Uddufune

Yofttaahee Israaꞌeelata Amoonatu huqqunnaappe kessanawu Xoossaa maadoy bawu koshshiyoogaa akeekiis. Yofttaahee i xoonanaadan Yihooway maaddikko, i olaappe soo simmiyo wode a mokkanawu koyro kiyiya oonanne Yihoowawu “xuuggiyo yarshsho” oottidi immanawu qaalaa geliis. (Daan. 11:30, 31) I oottanawu qaalaa gelidobay aybee? Asa yarshshanawu woriyoogee Yihooway shenetiyooba. Yaatiyo gishshawu, Yofttaahee yarshshanawu asa woranawu koyibeennaagee qoncce. (Zaa. 18:9, 10) Muuse Higgiyan, xuuggiyo yarshshoy muleera Yihoowawu imettiyaaba; hegaa gishshawu, Yofttaahee he uri Xoossaabaa xallaa oottanaadan immanawu koyiis. I he uri gayttiyo dunkkaaniyan ubbatoo oottanaadan qaalaa geliis. Yihooway Yofttaahee oychidobaa siyidi, i gita xoono xoonanaadan oottidi a anjjiis. (Daan. 11:32) Yofttaahee olaappe simmiyo wode a mokkanawu koyro kiyidaara i siiqiyo a mexi issi naꞌiyo! Yaatin Yofttaahee ba gelido qaalaa polanee? w16.04 1:11-13

Amarida layttaappe kase, gubaaꞌiyaa Geeshsha Maxaafaa Xinaatiyan Xoossaappe Yiya Mishiraachuwaa! giyo broshuriyaa xannaꞌido wode Yihoowa eeshshaabaa xannaꞌidoogee, qassi ne ishanttinne michontti wozanappe yootido qofay saluwan deꞌiya ne Aawaa neeni mintta siiqanaadan oottibeennee? Haasayaanne Geeshsha Maxaafaa nabbabiyoogaa siyiyo wode, qassi ootti besuwaa beꞌiyo wodekka Xoossaa Qaalaa kaseegaappe aaruwan akeekoos. Gubaaꞌe shiiqoy Geeshsha Maxaafaa maaraa nu deꞌuwan ubbaban oosuwan peeshshanaadan tamaarissees. (1 Tas. 4:9, 10) Leemisuwawu, Wochiyo Keelaa Xinaatee Xoossaa asaa keehi maaddees. Wochiyo Keelaa Xinaatee Yihoowayyo kaseegaappe loytta oottanawu qoppanaadan, ne ishanttuyyo atto gaanaadan, woy qassi kaseegaappe loytta woossanaadan nena denttettidee? Saaminttawu gidduwan shiiqiyo shiiqoy haggaazuwawu nuna loohissees. Mishiraachuwaa waati loytti yootanaakkonne Geeshsha Maxaafaa maaraa waati loytti tamaarissanaakko he shiiquwan tamaaroos.—Maa. 28:19, 20. w16.04 3:4, 5

Walaqettida asatubaa Geeshsha Maxaafay yootiyoobaa qoppa eray? Doomettaabaa maxaafan koyro heeran deꞌiya amarida shemppota akeeka. Qaayeeli Aabeela woriis (Doo. 4:3-8); Laameeki bana shocida issi yelagaa woriis (Doo. 4:23); Abrahaama (Abraama) wudiyaanne Looxe wudiyaa heemmiyaageeti ooyettidosona (Doo. 13:5-7); Aggaara Saaro (Saarayo) karaasu; yaatin Saara Abrahaama bolli yiillotaasu (Doo. 16:3-6); Isimaaꞌeeli asa ubbaara eqettiis; qassi asa ubbaykka aara eqettiis. (Doo. 16:12) He ooshshaabay Geeshsha Maxaafan odettidoy aybissee? Issi gaasoy, hegee nagarancha asay issoy issuwaara saruwan deꞌana koshshiyoy aybissakko akeekanaadan maaddiyoogaa. Hegee nuuni saruwan waani deꞌanaakkokka bessees. Banttana metidabaa xoonanawu baaxetida asatubaa yootiya taarikiyaa Geeshsha Maxaafaappe nabbabiyoogee nuna keehi maaddees. Eti baaxetidi demmidobaa akeekoos; qassi hegee issi issibay nuna gakkiyo wode maaddana danddayees. Ha ubbabay, etaagaa malabay gakkiyo wode nuuni oottana koshshiyaabaanne koshshennabaa akeekanawu maaddees. w16.05 1:1, 2

Yesuusinne i erissiyo ashkkarati mishiraachuwaa ayba ogetun yootidonaa? Eti asay deꞌiyoosaa awanne biidi leemisuwawu, ogiyaaninne giyan sabbakidosona. Eti sooppe soo biyoogankka, mishiraachuwaa siyiya asaa koyidosona. (Maa. 10:11; Luq. 8:1; Oos. 5:42; 20:20) Hegaadan oottiyoogee asa asappe shaakkennaagaa bessiyaaba. Yihoowa Markkatu taarikee ay bessii? Yesuusi 1914⁠ppe doommidi Kawo gididi haariyoogaa yootiyaageeti eta xalaala. Yesuusi azazidoogaadan mishiraachuwaa yootiyoogaa eti aybippenne kaseyoosona. Pilars of Feyz—Amerikan Kongrigeeshins end Zeyr Partners giyo maxaafay, “Yihoowa Markkati . . . banttawu waanna oosoy alamiyaa xayoy matattidoogaanne atotettay keehi koshshiyoogaa yootiyoogaa gidiyoogaa mule dogokkona” giidi qonccissiis. Yihoowa Markkati Yesuusinne i erissiyo ashkkarati yootido ogetun he mishiraachuwaa yootiiddi deꞌoosona. w16.05 2:10, 12

