Hosppune

Issi wode, i Yihoowa sinttan suure gididi deꞌiis. SHin ha ayyaana meretay asaa naati baassi goynnanaadan amottiyoogaa doommiis. He iita amuwaa aggennan ixxidi, he amoy diccidi nagaraa yelanaadan oottiis. (Yaaq. 1:14, 15) He meretay “tumatettaakko shiiqi erenna,” Seexaanaa gidiyoogaa eroos. I Yihoowa bolli makkalidi, “wordduwaukka aawa” gidiis. (Yoh. 8:44) Seexaanay makkalido wodeppe doommidi, Yihoowawu wolqqaama morkke gidiyoogaa bessiis; qassi asaa naatussikka morkke. Seexaanawu imettida sunttati i ay keena iitakko bessoosona. “Eqettiyaagaa” giyo birshshettay deꞌiyo Seexaanaa giyo sunttay ha iita ayyaana meretay Xoossaa haaruwawu exatiyoogaappe hegaa ixxiyoogaanne bawu deꞌiya wolqqa ubban olettiyoogaa bessees. Aybippenne aaruwan, Seexaanay Yihoowa haaroy xayanaadan koyees. w15 5/15 1:1, 2

Nuuni Geeshsha Maxaafaa xannaꞌiyo wode Yihoowawu loytti haggaazanawu nu deꞌuwan laamettana danddayiyoobaa tamaariyoogee tuma. SHin hegee nuuni Yihoowa loꞌꞌo eeshshaa keehi nashshanaadankka maaddees; yaatiyo wode a keehi siiqoos. Nuuni Xoossaa mintti siiqiyo wode, ikka nuna keehi siiqees; hegee aara dabbotaa minttanaadan oottees. SHin nuuni Yihoowayyo mata dabbo gidanawu, loꞌꞌobaa halchidi xannaꞌanawu koshshees. Yohaannisa 17:3y, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagees. Hegaa gishshawu, nu halchoy era gujjana xallaassa gidennan, Yihoowa loytti ‘eranaassa’ gidana koshshees. (Kes. 33:13; Maz. 25:4) Nuuni Yihoowa loytti eriyo wode, Geeshsha Maxaafay yootiyo issi issibaa, i hegaadan oottidoy aybissakko nuuyyo gelana xayikko, hegee nuna hirggissenna. w15 4/15 3:6-8

Harati ayyaanaaban diccanaadan maaddiya amarida cimati ishantta waati loohissiyaakko mata wode oyshettidosona. Ha ishanttu hanotay issi mala gidana xayikkonne, eti zorido zoree issi mala. Hegee ay bessii? PHawuloosa wodiyaagaadan, Geeshsha Maxaafaa goꞌettidi hegaadan loohissiyoogee “ubba sohuwan de7iya [gubaaꞌe] ubban” tamaaretussi haniyaaba. Asttamaaree tamaarissanawu injjetiya hanotaa giigissana koshshees. Ataakilttiyaa oottiyaagee zerettaa zeranaappe kase gadiyaa goyidi liiqissana koshshiyoogaadan, asttamaaree tamaariyaa oorattabaa tamaarissanaappe kase, a wozanaa giigissana woykko a minttettana koshshees. Yaatin, asttamaareti harata loohissanawu injjetiya hanotaa waati giigissiyoonaa? Sameeli Saaꞌooli Israaꞌeelata kaalettanaadan giigissido wode oottidobaa kaalliyoogaana.—1 Sam. 9:15-27; 10:1. w15 4/15 1:11, 12

Ha alamee minttettiyo darobay Geeshsha Maxaafaa maaraara maayettenna. Ha alamiyan deꞌiya ubbabay iita gidennaagee tuma. Gidikkokka, Seexaanay nuuni iitabaa amottidi nagaraa oottanaadan denttettanawu woy alamiyaa siiqidi Yihoowayyo goynniyoogaa agganaadan oottanawu ba alamiyaa goꞌettiyoogaa nuuni qoppana koshshees. (1 Yoh. 2:15, 16) Alamiyaa siiqiyoogee koyro xeetu layttan amarida Kiristtaaneta qohiis. Leemisuwawu, PHawuloosi, “Deemaasi ha wodiyaa sa7aa dosidi, tana aggidi . . . biis” yaagiis. (2 Xim. 4:10) Deemaasi alamiyaabaa ay dosidi PHawuloosa aggidi biidaakko Geeshsha Maxaafay yootenna. Deemaasi Yihoowayyo haggaaziyoogaappe aaruwan aquwaa siiqennan aggenna. Hegaadan gidikko, ufayssiya maatay Deemaasappe haliis. I yaatidoogee bessiyaabee? Akkay. Deemaasi PHawuloosa maaddiiddi deꞌana danddayees shin. Yihooway ayyo immiyoobaappe aadhiyaabaa alamee mule immana danddayenna!—Lee. 10:22. w15 5/15 2:10, 11

