Hidaare

Abrahaami “lo77o ceeggidi” hayqqidoogaabaa nabbabiyo wode, i sinttappe deꞌanawu koyennabadan qoppana bessenna. Geeshsha Maxaafay, “Abrahaami Xoossai lo77o baasuwan hayyottidi keexxido katamaa naagees” yaagees. (Ibr. 11:10) Abrahaami Gannate saꞌan deꞌiyoogaaninne Yihoowaara deꞌiya dabbotaa he wodekka minttiyoogan ay keena ufayttanaakko qoppa. I hayqqi simmin, a ammanoy Yihoowa ashkkarata daro shaꞌu layttawu keehi maaddidoogaa eriyo wode ay keena ufayttaneeshsha! Yisaaqi hayquwaappe attidoogee hegaappe keehi aadhiyaabawu leemiso gididoogaakka i he wode akeekana. (Ibr. 11:19) Qassi i Yisaaqa yarshshanawu giigettiyo wode keehi mishettidoogee, Yihooway ba Naꞌaa Yesuus Kiristtoosa wozo oottidi immiyo wode keehi mishettidoogaa miilooniyan qoodettiya ammanettida asay akeekanaadan maaddidoogaakka erana.—Yoh. 3:16. w16.02 1:15, 16

Aawatettay deꞌiyo issi uri nu hanotaa bala ogiyan akeekiyo wode, Yihoowayyo ammanettiyoogee metana danddayees. Yonaataana hegaa malabay gakkiis. Xoossay tiyido Kawuwaa Saaꞌooli ba naꞌay Daawitaara dabbotiyoogaa erees; shin hegawu gaasoy aybakko akeekibeenna. Saaꞌooli hanqquwaa suullidi Yonaataana kawushshiis. SHin Yonaataani iitaa gishshaa iitaa zaaribeenna. I Xoossaayyoonne sinttappe kawo gidana Daawitayyo ammanettiyoogaa aggibeenna. (1 Sam. 20:31-41) Ha wodiyan, Kiristtaane gubaaꞌiyan ishantti darotoo nu hanotaa bala ogiyan akeekokkona. SHin gubaaꞌe cimati nagarancha gidiyo gishshawu, nu hanotaa bala ogiyan akeekana danddayoosona. (1 Sam. 1:13-17) Asi nu hanotaa bala ogiyan akeekiyo wode, ubbatoo Yihoowayyo ammanettanawu baaxetiyaageeta gidoos. w16.02 3:14, 15

Issoti issoti ba huuphiyaa geppiyoogee xammaqettiyoogaappe aybin dummatiyaakko shaakki erokkona. Leemisuwawu, issi issi yelaga naati, ‘Ta huuphiyaa Yihoowawu geppaas, shin xammaqettanawu giigettabeykke’ goosona. Hegee danddayettiyaabee? Ba huuphiyaa geppiyoogee merinawu ayyo haggaazanaagaa Yihoowayyo yootiyoogaa. Issi uri xammaqettiyo wode, bana geppidoogaa haratuyyo bessees. Hegaa gishshawu, xammaqettiyoogee nena Yihoowawu geppidoogaa ayyo woosan yootidobaa asawu qonccissiyoogaa. Neeni xammaqettanaappe kase, ba huuphiyaa geppiyoogaa birshshettay aybakko erana bessees. Ne deꞌuwaa Yihoowawu geppiyo wode, neeni abaa gidiyoogaa ayyo yootaasa. Ne deꞌuwan hara aybippenne kaseyada a sheniyaa oottanawu Yihoowawu qaalaa gelaasa. Qaalaa gelidobaa aybanne polana bessikko, Xoossaa Yihoowawu gelido qaalaa aybippenne aaruwan polana bessees!—Maa. 5:33. w16.03 1:14, 15

PHawuloosi asa bollaa leemisodan goꞌettidi, gubaaꞌee baayyo huuphe gidida Yesuus Kiristtoosawu haarettiyoogan issippetettan deꞌiyoogaa qonccissiis. Kiitettida PHawuloosi koyettiyaabaa oottiya ‘shaya ubbaa’ baggaara issippetettan oottiyoogaara gayttidabaa yootiis. (Efi. 4:16) Nuuni ubbay, yelaga gidin gastta gidin, mino gidin shugo gidin, gubaaꞌiyaa issippetettawu waatana danddayiyoo? Hegawu koshshiya waannabay, gubaaꞌiyawu kaaletuwaa immanaadan Yesuusi sunttido cimatuyyo haarettiyoogaanne eta bonchiyoogaa. (Ibr. 13:7, 17) Hegaadan oottiyoogee issi issitoo metana danddayees. Gidikkokka, Xoossay nuna kaalettanaagaa ammanettidi a woossana danddayoos. A ayyaanay nuuni gubaaꞌiyaara wozanappe hashetidi oottanaadan maaddees. Yaatiyo gishshawu, nuuni issi issitoo azazettanawu metootikko, nu huuphiyaa kawushshidi hasheti oottiyoogee gubaaꞌiyaa issippetettawu waati maaddiyaakko qoppana bessees. Hegaa bollikka, hegaa malaban hashetidi oottiyoogee nuuni ubbay kaseegaappe aaruwan siiqettanaadan maaddees. w16.03 3:8, 9

