nuna minttetteesinne kaalettees. Nuuni ‘Yihoowa masoofiyaappe’ maanaadan ubbatoo shoobettikkonne, hegaa nashshiyaageeta gidana bessees. (1 Qor. 10:21) Nuuni goynuwawunne issoy issuwaa minttettanawu shiiqiyo shiiquwaa Yihooway xoqqu oottidi xeelliyo gishshawu, nuuni shiiqiyoogaa aggennaadan kiitettida PHawuloosi nuna zorana mala i ba ayyaanan denttettiis. (Ibr. 10:24, 25) Nuuni bessennaban gaasoyidi shiiquwaa beennan aggiyaakko, hegee Yihoowa bonchiyoogaa bessiyaabee? SHiiquwawu giigettiyoogaaninne minttettiya qofaa yootiyoogan nuuni Yihoowanne i giigissidobaa ay keena nashshiyaakko bessana danddayoos. w15 7/15 4:3, 4

Yesuusi nuuni naagi uttanaadan yootido gishshawu, hegaadan oottiyoogee bessiyaaba! Hegaara gayttidaagan, Yihoowa dirijjitee nuussi leemiso. Nu xuufeti nuuni ‘Xoossaa gallassaa naaganaadaaninne’ Xoossay ehaana giido ooratta alamiyan hidootaa wottanaadan ubbatoo zoroosona. (2 PHe. 3:11-13) Daro xeetu layttaappe kase deꞌida Kiristtaaneti naagi uttana koshshikkokka, yaatiyoogee nuussi hegaappe aaruwan koshshiyaaba. Ayssi giikko, nuuni Kiristtoosi qoncci takkiyo wodiyan deꞌoos. I qonccidoogaa bessiya malaataa 1914⁠ppe doommidi beꞌiiddi deꞌoos. Alamiyaa hanotay yaa iitiyoogaanne Kawotettaabaa mishiraachoy kumetta saꞌan odettiyoogaa gujjin, daro qommo malaataa beꞌiyoogee nuuni ‘wodiyaa wurssettan’ deꞌiyoogaa bessees. (Maa. 24:3, 7-14) Wurssettay yaana gakkanaashin he wodee ay keena takkanaakko Yesuusi yootibeenna gishshawu, nuuni beegotti uttananne naagi uttana koshshees. w15 8/15 2:4, 5

Ooratta alamiyan nuna aybippenne aaruwan ufayssanabay ayyaanaaban nuussi koshshiyaabaa demmiyoogaa. (Maa. 5:3) Nuuni aybippenne aaruwan kaseyiyoobay ayyaanaabaa gidana; qassi nuuni Yihoowan keehi ufayttiyoogaa bessana. Nuuni ha wodiyan ayyaanaabaa kaseyiyoogan, sinttappe demmana tumu deꞌuwawu giigettoos. (Maa. 6:19-21) Xoossawu oottiyoogan waatidi kaseegaappe aaruwan ufayttana danddayiyoo? Issi ogee ayyaanaabaa halchiyoogaa. Neeni ne deꞌuwan Yihoowawu haggaazanawu loytta qoppiya yelaga gidikko, dumma dumma kumetta wodiyaa haggaazuwaabay xuufiyan kiyidaagaa nabbabada hegeetuppe issuwaa oottanawu halchiyoogee loꞌꞌo. Daro layttawu kumetta wodiyaa haggaazida amaridaageetuura haasayana danddayaasa. Neeni ne deꞌuwan Yihoowawu haggaaziyoogan ooratta alamiyankka ayyo haggaazanawu giigettaasa; nena Xoossay loohissidoogeenne ne deꞌuwan beꞌidobay yan keehi maaddana. w15 8/15 3:13, 14

