Tamme

Issi uray hanqqetissiyaabaa haasayiyo wodekka, liiqo qaalan zaariyoogee loꞌꞌo ayfe demissana danddayees. (Lee. 15:1) Leemisuwawu, aayyiyaa barkka dichiyo yelaga naꞌay issi wode Yihoowawu haggaaziyaagaa milatiiddi iitabaa oottees. Issi michiyaa he aayeeyyo qarettada, “Naꞌa loohissiyoogan ne daafuray polettibeennaagee azzanttiyaaba” yaagaasu. Aayyiyaa guuttaa qoppada hagaadan gaasu: “Haꞌꞌi hanotay loꞌꞌo gidennaagee tuma, shin a loohissiyoogee dicci dicci biyaaba. Armmageedoonappe simmin tanaara haasaya; nuuni he wode shaakki erana.” Hegaadan ashkketettan zaaridoogee michonttu sarotettay moorettennaadan oottiis; qassi eti haasayidobaa siyida he naꞌaa minttettiis. Naꞌay ba aayyiyaa banan hidootaa qanxxabeennaagaa akeekiis. Hegee i iita laggetuppe duuxxanaadan denttettiis. Guyyeppe, i xammaqettiis; qassi Beeteelenkka haggaaziis. Nu ishanttuura, nu so asaara woy nuuni erennaageetuurakka gidin, nu haasayay ubbatoo “siyanau kehiyaagaanne ufaissiyaagaa” gidana koshshees.—Qol. 4:6. w15 12/15 3:15, 17

Hegee eta bolli wodhido erissiyo ashkkaratuppe neeni issuwaa gidiyaakko, he gallassay neeni awudenne dogiyooba gidenna. Ayyaanan tiyettidoogaa ammanettaasa; ubba qassi, neeni hara qaalan haasayiyo maalaalissiya imotaa ekkidaba gidikko hegaa aynne sirakka. (Oos. 2:6-12) SHin geeshsha ayyaanan tiyettiya ubbay, 120 gidiya koyro erissiyo ashkkarati tiyettidoogaadan tiyettiyoonaa? CHii. He gallassi Yerusalaamen deꞌiya hara asati xammaqettiyo wode ayyaanan tiyettidosona. (Oos. 2:38) Tamaa laco milatiya inxxarssay he asatu bolli wodhibeenna. Qassi, ayyaanan tiyettida Kiristtaaneti ubbay xammaqettiyo wode tiyettibookkona. Samaariyaa asati xammaqettidi amarida wodee aadhin geeshsha ayyaanan tiyettidosona. (Oos. 8:14-17) Qassi, Qornneliyoosinne a soo asay ubbay xammaqettanaappe kase geeshsha ayyaanan tiyettidosona.—Oos. 10:44-48. w16.01 3:3, 5

Ayyaanan tiyettidaageeti saꞌan deꞌanawu hidootan naagiyaageetussi deꞌiyaagaappe aadhiya geeshsha ayyaanay banttawu deꞌiyaabadan qoppokkona. Eti banttawu dumma eray deꞌiyaabadan yootokkona; qassi haratuppe issi issiban leqqoos gookkona. Qassi eti issi uri ayyaanan tiyettiis gi qoppidi, Godaa Kahuwaa bonchiyo wode oyttaa maanaadaaninne woyniyaa uyanaadan mule minttettokkona; shin eti ashkke gidiyo gishshawu, saluwaa biyaageeta dooriyaagee Yihoowa xalla gidiyoogaa eroosona. Ayyaanan tiyettida Kiristtaanee harati bana dumma ogiyan bonchana mala koyenna. (Efi. 1:18, 19; Pili. 2:2, 3) Yihoowa ayyaanay etawu markkattees. Izaawu hegaa haratuyyo erissiyoogee bessiyaaba gidenna. Eti ayyaanan tiyettidoogaa asay ammanennaba gidikko garamettokkona. Geeshsha Maxaafay, issi uri Xoossay bana dumabawu dooridoogaa yootiyaaba gidikko, he uraa sohuwaara ammanana bessennaagaa yootees.—Ajj. 2:2. w16.01 4:6, 7

Yihooway zaari zaaridi keehi maalaalissiyaabaa oottidi Abrahaamanne Saaro naagiis. (Doo. 12:10-20; 20:2-7, 10-12, 17, 18) Abrahaami ba deꞌuwan beꞌido he hanotati a ammanoy minnanaadan oottidosona. Nuuni Yihoowayyo dabbo gidana danddayiyoo? Ee, danddayoos! Abrahaamaagaadan, nuunikka eraa demmananne deꞌuwan issi issibaa beꞌana koshshees. Geeshsha Maxaafan qonccida daro aadhida eratettaara gatti xeelliyo wode, Abrahaama eray keehi guutta. (Dane. 12:4) Xoossaa Qaalay nuuni ‘saluwaanne saꞌaa medhidaagaa’ xeelliyaagan keehi darobaa eranaadan oottees; qassi hegee a bonchanaadaaninne siiqanaadan maaddees. (Doo. 14:22) He koshshay nuuni Xoossawu azazettanaadan denttettees; qassi ayyo azazettiyoogee waati maaddiyaakko nu deꞌuwan beꞌoos. A zoriyaa siyiyo wode, i nuna naagiyoogaa, anjjiyoogaanne minttettiyoogaa akeekoos. Kumetta wozanaappe Xoossaayyo oottiyoogee woppatettaa, saruwaanne ufayssaa demissiyoogaa eroos. (Maz. 34:8; Lee. 10:22) Hegaa mala eraynne nu deꞌuwan beꞌiyoobay Yihoowa mintti ammananaadaaninne dabbotettaa minttanaadan maaddees. w16.02 1:7, 8

