Ichashe

Wurssetta gallassay wurana haniyo wodekka iitati kaseegaadan ‘maataadan diccana.’ (Maz. 92:7) Hegaa gishshawu, asaa kanddoy moorettiyoogee garamissenna. Hegaa mala alamiyan, nuuni “iita yohuwan yiira mala” gididi, “wozanaa qofan wozannaamata” waanidi gidana danddayiyoo? (1 Qor. 14:20) Ha oyshaa zaaroy hachchi gallassa xiqisiyan deꞌees. He xiqisiyaa shaahoy, “GODAASSI goinniyaageetussi ubbabaikka [woykko, Yihoowa ufayssiya ubbabaykka] gelees” yaagees. Yihooway “suuretussi maaddiya zoriyaa minjjees” giya Leemiso 2:7, 9⁠ykka hegaa mala qofaa yootees. Hegaappe denddidaagan, suureti “xillotettaa, suure pirddaa, suuretettaanne lo77o ooso ubbaa erana.” Nohee, Daaneelinne Iyyoobi aadhdhida eratettaa demmidosona. (Hiz. 14:14) Ha wodiyan deꞌiya Xoossaa asaykka hegaa mala aadhdhida eratettaa demmiis. Neeni shin? Yihoowa ufayssiya ‘ubbabaa’ akeekay? Hegawu koshshiya waannabay A loytti eriyoogaa. w18.02 8 ¶1-3

Issi uri xammaqettanaadan aaway, aayyiyaa, Geeshsha Maxaafaa xannaꞌissiya uri woy gubaaꞌiyan deꞌiya ooninne iisettana koshshenna. Hegee Yihooway koyiyooba gidenna. (1 Yoh. 4:8) SHin nuuni hegeeta xannaꞌissiyo wode Yihoowaara dabbotaa medhdhiyoogee keehi koshshiyoogaa mintti yootana bessees. Xannaꞌiya uri xammaqettanaadan denttettiyaabay tumaa wozanappe nashshiyoogaanne Kiristtaane erissiyo ashkkara gididi qambbaraa tookkanawu koyiyoogaa. (2 Qor. 5:14, 15) Issi uri xammaqettanawu gakkiyo layttay hagaa giyo wodee baawa. Xannaꞌiya ubbay ba hanotaadan dicceesinne wozannaamees. Issi uri xammaqettiyo gallassay tumuppe ufayttiyo wode. Qassikka, he gallassay akeekan qoppiyo wode. Issi uri bana geppidoogaadan deꞌanawu minnidi baaxetana koshshees. Issi Kiristtaanee erissiyo ashkkara gidiyoogaa Yesuusi qambbaraara geeddarssidoy hegaassa. Yesuusa kaalliyaageeti “bantta gishshau haiqqidaagaayyoonne qassi haiquwaappe denddidaagaayyo de7anaappe attin, sinttappe bantta huupheyyo” deꞌana bessenna.—2 Qor. 5:15; Maa. 16:24. w18.03 6-7 ¶14-17

Neeni imattanawu mammotta eray? Yaanikko, ufayssiya wodiyaa aattananne merinawu laggetiya asaa demmana danddayishin neeppe haliis. Imattiyoogee borasiyoogaa agganawu keehi maaddiyaabaappe issuwaa. SHin neeni, ‘Ay asinne imattanawu ayssi mammottanee?’ gaada qoppana danddayaasa. Hegawu daro gaasoy deꞌees. Hegaappe issoy, Yihoowa Markkatuyyo oosoy daro; qassi issotu issotuyyo dumma dumma aawatettay deꞌees. Amaridaageeti imattanawu banttawu wodee woy wolqqi baynnabaadan qoppana danddayoosona. Neeni hegaadan qoppikko, haꞌꞌi ne oottiyoobaa qorana danddayaasa. Neeni imattanawu woy imatettanawu wodiyaanne wolqqaa demmana mala giigissana danddayiyoobi deꞌii? Geeshsha Maxaafay Kiristtaaneti imattaa mokkanaadan zorees. Yaatiyo gishshawu, hegawu wodiyaa bazziyoogee bessiyaaba. Neeni darin koshshenna issi issibaa aggana danddayaasa. w18.03 16 ¶13-14

Ayyaanaabaa qoppiyoogan, ha saꞌan deꞌida asaa ubbaappe aadhdhiya leemisoy oonee? Hegee Yesuusa gidiyoogee qoncce. I ba deꞌuwaaninne haggaazuwan ba Aawaa Yihoowa milatana koyiyoogaa ubbatoo bessiis. I Yihoowaagaadan qoppiisinne oottiis; qassi Xoossaa sheniyaadaaninne A maaraadan deꞌiis. (Yoh. 8:29; 14:9; 15:10) Leemisuwawu, hananabaa yootiya Isiyaasi Yihoowa qaretaabaa woygidaakko akeeka; qassi Wonggeliyaa xaafidaageetuppe issoy Marqqoosi, Yesuusa qofaabaa yootidobaara hegaa geeddarssa. (Isi. 63:9; Mar. 6:34) Nuunikka maadoy koshshiyo asaara gayttiyo wode Yesuusaagaadan ubbatoo qarettiyoo? Hegaa bollikka, Yesuusi saꞌan deꞌido wode ubban mishiraachuwaa tamaarissiisinne yootiis. A hanotaynne I oottidobay ubbay I ayyaanaabaa qoppiyoogaa bessees. w18.02 21 ¶12