Issi issi yelaga ishati dicciyo wode ayyaanaabaa halchanaadan minttettiday baynnaagaa bessees. Hegaa mala yelagati ayyaanaabaa mule kaseyokkona. (Maa. 10:24) Hegaa gishshawu, issi cimay he yelagaa lagge oottanawunne i gubaaꞌiyan aawatettaa ekkanawu loohana koshshiyoogaanne gubaaꞌiyawu koshshiya ura gidiyoogaa akeekanaadan loddan loddan maaddana bessees. Yaatidi, guuttaa takkidi cimay he ishaara issippe issi issi Geeshsha Maxaafaa xiqiseta tobbana, qassi i bana Yihoowawu geppidoogaa xeelliyaagan wotti dentti qoppanaadan maaddana bessees. (Era. 5:4; Isi. 6:8; Maa. 6:24, 33; Luq. 9:57-62; 1 Qor. 15:58; 2 Qor. 5:15; 13:5) ‘Ne huuphiyaa Yihoowawu geppiyo wode ay oottanawu ayyo qaalaa geladii?’ gidi he cimay a oychana danddayees. Hagaadan gidi a wozanaa denttettanawu malana danddayees: ‘Neeni xammaqettiyo wode Yihoowawu aybi siyettiis gaada qoppay?’ (Lee. 27:11) ‘Seexaanawu shin, aybi siyettidee?’ (1 PHe. 5:8) Akeekan doorido Geeshsha Maxaafaa xiqiseta nabbabiyoogee, issi ishaa keehi denttettana danddayiyoogaa cimati akeekoosona. w15 4/15 2:9, 11

Nuuni oychiyo ubbabaa Yihooway sohuwaara zaarennay aybissee? Nuuni aara dabbotiyoogaa naati bantta aawaara dabbotiyoogaara i geeddarssiyoogaa hassaya. (Maz. 103:13) Issi naꞌi oychiyo ubbabaa ba aaway immana woy eesuwan hegaadan oottana giidi qoppennaagee qoncce. Naati oychiyo issi issibay eti sohuwaara dogi aggiyooba gidana danddayees. Harati bessiya wodee gakkanaashin naagana koshshiyoobata. Harati qassi naata woykko hara asaa maaddennaba gidana danddayoosona. Hegaa bollikka, naꞌi oychiyo ubbabaa polikko, naꞌay goda mala, aaway qassi ayyo ashkkara mala gidees. Saluwan deꞌiya nu Aaway Yihooway nuna siiqees. I nuna Medhida aadhida eranchaa gidiyoogaadan, nuussi koshshiyaabaanne nuuni oychiyoobaa zaarana bessiya wodiyaa erees. Nu woosaa Yihooway waatidi zaaranaakko naagidi beꞌiyoogee loꞌꞌo.—Isi. 29:16; 45:9. w15 4/15 4:6, 7

Ha alamee xayanawu matido gishshawu, Seexaanay nuuni ha alamiyan gitatiyoogaa xallaa qoppidi, nuussi qarettanaadan oottanawu koyees. I nuuni wurssetta gallassan deꞌiyoogaa dogidi naagettennan agganaadan koyees. Hagee ne bolli yeenna mala ubbatoo ‘naaga utta.’ (Maa. 16:22, 23; 24:42) Seexaanay asaa cimmanawu ha alamiyaa wurssettay eesuwan yeennabadan woy mule yeennabadan odiyo worddobaa aynne ammanoppa. Seexaanay Xoossay nuna siiqennabadaaninne nu nagaraa atto geennabadan nuuni qoppana mala koyees. He ubbabay Seexaanay asaa cimmanawu odiyo worddo odo. Yihooway tumu siiqennay oonee? Seexaanaa. Yihooway tumu atto geennay oonee? Ini Seexaanaakka. SHin Geeshsha Maxaafay, “Intte oottido oosuwaanne . . . Xoossaa siiqido siiquwaa Xoossai doganau worddanchcha gidenna” yaagidi nuna minttettees. (Ibr. 6:10) Yihooway nuuni a ufayssanawu oottiyoobaa nashshees; qassi nuuni awu haggaaziyo haggaazoy mela gidenna. (1 Qor. 15:58) Hegaa gishshawu, Seexaanay odiyo worddo oduwan cimettoppa. w15 5/15 1:16-19