Ha qofay Mayraama Geeshsha Maxaafaa qofaa loytta eriyoogaa qonccissees. A haasayidobay, hananabaa yootiya Sameela aayyiyaa Haanna woossiyo wode giidobaara issi mala. (1 Sam. 2:1-10) Issi issi asay yootiyoogaadan, a Geeshsha Maxaafaappe 20 gidiya qofaa yootaasu. Mayraama ooppenne gita gidida ba Dabbuwaa, Xoossaa Yihoowappe tamaarido alꞌꞌo tumaa haasayanawu koyiya asa gidiyoogee qoncce. Mayraamiigaadan, issi issitoo Yihooway nuussi deexxiyaaba milatiya aawatettaa immana danddayees. Nuuni i leemisuwaa kaalliyoogan, nu huuphiyaa kawushshidi he aawatettaa ekkananne Yihooway nuna maaddanaagaa ammanettana danddayoos. Yihoowabaanne a halchuwaabaa akeekan siyiyoogan, ayyaanaabaa tumaa wotti dentti qoppiyoogan, qassi nuuni tamaaridobaa haratuyyo ufayssan yootiyoogan Mayraamiigaadan ammaniyoogaa bessana danddayoos.—Maz. 77:11, 12; Luq. 8:18; Roo. 10:15. w16.02 2:17, 18

Layttan layttan kumetta saꞌan shaꞌan qoodettiya yelaga naati xammaqettoosona. (Era. 12:1) He yelaga naati bantta dosan kuuyiyoogaa xalla gidennan, xammaqettanawu koyettiyaabaa akeekidi kuuyiyoogaa yelidaageetinne gubaaꞌe cimati eranawu koyoosona. Issi uri ba huuphiyaa geppidi xammaqettiyoogee Yihoowa anjjuwaa demmiyoonne Seexaanaykka eqettiyo deꞌuwawu doometta. (Lee. 10:22; 1 PHe. 5:8) Yaatiyo gishshawu, Kiristtoosa kaalliya urappe koyettiyaabay aybakko Kiristtaane aawaynne aayyiyaa bantta naata tamaarissoosona. Qassi aawaynne aayyiyaa Yihoowa Markka gidenna naati Yesuusa kaalliyaageeta gidanawu koshshiyaabaa akeekanaadan gubaaꞌe cimati maaddoosona. (Luq. 14:27-30) Issi keettaa loytti keexxidi wurssanawu halchana koshshiyoogaadan, “wurssettaa gakkanaashin” Yihoowayyo ammanettidi haggaazanawu giigettana bessees.—Maa. 24:13. w16.03 1:1, 2

Muuse Higgee Israaꞌeela deriyaa xallawu imettiis. SHin dumma dumma wogan diccida daro biittaa asati ayyaana Israaꞌeela gidoosona. Israaꞌeelati masettida shuchan xaafettida Muuse Higgiyaa Hidootaa Biittan kaallidosona. Ayyaana Israaꞌeelati kaalliyo ‘Kiristtoosa higgiyan’ deꞌiya maaray eta wozanan xaafettiis. ‘Kiristtoosa higgee’ awan deꞌiya Kiristtaanetussikka hanees, qassi eta goꞌꞌees. (Gal. 6:2) Xoossay ba Naꞌaa baggaara immiyo kaaletoy ayyaana Israaꞌeelata keehi goꞌꞌees. Ooratta maachaa maacettanaappe kase, Yesuusi naaꞌꞌu gita azazota yootiis. Hegaappe issoy sabbakiyo oosuwaara gayttidaba. Haray Yesuusa kaalliyaageetu eeshshaabaa, qassi eti bantta mala Kiristtaanetuura gayttidaagan waatana bessiyaakko qonccissees. He azazoti Kiristtaanetu ubbaassi imettidosona; yaatiyo gishshawu, saluwaa deꞌuwaa gidin saꞌaa deꞌuwaakka ha wodiyan hidootan naagiya tumu Kiristtaanetussi ubbaassi hanoosona. w16.03 4:10, 11