Naata dichchiyoogee ha wodiyan keehi deexxiyaaba. (2 Xim. 3:1-5) Naati yelettiyo wode iitaa kehaa shaakki erokkona; qassi eta kahay loohibeenna. Hegaa gishshawu, kahaa loohissanawu etassi seeray koshshees. (Roo. 2:14, 15) Issi Geeshsha Maxaafaa eranchchay “seeraa” geetettidi birshshettida Giriiketto qaalay “naatu dichchaa” woy aawatettaa ekkiyaageeta oottidi naata dichiyoogaakka geetettana danddayiyoogaa qonccissiis. Siiquwan seeriyo naati darotoo woppu goosona. Laꞌatettawu zaway deꞌiyoogaa, qassi eti kuuyiyoobaynne eta duussay loꞌꞌobaa woy iitabaa kaalettiyoogaa tamaaroosona. Qassi Kiristtaane aawatinne aayoti Yihoowa kaaletuwaa koyiyoogee keehi koshshiyaaba. Naata dichchiyoogaara gayttida qofaynne hiillay wogaappe wogan, qassi yeletaappe yeletan dummatiyoogaa dogoppite. Xoossay yootiyoobaa siyiya aawaynne aayyiyaa bantta naata waati dichchanaakko malan qoppana woy qassi ha alamiyaa aadhdhida eratettan ammanettana koshshenna. w18.03 30 ¶8-9

Neeni Xammaqettida yelaga Kiristtaane gidiyoogaadan, ne aawaanne aayee keettan deꞌikkokka, ne atotettawu koshshiyaabaa ne oottana bessees. Hegaa hassayana koshshiyoy aybissee? Panttatettaa wodiyan neeyyo siyettiyaabaynne nena metiyaabay kase erennaba gidana danddayees. Issi 18 laytta naꞌiyaa hagaadan gaasu: “Issi naꞌi timirtte keettan yeleta gallassaa bonchiyo wode keekkiyaa meenna gishshawu, Yihoowa Markka gidiyoogan darotoo azzanenna. SHin hegaappe amarida layttay aadhi simmin asho gaytotettaa amoy keehi wolqqaamiyo wode, Yihoowa higgiyawu azazettiyoogee ubbatoo loꞌꞌo gidiyoogaa i woy a mintti ammanana koshshees.” Gasttidi xammaqettidaageetussikka ammanuwaa paacciya qoppibeenna darobay gakkana danddayees. He paacee aqo deꞌuwaara, payyatettaara, woy oosuwaara gayttidaagaa gidana danddayees. Yelaga gidin gastta gidin, oonakka Yihoowawu ammanettiyoogaa bessana koshshiyaabay gakkees.—Yaaq. 1:12-14. w17.12 24 ¶4-5

Daawitaagaa keena iita naaqoy gakkido asay guutta. Gidikkokka, Xoossaa dabbo gidida I yiillotibeenna. Ubbakka I, “Hanqquwaa agga; yiilluwaappe teqetta. Yiillotoppa; aissi giikko, hegee metuwan yeggees” yaagiis. (Maz. 37:8) Nuuni “nu nagaraadan oottenna” Yihoowa milatanawu koyiyoogee hanqquwaa ‘aggana’ koshshiyo waanna gaaso. (Maz. 103:10) SHin hanqquwaa ‘aggiyoogee’ nunakka maaddees. Hanqqoy suuttay bolla giddon sugettiyo hanotay xoqqu gaanaadaaninne shemppiyoogaara gayttida sahuwaa sahettanaadan oottees. Qassi hegee tiriyaanne pankiriyaase giyo xiiꞌiyaa qohana danddayees; hegaadankka qumay maara liiqennaadan oottana danddayees. Nuuni hanqqettiyo wode, issi issitoo suure qoppokko. Hegaa bollikka, harata qohiyaabaa haasayana woy oottana danddayoos; hegee qassi adussa wodiyawu qofan unꞌꞌettanaadan oottana danddayees. SHin Geeshsha Maxaafay, “Woppu giida wozanai bollaa payya wottees” yaagees. (Lee. 14:30) Yaanin, lancciyoogaa aggidi nu ishaara waani sigettana danddayiyoo? Geeshsha Maxaafan deꞌiya aadhdhida eratetta zoriyaa oosuwan peeshshiyoogee hegawu maaddees. w18.01 10 ¶14-15

Daawiti hegaadan giidoy i mule hayqqennaagaa woy duufuwan gelennaagaa yootanaassa gidenna. Xoossaa Qaalay Daawiti ceeggidoogaa qonccissidi yootees. Hegaappe simmin i hayqqiis; i “haiqqidi, ba maizzan gaittiis; yaatidi Daawita Kataman moogettiis.” (1 Kaw. 2:1, 10) Yaatin, Mazamure 16:10y obaa yootii? Yesuusi hayqqidi denddin amarida saaminttaappe guyyiyan, Mazamure 16:10y obaa yootiyaakko PHeexiroosi shaꞌan qoodettiya Ayhudatussinne Ayhuda ammanuwawu laamettidaageetuussi haasayiis. (Oos. 2:29-32) I Daawiti hayqqidoogaanne moogettidoogaa yootiis. PHeexiroosi yootiyoobaa siyiyaageeti hegaa eroosona. PHeexiroosi Daawiti yaana Masiyaa “dendduwaa sinttau” xeellidoogaa yootiis. Qassi he asatuppe ooninne hegaa palamettidoogaa qonccissiyaabi xaafettibeenna. PHeexiroosi ba yohuwaa minttanawu Daawiti Mazamure 110:1n haasayidobaa yootiis. (Oos. 2:33-36) PHeexiroosi qonccissidoogee Yesuusi “Godanne Kiristtoosa” gidiyoogaa he cora asaa ammanttanawu maaddiis. Qassi he asay Yesuusi hayquwaappe denddido wode Mazamure 16:10y polettidoogaa akeekiis. w17.12 10 ¶10-12