Nu kuuyiyoobay Yihoowa qofaara maayiyo wode, kaseegaappe aaruwan aakko shiiqoos. (Yaaq. 4:8) Yaatiyo wode a ufayssoosinne a anjjuwaa demmoos. Hegee qassi saluwan deꞌiya nu Aawaa mintti ammananaadan maaddees. Hegaa gishshawu, Geeshsha Maxaafaa higgiyaanne maaraa kaalliyaageeta gidoos; ayssi giikko, hegeeti Xoossaa qofaa qonccissoosona. Nuuni Yihoowaabaa ubba wode oorattabaa tamaaranaagee qoncce. (Iyy. 26:14) SHin minnidi xannaꞌiyoogan loꞌꞌobaa kuuyanawu maaddiya aadhida eratettaa, eraanne akeekaa haꞌꞌikka demmana danddayoos. (Lee. 2:1-5) Nagarancha gidida asi qoppiyoobaynne halchiyoobay laamettiyaaba; shin Yihooway mule laamettenna. Mazamuraawee, “GODAA halchchoi merinaassi eqqidi de7ees; a wozanaa qofaikka yeleta ubbaa gakkanau de7ees” yaagiis. (Maz. 33:11) Nuuni qoppiyoobaynne kuuyiyoobay ubbaappe aadhiya erancha Xoossaa Yihoowa qofaara maayiyo wode keehi loꞌꞌobaa kuuyana danddayiyoogee erettidaagaa. w16.05 3:17

Yihooway asaa wozanaa qoridi i dooridoogeeta baakko shiishshana danddayiyoogaa ammaniyoogee nu moottankka gubaaꞌiyankka haratu bolli pirddennaadan naagettana mala maaddees. (Yoh. 6:44) Yihooway nuna urqqa miishshadan medhiyoogaa akeekiyoogee nuuni nu mala Kiristtaaneta xeelliyo hanotaakka laammanaadan oottees. (Isi. 64:8) Xoossaagaadan, neenikka ne ishanttanne michontta makkisidi giigissido miishshadan gidennan, biron giigissiiddi deꞌiyo miishshadan xeellay? Xoossay issi ura wozanaa, qassi i giigissin he uri ay mala asa gidanaakko akeekana danddayees. Hegaa gishshawu, Yihooway asaa balaa gidennan, eta loꞌꞌo eeshshaa xeellees. (Maz. 130:3) Nuunikka a ashkkaratu loꞌꞌo eeshshaa xeelliyoogan a milatana danddayoos. Nu ishanttinne michontti ayyaanaaban diccanawu baaxetiyo wode eta maaddiyoogan nuna urqqa miishshadan medhiyaagaara issippe oottoos. (1 Tas. 5:14, 15) Cimati “imota” gidiyo gishshawu, hegaara gayttidaagan sintta xeera gidana bessees.—Efi. 4:8, 11-13. w16.06 1:4-6

Mishiraachuwaa haratuyyo yootiyoogee nuuni nu huuphiyaa kawushshanaadaaninne Xoossaa ayyaanaa ayfiyaa daro macarati nuussi deꞌanaadan maaddana danddayees. (Gal. 5:22, 23) Hegaa bollikka, nuuyyo Kiristtoosaagaa mala eeshshay deꞌiyoogee nuuni yootiyooban asay ufayttanaadan oottees; hegee issi issi asay ba qofaa laammanaadan maaddana danddayees. Leemisuwawu, Awusttiraaliyan naaꞌꞌu Yihoowa Markkati issi maccaasiyaa ufayssennabaa haasayishin bonchuwan siyidosona. SHin guyyeppe, a zilꞌꞌettada macara biiruwawu dabddaabbiyaa xaafaasu. A hagaadan gaasu: “Tana keehi daro xillodan xeellidonne axiraarido gishshawu, danddayanchanne ashkke gidida he naaꞌꞌu asati tana maaranaadan koyays. Xoossaa Qaalaa yootiya he naaꞌꞌu asata hegaadan yedettiyoogee eeyyatetta gidiyoogaa akeekaas.” Aassiya he asati guuttaakkonne yiillotidaba gidiyaakko he maccaasiyaa hegaadan gaada xaafanee? Waaya xaafana. Ee, haggaazoy nunakka nu shoorotakka keehi maaddees! w16.06 2:12, 13

