Tisaase

Abrahaami Xoossaa dabbo gidiyoogaa Geeshsha Maxaafay heezzusan yootees. (2 Odi. 20:7; Isi. 41:8; Yaaq. 2:23) Geeshsha Maxaafay Xoossaa dabbo giidi yootiyoy ha ammanettida bitaniyaa xalla. Yaatin, Yihoowa dabbo gidana danddayida asi Abrahaama xalla giyoogee? CHii, Geeshsha Maxaafay nuuni ubbay Xoossaa dabbo gidana danddayiyoogaa yootees. Yihoowa yayyiya, an ammaniyaanne ayyo mata dabbo gidida, ammanettida asata xeelliyaagan Xoossaa Qaalay darobaa yootees. Kiitettida PHawuloosi ‘shaaraadan nu matan yuuyi aadhidi markkattiya’ asatubaa yootiis. (Ibr. 12:1) He asati ubbay Xoossaa dabbo. Xoqqa maataa gidida, Xoossaa dabbo gidiyo maataa demmido gishshawu eti keehi ufayttidosona. Ammanuwan mino gidida he asatu leemisuwaa kaalliyoo? (Ibr. 6:11, 12) Yaatikko, Yihoowayyo mata dabbo gididi, daro anjjuwaa demmanaagaa ammanettana danddayoos! w16.02 2:1, 2, 19

Ne laggee neessi kaame immidabadan qoppa. I kaamee higgiyan mazggafettido woraqataa neeyyo immidi, “Qulppiyaa ta oyqqana. Qassi kaamiyaa laaggiyay nena gidennan tana” giidabadan qoppa. He imotaa xeelliyaagan neeyyo aybi siyettanee? Yihoowayyo, “Taani ta deꞌuwaa neeyyo immays. Taani nebaa” giidi, bana awu geppida urappe Yihooway koyiyoobaa qoppa. He uri ammanenna ura ekkanawu woy gelanawu geeman issippe wodiyaa aattiyoogan Yihoowawu azazettana xayikko shin? Woy i Yihoowawu kumetta shemppuwaappe haggaazennaadaaninne gubaaꞌe shiiquwaa darotoo uttennaadan diggiya oosuwaa oottanawu eeno giyaaba gidikko shin? Hegee kaamiyaa immidi qulppiyaa diggiyoogaa mala gidennee? Ba huuphiyaa Yihoowawu geppiya uri, “Ta deꞌoy nebaappe attin tabaa gidenna” yaagees. Hegaa gishshawu, Yihooway koyiyoobay nuuni koyiyoobaappe dummatiyo wodekka gidin, ubbatoo i koyiyoobaa oottoos. Ha qofay hachi gallassa xiqisiyan Yesuusi giidoogaara issi mala. w16.03 1:16, 17

Hananabaa yootiya Eelaasi 3,000 gidiya layttappe kase, yelaga Elssaaꞌi bana maaddanaadan oychiis. Elssaaꞌi sohuwaara eeno giidi, bana ziqqi oottiya oosuwaa oottiyoogan he cima bitaniyawu ammanettidi haggaaziis. (2 Kaw. 3:11) Hegaappe simmin, Elssaaꞌi usuppun laytta gidiyaagaa loohiis; yaatidi Eelaasi Israaꞌeela biittan oottiyo oosuwaa wurssana haniyoogaa eriis. He wode Eelaasi loytti loohida ba laggee ba geeduwaa kaallennaadan yootiis; shin Elssaꞌi bawu danddayettida keenan bana loohissiyaagaara takkanawu murttiis. Neeni yelaga gidikko Elssaaꞌa leemisuwaa ha wodiyan waatada kaallana danddayay? Nena ziqqi oottiya oosuwaa gujjin, oosoy imettiyo wode sohuwaara eeno ga. Nena loohissiyaagaa laggedan xeella; qassi i nena maaddiyoogaa neeni ay keena nashshiyaakko i akeekanaadan ootta. Ubbaappe aaruwan, neeyyo imettiya ay oosokka ammanettada ootta. Hegee keehi koshshiyoy aybissee? Yihooway neessi gubaaꞌiyan aawatettaa immanawu koyiyoogaa cimati akeekiyoy neeni ammanettiyaagaa gidiyooga bessa simmiina gidiyo gishshataassa.—Maz. 101:6; 2 Xim. 2:2. w15 4/15 2:13, 14

Yonaataani ba goꞌꞌaa kaseyanaadan Saaꞌooli minttettiis. (1 Sam. 20:31) SHin Xoossaayyo ammanettiyoogee, Yonaataani kawotanawu koyiyoogaappe Daawita maaddanawu koyanaadan denttettiis. Yonaataani Daawitaara ‘caaqqidobaa poliis’; nuunikka nu caaquwaa polana koshshees. Leemisuwawu, nuuni oosuwawu qaxarettiyo wode gelido qaalay nu qoppidoogaadan hanana xayikkokka, Xoossaayyo ammanettiyoogeenne Geeshsha Maxaafaa bonchiyoogee nuuni gelido qaalaa naaganaadan denttettees. Nu aqo deꞌoy nuuni qoppidoogaadan hanana xayidi, daro metiyaagaa gidikko shin? Xoossaa siiqiyoogee nuuni nu aqo laggiyawu ammanettanaadan denttettees. (Mil. 2:13-16) Qassi, Xoossaa asawu, ubba nu hanotaa bala ogiyan akeekiya asatuyyookka ammanettiyoogan, Yihoowayyo ammanettanawu baaxetiyaageeta gidoos. Metiyaabay deꞌishinkka Xoossaa Yihoowayyo ammanettiyo wode, a wozanaa ufayssoos. (Lee. 27:11) Nuuni ubbatoo Yihoowayyo ammanettikko, i bana siiqiyaageetuyyo ubbabaa loyttanaagaa ammanettoos. w16.02 3:16, 17

