Usuppune

Neeni ne huuphiyaa Yihoowayyo geppada xammaqettadii? Yaatikko, Xoossaassi mata dabbo gidiyo alꞌꞌo maataa demmadasa. SHin, Seexaanaa alamiyaa xalla gidennan, nu nagarancha asatettaykka he dabbotaa mooranawu kajjeelees. Ubba Kiristtaanetikka hegaadan paacettoosona. Hegaa gishshawu, nuuni Yihoowaara dabbotaa keehi minttana koshshees. Yihooway neessi mata dabbodan qoncci beettii? Ne dabbotaa minttanawu koyay? Hachi gallassa xiqisee, Yaaqooba 4:8y neeni waatada hegaa minttana danddayiyaakko yootees. He dabbotettaa minttanawu neenikka Yihoowaykka oottiyoobay deꞌees. Nuuni kaseti Xoossaakko shiiqiyo wode, ikka nuukko shiiqees. Darotoo hegaadan oottiyoogee nuuni Yihoowaara dabbotaa mintti mintti baanaadan oottees. Hegee Yihooway nuuyyo mata dabbodan qoncci beettanaadan maaddees. Nuuni Yesuusaagaadan ammanettanaadankka oottees; i, “Tana kiittidaagee tumanchcha; . . . taani a erais” yaagiis.—Yoh. 7:28, 29. w15 4/15 3:1, 2

Neeni siiqiyo so asaappe issoy bohettiis giidi qoppoos. Geeshsha Maxaafay bohettidaageeta xeelliyaagan yootiyoobaa eraasa. (1 Qor. 5:11; 2 Yoh. 10) SHin neeni bohettidaagaa siiqiyo gishshawu, Geeshsha Maxaafaa maaraa azazettiyoogee keehi deexxiyaaba, ubba qassi danddayettennaba gaada qoppana danddayaasa. Bohettidaageeta xeelliyaagan Geeshsha Maxaafaa kaaletuwaa murttada kaallanawu neeni minnanaadan saluwan deꞌiya ne Aaway maaddanaagaa ammanettana danddayay? He hanotaa Yihoowaara dabbotaa minttana danddayiyoobadan qoppuutee? Hegee nuuni nu soo asaa keehi siiqana koshshennaagaa bessii? Bessennaagee qoncce! SHin nuuni ooppenne keehi siiqana koshshiyoy Yihoowa. (Maa. 22:37, 38) Hegee nu soo asay Yihoowayyo haggaazin aggin, eta keehi maaddees. Bohettida intte soo asa hanotay nena qofissikko, qofissiya ubbabaa Yihoowayyo woosan yoota.—Pili. 4:6, 7. w15 4/15 4:14, 16

Harati oottido loꞌꞌoban ufayttiyoogan, qassi nuban guuttaa ceeqettiyoogan bali baawa. Nu soo asan, nu wogan, woy nu diccido heeran yeellatana bessenna. (Oos. 21:39) SHin, haratuura ubba qassi Yihoowaara nu dabbotaa moorana danddayiya otoroykka deꞌees. Hegaa mala otoroy, nuussi koshshiya zoree imettin yiillotanaadaaninne siyennan ixxanaadan oottana danddayees. (Maz. 141:5) Hegaa mala otoroy “issi uri bana keehi xoqqu oottiyoogaa,” woy “darotoo coo mela hara asaappe aadhoos giidi qoppiyaageeti axiraariyoogaa” geetettees. Yihooway otoruwan sugettiyoogaa ixxees. (Hiz. 33:28; Amo. 6:8) SHin Seexaanay asay aagaadan banttaban ceeqettidi otorettiyo wode dosees. Naamiruuda, Paaroona, Abeseloomanne hegeetu mala asati coo mela otorettiyo wode Seexaanay keehi hombbociis!—Doo. 10:8, 9; Kes. 5:1, 2; 2 Sam. 15:4-6. w15 5/15 2:5, 6

‘Xoossaa wolqqay Kiristtoosi’ ba Aawaagaadan, darotoo ba kushiyaappe yeggidi bana kaalliyaageetu amuwaa aliis. (1 Qor. 1:24) I hegaadan oottidoogee a wolqqaa bessiyaaba xalla gidenna. I haratussi wozanappe qoppiyo gishshawu hegaa oottiis. Maatiyoosa 14:14-21 akeeka. Yesuusi erissiyo ashkkarati qumaara gayttidabaa yootanawu akko biidosona. Eti namisettennan waayi aggana; shin hegaa xalla gidennan, katamatuppe Yesuusa kaallidi tohuwan biida namisettidanne daafurida daro asaabay eta qofissiis. (Maa. 14:13) Yaatin i ay oottanee? Yesuusi ichashu oyttaanne naaꞌꞌu moliyaa maccaasatinne naati qoodettennan, 5,000 attuma asaa miziis! SHiiqida “asa ubbai miidi kalliis.” Hegee he sohuwan keehi daro qumay deꞌiyoogaa bessees. He qumaa miidoogee eti soo guyye baanawu koshshiya wolqqaa demmanaadan oottiis. (Luq. 9:10-17) Attida qumay 12 samppaa kumiis! w15 6/15 1:8, 9