Nuuni ubbay yelettoosappe doommidi nagarancha. (Roo. 5:12, 19) Hegaa gishshawu, gubaaꞌiyan deꞌiya issoti issoti nuna qohiyaabaa issi issitoo haasayana woy oottana danddayoosona. Hegee nuuni Yihoowanne a asaa siiqiyaakko siiqennaakko paaccana danddayees. Hegaa mala hanotan nuuni ay oottanee? Leemisuwawu, Qeese Ubbatu Halaqaa Eelayyo Yihoowa higgiyawu azazettenna naaꞌꞌu attuma naati deꞌoosona. Geeshsha Maxaafay, “Eela attuma naati iita asata; eti GODAA erokkona” yaagees. (1 Sam. 2:12) Eta aaway tumu goynuwaara gayttidabaa minni oottikkokka, a naaꞌꞌu naati keehi gita nagaraa oottidosona. Eeli hanidabaa eriyo gishshawu ba naata seerana bessees; shin i eta mintti seeribeenna. Hegaappe denddidaagan, Xoossay Eela so asaa bolli pirddiis. (1 Sam. 3:10-14) Guyyeppe, a zerettaappe ooninne qeese ubbatu halaqa gidenna. Neeni Eela wode deꞌiyaakko, i ba naatu nagaraa coꞌꞌu giidi xeelliyo wode ne waananee? Neeni he hanotan xubettada Xoossawu oottiyoogaa aggabayuutee? w16.06 4:5, 6

Yesuusi hegaadan giidoy aybissee? Hegaappe kasetiya payduwan i, “He ubbai inttena koshshiyoogaa saluwan de7iya intte Aawai erees” yaagiis; he ubbabay geetettidabay nu deꞌuwawu koshshiyaabaa. Nuussi koshshiya qumaa, maayuwaanne keettaa malabaa nuuni qoppanaappe kasekka Yihooway erees. (Pili. 4:19) Nu maayuwaappe koyro wuranay awugaakko i erees. I nuuni maana koshshiyaabaa, qassi nu so asawu deꞌiyoosay koshshiyoogaa erees. Yihooway tumuppe nuussi koshshiyaabaa nuuni demmanaadan oottees. Nu deꞌuwan ayyaanaabaa kaseyiyoogan nuuppe koyettiyaabaa oottikko, Yihooway nuuyyo loꞌꞌobaa diggennaagaa ubbatoo ammanettoos. “Xoossaa milatiyoogee” “miyoobainne maayiyoobai” nuussi gidana giidi deꞌanaadan denttettana koshshees.—1 Xim. 6:6-8. w16.07 1:17, 18

Hegaadan sigettiyoogee Xoossaara saruwan deꞌanaadan oottees. PHawuloosi he gita maatay Yihoowa aaro kehatettaara gayttidaba gidiyoogaa hagaadan giidi qonccissiis: “Nuuni [ayyaanan tiyettida Kiristtoosa ishantti] ammanuwan xillidoogan, nu Godaa Yesuus Kiristtoosa baggaara nuuyyo Xoossaara sarotettai de7ees; qassi i nuna ha77i nuuni de7iyo Xoossaa aaro kehatettaa giddo ammanuwan ehiis.” (Roo. 5:1, 2) Hegee tumakka gita anjjo! Nuuni ubbay nagarancha. SHin “eranchchati,” woy tiyettidaageetuppe attidaageeti ‘darota xillotettaa ogiyaa kaalettanaagaa’ hananabaa yootiya Daaneeli kasetidi yootiis. (Dane. 12:3) Eti sabbakiyoonne tamaarissiyo oosuwan miilooniyan qoodettiya ‘hara dorssati’ Yihoowa sinttan xillo gididi qoodettanaadan oottidosona. (Yoh. 10:16) Gidikkokka, hagee ubbay hanana danddayidoy Yihoowa aaro kehatettaana.—Roo. 3:23, 24. w16.07 3:10, 11

Kiitanchati ashuwaa maayidi bessenna hanotan maccaasaa hegaadan machin, Nefiliime geetettiya wolqqaama iita naati yelettidosona. Hegaa bollikka, ‘he wode saꞌaa bollan deꞌiya asaa iitatettay dariis.’ (Doo. 6:1-5) Yihooway Nohe wode Bashshaa Haattan iita asaa xayssiis. Asay he wode, aqo oyqqiyoogaa gujjin, ubba galla oottiyoobawu bichaariyo gishshawu, “xillotettaabaa yootida” Nohee bashshay matattidoogaa odin asay wozanan wottibeenna. (2 PHe. 2:5) Yesuusi he wodiyaa hanotaa ha wodiyan nuuni beꞌanabaara geeddarssiis. (Maa. 24:37-39) Ha iita alamee xayanaappe kase, ubba asawu markka gidana mala kumetta saꞌan odettiiddi deꞌiya Xoossaa Kawotettaa mishiraachuwaa ha wodiyan daro asay siyenna. Aqo oyqqiyoogaanne naata dichiyoogaa mala so asaa allaallee Yihoowa gallassay eesoyiyaaba gidiyoogaa nuuni doganaadan oottenna mala akeekancha gidana koshshees. w16.08 1:8, 9

Nuuni ‘wurssetta gallassay’ wuranawu matido wodiyan deꞌiyo gishshawu, genccanawu ‘wayssiya’ wode gidiis. (2 Xim. 3:1-5) Gidoppe attin, ayyaanaaban minnidi deꞌiyoogee ha alamiyaa qohuwaa eqettanawu keehi maaddees. Hachi gallassa xiqisiyan PHawuloosi yootido qofay aqo oyqqidaageeti aqo deꞌuwan bantta aawatettaa aggibayana koshshees giidoogaa bessenna. SHin eti wodee wuridoogaa akeekidi, ayyaanaabaa sinttayana bessees. (Maa. 6:33) Ha wayssiya wodiyan daro aqo deꞌoy laalettiyoogaa beꞌoos. Nu aqo deꞌoy giiganne ufayssiyaagaa gidana danddayii? Nuuni Yihoowakkonne a asaakko shiiqikko, Geeshsha Maxaafaa maaraa oosuwan peeshshikko, qassi Yihoowa ayyaanaa kaaletuwaa kaallikko, ee danddayees. Nuuni yaatiyo wode, “Xoossai issippe gattidoogaa” bonchoos.—Mar. 10:9. w16.08 2:17, 18