Ayyaanaa ayfiyaa macaratuppe danddayaa, ashkketettaanne ba huuphiyaa naagiyoogaa mala hara eeshshatikka keehi koshshoosona. (Gal. 5:23) Hegeeti issi kayma Kiristtaanee metiya hanotan yiillotennaadaaninne azzanttiyaaban hidootaa qanxxennan genccanaadan maaddana danddayoosona. I iitaa kehaa shaakki eranaadan maaddana danddayiya Geeshsha Maxaafaa maaraa ubbatoo xannaꞌees. Yaati simmidi, ayyaanaaban kaymidoogaa bessiyaabaa kuuyees. Leemisuwawu, Geeshsha Maxaafaa maaran loohida ba kahay yootiyoobaa kaallees. Kaymida Kiristtaanee Yihoowa ogeenne i kessido maaray ubbatoo baagaappe loꞌꞌo gidiyoogaa akeekiyoogan ba huuphiyaa kawushshiyoogaa bessees. I mishiraachuwaa mishettidi yootees; qassi gubaaꞌiyaa issippetettawu maaddiyaabaa oottees. Nuuni Yihoowawu ay keena wodiyaa haggaazikkokka, hagaadan oychana danddayoos: ‘Taani ayyaanaaban ubbatoo diccanawu, Yesuusa leemisuwaa mintta kaallana koshshiyo gini deꞌii?’ w15 9/15 1:6, 7

Erissiyo ashkkarati Yesuusi Galiilaa Abbaa bolli hemettiyaagaa beꞌidosona. PHeexiroosi Yesuusa xeesidi, haattaa bollaara hemettiiddi akko baana danddayiyaakkonne oychiis. Yesuusi baakko yaanaadan PHeexiroosawu yootido wode, PHeexiroosi wolwoluwaappe wodhidi Yesuusakko hemettiyoogaa doommiis. SHin, guuttaa takkidi PHeexiroosi muukettiyoogaa doommiis. Aybissi? I wolqqaama carkkuwaa xeellidi yayyiis. PHeexiroosi Yesuusi maaddana mala waassin Yesuusi sohuwaara a kushiyaa oyqqidi qommoora deꞌiya qofaa yootiis. (Maa. 14:24-32) Haattaa bollaara hemettanawu PHeexiroosi wolwoluwaappe wodhidoy ammanuwaana. Yesuusi a xeesido gishshawu, Xoossaa wolqqay Yesuusa maaddiyoogaadan banakka maaddanaagaa PHeexiroosi ammanettiis. Hegaadankka, nuuni Yihoowawu nuna geppidi xammaqettiyo wode, ammaniyo gishshawu hegaadan oottida. Yesuusi nuuni a leemiso oottidi kaallanaadan xeesiis. Yesuusinne Xoossay nuna dumma dumma ogiyan maaddanaagaa ammanettidi nuuni eta ammanana koshshees.—Yoh. 14:1; 1 PHe. 2:21. w15 9/15 3:1, 3

Siiqiya aaway kasetidi koyiyoobaappe issoy ba soo asaa gakkana danddayiya qohuwaappenne daafabaappe naaganaassa gidiyoogee tuma. SHin saluwan deꞌiya nu Aaway, Yihooway hegaappe aadhiyaabaa oottees. Issi leemisuwaa akeeka. Ne ayfee neeyyo keehi alꞌꞌo! Yihoowaykka ba asaa hegaadan xeellees. (Zak. 2:8) Hegaa gishshawu, Xoossaayyo a asay keehi alꞌꞌo! Yihooway baayyo ammanetti oottiya Isxxifaanoosa mala asata morkketi woranaadan issi issitoo paqqadiis. SHin, Xoossay ba asay Seexaanaa cimuwaappe naagettanaadan maaddiyaabaa yootiyoogan, eta ubbaa naagees. (Efi. 6:10-12) Cimmiya duretettaabaa, shori baynnabaaninne iitaban allaxxiyoogaa, Intternneetiyaa iitabawu goꞌettiyoogaanne hegaa malabaa xeelliyaagan tumaa eranaadan, i ba Qaalaanne ba dirijjitee giigissiyo Geeshsha Maxaafaa qofay deꞌiyo xuufetu baggaara nuna maaddees. Siiqiya Aawaadan Yihooway ba asay ufayssan woppu giidi deꞌanaadan naagiyoogee qoncce. w15 9/15 4:15, 17