Yihooway asi ubbi genccananne genccennan aggana danddayiyoobaa eriyoogaa hassaya. (Maz. 103:14) Hegaa gishshawu, nuuni nu paace wolqqan genccana giidi i qoppenna; shin aawa gidiyo gishshawu maaddees. Nuuni issi issitoo genccana danddayennabadan qoppana danddayoos. SHin Yihooway ba ashkkarati bantta wolqqay danddayiyoogaappe aadhiya paaciyan paacettanaadan koyennaagaa qonccissiis. Ee, ‘kessi ekkiyo ogiyaa i immana.’ (1 Qor. 10:13) Yaatiyo gishshawu, nuuni genccana danddayiyoobaa xeelliyaagan Yihooway qoppiyoobay likke gidiyoogaa ammanettoos. Nuuni woossidi sohuwaara maaduwaa demmana xayikko, nuna maaddana wodiyaa eriya Xoossaa naagiyaageeta gidoos. I nuna ashshanawu ubbatoo amottiyo gishshawu, ikka danddayan naagiyoogaa hassaya. Yihooway “intteyyo kehanau naagees; i intteyyo qarettiyoogaa bessanau denddees.” w15 4/15 4:8, 9

So Asaa Goynuwan saaminttan saaminttan minttettiyaabaa tobbiyoogee yelagatunne gasttatu issippetettay minnanaadan maaddiyoogaa daroti akeekidosona. Ha ufayssiya wodiyan nuuni ayyaanaabaa tobboos; hegee qassi so asaa issippetettawu keehi maaddees. Haggaazuwawu meezetiyoogee, so asay muruta ogiyan sabbakanawu loytti giigettanaadan maaddees. Qassi so asay ubbay tumaabaa issoy issuwaara haasayiyo wodenne ubbay Yihoowa siiqiyoogaanne a ufayssanawu koyiyoogaa beꞌiyo wode, issoy issuwaara siiqettoosona. Azinaynne machiyaa Yihooway sabettanaadan issippetettan ay oottana danddayiyoonaa? Eti naaꞌꞌaykka Yihoowawu ammanettidi oottiyo wode, hegee demissiyo issippetettan ufayttoosona. Abrahaaminne Saara, Yisaaqinne Ribiqa, Elqqaaninne Haanna haasayidoban bantta aqo laggiyaa siiqiyoogaa ubbaykka qonccissidosona. Nuunikka hegaadan oottana bessees. (Doo. 26:8; 1 Sam. 1:5, 8) Hegee nu aqo laggiyaara issippetettan deꞌanaadan, qassi saluwan deꞌiya nu Aawaakko loytti shiiqanaadan maaddees.—Era. 4:12. w16.03 3:12, 13

Seexaanay tiyettidaageetuppe attidaageetuuranne ‘hara dorssatuura’ olettiiddi deꞌees. (Yoh. 10:16) Dabloosi baassi attida guutta wodiyan bawu danddayettidaagaa keenan daro Yihoowa ashkkarata maanawu halchiis. (Ajj. 12:9, 12) Nuuni Seexaanaara olettidi xoonana danddayiyoo? Ee! Geeshsha Maxaafay, “Xalahe halaqaa teqqite; i intteppe baqatana” yaagees. (Yaaq. 4:7) Seexaanay deꞌiyoogaa ammaniyaageetu bolli daroti qilliiccoosona. Etassi, Seexaanaynne dayddanttati maxaafatun, keehi yashshiya pilmetuuninne biiduwaa kaassan asi coo medhidoba. He asati yuushshi qoppiya uri iita ayyaanati deꞌoosona giidi ammanennabadan qoppoosona. Seexaanaynne dayddanttati haysen odettiyaabaa giidi xaasayi xeelliyoogee Seexaanaa qofissees gaada qoppay? Qofissenna! I deꞌiyoogaa siriyaageetu qofaa jallissiyoogee Seexaanaa metenna. (2 Qor. 4:4) Ayyaana meretati baawa giyo qofaa aassiyoogee Seexaanay asaa balettanawu goꞌettiyo daro ogetuppe issuwaa. w15 5/15 2:1, 2

Muusee bana yelida aawappenne aayyeppe Yihoowabanne i Israaꞌeelata aylleppe laꞌa kessidi hidoota bitaa immanawu halchidobaa tamaariis. (Doo. 13:14, 15; Kes. 2: 5-10) Muusee Yihooway Israaꞌeelatussi oottana giidobaa loytti qoppidoogee, i ammanuwan minnanaadaaninne Xoossaa wozanappe siiqanaadan maaddiis. Xoossaa yayyiya hara asatuugaadan, Yihooway asa ubbaa hayquwaappe laꞌa kessiyo wodiyaabaa i erees. (Iyy. 14:14, 15; Ibr. 11:17-19) Muusee Ibraawetussikka hara asa ubbawukka qarettiya Xoossaa siiqidoogee garamissenna. Ammanoynne siiqoy Muusee ba deꞌo laytta ubban Yihoowayyo haggaazanaadan maaddiis. (Zaa. 6:4, 5) Paarooni a woranawu koyido wodekka Muuse ammanoy, i Xoossaa siiqiyoogeenne sinttanaabaa loꞌꞌobaa qoppiyoogee xalanaadan a minttettiis.—Kes. 10:28, 29. w15 5/15 3:11-13