Gubaaꞌiyan keehi daro cimati koshshoosona; qassi he oosuwaa sinttappe oottanaageeta ubbatoo loohissana koshshees. PHawuloosi Ximootiyoosawu hagaadan giis, “Daro markkati de7iyoosan taappe neeni siyido yohota harata tamaarissanau danddayiya ammanettida asatuyyo hadaraa imma.” (2 Xim. 2:1, 2) Ximootiyoosi cimida PHawuloosaara issippe haggaaziyoogan tamaariis. Ximootiyoosi ba haggaazuwaaninne geeshsha goynuwaa goynniyo hara ogetun PHawuloosi tamaarissidoogaadan oottiis. (2 Xim. 3:10-12) PHawuloosi Ximootiyoosa loytti loohissiis. I he yelagaa banaara efiis. (Oos. 16:1-5) Cimati heemmanawu biyo wode gubaaꞌiyawu oottiyaageeta efaana bessikko efiyoogan, PHawuloosa leemisuwaa kaallana danddayoosona. Yaatiyoogan, gubaaꞌiyawu oottiyaageeti waati tamaarissanaakko, waanidi danddayanchanne siiqiyaageeta gidanaakko, qassi a dorssaa wudiyaa heemmiyo wode Yihoowan waani ammanettanaakko cimatuppe tamaarana. Sinttappe “Xoossaa dorssaa wudiyaa” heemmanaageeta loohissanawu hegaadan oottiyoogee maaddees. w16.08 4:16, 17

Hidootaa qanxxida woy yibbaatida uraa hanotaa Geeshsha Maxaafay issi issitoo arggaacida kushiyaara geeddarssees. (2 Odi. 15:7; Ibr. 12:12) Issi uri hegaa mala hanotan issibaa yeggi bayiyoogee wottin deꞌiyaaba. Seexaanaa alamiyan nuuni hirgganaadaaninne hidootaa qanxxanaadan oottana danddayiya keehi metiya darobay gakkiyoogee azzanttiyaaba. Hegee markkabee qaaxxennaadan oyqqiya birataa mala gidana danddayees. (Lee. 12:25) Nena hegaadan oottana danddayiyaabay aybee? Neeni siiqiyo uri hayqqin danddayanawu, wolqqaama sahoy sakkishin genccanawu, deꞌoy metiyo ha wodiyan so asawu koshshiyaabaa kunttanawu woy yedetay gakkishin genccanawu baaxetaydda deꞌana danddayaasa. Hegee neeni unꞌꞌettanaadan oottidi guyyeppe ne wolqqaa wurssana danddayees. Ubba qassi hegee neeni ufayttiyoogaa agganaadan oottana danddayees. SHin Xoossay nena maaddanaagaa ammanettana danddayaasa.—Isi. 41:10, 13. w16.09 1:2, 4

Nuuni nagarancha gidiyo gishshawu, issi issi iita amuwaa agganawu baaxetana danddayoos. Harati haggaazuwaabaa ubbatoo loꞌꞌobaa qoppanawu baaxetoosona. Woy qassi neeni sahettiyaaba woy boorasiyaaba gidikkokka, genccana koshshennan waayi aggana. Issi uri bana hanqqetissida woy qohida urawu atto gaanawu baaxetiyoogaakka nuuni akeekana koshshees. Nuuni Yihoowawu ay keena wodiyaa haggaazikkonne, ammanettidaageeta anjjiya Xoossawu haggaaziyoogaa agganaadan oottana danddayiyaabata eqettana koshshees. Iita amoy nena guuttaa qohiyoogaa akeekikko, Xoossay geeshsha ayyaanaa neeyyo immanaadan woossa. Woosaynne geeshsha ayyaanay neeni Yihoowa anjjuwaa demmana danddayiyoogaa eriyo suure ogiyaa kaallanaadan neessi wolqqaa immana danddayees. Ne woosaara maayettiyaabaa ootta. Galla galla Geeshsha Maxaafaappe amaridaagaa nabbaba, qassi buzo xinaatiyawunne So Asaa Goynuwawu wodiyaa bazza.—Maz. 119:32. w16.09 2:10, 11

Issi uri neeyyo hagaadan gaana danddayees: “Saynttistteti lodda laamee tuma giyo gishshawu taani hegaa ammanays. Xoossaa ooninne beꞌibeenna gishshawu neeni an waata ammanana danddayay?” Daroti hegaadan qoppoosona. Xoossaa woy qassi issibay merettishin nuuppe ooninne beꞌibeenna. (Yoh. 1:18) Deꞌuwan deꞌiya issibay harabawu laamettishin saynttistte gidin woy hara asi ooninne beꞌibeenna. Leemisuwawu, geleshshoy laamettidi asa gidishin ooninne beꞌibeenna. (Iyy. 38:1, 4) Yaatiyo gishshawu, nuuni ubbay naqaashaa loytti qorananne yuushshi qoppidi loꞌꞌobaa kuuyana bessees. Meretaa xeelliyaagan, kiitettida PHawuloosi hagaadan giis: “Beettenna [Xoossaa] hanotai hegeekka a merinaa wolqqainne a Xoossatettai issippe Xoossai ha sa7aa medhdhoosappe doommidi, etau qonccidi beettiis; eti hegaa Xoossai medhdhidobaappe be7anau danddayiyo gishshau, etau gaasoyiyoobi baawa.”—Roo. 1:20. w16.09 4:4