Yesuusi waayettana xayikkonne, haratu waayiyaa akeekiis. Leemisuwawu, coo asay banttana cimmiyaanne asa wogaa darissidi banttana deexobaa toossiya haymaanootiyaa kaalettiyaageetussi yayyees. (Maa. 23:4; Mar. 7:1-5; Yoh. 7:13) Yesuusi aynne yayyibeenna woy cimettibeenna; shin i bana gakkibeenna hanotaakka akeekana danddayees. Yaatiyo gishshawu, i “daro asaa be7idi, heemmiya asi bainna dorssadan asai hirggiyo gishshaunne asaa maaddiyaabi bainna gishshau, asaayyo qarettiis.” (Maa. 9:36) Yesuusi ba Aawaagaadan, asaa siiqeesinne etawu qarettees. Waayettiya asaa beꞌido wode, Yesuusi etawu qarettiis. Hegaa gishshawu, i wottiyoobi baynna hanotan asaa ba Aawaagaadan siiqiis. Yesuusinne i kiittidoogeeti haaho sohuwaa bi sabbaki simmidi, guuttaa shemppi ekkanawu asi baynnasaa baanawu koyidosona. I bana naagiya daro asawu qarettido gishshawu, eta “darobaa tamaarissuwaa doommiis.”—Mar. 6:30, 31, 34. w15 5/15 4:3, 4

Xoossawu bayra naꞌay akeekanawu danddayettenna Yihoowa aadhida eratettawu aybippenne aadhiya leemiso; qassi i ba Aawawu “waanna oosanchcha.” I ba Aaway “salota miccido wodenne” “sa7aa baasuwaa i baasido wode” ay keena ufayttidaakko qoppa. SHin Xoossawu bayra Naꞌay ha meretata nashshikkonne, asaa naatun keehi ‘ufayttees.’ (Lee. 8:22-31) Ee, koyroppe doommidi i asaa siiqees. Guyyeppe, Xoossawu Bayra Naꞌay ba Aawawu ammanettiyoogaa, a siiqiyoogaanne ‘asaa naata’ wozanappe siiqiyoogaa bessanawu “ba shenen ubbabaa aggi bayidi,” asa milatidi qoncciis. I “daro asaa wozanau” hegaadan oottiis. (Pili. 2:5-8; Maa. 20:28) I asaa keehi siiqees! w15 6/15 2:1, 2

Yihooway neeyyo oottidobaa nashshay? Yaanikko nena Yihoowawu geppada xammaqettiyoogee bessiyaaba. Ne huuphiyaa geppiyoogee, ay gidikkokka Yihoowa sheniyaa merinawu oottanawu qaalaa geliyoogaa gidiyoogaa hassaya. Hegaa mala qaalaa gelanawu neeni yayyana bessii? Mule yayyana bessenna! Yihooway neeyyo keehi loꞌꞌobaa amottiyoogaanne i “bana koyiyaageetuyyo woituwaa immiyoogaa” hassaya. (Ibr. 11: 6) Ne huuphiyaa Yihoowayyo geppiyoogeenne xammaqettiyoogee ne deꞌoy iitanaadan oottenna. Ubbakka, Yihoowayyo haggaaziyoogee ne deꞌuwaa giiga oottees. Ba goꞌꞌa xallawu nena koyiya Seexaanaappe Yihooway keehi dumma! Seexaanay baassi exatiyaageetussi wodeppe goꞌꞌiyaabaa immenna. Baayyo baynnabaa neessi waatidi immana danddayii? w16.03 2:16, 18, 19

Yihooway neessi mata dabbodan qoncci beettana mala, i woosaa siyiyoogaa neeni ammanana bessees. Ane hagaa qoppa: Yesuusi asa gidanaappe kase Yihooway baassi oottiya asatu woosaa siyishin beꞌiis. Hegaappe simmin, Yesuusi saꞌan haggaaziyo wode, saluwan deꞌiya ba Aawaakko woossiyoogan baassi siyettiyaabaa ayyo yootiis. Yihooway siyenna giidi qoppiyaakko, i hegaadan oottanee, ubbakka kumetta qammaa woossiiddi aqanee? (Luq. 6:12; 22:40-46) Woosaa goꞌꞌay woppu oottiyoogaa xalla giidi qoppiyaakko, i ba erissiyo ashkkarati woossanaadan tamaarissanee? Woosay Yihoowaara haasayiyo oge gidiyoogaa Yesuusi eriyoogee qoncce. Yihooway ‘woosaa siyiyaagaa’ gidiyoogaa nuunikka ammanettana danddayoos.—Maz. 65:2. w15 4/15 3:11, 13