Galiila biittan Qaana giyo kataman issi bullachan Yesuusi ba koyro malaataa oottiis. Qoppidoogaappe daro imattati yeennan aggokkona. SHin gaasoy ayba gidikkokka, woyniyaa eessay wuriis. Bullachaa yiida imattatuppe issinniyaa Yesuusa aayyiyo Mayraamo. A “Ubbaappe Bolla Xoossaa Na7a” geetettanaagaa eriyo ba naꞌaabay hiraagan odettida ubbabaa qoppennan waaya aggana. (Luq. 1:30-32; 2:52) A biron qonccibeenna wolqqay an deꞌees gaada qoppadee? Qoncciyan erettiyaabay Mayraamakka Yesuusikka Qaana kataman bullachidaageenne a machiyaa yeellatennaadan etawu qarettidoogaa. Imattaa mokkiyoogee aawatetta gidiyoogaa Yesuusi erees. Hegaa gishshawu, i maalaaliyaabaa oottidi 380 litiro haattaa ‘ayfe woyne eessa’ kessiis. (Yoh. 2:6-11) Yesuusi he maalaalissiyaabaa oottana bessiyo gishshawu oottidee? CHii. I asaassi qoppiyo gishshawunne saluwan deꞌiya ba Aawaagaadan kehanawu hegaa oottiis. w15 6/15 1:3

Yesuusi saluwaa baanaappe kase i kiittidoogeeti, a hegaa oychidosona. Xoossaa Kawotettay haariyoogaa awude doommanaakko eti eranawu wodee gakkibeennaagaa Yesuusa zaaroy bessees. I bana kaalliyaageeti mishiraachuwaa sabbakiyo keehi koshshiya oosuwaa minnidi oottanaadan yootiis. (Oos. 1:7, 8) SHin, Yesuusi bana kaalliyaageeti Xoossaa Kawotettay yaanaagaa hidootan naaganaadankka tamaarissiis. Yaatiyo gishshawu, kiitettidaageetu wodiyaappe doommidi, Kiristtaaneti he Kawotettay yaanaadan woossoosona. Yesuusi saluwan haariyoogaa doommiyo wodee matattin, hegee haniyo wodiyaa eranaadan Yihooway ba asaa maaddiis. Raasili 1876n, Baybil Egzamayner giyo maxeetiyan issi huuphe yohuwaa xaafiis. “Ayhuda Gidenna Asaa Wodee Awude Wuranee?” giya he huuphe yohoy 1914y dumma laytta gidiyoogaa yootiis. He huuphe yohoy Daaneela hiraagan odettida “laappun laittai” Yesuusi yootido ‘Ayhuda gidenna asatu wodiyaara’ gayttidaba gidiyoogaa qonccissiis.—Dane. 4:16; Luq. 21:24. w15 6/15 4:11, 12

Harati azzaniyo wode Yesuusi etawu wozanappe qarettees. A laggee Alꞌꞌaazari hayqqin harati azzanido gishshawu, Yesuusi keehi qarettidi “mishettiis”; qassi “tookki shemppiis.” I Alꞌꞌaazara sohuwaara denttanaagaa erikkonne, hegaadan seelettiis. (Yoh. 11:33-36) Yesuusi yeekkanawu yeellatibeenna. Matan deꞌiya asay Alꞌꞌaazarayyoonne eta soo asawu Yesuusi qarettiyoogaa akeekana danddayees. Yesuusi Xoossay immido wolqqaa goꞌettidi ba laggiyaa hayquwaappe denttiyoogan keehi qarettiyoogaa bessiis! (Yoh. 11:43, 44) Geeshsha Maxaafay Yesuusi “muleerakka [Medhidaagaa] meretaa” ekkidoogaa yootees. (Ibr. 1:3) Yaatiyo gishshawu, Yesuusinne a Aaway sahuwaanne hayquwaa gaasuwan gakkiya azzanuwaa xayssanawu koyiyoogaa Yesuusi oottido maalaalissiyaabay qonccissees. Yihoowaynne Yesuusi mata wode keehi daro asaa hayquwaappe denttana. Yesuusi ‘duufuwan deꞌiyaageeti duufuwaappe gaxi kiyiyo’ wodee yaanaagaa yootiis.—Yoh. 5:28, 29. w15 6/15 2:13, 14