Israaꞌeelan deꞌiya hara biittaa asati cakkiyaageeti aggido poshiluwaa qoranaadan oottiyoogan, Yihooway etawu koshshiyaabaa siiquwan giigissiis. (Wog. 19:9, 10) Yihooway Israaꞌeelati hara biitta asaa bonchanaadan azaziyoogaappe, etawu qarettanaadan yootiis. (Kes. 23:9) Eti “bete gidiyoogee aiba azzanttiyaabaakko” eroosona. Gibxxeti bantta zariyan ceeqettiyo gishshawu woy haymaanootiyaa ixxiyo gishshawu, Ibraaweti aylle gidanaappe kasekka eta lagennan aggokkona. (Doo. 43:32; 46:34; Kes. 1:11-14) Israaꞌeelati hara biittan deꞌiyo wode tugga deꞌo deꞌidosona; shin Yihooway eti bantta giddon deꞌiya hara biitta asaa ‘bantta biittaa asadan’ xeellanaadan koyees. (Wog. 19:33, 34) Yihooway nu gubaaꞌiyan shiiqiya hara biitta asatussikka hegaadan qoppiyoogee qoncce. (Zaa. 10:17-19; Mil. 3:5, 6) Hara zare gidiyo gishshawu naaqqiyoogaa woy qaalaa dummatettaa gaasuwan eta gakkiya metuwaa wotti dentti qoppikko, nuuni etawu kehiyoonne qarettiyo ogiyaa koyoos.—1 PHe. 3:8. w16.10 1:3-5

Yaaqooba dabddaabbee tumu Kiristtaane ammanoy oosuwan qonccana bessiyoogaa qonccissees. I, “Neeni ne ammanuwaa ne oosuwaappe shaakkada tana bessa; taanikka ta ammanuwaa ta oosuwan nena bessana” yaagiis. (Yaaq. 2:18) Yaaqoobi coo ammaniyoogaanne ammanuwaa oosuwan bessiyoogaa giddon deꞌiya dummatettaa qoncciyan yootiis. Dayddanttati Xoossay deꞌiyoogaa ammanoosona; shin etawu tumu ammanoy baawa. Eti a keehi eqettoosona. (Yaaq. 2:19, 20) Hegaappe dumma ogiyan, beni deꞌida ammaniya hara uraabaa Yaaqoobi hagaadan giis: “Nu aawai Abrahaami ba na7aa Yisaaqa yarshshiyoosaa bolli wottido wode, ba oosuwan xillibeennee? A ammanoinne a oosoi issippe oottidoogaanne a ammanoi a oosuwan polettidoogaa be7ikkii?” (Yaaq. 2:21-23) Qassi ammanuwaa oosuwan bessana koshshiyoogaa loytti qonccissanawu Yaaqoobi gujjidi, hachi gallassa xiqisiyan deꞌiya qofaa yootiis. w16.10 4:8

Saynisee saluwaabaanne saꞌabaa darobaa qonccissiis; qassi nu deꞌuwan nuna dumma dumma ogiyan maaddiis. SHin saynisee zarana danddayibeenna daro oyshay deꞌees. Leemisuwawu, saloy waani merettidaakko woy nuuni saꞌan deꞌiyoy aybissakko saluwaa meretatubaa xannaꞌiyaageeti yootana danddayokkona. Qassi, xaaxi waaxin asay merinawu deꞌanawu amottiyoy aybissakko yootana danddayiya asi baawa. Zaaroy baynna keehi koshshiya daro oyshay deꞌiyoy aybissee? Amarida gaasoy daro saynttisttetinne hara asay Xoossay baawa giidi qoppiyo gishshataassanne lodda laamiyaa timirttiyaa tamaarissiyo gishshataassa. SHin ubbasan deꞌiya asay ba wozanan qoppiyo oyshatu zaaruwaa Yihooway ba maxaafan qonccissees. Nuuni Yihooway kessido laamettennanne ammanttiya meretaa higgiyan ammanettoos. Elekitirkiyaaranne bombbaara gayttidabaa oottiyaageeti, mandiseti, horoophiliyaa laaggiyaageeti, dottoreti eti ubbaykka he higgetun ammanettidi bantta oosuwaa oottoosona. w16.11 2:4, 5