Yihoowa Markkati Kawotettaa mishiraachuwawu ‘mootettidi mintti essidoogee’ Yihoowa gita kushee eta maaddiyoogaa bessiyaaba. (Pili. 1:7) Issi issi kawotettati Xoossaa asay oottiyoobaa muleera teqqanawu malidosona. SHin, Yihoowa Markkati 2000⁠ppe doommidi, Awurooppan Asaa Maataa Pirdda Keettan shatimmido 24 mootuwaa gujjin, xoqqa pirdda keettatun baa giishin 268 mootuwan shatimmidoogaa qoppiyo wode, Xoossaa kushiyaa ooninne teqqana danddayennaagee qoncce. (Isi. 54:17) Kumetta saꞌan Kawotettaa mishiraachuwaa sabbakiyoogee Xoossay maaddiina. (Maa. 24:14; Oos. 1:8) Qassi ha wodiyan Yihoowa asay kumetta saꞌan ishanttu maabaran issippetettan deꞌees. Alamiyaa asay hegaadan oottana danddayenna gishshawu, haratikka, “Xoossai tumu intte giddon de7ees” yaagiyoy aybissakko akeekana danddayoos. (1 Qor. 14:25) Hegaa gishshawu, Xoossay ba asaa maaddiyoogaa bessiya darobay deꞌees.—Isi. 66:14. w15 10/15 1:13, 14

Nuuni alamiyaaban muleera goꞌettennaadan Geeshsha Maxaafay yootees. (1 Qor. 7:29-31) Ufayssiyaabaa oottiyoogan, allaxxanawu nabbabiyoogan, televizhiiniyaa beꞌiyoogan, deriyaa dembbaa beꞌiyoogan, bayzziyoobaa xeelliiddi yuuyiyoogan, zammaana elektiroonike miishshaa woy alꞌꞌobaa koyiyoogaa mala bala geetettibeennabatun issi Kiristtaanee daro wodiyaa coo wurssana danddayees. Intternneetiyan asaara gayttiyoogee, kiitaanne iimeyliyaa kiittiyoogee, ooratta oduwaabaanne ispporttiyaabaa darotoo beꞌiyoogee nu wodiyaa coo wurssananne hegaabaa muletoo qoppanaadankka oottana danddayees. (Era. 3:1, 6) Daro koshshennaban nu wodiyaa wurssiyoogaa aggennaba gidikko, Yihoowawu goynniyo keehi koshshiyaabaa xaasayi xeellana danddayoos. (Efi. 5:15-17) Seexaanay ba alamee nuna cimmanaadaaninne nu qofaa shaakkanaadan oottees. Hegee koyro xeetu layttan haniis; qassi ha wodiyan ubba hegaappekka iitiis. (2 Xim. 4:10) Yaatiyo gishshawu, hachi gallassa xiqisiyan deꞌiya zoriyaa siyana bessees. w15 10/15 3:7, 8

Maanuheenne a machiyaa naꞌa yelanaagee etawu odettiis! Maanuhee keehi ufayttidoogee qoncce; shin i bawu gita aawatettay imettidoogaakka akeekiis. Israaꞌeela biittan he wode iitabay kumido gishshawu, inne a machiyaa bantta naꞌay Xoossawu haggaaziyaagaa gidanaadan waati dichana danddayiyoonaa? Maanuhee, “‘Na7ai yelettiyo wode ai oottanau koshshiyaakko erissana mala, neeni wontta kiittido Xoossaa asi [kiitanchay] nuukko simmidi yaanaadan oottarkkii’ yaagidi GODAA woossiis.” (Daa. 13:1-8) Intte naꞌa yelidaba gidikko, Maanuhee wozanappe woossido woosaa akeekana danddayeeta. Intte naꞌay Yihoowa eranaadaaninne a siiqanaadan maaddiyo gita aawatettay inttessikka deꞌees. (Lee. 1:8) So Asaa Goynuwaa wode, Yihoowabaanne Geeshsha Maxaafaabaa ubbatoo tamaaranaadan intte eta maaddana danddayeeta. Intte naatuura Geeshsha Maxaafaa saaminttan saaminttan xannaꞌiyoogaappe harabaakka oottana koshshees. (Zaa. 6:6-9) Intte naata tumaa tamaarissiyoogaara gayttida metuwaa genccana danddayeetii? w15 11/15 1:1, 2