SHori baynnabay ubbasan meeze gidido gishshawu, ‘Geeshsha gididi deꞌiyoogee danddayettiyaabee?’ gaada neeni qoppennan waaya aggana. Ee, Yihooway maaddin danddayeetes. Gidoppe attin, nuuni geeshsha gididi deꞌanawu shori baynnabaa amottiyoogaa aggana koshshees. Miyoobaa wottido piree moliyaa cimmana danddayiyoogaadan, issi Kiristtaanee sohuwaara aggana xayikko, shori baynnabaa qoppiyoogeenne pokkobaa amottiyoogee gubaaꞌiyaappe kiyanaadan a cimmana danddayees. Hegee nu ashuwaa ufayssana danddayiyo gishshawu, shori baynnabaa oottanaadan denttettees. Gamꞌꞌidi, iitabaa amoy keehi wolqqaamana danddayees. He wode, Yihoowa ashkkara gidida urikka ba amottidobaa polana danddayees. Ee, “amoi . . . nagaraa yelees.” ( Yaaq. 1:14, 15) Amottiyoobay waatidi iita nagaran yeggana danddayiyaakko keehi qoppana koshshees. SHin nuuni iita amoy diccennaadan teqqikko, shori baynnabaa oottidi hegee kaalettiyo metuwan gelennaagaa eriyoogee keehi minttettiyaaba!—Gal. 5:16. w15 6/153:1-3

Saꞌan 6,000 gidiya layttaappe kase Xoossaa shenee wottiyoobi baynna hanotan haniiddi takkiis. Yihooway asaa deꞌoy loꞌꞌo hanotan doommanaadan ootti medhidoogaa beꞌidi, “daro lo77o” giidoy hegaassa. (Doo. 1:31) Hegaappe simmin Seexaanay makkaliis; qassi he wodeppe doommidi, Xoossaa sheniyaa saꞌan oottida asay keehi guutta. SHin hosppun miiloone gidiya Yihoowa Markkati Xoossaa shenee saꞌan hananaadan woossiyoogaa xalla gidennan, he woosaadan deꞌanawu baaxetiyo ha wodiyan deꞌiyoogee nuussi keehi gita maata. Eti bantta deꞌuwaaninne asaa erissiyo ashkkara oottiyo oosuwaa mishshettidi oottiyoogan he woosaadan deꞌoosona. Xoossaa Kawotettaa eqettiyaageeti ha saꞌaappe xayana gakkanaashin, Xoossaa shenee hananaadan ubbatoo woossoos. Biilooniyan qoodettiyaageeti gannate gidida saꞌan hayquwaappe denddin, Xoossaa shenee muleera polettiyoogaa nuuni he wode beꞌana. (Yoh. 5:28, 29) Nuuni siiqiyo hayqqidaageeti denddiyo wode deꞌidi eta mokkiyoogee keehi ufayssiyaaba! w15 6/15 4:15, 17

Nuuni darotoo ayyaanaa gannatiyaabaa haasayoos. He gannatee nuuni Xoossaaranne nu ishanttuura sarotettan deꞌanaadan oottiya ayyaanaabaa hanotaa bessiyaaba. Nuuni ‘ayyaanaa gannateenne’ “ayyaana beeta maqidasee” issi mala giidi qoppana koshshenna. Ayyaana beeta maqidasee tumu goynuwawu Xoossay giigissidoba. Ayyaanaa gannatee Xoossay nashshiyoogeetanne ha wodiyan ayyaana beeta maqidasiyan awu haggaaziyaageeta shaakki eranawu maaddees. (Mil. 3:18) Yihooway 1919⁠ppe doommidi ayyaanaa gannatee saꞌan giiga, minonne aaho gidanaadan nagarancha asati banaara oottana mala paqqadidoogaa eriyoogee keehi ufayssiyaaba. Ha maalaalissiya oosuwaa oottaydda deꞌay? Yihooway ‘tohuwaa wottiyo sohoy’ bonchettana mala aara issippe oottanawu wozanappe koyay? w15 7/15 1:10, 11