Intte naati siyishin intte huuphiyaa kawushshidi woossiyo wode, eti Yihoowan zemppiyoogaa tamaaroosona. Brazile biittan deꞌiya Ana hagaadan gaasu: “Ta aayee aawaynne aayyiyaa sahettiyoogaa mala metoy merettiyo wode, eti he hanotaa genccana mala wolqqaa immanaadaaninne loꞌꞌobaa kuuyiyo eraa immanaadan Yihoowa woossoosona. Eti keehi unꞌꞌettiyo wodekka, bantta toohuwaa Yihoowa bolli wottoosona. Hegaappe denddidaagan, taani Yihoowan ammanettiyoogaa tamaaraas.” Ne naatuura issippe woossiyo wode, eta xallawu woossoppa. Nenakka Yihooway maaddanaadan, leemisuwawu ootissiyaagee oosuwaappe gita shiiquwawu paqqadanaadan a oychanawu maaddana mala, ne shooruwawu markkattanawu xalanaadan maaddana mala, woy haraban maaddana mala woossa. Neeni ne huuphiyaa kawushshada Xoossan ammanettikko, ne naatikka an ammanettiyoogaa tamaarana. w15 11/15 1:7, 8

Neeni kaseegaappe aaruwan Yihoowa siiqanaadan maaddiya keehi loꞌꞌobay Yihooway immido gita imota gidida a Naꞌaa wozo yarshshuwaabaa wotta dentta qoppiyoogaa. (2 Qor. 5:14, 15; 1 Yoh. 4:9, 19) Wozuwaabaanne hegee nena maaddiyo ogiyaabaa qoppiyoogee neeni hegaa nashshiyoogaa bessanaadan denttettees. Wozuwaa neeni nashshiyoogaa ha leemisuwan qonccissana danddayettees: Haattay nena maana hanishin issi uri ashshiis gaada qoppa. Neeni soo baada, ne bollaa xiꞌꞌissa simmada he bitanee neessi oottidobaa doga aggay? Hegaadan oottennaagee qoncce! Ne shemppuwaa ashshida he bitaniyaa neeni ubbatoo galatanaagee erettidaba. Neeni ne deꞌuwaa he bitaniyawu acotadasa giyoogaa mala! Xoossaa Yihoowayyoonne Yesuus Kiristtoosayyo nuuni hegaappekka aadhiyaabaa acotida. Wozuwaa Yihooway siiquwan giigissido gishshawu, gannate gidana saꞌan merinawu deꞌiyo maalaalissiya hidootay nuussi deꞌees! w16.03 2:16, 17

Yihooway zawi baynna layttawu saluwan awu ammanettidi deꞌida ba mexi issi naꞌan keehi ammanettees. Ha saꞌan, Yesuusi keehi iita paacee gakkishin ba Aawaayyo ammanettidaagaa gididi hayqqiyoogan, suure gididi deꞌiisinne Yihoowa haaruwawu exatiis. Yesuusi ba hayquwan asaa wozido gishshawunne Xoossay ehaana giido ooratta alamiyan merinawu deꞌanaadan ogiyaa dooyido gishshawukka, nuuni keehi galatana koshshees! Kiitettida Yohaannisi hagaadan giis: “Xoossai nuna ba siiquwaa hagan bessiis; nuuni Kiristtoosa baggaara de7uwaa demmana mala, ba issi Na7aa ha sa7aa kiittiis. Siiqo giyoogee hagaa; Xoossai nuna siiqidi, nuuni nu nagaraappe maarotettaa demmido ba Na7aa nuuyyo kiittiisippe attin, nuuni a siiqidoogaana gidenna.”—1 Yoh. 4:9, 10. w15 11/15 3:13, 14

Nuuni Addaame naata gidiyo gishshawu, nagaraanne a qixaatiyaa, hayquwaa laattida. “Tawu wozoy koshshenna” gaana danddayiya uri baawa. Xoossawu keehi ammanettiya ashkkaratussikka Kiristtoosa baggara qonccida Yihoowa aaro kehatettay koshshees. Nuuni ubbay nu gita nagaray atto geetettidoogaa akeekanawu bessees. Yihoowa siiqoynne a qaretay nuuni ay oottanaadan denttettana koshshii? Nuuni nu ishanttu woy nu michonttu bolli lanccidobay deꞌikko “atto giya” Yihoowa milatana bessees. (Nah. 9:17; Maz. 86:5) Yihooway nu daro acuwaa maaranawu oottidobaa nashshikko, haratuyyo wozanappe atto gaanawu koyoos. Nuuni harata siiqananne etawu atto gaana xayikko, Xoossay nuna siiqennanne nuussi atto geenna. (Maa. 6:14, 15) Atto giyoogee kasebaa laammennaagee tuma, shin sinttappe nuuyyo loꞌꞌobaa demissanaagee erettidaba. w16.01 2:5, 15-17