Abrahaami hidootan naagidoogaa ammananaadan oottiya darobay deꞌiyo gishshawu, hegee i beꞌibeennabaa beꞌidoogaa mala! Xoossay qaalaa gelidobaa Abrahaami ammanidoogee i Xoossaa sheniyaa oottanawu keehi murttanaadan oottiis. I ammanuwan Uura katamaa aggidi biis, qassi hegaappe simmin deꞌido wodiyan Kanaane katamatuppe issuwaaninne deꞌiigibeenna. Ayssiyaageeti Yihoowayyo haggaazenna gishshawu, he katamati minnidi deꞌennaagaa i erees. (Yaas. 24:2) Abrahaami hegaappe simmin deꞌido adussa wodiyan “Xoossai lo77o baasuwan hayyottidi keexxido katamaa” naagiis. (Ibr. 11:10) Abrahaami Yihooway merinawu haariyo sohuwan deꞌana deꞌuwaabaa qoppiis. Aabeeli, Heenooki, Nohee, Abrahaaminne eta mala harati hayqqidaageeti denddanaagaa ammanidi, ‘loꞌꞌo baasuwan keexxido katama’ gidida Xoossaa Kawotettaa haaruwan deꞌanawu hidootan naagidosona. Eti he anjjuwaa wotti dentti qoppidoogee Yihoowa mintti ammananaadan maaddiis.— Ibr. 11:15, 16. w15 5/15 3:8, 9

Yihooway Yesuus Kiristtoosa baggaara ba wolqqaa maalaaliya ogiyan bessiis. Kiristtoosi oottido maalaaliyaabaappe amaridaageeta oyddu Wonggeleti ammanuwaa minttiya ogiyan loytti qonccissoosona. Geeshsha Maxaafan xaafettidaagee i oottido maalaalissiyaabaappe amaridaagaa. (Maa. 9:35; Luq. 9:11) Ee, Xoossaa wolqqay Yesuusan qoncciis. Hegaa gishshawu, kiitettida PHawuloosi, ‘Xoossaa wolqqay Kiristtoosa’ giidi abaa yootidoogee bessiyaaba. SHin, Yesuusi oottido maalaalissiyaabay nu deꞌuwan nuna waatidi maaddana danddayii? Kiitettida PHeexiroosi Yesuusi maalaaliyaabaa, woy ‘oorattabaa’ oottidoogaa yootiis. (Oos. 2:22) Yesuusi ha saꞌan oottido wolqqaamabay i kawo gididi haariyo wode ehaana daro anjjuwaa qonccissiyaaba. Hegee Yesuusi Xoossay ehiyo ooratta alamiyan kumetta saꞌan oottana maalaalissiyaabawu eesho! I oottido maalaalissiyaabay a eeshshaanne a aawaa eeshshaa nuuni loytti akeekanaadankka maaddees. w15 6/15 1:1, 2

Yesuusi ba Aaway Yihooway he maccaasiyo pattidoogaa erido gishshawu, iyyo keha qaalan, “Ta na7ee, nena ne ammanoi pattiis; saruwan ba, ne waayiyaappenne paxa” yaagiis. (Mar. 5:34) Yesuusi daro keha! I harggiyan waayettiyaageetuyyo wozanappe qarettiyoogaa akeekoos. ‘Nuna ooninne siiqenna, qassi pattokko’ giidi nuuni qoppanaadan Seexaanay koyees. Yesuusi oottido maalaalissiyaabay nubaynne nu metuwaabay a tumuppe qofissiyoogaa bessees. I keehi qarettiya Kawonne Qeese Ubbatu Halaqaa! (Ibr. 4:15) Nuna etaagaadan sakkana xayikko, harggee caddiyoogeetu waayiyaa akeekanawu metana danddayees. Yesuusi sahettana xayikkonne, sahettidaageetu hanotaa akeekidi etawu qarettidoogaa hassayana danddayoos. Yesuusa leemisoy nuuni nuuyyo danddayettida ubban hegaadan oottanaadan denttana mala amottoos.—1 PHe. 3:8. w15 6/15 2:11, 12

Nuuni Xoossaa sunttaa eriyoogaa xalla gidennan, a sunttan xeegettiya ‘asa’ gidiyoogeekka nuussi gita maata. (Oos. 15:14; Isi. 43:10) Saluwan deꞌiya nu Aawaa, “Ne geeshsha sunttai anjjetto” giidi woossoos. (Maa. 6:9) Hegaadan woossiyoogee Yihoowa geeshsha sunttaa bonchennaagaa bessiyaabaa oottennaadan woy haasayennaadan i nuna maaddanaadan oychana mala denttettana danddayees. Hachi gallassa xiqisiyan qonccidoogaadan bantta sabbakiyoobaa oosuwan peeshshibeenna, koyro xeetu layttan deꞌida amarida asatu mala gidanawu nuuni koyokko. Xoossaa boncho sunttay cashsha ubbaappe muleera geeyanawu aybi koshshii? Yaatanawu, Yihooway ba haaruwaa eriiddi eqettiya ubbaa xayssana bessees. (Hiz. 38:22, 23) Asay loddan loddan wottiyoobi baynnaagaa gidana. Qoppana danddayiya mereta ubbay Yihoowa sunttaa geeshsha ootti xeelliyo wodiyaa beꞌanawu keehi amottoos! Hegaappe simmin, saluwan deꞌiya siiqiya nu Aaway ubbaassi ubbabaa hanana.—1 Qor. 15:28. w15 6/15 4:7, 10