Haymaanootiyaa kaalliyaanne saluwaa biidi Xoossaa sabbana giidi balan qoppiya issi issi asaagaappe dumma hanotan, Yihoowa Markkati ubbay ha wodiyan, ha saꞌan a sabbana koshshiyoogaa akeekoosona. Yaatiyoogan nuuni Mazamure 99:1-3, 5n odettida, Yihoowawu ammanettida ashkkaratu leemisuwaa kaalloos. He mazamuree yootiyoogaadan, Muusee, Aarooninne Sameeli bantta wode tumu goynuwawu kumetta wozanappe exatidosona. (Maz. 99:6, 7) Ayyaanan tiyettida Yesuusa ishatuppe attidaageeti saluwaa biidi qeese gididi haggaazanaappe kase, ha wodiyan ayyaana beeta maqidasiyawu saꞌaa dabaaban ammanettidi haggaazoosona. Miilooniyan qoodettiya ‘hara dorssati’ ammanettidi eta maaddoosona. (Yoh. 10:16) He naaꞌꞌu citan deꞌiyaageeti eta hidootay dumma dumma gidikkokka, Xoossaa tohoy yedhiyo ha saꞌan issippe Yihoowawu goynnoosona. Nuuni, ‘Yihooway tumu goynuwawu giigissidoban wozanappe hashetada oottiyaanaa?’ yaagidi nuna huuphiyan huuphiyan oychana koshshees. w15 7/15 1:4, 5

Yihoowawu goynniyaageeti ayyaanaa kaaletuwan xaafettida hiraagay polettanaagaa daro wodiyawu naagidosona. Isiyaasi geeshsha ayyaanay denttettin, Yihooway Ayhudata omooduwaappe eta biittawu zaaranaagaa kasetidi yootiis; qassi i, “A naagiyaageeti ubbati anjjettidaageeta” yaagiis. (Isi. 30:18) Yihooway qaalaa gelidobay polettanaagaa Mikiyaasikka naagiis; i, “Taani ufaissan GODAA xeellashshana” yaagiis. (Mik. 7:7) Masiyaa woy Kiristtoosa xeelliyaagan odettida hiraagati polettanaagaakka Xoossaa ashkkarati daro xeetu layttawu naagidosona. (Luq. 3:15; 1 PHe. 1:10-12) Masiyaabaa yootiya hiraagati haꞌꞌikka polettiiddi deꞌiyo gishshawu, Xoossaa ashkkarati ha wodiyankka naagoosona. Yihooway mata wode iitata xayssiyoogaaninne Seexaanay haariyo iita alamiyaappe ba asaa ashshiyoogan, Mase Kawotettaa baggaara asaa metuwaa qaarana. (1 Yoh. 5:19) Yaatiyo gishshawu, ha siraatay mati xayanaaga loytti akeekidi naagi uttoos. w15 8/15 2:1, 2

Yihooway azazin Israaꞌeelati gayttiyo dunkkaaniyaa keexxidosona. (Kes. 25:8) Guyyeppe, eti Yihoowayyo goynnanawu beeta maqidasiyaa keexxidosona. (1 Kaw. 8:27, 29) Ayhudati Baabiloona omooduwaappe simmidi, Ayhuda woosa keettan muletoo shiiqoosona. (Mar. 6:2; Yoh. 18:20; Oos. 15:21) Beni Kiristtaaneti gubaaꞌe shiiquwaa asaa son shiiqoosona. (Oos. 12:12; 1 Qor. 16:19) Ha wodiyan, Yihoowa asay kumetta saꞌan shaꞌan qoodettiya Kawotettaa Addaraashan tamaaranawunne goynuwawu shiiqees. Yesuusi Yerusalaamen deꞌiya Yihoowa beeta maqidasiyaa keehi siiqiyoonne nashshiyo gishshawu, Wonggeliyaa xaafee, hachi gallassa xiqisiyan deꞌiya hiraagay abaa qonccissiyoogaa yootiis. (Maz. 69:9) Yerusalaamen deꞌiya beeta maqidasiyaagaadan ‘Yihoowa keetta’ geetettana danddayiya Kawotettaa Addaraashay baawa. (2 Odi. 5:13; 33:4) Gidikkokka, ha wodiyan deꞌiya nu goyno sohuwaa goꞌettananne bonchana koshshiyo maaraa Geeshsha Maxaafay yootees. w15 7/15 4:1, 2

Kiristtoosa SHaꞌu Layttaa Haaruwaa wode, issoy issuwaara siiqettana danddayiyoo? Nuuni ha wodiyan coo atto giyaageetanne haratuura siga deꞌiyaageeta gidikko, he wode hegaadan deꞌanawu metootokko. (Qol. 3:12, 13) Ooratta alamiyan nuuni koyiyoobaa koyido wodiyan ubbatoo waayi demmana. He wode nuuni siiquwan haariya Yihoowawu haarettidi goꞌettiyo wode, ayba hanotankka nashshananne ufayttana koshshees. Yihooway ha wodiyan nuna tamaarissiyo eeshshay he wode nuuyyo deꞌana bessees. He wode deꞌanawu qoppiyoogaadan ha wodiyan deꞌiyoogan, meri merinawu nuussi koshshiya eeshshay deꞌiyoogeeta gidoos. Yaatiyoogan, ‘sinttappe yaana saꞌan’ deꞌanabaa mintti ammanoos. (Ibr. 2:5; 11:1) Qassi, he wode saꞌan deꞌana xillotettaa keehi yeemotti naagiyoogaa bessoosinne Xoossay ehaana ooratta alamiyan merinawu deꞌanawu giigettoos. w15 8/15 3:11, 12