Yesuusi PHeexiroosinne hara erissiyo ashkkarati sinttanaabaa qoppanaadan maaddanawu hegaa yootiis. Hegaa gishshawu, kumetta saꞌaa ayssidi azazettiya asaassi gita anjjuwaa ehaana kawotettan oottanabaa PHeexiroosinne hara erissiyo ashkkarati qoppana danddayoosona. Yihoowassi haggaaziya saꞌan deꞌiyaageeti Xoossay qaalaa gelidobay polettiyo wodiyaabaa qoppiyoogan ubbatoo goꞌettidosona. Aabeeli sinttanaabaa loꞌꞌobaa qoppiis; qassi he hidootaa ammanido gishshawu, Yihoowa ufayssiis. Abrahaami ammanuwan minnidoy yaana geetettida “zerettaa” xeelliyaagan Xoossay kasetidi yootidobay polettanaagaa “beꞌido” gishshataassa. (Doo. 3:15) Muusee “wodeppe demmana woituwaa i tishshi oottidi xeellido gishshau,” Yihoowa ammaniis, qassi A kaseegaappe loytti siiqiis. (Ibr. 11:26) Nuuni Yihooway qaalaa gelidobay polettana wodiyaabaa qoppiyo wode, a mintti ammanoosinne siiqoos. w15 5/15 3:17, 18

Ayyaanaaban kayma gidanawu koyiya Kiristtaanee Yesuusa leemisuwaa kaallidi, bawu danddayettida keenan loyttidi Geeshsha Maxaafaabaa eranawu koyees. I ‘mino qumay wozannaama asaassa’ gidiyoogaa akeekidi, a giddon deꞌiya qofaa ubbatoo loytti pilggees. (Ibr. 5:14) Kayma Kiristtaanee ‘Xoossaa Naꞌaa loytti eranawu’ koyiyoogee qoncce. (Efi. 4:13) Galla galla Geeshsha Maxaafaa nabbabay? Buzo xinaatiyaa ubbatoo xannaꞌay? Saaminttan saaminttan so asaa goynuwaa goynnay? Xoossaa Qaalaa xannaꞌiyo wode, Yihoowa qofaa neeni loytta eranaadan maaddiya Geeshsha Maxaafaa maaraa akeeka. Yaatada, issibaa kuuyiyo wode Geeshsha Maxaafaa maaraa kaalliyoogan hegaa oosuwan peeshshanawu mala; hegee neeni Yihoowakko keehi shiiqanaadan maaddees. w15 9/15 1:5, 9, 10

Yesuusi saꞌaanne an deꞌiyaabaa loyttidi erees. I saꞌan deꞌiya ubbabaa waatidi maara ayssanaakkonne waatidi ubbawu gattanaakko erees. Yesuusi saꞌan deꞌiyo wode meretaa wolqqaa azaziyoogan, i ‘Xoossaa wolqqaa’ gidiyoogaa bessiis. Hanotaa ane qoppa: Kiristtoosi haggaazuwan daafuriis. Beetay wolwoluwaa shocees, denddida haattaykka wolwoluwaa giddo gelees. SHin beetay kooshimmishiininne wolwoloy yaanne haanne shocettishin Yesuusi xiskki uttiis. I shemppanawu koyiis. Keehi yayyida a erissiyo ashkkarati Yesuusa xiskkuwaappe denttidi, “Nuuni xayoos” yaagidosona. (Maa. 8:25) Yesuusi xiskkuwaappe suuridi gotiyaa, “Co77u ga” giidi abbaakka, “Woppu ga” giidi azazin, gotee coꞌꞌu giis. (Mar. 4:39) Yesuusi carkkoynne abbay woppu giidi deꞌanaadan azaziis. Azazin, “ubbabaikka woppu giis.” Yesuusa wolqqay keehi gita! w15 6/15 1:12-14

Yesuusi nuuni hachi hachi koshshiya qumawu woossanaadan yootidoy haꞌꞌissawu koshshiyaabawu woossanaadaana. Yaatiyo gishshawu, i Xoossay dembban deꞌiya ciishshaa waati mayzziyaakko yooti simmidi hagaadan giis: “Laafa ammanoi de7iyoogeetoo, . . . inttena etaagaappe aattidi waati maizzennee ?” I wurssettan zaarettidi, “Wonttobau hirggoppite” yaagidi, ha keehi koshshiya zoriyaa zoriis. (Maa. 6:30-34) Nuuni miishshaa siiqiyoogaappe, hachissi koshshiyaabaa demmidi ufayttidi deꞌana bessees. Leemisuwawu, deꞌiyo keettaa, nu so asawu koshshiyaabaa kunttanawu oosuwaa, qassi payyatettaara gayttidaagan suurebaa kuuyiyo eratettaa demmanawu woossana danddayoos. SHin nuuni woossana koshshiyo hegaappekka aadhiyaabay deꞌees. Nu Goday, “Asi Xoossai haasayiyo qaala ubban de7anaappe attin, oitta xalaalan de7enna” yaagiis. (Maa. 4:4) Hegaa gishshawu, Yihooway nuussi koshshiyo wodiyan ayyaanaabaa qumaa immanaadan aggennan woossana koshshees. w15 6/15 5:4, 7, 8