Yedhiyo sohuwaa’ giyo qofay saꞌaa qonccissiyaaba; qassi Ibraawetto Geeshsha Maxaafan beni Israaꞌeelati goꞌettiyo beeta maqidasiyawu leemiso. (1 Odi. 28:2; Maz. 132:7) Saꞌan kase deꞌiya beeta maqidasee tumu goynuwaa humꞌꞌo. Yaatiyo gishshawu, Yihoowa xeelan hegee tumuppe loꞌꞌees; qassi, beeta maqidasee deꞌiyoogee Yihooway tohuwaa wottiyo sohoy bonchchettanaadan oottiis. (Isi. 60:13) Ha wodiyan tumu goynuwaa humꞌꞌoy keexettida beeta maqidase gidenna. SHin keexxido ayba keettappenne aaruwan Yihoowa bonchissiya ayyaanaa beeta maqidasee deꞌees. He beeta maqidasee qeesetu oosuwaaninne Yesuus Kiristtoosa yarshshuwan Yihoowaara sigettanaadan giigidaba. Hegee Yesuusi 29 M.Ln xammaqettidi Yihoowa ayyaana beeta maqidasiyan gitan Qeese Ubbatu Halaqa gididi sunttettido wode doommiis.—Ibr. 9:11, 12. w15 7/15 1:1-3

He wode ammanettidaageeti anjjettana; qassi ammanettibeennaageeti qaxxayettana. (Maa. 24:46, 47, 50, 51; 25:19, 28-30) Yesuusi hagaa loytti qonccissanawu leemisuwaa yootiis. I, hagaadan giis: “Taani, Asa Na7ai, kiitanchcha ubbatuura bonchchuwan yiyo wode, ta bonchcho kawotaa araatan uttana. Sa7an de7iya asai ubbai ta sintti shiiqana; heemmiyaagee dorssata deeshshatuppe shaakkiyoogaadan, taani he asaa naa77u kessada shaakkana. Qassi dorssata taappe ushachcha baggaara essada, deeshshata taappe haddirssa baggaara essana.” (Maa. 25:31-33) Dorssatussinne deeshshatussi pirddettanabay aybee? Leemisuwaa wurssetta qofay hagaadan gees: “Hegeeti [deeshshati] merinaa qaxxayuwau baana; shin xilloti merinaa de7uwau baana.”—Maa. 25:46. w15 7/15 2:11, 12

Nuuni diccido biittaa wogaa, qaalaanne qumaa dosana danddayiyoogee erettidaagaa. SHin, nuugaa mali baawa giidi nuuni qoppana koshshenna. Nuuni ufayttana mala, Yihooway ubbaban dumma dummabaa medhiis. (Maz. 104:24; Ajj. 4:11) Yaatin issibaa oottiyo issi ogee haraappe aadhees giidi qoppana koshshii? Xoossay asay ubbay tumaa eranaadaaninne merinawu deꞌanaadan koyees. (Yoh. 3:16; 1 Xim. 2:3, 4) Dumma dumma loꞌꞌo qofaa siyanawu eeno giyoogee nuna maaddees; qassi Kiristtaane issippetettay moorettennaadan naagees. Nuuni Yihoowawu ammanettidi deꞌanawu, alamiyaa ooshshan gelana bessenna. Nuuni alamiyaaban oossinne exatokko. Asay shaahettanaadan, otorettanaadaaninne keesettanaadan oottiya Seexaanaa alamiyan deꞌiyaabaappe Yihooway nuna kessido gishshawu, a keehi galatoos! w15 7/15 3:17, 18

Nuuni Yihoowa siiqiyoogaa bessana danddayiyo daro ogee deꞌees. Leemisuwawu, Kawotettaa mishiraachuwaa mishettidi sabbakiyoogan Xoossaanne nu shooruwaa siiqiyoogaa bessoos. (Maa. 24:14; 28:19, 20) Paacee nuna gakkishin ubbatoo ammanettidi deꞌiyoogan Yihoowa tumuppe siiqiyoogaa bessoos. (Maz. 84:11; Yaaq. 1:2-5) Nuna gakkiya paacee wolqqaamikko, nuuni ayyo alꞌꞌo gidiyo gishshawu, Xoossay nu waayiyaa akeekiyoogaanne nuna maaddanaagaa ammanettana danddayoos. (Maz. 56:8) Nuuni Yihoowa siiqiyoogee i medhidobaanne oottido maalaalissiya harabaa wotti denttidi qoppanaadan denttettees. Geeshsha Maxaafaa minnidi xannaꞌiyoogan, Xoossaa siiqiyoogaanne a Qaalaa xoqqu oottidi xeelliyoogaa bessoos. Nuuni Yihoowa siiqiyoogee woosan akko ubbatoo shiiqanaadan oottees. Qassi Xoossay nu nagaraassi giigissido wozuwaa yarshshuwaa wotti dentti qoppiyo wode, a wozanappe siiqoos. (1 Yoh. 2:1, 2) Yihooway nuna aggennan siiqido gishshawu a siiqanaadan oottiya darobaappe hageeti amaridaageeta. w15 8/15 1:6, 17, 18

