Uddufune

Nuuni keha, pashkkanne haratussi siyettiyaabaa qoppiyaageeta gidiyoogan, Yesuusaagaadan liiqo qaalaa haasayana danddayoos. Yesuusi cora asay i yootiyoobaa siyanawu baaxetidoogaa beꞌidi, etawu qarettidi “darobaa tamaarissuwaa doommiis.” (Mar. 6:34) Yesuusi asay bana cayiyo wodekka hanqquwan haasayibeenna. (1 PHe. 2:23) Nuuni loytti eriyo urawu haasayiyo wode, ashkketettaaninne hiillan haasayanawu metootana danddayoos. Awu yootiyoobawu naagettana koshshennabadan qoppana danddayoos. Nuuni so asaara haasayiyo wode gidin, woy gubaaꞌiyan deꞌiya nu mata laggiyaara haasayiyo wode hegaadan qoppana danddayoos. SHin Yesuusi ba laggeta haasayissiyo wode hanqqettibeenna. Yesuusi ba mata laggeti bantta giddon ubbaappe aadhiyaagee oonakko palamettido wode, i guutta naꞌaa leemisuwaa yootidi, eta kehatettan seeriis. (Mar. 9:33-37) Cimati “ashkketetta ayyaanan” harata zoriyoogan Yesuusa milatana danddayoosona.—Gal. 6:1. w15 12/15 3:15, 16

Ubbatoo nuuni ishanttudan siiqettiyoogee keehi koshshiyoy aybissee? Hegawu waanna gaasoy, Yihooway nuuni issoy issuwaara ishanttudan siiqettanaadan koyiyoogaa. Nuuni nu ishantta ixxiiddi, Xoossaa siiqoos gaana danddayokko. (1 Yoh. 4:7, 20, 21) Nuuni ubba wode, ubba qassi meto wodiyan issoy issuwaa maaduwaa keehi koyiyoogee erettidaagaa. PHawuloosi Ibraawe Kiristtaanetuyyo he dabddaabbiyaa xaafiyo wode, matan etappe issoti issoti bantta keettaanne aquwaa aggidi baqatanaagaa erees. Hegee ay keena metiya wode gidanaakko Yesuusi kasetidi yootiis. (Mar. 13:14-18; Luq. 21:21-23) Hegaa gishshawu, eti awudeegaappenne aaruwan issoy issuwaa mintti siiqana koshshees. (Roo. 12:9) Matan, kiitanchati bashshaa carkkuwaa yeddiyo wode, mule hani erenna gita waayee gakkana. (Mar. 13:19; Ajj. 7:1-3) SHin nuuni ubbatoo shiiqiyoogaa xallay gidenna. PHawuloosi Ibraawe Kiristtaaneta hegaa mala wodetun eti issoy issuwaa ‘siiquwawunne loꞌꞌo oosuwawu’ denttettana koshshiyoogaa hassayissiis.—Ibr. 10:24, 25. w16.01 1:6-8

He wodee, 33 M.L. PHenxxaqosxxe gallassaana. Yerusalaamen pooqiyan, 120 gidiya Kiristtaaneti ‘tolidi woossanawu’ issippe shiiqi uttidosona. (Oos. 1:13-15) He wode hanidabay, hananabaa yootiya Yuuꞌeeli yootido hiraagaa polo. (Yuu. 2:28-32; Oos. 2:16-21) Pooqiyan issippe shiiqi uttida he Kiristtaanetu bolli Xoossaa geeshsha ayyaanay wodhiis. (Oos. 1:8) Eti beꞌidonne siyido maalaaliyaabaa xeelliyaagan hananabaa yootiyoogaa woy markkattiyoogaa doommidosona. Hegaappe simmin, kiitettida PHeexiroosi hanidabay aybakko keehi cora asawu qonccissiis. He wode i shiiqida asaa, “Intte nagarai atto geetettana mala, nagaraappe simmidi, intte huuphiyan huuphiyan Yesuus Kiristtoosa sunttan xammaqettite. Xoossai immiyo Geeshsha Ayyaanaa intte ekkana” yaagiis. Yaagin, he gallassi 3,000 gidiya asay ammanidi xammaqettiis; qassi Xoossay immana giido geeshsha ayyaanaa ekkiis.—Oos. 2:37, 38, 41. w16.01 3:1-3

Kiitettida PHawuloosi hagan qonccissanawu koyido qofay aybee? Yihoowaara deꞌiya dabbotay mooretti uttidaashin, ayyaanan tiyettida Kiristtaanee oyttaa miyaabanne woyniyaa uyiyaaba gidikko, hegee bessennaba. (Ibr. 6:4-6; 10:26-29) Ha zoree ayyaanan tiyettida Kiristtaaneti bantta woytuwaa biron ekkibeennaagaa eti hassayanaadan maaddees. Eti “Xoossai Kiristtoos Yesuusa baggaara bolla de7uwau xeesiyo woituwaa ekkanau” ubba wode baaxetana koshshees. (Pili. 3:13-16) PHawuloosi ayyaanay denttettin, Xoossai “xeesido xeessau bessiya de7uwaa [eti] de7anaadan” tiyettida Kiristtaaneta woossiis. Eti hegaadan waati oottana danddayiyoonaa? PHawuloosi hagaadan qonccissiis: “Ubba wode intte intte huuphiyaa kaushshiyaageeta, ashkketanne danddayanchchata gidite; issoi issuwaa maaddiyoogan intte siiquwaa bessite. Inttena issippe gatti qachchiya sarotettan, Geeshsha Ayyaanai intteyyo immiyo issippetettaa naaganau minnite.” (Efi. 4:1-3) Yihoowa ayyaanay otorettanaadan gidennan, nu huuphiyaa kawushshanaadan oottees.—Qol. 3:12. w16.01 4:5, 6