Yesuusaagaadan, wozanan deꞌiyaabaa intte beꞌana danddayekketa, shin Xoossay inttena maaddin, akeekancha gidana danddayeeta. Intte intte yelaga naꞌaa wozanaappe loꞌꞌobaa koyanawu he imotaa goꞌettuuteetii? “Wayssiyaagaa” geetettanawu koyiya uri baawa. Intte qofankka haasayankka, intte naꞌaa “makkalancha yelagaa” woy “wayssiya naꞌaa” gooppite. Intte yelaga naꞌay baaxetiiddi deꞌikkokka, intte a abbiyaanne i loꞌꞌobaa oottanawu wozanappe amottiyoogaa akeekiyoogaa i eranaadan oottite. I kaseegaappe loꞌꞌo asa gidanawu oottiyoobaa akeekidi galatite. Danddayettikko kaseegaappe aaro aawatettaa awu immiyoogan, a loꞌꞌo eeshshay yaa loꞌꞌanaadan maaddite. Yesuusi ba erissiyo ashkkaratussi hegaadan oottiis. Yesuusi Naatinaaꞌeelaara gayttoosappe layttanne bagga gidiya wodee aadhi simmin, kiitettidaagaa gidanaadan a dooriis; qassi Naatinaaꞌeeli mishettidi oottiya Kiristtaane gidiyoogaa bessiis. (Luq. 6:13, 14; Oos. 1:13, 14) Intte intte naꞌaa galatiyoogeenne minttettiyoogee, ubbatoo mooriya uradan gidennan, Yihooway goꞌettana danddayiyo mino Kiristtaanedan i bana xeellanaadan maaddees. w15 11/15 2:15, 16

Wurssetta gallassay 1914n doommiyo wode, kumetta saꞌan deꞌiya Yihoowa ashkkarati guutta shaꞌan qoodettiyaageeta. Tiyettida Kiristtaanetuppe attida amaridaageeti bantta shooruwaa siiqiyo gishshawu, Xoossaa ayyaanay eta maaddin Kawotettaa mishiraachuwaa minnidi sabbakidosona. Hegaappe denddidaagan, saꞌaa laattiyo hidootay deꞌiyo zaway baynna daro asay ha wodiyan shiiqiiddi deꞌees. Kumetta saꞌan 115,400⁠ppe dariya gubaaꞌetun 8,000,000 gidiya Yihoowa Markkati deꞌoosona; qassi he qooday gujji gujji bees. Leemisuwawu, 2014 haggaazo layttan 275,500⁠ppe dariya asay, woykko saaminttan saaminttan amakaayiyan 5,300 gidiya asay xammaqettidi Yihoowa Markka gidiis. Nu dirijjitee ubbatoo dicciyoy nuuni Xoossaa ammaniyo gishshaassanne Geeshsha Maxaafaa i ba ayyaanaa kaaletuwan xaafissidoogaa ammaniyo gishshataassa. (1 Tas. 2:13) “Ha sa7aa Xoossai” Seexaanay keehi ixxishiininne eqettishin Yihoowa asay ayyaanaaban dicciyoogee maalaalissiyaaba.—2 Qor. 4:4. w15 11/15 4:12, 14, 16

Geeshsha Maxaafaa eranchati duuxxidi attida, kushiyan xaafettida, qassi beni birshshettida shaꞌan qoodettiyaageeta geeddarssidi loytti xannaꞌidosona. Geeshsha Maxaafan deꞌiya qofaappe keehi daroy tuma gidiyoogee he xinaatiyan qoncciis. SHaakki eribeenna keehi guutta xiqiseti kumetta qofay laamettanaadan oottokkona. Kushiyan beni xaafettidaagaa xannaꞌiyoogee, ha wodiyan deꞌiya maxaafay Geeshsha Maxaafaa xaafidaageeta Yihooway koyro ba ayyaanan kaalettidoogaara issi mala gidiyoogaa Geeshsha Maxaafaa wozanappe xannaꞌiyaageeti ammananaadan oottees. Morkketi keehi eqettishinkka, Yihooway ba Qaalay asi deꞌido wode ubban ay maxaafappenne aaruwan birshshettanaadan oottiis. Daroti Xoossan darin ammanenna woy mule ammanenna ha wodiyankka, Geeshsha Maxaafaagaa keena bayzettiya maxaafi baawa; qassi haꞌꞌi kumettay woy appe amaridaagee 2,800⁠ppe dariya qaalan deꞌees. SHin, issi issi Geeshsha Maxaafaa birshshettati haratuugaa keena qoncce woy ammanttiyaageeta gidana xayikkokka, ubba birshshettatuppe Geeshsha Maxaafan deꞌiya hidootaabaanne atotettaabaa tamaarana danddayoos. w15 12/15 1:13, 14