Ooratta alamiyan nuuni danddayancha gidana koshshiyo wodee deꞌana danddayees. Leemisuwawu, issi issi asati hayquwaappe denddin eta dabbotinne eta laggeti ufayttiyoogaa siyana danddayoos. SHin nuuni siiqiyoogeeti denddana gakkanaassi naagana koshshennan waayi aggana. Yaanikko, nuuni danddayancha gididi haratuura ufayttanee? (Roo. 12:15) Yihooway qaalaa gelidobay polettana gakkanaashin ha wodiyan danddayan naagiyoogee, he wode danddayancha gidanaadan nuna maaddees. Nuuni tumaa akeekidobay laamettiyoogaara gayttidaagan danddayancha gidiyoogankka ooratta alamiyaa deꞌuwawu giigettana danddayoos. Laamettidabaa xannaꞌiyoo, qassi loytti akeekana xayikko danddayancha gidiyoo? Yaatikko, Yihooway asaappe koyiyoobaa ooratta alamiyan yootiyo wode, nuuni danddayancha gidanawu waayi metootana.—Lee. 4:18; Yoh. 16:12. w15 8/15 3:9, 10

Efisoonan deꞌiya Kiristtaaneti ayyaanaaban diccana koshshiyoogaa kiitettida PHawuloosi xaafiis. Eti ‘Xoossaa Naꞌaa ammaniininne erin beettiya issippetettaakko gakkanaadaaninne Kiristtoosa polo dichaa keenaa diccidi, gastta asa gidanawu’ baaxetanaadan zoriis. (Efi. 4:13) PHauloosi dabddaabbiyaa xaafiyo wode, Efisoona gubaaꞌee eqqoosappe guutta layttaa takkiis. Yan deꞌiya daro erissiyo ashkkarati ayyaanaaban keehi diccidosona. SHin amaridaageeti kayma gidanawu baaxetana koshshees. Yihoowa Markkatu hanotay ha wodiyan hegaara issi mala. Daro ishanttinne michontti Xoossawu daro wodiyaa haggaazidosona; qassi ayyaanaaban kaymidosona. Gidoppe attin, issoti issoti kaymibeennaagee qoncce. Leemisuwawu, layttan layttan shaꞌan qoodettiyaageeti xammaqettiyo gishshawu, kaymanawu issoti issoti haꞌꞌikka baaxetana koshshees. Neeni shin?—Qol. 2:6, 7. w15 9/15 1:2, 3

Bollaa ubbatoo minttiyoogee gazddissiyoogaanne payyatettawukka maaddiyoogaa daroti akeekoosona. Nuuni haratuura issippe bollaa minttanawu koyikko, hegaa oonaarakka oottana koshshii? Leemiso 13:20y, “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” yaagees. Nuuni Geeshsha Maxaafan loohida nu kahay yootiyoobaa siyiyoogan, dooridi allaxxana koshshiyoogaa hegee bessennee? Ay keena wodiyaa allaxxay? SHiiquwaa, haggaazuwaa, buzo xinaatiyaanne hegaa malabaa kaseyayiyye, allaxxiyoobaa kaseyay? Neeni keehippe koyiyoobay aybee? Yesuusi, “Kasetidi, Xoossaa kawotettaanne a xillotettaa koyite; i intteyyo he ubbabaa immana” yaagiis. (Maa. 6:33) Ne kahay neeni Yesuusa zoriyaara maayettiyaabaa kaseyanaadan denttettii? w15 9/15 2:13, 15

Hegee bessiya wodiyan imettida zorenne maaddiya kaaleto. Yihooway Qaayeela ogee iita gidiyoogaa beꞌidi hegaadan yootiis. Qaayeeli odettidabaa siyennan ixxidi qohettidoogee azzanttiyaaba. (Doo. 4:11-13) Ermmaasa xaafee Baaruki daafuridonne hidootaa qanxxido wode, i ba metuwaa akeekanaadan maaddiya zoriyaa Yihooway a zoriis. Qaayeelaagaappe dumma hanotan, Baaruki Yihoowa zoriyaa siyiis; qassi hegee a shemppuwaa ashshiis. (Erm. 45:2-5) Yihooway nuna siiqiyo gishshawu kaaletteesinne seerees. I koshshiyo wode nuna qaxxayiyoogaa xalla gidennan, nuna loohissees. (Ibr. 12:6) Yihoowayyo ammanettidi oottiyo wode gita paacee gakkido darotubaa Geeshsha Maxaafay yootees; he paaciyan i eta seerennaaninne loohissennan waayi aggana. w15 9/15 4:12, 13