Nuna paacee gakkiyo wode, suure gididi deꞌanawu maaddana mala muletoo a mintti woossiyoo? Nu diccido hanotay woy nu kase eeshshay Yihooway ixxiyoobaa dosanaadan oottana danddayees. Gidikkonne, i nuuni issi issibaa laammanaadan maaddin ubbatoo a ufayssiya ogiyan assi haggaazana danddayoos. Kawuwaa Daawiti hegaa akeekiis. Daawiti Berssaabiira wodiraa laammi simmidi, “Geeshsha wozanaa ta giddon medhdha; ammanettiya ayyaanaa ta giddon ooraxissa” yaagidi Yihoowa woossiis. (Maz. 51:10-12) Nuuni nagarancha gidiyo gishshawu, iita eeshshaa keehi dosana danddayoos; shin Yihooway baayyo nuuni eeno giidi azazettanaadan maaddana danddayees. Iitabaa amoy wolqqaamidi nu geeshsha qofaa moorana hanikkonne, Yihooway nuuni a higgiyaa azazettidi deꞌiyoogan goꞌettanaadan nu hemetaa suurissana danddayees. I nuna qohiya aybinne haarennaadan oottana danddayees.—Maz. 119:133. w15 6/15 3:5, 6

Cimata gidennan, gubaaꞌiyawu oottiyaagee gubaaꞌiyan deꞌiyo wodiyaa, Macara Biiruwaa Konttiyaa gidennan, macara biiruwawu oottiyaagee issi biittan deꞌiyo wodiyaa, qassi Yihoowa Markkata Bolla Gididi Heemmiyaagaa gidennan, Wach Tawer Soosaytiyaa pirezddanttee kaalettiyo wodiyaa gubaaꞌiyan deꞌiya gasttati hassayoosona. Yihoowawu aqida ha ishantta ubbaa maaddiya ammanettida asati deꞌikkokka, kase gubaaꞌiyan, macara biiruwaaninne waanna biiruwan koshshiyaabaa kuuyiyay issi ura xalla. Kase issi uri kuuyiyoogee attin, 1970⁠ppe haa simmin amarida cimati kuuyoosona. Hegaa Geeshsha Maxaafaa loytti akeekidi laammida. Ubbabaa issi uri kuuyiyoogaappe, Yihooway immido “imota” gidida cimatu ubbaa loꞌꞌo eeshshan dirijjitee goꞌettees.—Efi. 4:8. w15 7/15 1:14, 15

Tumu Kiristtaaneti olaa wode xalla gidennan, ubbatoo ammanettidinne alamiyaaban oossinne exatennan deꞌana bessees. Aybissi? Yihoowayyo bana geppida ubbay a siiqanawu, ayyo ammanettanawunne azazettanawu qaalaa gelido gishshataassa. (1 Yoh. 5:3) Nuuni awan deꞌikkokka, qassi nuuni diccido hanotay, nu zaree woy wogay ayba gidikkokka, Xoossay kessido xillotettaa maaraa naaganawu koyoos. Yihoowayyoonne a Kawotettawu ammanettiyoogee hara aybippenne aadhiyaaba. (Maa. 6:33) Kiristtaaneti hegaadan ammanettanawu ha alamiyaa olaappenne ooshshaappe haakkana koshshees. (Isi. 2:4; Yoh. 17:11, 15, 16) Alamiyan deꞌiya daro asay ba biittawu, ba zariyawu, ba wogawu, woy ba biittaa ispporttiyaa citawu exatana danddayees. Hegaadan exatiyoogee keesettanaadan, ooyettanaadan, ubba qassi asaa woranaadaaninne hara zariyaa busakkanaadan oottiis. Hegaa malabay merettiyo wode oossinne exatennan deꞌana danddayayiyye, exatay? w15 7/15 3:1, 2