Haasayiyoobay woranawukka pattanawukka danddayees. Qohiyaabaa haasayiyoogee Seexaanaa alamiyan meeze gididaba. Allaxxiyoobay daroti ‘bantta inxxarssaa bisodan leefanaadaaninne marzze qaalata wonddafiyaa zubbiyaadan dukkanawu giigissanaadan’ denttettees. (Maz. 64:3) Issi Kiristtaanee ha qohiya eeshshaappe naagettana bessees. Harata toochanawu woy boranawu giidi baceessiyoogee ‘marzze qaalatuppe’ issuwaa. Asay darotoo baceessiyoy miichanaassa gidikkokka, hegee sohuwaara laamettidi, kariyoogaa bessiya cashsha gidana danddayees. Kiristtaaneti ‘xayssana’ bessiyo iita haasayaappe issoy marzze mala baceessuwaa. Miichiyaabaa haasayiyoogee ufayssana danddayikkonne, harata qohiya woy yeellayiya qire haasayidi miichanawu malennaadan naagettana koshshees. Geeshsha Maxaafay, “Intte haasayai siyiyaageeta go77ana mala, koshshiyoogaadan minttettiya lo77o qaalai intte doonaappe kiyoppe attin, iita qaalai mulekka kiyoppo” yaagidi zorees.—Efi. 4:29, 31. w15 12/15 3:10

Ha xiqisiyaa wurssettan deꞌiya qofay, koyro xeetu layttan bolla gididi heemmiyaagee gubaaꞌetussi kiittido dabddaabbee “minnite” geetettidi birshshettanakka danddayees. Nuuni minonne ‘payya’ gididi nu gita Xoossawu loytti haggaazanawu koyiyoogee erettidaba. Ha alamee xayana gakkanaashin, nuuni nagarancha gidiyo gishshawu, sahettiyoogee attennaba. Ha wodiyan maalaalissiya hanotan nuuni paxana giidi qoppana danddayokko. SHin Ajjuutaa 22:1, 2y nuuni awude muleera paxanaakko yootees. Kiitettida Yohaannisi “de7o haattaa shaafaa,” qassi ‘zare ubbaa harggiyaappe pattiya’ bonccoy deꞌiyo ‘deꞌo mittaa’ ajjuutan beꞌiis. Hegee haꞌꞌi gidin sinttappekka gidin, pattiya bonccuwaabaa yootiyaaba gidenna. SHin, hegee azazettiya asawu merinaa deꞌuwaa immanawu Yihooway Yesuusa baggaara giigissidobaa bessiyaaba; hegee nuuni tumuppe yeemottidi naagana bessiyaaba.—Isi. 35:5, 6. w15 12/15 4:17, 18

Ha wodiyaa xeelliyaagan Yihooway, “He gallassatun dumma dumma qaalan haasayiya kawotettatu ubbaappe tammu asati yiidi, issi Ayhuda bitaniyaa maayuwaa macaraa oyqqidi, ‘Xoossay inttenaara deꞌiyoogaa nuuni siyido gishshawu, nuuni inttenaara baana’ yaagana” yaagiis. (Zak. 8:23, NW) Leemisuwan odettida tammu asatudan, saꞌan deꞌanawu hidootan naagiyaageetikka ‘Ayhuda bitaniyaa maayuwaa macaraa oyqqidosona.’ Yihooway tiyettidaageeta anjjiyoogaa eti eriyo gishshawu, ayyaanan tiyettida ‘Xoossaa Israaꞌeelatuura’ issippe oottiyoogan ufayttoosona. (Gal. 6:16) Hananabaa yootiya Zakkaariyaasi odidoogaadan, Yesuusikka Xoossaa asaa giddon issippetettay deꞌanaagaa yootiis. I baana kaalliyaageeti naaꞌꞌu cita, hegeekka “amarida dorssa” citanne ‘hara dorssa’ cita gidanaagaa yootiis; gidikkokka eti ‘issi wude’ qassi eta “heemmiyaageekka issuwaa gidana.”—Luq. 12:32; Yoh. 10:16. w16.01 4:1, 2