Israaꞌeelatu Xoossay tumu Xoossaa gidiyoogaa Gabaaꞌoonati akeekidosona. Raꞌaabakka Xoossay i wode oottidoban a kushiyaa beꞌaasu. Yihooway ba asaa waati ashshidaakko siya simmada, biittaa wochiya Israaꞌeela asatu naaꞌꞌaayyo a, “GODAI ha biittaa intteyyo immidoogaa, . . . taani erais” yaagaasu. Hegaadan oottiyoogee qohana danddayikkonne, a bananne bantta so asaa Yihooway ashshana danddayiyoogaa ammanaasu. (Yaas. 2:9-13; 4:23, 24) Hageenne Geeshsha Maxaafan deꞌiya hara leemisoti Xoossaa woy a kushiyaa beꞌiyoogee aybakko akeekanaadan nuna maaddoosona. A eriyo wode, a eeshshatanne i oottiyoobaa ‘nu wozanaa i dooyin beꞌiyo’ gishshawu, nuunikka a kushiyaa beꞌana danddayoos. (Efi. 1:18) Nuuni beni wodekka ha wodiyankka Yihooway ba asaa maaddiyoogaa beꞌidaageetu mala gidanawu koyiyoogee qoncce. w15 10/15 1:6, 7, 9

Yesuusi siiqiyoonne bonchiyo maccaasi Martto xalla gidenna. Leemisuwawu, Martti michiyaa Mayraamakka Yesuusawu mata lagge. Yesuusi ba aayyiyo Mayraamokka siiqees. (Yoh. 19:25-27) Yaatin Yesuusi Martto siiqanaadan oottidabay aybee? Yesuusi Martto siiqidoy a imatuwaa mokkiyoonne mino oosancha gidiyo gishsha xalla gidennan, ayyaanaabankka mino gidiyo gishshataassa gidiyoogee qoncce. A Yesuusi tamaarissiyoobaa wozanappe ammaniya maccaasa. Yaana giido Masee Yesuusa gidiyoogaa Martta mintta ammanawusu. (Yoh. 11:21-27) Gidikkokka, a nu mala nagarancha asa. Issi wode Yesuusi i son shoobettido wode, Martta likke gidenna gaada qoppidobaa giigissanawu Yesuusi oottana koshshiyoobaa yootaasu. Martta, “Godau, taani ha ubba oosuwaa oottishin, ta michchiyaa utta bayidoogaa qoppikkii? Yaatikko o tana maadda ga” yaagaasu.—Luq. 10:38-42. w15 10/15 3:1, 2

Ubbatoo ayyaanaabaa wotti dentti qoppiyoogan, tumawu mishettiiddi deꞌana danddayoos. Yaatiyoogee nu ishatanne Geeshsha Maxaafaabaa eranawu koyiya, haggaazuwan nuuni demmiyo asata minttettees. Xoossay immido gita imota gidida Yesuusa wozuwaa yarshshuwaabaa wotti dentti qoppiyoogee nuuni nu Geeshsha Aawaa Yihoowayyo mata dabbo gidiyoogaa nashshanaadan maaddees. (Roo. 3:24) Alamiyaaban oossinne exatenna gishshawu heezzu layttawu qashettida, Tohossa Afirkkan deꞌiya Marki hagaadan giis: “Wotti dentti qoppiyoogaa keehi ufayssiyaabaa demmiyoogaara geeddarssana danddayoos. Nuuni ayyaanaabaa kaseegaappe aaruwan wotti dentti qoppiyo wode, nu Xoossaa Yihoowabaa oorattabaa loytti eroos. Issi issitoo taani guuttaa azzaniyo wode woy sinttanaabawu hirggiyo wode, Geeshsha Maxaafaappe issi xiqisiyaa kessada wotta dentta qoppays. Hegee tumukka woppu oottiyaabadan tawu siyettees.” w15 10/15 4:15

Koshshiyaabaa gidikko, intte kessiyo maarawu woy kuuyiyoobawu gaasoy aybakko intte naatuyyo yootite. Intte yelaga naꞌay gaasuwaa akeekiyo wode, intteyyo azazettanawu koyana danddayees. Oyddu naata dichida Bari, “Intte kuuyiyoobawu gaasuwaa yootiyoogee intte yelaga naati inttenan ammanettanaadan maaddees; ayssi giikko, gaasoy baynnan intte coo kuuyibeennaagaa eti akeekoosona” yaagiis. Yelagati guutta naꞌa gidennaagaakka hassayite. Eti banttabaa waati qoppanaakko tamaaroosona; qassi issibaa banttawu kuuyanawu koyoosona. (Roo. 12:1) Bari, “Yelagati banttawu siyettiyaaban gidennan, loytti qoppidi kuuyiyoogaa tamaarana koshshees” yaagiis. Hegaa gishshawu, inttena kawushshidi, issibaa intte aybissi kuuyidaakko intte yelaga naꞌaassi yootite. Yaatiyo wode, i ba huuphen kuuyiyoogaa tamaarees; qassi intte a bonchiyoogaanne i gasttiiddi deꞌiyoogaa intte akeekiyoogaa erees. w15 11/15 2:11