Issi cimay hara isha loohissiyoogaa doommanawu loddan ufayssiya hanotan aara dabbotaa medhana koshshees. Issi cimay hegaadan oottiyoobay biittaappe biittan, heera hanotaadaaninne wogaadan dummatana danddayees. SHin, neeni awan deꞌinkka, qassi oosoy dariyo cima gidinkka, wodiyaa bazzada tamaariya uraara wodiyaa attikko, hegee “Neeni taassi koshshaassa” giyoogaa mala. Aynne haasayennan hegaadan oottiyoobaa tamaaranawu koyiya, ubbasan deꞌiyaageeti loytti akeekoosonanne wozanappe nashshoosona. Gooba asttamaaree hara uraa tamaarissanawu dosiyoogaa xalla gidennan, i tamaarissiyo uraakka dosees. (Yoh. 5:20⁠ra gattada xeella.) Asttamaaree ha keehi koshshiya eeshshaa bessiyoogaa tamaaree eesuwan akeekees; qassi tamaarissiyoobaakka eesuwan ekkanaadan hegee maaddees. Hegaa gishshawu, alꞌꞌo cimatoo, intte loohissiyo wode, asttamaare xalla gidennan, lagge gidite.—Lee. 17:17; Yoh. 15:15. w15 4/15 1:19, 20

Geeshsha Maxaafan qanttan odettida taariketuugaadan, Xoossaa Qaalan Kawuwaa Ooziyaabaa (Kawuwaa Azaariyaabaa) darobay qonccibeenna gada qoppa. (2 Kaw. 15: 7, 32; 2 Odi. 26: 3-5, 16-21) Hegee Xoossay xillo gidiyoogaa neeni siranawu malanaadan oottanee? Woy qassi Yihooway oottiyoobay ubbatoo likke gidiyoogaanne iitaa kehaa xeelliyaagan maaraa kessiyay a gidiyoogaa Geeshsha Maxaafay loytti qonccissees gaada qoppuutii? (Zaa. 32:4) Nuuni Yihoowa loytti eriyo wode, a eeshshaa keehi siiqiyoonne nashshiyo gishshawu, i ay oottikkonne ayssi oottidaakko qonccissanaadan koyokko. Xoossay ba Qaalan yootiyoobaa neeni loytta xannaꞌiyoonne wotta dentta qoppiyo wode, kaseegaappe aaruwan hegaadan nashshanaagaa ammanetta. (Maz. 77:12, 13) Hegee qassi Yihooway neessi kaseegaappe aaruwan qoncci beettanaadan oottin aara dabbotaa minttaasa. w15 4/15 3:8, 10

Kiitancha geetettiya ayyaana meretati keehi ‘wolqqaama.’ Eti eraaninne wolqqan asaappe aadhoosona. Ammanettida kiitanchati bantta wolqqaa loꞌꞌobawu goꞌettoosona. Leemisuwawu, issi wode Yihoowa kiitanchay issoy morkke Asoore wotaaddarata 185,000 woriis; hegee issi uri, haray atto olanchati ubbay oottana danddayennaba. (2 Kaw. 19:35) Hara gallassi issi kiitanchay Yesuusi kiittidoogeeta qasho keettaappe kessanawu asaagaappe aadhiya ba wolqqaanne eraa goꞌettiis. Kiitanchay gorddettida kariyaa dooyidi, kiitettidaageeta kare kessi yeddidi kariyaa gorddiyo wode naagiyaageeti matan deꞌoosona, shin beꞌibookkona! (Oos. 5:18-23) Ammanettida ayyaana meretati bantta wolqqaa loꞌꞌobaa oottanawu goꞌettoosona; shin Seexaanay ba wolqqaa iitabaa oottanawu goꞌettees. Seexaanawu keehi gita wolqqay deꞌees; qassi i keehi qohana danddayees! Geeshsha Maxaafay Seexaanay ‘ha saꞌaa haariyaagaa’ gidiyoogaa yootees.—Yoh. 12:31. w15 5/15 1:5, 6

Nuuni aqo oyqqin woy oyqqana xayin, shori baynnabaa ubbaa eqettana koshshees. Hegee wayssennabee? CHii, wayssiyaaba! Leemisuwawu, neeni yelaga gidikko, nenaara tamaariyaageeti asho gaytotettaa gayttiyoogan woy asho gaytotettaabaa moobayliyan kiittiyo, issi issi biittan naatu pornograafiyaa geetettiyaabaa kiittiyoogan ceeqettishin siyana danddayaasa. Geeshsha Maxaafay, “SHaaramuxiyaagee ba bolli nagaraa oottees” yaagees. (1 Qor. 6:18) Asho gaytotettan oyqqiya harggee daridoogee asay waayettanaadaaninne hayqqanaadan oottiis. Qassi aqo oyqqennan asho gaytotettaa gayttida daro yelagati hegan zilꞌꞌettoosona. Alamee ba giigissiyo allaxxiyooban nuuni Xoossaa higgiyaa kanttiyoogee qohenna giidi qoppanaadan koyees. Hegaadan qoppiyoogee ‘nagaray asaa balettanaadan’ oottees.” w15 5/15 2:14