Nuuni ayyaanaaban shuggenna mala naagettana bessees. Nuuni Seexaanaa Dabloosi haariyo alamiyan deꞌiyo gishshawunne nagarancha gidiyo gishshawu, akeekennan alamiyaa asaagaadan qoppananne hanana danddayoos. Alamiyaa ayyaanay nuuni baanawu koyennasaa efaanawu sugiya, goggiya haattaa mala. Haattay goggiyo ginaa beenna mala, hara ginan minnidi wadhana bessees. Hegaadankka, nuuni Seexaanaa alamiyaa ayyaanan xoonettennaadan keehi baaxetana bessees. Haratuyyo sabbakiyo wode, nu ammanuwaa shugissiya qofaa gidennan, ayyaanaaban keehi maaddiyaabaa yootoos. Haratuyyo sabbakiyoogee Yihooway qaalaa gelidobaanne i siiquwan kessido maaraa nuna hassayissiyo gishshawu, nu ammanuwaa minttees. Hegaa bollikka, ayyaanaabaa ola miishshaa ubbaa gixxi uttanaadan maaddees. (Efi. 6:14-17) Nuuni ayyaanaabaa oosuwaa ubbatoo oottikko, nu metuwaabaa keehi qoppanawu wode demmokko; hegee nuna ayyaanaaban naagees. w16.01 5:12, 13

Uruta Yihoowa ay keena siiqidaakko beꞌa. Qassi Booꞌeezikka Uruta Yihoowa qefiyaa garssan shemppanawu koyido gishshawu o galatiis. (Uru. 2:12) Hegee kafo maray ba aayee qefiyaa giddon baqati attiyoogaa nuuni hassayanaadan oottana danddayees. (Maz. 36:7; 91:1-4) Yihooway Urutiyyo baqati attiyo soho gidiis. I ammanuwaa gishshawu Yihooway o woytiis; qassi a kuuyidoban zilꞌꞌettiyo ayba gaasoynne baawa. Ha wodiyan daroti Yihoowaabaa eriyaaba gidikkokka, a baqati attiyoosa oottanawu koyokkona. Eti banttana geppanawunne xammaqettanawu guyye goosona. Ne huuphiyaa Yihoowayyo geppanawu guyye giyaaba gidikko, neeni hegaadan haniyoy aybissakko qoppa. Ubba asaassi goynniyo xoossati deꞌoosona. (Yaas. 24:15) Tumu Xoossawu oottanawu dooriyoogee eratetta. Ne huuphiyaa Yihoowayyo geppiyoogee neeni a ammaniyoogaa bessiyo loꞌꞌo oge. Ay metoy gakkikkokka, neeni aggennan ayyo haggaazanaadan i nena maaddana. Xoossay Urutiyookka hegaadan oottiis. w16.02 2:6, 7

Abishaayi Saaꞌoola woranawu koyiyoogan, Daawitayyo ammanettiyaagaa gidanawu baaxetiis. SHin Daawiti “GODAI tiyido kawuwaa bolli” kushiyaa denttiyoogee bala gidiyoogaa akeekidi Abishaayi kawuwaa worennaadan diggiis. (1 Sam. 26:9-11) He hanotaappe keehi koshshiyaabaa tamaaroos: Nuuni ubbaappe aaruwan oossi ammanettana koshshiyaakko kuuyana bessiyo wode, nu hanotaara gayttidaagan nuna maaddana danddayiya Geeshsha Maxaafaa maaraa qoppana koshshees. Ammanettiyoogee wozanaappe pulttiyaaba; shin asaa wozanay cimmiyaagaa. (Erm. 17:9) Yaatiyo gishshawu, Xoossaayyo ammanettidi deꞌiya uri bawu mata laggee woy so asi iitabaa oottikkokka, ayyo ammanettanawu paacettana danddayees. Hegaa gishshawu, nuuni siiqiyo uri iitabaa oottidi tumaa aggikko, ubbappe aaruwan nuuni Yihoowawu ammanettana bessiyoogaa hassayana koshshees.—Maa. 22:37. w16.02 4:5, 6