Neeni kaꞌꞌida muuziyaa woy hegaa malabaa giyan dooriyo wode, ubbay issi mala gidennaagaa akeekaasa. Gidikkokka, eti ubbay kaꞌꞌidoogaa erissiya issi issibay deꞌees. Hegaadankka, kayma Kiristtaaneti zariyan, diccido hanotan, payyatettan, layttaaninne bantta deꞌuwan beꞌidoban issi mala gidennan aggana danddayoosona. Eeshshan woy wogan issoy issuwaappe dummatoosona. Gidikkokka, ayyaanaaban dicciya ubbaayyo eti kayma gidiyoogaa bessiya eeshshay deꞌees. He eeshshatuppe amaridaageeti awugeetee? Nuuni a “kaallana mala” Yesuusi nuussi leemiso gidiis; Yihoowawu haggaaziya kaymida asi i deꞌidoogaadan deꞌees. (1 PHe. 2:21) Yesuusi keehi koshshiyaaba giidobay aybee? Issi uri ba kumetta wozanaappe, ba kumetta shemppuwaappenne ba kumetta qofaappe Yihoowa siiqiyoogaanne ba shooruwaa ba huuphedan siiqiyoogaa. (Maa. 22:37-39) Kaymida Kiristtaanee he zoriyaadan deꞌanawu baaxetees. I Yihoowaara medhido dabbotaa kaseyiyoogaanne ba goꞌꞌaa aggibayidi harata siiqiyoogaa bessiya deꞌuwaa deꞌees. w15 9/15 1:3-5

Loꞌꞌo kahay nuna maaddiyoy iitabaa oottennaadan yootiyoogaa xallaana gidenna. I nuuni loꞌꞌo oosuwaa oottanaadan denttettees. He loꞌꞌo oosotuppe waannatiyaagee sooppe soo biidi markkattiyoogaanne haggaazuwaa kiyennan markkattiyoogaa. PHawuloosi hegaadan oottanaadan a kahay a denttettiis. I, “Wonggeliyaa mishiraachchuwaa yootennan aggikko, taassi aayye7ana” yaagiis. (1 Qor. 9:16) Nuuni aagaadan oottiyo wode, nuuni suurebaa oottiyoogaa nu kahay nuussi yootees. Qassi mishiraachuwaa yootiyoogan nuuni etawu yootiyo asatu kahaa denttettoos. Ee, kahay keehi maaddana danddayees. Nuuni Xoossaa Qaalaa ubbatoo loytti xannaꞌiyoogan, akeekidobaa wotti dentti qoppiyoogaaninne hegaadan deꞌanawu baaxetiyoogan nu kahaa loohissoos. Yaatiyo wode, kahay deꞌuwan nuna keehi maaddees! w15 9/15 2:16, 18

Geeshsha Maxaafay haratu ubbaagaappe aaruwan Yooseefabaa, Muusebaanne Daawitabaa loytti yootiyo asatuppe amaridaageeti eta. Paacee eta bolli gakkiyo wode ubban Yihooway etaara deꞌiyoogaanne i etan loytti goꞌettidoogaa nabbabiyo wode, Yihooway baayyo oottiyaageetuyyo qoppiyoogaanne i eta siiqiyoogaa kaseegaappe aaruwan akeekoos. Yihooway nuna seeriyoogee a siiquwaayyo hara macaraa akeekanaadan maaddees. Moorobaa oottidaageeta Yihooway seerin eti bantta nagaraappe simmiyo wode, ‘i etayyo coo atto gaana.’ (Isi. 55:7) Hegee woygiyoogee? Daawiti minttetiya qaalan Yihoowa maarotettaabaa hagaadan yootiis: “I ta nagaraa ubbaa atto gees; i ta harggiyaa ubbaappe tana pattees. I tana duufuwan gelennaadan ashshees; aggenna siiquwaaninne maarotan tana anjjees.” (Maz. 103:3, 4) Yihoowa zoreenne, ubba qassi a seeray i nuna siiqiyo zawi baynna siiquwaa qonccissiyoogaa akeekidi, ubbatoo a zoriyaa siyanawunne a seeraa eesuwan ekkanawu amottoos.— Maz. 30:5. w15 9/15 4:13, 14

Martta Yesuusi ufayttanaadan malꞌꞌiya qumaa kattiyoogaan bichaarawusu; qassi a Mayraami bolli yiillotaasu. Yesuusi Martta keehi darobaa oottanawu baaxetiyoogaa akeekidi, kehatettan, “Marttee, Marttee, neeni daroban hirggaasa; qassi tuggataasa” yaagiis. Yaagi simmidi koshshiyaabay issibaa gidiyoogaa i yootiis. Hegaappe simmidi, Mayraama i yootiyoobaa akeekan siyido gishshawu, Yesuusi o nashshiis. I, “Mairaama baappe ooninne ekkenna lo77obaa dooraasu” yaagiis. (Luq. 10:38-42) Mayraama he wode miido qumaa sohuwaara dogana danddayikkonne, Yesuusi o nashshidoogaanne a ayyaanaaban appe tamaaridobaa mule dogukku. Kiitettida Yohaannisi 60⁠ppe dariya layttaappe guyyiyan, ‘Yesuusi Marttonne i michiyo siiqees’ yaagiis. (Yoh. 11:5) Geeshsha ayyaanay kaalettin xaafettida ha qofay Martta Yesuusi zoridobaa ba wozanan wottada, ba deꞌo laytta ubban ammanettada Yihoowawu haggaazanawu baaxetidoogaa bessees. w15 10/15 3:3, 4