Kumetta saꞌan miilooniyan qoodettiya asay Yihoowawu goynnees; qassi a sunttaabaanne a halchuwaabaa markkattees. Yihoowawu goynniya ubbay ba mala Kiristtaaneta waati xeellana bessii? (Roo. 12:10) Kiitettida PHeexiroosi hagaadan giis: “Tumatettaayyo intte azazettiyoogan, lo77o milatiya iitatetti bainnan, intte ishantta siiqanau intte huuphiyaa geeshshidi, issoi issuwaara minttidi wozanappe siiqettite.” Qassi PHeexiroosi ba mala Kiristtaanetussi, “Ubbabaappe aattidi issoi issuwaara wozanappe siiqettite” yaagiis. (1 PHe. 1:22; 4:8) Nuuni nunaara Yihoowayyo goynniyaageeta wozanappe siiqiyo gishshawu, kumetta saꞌan dumma dirijjite gidida. Hegaa bollikka, nuuni Yihoowa siiqiyoonne a higgiyawu azazettiyo gishshawu, laggetiyaabi baynna ba gita wolqqan, geeshsha ayyaanan i nuna maaddees. Kumetta saꞌan deꞌiya ishanttu maabaran ufayssiya issippetettan deꞌanaadan hegee nuna maaddiis.—1 Yoh. 4:20, 21. w15 11/15 4:8, 9

Yihooway nuuni a woy a halchuwaa eranawu dumma qaalaa tamaaranaadan i koyenna. (Ajj. 7:9, 10) Dumma dumma qaalaa goꞌettiyoogeenne birshshiyo wode guuttaa dummatiyoogee Xoossay asaara haasayennaadan diggidee? CHii diggibeenna. Leemisuwawu, koyro qaalaappe Yesuusi goꞌettido amaridaageetu xallaa nuuni akeekana danddayoos. (Maa. 27:46; Mar. 5:41; 7:34; 14:36) SHin, Yihooway Yesuusi tamaarissidobay Giriikettuwan, qassi guyyeppe hara qaalatunkka odettanaadan oottiis. Hegaappe simmin, Ayhudatinne Kiristtaaneti Geeshsha Maxaafaa kushiyan darotoo xaafidoogee, Xoossaa Qaalay xayennaadan maaddiis. Hegee hara daro qaalan birshshettiis. Kiristtoosa wodiyaappe 400 gidiya layttay aadhi simmin deꞌida Joon Krisisttomi Yesuusi tamaarissidobay Sooretu, Gibxxetu, Hinddetu, Parssetu, Toophiyaa asaanne hara daro asaa qaalan he wode birshshettidoogaa yootiis. w15 12/15 1:10, 11

Nuuni yootiyoobay siyiya urawu keehi koshshikkokka, haasayana bessiya wodiyaa akeekana xayikko, maaddennan aggana danddayees. Leemisuwawu, wolqqaama biittaa qaattaynne sunaami giyo beetay Laappune 2011n arshsho bagga Jaappaanen katamata ubbaanne daro heeraa bashshiis. He wode 15,000⁠ppe dariya asay hayqqiis. He heeran deꞌiya Yihoowa Markkatikka bantta shoorotuugaadan qohettikkokka, azzanidaageetuyyo banttawu danddayettida ubban Geeshsha Maxaafaappe minttettiyaabaa yootidosona. SHin heeran deꞌiya daro asay Budistte haymaanootiyaa kaallees; qassi Geeshsha Maxaafay tamaarissiyoobaa eti eriyoobay guutta woy mule erokkona. Nu ishantti he wodee injjetennaagaa akeekido gishshawu, sunaamee aadhosaara dendduwaa hidootaabaa yootibookkona. SHin, eti minttettiyaabaanne asaa bolli hegaa mala iitabay gakkiyo gaasuwaa Geeshsha Maxaafaappe yootanawu haasayiyo imotaa goꞌettidosona. w15 12/15 3:7