Yesuusi Xoossaadan keha. Yesuusi keha gidanaadan maaddidabay aybee? I haasayiyooban woy oottiyooban haratussi aybi siyettana danddayiyaakko qoppiis. Leemisuwawu, nagarancha gidiyoogan erettida issi maccaasiyaa akko shiiqada yeekkaydda a tohuwaa afuttan laagottaasu. A nagaraappe simmidoogaa Yesuusi akeekiis; i iyyo qarettennabaa gidiyaakko, a ay keena azzananaakko eriis. I o galatiisinne iyyo atto giis. I oottidobaa issi Parisaawee dosana xayikkonne, Yesuusi assikka kehatettan yootiis. (Luq. 7:36-48) Nuuni Xoossaadan waani keha gidana danddayiyoo? Kiitettida PHawuloosi, “Godaa ashkkarai ubbaayyo kehiyaagaa . . . gidanau besseesippe attin, ooyettanau bessenna” yaagiis. (2 Xim. 2:24) Nuuni haasayiyooban harati waananaakko, qassi etawu aybi siyettana danddayiyaakko qoppana koshshees. Yaatikko, Yihoowagaadan keha gidanawu haasayananne oottana koshshiyaabaa akeekoos.— Lee. 15:28. w15 5/15 4:8, 9

Nu ishantta metoy gakkiyo wode, asatettan, qofaaninne ayyaanaaban eta minttettananne maaddana danddayoos. (Lee. 17:17) Leemisuwawu, meretay gattido daafabaappe eti minettanaadan maaddana danddayoos. Wolqqaama gotee i keettaa keehi qohi simmin issi amꞌꞌiyaa, “Taani Yihoowa dirijjitiyaa yame gidiyoogan asatettaabaa xallan gidennan, ayyaanaabankka maadettiyoogaa keehippe nashshays” yaagada wozanappe galataasu. I keettaa wolqqaama gotee qohi simmin hidootaa qanxxada unꞌꞌettida, azinaa gelabeenna issi michiyaa yootidobaa akeeka. Bana maaddi simmin a, “Hegee odin wuriyaabaa gidenna! Tawu siyettiya ubbabaa yootanawu danddayikke . . . Yihoowa nena galatays!” yaagaasu. Nuuni haratussi koshshiyaabawu wozanappe qoppiya ishanttu maabaraa yame gidiyo gishshawu ufayttoos. Aybippenne aaruwan ufayttanaadan oottiyaabay Yihoowaynne Yesuus Kiristtoosi Xoossaa asaassi wozanappe qoppiyoogaa. w15 6/15 1:17

Nuugaappe dummatiya mattumay deꞌiyoogeetuura gayttiyo wode oottana koshshiyaabaa Geeshsha Maxaafay nuna zorees. He zoree lambbeechenna mala diggiyoogee qoncce. Issoti issoti issi uraa bochana xayikko, qaaqqatidi xeelliyoogee, qimꞌꞌotiyoogeenne hegaa malabay qohennabadan xeelloosona. SHin lambbeechiyoogee nagaraa oottanaadan denttettiya iita amuwaa amottanaadan oottana danddayees. Hegee kase haniis; zaarettidikka hanana danddayees. Yooseefi hegaara gayttidaagan akeekancha gidiyooga bessiis. A godaa PHoxiifaara keettayiyaa Yooseefa cimmanawu malin, i o eqettiis. SHin a hidootaa qanxxabeykku. Banaara zinꞌꞌanaadan ubba gallassi Yooseefa shoobbaasu. (Doo. 39:7, 8, 10) SHin a Yooseefa sheleeshshanawu haasayidobaa i siyennan ixxiis. Yaatido gishshawu, ba wozanan iitabaa amottibeenna. w15 6/15 3:10, 11

Nuuni ayyaanaaban nu payyatettaabaa xalla gidennan, nuna naaqqiyaageeta gujjin, haratu payyatettaabaakka qoppanaadan Yihooway koyees. Hegaa mala nagaray darotoo laafa; qassi hegaa mala hanotan, Xoossay nu nagaraa atto giidoogaadan, nuuni nu ishanttu nagaraa atto gaanawu koyiyoogaanne eta wozanappe siiqiyoogaa bessana danddayoos. (Qol. 3:13) Nuuni nagarancha gidiyo gishshawu issi issitoo uluwan lancciyaa oyqqana danddayoos. (Wog. 19:18) Nuuni hegaabaa denttikko, harati nuussi exatana danddayoosona; hegee qassi gubaaꞌiyan deꞌiyaageeti shaahettanaadan oottees. Hegaa mala hanotaa giigissennan aggikko, Xoossaa maarotaanne wozuwaa xoqqu oottidi xeellennaagaa bessoos. Nuuni atto gaana xayikko, nu Aaway ba Naꞌaa yarshshuwaa waagan nuuni goꞌettennaadan oottees. (Maa. 18:35) Yesuusi woosaa tamaarissosaara hegaa loytti qonccissiis. (Maa. 6:14, 15) Wurssettan, Xoossaa maarotettan goꞌettanawu, nuuni wolqqaama nagaraa oottennaadan naagettana bessees.—1 Yoh. 3:4, 6. w15 6/15 5:9-11