Issi cima bitanee deriyaa kiyiyoogaa qoppa. Hegee i ba deꞌuwan keehi metootido manddara. I keehi daafuridoy layttan sugido gishshataassa gidenna. Abrahaamassi layttay 125 gidana danddayikkokka, mino asa. Issi yelagay a geeduwaa kaallees; awu layttay 25 gidennan aggenna. Hegee a naꞌaa Yisaaqa; i yarshshuwaa mittaa tookkiis. Abrahaami qassi billamaanne tamaa eettiyoobaa oyqqiis. Yihooway Abrahaami ba naꞌaa yarshshanaadan azaziis! (Doo. 22:1-8) Hegee Abrahaama ammanoy keehi paacettanaadan oottidaba gidennan aggenna. Abrahaami Xoossaayyo eri baynnan coo azazettibeenna. Tumu ammanoy deꞌiyo gishshawu azazettiis. Mino ammanoy awu deꞌiyo gishshawu, saluwan deꞌiya Aaway Yihooway baassi ammanettidi oottiyaageeta qohiyaabaa aybanne oottennaagaa Abrahaami akeekiis. I Yihoowayyo azazettiyaaba gidikko, Xoossay anne a naꞌaa anjjanaagaa eriis. Abrahaamayyo hegaadan mino ammanoy deꞌanaadan maaddidabay aybee? Eraanne deꞌuwan beꞌidobaa. w16.02 1:3, 4

Mayraama Xoossaayyo mexi issi Naꞌa gididaagaa shahaarada yelananne dichana! Nuuni Mayraamissi imettida gita maataa qoppidi, o qofissana danddayiya issi issibaa akeekennan aggana danddayoos. Xoossaa kiitanchay Gabreeli a attuma asaara gayttennan, maalaalissiya hanotan shahaaranaagaa yootiis. A waanada shahaaranaakko Gabreeli Mayraamintta so asawunne shoorotuyyo yootibeenna. Eti ay qoppana danddayiyoonaa? Mayraamo, o giigissida Yooseefabaykka qofissennan aggenna. A shahaara uttada, ayyo ammanettida asa gidiyoogaa waata ammanttanee? Qassi Ubbaappe Bolla Xoossaa Naꞌaa dichiyoogeenne loohissiyoogee gita aawatetta! Gabreeli hegaa yootiyo wode Mayraamo qofissida ubbabaa erokko. SHin a, hachi xiqisiyan deꞌiyoogaadan zaaridoogaa eroos.—Luq. 1:26-38. w16.02 2:13, 14

Hushaaya giyo bitanee Xoossaayyo ammanettanawu xala gidana koshshiis. I Kawuwaa Daawitayyo ammanettida lagge. SHin, Daawita naꞌay Abeseloomi Yerusalaama oyqqidi kawotanawu koyin daro asaa wozanay Abeseloomakko simmido wode, Hushaayi ooyyo ammanettana bessiyaakko paacettiis. (2 Sam. 15:13; 16:15) Daawiti he katamaappe baqatiis, shin Hushaayi ay oottanee? I Daawita aggidi Abeselooma maaddidee? Akkay. Daawiti cimanne daro asay a woranawu koyiyaaba gidikkonne, Yihooway kawo gidanaadan a sunttido gishshawu, Hushaayi Daawitawu ammanettidi deꞌiis. Hegaa gishshawu, Hushaayi Daawitaara gayttanawu Dabira Zayte Deriyaa biis. (2 Sam. 15:30) Hushaayi Abeselooma lagge milatidi Akixoofeela zoriyaa halissanawu Yerusalaame guyye simmanaadan Daawiti yootiis. Hushaayi ba shemppuwaa daafaban yeggidi, Yihoowayyo ammanettiyoogaa bessiis; qassi i oottanaadan Daawiti oychidoogaa oottiis. Daawiti Xoossaayyo woossidoogaadan, Hushaayi xalidi zorido zoree Akixoofeela zoriyaa halissiis.—2 Sam. 15:31; 17:14. w16.02 4:15, 16

Nuuni Kiristtaane gidiyoogaadan, Israaꞌeelatuyyo imettida Higgiyan deꞌiya kaaletuwan goꞌettana danddayoos. Waatidi? Eqqidi xeelliya uradan, nuuni he Higgiyan deꞌiya maaraa loytti qoppana danddayoos. Nuuni he higgiyaappe garssaara deꞌennaba gidikkokka, hegeetuppe darota nu deꞌuwan ubbatoo, qassi nu geeshsha Xoossawu Yihoowawu goynniyo wode ammanttiya kaaletodan xeellana danddayoos. Nuuni he higgiyaappe tamaaranaadan, he maaraa kaallanaadaaninne Kiristtaanetussi imettida kandduwaa maaraa akeekanaadan i hegaa Geeshsha Maxaafan xaafissiis. Yesuusi woygidaakko siya: “‘SHaaramuxoppa’ giidoogaa siyideta. SHin taani intteyyo odais; maccaaro xeellidi amottiya ubbai, ba wozana giddon he wode iira shaaramuxiis.” Hegaa gishshawu, nuuni shaaramuxennaadan naagettiyoogaa xalla gidennan, hegaa malabaa amottennaadankka naagettana bessees.—Maa. 5:27, 28. w16.03 4:6, 8