Bolla Gididi Heemmiyaagee dirijjitiyaa miishshaa goꞌettiyoogan ammanettidaagaanne wozannaama. (Maa. 24:45) Bolla Gididi Heemmiyaagaa yarati loꞌꞌobaa kuuyanawu woossoosona, qassi eti miishshaa waati goꞌettanaakko loyttidi halchchoosona. (Luq. 14:28) Kiitettida PHawuloosi Yihudan deꞌiya qohettida ishantta maaddanawu miishshaa shiishshiis. I he miishshaa efiyaageetussi ‘Godaa sintta xalaalan loꞌꞌobaa oottiyaageeta gidennan, asa sinttankka loꞌꞌobaa oottanaadan’ yootiis. (2 Qor. 8:18-21) Ha wodiyan, nu dirijjitee Iziranne PHawuloosa leemisuwaa kaallees; qassi imettida miishshaa maara goꞌettees. (Izi. 8:24-33) Mata wodeppe haa simmin, ufayssiya oorattabay oosettiiddi deꞌees. Dirijjitee kaseegaadan miishshaa kessennan aggiyo ogiyaa koyees; qassi neeni kehatettan immiyo miishshaa loytti goꞌettidi danddayettida keenan darobaa oottanawu oosuwaa poxxees. w18.01 19-20 ¶12-13

Siiqoynne kehatettay nuuni issoy issuwawu atto gaanaadan maaddana danddayees. Leemisuwawu, issi Kiristtaanee haasayidoban woy oottidoban nuna qohidobadan nuuni qoppikko, haasayidoban woy oottidoban nuuni kehatettaa bessibeenna wodiyaa hassayiyoogee loꞌꞌo. Nu ishantti nuuyyo siiquwaaninne kehatettan atto giido gishshawu keehi galatoos! (Era. 7:21, 22) Nuuni tumu goynuwan nuna issippe shiishshida Kiristtoosa kehatettaa keehi nashshoos. Nuuni ubbay issi Xoossaa siiqoos, issi mala mishiraachuwaa yootoos, qassi nuna metiyaabaappe daroy issi mala. Nuuni kehatettaaninne siiquwan issoy issuwawu atto giyoogee Kiristtaane issippetettay minnanaadaaninne nuuni deꞌuwaa woytuwaa ubbatoo qoppanaadan nuna maaddees. Nuuni naagettanaadan Geeshsha Maxaafay yootiyoobay, qanaatiyoogee woytoy nuuppe halanaadan oottana danddayiyoogaa hassayissees. Leemisuwawu, Qaayeeli ba ishaa Aabeela qanaatidi woriis. Qoraahi, Daataaninne Abiiraami Muusa qanaatidi eqettidosona. Qassi Kawuwaa Saaꞌooli Daawiti demmidoban a qanaatidi woranawu maliis. w17.11 27 ¶9-10

Cimati pirdda konttiyan oottiyo wode, gita nagaraa oottidaagee ba nagaraappe simmidaakkonne eranawu akeekan pilggana bessees. Hegaadan oottiyoogee issi issitoo deexxiyaaba. Nagaraappe simmiyoogee izaawu qoppiyoobaara, awu siyettiyaabaaranne a wozanaa hanotaara gayttidaba. (Ajj. 3:3) Nagaraa oottida uri maarotaa demmanawu ba nagaraappe simmana bessees. Cimati asa wozanaa Yihoowaagaadaaninne Yesuusaagaadan erana danddayokkona. Yaatin, neeni cima gidikko, issi uri wozanappe ba nagaraappe simmidoogaa waatada erana danddayay? Koyruwan, aadhida eratettaanne akeekaa demmanawu woossa. (1 Kaw. 3:9) Naaꞌꞌanttuwan, “Xoossai koyiyo azzanoi,” woykko wozanappe nagaraappe simmiyoogee ‘saꞌaa azzanuwaappe’ waani dummatiyaakko shaakka eranawu nena maaddana mala Xoossaa Qaalaanne wozannaama ashkkaray giigissido xuufeta xannaꞌa. (2 Qor. 7:10, 11) Nagaraappe simmidaageetubaanne simmibeennaageetubaa Geeshsha Maxaafay waati qonccissiyaakko akeeka. Geeshsha Maxaafay etawu siyettiyaabaa, eta qofaanne eta eeshshaa waati qonccissii? w17.11 17 ¶16-17