Tiyettida 144,000tuppe attidaageeti saluwaa baanaappe guuttaa kasetidi, Googi Xoossaa asaa bolli denddanaagaa hassaya. Hegee Xoossaa asay waatanaadan oottanee? Saꞌan Xoossaa asay ashshiyaabi baynnaba milatana. ‘Ha olaa olettiyaageeti inttena gidekketa. Intte sohuwaa sohuwaa oyqqi eqqidi, Yihooway inttena ashshiyoogaa beꞌite; Yihudaa asawu, Yerusalaame asawu, yayyoppitenne dagammoppite!’ yaagiya, Kawuwaa Yoosaafixa wode imettida kaaletuwaa eti azazettana. (2Odi 20:17) SHin, saluwan hegaappe dummabay hanana. Tiyettidaageeti ubbay saluwan deꞌiyo wode Xoossaa asaa morkketa xeelliyaagan hananabaa Ajjuutaa 17:14y hagaadan gees: “Eti Dorssaara olettana; shin dorssainne dorssaara de7iyaageeti, i xeegidoogeetinne dooridoogeeti, a kaalliya ammanettidaageeti, he kawota xoonana; aissi giikko, i godatu Godaanne kawotu Kawuwaa.” Yesuusi saluwan banaara haariya 144,000tuura, saꞌan deꞌiya Xoossaa asata ashshana. w15 7/15 2:16

Nu eeshshan, maayiyoobaaninne alleeqettiyooban nuna gubaaꞌiyaa shiiquwaa shoobbida Xoossaa bonchiyoogaa bessana koshshees. Bonchiyoogee nuuni bessennabaa oottennaadankka maaddees. Yihooway ba ashkkaratikka imattatikka Kawotettaa Addaraashan ufayttanaadan koyees. Hegaa bollikka, shiiquwan deꞌiyaageeti bessenna maayuwaa maayiyoogan, shiiquwaa wode kiitaa yeddiyoogan woy haasayiyoogan, miyoogan, uyiyoogaaninne hegaa malaban asaa qofaa wora zaaranawu koyokkona. Kawotettaa Addaraashay woxxiyo soho woy kaaꞌiyo soho gidennaagaa naati akeekanaadan aawaynne aayyiyaa eta loohissana bessees. Yesuusi hanqqettidi zalꞌꞌanchata Xoossaa beeta maqidasiyaappe yedettiis. (Yoh. 2:13-17) Nu Kawotettaa Addaraashaykka geeshsha goyno sohonne ayyaanaabaa tamaariyo soho. Yaatiyo gishshawu, zalꞌꞌiyaara gayttidabaa yan oottiyoogee likke gidenna.—Nahimiyaa 13:7, 8⁠ra gatta xeella. w15 7/15 4:7, 8

“Wurssetta gallassi” iitatettay yaa daranaagaa Geeshsha Maxaafay yootees. (2 Xim. 3:13; Maa. 24:21; Ajj. 12:12) Yaatiyo gishshawu, haꞌꞌi iiti uttida alamiyaa hanotay yaa iitana giidi qoppana danddayoos. SHin ‘daro waayiyaappe’ kase alamiyaa hanotay ay keena iitana gaada qoppay? (Ajj. 7:14) Leemisuwawu, ubba biittan olay denddana, o sonkka qumi deꞌenna, qassi harggee ubba keettaa gelana gaada qoppay? Hegaa mala hanotan, siriya urikka Geeshsha Maxaafaa hiraagay polettiiddi deꞌiyoogaa ammanana danddayees. SHin Yesuusi ba yuussaa xeelliyaagan daro asay kaseegaadan deꞌiiddi, wodee aadhiichana gakkanaashin ‘akeekennaagaa’ yootiis. (Maa. 24:37-39) Hegaa gishshawu, wurssetta gallassi asay wurssettay matidoogaa wolqqan ammananaadan oottiya keehi iitabay hanennaagaa Geeshsha Maxaafay qonccissees.—Luq. 17:20; 2 PHe. 3:3, 4. w15 8/15 2:6, 7

Xoossay ehiyo ooratta alamiyan deꞌanawu giigettanawu ha wodiyan ufayssiya loꞌꞌo deꞌuwaa deꞌiyoogaa aggibayana koshshii? CHii koshshenna! Yihoowayyo haggaaziyoogaa keenaa ufayssiya deꞌoy baawa. Nuuni asi wolqqanttin woy iita waayiyaappe attana xallawu ayyo haggaazokko. Nuuni Yihoowayyo haggaazanawu merettida; hegee gita ufayssaa demissees. Xoossay siiqiyoogeeta gidiyoogeenne a kaaletuwaa kaalliyoogee hara aybippenne aadhees. (Maz. 63:1, 2) Yihoowayyo wozanappe haggaaziyoogan ayyaanaaban anjjuwaa demmanawu ooratta alamee yaana gakkanaashin naagana koshshenna; ha wodiyankka he anjjuwaa demmana danddayoos! Nuuppe amaridaageeti daro layttawu he anjjuwaa demmida; qassi nu deꞌuwan haraban aybiininne hegaadan ufayttana danddayennaagaa eroos.—Maz. 1:1-3; Isi. 58:13, 14. w15 8/15 3:16