Yihooway ha wodiyankka asaa maaddiyoogaa nuuni ammananaadan oottiya darobay deꞌees. Ayyaanaaban Xoossay maaddanaadan issoti issoti waati woossidaakkonne waati maaduwaa demmidaakko bessiyaabaa darotoo siyida. (Maz. 53:2) Alani Pilippinssen issi guutta haruuruwan sooppe soo sabbakiyo wode, aara gayttida maccaasiyaa yeekkiyoogaa doommaasu. I hagaadan giis: “A banaara Yihoowa Markkati gayttanaadan he galla maallado Yihoowa woossaasu. Xoossay i woosaa eesuwan zaaridoogee a wozanappe garamettanaadan oottiis.” Issi laytta giddon, Yihoowayyo bana geppada xammaqettaasu. Xoossaa ashkkaratuppe daroti sijaaraa uyiyoogaa, jallissiyaabaa goꞌettiyoogaa woy pokkobaa beꞌiyoogaa mala amaliyaa agganaadan Xoossay banttana maaddidoogaa beꞌidosona. Issoti issoti hegaa banttarkka agganawu darotoo malikkonne, aggana danddayibeennaagaa yootoosona. SHin, eti Yihooway banttana maaddanaadan woossido wode, i ‘ubbaappe aadhiya wolqqaa’ immin, metiyaabaa xoonidosona.—Maz. 37:23,24. w15 10/15 1:10, 11

Issoti issoti nabbabanawu, wotti dentti qoppanawunne woossanawu guuran denddoosona. Harati qassi laaxaa saatiyan hegaadan oottoosona. Omarssi woy xiskkanaappe kase hegaadan oottiyoogee neeyyo injjetana danddayees. Issoti issoti maalladonne xiskkanaappe kase Geeshsha Maxaafaa nabbabiyoogan ufayttoosona. Yaatiyoogan, eti “gallassinne qammi” woy ubbatoo Geeshsha Maxaafaa nabbaboosona. (Yaas. 1:8) Waannabay daro koshshennabawu goꞌettiyo wodiyaappe amaridaagaa Xoossaa Qaalaa galla galla wotti dentti qoppanawu bazziyoogaa. Geeshsha Maxaafaa qofaa wotti dentti qoppiyaanne tamaaridobaa oosuwan peeshshanawu baaxetiya ubbay anjjettanaagaa Xoossaa Qaalay darotoo yootees. (Maz. 1:1-3) Yesuusi, “Anjjettidaageeti Xoossaa qaalaa siyidi, he qaalai azaziyoogaadan oottiyaageeta” yaagiis. (Luq. 11:28) Ubbabaappe aaruwan, ubba gallassi ayyaanaabaa wotti dentti qoppiyoogee maalaalissiya nu guuggiyaa Medhidaagaa bonchissanawu maaddees; qassi ha wodiyan ufayttanaadan oottiyoogaaninne i ehaana xillotettay kumido ooratta alamiyan merinawu deꞌanaadan oottiyoogan i nuna anjjana.—Yaaq. 1:25; Ajj. 1:3. w15 10/15 4:17, 18

Yesuusi hayqqenna mala baassi qoppanaadan kiitettida PHeexiroosi a zoridoy awu qarettido gishshataassa. Gidoppe attin, PHeexiroosi bala qofaa qoppidi zoridoogaa Yesuusi akeekiis. Yesuusi anne erissiyo ashkkarata harata maaddanawu mintti zoriis, issi uri bana ashshanawu koyiyoogee kaalettiyoobaa yootiis, qassi ba goꞌꞌaa aggibayiyoogee demissiyo anjjuwaa qonccissiis. (Maa. 16:21-27) PHeexiroosi zaarettidi hegaadan qoppibeenna. (1 PHe. 2:20, 21) Intte yelaga naꞌaa maaddana koshshiyoobaa shaakki eranaadan Yihooway akeekaa intteyyo immana mala woossite. (Maz. 32:8) Leemisuwawu, intte naꞌaa ammanoy shuggidoogaa bessana danddayiyaabay aybee? I kaseegaa keena ufayttennan aggana, ba mala Kiristtaaneta borana, woy ba wozanan deꞌiyaabaa intteyyo yootennan aggana danddayees. Hegee i qosan iita nagaraa oottiiddi deꞌiyoogaa bessees giidi eesuwan kuuyoppite. Qassi, hegaa mala malaataa xaasayidi xeelloppite, woy intte yelaga naꞌay guuttaa takkidi boorasiyoogaa aggana giidi qoppoppite. w15 11/15 2:12, 13

Yesuusi, “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagido gishshawu, Yihoowa ashkkaratu giddon tumu siiqoynne issippetettay deꞌiyoogee eti tumu haymaanootiyaa kaalliyoogaa erissees. (Yoh. 13:34, 35) Kiitettida Yohaannisi qassi hagaadan giis: “Xoossaa naatu giddooninne xalahe halaqaa naatu giddon de7iya dummatettai hagan erettees; xillobaa oottenna urai woikko ba ishaa siiqenna urai ooninne Xoossaa Na7a gidenna. Aissi giikko, koiroosappe intte siyido kiitai, ‘Issoi issuwaara siiqettanau bessees’ yaagiyaagaa.” (1 Yoh. 3:10, 11) Maalaalissiya issippetettay deꞌanaadan oottiya siiqoy Xoossay i saꞌa ubban Kawotettaa mishiraachoy odettanaadan halchidobaa polanawu goꞌettiyo, Kiristtoosa tumuppe kaalliyaageeti Yihoowa Markkata gidiyoogaa bessees.—Maa. 24:14. w15 11/15 4:10, 11