Ha wodiyan, daro maxaafati, pilimetinne televizhiiniyaa prograameti naati banttana yelidaageetuyyo azazettennaagee suurenne ekettiyaaba milatissidi qonccissoosona. SHin yelidaageetuyyo azazettennaagee deretettawu denddo gidida so asay shugganaadan oottiyoogee tuma. Asay he tumaa beniisappekka erees. Beni Giriiken, issi naꞌi ba aawaa woy ba aayyiyo shocikko, deretettan ayyo maati baawa; Rooma higgiyan, aawa shociyoogee woriyoogaa keena wolqqaamaba. Ibraawetto Geeshshaa Maxaafaykka Giriiketto Geeshsha Maxaafaykka naati banttana yelidaageeta bonchchanaadan zorees. (Kes. 20:12; Efi. 6:1-3) Naati banttana yelidaageeti etawu oottidobaa wotti dentti qoppiyoogan azazettennan ixxiyoogaappe banttana naagana danddayoosona. Nu ubbaa Aaway, Xoossay nu awu azazettanaadan koyiyoogaa eriyoogee nashshiyaageeta gidanaadan maaddees. Yelagati banttana yelidaageetubaa loꞌꞌobaa haasayiyoogan, eta laggeti banttana yelidaageeta loytti bonchchanaadan maaddoosona. w18.01 29 ¶8-9

Ha wodiyan, gita nagaraa oottida issi Kiristtaanee zaarettidi minnanawu gubaaꞌe cimatu maaduwaa koyana bessees. Hegee keehi koshshiyoy aybissee? Koyruwan, Geeshsha Maxaafay yootiyoogaadan, gita nagaraa oottida ura cimati maaddanaadan hanotaa giigissiday Yihoowa. (Yaaq. 5:14-16) Naaꞌꞌanttuwan, nagaraappe simmida uri nagaraa meeze oottennan Xoossaa maaduwaa demmiiddi deꞌanaadan hegee a maaddees. (Gal. 6:1; Ibr. 12:11) Heezzanttuwan, cimati nagaraappe simmiyaageeta minttettanawunne azzaniyoogaa agganaadan eta maaddanawu sunttettidosonanne loohidosona. Yihooway he cimata “gotiyaappe baqatiyo soho” yaagees. (Isi. 32:2) Hegee Xoossay ba maarotan giigissidobaa gidiyoogee qoncce. Xoossaa ashkkaratuppe daroti cimatuppe maaduwaa koyidi demmiyoogee woppu gaanaadan oottiyoogaa akeekidosona. w17.11 10 ¶8-9

Nuuni keehi azzanikkokka, silkkiyan, kiitaa yeddiyoogan, dabddaabbiyaanne imeliyaa xaafiyoogan, woy Interneettiyan bohettida nu soo asaara mule gayttana bessenna. Gidikkokka, mule hidootaa qanxxoppa. Siiqoy Yihoowayyo goynniyoogaa aggida uri Yihoowakko simmiyoogaa gujjin “ubbabaikka hanana giidi, ufaissan naagees.” (1 Qor. 13:7) Bohettida ne soo asay ba qofaa laammiiddi deꞌiyoogaa akeekikko, i woy a Geeshsha Maxaafaappe minttettuwaa demmanaadaaninne Yihooway, “Taakko simma” giyo zoriyaa siyanaadan woossana danddayaasa. (Isi. 44:22) Yesuusi ay asappenne aattidi nuuni a siiqana bessiyoogaa yootiis. I ba erissiyo ashkkarati so asay eqettishinkka xalidi ayyo ammanettidi deꞌanaagaa erees. Neeni Yesuusa kaalliyoogee ne soo asaa giddon tooraa ehiidaba gidikko, he metuwaa xoonanaadan maaddana mala Yihoowan ammanetta. (Isi. 41:10, 13) Yihoowaynne Yesuusi nenan ufayttiyoogaa, qassi neeni ammanettada deꞌiyo gishshawu eti nena woytanaagaa erada ufaytta. w17.10 16 ¶19-21

Asay harggiya gaasuwaaninne cimatettaa gaasuwan waayettiyoogaa beꞌiyo wode qarettoos. Harggeenne cimatettay xayiyo wodiyaa beꞌanawu yeemottoos. Hegaa gishshawu, Xoossaa Kawotettay yaanaadan woossoos. He wodee gakkanaashin, maadoy koshshiyoogeeta maaddanawu nuussi danddayettidabaa oottoos. Issi xaafee Alzzaymer giyo harggiyan metootiya cimida ba aayeebaa yootidobaa ane beꞌoos. Issi galla a ba maayuwaa biittan mooraasu. A hegaa geeshshanawu malishin, karen asi xeegiis. Yiida asati o darotoo oychiya naaꞌꞌu Yihoowa Markkata. Michoti ootti maaddiyoobi deꞌiyaakkonne o oychidosona. Oychin a, “Yellayiyaaba, shin ee, deꞌees” yaagaasu. Eti hegaa meeccidi o maaddidosona. Eti iyyo shayiyaa penttissidi iira haasayiiddi takkidosona. I naꞌay eta keehi galatiis. I keehi galatidi, Yihoowa Markkati bantta ‘sabbakiyoogaadankka oottiyoogaa’ yootiis. Harggiya asawunne cima asawu qarettiyoogee eti bantta waayiyaappe woppu gaanaadan neeni neeyyo danddayettida ubbabaa oottanaadan denttettii?—Pil. 2:3, 4. w17.09 9 ¶5; 12 ¶14