Asa xeelan danddayettennaba milatiyaabaa nuuni oottanaadan ammanoy maaddees. (Maa. 21:21, 22) Leemisuwawu, kase nuna eriyaageeti dogiyoogaa keena nuuppe amaridaageetu xeelaynne eeshshay laamettiis. Nuuni Yihoowan ammaniyoogaappe denddidaagan hegaadan oottido gishshawu, i nuna maaddiis. (Qol. 3:5-10) Nuna Yihoowawu geppanaadan ammanoy denttettin a dabbo gidida; hegee nu wolqqan nuuni oottana danddayennaba. Nu ammanoy nuuni minnanaadan oottees. Asappe wolqqaama gidida nu morkkee Dabloosi nuna qohanawu oottiyoobaa ammanuwan eqettana danddayoos. (Efi. 6:16) Hegaa bollikka, nuna metoy gakkiyo wode keehi hirggennaadan Yihoowan ammanettiyoogee maaddees. Ammanoy denttettin nuuni Kawotettaabaa kaseyikko, nuussi koshshiyaabaa immanaagaa Yihooway yootiis. (Maa. 6:30-34) Hegaappekka aaruwan, ooninne ba oosuwan demmana danddayenna merinaa deꞌuwaa imotaa nu ammanuwan demmoos.—Yoh. 3:16. w15 9/15 3:4, 5

Xoossay “koiro nuna siiqido” ogee aybee? Kiitettida PHawuloosi, “Nuuni biron nagaranchcha gididi de7ishin, Kiristtoosi nu gishshau haiqqiis; hegee Xoossai nuna ai keenaa siiqiyaakkonne a siiquwaa erissees” yaagiis. (Roo. 5:8) Siiqoy Yihoowa waanna eeshsha gidiyo gishshawu, Xoossaa azazuwaappe koyroogee awugaakko bana oychida bitaniyawu Yesuusi, “Intte Godaa intte Xoossaa intte kumetta wozanaappe, intte kumetta shemppuwaappe, intte kumetta qofaappe, intte kumetta wolqqaappe siiqite” yaagidoy aybissakko akeekana danddayoos. (Mar. 12:30) Ubbaappe koyruwan, Xoossaa siiqiyoogee wozanaara gayttidaba gidiyoogaa Yesuusi haasayidobaappe akeekoos. Nuuni nu kumetta wozanaappe Yihoowa siiqennan aggiyoogee a ufayssenna. Gidikkokka, Xoossaa siiqiyoogee nu kumetta shemppuwan, qofaaninne wolqqan a siiqiyoogaa gidiyoogaakka akeekoos. Hegaa giyoogee, Xoossaa tumuppe siiqiyoogee nuussi siyettiyaabaappekka keehi aadhiyaaba giyoogaa. Nuuni Xoossaa wozanappe siiqiyoogaa xalla gidennan, nu kumetta qofaaninne wolqqan siiqana bessees. Hananabaa yootiya Mikiyaasi giidoogaadan, Yihooway nuuppe koyiyoobay hegaa.—Mik. 6:8. w15 9/15 5:1-3

Nu deꞌuwan Xoossaa kushiyaa loytti beꞌennaadan oottana danddayiya issi issibay aybee? Nu deꞌuwan metoy nuna iissana danddayees. Hegaadan haniyo wode, Yihooway nuna kase darotoo maaddidoogaa dogana danddayoos. Kawiyaa Elzzaabeela hananabaa yootiya Eelaasa worissanawu naassido wode, bana Xoossay waati maaddidaakko Eelaasikka guutta wodiyawu dogiis. Geeshsha Maxaafay Eelaasi, “Haiqqanau woossiis” yaagees. (1 Kaw. 19:1-4) I maaduwaanne xalatettaa awuppe demmana danddayii? Yihoowakko xeellana koshshees. (1 Kaw. 19:14-18) Iyyoobikka bana qofissiyaaba xallaa qoppido gishshawu, ba hanotaa Xoossaagaadan xeellana danddayibeenna. (Iyy. 42:3-6) Nuuni Iyyoobaagaadan, Xoossaa beꞌanawu keehi baaxetana koshshennan aggenna. Nuuni hegaadan waati oottana danddayiyoo? Nu metuwaara gayttidaagan Geeshsha Maxaafay yootiyoobaa nuuni wotti dentti qoppana koshshees. Yihooway nuna waati maaddiyaakko nuuni akeekiyo wode, i kaseegaappe aaruwan nuuyyo qoncce gidana. w15 10/15 1:15, 16