Wogaynne haymaanootee dumma dumma gidiyo wode, nuuni haasayanawu bessiya wodiyaa akeekan doorana koshshiyoogee qoncce. Qassi haasayana bessiya wodiyaa darotoo akeekana koshshiyoogee qoncce. Leemisuwawu, issi uri nuuyyo qoppidi haasayidobay nuna hanqqetissiyaabaa gidana danddayees. Hegee nuuni zaarana bessiya yohokkonne akeekan qoppiyoogee loꞌꞌo. Zaarana koshshikko, ufayssennabaa haasayennaadan, hanqqetti uttidi haasayana bessenna. (Lee. 15:28) Hegaadan, ammanenna nu so asawu Geeshsha Maxaafaabaa awude yootana bessiyaakko akeekana koshshees. Eti Yihoowa eranaadan nuuni koyikkokka, danddayanchanne akeekancha gidana bessees. Haasayana bessiya wodiyan minttettiyaabaa yootiyoogee eti wozanappe siyanaadan maaddana danddayees. w15 12/15 3:6, 8, 9

Akkamuwaara woy xalettiyoobaara gayttidaban yootiyoobay oorattaba woy xuuraba milatiyo wode, ‘nu huuphiyaa naagiyoogee’ woykko loytti qoppiyoogee keehi koshshiyaaba. Hegaa oottiya woy zoriya uri hegee waatidi maaddiyaakko loytti qonccissana danddayii? Hegee tuma gididabaara maayettiyaabee, qassi eranchati daroti hegaa maaddiyaabadan xeelliyoonaa? (Lee. 22:29) Woy qassi odiyo waannabay asaa ufayssanawu halchidobee? Hegee ha wodiyan pilgganawu geema gididabadan, beni wode woy keehi haahosan beettidabadan odettana danddayees. Hegaa mala odoy issibay tuma gidiyoogaa, ubba qassi hananaba milatiyoogaa bessii? Maramariyo issi issi miishshay woy issi issi xalee ‘xuurabaa’ woy erettenna wolqqaa goꞌettiyoobadan odettees. ‘SHareechennaadaaninne’ iita ayyaanaa wolqqaa goꞌettennaadan Xoossay yootido gishshawu, hegee keehi naagettana koshshiyaaba.—Wog. 19:26; Zaa. 18:10-12. w15 12/15 4:16

Geeshsha Maxaafay, ammanettida daro asati geeshsha ayyaanaa ekkidoogaa yootees; shin eti saluwan deꞌanawu hidootan naagibookkona. Hegeetuppe issoy Xammaqiya Yohaannisa. Yesuusi Yohaannisa keehippe nashshiis; shin saluwaa Kawotettaa laattiyaageetu giddon i baynnaagaa yootiis. Daawitakka geeshsha ayyaanay kaalettiis. (1 Sam. 16:13) Geeshsha ayyaanay, i Yihoowaabaa cimma qofaa akeekanaadaaninne Xoossaa Qaalan deꞌiya qofaappe amaridaagaa xaafanaadankka maaddiis. (Mar. 12:36) Gidikkokka, Daawiti ‘saluwaa kiyibeennaagaa’ PHeexiroosi PHenxxaqosxxe gallassi yootiis. (Oos. 2:35) Ha asati geeshsha ayyaanan maalaalissiyaabaa oottidaba gidikkokka, eti saluwaa deꞌuwawu doorettidoogaa geeshsha ayyaanay etawu markkattibeenna. Hegee eti saluwan deꞌanawu doorettiya asatuugaa keenaa ammanettibookkona giyoogaa gidenna. Gidikkokka, eti gannate gidana saꞌan deꞌana mala Yihooway eta hayquwaappe denttana.—Yoh. 5:28, 29; Oos. 24:15. w16.01 3:16

Nuuni siiqiyo asatuura oottiyo wode, etakko shiiqoos; qassi etanne eta eeshshaa loytti eroos. Eti halchidobaa, qassi hegaa polanawu waani baaxetiyaakko akeekoos. Yesuusi Yihoowaara geella daro biilooniyan qoodettiya layttawu issippe oottido gishshawu, eti naaꞌꞌay keehi siiqettoosona; qassi eta dabbotaa aybinne moorana danddayenna. Eti ubbatoo maayettidi issippe oottiyo gishshawu, eta issippetettay keehi mino. Yesuusi ba erissiyo ashkkarata ba Aaway Yihooway naaganaadan woossiis. Aybissi? I, “Neeninne taani issuwaa gidiyoogaadan, eti issuwaa gidana mala” yaagidi woossiis. (Yoh. 17:11) Nuuni Xoossay kessido maaraara maayiya ogiyan deꞌiyo wodenne sabbakiyo oosuwaa minnidi oottiyo wode, ufayssiya a eeshshata loytti eroos. Qassi an ammanettiyoogeenne a kaaletuwaa kaalliyoogee loꞌꞌo gidiyoy aybissakko akeekoos. Nuuni Xoossaakko shiiqiyo wode ikka nuukko shiiqees. (Yaaq. 4:8) Nuna metiyaabay, ufayssiyaabaynne nuuni halchiyoobay nu ishanttuugaaranne michonttuugaara issi mala gidiyo gishshawu, etakkokka shiiqoos. w16.01 5:9, 10