Danddayettiyaaba gidikko, nu ishanttussi “geeman,” woy asa erissennan siiquwaa bessiyaabaa nu dosan oottana bessees. (Maa. 6:1-4) Qassi, nuuni kasetidi harata bonchana bessees. (Roo. 12:10) Yesuusi asay kariyo oosuwaa oottidi harata bonchiyoogan leemiso gidiis. (Yoh. 13:3-5, 12-15) Hegaadan nu huuphiyaa kawushshidi harata bonchanawu minnidi oottana bessees. Ubba qassi kiitettidaageeti geeshsha ayyaanaa ekkana gakkanaashin Yesuusi oottidobaa loytti akeekibookkona. (Yoh. 13:7) Nuuni nu tamaaridobaa, aquwaa, woy Yihoowawu haggaaziyo maataa bessiyaagaappe aattidi qoppennan aggiyoogan harata bonchiyoogaa bessana danddayoos. (Roo. 12:3) Nuuni etaagaadan bonchettana bessees woy oosettidaban nuunikka sabettana bessees giidi qoppikkonne, harati sabettiyo wode qanaatiyoogaappe etaara ufayttoos. w17.10 9 ¶9-10

Haggaazuwan Xoossaa Qaalaa goꞌettiyoogee mishiraachuwaa siyiya asaa keehi maaddana danddayoogaa daroti akeekidosona. Issi leemisuwaa beꞌa. Issi ishay daro layttawu nu maxeeteta nabbabida cima bitaniyaa zaaretti oychiis. Ishay mati kiyida Wochiyo Keelaa coo immiyoogaappe he maxeetiyan deꞌiya issi xiqisiyaa nabbabanawu koyiis. I 2 Qoronttoosa 1:3, 4 nabbabiis. He xiqisee, ‘Maarotettaa Aawaynne minttetto ubbaa Xoossay nu waaye ubban nuna minttettees’ yaagees. Bitanee he qofan keehi garamettido gishshawu, ishay he xiqisiyaa zaarettidi nabbabanaadan oychiis. Bitanee baassinne ba keettaayeessi minttettoy keehi koshshidoogaa yootiis; qassi Geeshsha Maxaafaabaa gujjidi eranawu koyiis. Xoossaa Qaalay nuna haggaazuwan keehi maaddees!—Oos. 19:20. w17.09 26 ¶9-10

Dabloosi hanidobay Xoossaayyo ammanettidi oottiya saluwan deꞌiya meretati dagammanaadan, yiillotanaadaaninne Dabloosa karanaadan oottennan aggenna. SHin Yihooway hanotaa giigissanawu dirbbibeenna. I oottana bessiyaabaa oottiis. I Seexaanaa makkalaa danddayidi suurebaa oottiis. (Kes. 34:6; Iyy. 2:2-6) Ayssi hegaa oottidee? Yihooway ubbay ‘ba nagaraappe simmanaadan koyiyo’ gishshawunne ooninne xayanaadan koyenna gishshawu amarida wodee aadhanaadan oottiis. (2 PHe. 3:9) Yihooway ba huuphiyaa naagido hanotaappe nuunikka haasayiyoobaaninne oottiyooban naagettana koshshiyoogaa tamaaroos; nuuni aybanne dirbban oottana koshshenna. Neeni issi gitabaa kuuyana bessiyo wode, eratettan kuuyanawu eesotana bessenna. Suurebaa haasayanawu woy oottanawu aadhida eratettaa immana mala woossa. (Maz. 141:3) Hanqetissiyaabay merettiyo wode, qoppennan issibaa haasayana woy oottana danddayoos. Daro asay eesotidi haasayidoban woy oottidoban zilꞌꞌettees!—Lee. 14:29; 15:28; 19:2. w17.09 4 ¶6-7

Qeese Ubbatu Halaqaa Yaasu huuphiyan kallachaa wottiyoogee a kawo oottii? Oottenna; Yaasu Daawita keettaa asaa gidenna gishshawu, kawo gidana danddayenna. I kallachaa wottidoogee sinttappe merinaa kawonne qeese gidiya urawu malaata. Kawo gidida qeese ubbatu halaqay Tashiyaa woykko Aacaa geetettiis. Geeshsha Maxaafay he Aacay Yesuus Kiristtoosa gidiyoogaa yootees. (Isi. 11:1; Maa. 2:23) Yesuusi Kawonne Qeese Ubbatu Halaqaa gidiyo gishshawu, saluwan deꞌiya Yihoowa olanchata kaalettiyay a. Xoossaa asay ha iita alamiyan deꞌikkokka, i eti saruwan deꞌanaadan minnidi oottees. (Erm. 23:5, 6) Mata wode, Kiristtoosi Xoossaa haaruwawu exatanawunne Yihoowa asaa ashshanawu kawotettata xooniya olanchata kaalettana. (Ajj. 17:12-14; 19:11, 14, 15) SHin he gallassaappe kase, Aacay woykko Yesuusi oottana gitabay deꞌees. w17.10 29 ¶12-14

Ne maayoy qitattidi, peenotikko waatuutee? Sohuwaara he maayuwaa qaaraasa. Hegaadan, Xoossaa eeshshaappe dummatiyaabaa qaaranaadan odettida azazuwaa nuuni sohuwaara azazettana koshshees. Nuuni PHawuloosi he wode deꞌida Kiristtaaneta, “Hageeta ubbaa intteppe xaissite” yaagidi zoridoogaadan deꞌanawu koyoos. PHawuloosi yootido nagaraa oosotuppe naaꞌꞌata, shaaramuxiyoogaanne tunatettaa ane beꞌoos. (Qol. 3:5-9) Issi uri i machibeenna maccaaseera, qassi attuma asi attuma asaara macca asi macca asaara zinꞌꞌiyoogee “shaaramuxiyoogaa” geetettida qaalawu Geeshsha Maxaafay koyro xaafettido doonan deꞌiya birshshettatuppe issuwaa. ‘SHaaramuxiyoogaara’ gayttidaagan PHawuloosi Kiristtaaneti ‘bantta’ bollaa qommota ‘worana’ bessiyoogaa yootiis. PHawuloosi yootidobay hegaa mala iita amuwaa agganawu keehi baaxetana koshshiyoogaa bessees. SHin baaxetidi nagaraa amuwaa xoonana danddayoos. w17.08 18 ¶5-6