Asay oychidobaa Sameeli oottennan ixxin, asay yootiyoobaa siyana mala Yihooway ayyo heezzutoo yootiis. (1 Sam. 8:7, 9, 22) SHin, Sameeli ba sohuwan hara uri sunttettiyo gishshawu yiillotibeenna. Saaꞌoola tiyanaadan Yihooway ayyo yootido wode, hananabaa yootiyaagee azazettiis; qassi hegaa i saxaa gattanawu gidennan, siiquwan eeno giidi oottiis. Sameelaagaadan, ha wodiyan deꞌiya kayma cimati eti loohissiyoogeetussi hegaadan qarettoosona. (1 PHe. 5:2) He cimati gubaaꞌiyan eti oottiyo amaridabaa tamaaretuyyo immoos gi yayyidi harata loohissiyoogaa aggokkona. Keha asttamaareti loohanawu koyiya tamaareta gubaaꞌiyawu alꞌꞌo imota gididanne banttanaara ‘issippe oottiya’ asatudan xeelloosonappe attin, banttanaara keesettiyaabadan xeellokkona. (2 Qor. 1:24; Ibr. 13:16) Tamaareti banttassi deꞌiya eraa goꞌettidi gubaaꞌiyaa waati maaddiyaakko beꞌiyoogee yaaretenna he asttamaareta keehi ufayssiyaaba!—Oos. 20:35. w15 4/15 1:16, 17

Kawuwaa Ooziyaani ‘Yihoowa sinttan suurebaa oottiis.’ Gidikkokka, “GODAI Ooziyaana hanttaara goga harggiyan oittiis; haiqqana gakkanaashinkka he harggee a yeddibeenna.” (2 Kaw. 15:1-5) Aybissi? He taarikee aybissakko yootenna. Hegee nuna hirggissana woy Yihooway Ooziyaana gaasoy baynnan qaxxayideeyye giidi qoppanaadan oottana koshshii? Nuuni Yihoowa loytti erikko hegaadan qoppokko. Ooziyaani guutta wodiyawu Yihoowa sinttan suurebaa oottikkonne, guyyeppe “otoroi a kunddettau” kaalettidoogaa 2 Hanidabaa Odiya 26:3-5, 16-21n deꞌiya taarikiyaappe akeekoos. I otorettidi, qeesetussappe attin baayyo imettibeennabaa oottanawu maliis. Hosppun tammanne isiini qeeseti a teqqidi seeranawu malidosona. SHin Ooziyaani waatidee? I ay keena otorettiyaakko bessiis. I qeesetu bolli “hanqqettiis.” Yihooway a hanttaara goga harggiyan oyttidoogee garamissenna! w15 4/15 3:8, 9

Seexaanay Dabloosa geetettidikka xeegettees; hegee “Cayiyaagaa” giyoogaa. Seexaanay Yihoowa worddancha giidi a sunttaa mooridoogaa hegee hassayissees. ‘Beni shooshshaa’ giyo qofay Seexaanay Edenen shooshshaa baggaara Hewaano cimmido azzanttiya gallassaa hassayissees. ‘Gita miimminttiyaa’ giyo qofaykka Seexaanaa loytti qonccissees. I meqetti baynna iitaa. I Yihoowa halchoy polettennaadaaninne a asaykka xayanaadan koyees. Seexaanay nuuni suure gididi deꞌennaadan oottanawu keehi baaxetiyoogee qoncce. Geeshsha Maxaafay, “Xalahe halaqai, intte morkkee, mittiyo uraa koyidi, gudiya gaammuwaadan gudiiddi, intte lanqqiyan yuuyiyo gishshau naagettitenne beegottite” yaagidi nuna zoriyoogee bessiyaaba. (1 PHe. 5:8) Yihoowa ashkkaratuppe issoy gita nagaraa oottidoogan azzaniyo wode Seexaanay ufayttiyoogee qoncce; qassi i hegan Yihoowa cayana danddayees.—Lee. 27:11. w15 5/15 1:3, 4, 10

Yihooway Addaameyyoonne Hewaaniyyo loꞌꞌiya heeraa giigissidoogaa qoppiyo wode, nuuni ishalidi deꞌanaadan i koyiyoogaa akeekoos. (Doo. 2:9) SHin Seexaanay ‘duretettay’ nuna cimmanaadan oottanawu nu koshshaa goꞌettana danddayees. (Maa. 13:22) Daroti banttawu miishshay deꞌikko ufayttana, woy deꞌoy injjetanaadan aqoy keehi maaddees giidi qoppoosona. Hegaa mala qofay cimmiyaaba, qassi Yihoowa dabbo gidiyo keehi alꞌꞌo aqoy nuuppe halanaadan oottiyaaba. Yesuusi bana kaalliyaageeta, “Naa77u godatuyyo haarettanau danddayiyai ooninne baawa; aissi giikko, woi issuwaa ixxidi, hinkkuwaa siiqana; woi issuwaa bonchchidi, hinkkuwaa karana; Xoossaassinne miishshaassi haarettanau danddayekketa” yaagidi zoriis. (Maa. 6:24) Nuuni miishsha xallawu haarettikko, Yihoowayyo haggaaziyoogaa aggoos; hegee qassi nuuni oottanaadan Seexaanay koyiyooba! Miishshaa gaasuwan woy an shammiyoobaa gaasuwan Yihoowaara nu dabbotay moorettanaadan mule koyokko. Nuuni Seexaanaa eqettanawu, aquwaa ubbatoo bessiyaagaadan xeellana koshshees.—1 Xim. 6:6-10. w15 5/15 2:12