Yesuusi saꞌan haggaaziyo wode a qofay shaahettanaadan oottana danddayiya darobay merettiis; shin i hegan mule xoonettibeenna. I haggaazuwaa doommido wodiyaa heeran, Qifirinaahooman daro asaa tamaarissi simmiininne maalaalissiyaabaa ootti simmin, asay i bantta katamaappe beenna mala a woossiis. SHin asay a nashshiyaabadan oychido he oyshaa Yesuusi waati zaaridee? I, “Taani hara kataman de7iya asaukka Xoossaa kawotettaa wonggeliyaa mishiraachchuwaa yootanau bessees. Aissi giikko, Xoossai tana kiittidoogee hegaassa” yaagiis. (Luq. 4:42-44) Yesuusi ba yootidoogaadan darosaa biidi sabbakiisinne tamaarissiis. I nagari baynna asa gidikkonne, minnidi oottiyoogaappe denddidaagan daafuriyo gishshawu shemppana koshshees. (Luq. 8:23; Yoh. 4:6) Hegaappe simmin issi wode Yesuusi bana kaalliyaageeti yedetaa waati danddayanaakko tamaarissishin issi bitanee kelttiyaa gelidi, “Tamaarissiyaagoo, ta aawai aggidi haiqqido aquwaa ta ishai tanaara shaakkana mala, ayyo yoota” yaagiis. SHin Yesuusi he yohuwan gelennan ixxiis.—Luq. 12:13-15. w15 10/15 3:10, 11

Yihoowau waanna eeshshay siiquwaa. Yihooway siiqiyoogaa xalla gidennan, i ba huuphe siiqo. Deꞌuwan deꞌiyaabaa gujjin, ubbabaa Medhidaagee siiqiya Xoossaa gidiyoogaa eriyoogee keehi ufayssiyaaba! I ubbabaa oottiyoy siiquwaana. Yihooway ba medhidoogeetussi kehiyaagaanne qarettiyaagaa. I nuna siiqiyoogee i asawu halchidobaa keehi loꞌꞌo ogiyan polanaagaa nuuni ammanettanaadan oottees. I polanabay awu azazettiya ubbaa tumuppe ufayssiyaaba. Leemisuwawu, Yihooway “ba doorido uran [Yesuus Kiristtoosan] sa7an de7iya asa ubbaa bolli xillo pirddaa i pirddana” gallassaa siiquwan keeri wottiis. (Oos. 17:31) Hegee polettanaagaa ammanettoos. Suure qofay deꞌiyo azazettiya asawu imettana loꞌꞌo pirdday sinttappe eti tumuppe anjjettida wodiyan meri merinawu deꞌanaadan oottana. w15 11/15 3:1, 2

Nuuni yootiyoobaa issi issi asay siyees, harati qassi ixxoosona. SHin asaa xeelay ay gidikkokka, Xoossaa Qaalay a ashkkarati ubbatoo kaallana bessiya maaraa yootees. Nuuni nu shooruwaa siiqiyo gishshawu, nu ammanuwawu exatidi zaariyoobaa ubbatoo “ashkketettaaninne yashshatettan” zaaranawu koyoos. (1 PHe. 3:15) Nu bolli hanqqettiya uri nu yootiyoobaa ixxikkokka, nuuni nu shooruwaa siiqiyoogaa bessoos. Nuuni Yesuusa leemisuwaa kaalloos. I “asi bana cayiyo wode, zaaridi cayibeenna; waayettiyo wodekka manddibeenna. SHin xillo pirddiya Xoossaayyo bana aattidi immiis.” (1 PHe. 2:23) Yaatiyo gishshawu, ubbatoo nu huuphiyaa kawushshidi, ha zoriyaa kaalloos: “Iitaa gishshaa iitaa woi cashshaa gishshaa cashshaa zaaroppite; hegaa aggidi, Xoossai intteyyo anjjuwaa immanau inttena xeesido gishshau anjjite.”—1 PHe. 3:8, 9. w15 11/15 4:17, 18