Nuuni Yihoowa galatanaadan oottiya darobay deꞌees! Nuuyyo deꞌuwaa immiday a gidiyo gishshawu, i maaddennan paxa deꞌokko woy qaaxxokko. I keehi alꞌꞌo imota gidida ba maxaafaa, Geeshsha Maxaafaa nuussi immiis. Tasalonqqe Kiristtaaneti Xoossaa qaalaa ekkidoogaadan, nuuni he qaalaa Xoossaa kiitadan nashshidi ekkoos. (1 Tas. 2:13) Xoossaa Qaalay nuna maaddiyo gishshawu, Yihoowakko shiiqida; qassi ikka nuukko shiiqiis. (Yaaq. 4:8) Saluwan deꞌiya nu Aaway nuuyyo ba dirijjitiyaa yara gidiyo maalaalissiya maataa immiis. He ufayssiyaabaa nuuni keehi nashshoos! Mazamuraawee, “GODAA galatite! Aissi giikko, i keha, aggenna a siiqoi merinaagaa” yaagidi yexxiyoogan ufayssiya hanotan hegaadan nashshiis. (Maz. 136:1) “Aggenna a siiqoi merinaagaa” giya azmaachee Mazamure 136n, 26 sohuwan deꞌees. Nuuni Yihoowayyo ammanettikko, qassi i ba dirijjitiyaa baggaara nuuyyo immiyo kaaletuwaa kaallikko, i nuuyyo merinaa deꞌuwaa immana; qassi i merinawu nuuyyo ammanettana! w16.11 3:18, 19

Ha xiqisee Tumuppe Geeshsha Maxaafay Tamaarissiyoy Aybee? giyo maxaafan darosan deꞌees. Ha maxaafaa ne naata woy harata xannaꞌissiyo wode, Xoossay saꞌawu halchidobaa, wozuwaabaanne hayqqidaageetu hanotaabaa qonccissanawu Roome 5:12 nabbabennan aggakka; hegee shemppo 3n, 5⁠ninne 6n deꞌees. SHin neeni Yihoowa ufayssanawu oottiyoobaara, qassi demmanawu hidootiyoobaara gayttidaagan Roome 5:12 darotoo qoppay? Nuuni ubbaykka nagarancha gidiyoogee qoncce. Nuuni ubba wode baloos. SHin Xoossay nuuni biitta gidiyoogaa akeekeesinne nuuyyo qarettees; hegaa eriyoogee nuna minttettees. (Maz. 103:13, 14) Yesuusi tamaarissido woosan, “Nu naaquwaa atto ga” giidi Xoossaa wossanaadankka yootiis. (Luq. 11:2-4) Hegaa gishshawu, Xoossay nuuyyo atto giido nagaraa ubbatoo qoppiiddi unꞌꞌettana bessenna. Yihooway nuna waati atto giyaakko ane pilggoos. w16.12 1:1-3

Roomen deꞌiya Kiristtaaneti eti ubbatoo qoppiyoobay aybakko shaakki erana bessees. Eti ubbatoo qoppiyoobay ‘asatettaabeeshsha’? Nuunikka nubaa qoppiyoogee bessiyaaba. Nuna keehi ufayssiyaabay, qassi nuuni ubbatoo haasayana koyiyoobay aybee? Nuuni ubbatoo halchiyoobaynne oottiyoobay aybee? Issoti issoti ubbatoo qoppiyoy dumma dumma woyne eessaa uyiyoogaabaa, bantta keettaa alleeqissiyoogaabaa, paashine maayuwaabaa, daro wore demmiyoogaabaa, haaho heeri biidi allaxxanawu halchiyoogaabaanne hegaa mala haraba gidana danddayees. Ha allaalleti bantta huuphe iitaba gidokkona; asa deꞌuwan meeze gididabata. Leemisuwawu, issi wode Yesuusi haattaa woyne eessa oottiis; qassi PHawuloosi Ximootiyoosi “guutta woiniyaa eessaa” uyanaadan zoriis. (1 Xim. 5:23; Yoh. 2:3-11) SHin Yesuusinne PHawuloosi ubbatoo woyne eessaabaa ‘haasayidonaa, ubbatoo a uyidonaanne sabbidonaa’? CHiikka. Nuuni shin, ubbatoo qoppiyoobay aybee? w16.12 2:5, 10, 11

Yihooway gelido ha qaalay kasetidi Xoossaa Kawotettaanne a xillotettaa koyanaadan Yesuusi yootidobaa ammananaadan oottees. (Maa. 6:33) Kiitettida PHeexiroosi Yesuusa issitoo, “Nuuni nuuyyo de7iya ubbabaa aggi bayidi, nena kaallida; yaatidi nuuni ai demmaneeshsha?” yaagidi oychiis. (Maa. 19:27) PHeexiroosi hegaadan oychido gishshawu Yesuusi a seeriyoogaappe, ba erissiyo ashkkarati bantta goꞌꞌaa aggido gishshawu woytuwaa demmanaagaa yootiis. Kiitettidaageetinne ammanettida harati Yesuusaara saluwan haarana. Ubba ha wodiyankka demmiyo woytoy deꞌees. Yesuusi hagaadan giis: “Ta sunttaa gishshau, keettata woi ishantta woi michchentta, woi aawaa woi aayyiyo woi machchiyo, woi naata woi gadiyaa aggida ooninne, xeetu kushiyaappe dichchaa ekkana; qassi merinaa de7uwaakka laattana.” (Maa. 19:29) A erissiyo ashkkarati aggido, banttana goꞌꞌana danddayiya aybippenne keehi dariya anjjuwaa demmana. Ayyaanaaban demmiyo aawati, aayeti, ishati, michotinne naati nuuni Xoossaa Kawotettawu giidi aggido aybippenne keehi aadhokkonaa? w16.12 4:4, 5