Nu ayyaanaa gannatee yaa loꞌꞌanaadan nuuni maaddana mala Yihooway paqqadidoogee nuussi boncho. Nuuni Kawotettaa mishiraachuwaa mishettidi sabbakiyoogaaninne asaa erissiyo ashkkara oottiyoogan hegaadan maaddoos. Nuuni issi uri ba huuphiyaa geppidi Kiristtaane gidanaadan maaddiyo wode, ayyaanaa gannatee aakkanaadan oottoos. (Isi. 26:15; 54:2) Nu eeshshay loꞌꞌi loꞌꞌi baanaadan oottiyoogankka ayyaanaa gannatee yallisanaadan oottana danddayoos. Yaatiyoogan, ayyaanaa gannatee harata keehi ufayssiyaagaa gidanaadan oottoos. Darotoo asay dirijjitiyaakko shiiqidi, Xoossaakkonne Kiristtoosakko shiiqanaadan oottiyay, nuuni Geeshsha Maxaafaa eriyoogaappekka aaruwan nu geeshshatettaanne nuuni sarotettan deꞌiyoogaa. Ha wodiyan keehi loꞌꞌiya ayyaanaa gannatiyaa beꞌidi Yihoowaynne Yesuusi keehi ufayttiyoogee erettidaba! Ha wodiyan ayyaanaa gannatee loꞌꞌi loꞌꞌi baanaadan oottiyoogan ufayttoos; shin saꞌay gannate gidanaadan oottiyoogan ufayttanaagawu hegee xeera beso. w15 7/15 1:18-20

Seexaanay i issibaa oottiyo ogee Xoossay oottiyo ogiyaappe aadhees giidi asay ammananaadan koyiis. Yihooway nuuni oossi exatanaakko kuuyanaadan koyees. Neeni shin? Yihooway issibaa oottiyo ogee neegaappe loꞌꞌo gidiyoogaa ammanada Yihoowayyo azazettay? Nu meto ubbaa qaarana danddayiyay Xoossaa Kawotettaa xalla gidiyoogaa ammanay? Woy qassi iitaa kehaa issi uri ba huuphen kuuyana koshshees gaada qoppay? Ha oyshatussi neeni zaariyoobay asay keehi palamettiyo allaalliyaa xeelliyaagan nena oychiyo wode neeni waata zaaranaakko qonccissees. Polotikaa asatinne deretettan issi issibay laamettanaadan koyiyaageeti asay palamettiyoobaa maarayanawu daro wodiyawu baaxetidosona. Eti asaa maaddanawu koyidi wozanappe baaxetiyaageeta gidana danddayoosona. SHin, Kiristtaaneti Xoossaa Kawotettaa xallay asaa metuwaa qaarananne suure pirddaa ehaana danddayiyoogaa eroosona. Nuuni Yihooway oottanabaa naagana koshshees. Ubba Kiristtaaneti metuwaa qaaranawu eti loꞌꞌo giidi qoppiyoobay polettanaadan minttettiyaakko, woni nu gubaaꞌee sohuwaara shaahettennee? w15 7/15 3:7, 8

Yihooway medhidobaappe a aggenna siiquwaa akeekana danddayiyoo? Ee, akeekana danddayoos; ayssi giikko, Xoossay meretaa medhidoogee a siiquwaa bessiyaaba. (Roo. 1:20) Leemisuwawu, Yihooway nuuni coo deꞌiyoogaappe aadhiyaabaa oottanaadan saꞌaa giigissiis. Nuuni deꞌuwan ufayttanaadan koshshiya ubbabaa i immiis. Nuuni deꞌanawu maana koshshees. Maaddiya qumaa giigissana danddayiyo, qoodin wurenna daro qommo mittaa maataa mokissanaadan oottidi Yihooway saꞌaa medhiis. I ubba qassi nuuni miyoogan ufayttanaadan oottiis! (Era. 9:7) Yihooway nuuni maaddiya loꞌꞌo oosuwaa oottidi ufayttanaadan nuna medhiis. (Era. 2:24) I asay saꞌaa kumanaadaaninne haaranaadan, qassi moliyaa, kafuwaanne hara meretata haaranaadan halchiis. (Doo. 1:26-28) Yihooway nuuni a milatana danddayiyo eeshshaa immiyoogankka nuna keehi siiqiyoogaa bessiis!—Efi. 5:1. w15 8/15 1:4, 5

Geeshsha Maxaafaa hiraagay polettiiddi deꞌiyoogaanne ha iita alamee xayiyo wodee keehi matidoogaa alamiyan haniyaabay loytti qonccissees. Hegaa gishshawu, Ajjuutaa 17:16n odettida “tammu kaceenne do7ai” alamiyaa worddo haymaanootiyaa xaaxa waaxiya Gita Baabilooni bolli denddanawu daro wodee attiis giidi nuuni qoppana koshshenna. Eti hegaadan oottanaadan Xoossay ‘eta wozanan amuwaa wottanaagaa’ hassayana koshshees; qassi hagee eesuwan, ay wodekka hanana danddayees. (Ajj. 17:17) Ha alamee xayana wodee haaho gidenna. Yesuusi, hachi gallassa xiqisiyan yootidobaa nu wozanan wottana bessees. (Ajj. 16:15) Yihooway ‘banan ammanettidi naagiyaageetussi maalaalissiyaabaa oottanaagaa’ ammanidi, mishettidi ayyo haggaazanawu murttoos.—Isi. 64:4. w15 8/15 2:17