Yesuusi darotoo ba erissiyo ashkkarata siiqiyoogaa yootees. (Yoh. 15:9) Yesuusi ba erissiyo ashkkaratuura daro wodiyaa aattees. (Mar. 6:31, 32; Yoh. 2:2; 21:12, 13) Hegaadankka, intte intte naata siiqiyoogaa etawu yootite; qassi intte eta xoqqu oottidi xeelliyoogaa ubbatoo bessite. (Lee. 4:3) Awusttiraaliyan deꞌiya Sameeli hagaadan giis: “Naatettan taassi ta aaway Geeshsha Maxaafaa Taariketa Tamaariyo Maxaafaa giyo maxaafaa omarssi omarssi ubbatoo nabbabees. I taani oychiyoobaa zaarees, tana qoommeesinne saro aqa giidi tana yerees. Ta aaway diccido keettan qoommiyoogeenne yeriyoogee meeze gidennaagaa guyyeppe erada garamettaas! I tana siiqiyoogaa yootanawu wozanappe baaxetiis. Hegaappe denddidaagan, a loytta siiqaysinne an ammanettays; qassi hirggikke.” “Taani nena siiqays” giidi intte naatuyyo ubbatoo yootiyoogan hegaadan etawu siyettanaadan maaddite. Intte naata siiqiyoogaa bessite. Etaara haasayite, etaara miite, etaara kaaꞌite. w15 11/15 1:3, 4

Aadhida xeetu layttaa doomettan Geeshsha Maxaafaa minnidi xannaꞌiya amaridaageetu citay ‘ammanettida wozannaama ashkkara’ gididi sunttettiyo wode, eti ‘so asaa’ darotoo haasayissiyoy Inggilizettuwaana. He ‘ashkkaray’ kaseegaappe daro qaalan ayyaanaabaa qumaa giigissanawu keehi baaxetiiddi takkiis; he qooday haꞌꞌi 700⁠ppe daro. Koyro xaafettida qofaa he wode asay haasayiyo qaalan Geeshsha Maxaafaa suure birshshana koshshiis. Ooratta Alamiyaa Geeshsha Maxaafaa Birshshiya Konttee sunttettin, eti birshshidoogee 1950⁠ppe 1960 gakkanaashin deꞌiya tammu layttan usuppun maxaafan shaahettidi kiyiis. Hegeetuppe koyroy kiyidoogaa Naase 2, 1950n erissiyo wode, Ishaa Naatan Noori he birshshettay miilooniyan qoodettiya asaa ayyaanaaban maaddana giidi amottiyoogaa qonccissiis. w15 12/15 1:15, 17

Ufayssiya qaalaa demmanawu darotoo metootay? Yaanikko, daro qaalaa eriyoogee neessi koshshennan waayi aggana. Yaatana danddayiyo issi ogee Geeshsha Maxaafaaninne nu xuufiyan qaalata goꞌettiyo ogiyaa akeekiyoogaa. Ooratta qaalatu birshshettaa akeeka. Ubbaappe aaruwan, harata maaddiya ogiyan qaalaa waata goꞌettanaakko tamaara. Harata maaddiya ogiyan waati haasayanaakko tamaaranawu Yesuusa leemisuwaa xannaꞌana danddayoos. ‘Daafuridaageeta qaalan waatidi minttettanaakko’ Yihooway a tamaarissido gishshawu, i ay haasayanaakko erees. (Isi. 50:4) Nuuni haasayanabaa wotti dentti qoppiyoogee haasayana bessiyaabaa dooranaadan maaddana danddayees. (Yaaq. 1:19) Nuna hagaadan oychana danddayoos: ‘Ha qaalati taani yootana koyiyoobaa qonccissiyoonaa? Taani dooriyo qaalay siyiya uri waananaadan oottanee?’ w15 12/15 3:12

Yesuusi kasetidi yootidoogaadan ‘Yerusalaamee wotaaddaran direttiis.’ He wode Yihudan, ubba qassi Yerusalaamen deꞌiya Kiristtaaneti sohuwaara issibaa oottana. Kasetidi odettidabay polettiyoogaa doommiyo wode, eti sohuwaara baqatana bessiyoogaa Yesuusi mintti yootiis. (Luq. 21:21-24) Yesuusi hegaa yooti simmin deꞌiya 28 layttatun, Israaꞌeelan deꞌiya, ammanettida Ayhuda Kiristtaaneti daro yedetaanne waayiyaa gencci aadhidosona. (Ibr. 10:32-34) SHin ammanuwaa paacciya wolqqaama waayee biron eta gakkanaagaa PHawuloosi erees. (Maa. 24:20, 21; Ibr. 12:4) I eta aybi gakkikkokka giigetti uttanaadan koyiis. Eta ammanoy shemppo ashshiyaagaa keenaa keehi mino gidana bessees; qassi eti keehi genccana bessees. (Ibr. 10:36-39) Yaatiyo gishshawu, PHawuloosi he wode deꞌiya alꞌꞌo ishatinne michoti banttana gakkanabaa genccana mala eta minttettiyaabaa xaafanaadan Yihooway ba ayyaanan denttettiis. He dabddaabbee ha wodiyan Ibraawe maxaafaa geetettees. w16.01 1:1, 2