Naaꞌooma qassi ba biitti Israaꞌeela simmanawu murttaasu. Iira deꞌiya Uruta keehi koshshiyaabaa kuuyana. A Mooꞌaaba biittan deꞌiya bantta soo asaakko simmiyoogaappe woy ba bollotee Naaꞌoomiira Beetaliheema biyoogaappe issuwaa doorana danddayawusu. (Uru. 1:1-8, 14) Uruta baassi koshshiyaabaa kunttiya so asay, i aayyiyaanne hara dabboti deꞌiyo Mooꞌaaba biitti baanawu qoppana danddayaasu shin. Mooꞌaabi a yelettido biitta. A eriyoy he biittaa wogaa, qaalaanne asaa. Uruta hegaa malabaa Beetaliheemen demmanaagaa Naaꞌooma qaalaa gelana danddayukku. Uruta Mooꞌaaba biittan deꞌanaadan a zoraasu. Naaꞌooma ba naꞌaa machiyaa keetta woy azina demmanaagaa siraasu. Uruta waataneeshsha? ‘Ba asaakkonne ba xoossatukko simmida’ Orppi hanotay Urutigaappe keehi dummatiyoogaa akeeka. (Uru. 1:9-15) Uruta ba asaakkonne eta xoossatukko simmanawu koyadee? CHii, koyabeykku. w16.02 2:4, 5

Sakkana xuman, Daawitinne Abishaayi xiskkida 3,000 wotaaddaratu giddo loddan gelidosona. Eti kambbiyaa giddon wolqqaama xiskkuwaa xiskkida Kawuwaa Saaꞌoola demmidosona. I Daawita demmidi woranawu Yihudaa bazzuwaa biis. Abishaayi Daawitayyo, “Taani ta tooran [Saaꞌoola] issitoo biittaara gattada sikkais; taani a naa77utoo caddanau koshshenna” yaagidi saasukkidi yootiis. Daawita zaaroy garamissiyaaba! I, “Neeni a woroppa; GODAI tiyido kawuwaa bolli ba kushiyaa denttiya oonanne GODAI qaxxayana. . . . GODAI tiyido kawuwaa bolli taani kushiyaa denttennaadan tana GODAI teqqo” yaagiis! (1 Sam. 26:8-12) Daawiti Xoossaayyo ammanettana bessiyoogaa akeekiis. I Saaꞌoola woranawu mule koyibeenna. Ayssi? Saaꞌooli Israaꞌeela bolli kawo gidanaadan tiyiday Xoossaa gidiyo gishshataassa. Yihoowayyo ammanettida ashkkaraati i sunttidoogeeta bonchoosona. Yihooway ba asay ubbay ‘aggenna siiquwaa bessanaadan’ woy ammanettanaadan koyees. w16.02 4:1, 2

Neeni xammaqettanawu qoppiya yelagee? Yaanikko, ay asinne demmiyo maatappe keehi aadhiya maataa demmaasa. SHin, xinqqatee xoqqu oottidi xeellana bessiyaaba. Xinqqatee neeni ne huuphiyaa geppidoogaa, hegeekka, ne deꞌuwan hara aybippenne kaseyada merinawu a sheniyaa oottanawu Yihoowawu qaalaa gelidoogaa bessiyaaba. Neeni xammaqettanawu wozanappe koyiyoonne ba huuphiyaa geppiyoogaa birshshettaa akeekiyo, qassi xammaqettanawu kuuyana danddayiyo wodiyan xammaqettana bessiyoogee tuma. Xammaqettanawu giigettidaakkonne neeni sirikko shin? Woy neeni xammaqettanawu koyikkonne, neeni gasttanne akeekancha gidana gakkanaassi takkana koshshiyaabadan nena yelidaageeti qoppikko shin? He naaꞌꞌu hanotankka hidootaa qanxxoppa. SHin, daro takkennan xammaqettanawu ayyaanaaban diccanawu baaxeta. w16.03 2:1, 2

Xoossawu haggaaziyaageetuppe issoti issoti aqo oyqqi simmidi tumaa siyidosona; qassi eta aqo laggee Yihoowa Markka gidenna. Gidikkokka, Geeshsha Maxaafaa maaraa kaalliyoogee so asay issippetettan deꞌanaadan maaddees. Yaatiyo wode, ammaniyoobaa mintti oyqqidi, danddayettida ubban hashetidi oottana koshshees. Hegee metana danddayees, shin demmana danddayiyo anjjuwaa qoppite. Qassi Seexaanay ha wodiyan so asaa keehi qohiyo gishshawu, Xoossawu oottiya ubbay bantta aqo deꞌuwan ubbatoo hashetidi oottana bessees. Intte aqo oyqqidi ay keenaa takkikkokka, intte aqo deꞌuwaa minttanawu woygana woy waatana danddayiyaakko qoppite. Hegaara gayttidaagan, gasttati gubaaꞌiyan deꞌiya yelagata maaddana danddayoosona. Issi issitoo, neeninne ne machiyaa intte so asaa goynuwaa wode yelaga aqo laggeta shoobbana danddayeeta. He yelagati inttenaara takkiyo wodiyan, aqo deꞌuwan ay keena gamꞌꞌikkokka siiqoynne issippetettay keehi koshshiyaaba gidiyoogaa akeekana danddayoosona.—Tii. 2:3-7. w16.03 3:14, 15