Xoossaa higgiyaa kaallennaageetussikka nuuni kehanawu koyikkonne, etawu mata lagge gidana koshshenna. Yaatiyo gishshawu, aqo oyqqibeenna Yihoowa Markki bana Xoossawu geppibeenna, ayyo ammanettennanne I kessido kandduwaa maaraa bonchenna ura ekkanawu woy gelanawu koyiyoogeekka bala. Yihoowa higgiyaadan deꞌenna asati dosiyo ura gidiyoogaappe, Kiristtaanetuppe koyettiyaagaadan ammanettidi deꞌiyoogee keehi koshshiyaaba. Nuuni Xoossaa sheniyaadan deꞌiyaageetuura lagge gidana bessees. Iita asatuura laggetiyoogee qohiyoogaa Israaꞌeelati beꞌidosona. (Kes. 23:28; Maz. 106:42) Eti Xoossawu ammanettibeenna gishshawu, Yesuusi guyyeppe etawu, “Be7ite, intte keettai muleera ona gidana” yaagiis. (Maa. 23:38) Yihooway Israaꞌeelata aggibayidi, ooratti eqqida Kiristtaane gubaaꞌiyaa anjjiis.—Oos. 2:1-4. w15 8/15 4:7, 8

Xoossaa Yihooway asay ba koyidobaa dooranaadan oottidi medhiis. Xoossay koyro bitanee, a machiyaanne eti yelana naati iitaa kehaa shaakki eranaadan eta kaalettiya loꞌꞌobaa, hegeekka kahaa etawu immiis. Nuuni kahaa maara goꞌettikko, loꞌꞌobaa oottanaadaaninne iitabaappe haakkanaadan nuna maaddana danddayees. Hegaa gishshawu, nu kahay Xoossay nuna siiqiyoogaanne asay issippetettan loꞌꞌobaa oottanaadan i koyiyoogaa bessees. Ha wodiyankka asawu kahay deꞌees. (Roo. 2:14,15) Daro asay Geeshsha Maxaafaa kandduwaa maaraappe wora simmikkokka, issi issi asay darotoo loꞌꞌobaa oottiyoogaanne iitabaa ixxiyoogaa akeekoos. Daroti keehi iitabaa oottennaadan eta kahay teqqees. Oossinne kahay baynnaakko alamiyaa hanotay ay keena iita gidanaakko qoppa! Xoossay asawu kahaa immido gishshawu a keehi galatoos! w15 9/15 2:1, 2

Yohaannisi yootido ha qofa tumukka nuuni wozanappe nashshananne qoppana koshshiyaaba. Yohaannisi, “Xoossai nuna ai keenaa siiqidaakkonne be7ite” yaagiyoogan, Xoossay nuna waati siiqiyaakko akeekanaadan Kiristtaaneta zoriis. Hegaadan odettida Yihoowa siiquwaa akeekiyoogee a loytti siiqanaadaaninne aara dabbotaa minttanaadan nuna maaddees. Issoti issoti Xoossay eta waati siiqana danddayiyaakko akeekennaagee azzanttiyaaba. Eti a yayyananne azazettana bessiyo Xoossadan xeelloosona. Woy qassi likke gidenna timirttiyaappe denddidaagan, eti Xoossay siiqenna, qassi a siiqana danddayettenna giidi qoppoosona. Harati qassi asay ay oottikkokka Xoossay ubba asaa siiqees giidi qoppoosona. Geeshsha Maxaafaa xannaꞌiyoogan, siiqoy Yihoowa waanna eeshsha gidiyoogaanne i ba Naꞌaa nu gishshawu wozo oottidi immanaadan siiqoy a denttettidoogaa tamaaradasa.—Yoh. 3:16; 1 Yoh. 4:8. w15 9/15 4:1, 2

PHawuloosi yaagidoogee seeraa goꞌꞌaa xaasayi xeelliis giyoogaa gidenna; ayssi giikko, gujjidi i, “SHin qaxxayidoogeetuyyo guyyeppe he qaxxayoi xillotettaa de7uwaa sarotettaa woituwaa immana” yaagiis. Nuuni Yihoowa siiqikko, i zoriyo wode lanccennaadan naagettana koshshees. Hegee issotu issotuyyo metiyaabaa gidana danddayees. Ba xallaa siiqiya asay kumido ha wodiyan zoriyaanne seeraa ekkiyoogee attoshin, hegaabaa haasayiyoogeekka wayssiyaaba. Zoriyaanne seeraa ekkiyaabaa milatiya asatikka darotoo ufayttennan ekkoosona. SHin Kiristtaanetussi, “Ha sa7aa asaa milatoppite” giya zoree imettiis. Nuuni ‘Xoossay koyiyo kumettabaa’ erananne kaallana koshshees. (Roo. 12:2) Yihooway ba dirijjitiyaa baggaara nu deꞌuwan dumma dummaban, hegeekka mattuman nuuppe dummatiyaageetuura nuuni hanana bessiyaabaa, laggetettaanne nu allaxxiyoobaa xeelliyaagan koshshiya wodiyan zorees. Hegaa mala zoriyaa eeno giidi ekkiyoogeenne oosuwan peeshshiyoogee nuuni Yihoowa galatiyoogaanne a wozanappe siiqiyoogaa bessees.—Yoh. 14:31; Roo. 6:17. w15 9/15 5:13, 15