Ubbabay maara oosettanaadan koyiya, nuuni goynniyo Xoossaa eeshshaa qonccissana mala, Kawotettaa Addaraashay oorattay keexetti simmin hegaa geeshshatettan loytti oyqqana bessees. (1 Qor. 14:33) Geeshsha Maxaafay geeshshatettay asatettaa geeshshatettaaranne ayyaanaabaa xillotettaara gayttidaba gidiyoogaa yootees. (Ajj. 19:8) Yaatiyo gishshawu, asay Yihoowan nashettanawu koyikko, asatettankka geeshsha gidana bessees. Nuuni ha maarata kaallidi, eranawu koyiya asay shiiquwaa shiiqanaadan ubbatoo ufayttidi shoobbana koshshees; ayssi giikko, addaraashaa hanotay nuuni etassi yootiyo mishiraachuwaara maayettees. Mata wode ha saꞌaa iitabaappe geeshshidi gannate oottana geeshsha Xoossawu nuuni goynniyoogaa eti akeekana. (Isi. 6:1-3; Ajj. 11:18) Heeraa hanotay ayba gidikkonne, nu Kawotettaa Addaraashay Yihoowa sunttan xeesettiyaagaanne geeshsha goyno soho gidiyo gishshawu, maara oyqettida loꞌꞌo leemiso gidana bessees.—Zaa. 23:14. w15 7/15 4:13-15

Kiristtoosi 1914n qoncciyoogaa doommidoogaa akeekidi, Yesuusa kaalliyaageeti wurssettay eesuwan yaana giidi giigettidoogee bessiyaaba. Eti Kawotettaabaa kaseegaappe aaruwan sabbakiyoogan hegaadan oottidosona. Yesuusi i guuttaa takkidi, ‘kuttoy waassiyo wode woy maallado guuraara’ yaana danddayiyoogaa yootiis. Hegaadan hanikko, a kaalliyaageeti waananee? I, “Minnite” yaagiis. Hegaappe denddidaagan, daro naagido gishshawu, wurssettay gamꞌꞌidi yaana giidi qoppana woy qassi yeenna giidi, naagennan aggana bessenna. Oorattaa alamiyan ha alamiyaa wurssettaabaara gayttidaagan kasetidi odettidabay ubbay polettidoogaa akeekoos. Polettida hiraagaabaa ha wodiyan wotti dentti qoppiyoogee Yihoowaninne i sinttappe polanawu gelido qaalan ammanettanaadan maaddees. (Yaas. 23:14) ‘Ubbabawukka wurssettay matattidoogaa’ eridi ubbatoo beegottidi deꞌanaadan, Xoossay “ba godatettan keerido aginaanne wodiyaa” gishshawu a galatana bessees.—Oos. 1:7; 1 PHe. 4:7. w15 8/15 2:10, 11, 14

Geeshsha Maxaafan makkalaba, pokkoba, iita ayyaanaa ooso woy Xoossay ixxiyooba geetettida harabaa daro asay allaxxiyo wode beꞌees woykko oottees. Leemisuwawu, Intternneetiyan, televizhiiniyan, pilimiyan, maxaafaaninne maxeetiyan darotoo makkalabaynne shori baynnabay loꞌꞌobadan odettees. Asay issi wode dosenna eeshshay issi issi biittan higgiyan paqqadettiis. SHin he eeshshay Xoossay dosiyooba gidenna. (Roo. 1:28-32) Yesuusa kaalliyaageeti koyro xeetu layttan iitaban allaxxibookkona. Xoossay dosiyo he eeshshaanne hara eeshshaa gaasuwan harati eta ixxidosonanne yedettidosona. Kiitettida PHeexiroosi, “Aihuda gidenna asaara intte [Kiristtaaneti] shori bainna oosuwaa issippe oottenna gishshau garamettidi, inttena cayoosona” yaagiis.—1 PHe. 4:4. w15 8/15 4:2, 3

Yihoowawu haggaaziya kayma Kiristtaanee gubaaꞌiyan issippetettay deꞌanaadan maaddees. (Efi. 4:1-6, 15) Xoossaa asay ‘issippe ohettanaadaaninne’ ubbay issoy issuwaara hashetidi oottanaadan halchoos. He issippetettay deꞌanaadan nuuni nu huuphiyaa kawushshana koshshiyoogaa Yihoowa Qaalay yootees. Harati nagarancha gidiyoogaa gaasuwan eta qohiyo wodekka, kayma ishay woy michiyaa issippetettan deꞌanawu bantta huuphiyaa kawushshoosona. Issi ishay woy issi michiyaa mooriyo wode neeni waanay? Woy qassi issi uri nena qohiyo wode waanay? Aara haasayiyoogaa aggabayayiyye, sigettanawu baaxetay? Kayma Kiristtaanee sigettanawu koyeesippe attin, harata metiya ura gidanawu koyenna. Neeni gubaaꞌiyaa issippetettawu maaddiyaabaa qoppay? w15 9/15 1:12, 13