Haratu waayiyaa akeekiyoogee issi issitoo metees. Nuuni mule erenna metoy daro asaa gakkees. Issoti issoti daafaban qohettido gishshawu, sahettiyo gishshawu woy cimido gishshawu metootoosona. Harati unꞌꞌettiyo gishshawu, yashshaa maashiyo gishshawu woy kase naaqettido gishshawu waayettoosona. Harati qassi so asay dumma dumma ammanuwaa kaalliyo keettan woykko aawaa woy aayee xallay naata dichiyo keettan deꞌoosona. Ubba asaa metoy gakkees; qassi he metuwaappe dariya baggay nuna gakkiyaagaappe dumma. Hegaa mala hanotan, nuuni waatidi Xoossaagaadan siiqana danddayiyoo? Yaatanawu, hara urawu siyettiyaabaa guuttaakkonne akeekana gakkanaashin loytti ezggana koshshees. Hegee maaddana koshshiyaaban maaddiyoogan Yihoowagaadan siiqana mala nuna denttettees. Ubba asawu koshshiyaabay dumma dumma, shin nuuni ayyaanaaban minttettananne hara maaddiyaabaa oottana danddayoos.— Roo. 12:15; 1 PHe. 3:8. w15 5/15 4:6, 7

Yesuusi ba wolqqaa Yihoowappe demmiis; hegaa gishshawu, Ubbaa Danddayiya Xoossay saꞌaa meretaa wolqqaa azazana danddayiyoogaa ammaniyoogee bessiyaaba. Amarida leemisota ane qoppa. Yihooway Bashshaa Haattaappe kase, “Laappun gallassaappe guyyiyan, taani oitamu gallassaanne oitamu qammaa ha sa7aa bollan iraa bukissana” yaagiis. (Doo. 7:4) Hegaadankka, Yihooway arshsho baggappe “wolqqaama carkkuwaa yeddidi, abbaa” guyye zaaridoogaa Kessaabaa 14:21 yootees. Qassi Yoonaasa 1:4y, “GODAI abbaa bolli wolqqaama carkkuwaa denttiis; denttin abbaa beetai keehi darido gishshau, markkabee me77ana haniis” yaagees. Yihooway carkkuwaanne hegaa malabaa azazana danddayiyoogaa eriyoogee minttettiyaaba. Sinttappe saꞌay loꞌꞌanaagee erettidaba. He wode “Xoossaa keettai” asaara deꞌiyo gishshawu, saꞌaa meretaa wolqqay asaa worennaagaa woy qohennaagaa qoppiyoogee ay keena ufayssiyaabee! (Ajj. 21:3, 4) Kiristtoosi Xoossay baassi immido wolqqan SHaꞌu Layttaa Haaruwan saꞌaa meretaa wolqqaa azazanaagaa ammanettana danddayoos. w15 6/15 1:15, 16

Ha zoriyaa xaasayidi xeelliyoogan gakkiya daafabay issi shaaramuxa maccaasee keettaa mataara kanttanawu biida wodallabaa yootiya Leemiso shemppo 7n odettiis. Eti shori baynnabaa hanidosona. Hegaa i akeekiyaakko maccaaseeppe baqatana! (Lee. 7:6-27) Nuuni gakkiya daafabaa akeekennaagaappe denddidaagan he wodallaagaa mala akeeki paccidobaa oottana danddayoos. Leemisuwawu, televizhiiniyan hara saatiyan diggiyoobaa qammi qammi diggennan aggana danddayoosona. Issi issitoo nuuni dumma dumma xaabiyaa dooyikko shin? Woy qassi pokkobaa bessiyaabaa Intternneetiyan beꞌanaadan shoobbiya sayttiyaa yuushshi qoppennan goꞌettana danddayoos. Hegaa mala hanotay nuuni iitabaa amottanaadaaninne geeshsha gididi deꞌanawu baaxetiyoogaa xaasayi xeellanaadan oottana danddayennee? w15 6/15 3:8, 9