Nuuni nurkka nu ammanoy minnanaadan oottana danddayokko. Ammanoy Xoossaa geeshsha ayyaanaa ayfiyaa macara. (Gal. 5:22) Yaatiyo gishshawu, he ayyaanaa Xoossay nuussi gujji immana mala woossanaadan Yesuusi zoridoogaa kaalliyoogee loꞌꞌo; ayssi giikko, Aaway ‘bana woossiyaageetussi geeshsha ayyaanaa immanaagaa’ Yesuusi yootiis. (Luq. 11:13) Nuuni ammanuwan minnidi, hegaa ubbatoo naagana koshshees. Nu ammanuwaa eexxiya taman leemisana danddayettees. Tamaa eettiyo wode, lacoy tololattana danddayees. SHin, taman mittaa shiishshana xayikko, bonqqo xallay attees; qassi coo aggibayikko, bidintta gidees. SHin taman mittaa aggennan shiishshikko, tololattidi eexxiiddi deꞌana danddayees. Hegaadan, nuuni ubbatoo Xoossaa Qaalaa nabbabiyaabanne xannaꞌiyaaba gidikko, ammanuwan minnidi deꞌana danddayoos. Geeshsha Maxaafaa ubbatoo xannaꞌiyoogan, Geeshsha Maxaafaanne a xaafissidaagaa loytti siiqana danddayoos; hegee qassi nuuni ammanuwan minnanaadan oottees. w15 10/15 2:6, 7

Xannaꞌiyo wode cenggurssaa sissidi nabbabiyoogee hegaa eesuwaara hassayanaadan maaddiyoogaa saynttistteti xannaꞌidobay qonccissees. Nu guuggiyaa Medhidaagee hegaa erees. I ba Higgiyaa maxaafaa wotti dentti ‘qoppanaadan’ woy Ibraawetto qaalaa birshshettay yootiyoogaadan ‘saasukkidi nabbabanaadan’ Yaasa azazidoy hegaassa. (Yaas. 1:8) Geeshsha Maxaafaa loddan woy saasukkada nabbabiyoogee neeni hegaa loytta hassayanaadan maaddiyoogaa akeekennan aggakka. Hegee neeni nabbabiyoobaa loytta qoppanaadankka maaddana danddayees. Nabbabanawu daro baaxetana koshshenna; shin wotti dentti qoppanawu he qoppiyooban sheekkana koshshees. Nagarancha asay sohuwaara keehi koshshennabaa woy wayssennabaa qoppiyoy hegaassa. Hegaa gishshawu, neeni unꞌꞌettennan woppu giidonne ne qofay shaahettanaadan oottiyaabi darenna saatiyan wotta dentta qoppiyoogee loꞌꞌo. Mazamuraawee ba hiixan qammi xiskkuwaappe beegottiyo wodee wotti dentti qoppanawu injjetiya wode gidiyoogaa akeekiis. (Maz. 63:6) Qoppiyooban bali baynna Yesuusi woppu giida sohoy wotti dentti qoppanawunne woossanawu maaddiyoogaa akeekiis.—Luq. 6:12. w15 10/15 4:4, 6, 7

Leemisuwawu issi wode, Galiilan issoti issoti Yesuusa koyanawu biidosona. (Yoh. 6:22-24) Eti he sohuwaa yiido waanna gaasoy i tamaarissiyoobaa siyanawu koyido gishshawu gidennan, qumaa koyido gishshataassa gidiyoogaa i akeekiis. I eti balidobaa beꞌidi, danddayan eta zoriisinne eti waatana danddayiyaakko yootiis. (Yoh. 6:25-27) Wozanan deꞌiyaabaa intte beꞌana danddayennaba gidikkokka, akeekancha gidananne intte naꞌay haggaazuwaa waati xeelliyaakko shaakki erana danddayeeta. Naata yelida daroti haggaaziyo wode, bantta naati guuttaa shemppidi amaridabaa maanaadan oottoosona. SHin, ‘Ta naꞌay haggaaziyoogan ufayttiiyye, haggaazuwaappe shemppiyo wode miyooban ufayttii?’ yaagidi inttena oychana danddayeeta. Haggaazoy intte naatussi kaseegaappe aaruwan ufayssiyaaba woy maaddiyaaba gidana koshshiyoogaa akeekikko, eti gakkana hoolliyaa etaara issippe zorettite. Eti haggaazuwan inttenaara wozanaappe hashetanaadan hiillan maaddite. w15 11/15 1:10, 11

Siiqiya nu Xoossay ubbatoo ammanettida ba ashkkarata maaddiyaabaa oottees. Geeshsha Maxaafay hagaadan gees: “Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.” Yihoowa siiquwaa tumuppe nashshiyaageeti, qassi awu haarettiyaageetinne azazettiyaageeti ubbay sinttappe keehi maalaalissiyaabaa demmana! Yihoowa Qaalay hagaadan gees: “Ane lo77o asa akeeka; suure asa be7a; aissi giikko, saro asaassi sintta yeletai de7ana. SHin mooranchchati mule xayana.” (Maz. 37:37, 38) ‘Loꞌꞌo asi’ Yihoowanne a Naꞌaa erees; qassi Xoossaa sheniyaadan deꞌees. (Yoh. 17:3) Hegaa mala uri 1 Yohaannisa 2:17y yootiyoogaadan, “ha sa7ainne ha sa7an asi amottiyo ubbabai” aadhiyaaba gidikkonne, “Xoossai giidoogaa oottiya urai merinau” deꞌanaagaa ammanees. Ha alamee xayanawu matido gishshawu, nuuni Yihoowan ‘ufayttiyoogeenne a ogiyaa naagiyoogee’ keehi koshshiyaaba.—Maz. 37:34. w15 11/15 3:11, 12