Ha wodiyan nuna gakkiyaabay hananabaa yootiya Mikiyaasa wodiyaagaara issi mala. I iita Kawuwaa Akaazi haariyo wode deꞌiis; balibakkoy he wode ubbasan kumiis. Asay ‘iitabaa oottanawu loohi uttiis.’ (Mik. 7:1-3) Mikiyaasi he hanotaa laammana danddayennaagaa akeekiis. Mikiyaasaagaa mala ammanoy nuussi deꞌikko, nuuni Yihoowa nu dosan naagoos. Nu hanotay a worana gallassaa qasho keettan naagiya uraagaa mala gidenna. I wolqqan naagiyo gishshawu, he galla hananabaa yeemottidi naagenna. Nu hanotay hegaappe keehi dumma! Yihooway nuussi merinaa deꞌuwaa immanawu gelido qaalaa bessiya wodiyan, keehi loꞌꞌo wodiyan polanaagaa nuuni eriyo gishshawu, dosan a naagoos! Yaatiyo gishshawu, nuuni ‘ubbaban ufayssan genccoosinne danddayoos.’ (Qol. 1:11, 12) Nuuni naagiyo wode Yihooway eesotibeenna giidi amassalennaadan naagettoos. Nuuni amassalikko, i ufayttenna.—Qol. 3:12. w17.08 4 ¶6-7

Nuuni Yihoowa maaduwan waati goꞌettana danddayiyoo? Nuuni aara dabbotidi deꞌana koshshees. Aara dabbotidi deꞌanawu nuuni ashkke gidana bessees. (Sof. 2:3) Iitatettaanne pirdda pacaa ubbaa Xoossay xayssanaashin ashkketi danddayan naagoosona. Yihooway hegaa mala asata nashshees. Xoossay “iitata biittan duge olees.” (Maz. 147:6b) Hegaa malabay nu bolli gakkanaadan koyokko! Aggenna Yihoowa siiquwan goꞌettanawunne a hanqquwaappe attanawu, i ixxiyoobaa ixxana bessees. (Maz. 97:10) Leemisuwawu, shaaramuxaa ixxana bessees. Qassi pokkobaa beꞌiyoogaa gujjin shaaramuxanaadan denttettiya aybippenne haakkana koshshees. (Maz. 119:37; Maa. 5:28) Hegee keehi baaxeyiyaaba gidana danddayees; shin yaatiyoogee Yihoowa anjjuwaa demissiyo gishshawu, nuuni baaxetiyoogee bessiyaaba. Nuuni hegaadan baaxetiyo wode, Yihoowan ammanettana koshsheesippe attin nunan ammanettana koshshenna. Yihooway nuuni nu iita qofaa xoonanaadan maaddana mala zaari zaaridi oychana bessees. w17.07 19-20 ¶11-13

Kawotettaabaa oosuwaa maaddanawu asatettaabaa aquwaa goꞌettiyoogee nuuyyo deꞌiyaaban harata goꞌꞌiyaabaa oottanaadan maaddees. Asatettaabaa aqoy etawu deꞌikkokka, kumetta wodiyaa haggaazana woy sabbakanawu kare biitti baana danddayennaageeti eti immiyo miishshay harata bantta haggaazuwan goꞌꞌiyoogaa eridi ufayttana danddayoosona. Nuuni dosan immiyo miishshay ayyaanaabaa oosoy darin oosettiyo hiyyeesa biittatussi xuufiyaa gattanawunne sabbakiyo oosuwawu maaddees. Daro layttawu, Kongo, Madagaskkaarenne, Ruwandda mala biittatun issi Geeshsha Maxaafaa shammiyo waagay issi uri saaminttan woy aginan oottidi demmiyo miishshaara issi lagge gidiyo gishshawu, ishantti darotoo bantta so asawu kattaa shammiyoogaappenne Geeshsha Maxaafaa shammiyoogaappe issuwaa doorana koshshees. Asay oosuwaa maaddanawu immiyo miishshaa Yihoowa dirijjitee maara goꞌettiyo gishshawu, Geeshsha Maxaafay birshshettidinne attamettidi Yihoowa Markkatu ubbawu, qassi ayyaanaabaa eranawu koyiya Geeshsha Maxaafaa xinaatetuyyo gakkees.—2 Qor. 8:13-15. w17.07 9 ¶11