Geeshsha Maxaafay deꞌuwawu keehi maaddiya, Xoossaa Qaala gidiyoogaa Yesuusi ammanettees. Nuuni Yesuusa leemisuwaa kaallidi, Geeshsha Maxaafaa galla galla nabbabana, xannaꞌananne tamaaridobaa wotti dentti qoppana koshshees. Geeshsha Maxaafaa xannaꞌiyo wode, neeni erana koyiyoobaa loyttada pilgga. Leemisuwawu, nuuni wurssetta gallassan deꞌiyoogaa bessiyaabaa Geeshsha Maxaafaappe loytta xannaꞌada, ha alamee xayiyo wodee keehi matidoogaa kaseegaappe aaruwan ammanana danddayaasa. Polettida keehi daro hiraagata pilggiyoogan, Geeshsha Maxaafay sinttappe yaana giidi yootiyooban kaseegaappe aaruwan ammanetta. Geeshsha Maxaafay asaa deꞌoy laamettanaadan waatidi maaddiyaakko odettidabaa xannaꞌiyoogan, Geeshsha Maxaafay goꞌꞌiyoogaa loytta ammanetta. (1 Tas. 2:13) Yihooway neeyyo immanawu gelido keehi ufayssiya hidootaabaa wotta dentta qoppiyoogankka Yesuusa milata. (Ibr. 12:2) Hegeeta Xoossay asaa naatu ubbaassi yootidoba gidennan neessi buzuwan yootidabadan xeella. w15 9/15 3:16, 17

Nuuni Xoossaa siiqiyoogaa bessiyaabaa oottana danddayiyo issi issi ogeti awugeetee? Nu heeraaninne kumetta saꞌan oosettiya Kawotettaa oosuwaa nu miishshan maaddana danddayiyoogee qoncce. Nuuyyo deꞌiya miishshay darin guuxxin, hegee nuuni Yihoowa siiqiyoogaa bessiyo loꞌꞌo oge. (2 Qor. 8:12) SHin nuuni Yihoowa siiqiyoogaa bessiyo hara ogetikka deꞌoosona. Yesuusi bana kaalliyaageeti miyoobawunne maayiyoobawu hirggennan ubbatoo kasetidi Kawotettaa koyanaadan etawu yootidoogaa hassaya. Aaway nuuyyo koshshiyaabaa eriyoogaa i yootiis. (Maa. 6:31-33) Nuuni Yihoowan ammanettoos; qassi i gelido he qaalaa naaganaagaa eroos. Neeni issi ura tumuppe siiqikko, an ammanettiyoogee qoncce. Yihoowan nuuni keehi ammanettikko, a wozanappe siiqiyoogaa bessoos. (Maz. 143:8) Hegaa gishshawu, nuna hagaadan giidi oychana danddayoos: ‘Taani oottanawu qoppiyoobaynne ta wodiyaanne ta wolqqaa goꞌettiyo ogee taani Yihoowa tumuppe siiqiyoogaa bessii? Galla galla ta oottiyoobay Xoossay taayyo koshshiyaabaa kunttana danddayiyoogaa ammanettiyoogaa bessii?’ w15 9/15 5:7, 8

‘Taani gita waayiyaa wode Yihooway ashshidi ooratta alamiyaa gelissanawu koyiyo asee?’ gaada qoppa eray? Nuuni bashshaappe attanawu keehi koshshiya issi eeshshay ammanuwan minniyoogaa. Kiitettida PHeexiroosi ‘Yesuus Kiristtoosi beettiyo wode, galataa, bonchchuwaanne sabaa ekkanaadan’ oottiya, paaciyaa xoonida ammanuwaabaa yootiis. (1 PHe. 1:7) Gita waayee keehi matido gishshawu, bonchettida nu Kawoy qoncciyo wode, i galatiyo ammanoy deꞌiyoogeeta gidanawu koyokkoo? Nuuni ‘ammanidi attidaageetu bagga gidanawu’ koyiyoogee erettidaagaa. (Ibr. 10:39) Nuuni hegaa hassayidi, “Gujja ammananaadan, tana maaddarkkii” giida bitaniyaagaadan woossana danddayoos. (Mar. 9:24) Woy qassi Yesuusi kiittidoogeetuugaadan, “Nuussi ammanuwaa gujja” gaana danddayoos.—Luq. 17:5. w15 10/15 2:1, 2