Yesuusi, “Nu naaquwaa [acuwaa] atto ga” yaagiis. (Maa. 6:12; Luq. 11:4) Nu naaqoy woy nagaray aco mala. Wochiyo Keelay 60⁠ppe dariya layttaappe kase hagaadan giidi loytti qonccissiis: “Xoossaa higgiyaa kanttidi nagaraa oottiyoogee ayyo acotiyoogaa. . . . Xoossay nu nagaraa gishshawu nuuni nu shemppuwaa qanxxanaadan oychana danddayees. . . . I banaara nuuni dabbotennaadan oottidi, ba sarotettay nuuppe haakkanaadan oottana danddayees. . . . Nuuni ayyo azazettiyoogan a siiqana bessees; qassi nagaraa oottiyoogee Xoossaa siiqennaagaa bessiyo gishshawu, nagaraa oottiyo wode, siiquwaa acuwaa qanxxennan aggoos.” (1 Yoh. 5:3) Nu nagaray ubba galla atto geetettana koshshiyoogee Xoossay nu nagaraa atto gaana danddayiyoy Yesuusa wozuwaa yarshshuwaa xallaana gidiyoogaa qonccissees. He wozoy 2,000 gidiya layttaappe kase qanxxettikkokka, nuuni hegaa haꞌꞌi imettida imotadan xoqqu oottidi xeellana bessees. Nu shemppuwaa “waagai” keehi “al77o” gidiyo gishshawu, nagarancha asi oottana danddayiyoobi aybinne hegaa qanxxana danddayenna.— Maz. 49:7-9; 1 PHe. 1:18, 19. w15 6/15 5:9, 10

Maaddiya, ufayssiyaanne loꞌꞌiya xuufeta haggaazuwan asawu immiyoogee keehi ufayssiyaaba! Qassi jw.org Weyb sayttiyaa mala ooratta tekinolojiyaa goꞌettidi tumaa asawu yootiyo wode, Yihoowagaadan ubbasan deꞌiya asawu keehi koshshiya kaaletuwaa immanawu koyiyoogaa bessoos. So Asaa Goynuwaa omarssawu woykko buzo xinaatiyawu wodiyaa demmanaadan nu shiiquwaara gayttidaagan laamettidabaakka keehi nashshoos. Hegaadankka, gita shiiquwaa prograametun laamettidabaa nashshoos. Darotoo nuuni hegee layttan layttan yaa loꞌꞌi loꞌꞌi bees goos! Daro tiꞌokiraase timirtte keettatun kaseegaappe aaruwan loohiyoogan nuuni ufayttiyoogee qoncce. Ha laamettida ubbaban Yihooway kaalettidoogee erettidaba. I ba dirijjiteenne haꞌꞌi nuuni deꞌiyo ayyaanaa gannatee ubbatoo loꞌꞌi loꞌꞌi baanaadan oottees! w15 7/15 1:16, 17

Issi hanotan waatana koshshiyaakko sirikko, ‘Yesuusa gidiyaakko waatanee?’ yaagada nena oychiyoogee loꞌꞌo. Beni Yesuusi deꞌiyo biittan Yihudaappe, Galiilappe, Samaariyaappenne hara biittaappe yiida asay deꞌees. Ha dumma dumma heeraappe yiida asaa giddon ooshshay deꞌiyoogaa Geeshsha Maxaafay yootees. (Yoh. 4:9) Qassi Parisaawetinne Saaduqaaweti (Oos. 23:6-9), giiraa ekkiyaageetinne hara asay (Maa. 9:11), qassi Rabeti tamaarissidoogeetinne eti tamaarissibeennaageeti maayettokkona. (Yoh. 7:49) Koyro xeetu layttan, Roomati Israaꞌeelata haaroosona; Israaꞌeelati Roomati bantta giddon deꞌiyoogankka keehi hanqqettoosona. Yesuusi haymaanootiyaabaa tumaanne atotettay Ayhudatuppe yiyoogaa yootidaba gidikkonne, ba erissiyo ashkkarati hara asaappe aadhiyaabadan qoppana mala minttettibeenna. (Yoh. 4:22) SHin, i eti asa ubbaa bantta shoorodan siiqanaadan zoriis. w15 7/15 3:5

Yihooway nuuni harata siiqanawunne haratikka nuna siiqana mala koyanaadan oottidi medhiis. Qoppibeennabay merettiyoogee, woy azzaniyoogee, woy sahettiyoogee, woy miishshaa metoy gakkiyoogee, woy haggaazuwan muruta ayfiyaa demmennan aggiyoogee he koshshay polettennaadan oottikko, sohuwaara hidootaa qanxxana danddayoos. Yihooway nuna siiqennabadan nuuni qoppiyoogaa doommikko, i nuna xoqqu oottidi xeelliyoogaanne nu “ushachcha kushiyaa” oyqqidi nuna maaddiyoogaa hassayana koshshees. Nuuni ayyo ammanettikko, i nuna mule dogenna. (Isi. 41:13; 49:15) I azinay hayqqi simmin naaꞌꞌu naata barkka dichida Brijeta hagaadan gaasu: “Seexaanaa alamiyan issi uri barkka naata dichiyoogee keehi metiyaaba. SHin Yihooway taani azzanada yeekkiyo wodekka tana kaalettido gishshawunne ta wolqqay danddayiyoogaappe aadhiya paacee tana gakkanaadan mule paqqadenna gishshawu, i tana siiqiyoogaa akeekaas.”—1 Qor. 10:13. w15 8/15 1:1-3