Tumu Kiristtaanetussi keehi maalaalissiya hidootay deꞌees! Nuuni tiyettidaageeta gidin woy ‘hara dorssata’ gidin, Xoossay koyro halchidobay polettiininne Yihoowa sunttay geeyin beꞌanawu hidootan naagoos. (Yoh. 10:16; Maa. 6:9, 10) Hegee ooninne hidootan naagana koshshiyaaba. Nuuni ‘ooratta saluwaa’ bagga gidin woy ‘ooratta saꞌaa’ bagga gidin, Yihooway qaalaa gelido merinaa deꞌuwaa demmanawukka amottoos. (2 PHe. 3:13) Qassi Yihooway ha wurssetta gallassan ba asaa ubbatoo waatidi kaalettanaakkonne maaddanaakko beꞌanawu hidootan naagoos. Seexaanaa alamiyaa bagga gididaageetikka hidootan naagiyo darobay deꞌees; shin eti hegee polettanaagaa sirana danddayoosona. Leemisuwawu, ceeriyaa kaaꞌiya miilooniyan qoodettiyaageeti lotoree banttana gakkees giidi hidootan naagana danddayoosona; shin eti gakkanaagaa ammanettana danddayokkona. Hara baggaara qassi, tumu ammanoy Kiristtaaneti hidootan naagiyoobay ‘ammanttiyaaba’ gidiyoogaa erissiyaaba. w16.10 3:1, 2

Yihooway ba aaro kehatettan nuussi ubbaassi imotaa, aquwaa, eraa woy hiillaa immiis. Nuuni a bonchuwawunne harata maaddanawu hegeeta goꞌettana danddayoos. (Roo. 12:4-8) Yihooway haratussi oottiyo maataa nuussi immiyoogan nuna bonchiisinne ammaniis. SHin, Xoossay giigissidoban nuuyyo imettida sohoy tohettidaba mala gidenna. Takkidi laamettana danddayees. Yesuusa leemisuwaa qoppa. Koyro i Yihoowa xallaara deꞌiis. (Lee. 8:22) Hegaappe simmin, ayyaana meretata, saluwan saꞌan deꞌiya ubbabaanne wurssettan asaa medhiyoogan maaddiis. (Qol. 1:16) SHin guyyeppe Yesuusi saꞌan ooratta oosuwaa ekkidi, koyro ba huuphen aynne oottana danddayenna guutta naꞌa, guyyeppe qassi gastta asa gidiis. (Pili. 2:7) Yesuusi yarshsho gidi hayqqi simmidi, 1914n Xoossaa Kawotettaa Kawo gidanawu ayyaana mereta gididi saluwaa guyye simmiis. (Ibr. 2:9) Yesuusi SHaꞌu Layttaa Kawoti simmidi, ‘Xoossay ubbabaa wurssidi haaranaadan’ ba Kawotettaa Yihoowayyo sheedhana.—1 Qor. 15:28. w17.01 3:11, 12

Issi maccaasiyaa issibaa dooriyo wode ba laggiyawu hagaadan gaasu: “Tana qofissoppa; taani ay oottana bessiyaakko yoota. Hegee metennaba.” Ha maccaasiyaa o Medhidaagee immido alꞌꞌo imota gidida koyidobaa dooriyo maataa goꞌettiyoogaappe a ay oottanaakko bawu yootanaadan koyaasu. Neeni shin? Neeni ne huuphe kuuyanawu koyayiyye, woy harati neeyyo kuuyanaadan koyay? Neeni koyidobaa dooriyo maataa waata xeellay? Asay hegaa xeelliyaagan daro layttawu palamettiis. Issoti issoti Xoossay ubbabaa kasetidi kuuyido gishshawu koyidobaa dooriyo maati baawa goosona. Harati qassi koyidobaa doorana danddayiyoy ubbaban laꞌa gidiyoogaa xallaana goosona. Gidoppe attin, ha yohuwaa loytti akeekanawu Xoossaa Qaalaa pilggana koshshees. Aybissi? Geeshsha Maxaafay nuuni qoppidi nu huuphe kuuyana danddayiyo laꞌatettaa Yihooway nuussi immidi medhidoogaa yootees. w17.01 2:1, 2

Daawiti hegaa mala Xoossawu keexxiyo gita keettaa kaallidi polissanawu Solomoni danddayenna giidi qoppana danddayees. Ee, beeta maqidasee keehi ‘erettidaagaa’ gidana; Solomoni qassi “lammachchanne yelaga na7a.” Gidoppe attin, Solomoni bawu imettida oosuwaa polanaadan Yihooway a maaddanaagaa Daawiti eriis. Yaatiyo gishshawu, keehi daro miishshaa giigissiyoogan, Daawiti i ba huuphen maaddana danddayiyoobaa qoppiis. Hegaadan, cimida ishantti ha wodiyan bantta oosuwaa yelaga ishanttussi sheedhana bessiyo wode azzanana koshshenna. Aawatettaa ekkanaadan yelagata loohissiyoogee oosuwawu ubba keehi maaddees. Sunttettida ishantti eti oottiyo oosuwaa eti loohissido yelagati oottana danddayiyo wode keehi ufayttana koshshees. w17.01 5:8, 9