Roomen deꞌiya Kiristtaaneti kase ammanidobaa shaakki erana koshshiyoy aybissee? Geeshsha Maxaafan odettida Ximootiyoosa leemisuwaa qoppa. I Xoossaa Qaalaa loytti erees. A aayyiyaanne a aayee aayyiyaa i ‘guutta naatettan’ deꞌiyo wodiyaappe doommidi a tamaarissidosona. Gidikkokka, PHawuloosi Ximootiyoosa, “Neeni tamaaridoogaaninne eridoogan [“ammanada ekkidoogan,” NW] minnada de7a” yaagidi zoriis. (2 Xim. 3:14, 15) Koyro xaafettido doonan, ‘ammani ekkiyoogaa’ geetettida qaalay “issibay tuma gidiyoogaa ammaniyoogaanne shaakki eriyoogaa” geetettana danddayiyoogaa issi xuufee qonccissees. Ximootiyoosi tamaarido tumaa wozanappe ammaniis. I tumaa ammanidoy a aayyiyaanne a aayee aayyiyaa i hegaa ammananaadan odido gishshataassa gidennan, i yuushshi qoppidi ammani ekkido gishshataassa. (Roo. 12:1) Hegaadan, minna xannaꞌiyoogee oychiyoobaa zaaranaadan, sirennaadaaninne ammanuwan minnanaadan nena maaddees.—Oos. 17:11. w16.03 2:3, 4, 7

Beni, Israaꞌeelati baalaa bonchiyo wode, Yerusalaamen deꞌiya Yihoowa beeta maqidasiyan a sabbiyoogaa qoppa. Eti ogiyaa baanawu giigettoosona, biiddi issoy issuwaara maadettoosona, qassi beeta maqidasiyaa gakkidi issippe goynnoosona. He ubbabaa hashetidi oottana koshshees. Nuunikka ooratta alamiyaa efiya ogiyan hemettiyo wode, issippetettan hashetidi oottana bessees. Nuuni demmana anjjuwaa qoppa! Nuuni ha alamiyaa asaagaadan maayettennaaninne sigettennan deꞌiyo deꞌuwaa aggida. Xoossaa asay issippetettan Yihoowa “deriyaa” pude kiyanaagaa Isiyaasikka Mikiyaasikka yootido hiraagay ha wodiyan polettiyoogaa beꞌiiddi deꞌoos. (Isi. 2:2-4; Mik. 4:2-4) “Wurssetta gallassatun” tumu goynoy tumukka keehi xoqqu giis. SHin asay ubbay issippetettan hashetidi oottiyo wodiyan deꞌiyo wode nuuni keehi ufayttana! w16.03 3:16, 17

Harata loohissanawu wodiyaa bazziyoogee issi issi cimata wayssana danddayees. Eti hagaadan giidi qoppennan aggokkona: ‘Loohissiyoogee keehippe koshshiyaaba gidikkonne, gubaaꞌiyan eesuwan polana koshshiya harabaa mala gidenna. Taani harata loohissiyoogaa kaseyana xayikkokka, gubaaꞌiyan ubbabay maara oosettiyoogee attenna.’ Cimati darobaa sohuwaara polana koshshiyoogee tuma; shin loohissanawu haganaa sugiyoogee gubaaꞌiyaa ayyaanaaban qohana danddayees. Cimati eesuwan polettana koshshiya darobaa oottoosona. SHin cimati loohissana koshshishin ubbatoo haganaa sugikko, gubaaꞌiyan koshshiya ubbaabaa polanawu danddayiya ishantti guutta wodiyaappe guyyiyan deꞌokkona. Gidoppe attin, loohissiyoogaappe kaseyana bessiyaabay deꞌees giidi qoppennaadan nuuni naagettana koshshees. Sinttanaabaa qoppiyaanne loohibeennaageeta loohissanawu bantta wodiyaa bazziya cimati loꞌꞌo ashkkarata; qassi eti kumetta gubaaꞌiyaa maaddoosona.—1 PHe. 4:10. w15 4/15 1:4, 6, 7