Ha yaaretiya alamiyan asa sahuwan duretanawu koyiyaageeti deꞌiyoogee azzanttiyaaba. Hara asati woy dirijjiteti banttawu daro woriyaa demmanawu keehi alꞌꞌo waagan bayzettiyaaba goꞌettanaadan yootoosona. Paxanawu woy hayqqennan guuttaa takkanawu keehi koyiya sahettida urawu he xale geetettiyaabay loꞌꞌoba milatana danddayees. Zoriyaa yootida ura eray sirissiyaaba gidikko, ‘cincca’ asi keehi naagettees. ‘Cincca’ uri hagaadan giidi qoppana danddayees: ‘I ha xalee issi ura maaddidabadan qoppikkokka, hagee tuma gidiyoogaa ammanttiya markki deꞌii? Asay issoy issuwaappe dummatees. Ha xalee tana maaddanaagaa ammanttiyaabay deꞌii? Taani hegaa xeelliyaagan loytta pilggana woy hegaa tamaarida woy loohida uraara zorettana koshshii?’—Zaa. 17:6. w15 12/15 4:14, 15

Kiristtoosawu deꞌanaadan siiqoy denttettennan, zaway baynna a siiquwaa nuuni demmana danddayennaagaa PHawuloosi akeekiis. Yihooway nuussi oottidobaa nuuni loyttidi akeekiyo wodenne nu wozanaa a siiqoy denttettiyo wode, nuuni nu kumetta shemppuwan Kiristtoos Yesuusawu deꞌanawu koyoos. Nuuni hegaa koyiyoogaa waati bessiyoo? Kiristtoosaagaadan deꞌiyoogaaninne a leemisuwaa mintti kaalliyoogan a milatanaadan, Yihoowa siiqiyaageeta he siiqoy denttettees. (1 PHe. 2:21; 1 Yoh. 2:6) Nuuni Xoossaanne Kiristtoosa siiqiyoogaa azazettiyoogan bessoos. Yesuusi, “Ta azazoi a matan de7iyo asi, qassi he azazuwaakka naagiyaagee, i tana siiqiya asa. Tana siiqiya asa ta Aawaikka siiqees; taanikka a siiqais. Taani ayyo qonccana” yaagiis. (Yoh. 14:21; 1 Yoh. 5:3) Hegaa gishshawu, nena hagaadan oycha: ‘Taani Kiristtoos Yesuusa loytta kaalliyoy aybiinee? Taani kaseegaappe giigissana koshshiyoobay aybee?’ Nuuni ha alamiyaa kaallanaadan ubbatoo paacee gakkiyo gishshawu, hegaadan nuna qoriyoogee keehi koshshiyaaba.—Roo. 12:2. w16.01 2:7-9

Neeni keehi mishettada haggaaziyaabadan qoppay? Geeshsha Maxaafaa loytta xannaꞌiyoogaaninne ‘Xoossaabaa geemettida yohuwaa’ tamaariyoogan ufayttay? (1 Qor. 2:10) Neeni haggaazuwan loꞌꞌo ayfiyaa demmanaadan Yihooway maaddidabadan qoppay? Aybippenne aaruwan Yihooway koyiyoobaa oottanawu yeemottay? Harata ayyaanaaban maaddana koshshiyoogaa akeekada, eta wozanappe maadday? Yihooway ne deꞌuwan nena keehi maaddidoogaa akeekadii? Ha oyshatuyyo neeni ‘ee’ gaada zaariyaaba gidikkokka, hegee neeni saluwan deꞌanawu doorettidoogaa bessii? Bessenna. Aybissi? Hegee saluwaa baanawu doorettidaageetu xallawu siyettiyaaba gidenna. Yihoowa ayyaanay, saꞌan merinawu deꞌanawu hidootiyaageetikka hegaadan qoppanaadan oottees. Neeni saluwan deꞌanawu doorettidanaashsha gaada qoppiyaaba gidikko, hegee neeni doorettabeennaagaa bessiyaaba. w16.01 3:14, 15

Yesuusi ba oottidobaaninne bana Yihooway siiqiyoogaa eriyoogan keehi ufayttiiddi, ba Aawaara issippe oottiis. Nuuni shin? Immiyoogeekka ekkiyoogeekka ufayssiyaaba gidiyoogaa Yesuusi yootiis. (Oos. 20:35) Tumaa siyido wode ufayttida; qassi he tumaa haratuyyo odiyoogeekka nuna ufayssees. Geeshsha Maxaafaa tumaa haratuyyo yootiyo wode, kase ayyaanaaban namisettidaageeti nu Xoossaanne a Qaalan deꞌiya tumaa eriyoonne nashshiyo wode ufayttiyoogaa beꞌoos. Eti bantta qofaa laammiyoogaa xalla gidennan, eta deꞌoy kaseegaappe laamettiyoogaa beꞌiyoogan keehi ufayttoos. Qassi mishiraachuwaa asawu yootiyoogee keehi koshshiyaaba gidiyoogaa akeekoos. Hegee Xoossaara sigettiyaageeti merinaa deꞌuwaa demmanaadan ogiyaa dooyees. (2 Qor. 5:20) Asaa merinaa deꞌuwawu efiya ogiyaa bessiyoogaappe aaruwan ufayssiya oosoy deꞌii? w16.01 5:6, 7