Ammanettiyoogee keehi koshshiyoogaa wotti dentti qoppiyoogee nuna maaddiyoy aybissee? Nu bolli metoy gakkiyoogee maaddiyoobay deꞌees. Hegee Yihooway nunan azzanidoogaa bessiyaaba gidennan, Xoossay ubbabaa haariyo maatawu nuuni exatiyaakkonne bessanawu maaddiyaaba. Nuuni ammanettikkonne genccikko, Yihoowa ufayssoos; qassi nuuni sinttappe demmanabaa mintti ammanoos. (Roo. 5:3-5) Iyyooba taarikee “Godai maarotainne qaretai kumidoogaa” gidiyoogaa bessees. (Yaaq. 5:11) Hegaa gishshawu, Xoossay ubbabaa haariyo maatawu exatiya nunakka haratakka anjjanaagaa ammanettana danddayoos. Hegaa eriyoogee nuuni “ufaissan genccanaadaaninne danddayanaadan” maaddees. (Qol. 1:11) Yihoowa haaroy suure gidiyoogee erettiyoogaabaa ubbatoo qoppiyoogee metana danddayees. Yaatiyo gishshawu, metiyaabay nuna gakkiyo wode Xoossay ubbabaa haariyo maatawu exatiyoogee ay keena koshshiyaabakko ubbatoo hassayana bessees. w17.06 26 ¶15-16

Ha wodiyan daro asay ooratta maayuwaa, elektiroonike miishshaanne hegaa malabaa demmanawu bichaarees. Yaatiyo gishshawu, issi Kiristtaanee kaallidi deꞌiyaagaadan bana oychiyoogan ba koyiyoobaa ubbatoo qorana koshshees: ‘Taani gubaaꞌiyaa shiiquwawu giigettiyoogaappe aaruwan ooratta kaamiyaabaa woy ooratta paashiniyaabaa eranawu koyiyoogaaninne qoppiyoogan daro wodiyaa aattada aquwaabaa keehi xoqqu ootta xeelliyoogaa bessiyaanaa? Taani galla galla deꞌuwawu keehi bichaariyoogan woossanawu woy Geeshsha Maxaafaa nabbabanawu bazzido wodee keehi guuttee?’ Nuuni aquwaabaa siiqiyoogaa Kiristtoosa siiqiyoogaappe xoqqu oottidi xeelliyoogaadan nuuyyo siyettikko, hachchi gallassa xiqisiyan Yesuusi yootido qofaa wotti denttidi qoppana koshshees. Yesuusi “naa77u godatuyyo haarettanau danddayiyai ooninne” baynnaagaa yootiis. I gujjidi, “Xoossaassinne miishshaassi haarettanau danddayekketa” yaagiis. Hagaadan yootidoy naaꞌꞌu ‘godatikka’ banttawu muleera aqiyoogaa koyiyo gishshataassa. (Maa. 6: 24) Nuuni nagarancha asa gidiyo gishshawu, aquwaabaa gujjin, ‘asatettaa amuwaa’ agganawu ubbay muletoo baaxetana koshshees.—Efi. 2:3. w17.05 25-26 ¶15-16

Nuuni urqqaappe merettida nagarancha asa gidikkonne, nuuni sabbakiyo mishiraachoy nuuyyoonne nuuni yootiyoogaa siyiyaageetuyyo merinaa deꞌuwaa demissana danddayees. PHawuloosi haggaazuwaa siiqiyoogee i minnidi erissiyo ashkkara oottanaadan denttettiis. (Roo. 1:14, 15; 2 Xim. 4:2) Hegee i wolqqaama yedetaa genccanaadan maaddiis. (1 Tas. 2:2) Nuuni haggaazuwaa keehi siiqiyoogaa waati bessana danddayiyoo? PHawuloosi sabbakana danddayiyo wode ubban haratuyyo sabbakiyoogan haggaazuwaa nashshiyoogaa bessiis. Yesuusi kiittidoogeetudaaninne beni Kiristtaanetudan, nuuni haggaazuwaa kiyennan, dabaabaaninne sooppe soo biidi sabbakoos. (Oos. 5:42; 20:20) Nu hanotay injjetikko, kaafiya aqinye woy kumetta wodiyaa aqinye gididi kaseegaappe loytti haggaazana danddayoos. Nuuni sabbakanawu hara qaalaa tamaarana, nu biittan harasaa baana woy hara biitti baana danddayoos.—Oos. 16:9, 10. w17.06 10-11 ¶8-9

Ha alamiyan hanettiya iitabaappe dariya baggay amarida asatu ooso gidennan, dirijjitetu ooso. Xoossaa oonatettaa, Geeshsha Maxaafay ammanttiyaaba gidiyoogaa, saꞌawunne asawu sinttappe hananabaanne daro hara yohota xeelliyaagan miilooniyan qoodettiya asaa balettiya haymaanoote dirijjiteta qoppa. Qassi olawunne dumma dumma zariyaa giddon denddiya kobabawu gaaso gidiya, hiyyeesatanne miyyee baynnaageeta huqqunniya, maganxxuwaaninne somꞌꞌo xeelli pirddiyoogan naanida kawotettati shin? Hara asawu qoppennan heeraa mooriya, meretan deꞌiya aquwaa wurssiyaanne miilooniyan qoodettiyaageeti hiyyeesatettan waayettiyo wode amaridaageeti keehi duretanaadan oottanawu shammiya asaa cimmiya yaaretiya zalꞌꞌe dirijjiteti shin? Kawotettatinne etan zemppiya dirijjiteti ubbay, qassi etawu exatidi Xoossaa Kawotettaa bolli denddiya asay ubbay bantta eqqosaappe qaaxxanaagaa woykko xayanaagaa Xoossaa Qaalay kasetidi yootiis.—Erm. 25:31-33. w17.04 2 ¶7-8