Nuuni Xoossaa siiquwan goꞌettanawu maayikko, nu ishata siiqana bessees. (1 Yoh. 3:16) Nuuni siiquwaa ayba ogetun bessana danddayiyoo? Yesuusi nuuyyo leemiso gididobaa qoppa. I saꞌan haggaaziyo wode, bantta huuphiyaa kawushshiyaageetussi qarettidi maaddiis. I wobbeta, qooqeta, tulletanne duudeta pattiis. (Maa. 11:4, 5) Ayhuda haymaanootiyaa kaalettiyaageeti ‘qanggettida asadan’ xeelliyo, ayyaanaaban namisettidaageeta Yesuusi ufayttidi tamaarissiis. (Yoh. 7:49) I bantta huuphiyaa kawushshiya he asata siiqidi eta maaddiis. (Maa. 20:28) Ne gubaaꞌiyan deꞌiya ishanttubaanne michonttubaa qoppay? Neeni maaddana koshshiyo uri deꞌana danddayiyoogee qoncce. Geella maadoy koshshiyo layttan sugidaageeti deꞌana danddayoosona. Nuuni nu ishantta siiqanaadan Xoossaa siiqoy nuna denttettana bessees. w16.01 2:12-14

Hara dorssati ha wodiyan ayyaanan tiyettiya ubbatu sunttaa erana koshshii? Koshshenna. Aybissi? Issi uri saluwan deꞌanawu doorettiyo wode, biron shoobetteesippe attin, wurssettan woytuwaa demmanaagee erettiichibeenna gishshataassa. Seexaanay “harai atto Xoossai dooridoogeetakka balettanau” ‘wordduwaa hananabaa yootiyaageeta denttiyoy’ hegaassa. (Maa. 24:24) Yihooway woytana gakkanaashin, ayyaanan tiyettida Kiristtaanee saluwan ba woytuwaa ekkanaagaa woy agganaagaa ooninne erenna. Yihooway hegaa kuuyiyoy woykko wurssetta maatafaa a bolli wottiyoy, i ammanettidaagaa gididi hayqqanaappe kase woy ‘daro waayee’ doommana haniyo wode. (Ajj. 2:10; 7:3, 14) Hegaa gishshawu, ha wodiyan Xoossawu oottiya asatuppe wurssettan 144,000tu yara gidanay oonakko eranawu koyiyoogee aynne maaddenna. w16.01 4:2, 3

Mishiraachuwaa yootiyoogee Yihooway asaa naatuyyo siiquwan halchidobaara gayttidaba. I asay hayqqennan merinawu saꞌan deꞌanaadan halchiis; qassi Addaamee nagaraa oottidaba gidikkokka, Yihooway ba qofaa laammibeenna. Ubba i asaa naati nagaraanne hayquwaa pirddaappe attiyo ogiyaa giigissiis. He halchuwaara maayiya ogiyan, Yesuusi saꞌaa yiidi, azazettiya asaa naatuyyo ba shemppuwaa aatti immiis. Gidikkokka, asay azazettanawu, etappe Xoossay koyiyoobaa erana bessees. Hegaa gishshawu, Yesuusi Xoossay asaappe koyiyoobay aybakko tamaarissiis; qassi ba erissiyo ashkkaratikka hegaadan oottanaadan azaziis. Nuuni asay Xoossaara sigettanaadan maaddiyo wode, i asaa naata nagaraappenne hayquwaappe ashshanawu giigissidobaara maayiyaabaa oottoos. Hegee nuuni “asai ubbai attanaadaaninne tumatettaa eranaadan koyiya” Yihoowa siiqiyoogaa bessiyaaba.—1 Xim. 2:4. w16.01 5:15, 16

Akaaza naꞌay Hizqqiyaasi Xoossaa bolli hanqqettiyaanne yiillotiya asa gididi diccana danddayees shin. Aagaara gatti xeelliyo wode, guutta metoy gakkiyo issi issi asati Yihoowa bolli woy a dirijjitiyaa bolli ‘yiillotana’ danddayiyaabadan qoppana danddayoosona. (Lee. 19:3) Qassi harati eta soo asay oottido iitabaa gaasuwan eta deꞌoy moorettidoogaa, geella bantta aawati oottido balabaa etikka zaarettidi oottiyoy hegaa gishshataassa giidi qoppana danddayoosona. (Hiz. 18:2, 3) SHin hegaa mala qofay tumee? Hizqqiyaasa deꞌoy hegee tuma gidennaagaa bessees! Ha iita alamiyan asaa bolli gakkiya metuwawu pulttoy Yihoowa gidenna gishshawu, a bolli yiillotiyo gaasoy baawa. (Iyy. 34:10) Aaway woy ayyiyaa bantta naati loꞌꞌobaa woy iitabaa oottanaadan tamaarissana danddayiyoogee tuma. (Lee. 22:6; Qol. 3:21) SHin hegee nu soo asaa hanotay nuuni loꞌꞌo woy iita gidanaadan oottees giyoogaa gidenna. Hegaappe dumma hanotan, nuuni loꞌꞌobaa woy iitabaa dooridi oottiyo maataa Yihooway nu ubbaassi immiis.—Zaa. 30:19. w16.02 2:8-10