Yesuusi Xoossaa Kawotettaa Kawuwaa gididoogaadan, shooshshaa huuphiyaa qoxxana; qassi Seexaanaa makkalay kaalettido ubbabaa saluwaappenne saꞌaappe xayssana. Yesuusi saꞌan deꞌiyo wode, ba erissiyo ashkkarati Xoossaa Kawotettay ay keena koshshiyaabakko akeekanaadan maaddiis. Yesuusi xammaqettidi sohuwaara “Xoossaa kawotettaa wonggeliyaa mishiraachchuwaa” darosan yootiyoogaa doommiis. (Luq. 4:43) Yesuusi saluwaa baana haniiddi, ba erissiyo ashkkaratussi haasayido wurssetta haasayan eti ‘saꞌaa gaxaa gakkanaashin’ baassi markkattanaadan azaziis. (Oos. 1:6-8) Kawotettaabaa sabbakiyo oosuwan kumetta saꞌan deꞌiya asay wozuwaabaa erananne Xoossaa Kawotettawu haarettana danddayees. Ha wodiyan, kumetta saꞌan Kawotettaa mishiraachuwaa yootidi saꞌan deꞌiya Kiristtoosa ishantta maaddiyoogan Xoossaa Kawotettawu exatiyoogaa bessoos.—Maa. 24:14; 25:40. w17.02 2:7, 8

Beni gubaaꞌetun bolla gididi heemmiyaagawu aawatetti deꞌikkonne, eti banttana Kaalettiyaagee Yesuusa gidiyoogaa akeekidosona. “Nuuni siiqotettan, huuphe gidiya Kiristtoosakko ubbaban diccanawu bessees” giidi kiitettida PHawuloosi xaafiis. (Efi. 4:15) Yesuusi kiittido erettida asa sunttan xeesettiyoogaappe, kaalliyaageeti Xoossaa kaaletuwan ‘Kiristtaane geetettidi xeesettidosona.’ (Oos. 11:26) ‘Wogaa mintti naagiyoogee,’ woy kiitettidaageetinne kaalettiya hara attuma asati yootido Geeshsha Maxaafaa maaraa kaalliyoogee keehi koshshiyoogaa PHawuloosi akeekiis. Gidoppe attin, i gujjidi, “SHin Kiristtoosi [bolla gididi heemmiyaagaa yame ubbaa gujjin,] attumaasa ubbaayyo huuphe gidiyoogaa, . . . qassi Xoossai Kiristtoosassi huuphe gidiyoogaa intte erana mala koyais” yaagiis. (1 Qor. 11:2, 3) Yihooway ba Naꞌay, Kiristtoos Yesuusi gubaaꞌiyaa kaalettanaadan sunttidoogee qoncce. w17.02 4:7

Bonchana bessiyoogeeta bonchiyoogee nuuni nubaa xallaa qoppennaadan oottees. Hegee harati nuna bonchiyo wode, nuuni nubaa bessiyaabaa qoppanaadankka maaddees. Hegaadan oottiyoogee ammaniyaageeta gidin ammanennaageeta gidin bessiyaagaappe aattidi bonchenna Yihoowa dirijjitiyaara nuuni maayettidi deꞌanaadan maaddees. Hegaa bollikka nuuni bonchiyo uri nuna azzanttiyo wodekka nuuni xubettennaadan maaddees. Nuuni bonchana bessiyoogeeta bonchiyoogee Xoossaa ufayssees; hegee ubbaappe aadhiya gita anjjo. Nuuni oottanaadan i koyiyoobaa oottoos; qassi hegee awu ammanettidi deꞌanaadan oottees. Hegee Xoossay bana boriyaageetuyyo zaaruwaa immanaadan maaddees. (Lee. 27:11) Ha alamiyan harata bessiyaagaadan bonchenna asay kumiis. Yihooway nuuni harata i koyiyo ogiyan bonchanaadan tamaarissido gishshawu keehi ufayttoos. w17.03 1:13, 20, 21

Yoosaafixi asay Yihoowa koyanaadan ba aaway Asaagaadan minttettiis. Yihudaa katama ubban deꞌiya asaa ‘Yihoowa Higgiyaa Maxaafaappe’ tamaarissanaadan i ba asata kiittiis. (2 Odi. 17:7-10) Ubba qassi, i asaa ‘Yihoowakko zaaranawu’ huuphessa Israaꞌeela kawotettan deꞌiya Efireema gezziyaa gakkanaashin biis. (2 Odi. 19:4) Yihooway ha wodiyan oottissiiddi deꞌiyo tamaarissiyo gita oosuwaa nuuni ubbaykka oottana danddayoos. Neeni ubba wode harata Xoossaa Qaalaa tamaarissanawunne eti Xoossawu oottanaadan eta wozanaa denttettanawu halchadii? Hegaadan baaxetiyoogaaninne Yihooway anjjiyoogan Geeshsha Maxaafaa xinaatiyaa doomissana danddayaasa. Ne halchoy polettanaadan woossay? Neeni shemppanawu koyiyo saatiyankka gidin Geeshsha Maxaafaa xannaꞌanawu koyiya ura demmikko xannaꞌissanawu eeno guutee? Yoosaafixi asay tumu goynuwawu simmanaadan maaddanawu Efireema biittaa gakkanaashin biidoogaadan, nuunikka ayyaanaaban shuggidaageeta maaddanawu baaxetana danddayoos. w17.03 3:10, 11