Yerusalaame xayuwaabaa kasetidi yootanaadan, hananabaa yootiya Imbbaaqoomi kiitettiis. I yootiyo wode, he katamay baysa gidanaagee kasetidi daro layttawu odetti uttiis. He wode ‘nagaranchati xillo asata dooddi oyqqidosona, pirddaykka geellattiis.’ Yaatiyo gishshawu, Imbbaaqoomi, ‘Abeet Yihoowawu, neeni tana maaddanaadan awude gakkanaashin xeesoo?’ yaagidoogee garamissiyaabaa gidenna. Kasetidi odettida xayoy ‘gamꞌꞌennaagaa’ hananabaa ammanettidi yootiyaagaassi odiis. (Imb. 2:3) Imbbaaqoomi hidootaa qanxxidi hagaadan giis giidi qoppoos: ‘Yerusalaame xayuwaabaa daro layttawu siyaas. Hegee daro wodiyaa gamꞌꞌikko shin? Katamay qoppennan xayiyoobadan ubbatoo hananabaa yootiyoogee bessiyaaba milatenna. Hegaa haratussi agga bayana.’ Imbbaaqoomi hegaadan qoppiyaakko, i Yihoowan nashettiyoogee attees; qassi Baabilooneti Yerusalaame katamaa xayssiyo wode ikka hayqqana danddayees! w15 8/15 2:12, 13

Nu loꞌꞌo eeshshay moorettenna mala, iita eeshshay deꞌiyoogeetuura nuuni mata lagge gidana bessenna. Yihoowa Markka gidenna, iitabaa oottiyaageetu xallaara gidennan, Yihoowayyo goynnays giiddi, eriiddi a higgiyaa kanttiyaageetuura laggetiyoogaara gayttidaagankka hegee hanees. Banttana Kiristtaane giya hageeti gita nagaraa oottidi nagaraappe simmana xayikko, nuuni etaara laggetana bessenna. (Roo. 16:17, 18) Nuuni Xoossaa higgiyawu azazettennaageetuura laggetikko, eta ufayssanawu eti oottiyoobaa oottana danddayoos. Leemisuwawu, nuuni kandduwan shoraa xayida asatuura laggetikko, shori baynnabaa oottanawu paacettana danddayoos. Xammaqettida amarida Kiristtaaneti hegaadan hanidosona; qassi etappe issoti issoti bantta nagaraappe simmibeenna gishshawu bohettidosona. (1 Qor. 5:11-13) Eti bantta nagaraappe simmana xayikko, PHeexiroosi yootidoogaadan hanana danddayoosona.—2 PHe. 2:20-22. w15 8/15 4:4-6

Yesuusi ba mata lagge gidiyaageeta dooriis. Yesuusi ammanettidi bana kaalliyaanne kumetta wozanaappe Yihoowayyo haggaaziyaageetu giddoppe hegaa mala laggeta dooriis. Neenikka wozanappe Yihoowawu haggaaziyaageetu giddoppe mata laggeta dooray? Hagee keehi koshshiyaaba gidiyoy aybissee? Ishanttunne michonttu siiqoy neeni kayma gidanaadan maaddana danddayees. Neeni ne deꞌuwan ay oottanaakko kuuyanawu maliya yelaga gidennan waaya aggana. Daro layttawu Yihoowawu haggaazidanne gubaaꞌiyaa issippetettawu maaddiyaabaa oottida Kiristtaanetuura neeni laggetiyoogee keehi loꞌꞌo! Eti bantta deꞌuwan metootidaageetanne Yihoowawu haggaaziyo wode paaciyan genccidaageeta gidana danddayoosona. Hegeetu mala Kiristtaaneti neeni loꞌꞌobaa dooranaadan maaddana danddayoosona. He ishanttuuranne michonttuura ufayssiya wodiyaa issippe aattiyoogee neeni loꞌꞌobaa kuuyada kayma gidanaadan maaddana danddayees.— Ibr. 5:14. w15 9/15 1:14, 15

Yesuusi haasayiyoobankka oottiyoobankka ba erissiyo ashkkaratu ammanoy minnanaadan oottiis. (Mar. 11:20-24) Harati bantta ammanuwaa minttanaadan maaddiyoogee nu ammanuwaakka minttiyo gishshawu, nuuni a leemisuwaa kaallana koshshees. (Lee. 11:25) Neeni sabbakiyo wodenne tamaarissiyo wode, Xoossay deꞌiyoogaa, i nuussi qoppiyoogaanne Geeshsha Maxaafay a Qaala gidiyoogaa bessiyaabaa loytta qonccissa. Ishanttinne michontti bantta ammanuwaa minttanaadankka maadda. Issi uri sunttettida ishantta amassaliyoogaa neeni akeekikko, appe sohuwaara baqatoppa. I ba ammanuwaa minttanaadan hiillan maadda. (Yih. 22, 23) Neeni tamaare gidikko, timirtte keettan lodda laamiyaabay denddiyo wode, ne ammanuwaabaa xalan yoota; neeni yootiyoobay harata maaddin garamettana danddayaasa. Nuuni ubbay ammanuwan minnanaadan Yihooway maaddees. (1 PHe. 5:10) Nuuni ammanuwan minnanawu baaxetiyoogee bessiyaaba; ayssi giikko, ammanuwaa woytuwaara laggetiyaabi aybikka baawa. w15 9/15 3:20, 21