‘Wozanaa paacciya’ Yihooway Akaaba maariis. (Lee. 17:3) Akaabi oottido kobabaa eriya asay hegaa siyidi waanidee? Yihooway koyro pirddidobay attidaba milatin, Naabute dabbotunne laggetu ammanoy paacettennan aggenna. Eta hanotay hegaadaana gidikko, eti bantta huuphiyaa kawushshiyoogee bantta Xoossay pirddaa geellayennaagaa ammanidi eti ubbatoo Yihoowayyo ammanettidi goynnanaadan oottana. (Zaa. 32:3, 4) Naabutee, a naatinne a soo asay Yihooway xillota hayquwaappe denttiyo wode suure pirddaa demmana. (Iyy. 14:14, 15; Yoh. 5:28, 29) Qassi ba huuphiyaa kawushshiya uri “Xoossai ooso ubbaa bollan, qassi geemmida yoho ubbaa bollan, lo77o gidin, iita gidinkka pirddanau” deꞌiyoogaa hassayees. (Era. 12:14) Ee, Yihooway pirddiyo wode nuuyyo geemmida yohuwaakka qoppees. Hegaa gishshawu, issi uri ba huuphiyaa kawushshiyoogee ayyaanaaban i qohettennaadan maaddees. w17.04 24 ¶8-9

Ha alamiyan gakkiya metuwaappe denddidaagan, nu ishatuppe daroti bete gidi deꞌoosona. Issi issibaa meezetanaagee metiyaaba gidana danddayees. Ooratta qaalaa tamaariyoogaa, qassi dumma dumma maaraa, saatiyaa naagiyoogaa, qaraxaa qanxxiyoogaa, goꞌettidobawu miishshaa qanxxiyoogaa, tamaariyoogaanne naata seeriyoogaa xeelliyaagan ooratta higgiyaanne wogaa issi kutti meezetanawu baaxetiyoogaa qoppa! Hegaa mala metoy gakkiyo ishanttanne michontta danddayaaninne bonchuwan maadduutee? (Pili. 2:3, 4) Qassi, sunttati issi issitoo he ishantti gubaaꞌiyaara gayttanawu metootanaadan oottoosona. Nu ishantti shiiquwaa shiiqennaadan diggiya oosuwaa oottennan ixxikko, eta maaddokko woy etawu deꞌiyoosaa immokko giidi issi issi dirijjiteti yashissoosona. Amarida ishantti yayyidi hegan xoonettidosona. Hegaa gishshawu, betidi yiida nu ishantti gakkosaara etaara gayttiyoogee keehi koshshiyaaba. Nuuni etawu qoppiyoogaa eti erana koshshees. Nuuni qarettiyoogeenne maaddiyoogee eta ammanuwaa minttana danddayees.—Lee. 12:25. w17.05 5 ¶9-10

Yesuusi “wodiyaa wurssettaayyo” malaata gidana giidobaappe issoy “daro asaa siiqoi [irxxanaagaa].” (Maa. 24:3) Koyro xeetu layttan, banttana Xoossaa asa giya Ayhudati eti Xoossaa siiqiyo siiqoy irxxanaadan oottidosona. SHin, he wode deꞌiya daro Kiristtaaneti ubbatoo ‘Kiristtoosabaa mishiraachuwaa yootoosonanne’ Xoossaa, bantta mala Kiristtaanetanne ammanennaageeta siiqoosona. (Oos. 2:44-47; 5:42) Gidoppe attin, koyro xeetu layttan Yesuusa kaalliyaageetuppe amaridaageeti bantta siiqoy irxxanaadan oottidosona. Hayquwaappe denddida Yesuus Kiristtoosi koyro xeetu layttan Efisoonan deꞌiya Kiristtaanetuyyo, “Taani nena boriyoobi de7ees; aissi giikko, neeni kase ne siiquwaa aggadasa” yaagiis. (Ajj. 2:4) Hegawu issi gaasoy ayba gidana danddayii? Beni Kiristtoosa kaalliya hegeeti asatettaabaa qoppiya alamiyan qohettennan waayi aggana.—Efi. 2:2, 3. w17.05 17 ¶1-3

Daannaa Yofttaahee wolqqaama ola gadaawa, qassi mino olancha. Haanna qassi ba keettaa loytta oyqqiyaanne ba huuphiyaa kawushshiya macho. Eti naaꞌꞌaykka Yihoowawu goynnoosona. Eti issi mala gidido harabaykka deꞌees. Eti naaꞌꞌaykka Xoossawu shiiqettidobaa polidosona. Ha wodiyan issibaa oottanawu Yihoowawu qaalaa geliya asawu eti loꞌꞌo leemiso. Geeshsha Maxaafay, geppiyoogee Xoossaa sinttan qaalaa geliyoogaa gidiyoogaa yootees. Issi uri issibaa oottanawu, issibaa immanawu, issi qommo haggaazuwaa haggaazanawu, woy qassi issibaa oottennan agganawu qaalaa gelees. Hegee izaawu ba dosan qaalaa geliyooba. SHin issi uri hegaadan oottikko, Yihooway hegaa xoqqu oottidi xeellees; qassi he uri ba gelido qaalaa polanaadan koyees. Qaalaa geliyoogee issibaa oottanawu woy oottennan agganawu caaqqiyoogaa keena wolqqaamaaba gidiyoogaa Geeshsha Maxaafay yootees.—Doo. 14:22, 23; Ibr. 6:16, 17. w17.04 3 ¶1-2