PHawuloosi keehi ‘loꞌꞌobaa’ ba wozanan wottiis; qassi i Sooriyan, Qeeri Isiyan, Maqidooniyaaninne Yihudan simerettidi Xoossawu wozanappe haggaaziis. PHawuloosi, “Taappe guyyeera de7iyaagaa doga aggada, sinttan de7iyaagaa oiqqanau warettais. . . . Woituwaa ekkanau, ta gakkanasaa horddofais” yaagiis. (Pili. 1:10; 3:8, 13, 14) PHauloosi machibeennaagee qofay shaahettennan ‘Godaa oosuwaa minnidi’ oottanaadan a maaddiis.” (1 Qor. 7:32-35) PHawuloosaagaadan, Xoossaa ashkkaratuppe amaridaageeti so asaa aawatettay darennaadaaninne Kawotettaa oosuwaa minnidi oottanawu giidi aqo oyqqennan deꞌanawu dooridosona. (Maa. 19:11, 12) Aqo oyqqida Xoossaa ashkkaratuyyo darotoo son daro aawatettay deꞌees. SHin aqo oyqqidaageetikka oyqqibeennaageetikka, nuuni ubbay ‘xubbiya ubbabaa diggananne’ qofay daro shaahettennan Xoossawu haggaazana danddayoos. Yaatanawu, coo wodiyaa wurssiyo meeziyaa aggananne kaseegaappe aaruwan Xoossawu loytti haggaazanawu halchana koshshennan waayi aggana. w15 10/15 3:15, 16

Geeshsha Maxaafay, “Abeet GODAU, asa de7oi he aawussi buzo gidennaagaanne ba hemetaa suurissanaagee aawu shene gidennaagaa taani erais” yaagiyoogee tuma gidiyoogaa hanidabay qonccissees. (Erm. 10:23) Yihooway baappe shaahettidi asay bana barkka haariyo eraynne maatay deꞌiyoogaa gidanaadan oottidi medhibeenna. Xoossay iitatettay deꞌanaadan guutta wodiyaa paqqadidoogee asaa haaroy hada gidiyoogaa bessiyoogaa xalla gidennan, i merinawu halchidobaykka polettanaadan oottees. Hegee Xoossaa haaruwaa xallay suure gidiyoogaa merinawu qonccissiyaaba. Yihooway iitatettaanne iitabaa oottiyaageeta xayssi simmin, i siiquwan haariyo haaruwaa ooninne eqettikko, Xoossay a sohuwaara xayssana. Iitatettay mule xayanaadan, hegaa mala makkalanchata sohuwaara xayssanawu asay deꞌido laytta ubban hanidabaa Xoossay naqaasha oottana danddayees. w15 11/15 3:5, 6

Yesuusi Xoossaa Kawotettaabaa haasayiyoogaa dosees. Geeshsha Maxaafay yootiyoogaadan, i haggaaziyo wode hara ay allaalleppenne aaruwan, Kawotettaabaa 100⁠ppe darotoo yootiis. Kawotettay i tumukka xoqqu oottidi xeelliyooba. (Maa. 12:34) Yesuusi hayquwaappe denddi simmidi takkennan, Kawotettaabaa sabbakiyaageeta gidana 500⁠ppe dariyaageetuura gayttiis. (1 Qor. 15:6) Kawotettaabaa ‘asa ubbawu’ yootanaadan i azazidoy he wode gidennan aggenna; he wode hegee deexxiya ooso! He gita oosoy “wodiyaa wurssettai” gakkanaashin oosettanaagaa Yesuusi kasetidi yootiis; qassi hegaadan haniis. Neenikka he azazoynne he hiraagay polettanaadan maaddaydda deꞌennan aggakka. (Maa. 28:19, 20) Nuuni he oosuwaa polanaadan maaddanawu nu Xoossay “lo77o ooso ubban” nuna giigissiis. w15 11/15 5:1-3

Maxine Abbaa matan beettida xaaxettida maxaafaanne kushiyan xaafettida hegaa mala Ibraawetto Geeshsha Maxaafaa beniigaa xannaꞌiyaageeti Xoossaa sunttay xaafettido Tetragramaten giyo oyddu Ibraawetto pitaleti darosan deꞌiyo gishshawu, keehi garamettidosona. Xoossaa sunttay kushiyan beni xaafettida Ibraawetto maxaafa xallan gidennan, naaꞌꞌantto xeetu layttaappe K.K. doommidi koyro xeetu layttaa M.L. gakkanaassi deꞌiya amarida Giriiketto Septujenttiyankka deꞌees. Xoossaa sunttay Geeshsha Maxaafan deꞌiyoogaa bessiya qoncce naqaashay deꞌishinkka, daro birshshettati Xoossaa geeshsha sunttaa Geeshsha Maxaafaappe muleera kessidosona. Rivayzid Istandard Verzhinee 1952n attamettiis. He birshshettaa birshshidaageeti, 1901n attamettida Amerikan Istandard Verzhiniyaa kaalli xeellidaageetu maaraa kaallennan aggidi, Xoossaa sunttaa kessidosona. Aybissi? He maxaafaa doomettan hagaadan gees: “Issi Xoossawu buzo suntta goꞌettiyoogee . . . Kiristtaane Woosa Keettaa ammanuwawu aynne bessiyaaba gidenna.” Daro birshshettati, Inggilizettuwankka hara qaalankka hegaadan oottidosona. w15 12/15 2:3-5