Ha wodiyan, nuuni Yihooway medhidobaanne i ba halchuwaa polanawu oottiiddi deꞌiyoobaa darobaa eriyoogan anjjettida. Asay xoqqa timirttiyaa tamaaranaadan alamee minttettees. SHin darotu hanotaappe beꞌiyoogaadan, hegaa malabaa kaalliyoogee asay Xoossaa ammaniyoogaanne siiqiyoogaa agganaadan oottees. Gidikkokka, Geeshsha Maxaafay eratettaa siiqiyoogaa xalla gidennan, aadhida eratettaanne akeekaa demmanaadan nuna zorees. Hegaa giyoogee, nunakka haratakka maaddana mala Xoossay nuuyyo immido eratettaa waati goꞌettanaakko tamaaroos giyoogaa. (Lee. 4:5-7) Xoossay “asai ubbai attanaadaaninne tumatettaa eranaadan [koyees].” (1 Xim. 2:4) Xoossaa Kawotettaabaanne he Kawotettay asaayyo oottanabaa nuuyyo danddayettida ubban daro asaa tamaarissiyoogan, Yihoowanne asaa siiqiyoogaa bessoos.—Maz. 66:16, 17. w15 9/15 5:10, 11

Eelaasi Yihoowan wozanappe ammanettiyoogaa bessiya kaallidi deꞌiya hanotata qoppa. Eelaasi Yihooway iray bukkennaadan oottanaagaa Kawuwaa Akaabayyo yootido wode, “GODAI . . . Xoossai ero! . . . Taani odennan de7ishin, sa7an iri bukkenna woikko xaazi xaazatenna” yaagiis. (1 Kaw. 17:1) Iray bukkenna he wodiyan assinne haratussi koshshiyaabaa Yihooway immanaagaa Eelaasi ammaniis. (1 Kaw. 17:4, 5, 13, 14) Hayqqida naꞌaa Yihooway denttana danddayiyoogaa i ammanettiis. (1 Kaw. 17:21) Eelaasi Qarmmeloosa Deriyan giigissido yarshshuwaa tamay maanaadan Yihooway oottanaagaa siribeenna. (1 Kaw. 18:24, 37) Iri mule bukkennan deꞌishin Eelaasi Akaaba, “Kiyada ba; baada ma uya. Aissi giikko, wolqqaama iraa gunttai siyettees” yaagiis. (1 Kaw. 18:41) Hegaa mala taarikee nu ammanoy minokkonne nuuni qoranaadan oottennee? w15 10/15 2:4, 5

Asay haasayana danddayiyoogee Xoossay immido maalaalissiya imota. (Maz. 139:14; Ajj. 4:11) Xoossay nuussi immido guuggee harabankka keehi dummatees. Asay “Xoossaa leemisuwan” merettido gishshawu mehiyaappe dumma. Asawu koyidobaa dooriyo maatay deꞌees; qassi eti haasayiyooban Xoossaa bonchissanawu doorana danddayoosona. (Doo. 1:27) Qaalaa Medhidaagaa bonchanawu koyiya ubbawu, Xoossay maalaalissiya imota gidida Geeshsha Maxaafaa immiis. Geeshsha Maxaafay kumettay woy appe amaridaagee 2,800⁠ppe dariya qaalan attamettiis. Neeni Geeshsha Maxaafaa qofaa loytta akeekiyo wode, Xoossaa qofay ne qofan kumanaadan oottaasa. (Maz. 40:5; 92:5; 139:17) Yaatiyoogan, “atotettai beettiyo aadhdhida eratettaa immanau” danddayiyaabaa qoppiyoogan ufayttaasa. (2 Xim. 3:14-17) Wotti dentti qoppiyoogaa giyoogee issiban sheekkiyoogaanne hegaabaa yuushshi qoppiyoogaa giyoogaa. (Maz. 77:12; Lee. 24:1, 2) Nuuni wotti dentti qoppana koshshiyo naaꞌꞌu waannabay Xoossaa Yihoowabaanne a Naꞌaa Yesuus Kiristtoosabaa.—Yoh. 17:3. w15 10/15 4:2-4

Yesuusi ba haasayaaninne ba oosuwan ba erissiyo ashkkarati bantta huuphiyaa kawushshidi haratussi oottanaadan loohissiis. (Luq. 22:27) I ba kiittidoogeeti Yihoowawu haggaazanawu, qassi bantta mala Kiristtaanetuura gayttidaagan bantta goꞌꞌaa aggi bayanaadan eta tamaarissiis. Intte intte huuphiyaa kawushshidi intte goꞌꞌaa agga bayiyoogan, intte naatikka hegaadan oottanaadan tamaarissana danddayeeta. Naaꞌꞌu naatu aayyiyaa Deeba, “Ta azinay gubaaꞌe cima gidiyoogaara gayttidaagan haratuura wodiyaa aattiyoogan mule qanaata erikke. So asawu a maadoy koshshiyo wode ubban i maaddanaagaa erays” yaagaasu. I azinay Pranasi ba naati gita shiiquwan maaddanawu ubbatoo eeno giyoogaa yootiis. Eti ufayttoosona, loꞌꞌo laggeta demmidosona, qassi bantta ishanttuuranne michonttuura wodiyaa aattanawu koyoosona. So asay ubbay haꞌꞌi Yihoowassi kumetta wode haggaazees. Intte intte huuphiyaa kawushshiyoogeenne intte goꞌꞌaa aggibayiyoogee intte naati harata waati maaddana danddayiyaakko tamaaranaadan maaddees. w15 11/15 1:9