Mishiraachuwaa danddayettida keenan daro asay siyanaadan Xoossaa asay dumma dumma hiillata goꞌettana mala Kawoy kaalettiis. ‘Cakkiyaageeti qoodan guutta’ gidido wode hegee keehi maaddiis. Yihoowa asaa qooday keehi guutta gidido heeran daro asawu mishiraachuwaa gattanawu, 20ntta xeetu layttaa doomettaa heeran gaazeexaa goꞌettida. CHarles Tez Raasili saaminttan saaminttan Geeshsha Maxaafaa qofay deꞌiyo issi haasayaa oduwaa giigissiya dirijjitiyawu kiittees. He dirijjitee qassi Amarkkan, Kanaadaaninne Awurooppan deꞌiya gaazeexatussi he haasayaa kiittees. Ishaa Raasila haasayaa 1913 gakkanaassi, 15,000,000 gidiya asay 2,000u gaazeexan nabbabiis! Ishaa Raasili hayqqi simmin, mishiraachuwaa darosaa gattanawu hara loꞌꞌo hiillaa goꞌettiyoogaa doommida. Hosppune 16, 1922n, 50,000 gidiya asay siyido, ba koyro haasayatuppe issuwaa Ishaa Razerfordi eraadooniyan haasayiis. Hegaappe simmin, WBBR geetettiya nu eraadoone xaabee Usuppune 24, 1924n eraadooniyaa prograamiyaa doommiis. w15 11/15 5:10, 11

Yihooway i medhidobay i koyiyoogaadan hananaadan oottees. Xoossay ba sunttaa birshshettaara maayettiya ogiyan, Nohee markkabiyaa keexxiyaagaa, Baxaaliꞌeeli gooba kushe hiillancha, Geedooni gooba olancha, qassi PHawuloosi Ayhuda gidenna asatuyyo kiitettidaagaa gidanaadan oottiis. Ee, Xoossaa sunttaa birshshettay a asawu keehi gitaba. Ooratta Alamiyaa Birshshettaa Konttee Xoossaa sunttaa he birshshettan gelissidoy hegaassa. Xoossaa sunttaa Geeshsha Maxaafan kase deꞌiyo sohuwan gelissiyoogan, 130⁠ppe dariya qaalatun attamettida Ooratta Alamiyaa Birshshettay he sunttay bonchettanaadan oottees. (Mil. 3:16) SHin, ha wodiyan Geeshsha Maxaafaa birshshiyaageeti Xoossaa sunttaa kessidi, a sohuwan “Godaa” giyoogaa mala boncho sunttaa woy he biittaa xoossaa sunttaa gelissoosona. Yihoowa Markkata Bolla Gididi Heemmiyaagee Xoossaa sunttay bonchettanaadan oottiya Geeshsha Maxaafaa danddayettida keenan keehi daro asay demmanaadan oottiyoogaa kaseyiyo waanna gaasoy hegaa. w15 12/15 2:7-9

Xoossay issi uri sahettanaadan oottana danddayiyoogee qoncce. Geeshsha Maxaafay hegaa qonccissees. I Abrahaama wode deꞌida Gibxxe kawuwaa, Muuse michiyo Mayraamonne hegeetu mala issi issi asati sahettanaadan oottidi issi issitoo eta qaxxayiis. (Doo. 12:17; Qoo. 12:9, 10; 2 Sam. 24:15) Israaꞌeelati ayyo ammanettennan ixxikko, Xoossay “hargge ubbaanne bosha ubbaa” eta bolli yeddanaagaa yootiis. (Zaa. 28:58-61) SHin Yihooway harggiyaa xayssanawu woy asay sahettennaadan oottanawu danddayees. (Kes. 23:25; Zaa. 7:15) Qassikka, asaa pattana danddayees. Iyyoobi keehi sahettidi hayqqanawu amottidoogaappe guyyiyan, Xoossay a pattiis! (Iyy. 2:7; 3:11-13; 42:10, 16) Ee, Xoossay issi uri harggin a pattana danddayiyoogee tuma. A Naꞌaykka hegaa mala. Yesuusi maalaalissiyaabaa oottidi, hanttaara gogaa harggee, woy kaarettay oyqqidoogeeta, woy qooqeta, woy bollay silidoogeeta pattidoogaa Geeshsha Maxaafay yootees. (Maa. 4:23, 24; Yoh. 9:1-7) Yesuusi asaa pattidoogee i ooratta alamiyan oottana gitabawu xeera beso gidiyoogaa eriyoogee keehi minttettiyaaba! w15 12/15 4:3, 4