Daawiti Israaꞌeela kawo gidanaadan Xoossay dooridoogaa Abaneeri erikkokka, Saaꞌooli Daawita woranawu koyido wode Saaꞌoola maaddiis. (1 Sam. 26:1-5) Saaꞌooli hayqqi simmin, Abaneeri Saaꞌoola naꞌaa Yaabustta gidennan, Daawita maaddiyoogan ba huuphiyaa kawushshidi Xoossaayyo ammanettiyoogaa bessana danddayees. Guyyeppe Abaneeri Kawuwaa Saaꞌoola baakkeera aqidoogee, kawo gidanawu koyidi gidennan aggenna. (2 Sam. 2:8-10; 3:6-11) Hegaadankka, Daawita naꞌay Abeseloomi ba huuphiyaa kawushshibeennaagee Xoossaayyo ammanettennaadan oottiis. “Abeseloomi para gaariyaa, paratanne ba sinttan woxxanau ishatamu asata giigissiis”! (2 Sam. 15:1) I daro Israaꞌeelati bayyo ammanettanaadankka cimmiis. Abaneeraagaadan, Abeseloomi Yihooway Israaꞌeela kawo gidanaadan Daawita sunttidoogaa erikkokka, Daawita woranawu maliis. (2 Sam. 15:13, 14; 17:1-4) Abaneeranne Abeselooma hanotay aawatettaa maataa demmanawu bessiyaagaappe aattidi amottiyoogee issi uri Xoossaayyo ammanettennaadan oottana danddayiyoogaa qonccissees. Yihoowawu ammanettida ashkkaray ooninne hegaadan bana siiqennaageenne iita ogiyaa kaallennaagee qonccee. w16.02 4:9-11

Ne ammanoy mino gidikko, hegaa neeni oosuwan qonccissana giidi qoppiyoogee bessiyaaba. Yelagatikka ‘geeshshanne Xoossaa milatiyaageeta’ gidana bessees. (2 PHe. 3:11) Ne ‘deꞌoy geeshsha’ gidanaadan neeni kandduwan geeshsha gidana bessees. Hegaara gayttidaagan ne hanotay ay malee? Leemisuwawu, aadhida usuppun aginaabaa qoppa. Neeni iitabaa oottanaadan paacettiyo wode, iitaa kehaa shaakka eranawu loytta qoppadii? (Ibr. 5:14) Laggeti iitabawu denttettin neeni eqettido wodiyaa qoppana danddayay? Timirtte keettan ne eeshshay ne ammanuwaabaa loytti qonccissii? Nena borennaadan gaada nenaara tamaariyaageeta milatiyoogaappe, ne ammaniyoobawu exatay? (1 PHe. 4:3, 4) Bali baynna asi deꞌennaagee erettidaagaa. Yihoowassi daro layttawu haggaazidaageetikka, asaa sinttan bantta ammanuwawu exatanawu issi issitoo yayyana danddayoosona. Gidikkokka, Yihoowawu ba huuphiyaa geppida uri Xoossaa sunttan xeegettiyoogan ceeqettiyoogee bessiyaaba; qassi i hegaa ba eeshshan qonccissees. w16.03 2:10, 11

Yihooway ba asawu beniisappekka kaaletuwaa immees. Leemisuwawu, asay merinawu ufayttidi deꞌanaadan oottana danddayiya kaaletuwaa Edene gannatiyan immiis. (Doo. 2:15-17) Addaameenne Hewaana Yihoowa kaaletuwaa siyidaba gidiyaakko, azzanttiya deꞌo deꞌidi wurssettan hidooti baynna hayqo hayqqiyoogaappe attana danddayoosona. Hewaana azazettiyoogaa aggada, shooshshay yootidoba milatiya zoriyaa siyaasu. Addaameekka a giidobaa siyiis. Eti naaꞌꞌaykka banttana siiqiya Aawaa kaaletuwaa siyennan ixxidosona. Hegaappe denddidaagan, asa ubbay hayquwaa ogiyan bees. Ha wodiyan, i ba asaa sinttan eqqidabadan, eti daafabaappe naagettidi merinaa deꞌuwaa ogiyaa baanaadan bessees. Hegaappekka aaruwan, i dorssati iita ogiyaa beenna mala koshshiya kaaletuwaa immiya siiqiya henttancha mala. w16.03 4:2, 3