Yihooway ba gita siiquwaa daro ogiyan bessiis. Leemisuwawu, maalaalissiya ubba meretaabaa qoppa. Issuwan issuwan daro biilooniyan qoodettiya xoolinttetinne pilaaneeteti deꞌiyo, biilooniyan qoodettiya gaalakiseti deꞌoosona. He xoolinttetuppe issoy Milkkiwey gaalakisiyan deꞌiya awa ayfiyaa; ha saꞌan paxa deꞌiyaabay awa ayfee baynnaakko deꞌenna. Ha ubba meretay Yihooway Xoossaa gidiyoogaa, qassi ayyo deꞌiya wolqqaa, aadhida eraanne siiquwaa mala eeshshaa qonccissees. Yihooway saꞌan deꞌiya ubbabaa saꞌan paxa deꞌiya meretati goꞌettanaadan medhiis. I asay deꞌanaadan loꞌꞌiya gannatiyaa medhiis; qassi merinawu deꞌanaadan giigida wottiyoobi baynna guuggiyaanne bollaa etawu immiis. (Ajj. 4:11) Hegaa bollikka, i “mereta ubbau qumaa immees”; ayssi giikko, “aggenna a siiqoi merinaagaa.”—Maz. 136:25. w15 11/15 3:7-8

Miilooniyan qoodettiya asay Kawotettaa mishiraachuwaa siyanaadan eta wozanaa giigissanawu nuuni goꞌettanaadan, nu Kawoy aadhida daro layttan nuuyyo dumma dumma miishshaa immiis. Issi issi miishshati guutta wodiyawu maaddidosona; shin harata ha wodiyankka goꞌettiiddi deꞌoos. SHin ha miishshati ubbay sabbakiyoogan nuuni qara gidanaadan maaddidosona. Kawotettaabaa aassiyaageeti 1933n Markkattiyo Karddiyaa goꞌettiyoogaa doommidosona; hegee daroti haggaazuwaa doommanaadan maaddiis. Hegee Geeshsha Maxaafaa qofay amaridaagee deꞌiyo guutta kardde. Markkattiyo karddee aassiyaageeta dumma dumma ogiyan maaddiis. Aassiyaageetuppe issoti issoti markkattanawu keehi amottikkokka, yayyoosonanne woyganaakkokka erokkona. Harati qassi eti eriyo ubbabaa guutta daqiiqan yootoosona; shin issi issitoo eti hiillan yootokkona! Markkattiyo karddee aassiyaageeti ubbay amarida qoncce qofaa yootanaadan maaddiis. w15 11/15 5:3-6

Xoossaa sunttaynne he sunttay geeyiyoogee keehippe koshshiyoogaa Geeshsha Maxaafan keehi daro xiqiseti qonccissoosona. (Kes. 3:15; Maz. 83:18; Isi. 42:8; 43:10; Yoh. 17:6, 26; Oos. 15:14) Geeshsha Maxaafaa Xaafissida Xoossaa Yihooway xaafiyaageeti ba sunttaa goꞌettanaadan ayyaanan kaalettiis. (Hiz. 38:23) Kushiyan beni xaafettida maxaafan shaꞌan qoodettiya sohuwan deꞌiya sunttaa kessiyoogee Xaafissidaagaa bonchennaagaa bessiyaaba. Xoossaa sunttaa Geeshsha Maxaafan goꞌettana koshshiyoogaa bessiyaabay yaa gujjiis. Zaarettidi 2013n giigissido Ooratta Alamiyaa Birshshettan he sunttay 1984n attamettidaagaappe 6 gujjidi 7,216 sohuwan deꞌees. He gujettidaageetuppe ichashati 1 Sameela 2:25; 6:3; 10:26; 23:14, 16n deꞌoosona. He xiqisetun Xoossaa sunttay zaarettidi xaafettidoy, Ibraawetto Maasoretike xuufee xaafettanaappe 1,000⁠ppe dariya laytta kasetidi xaafettida, Maxine Abbaa matan beettida xaaxettida maxaafan deꞌiyo gishshataassa. Qassi, kushiyan beni xaafettidabaa loytti xannaꞌido gishshawu, Daannata 19:18n issi sunttay gujettiis. w15 12/15 2:5, 6

Nuuni haꞌꞌi ishanttudan minttidi siiqettana koshshees; hegee sinttappe ay paaceenne waayee gakkikkokka nuuni genccanaadan maaddees. Gita waayee doommanaappe kasetidi, nuuni ha wodiyankka ishanttudan minttidi siiqettana koshshees. Biittaa qaattay, wolqqaama diꞌoy, wolqqaama gotee, sunaami giyo carkkoy, woy meretay gattiyo hara daafabay nu ishanttuppe darota keehi qohiiddi deꞌees. Issi issi ishanttu bolli qassi wolqqaama yedettaynne ixoy gakkiiddi deꞌees. (Maa. 24:6-9) Hegaa ubbabaa bolli qassi nuuni deꞌiyoy ha iita alamiyaana gidiyo gishshawu, galla galla deꞌuwawu koshshiyaabaa demmiyoogeekka metees. (Ajj. 6:5, 6) Hegaa mala metoy gujji gujjidi biyo wode, nuuni ishanttudan mintti siiqettiyoogaa loytti bessana danddayoos. ‘Daro asaa siiqoy irxxikkokka,’ nuuni ubbatoo ishanttudan siiqettiyoogaa bessana koshshees.—Maa. 24:12. w16.01 1:8, 9